General Superintendent Rev. R. Lalrinsanga chuan March ni 4 a North Mizoram District PYD ten Golden Jubilee an lawmna ah thusawina hun a hmang a, tin, North Mizoram District Conference vawi 71 na March ni 5 atanga ni 7 chhung a neih ah a telpui bawk.
General Secretary Rev. Zohmingthanzama chuan march ni 6 atanga ni 7 chhung a Lunglei District ten District Conference vawi 56-na an hman na ah telpuiin rawngbawlna a nei.
General Treasurer, Rev. Lalmalsawma Sailo chuan March ni 7 a Serchhip Bial Missions Department ten Retreat an neih na ah resource Persona tangin hun a hmanpui ang.
———-
———-
CHHIMTUIPUI DISTRICT
Chhimtuipui District puipaten Sangau bial chhung local hrang hrangah rawngbawlna tluang takin an nei.
February ni 27 inrinni zan atanga bul tanin Sangau Bial chhung local hrang hrangah Chhimtuipui District puipa te chuan rawngbawlna nei in, sangau bialtu pastor leh bial hruaitu ten an tawiawm thin a. Feb ni 28 Pathian ni khan bial chhung upa leh rawngbawltute bakah department OB te nen inkawm ho na neiin Sangau bial hmasawnna tur leh hma lakna tur hrang hrang te sawi ho a ni.
———-
BIAK IN HAWNG DAWN
Chhimtuipui District Superintendent Rev. Joseph L. Thlauhthang chuan March ni 7 Pathianni khian Siata I Biak In hawnna a nei dawn a, Chhimtuipui Dist PYD Choir te pawhin zai a rawngbawlna an nei bawk ang. Siata I Biak In hawnna ah hian Sial leh vawk te talhin ruai nen ropui tak a hun hman tum a ni.
———-
PMD RAISING DAY HMANG
Siahatla local Pentecostal Mem Department (PMD) te chuan March ni 3 Nilaini khan an din champha vawi-3 na lawmna hun an hmang.
PMD Day hi Siahatla Biak In ah hman niin Pastor C Lalchhuanthanga Siaha sectional pastor leh J Lalhriatchhunga Secretary Dist PYD Music & Sound Committee ten hun an hman pui a ni.
Siahatla PMD te hian Sis. Lalṭhuami, Siahatla Biak In enkawltu chenna In tur sak sak in, kar khat chhungin an sa zo a ni.
———-
CHAWIMAWINA NEI
Dist. Evangelist N. Thanghnuna rawngbawlna kal zelah March ni 4 khan Upa T. Lalengzuala te chhungkua chuan Archhuang local ah Pathian hnen a lawmthu sawi chawimawina an nei a, he rawngbawlna hi Revival crusade chhun zawm zel a ni. Crusade speaker Evan. N. Thanghnuna leh a rawngbawlpui te chuan zan lamah Bible study Kohhran te neih puiin zirtirna anpe ṭhin a ni.
———-
———-
LAWNGTLAI WEST DISTRICT
Lawngtlai West District LAD leh PYD te chuan join Conference an hmang.
March ni 5 atanga ni 7 hmang hian Lawngtlai West District LAD leh PYD chuan Lawngtlai AOC Biakin ah join Conference an hmang a, Conference hi District puipa te chuan hmanpuiin, March ni 6 inrinni khan District LAD leh PYD te hian a hrang ve ve in rorelna an nei a ni.
March ni 7 Pathianni zingah District Superintendent Rev. R. Ramthatzawla chuan Thusawi rawngbawlna a nei a nga, Chawhnu inkhawm ah District Secretary/Treasurer Rev. Lalsawmliana Sailo leh Dist. Missions Director Rev. F. lalbiakthuama ten thusawina hun an hmang bawk ang.
Sist.Eden siamvuli Lawngtlai south bial leh Sist.Lalpianruali Lawngtlai south bial,Bro.LH.Ramengmawia Lawngtlai North bial ten zaia rawngbawlna an nei bawk a ni.
Conference neihna a mi inphalte thilpek:
1. Bro.David Lalnuntluanga (Ben Ben 200 Dawr neitu), Bazar Local in LAD & PYD Joint Conference huna Speaker leh Zaithiamte present tur MOMENTO siamna an tum sak a ni.
