Pennet News Service : February 19, 2022

GENERAL NEWS

FIRST MISSIONARY ARRIVAL DAY:

February 18, Zirtawp ni hi UPC- North East India Kohhran Missionary hmasa ber Rev. Ellis Luther Scism a’n Mizoram a lo luh ni a ni a, he ni Executive  Board rorel no. 1, date 9 – 12, 1999 chuan kohhran din niah pawmin office chawlhah a puang a; UPC General headquarters office, District office, kohhran zirna in, Book store, Bible Collge leh kohhran hmun pawimawh dangte he ni hian khar vek a ni.

Rev. Ellis Luther Scism-hian Pathian hnen atangin, India rama Missionary tura kohna dawng in kum 1948 khan India ram a rawn lut a, Adoor, Kerela-ah Bible School- dinin bul a tan a.  Mizorama mi hlim hote nena rawngbawlmek R.A Dover-i-te nen , inbe chhovin Dt.18.2.1950 (Inrinni)-ah khan Mizoram a rawn thleng a, hmun hrang hranga thlarau thianghlim hnathawh avanga tihduhdah leh nekchepna tuar te awm khawm nan UPC kohhran hi din a ni ta a ni.

He kohhrana Baptisma chang hmasa ber leh Pastor atana lak hmasa ber chu Pu Zakamlova a ni.

Kohhran din tirha member record hmasa ber kum 1950 ah member 3,000 niin tun dinhmunah, North East India huamchhungah hian member Nuai khat chuang an awm tawh a ni. Kum 2021 General Conference Report bua a lan danin N.E India UPC huamchhungah hian District 12 ah Kohhran member 1,11,597 an awm mek a. Tualchhung Kohhran 884 leh Preaching Point 175 a awm mek bawk.

North East India UPC hian India hmarchhak State hrang hrang bakah Odisha, Delhi, Kolkata, Andaman & Nicobar Island , Bhutan leh Bangladesh ramah Missionary tirin rawngbawlna hna a thawk mek a ni.

———-

LITERATURE AND PUBLICATION BOARD:

February  ni 16 Nilaini khan UPC North East India Literature and Publication Board chu General Hqrs. Office, Mualpui Salem veng, Aizawl ah neih a ni.
Literature and Publication Board hi Chairman Rev. ZohmingthanzamA chuan kaihruaiin Rawngbawltute Kaihhruaina bu Edit na an nei a, Board hi karleh lam a chhun zawm leh tur a tih a ni.

———-
———-

CHHIMTUIPUI DISTRICT

45 DIST PYD CONFERENCE:

Chhimtuipui Dist PYD Conference vawi 45-na chu February ni 18-20 chhung hian Tuipang L local, Tuipang Bial ah hman a ni a, General PYD President Rev. H. Lalropui chu speker hmangin, “Isua Krista lo kal lehna” Thup 22:12 tih chu thupui ah hman a ni.

Conference hi Lunglei Dist PYD hruaitute, General PYD Educationa Board hruaitu te, Lawngtlai West Dist PYD hruaitu te leh Upa Donny Lalruatsanga MCS secretary Mizoram Youth Commission ten an hman pui bawk.

February ni 19 ah Conference rorelna neih niin, conference ah hian zai thiam hrang hrang te leh Chhimtuipui Dist Choir, South Lungpher Local PYD Choir ten raqngbawlna an nei bawk.

———-

BIAL 2 AH CONFERENCE HLIM TAKA HMAN  A NI:

Chhimtuipui District chhung Siaha Bial leh Tuipang Bial te chuan Dt.11-13 chhung khan conference hlim tak in an hmang.

Siaha bial Conference vawi 47 na hi Council Veng local ah hman a ni a, Dist. Superintendent Rev. Joseph L. Thlauhthang leh Pastor C. Lalchhuanthanga te chuan thu hril rawngbawlna an nei a ni.
Tuipang Bial te chuan Conference hi Phura ah hmangin, Dist. PYD President Evan. K. Rinthara chu speaker a hman a ni a, Dist. Treasurer, Rev. Kholy Hlychho chuan Superintendent aiawh in Conference hi a hmanpui bawk. February ni 14 thawhtanni khan Bro.J Lalhrilhthanga, Tuipang te chhungkua chuan Pathian chawimawina hun buatsaih in ran an thawh Speaker Evan. K. Rinthara chuan rawngbawlna a nei chhun zawm nghal a ni.

———-

MITHAR LAWMLUT

February ni 13 Pathian ni khan Cheural local lawi tur in Member thar 2 chu Upa LH. Kapchhungan a lawmlut a, member thar te hi tlangval ve ve niin raltlan zinga mi Kawl hnam an ni.

