———-
General hruaitute Programme :
February ni 27 atanga March ni 1, Pathianni hmang hian UPC-North East India hnuaia District te chuan Distirct Conference an hmang a, General hruaituten hetiangin an hmanpui :
General Superintendent Rev. Lalmalsawma Sailo chuan North Mizoram District ten Chaltlang Biala an neihah a hmanpui a. Lunglei District te chuan District Conference hi Lunglei District Hqrs Biak in, Chanmari ah an hmang a, General Secretary Rev. R. Lalrinsanga’n a hmanpui a. Barak District ten Balaram ah hmang mekin General Treasurer Rev. Zohmingthanzama’n a hmanpui bawk.
General Missions Director Rev. R. Lalhawia chuan North Bengal and Sikkim Missions Field Confernce a hmanpui a, General Sunday School Director Rev. R. Laichhingpuia chuan Darlawn Bial Sunday School Seminar cum Revival Programme ah speaker-ah tangin rawngbawlna a nei bawk.
————
District hrang hrang rawngbawlna chanchin :
Lunglei District :
Feb.27 nilaithawhtan zan atang khan ‘Thlarauvah awm rawh u’ Galatia 5:16 tih thupui ah hmangin Lunglei District UPC Conference vawi 55-na chu Headquarters Local biak in Chanmari-III ah hman mek ni a, Rev.C.Vanlalena, District Superintendent chuan he inkhawmpui hi a hawng. He inkhawmpui hi General Superintendent aiawhin General Secretary Rev.R.Lalrinsanga chuan a hmanpui.
Feb.28 zirtawpni khan District Sunday School Department chuan Headquarters biak inah rorelna an nei a, District PYD chuan District Conference Hall-ah rorelna hi an nei bawk. Tin, Feb.29 inrinni khan kohhranpui chuan biak inah rorelna an nei ve bawk a, District kohhranpui hruaitu thlanna neih chhunzawm a ni bawk a ni. He inkhawmpuiah hian General Secretary Rev.R.Lalrinsanga, Hnahthial bialtu Pastor Rev.VL.Hmuaka, Chawngte bialtu Pastor Rev.B.Kamliana leh Headquarters bialtu Pastor Rev.C.Hmingthanfala ten thusawi rawngbawlna an nei a, Lunglei District PYD Choir bakah Haulawng bial PYD, Luangmual bial PYD, Headquarters bial PYD, Rahsiveng bial PYD leh Pukpui bial PYD zaipawl ten zaiin rawngbawlna an nei ang a, malzai thiam tak tak an zai bawk a, March ni 1 Pathianni zan thleng inkhawmpui hi hman a ni ang.
————
Bial PYD Conference :
District P.Y.D. Board-in bial P.Y.D. Conf.a hranga nei tur ten a rual tlangin Dt.21-23.Feb.2020 chhungin hmang se a lo tih angin bial P.Y.D. Conference chu a rual tlangin hman a ni a, hetiang hi bial hrang hrang ten inkhawmpui an hman dan Report a ni.
– HEADQUARTERS BIAL : Electric biak inah bial P.Y.D. Inkhawmpui vawi 41-na hi neih a ni a, Speaker atan Chengpui Home Missionary Evan.Simona Hmar chu an hmang. Hlim takin hun an hmang a, Feb.24 thawhtan zan thleng khan hun an hmang chhunzawm a ni. An rorel tlangpuite:
i. Section P.Y.D. Inkaihhruaina Dan siamthat te approve a ni.
ii. Section huapin Revival Crusade neih nise
iii. Bial P.Y.D. in kumin chhunga Bible chhiarchhuakte hnenah lawmman pek nise.
– LUANGMUAL BIAL : Lunglawn Zaia veng biak inah inkhawmpui vawi 21-na hi an hmang a, Speaker atan bialtu Pastor Rev.Lalbiakdika Chawhte chu hmangin, Thupui atan ‘Thlarauvah awm rawh u’ Galatia 5:16 chu hman a ni a, an rorel langsar zualte:
i. Thuleh awm hma atan kumtin Missionary pakhat chawm nise.
ii. Kumin chhungin Hoarding Board siam nise
iii. Tirhkohte Thiltih atangin Bible ralchhan buatsaih nise.
iv. Bial huapin Advance Christmas hman nise.