2. Rbt.Laldiliana (Sarah 100 Dawr neitu),Bazar Local in PYD Flag khulhna nei lo Local te a tum sak dawn bawk a ni.
3. Bro.George Lalawmpuia, Council Veng PYD President in Tuidangchhuah Local PYD Flag a lo tum sak bawk a a ni.
4. Evan R.VL.Chhuana, District PYD Secretary in M.Kawnpui PYD flag man a tum sak bawk a ni.
———-
LUNGLEI DISTRICT
1.LUNGLEI DISTRICT UPC CONFERENCE VAWI 56-NA:
Ni hnih awh Lunglei District UPC Conference vawi 56-na rorel inkhawm chu March ni 6 leh ni 7 khan Pukpui Local-ah neih a ni a, hripui leng avangin Conference hi Rorel inkhawm a hun hman a ni.
Rorel inkhawm ni khatna hi March ni 6 inrinniah neih a niin, Ladies Auxiliary Department (LAD) chuan Pukpui Local UPC Biak inah rorelin, Sunday School Department-te chuan Pukpui Local Sunday School Hall-ah rorelna hi an nei a ni.
District Kohhranpui chuan March ni 7 Pathianni chawhma dar 11 ah Pukpui Local UPC biak inah rorelna an nei a. He Conference hi Rev.Zohmingthanzana, General Secretary UPC-NEI chuan a telpui a ni. Conference rorelna ah hian lawmman chi hrang hrang semna neih nghal a ni bawk.
———-
2.MEDIA KALTLANGA RAWNGBAWLNA HAWN A NI:
February ni 28 Pathianni zan khan District UPC Conference Hall-ah Pentecostal Children Department, Lunglei District leh Pennet tangkawpin a buatsaih Media kaltlanga rawngbawlna chu a hawnna programme hman a ni.
He hun hi Bro.V.Lalromawia District PCD Vice President chuan a kaihruaia, District Superintendent Rev.C.Vanlalena chuan hunserh hmangin Media kaltlanga rawngbawlna hi a hawng a, District PCD Adviser Rev.PC. Lalfakawma chuan thusawina a nei bawk.
He Programme-ah hian H.Vanlalpeki Bazar Local, Janet Lalruatfeli Electric Local leh Mimi Vanlalmawizuali Pukpui Local-ten zaiin rawngbawlna an nei a, Michael Zirnunsanga Bazar Local chuan Recitation thiam taka a sawi bakah Venglai Local PCD-te chuan Musical Drama hmuhnawm tak an entir a, College veng Local PCD Group zai ngaihnawm tak ngaihthlak a ni bawk. District PCD Secretary Bro. Jacob Ramengmawia hnen atang report ngaihthlak a ni a, District PCD-in Media kaltlanga rawngbawlna zau zawk an neih theih nan he hun hi ruahman an nih thu a sawi bakah Pennet nen tangkawpin Local/bial hrang hranga PCD-te talent haichhuah leh an inpho chhuah theihna atana hmalakna tangkai tak tur anih thu a sawi a ni. He hun hi Rahsiveng bial PCD President Rbt.C.Lalawmpuia chuan tawngtainain a titawp a ni.
He Programme hi Pennet Lunglei Youtube channel-ah en theihin a awm a ni.
———-
3.BUNGHMUN BIAL LAD & PYD JOINT CONFERENCE NEIH A NI:
Ni 26-28. Feb. 2021 chhung khan Tleu Local-ah Bunghmun bial PYD leh LAD Joint Conference hlim tak a hman a ni. He Conference hi District LAD President, Secretary, Treasurer leh Asst Secretary ten an hmanpui a, District PYD Vice President Evan.Lalrinmawia chuan a hmanpui bawk. He Joint Conference hi Thlarau lam boruak nuam tak nen hun hman a ni. An rorel langsar zual te.