———-

RAWNGBAWLTU LA THAR

February ni 13 Pathianni a Siaha Bial Conference Vawi-47 na khan Pastot C. Lalchhuanthanga Siaha sectional pastor chuan, a bial chhung Local 2 a rawngbawltu ruat thar C. Lalhmudika leh Dohranga te chu local church Rawngbawltu a tan a ruat thar a ni.

———-
———-

LAWNGTLAI WEST DISTRICT

District Hruaitu-te Programme:

District Superintendent, Rev. F. Lalbiakthuama chuan February ni 18-20 chhung hian Chawngte “P” Bial Conference vawi 2 na ah Speaker niin rawngbawlna a nei ang..

District secretary & Treasurer, Rev.Lalsawmliana Sailo chuan Pathianni hian Chandmary Local Church rawngbawlna a nei bawk ang.

———-

RALTLAN TANPUI

February ni 9 khan Lawngtlai North bial, AOC Local LAD te chuan an vengchhung a Raltlan awm mek te tan, thawmhnaw leh thilpek dang dang Refugee Committee Aoc veng-te hnen ah an hlan a ni.

———-

BIAKIN SAKNA TANPUINA PE

Lawngtlai South bial, Mampui local church chuan Vathuampui bial chhung Chhotaguisury II preaching station Biak In sakna a tan, cheng sanga Rs.5,000  Pastor B. Lalbiakchhunga bialtu Pastor hnenah an hlan a ni.

Chhotaguisury II kohhran hi September ni 15, 2019 khan din a ni a, tunah hian Biak In an neih loh a vangin Biak In sak tumin Vathuampui bial Mission Department  chuan hma an la mek a ni.

———-

MITHAR BAPTISTMA CHANG.

February ni 13 khan Thingkah Pastor S. Vanlallunghnema Lawngtlai North Bialtu chuan mi thar 2 chu Lalpa Isua hmingin Sual ngaihdamna Baptisma a chantir a, Rev.F.Lalbiakthuama Dist.Supdt chuan Kohhran a lawmluhna a nei nghal bawk.

———-
———-

LUNGLEI DISTRICT

LUNGLEI DISTRICT UPC CONFERENCE VAWI 57-NA ROREL INKHAWM IN NEIH A NI DAWN :

Hri leng avangin Lunglei District UPC Conference vawi 57-na March ni 3-6 2022 chhunga Headquarters Local-a neih tur chu hetiang hian a hman dan tur ruahmanna siam thar a ni.

1. Sermon inkhawm a awm lo anga, rorel na neih hram tum a ni.

2. Department ten March ni 5  Inrinni chawhma 11:00 aṭangin ro an rel ang. Rorel na hmun tur chu hetiang hian ruahman a ni. District PYD – Headquarters Biak in ah, Sunday School Department –  Dist Conference Hall-ah

3. Kohhranpui rorel hi March ni 6 Pathianni chawhma 10:30 aṭangin neih a ni ang a, 10:00 am a tangin registration tih nghal tur a ni ang.

4. Thilpek hlan tur ang chi awm reng reng chu Kohhranpui rorel naah hian in hlan tur a ni ang.

———-

BIAL PANGA IN CONFERENCE TLUANG TAKIN AN HMANG ZO:

February ni 11-13 chhung khan Headquarters bial, Zawlpui bial, Chhipphir bial, Thingsai bial leh Cherhlun bial te chuan bial Conference tluang takin an hmang.

1) Headquarters bial Conference vawi 42-na hi Headquarters biak in, Chanmari-ah neih a ni a, District Superintendent Represent-in Rev.R.Vanlalenga District Missions Director chuan a hmanpui, February ni 12 inrinni khan kohhranpuiin rorelna an nei. an rorel langsar zualte:

– Bial huapa rawngbawltu ni hman nise tha tih a ni a,  Rev.C.Vanlalena leh Rev.C.Lalrintluanga te Resource Person-ah hman nise tha tih a ni.

– Nakum bial Conference-na hmun atan Electric Local ruat a ni.

2) Zawlpui bial inkhawmpui vawi 8-na Zawlpui Local-a neih hi Rahsiveng bialtu Pastor Rev.C.Lalhriatpuia chuan District Superintendent Represent-in a hmanpui a,  bial kohhranpui rorel langsar zualte:

– Bial chhung Local tinah Financial Campaign neih ni se.

– Pastor Quarters Sign Board leh Kitchen Cabinet siam ni  se.

– Local intlawhkualna neih leh nise.

–  Bial chhunga rawngbawltute tan Leadership training buatsaih ni se.