– THEIRIAT BIAL : Zobawk vengthar biak inah Theiriat bial Conference vawi 27-na hi hman a ni a, Speaker atan Thingsai bialtu Pastor H.Lallawmsanga chu hman a ni a, thupui atan ‘Krista tana sengkhawm’ tih chu hman a ni . Lunglei District P.Y.D. Choir-te chuan Feb.23 Pathianni zingah zaiin rawngbawlna an nei bawk. An rorel tlangpuite:
i. Pastor Quarters tih changtlunna tur a hmalak
ii. Target tlak hmasa lawmman siam
iii. Bial chhunga P.Y.D. Member boral an awmin bial chhung P.Y.D. Members ten in tawiawm thin nise.
iv. Kumin chhungin Missionary 1 chawm ve nise.
v. Kumin chhungin bial chhung Local in tlawh kual nise
vi. Bial huapin bial P.Y.D. ten ruihhlo ngaite pual a Bethel neih
vii. Nakum bial Conference hmun atan Theiriat Local a ni ang.
– RAHSIVENG BIAL : Venghlun biak inah an bial P.Y.D. inkhawmpui vawi 36-na hi an nei a, Speaker hran nei loin bial hruaitute bakah District P.Y.D. hruaituten thu an in sawi chhawk a ni. An rorel langsar zualte:
i. Missionary thlatin Rs.1000 a Support.
ii. Pastor Quaters ami Dining Table chei that leh Dining chair 6 dah.
iii. Bible ralchhan , Rom, Korinth I&II hmangin neih nise.
iv. Conference Rotation a kal ve tawh nise
v. Conference dawltu puihna Rs. 10000 ni tawh se.
– PUKPUI BIAL : Venglai Local biak inah Pukpui bial inkhawmpui vawi 35-na hi neih a ni a, Speaker atan Rev.R.Lalrosanga, Former District Superintendent chu hman a ni a, thupui atan Harhna dik tih chu hman a ni. An rorel tlangpuite:
i. Kum 2021 ah Missionary pahnih (Rs 24000) in support leh nise.
ii. Kum 2020 hian Bial Sports cum Revival neih nise.
iii. Kum 2020 hian Bial P.Y.D. hmingin CEC School tanpui nise
iv. Bial P.Y.D. member bible chhiarchhuakte lawmman pek leh nise.
v. Bial P.Y.D. hmingin Pastor Quarters-ah Centre Table dah nise.
vi. Khawmpui dawltu tanpui na Rs 20000 ni tawh se.
Bial hrang hrangte hian District-a thlen tur thu pawimawh tak tak an ngaihtuah bawk.
Heng bial inkhawmpui hmangte hi District P.Y.D. hruaitute chuan hmun hrang hrangah insem darhin an hmanpui a ni.
——–
Distirct LAD :
Feb.28 zirtawp zan atang khan Chhimtuipui District L.A.D. Conference vawi 44-na chu Sangau-I ah neih a ni a, he hun hmanpui tur hian Lunglei District L.A.D. President Sist.Lalramlawmi Sailo B.W. leh District L.A.D. Vice President Sist. H.Biakngengi te bakah bial hruaitu thenkhatte nen mi 8 an kal a ni.General L.A.D. rorelin District hrang hrangte in palai tawn nise alo tih bawhzuina atan Lunglei District L.A.D. hruaitute hian Chhimtuipui District L.A..D Conference hi an hmanpui a ni.
——
Joint Conf :
Feb.27-1 March chhung khan Haulawng bial P.Y.D. leh L.A.D. Joint Conference chu Haulawng Lamthuamthum Local-ah neih a ni a, rorel langsar zualte:
1. L.A.D.: – Local hruaitu hlun chawimawina bial hminga pek nise.
-NEI chhunga Missionary-te pualin nikhat tawngtaisakna hun hman nise.