–  Kum 2023 bial conference chu  Zawlpui Local ah tho neih a ni ang.

3) Chhipphir bial inkhawmpui vawi 38-na Chhipphir Local-a neih  hi District Superintendent Represent-in Rev.PC.Lalfakawma District Secretary chuan  a hmanpui a, bial kohhranpui chuan Bial hruaitu (Department telin) lo ni tawh zawng zawngte record fel taka vawn nise an tih bakah nakum Conference neihna tur hmun atan Mualthuam N Electric Local an ruat a, bial Conference hi Rotation a in dawl chhawk nise an ti bawk.

4) Thingsai Local-ah Thingsai bial inkhawmpui vawi 32-na hi neih a ni a, District Superintendent Represent-in Rev.C.Lalrintluanga, District Treasurer-in  a hmanpui a, bial kohhranpui chuan 2023 Bial Conf-na hmun atan Thingsai Local nise an ti a, Pawl sum vawn inzirtir nise, bialtu Pastor in Local tinah neihpui se tih anih bakah Rawngbawltu nupuite seminar neih nise tha tih a ni.

5) Cherhlun bial inkhawmpui vawi 46-na hi S.Chawngtui Local-ah neih a ni a, District Superintendent Represent-in Rev.R.Lalsangzuala Haulawng bialtu Pastor chuan a hmanpui bial kohhranpui rorel langsar zualte:

1. Bial huapin Rawngbawltu retreat neih nise.

2. Sawma Pakhat leh Buhfaitham thate hnenah lawmman pek nise.

3. Pastor Quarters hnuai siam chhunzawm nise.

4. Bial chhung Local intlawh tawn nise.

5. Bial kohhranpuiin Bial PCD te tanpui thin nise.

6. Bial Missions Department-in New Ngharchhip-a Home Missionary an rawihna tur atan tanpui ve nise.

———-

MEMBER THAR:

February ni 14 Thawhtan zan khan Lungrang S Localah,  Mithar-1 bialtu Pastor Jerry Lalmuanawma’n a chuan a lawmlut. (Pic. Pastor Jerry Lalmuanawma)

———-
———-

NORTH MIZORAM DISTRICT

District Conference vawi 72-na hmang dawn:

UPC, North East India, North Mizoram District chuan Conference vawi 72-na Hqrs. Biak in Tuikhuahtlanga a hman tur inbuatsaihna chuan a vawrtawp thleng mekin; District lam pawhin inbuatsaihna an kalpui mek.

Hrileng hluar thar leh avangin Conference hman dan tur hi District Hruaitu Meeting chuan ngun taka ngaihtuahin Confe hian ni khat chhung awh turin ruahmanna an siam a, March ni 3 Ningani chu Palai thlenkim ni tur niin; March ni 4 Zirtawpni chawhmaah Confe Report, Rorel inkhawm bakah chawhnu lamah hruaitu thar thlanna inkhawm neih tur a ni ang.

Hrileng hluar thar leh avanga fimkhur ngai thilah District hruaitute meeting chuan Confe palai kal tur ruahmanna a lo siam tawh sa pawh tidanglamin, hetiang hian ruahmanna thar a siam bawk.

Palai tur te : (i) Licence Holder zawng zawng  (ii) District Level Department O.B zawng zawng bakah (iii) Bial tin atangin Upa pahnih (2) zel an ni ang.

Kum 2022-a Licence dil thar te, Pentecostal School of Ministry a luh dilte leh Missionary
hna dil zawng zawng te chu Feb ni 07 thawhtanni zing dar 10:00 AM District Board hmaah interview neih tur a dawn a ni.

———-

Bial Conference hmang :

UPC, North Mizoram District huam chhung Pastor Bial 30 te chuan Feb 11-13, Zirtawp zan atanga Pathianni thleng khan Bial Confe a rualin an hmang.

Bial Confe. Hi District Puipa pathum ten hetiang hian Bial hrang hrang an hmanpui a ni:
i) District Superintendent Rev. Laltluanga chuan Rengdil Bial
ii) District Secretary Rev. Chhiarpuia’n Headquatters Bial
iii) District Treasurer Rev. K. Lalduhsanga’n Kawnpui Bial
iv) Dist. Missions Director Rev. C. Lalthantluanga’n Bairabi Bial te an hmanpui a ni.

Bial Confe hi Bial thenkhat Confe thlenna tur huam Red zone a puan lai te a nih avangin, Palai bik inruatin rorel chauh kalpui an awm bawk. Hetihrual hian Bial tam zawkte chuan a hun ngai anga tluang taka kalpui thei an awm bawk.

Bial Confe neihah hian Kum 2022 chhunga Bial hmalakna tur leh rawngbawlna tur kawng hrang hrang relin Bial hrang hrang report atangin covid karah kohhran hmasawnna a chawl lova, kum 2022 chhunga hmalakna tur Bial/District leh Genral thlenga hmasawnna tur ro tha tak tak an rel chhuak a ni. (Bial Confe hmang)

———-

Kohhran sum Audit:

Feb ni 15 (Thawhlehni) atang khan N.Mizoram District Office leh Deppt hrang hrang te, Zirnain leh Camping Centre sum bakah Committee peng pawimawh hrang hrang sum hman dan Kum2021 kumtawp sum Audit chu neih a ni a, Feb ni 17 Ningani khan tluang takin an zo.
North Mizoram District Office sum Audit saktute hi i) Rev. C. Lalrammuana ii) Evan. F. Lalngaihawma leh Upa C. Lalnunmawia te an ni  (Sum Audit)

———-

Rengdil Bial te’n Bial Golden Jubilee leh Confe Golden Jubilee an hmang:

North Mizoram District, Rengdil Bial chuan Bial a din atanga kum 50 an tlinna leh Confe Golden Jubilee ( Kum 50-na) an lawm. He Confe leh Bial Golden Jubilee Confe hi, North Mizoram District Supdt. Rev. Laltluanga’n hmanpuiin Feb ni 10 Zirtawp zan khan Golden Jubilee lawm Prog tannin, Meichher det a ni a, Conference hun chhung hian Dist. Supdt. Rev. Laltluanga Speaker niin,   Golden Jubilee Lungphum hawnna te, Conference hawnna te neiin; Bialtu Pastor Rev. C. Lalthlengliana’n  Jubilee puala buatsaih Souvenir Bu a tlangzarh bawk.

Feb ni 10 zirtawpni khan Jubilee pualin mithar 1 lawm lutin, Bialtu Pastor Rev. C. Lalthlengliana kutah sual ngaihdamna baptisma a chang  ni. (Golden Jubilee COnfe)

———-

Bilkhawthlir Bial Khawmpui Vawi 40 na:

February ni 12-13 2022 chhung khan Bilkhawthlir Bial te chuan Khawmpui Vawi 40-na, Ruby Jubilee chu Dawrveng Kohhran Biak In ah an hmang.

Conference rorel pawimawh zingah Kum 2023 Bial Khawmpui chu Buhchangphai Kohhran ah nghah a ni a, tin, Kum 2022 atan Missionary 3 chawm leh nise tih te rel a ni.

Bilkhawthlir Bial chhungah hian Biak In 8 awm mek in, Home Mission Field -1 N.Thinglian an nei a, Kohhran member Mipa – 510 leh hmeichhia – 511 an awm mek a ni.

———-

W. Phulpui Mission Field Biak in chung chihin workcamp:

Bro. Lalnunhlima, Rawpuichhip, Lengpui bial Missions Secretary chu West Phulpui Mission Field a work camp turin Jan ni 31 thawhtanni khan West Phulpui thlengin, February ni 1 thawhlehniah hna a tan a, February ni 2 thawhlehni khan in chhun siam chawpin, in chung hi amah puitute nen an chih zo vek hman a ni.  Bro Lalnunhlima hi West Phulpui Missionary leh kohhran member remchang ang ang ten biak in chung chih ni hian an lo pui ve bawk a, Bro. Lalnunhlima leh a thawhpuite chungah District Missions hruaitute leh Bial Kohhranpui hruaitute an lawm hle.  (Ramthim tan fehchhuak)

———-

S. Chhimluang Missions Field, Sunday School Hall hawn a ni:

N. Mizoram District Missions Department leh Kolasib Venglai Bial Sunday School Department ten South Chhimluang Home Missions Field a Sunday School Hall an sak chu Feb ni 5 Inrinni khan Rev. B. Vanlalruata, Venglai Bialtu Pastor in a hawng.

Rev. B. Vanlalruata hian Bible chang  Exodus bung 25:8 leh Marka 11:17 chhiarin Pathian Kohhran ho ten Pathian thu an zir a, Pathian hming an lamna tur hmun hawn theih a peih a ni chu lawmawm a tih thu a sawi a. Hun lo kal zel turah pawh Pathian Thuthlung an zir chhuah a, an ngheh deuh deuhna hmun ni tura a duh a sawi a. Sunday School Hall a hawn zawh hian a hawnnaa tel te tawngtai rualin Hall hi an hlan a ni.