-Fellowship Cum Seminar buatsaih
– Target pe tlak hmasa lawmman siam
2. P.Y.D. : – Bial P.Y.D. Sport Meet neih
– Solfa Training buatsaih
– Blood Donation Camp buatsaih
– Dist.leh Section Target tlak hmasa lawmman siam
– Bial chhung Local intlawh tawn nise
– Project neih mek ennawn a ni a, Amplispeaker lei nise tih a ni.
– Bial P.Y.D. Zaipawl pualin Local tinin sumtuak fehchhuahna neih nise.
———-
Chhimtuipui District :
Dist LAD Conference :
Feb ni 28 atanga March ni 1 chhung hian Chhimtuipui Dist LAD Conference vawi 44 na, Sangau I local hman mek a ni.
He conference ah hian Evan Robert B Lalnunsiama T home missionary chu speaker atana hman a ni a, “Kan thlen chin atang khan hma isawn zel ang u” tih thupuiah an hmang.
———–
Chawimawina hlan :
College Veng local, Siaha techuan Feb ni 25, Pathianni khan Kum 38 lai chawlh miah lova Local Chairman lo ni tawh Evan V.John chu chawimawina Citation an hlan. Hemi rual hian Pi Mankungi B/W chu kum lamte alo upat tawh avangin chawlh (pension) a dil a hemi ni bawk hian ropui taka chawimawina nen thlah a ni.
Tin, hemi ni hian Kohhran tana Rawngbawltu laktharte mi pathum te nemnghehna leh tawngtaisakna hun hman an hmang nghal bawk.
Rawngbawltu laktharte :
1.Rbt.M.Chiadung.
2.Rbt.C.Sangmawng.
3.Rbt.Vanlallawma te an ni.
———-
Tranining :
Feb ni 22, Inrinni khan Sangau II local, sangau bial ah Bial PYD hmalakna in Leadership trainining neih a ni.
He hunah hian Pastor K Kawngkharmawia sectional pastor leh Rbt L Khuangpari te chu resources person atan an hmang a, zawhna leh chhanna hun hlawkthlak tan an hmang bawk.
———–
Hruaitu thar :
Feb ni 23, Pathianni khan Chhimtuipui District chhunga Pensioner Union in ruat thar na an neih ani, hruaitu atana ruat te:-
1. Chairman: Rev. C. Valy
2. Secretary: Rev. H. C. Mangliana
3. Treasurer: Rev. Thanchunga Sailo
———-
Lawngtlai West District :
Crusade :
Vathuampui bial missions department buatsaihin Feb ni 21-23 chhung khan Saibawh khua ah crusade an buatsaih a, Speaker atan Pastor B. Lalbiakchhunga hman a ni.
He hmunah hian mual inkhawm buatsaihin Vathuampui bial chhung Local hrang hrang atangin mi 22 vel kal khawmin he Crusade hi an hmanpui a ni.
———
District hruaitute Pathianni programme :
District Superintendent Rev.R Ramthatzawla – District hqrs Kohhranah.
District Secretary Pastor Lalsawmliana Sailo – Mampui Local ah
District Mision Director Rev F Lalbiakthuama – Chandmary Kohhranah
————
North Mizoram District :
Platinum Jubilee ;
North Mizoram District in kum 70 a tlinna Platinum Jubilee lawmna Programme February ni 18 chhun leh zan atanga Headquarters Biak in, Tuikhuahtlang a neih tluang taka hmang chhovi’n Feb ni 25 thawhlehni khan khar a ni.