South Chhimluang Sunday School Hall an hawn tak sak nan hian District Missions Department chuan cheng singnga an thawh a. Bial Sunday School-in Local hrang hrangte thawhkhawm bakah bial sum nen Rs 48,771 an tum a, Hall sak nan a sum sen zawng zawng hi Rs 98,771 a ni a. Hnatlang tha 88 sen a ni bawk.

Sunday school Hall hawnna inkhawm hi Upa Lalnunmawia, Bial Sunday School Director in a kaihruai a, Upa Lalhruailiana, Treasurer Bial Sunday School in Report a pe a. Upa Lalhmangaiha, Director Bial Mission Department leh Upa B. Daniel Lalawmpuia, Secretary Bial Missions Department bakah Evan Lalthianghlima Sidon bakah bial chhunga member thenkhat ten an tawiawm a. South Chhimluang ah hian Sist Lalhriatkimi chu thawktu in a awm mek a ni. (Pic: Hall Hawng)

———-

District Missions Director Rev. C. Lalthantluanga, Missions Field fangin fehchhuak :

North Mizoram District Missions Director Rev. C. Lalthantluanga chu Feb ni 4 chawhma khan, Home Missions Field hrang hrang tlawh turin a fehchhuak.

District Missions Director hi Mamit Bial Missions Director Upa B. Vanlalauva’n tawiawmin Vawngawnzo Field-a Missionary Quarters sak mek a hmunah enin hma bak an neih dan te a hmuh pui.
Feb ni  5 Inrinniah Jampui Tripura Home Missions Field Zomuantlang panin Tlangsang-ah Zan Inkhawm hmanpuiin Director Rev C.Lalthantluanga’n rawngbawlna a nei a ni.

Feb ni 6 Pathianniah Zomuantlangah inkhawmin Dist. Mission Director hian Pathian thu chah sawiin kohhranhote fuihna a nei a, Inkhawm banah New Kawnpui Kohhrante a tlawh leh bawk.
Tlangsang Bial chhunga NMD Missions Director in rawng a bawl chhung hian Bialtu Pastor leh Rev. K.Lalchamliana, Tlangsang Bial Mission Director te, Upa Rinkima te Upa R.Lalfakawma te Bro Jakoba te chhung  ten an tawiawm a ni.

Director hian February ni 7 thawhtanni zingah Sailut 1 kohhrante tlawhin, Sailut 1 Biak in hmun neih hi Bro, Jakoba’n JCB-in a hmun tur a laihsak dawn a, Bro. Jakoba vek hian  Biak in pawh a ruhrel Cement Work chin zawng a khawihsak dawn bawk a ni.  Biak in ram bula awm ram rem tak chu Bro. Ruatkima Tlangsang chuan lei bawkin, Kohhran mual rem tak Sailut 1-ah hian neih a ni dawn ta a ni.
He mi ni hian Rev. C. Lalthantluanga kutah Sual ngaihdamna Baptisma chang an awm bawk.

Tlangsang Bial Hqrs. Tlangsang kohhranhote hian Biak in sak nan Mimal sum pung awm lova Rs. 140000 an puk chu Bro. Jakoba hian Rs. 100000 ngai damin, a bak rulhtur awm Rs. 40000 pawh Dist. Mission Director Rev. C. Lalthantluanga hian a rulh sak bawk a, Kohhranhote an lawm hle
Feb ni  8 ah Dist. Missions Dept in Casual worker Evan. C. Sangliana ruaia rawng a bawlna hmun Vitor Kalagang, Dist. Missions Board-in Missions Field atana a puan tharah, Tirkoh Quarter sak dan tur te enin an thlithlai a, hetih lai hian Kohhran pawhin lei an lo dil thin Biak in ri chiah Kawngpui ana in sak lai Concrete building a dung 32 ft leh avang  16ft chu Rs 1,30,000/- a neituin a rawn zawrh a,  Kohhran hruaitute fehchhuak hian an lei ta a ni.  (Director zin)

———-

Missions Field tan fehchhuak:

Evan. Lalduhsaka Saza, Rengdil chuan Tumpanglui Missions Field Biak in hman tur Pulpit, Maicham leh Lecturn te a siam.  Evan. Duhsaka hian hei lo pawhin rawngbawla a lo awm tawhna Tuipuibari Hmar veng Biak in bungraw hrang hrang, Maicham, Thuthleng leh thil dang dang te siamin tha a lo thawh tawh a, Hetiang taka Pathian ram hmangaihtu Kohhran mite zinga an awm hi.. Tumpanglui MF hruaitute leh Department hruaitute pawh an lawm hle. (Maicham siam)