Tarlan tawh angin he Platinum Jubilee lawmna Programme hi Mizorama UPC a dinni Feb ni 18-khan hman tan a ni a, Biak in kawtah Biak in pawn Programme nei hmasain Rev. K. Lalduhsanga, Orgn. Chairman in a kaihruai a, Jubilee Choir ten Jubillee hawnna hla sain, Jubillee lungphum UPC-North East India General Supdt. Rev. Lalmalsawma Sailo in a nei a, Rev. LalMalsawma hian “Jubilee thiltum laimu chu Inngaihdamna a ni tiin; North Mizoram District chu Thianghlimna kawngah te, Sum leh Phai thehchhuah kawngah te leh ramlakna rawngbawlnaa thahnem ngai zual turin a fuih a. A thusawiah Mizoram Pentecost mite bul lo intan dan tarlangin, North Mizoram District chu North East India Unit tana Mother Church Distric tia koh thin chu thil awm tak a nih chu a sawi bawk. Hemi hnu hian Platinum Jubillee dar vawi 70 vuak niin; North East India huapa rawngbawltu pawimawh leh challang tak tak, North Mizoram District Hruaitu, District Department hruaitu leh Pensioner ten Platinum Jubilee dar hi an vua a ni.
Dar vuak zawhah Biak in chhung Prog hman chhunzawmin Rev. Chhiarpuia, District Secretary in Programme a kaihruai a, Platinum Jubillee Souvenir chu Rev. Zohmingthanzama UPC-NEI Gen. Treasurer chuan tlangzarhin. Platinum Jubilee Meichher Rev. C. Lalmuanpuia, Former Dist. Supdt. Kolasib Diakkawn Bial mektu chuan a chhi a, District Choir leh General Choir te an zai bakah Thuchah leh thusawi Rev. Laltluanga, District Superintendent, Rev.R.Lalrinsanga, General Secretary, Rev.C.Lianchama. Former Dist. Supdt hnen atang tein ngaihthlak a ni bawk a, Hqrs. Kohhran Church Board Secretary Upa C. Lalnunmawia hnen atangin North Mizoram District chanchin leh Headquarters Kohhran chanchin a sawi ngaihawm tak ngaihthlak a ni bawk.
Jubilee lawmnaah hian Pentecost zai mi hmasa Sist. Lalrinawmi leh Sist. Lalchhanhimi Ralte ten zaiin fak hla an sa a, Kohhranhote’n an hlut hle a, Tlaiah Jubillee lawmna ruai kil ho ni.
Platinum Jubilee hman Programme hi Feb ni ni 19 Nilai zan atang khan Department Nite-a hman chhunzawm niin; District PYD in bul an tan a, Feb ni 19 zanah LAD, Feb ni 20 Zirtawp zanah District Sunday Dept, Feb ni 22 zan -ah District Missions Department ten anmahni pual Programme an hmang a, Feb ni 23 atanga 25 zan thleng Platinum Jubilee Organising in Programme la lehin rawngbawltu kal hmasa te pual hun hmangin Feb ni 25 Thawhleh zan khan North Mizoram District in Platinum Jubilee a thlen lawmna Programme chu khar a ni ta a ni.
Jubilee kharna inkhawm hi Jubilee Organising Chairman Rev. k. Lalduhsanga’n a kaihruai a, Chawlhhmun Bial LAD Zaipawl, District PYD Choir, General PYD Choir, Headquarters Bial LAD Zaipawl bakah Malzai nung taka fak hla sak te ngaihthlak a ni a, thuchah ngaihnawm tak tak Former Gen. Supdt. Rev. VL Dika Sailo, NEI UPC Gen. Supdt. Rev. Lalmalsawma Sailo, leh North Mizoram District Secretary Rev. Chhiarpuia ten hun pek an nih angin an sawi a, Pathian thu hriltu Rev. C. Lianchama hnen atangin Jubilee puala thuchah ropui tak “Lungawina nena Lalpa rawngbawl” tih thu a sawi ngaihthlak niin; Pentecost rawngbawltute hian kan rawngbawlpuite harsatna siam i hlau ang u’ a ti a ni.
Jubilee lawmna inkhawm khar zanah hian Pathian fakna hlapui zaipawl zai atang te leh Malsawm tawngtaina atangtea sa chhunzawmin; hlim leh ui tak chungin North Mizoram Platinum Jubilee lawmna chu khar a ni ta a ni.
———
District Conference :
North Mizoram Dist. Conference vawi-70-na, Platinum Jubilee Conference chu Feb ni 27 Ningani zan atang khan Cultural Centre bawngkawn South-ah hman tan a ni.