———-

Vawngawnzo MF tan fehchhuak:

Feb ni 9 khan Kolasib Venglai Bial Missions Department  hmalâknain, Vawngawnzo Home Missions Field-ah hnatlang neih a ni a, Vawngawnzo Missionary Qtrs sak mekah an theihtawk thawh tur tul tul thawkin mi 11 an thawk chhuak a, an hnathawh bak Vawngawnzo Mission Field  Qtrs sak hna chhungzawm nan Mistiri leh Helper hlawh tur ₹ 11,200 an hlan nghal bawk. Kolasib Venglai Bial Missions Dept te chungah District Missions Hruritute an lawm hle.  (Kol Venglai MSD)

———-

Dapchhuah kohhran tan fehchhuak:

Lengpui Biala awm Dapchhuah Preaching Point Kohhran  SS Hall sakna tura, Bro. Dr. Lalrempuia S/o Rev, R. Thangliana(L) Rs. 50000  a lo pek tawh chu Rs 50000/- dang a pek belh leh a, heti hian Rs. 100000/-Nuai khat a thawh ta a ni. Dapchhuah kohhranho te leh Lengpui Bial hruaitute chuan lawmthu an sawi a ni.

———-

Hunthar bial-ah mithar nei:

Hunthar Bial Edenthar- kohhranah Feb ni 14 thawhtanni zan khan Evan T. Vanlalruata (valtea) rawngbawlna atangin chhungkaw 1 member 3 awmna te chuan NEI UPC zawmin Evan. T. Vanlalruata’n  kohhranah Isua hmingin a lawmlut.. (Edenthar mithar)

———-

Quarters sakna tur pe:

Dinthar Bial Missions Depatment te chuan North Mizoram District Missions Depatremnt enkawl Bajerung Missions Field Missionary Quarters sak kal lai mek, chhunzawm zelna turin sum fai Rs. 60000 an hlan a,  District Mision hruaitute an lawm hle.

———-
———-

AIZAWL EAST DISTRICT

Bial Kohhranpui Inkhawmpui:

Aizawl East District chhunga Bial hrang hrang te chuan February 11 atanga 13 chhung khan Bial Kohhranpui Inkhawmpui hlawhtling takin an hmang a, hripui leng avangin kum danga hman thin angin hman theih a ni lo. Bial engemaw zat chuan February 12, Inrinni khan rorelna hun hmangin Pathianni chawhma leh chawhnu-ah inkhawm an nei hlawm a, Bial thenkhat erawh chuan hrileng avangin inkhawmpui an la nei thei lova, Pathianni-a inkhawmna buatsaih lovin rorel inkhawm chauh nei an awm bawk a ni. Bial inkhawm rorel-ah hian Kum 2022 chhunga Bial kalphung tur hrang hrang bakah District-a lut turte an ngaihtuah hlawm a ni.

Bial Kohhranpui Inkhawmpui hi District hruaitute chuan hetiang hian hmun hrang hrangah an hmanpui a ni:

Rev Vanlalfela Ramtiam, District Superintendent chuan Khawzawl bial-ah a hmanpui a. Khawzawl Bial te hian Bial Inkhawmpui vawi 51-na leh Bial an nih Kum 50-na, Golden Jubilee an lawm nghal a, Khawzawl Vengthar Biakin-ah inkhawmpui hi an hmang a ni.

Rev R.Laltlankima, District Treasurer chuan Zohmun Bial hmanpuiin N.Tinghmunah Inkhawm hi an hmang a, Pathian thlarau thianghlim awmpuina hnuaiah hlim taka hun hmangin Thawhtanni khan Pathian chawimawina neih a ni a, Speaker-ah tangin rawngbawlna a nei chhunzawm leh a ni.

Rev KVL Hmangaihkima, Missions Director chuan Thuampui bial a hmanpui a, Thuampui Biakin-a inkhawmpui an hmanah hian Rev Lalmalsawma Sailo, General Treasurer chu Speaker-ah an hmang a ni.

Aizawl East District hnuaia Bial Inkhawmpui hi rualkhai taka hman anih theih nan a hun tur hi District Board-in ruahmanna siamin February thla Pathianni vawi 2-na hmanga kumtin neih thin a ni a, amaherawhchu hripui leng mek avanga a hun pangngaia hmang thei lo Bial engemaw zat an awm a, heng bial te hian an remchan angin Bial inkhawmpui hi an hmang ve leh mai dawn a ni.