Conference Thupuiah ‘Pathian thu hi a nung a ni’ Heb 4:12 hman niin; Platinum Jubilee Conference tan zan hian Rev. P. Chunga Former Gen. Supdt. chuan hawnna a nei a, Jubilee mei Rev. K. Satinvela’n a det bawk.
Conference chhung hian rawngbawltu Pathian mi hman tak tak i) Rev. RC Puia ii) Rev. C. Lalrammuana iii) Rev. C. Lianchama, iv) Rev. Lalmalsawma Sailo, NEI UPC Gen. Supdt. , v) Rev. K. Lalduhsanga, NMD Treasurer leh Rev. Laltluanga, North Mizoram District Supt. ten Pathian thuchah an sawi a. Heng thuhriltute hian Confe thupui ‘Pathian thu hi a nung a ni’ tih chu thupui then tet = 1) Kawnga min hruaitu a ni 2) Chhandamna a ni 3) Nunkawng hruaitu atan 4) A lokal lehna min hriattirtu a ni tih leh 5) Chakna leh thiltihtheihna a ni tih te hmangin Pathian thu an sawi dawn a ni.
Feb ni 28 Zirtawpni chawhma dar 10-12 chhung Kohhranpui leh Department hrang hrang bakah zirnain leh Camping Centre report te ngaihthlak niin; chawhnu dar 1:00 – 4:00 District Sunday School Department rorel neih a ni ang. Feb ni 29 Inrinni dar 10:00 Am – 4:00PM thleng Conference rorel neih tur niin; Rev. Laltluanga Dist. Supdt. in rorel a kaihruai ang.
North Mizoram District Conference vawi 70-na hi kar thar lamah kimchang zawkin PenNet chanchinthar-ah ngaihthlak theih kan tum dawn a ni.
————-
Aizawl East District :
Aizawl East District Conference vawi 26-na atan inbuatsaihna peih thawkhat a ni.
District Conference hi Zemabawk Bial ten Zemabawk Vengpui Biakin-ah an thleng dawn a, inbuatsaihna pawh chak taka kalpui niin tunah hian inkhawmpui thleng tur hian an inpeih thawkhat tawh a ni. Tarlan tawh angin kuminah hian District PYD in a hrana Conference an neih loh kum a nih avangin District Conference-ah an bet tel dawn a, March 6, Zirtawpni-ah District Sunday School nen a hranin rorel inkhawm an nei ang. Ruahmanna ang chuan District PYD hian Zemabawk Vengpui Biakin-ah rorelna an nei anga, District Sunday School hian Zemabawk Vengpui S.S Hall-ah rorelna an nei thung ang.
Kumin Aizawl East District Inkhawmpui-ah hian thupui hranpa nei lovin mi hrang hrangte hnen atangin thusawi ngaithlak tur niin Zirtawp zana inkhawm hi PYD te puala dah niin hetah hian District PYD bakah Sub-Committee hrang hrang ten lawmman sem tur an neihte sem a ni anga, Inrinni zanah Sunday School Department ten chawimawina leh lawmman semna hun an hmang bawk ang. Pathianni zanah Kohhranpuiin lawmman sem tur a neih te sem a ni dawn bawk a ni. Inkhawmpui hi Rev VL Sailo, Former General Superintendent chuan hlanna neiin Inrinni-ah Kohhranpuiin rorelna a nei dawn bawk a ni. Inkhawm apiangin mimal bakah zaipawl te hnen atangin fak hla ngaihthlak tur niin Pathianni chawhnu-ah Sacrament rawngbawlna a awm dawn bawk a ni.
——–
Intuaitharna :
February 22, Inrinni nileng khan Champhai Bethel bial, Bethel Church Board member ten intuaitharna hun an hmang. He hunah hian Upate tih tur leh nun dan turte bakah thil pawimawh tak tak ngaihthlak niin hlawk takin hun an hmang a ni. Bialtu Pastor Lalhmangaihawma Parte chu Resource person atan an hmang a ni.