———-

OTS-a kal turte tan Induction Programme hman a ni:

February 15, Thawhlehni khan Aizawl East District in Short Term Course Pathian thu zirna a neih, Oneness Theological Seminary, OTS chuan Kum 2021 Session atan Induction Programme District Committee room-ah an hmang. He hun hi Rev Vanlalfela Ramtiam, Principal chuan kaihruaiin  Rev KVL Hmangaihkima’n hunserh a hmang a ni. He hunah hian Rev H.Lalropuia, Secretary, Theological Education Board chuan Zirtirtute leh naupang inhmelhriattirna neiin tul dangte ngaihthlak a ni bawk. Zirlaite lawmluhna leh fuihna thu Rev Vanlalfela Ramtiam, Principal chuan neiin zirlai ten an hriattur hrang hrang OTS rules leh financial chungchang ngaihthlak a ni bawk. Rev C.Lalengliana chuan OTS Induction Programme hi malsawm tawngtaiin a ti tawp a ni.

OTS hi kumtin kal thin ni mahse Kum 2021 khan hrileng avangin Class kal mumal theih a ni lova, TEB meeting chuan February 15 atanga 23 chhung Class kalin February 24 leh 25-ah Exam neih ni se tiin a lo rel tawh a ni. Kumin-ah hian Zirlai 31 awmin Ist Year-ah 11, 2nd Year-ah 11 leh 3rd Year-ah 9 an awm mek a ni.

———-

Biakin hawng:

February 13, Pathianni Chawhma khan Sesawng Vengthar Biakin hawnna Bialtu Pastor, Pastor V. Lalnienga chuan a nei a, Pathian thuchah ropui tak a sawi nghal bawk a ni. Inkhawm banah Biakin thar hawn lawm nan thingpui ruai buatsaih a ni. Pathianni Chawhnu leh zanah Evan. Philip VL Hmuchhuaka, District Missions Evangelist in rawngbawlna a nei leh bawk a ni.

———-

Baptisma chang:

February 13, Pathianni khan Chhingchhip bial, Hmuntha Kohhranah Evan. F. Vanlalruata kutah mi 4(Kohhran member ni sa) ten Lalpa Isua hmingin sual ngaihdamna baptistma an chang.

———-

Golden Jubilee:

February 12 leh 13 chhung khan Khawzawl bial Kum 50-na,  Golden Jubilee leh bial inkhawmpui vawi 51na chu Khawzawl Vengthar kohhran biak Inah hlim leh tluang taka hman zawh a ni. Jubilee lungphun hawnna leh inkhawmpui hi February 12, Inrinni chawhma dar 10:30 khan Rev Vanlalfela Ramtiam, District Superintendent chuan a nei a, Jubilee dar vawi 50 vuak a ni bawk.

Jubilee dar vuak zawh hian Biak In chhungah lutin, Jubilee lawmna bakah Bial Inkhawmpui rorel neih chhunzawm a ni a, Upa. Lalmawia, Bial Missions Director chuan hunserh hmangin Bro. Malsawmkima, Souvenir board Secretary hnen atangin report ngaihthlak a ni a, Khawzawl bial Golden Jubilee Souvenir chu Rev Vanlalfela Ramtiam in a tlangzarh bawk a ni. Evan F. Laldanmawia, Bial Secretary hnen atangin Bial report ngaihthlak a ni bawk.

February 13, Pathianni khan Jubilee lawmna leh Bial inkhawmpui neih chhunzawm niin Chawhma inkhawm Bialtu pastor Lalhmangaihawma Parte chuan a kaihruai a, member boral sunna Upa Chhuanliana kaihhruaina in neih niin Rev T. Lalbiakliana, Saitual bialtu Pastor leh Rev Vanlalfela. Ramtiam, District Superintendent ten Pathian thuchah an sawi a ni. Khawzawl bial  kumpuan HMANSAWN KUM hawnna, Rev Darchhawna’n a nei bawk.

Pathianni Chawhnu inkhawm Bialtu Pastor-in kaihruai lehin, Kum 2021 chhunga Buhfai tham thate hnenah lawmman hlan niin Khawzawl bial atanga Pastor chhuak te, Bialtu Pastor lo ni tawh te bakah Bial hruaitu lo ni tawh zawng zawngte hnenah chawimawina hlan an ni bawk a, Rev Darchhawna leh Rev C. Lalengliana te hnen atangin Pathian thu chah ngaihthlak a ni leh bawk a ni. Khawzawl Bial conference  leh Bial Golden Jubilee lawmna hi Rev Vanlalfela’n Ramtiam,  District Superintendent chuan malsawm tawngtaiin a titawp a ni. Inkhawmpui leh Jubilee lawm chhung hian Sis K.Lalremsangi hnen atangin fak hla ngaihthlak thin a ni bawk.