Bethel Kohhran te bawk hian February 23, Pathianni chawhnu khan Kohhran chhungkaw tina nu leh pa berte inkhawm kim hun hmangin, nu leh pa mawhphurhna hrang hrangte ngaihthlak a ni bawk a, hlawk thlak an tiin zawngchhang thlak an ti hle a ni. Bialtu Pastor Lalhmangaihawma Parte chu he hunah hian thusawina hun a hmang a ni.
———-
Lawmthusawi chawimawina :
February 21 atanga 23 chhung khan Champhai Bial, Kahrawt Kohhran-a lawi T.Upa Lalthlengliana te chhungkua chuan Thuthlung chawimawina tuikhuah neiin Thlarau borual nuam leh hlimawm tak nen hun an hmang.
He hunah hian mi hrang hrang hnen atangin thuchah ngaihthlak niin Zirtawp zan leh Pathianni zanah Evan V Kamneihthanga’n thuchah sawiin Inrinni chhun leh Pathianni chawhma-ah Evan HK Lalhmangaiha, Inrinni zanah Evan H Malsawmthanga, Pathianni chawhnuah Evan F Zirliana te hnen atangin thuchah ngaihthlak a ni.
———-
Fehchhuak :
February 22 atanga 23 hmang khan Chhingchhip Bial Kohhrante chuan Maite Kohhran, Keifang Bial, tlawhin fehchhuah programme hlim takin an hmang.
He hunah hian Chhingchhip bial atang hian mi 100 chuang kalin hlim takin hun an hmang a, Bial chhung Upate leh Bialtu Pastor, Rev PB Chawngtinliana te hnen atangin Pathian thuchah ropui tak tak ngaihthlak thin a ni. Pathian thlarau thianghlim awmpuina hnuaiah hun hlimawm tak hman niin inkhawm apiang hian Beramno chawimawina hla nen Lalpa chawimawiin hlim taka hun hman a ni a, Bial chhung zaithiamte bakah Maite Kohhran zai mite hnen atangin fakna hla mawi tak tak leh nung tak takin ngaihthlak thin a ni bawk.
February 24, Thawhtanni khan kham lo tak leh ui tak chungin Pathian thlarau thianghlim awmpuina hnuaiah an tiak ta a ni.
————
Campaign :
Ngopa Bial Conference in Bial chhunga Kohhran tinah Financial campaign neih nise a tih bawhzuiin Bial chhung rawngbawltu Tirhkoh leh Upa te leh Bialtu Pastor K.Vanlalhlimpuia ho in rawngbawlna February 23, Pathianni khan bial chhung kohhran thenkhatah Financial Campaign neih a ni a, March 1, Pathianni hmang hian kohhran thenkhatah financial campaign hi neih leh tum a ni.
———
Executive Meeting :
February 21, Zirtawp zan khan District Superintendent Quarter-ah Aizawl East District PYD Executive meeting neih a ni.
He hun hi Rev R Laltlankima, President chuan kaihruaiin Rev Biaksangzuala, District Secretary in hunserh a hmang a ni. He hunah hian thu pawimawh tak tak ngaihtuah niin Kohhranpui Conference ruala District PYD-in rorelna hun a neih tur thlirlawkna te bakah March 12 atanga 15 chhunga Myanmar General Conference, Tahan hmuna neih turah Pentecostal Choir te nen sawmna an hmuh angin kal ngei ni se an tih bakah PYD inkhawm thupui zir tur chungchang ngaihtuahin a thei anga tam print ni se an ti bawk a ni. District PYD Executive Meeting-ah hian OB te an tel kim bakah District Kohhranpui hruaitute pawhin an telpui bawk a ni.
———
District Hruaitute Programme:
Rev Rosanga Kawlni, District Superintendent, Rev Biaksangzuala, District Secretary leh Rev R Lianzama, Missions Director te chuan N.Vanlaiphai Bial Hqrs. Kohhran ten an Biakin sak thar February 29, Inrinni-a hawnna an neihah telpuiin Rev Rosanga Kawlni, District Superintendent hian Biakin hawnna hi a nei a, Pathianni zan thleng a lawmna Programme an hmanah an telpui chhunzawm dawn a ni.
Facebook