———-

Hruaitute Programme:

Rev VL Hnemtluanga, District Secretary chuan Pathianni chawhma hian District Hqrs. Kohhranah thusawi rawngbawlna a nei anga, zanah District PYD hnuaia Talent Search Committee programme buatsaihah hun a hmang leh ang.

Rev R.Laltlankima, District Treasurer chuan Pathianni hian Rabung Bialtu Pastor lakluhna, Induction Service neiin rawngbawlna a nei ang.

Rev KVL Hmangaihkima, Missions Director leh District Missions hruaitute chuan Pathianni hmang hian Khawzawl bial chhungah Missionary Support zawngin rawngbawlna an nei ang.

ADVERTISEMENT

Aizawl East District hnuaia Pathian thu zirna, Oneness Theological Seminary chu Kum 2022 Session atan luh a lo hun leh dawn taa, dil turten heng a hnuaia tarlante hi kan hre dawn nia:

1.  Dilna hi Application Form siamsa hmang chauhva dil tur a ni a, Dilna form hi District office ah emaw Bialtu Pastor hnenah lam tur  ani.
2.  Dilna hi Dt. 28. 2. 2022 aia tlai lovah, District office-ah theh luh tur a ni.
3.  Dilna ah hian Church Board Committee leh Bialtu Pastor recommend-na thil tel tur a ni.
4. Diltu chu Zuk leh hmuam ruihtheih thil lakah a fihlim ngei tur a ni.
5. Dilna ah hian Passport size thlalak copy 1 dah tel tur a ni.
6. Zir mek te leh zir thar tur te tan, a thara dil leh vek tur a ni.
7. Kal thar (1st yr) tur tan interview neih tur a ni.
8. Interview hi District Conference 10th-13th March,2022 chhungin neih tur a ni.
9. Sum lam –
1) Admission fee        – Rs. 500/-
2) CBC Affiliation fee  – Rs. 100/-
3) Zirlaibu man        – Rs. 500/-
4) Exam fee            – Rs. 100/-
Total         – Rs. 1,200/-
10. Tul leh pawimawh ah chuan a hnuaia hruaitute Phone No. ah hian biak theih reng a ni.

In rawngbawlpui,

(REV. H.LALROPUIA)
Secretary
Mob.- 8729855646
Theological Education Board : Aizawl East District

———-

IMPHAL SECTION CONFERENCE A TIAK TA:

February 11-13, 2022  chhung khan Hqrs Section, Imphal District  chuan  Hqrs local  New Lambulane local-ah Section Conference Vawi-22 na an nei.

February ni 11 zirtawp ni chhun Dar 1  khan Hqrs. BIAL PYD  chuan Rorelna an nei a, tlai dar 6:00 pm ah palai lawmna inkhawm nei lehin, thupui ah “Ka aw i ngaihthlak a, Ka thuthlung hi i pawm tlat chuan khawvel hnam zawng zawng zingah hian ka tan ro thlan bik in ni ang;” tih thupui hmangin Rev. VL Hnemtluanga Secretary, Aizawl East District chuan Pathian thuchah a sawi a ni.

February ni 12 inrinni  zing dar 7:30 ah Bial Sunday School in rorel inkhawm nei lehin, dar 9 ah Bial Mission rorelna an nei ve leh a, chhun dar 11:00 ah Bial LAD te pual a inkhawmna leh zai leh Bible chang sawi a intihsiakna neih a ni. Tlai dar 2:30 ah  BIAL rorelna neih a ni bawk.

February ni 13 Pathian khan Unaupa Kampu Haokip te chhungkua chuan Pathian CHAWIMAWINA neiin Bawngpa an thawh a, Maicham rawngbawlna bialtu pastor Rev T. L. Siama an a nei a, an chhungkua aiawhin an fa nu Sis Lhingboi Haokip lu chunga hriak thihna a neihsak a ni. Pathian thuchah Rev V. L. Hnemtluanga’n a sawi in, kohhran ten hlim hlim takin  CHAWIMAWINA hun hi an hmang a ni.

Zan lam Inkhawm na neih leh a ni a, Bro. Hopeson leh Sis Lalmuanpuii ten  zai rawngnawlna  neiin, Pathian fakna hla an sa thin a,  Speaker thu sawi laiin hlapui a lo thleng a kohhran te an hlim hle a ni. Thlarau Thianghlim awmpuina nasa tak nena hun min hmantirtu kan Lalpa Isua chu fakin awm rawh se. Dated 14/2/2022(Monday) hian inngai leh inthlahlel tak chungin kan inkhawmpui chu kan ?iak ta a ni.