PYD:
1. Kum 2019 atang project neih tawh, bial PYD computer tur leina tuak chhunzawm zel nise.
2. Chhiatni thatni fund ennawn a ni.
3. Kum 2022 lo awm turah, bial pawn fehchhuah neih nise tha tih a ni.
4. Kum 2021 hian bial PYD Sport Meet Cum Revival nei tura ruahman a ni.
5. Kum 2021 District Conference rorel palai kalna turin budget Rs.8000 siam a ni.
LAD :
1. Kum 2021 chhungin Pastor Quarters-a dah tur belbawm a thar siam nise.
2. Laisawral Home Mission field Quarters-ah Water Filter tha tak dah tum a ni.
3. Bial chhung PBS kal chhuakte lawmpuina hlan thin tura hma lak.
4. Local hmasawn nan, Local tinah sum in tuakpui pahin Local in tlawh kual tura ruahmanna neih a ni.
———-
4.PUKPUI BIAL P.Y.D.CONFERENCE ROREL INKHAWM NEIH A NI:
February ni 28 Pathianni khan Pukpui bial PYD Conference vwi 36-na rorel inkhawm chu Pukpui Local UPC biak inah neih a ni.
Rorel inkhawm hi bial PYD President Rbt.P.Samson Vanlalfela chuan a kaihruai a, an thurel langsar zingah bial PYD hian thuthlung puandarhna atanah hmalak nise an ti a, bial PYD Member boral an awmin Rs.1500-a inral thin chu Rs.2000 a tihsan nise an tih bakah nakum 2022 chhungin Missionary pahnih chawm leh nise an ti bawk. Tin, Bible chhiar chhuakte hnenah lawmman inpek leh nise an tih bakah nakum 2022 Conference-na hmun atan Zotlang Local an ruat bawk.
Rorel inkhawm neih chhung hian nikum 2020 chhunga Pukpui bial chhunga PYD member boralte sunna hun bialtu Pastor Rev.PC.Nghakliana chuan a nei a, bial chhunga Bible chhiar chhuak mi 9 hnenah lawmman sem a ni bawk.
Report bu a alan danin Pukpui bial chhungah hian Local 7-an awm mek a, PYD Member hi 713 (Mipa 436, Hmeichhia 277) an awm a ni. Bial chhunga zuk leh hmuam nghei hi 177 niin nghei thar mi 6 an awm a, nikum 2020 chhung khan Bible chhiarchhuak hi mi 9 an awm bawk. Pukpui bial PYD hian nikum 2020 chhung khan Civil Hospital Blood bank tan thisen unit 51 an pe a ni.
He bial PYD Conference hi District PYD hruaitute chuan an telpui bawk.
———-
5.MI THAR :
February ni 28 Pathianni zan khan Electric Veng Local, Lunglei ah Baptisma khur hawn a ni a, member thar pakhatin Isua Hmingin Baptisma a chang a, Baptisma rawngbawlna hi Bialtu Pastor Rev C.Hmingthanfala’n a nei a ni.
February ni 28 Pathianni khan Mualcheng S Local-ah bialtu Pastor Rev.H.Rothuama chuan mi thar pakhat Baptisma chantirin kohhranah a lawmlut.
———-
———-
NORTH MIZORAM DISTRICT
District Confe vawi 71-na tluang takin hmang:
UPC-NEI, North Mizoram District huam chhunga inkhawmpui lian ber North Mizoram Dstrict Confe. Vawi 71-na chu, March ni 5 Zirtawpni chawhma Dar 11 khan tan a ni.
Confe hi Hqrs. Kohhran Biak In Tuikhuahtlangah neiin; Hqrs. Bialte’n an thleng a, Confe. Hawnna UPC, NEI Gen. Supdt. Rev. R. Lalrinsanga’n neiin; hemi hnu hian District LAD Conference rorel neih chhunzawm a ni. Dist. LAD Confe hi Dist. LAD President Sist. K. Lalhmachhuani BW chuan a kaihruai a ni.
March ni 5 Inrinni Chawhma dar 11:00 Am khan North Mizoram District Kohhranpui rorel inkhawm neih leh niin; Confe. Agenda atana chhawpchhuah te rel a ni. Confe rorel hi NM Dist. Supdt. Rev. Laltluanga’n a kaihruai a, Confe. Lawman hrang hrang sem a ni bawk.
North Mizoram District Confe hi Covid 19 hrileng avangin tum danga Confe. duan anga kal lovin, chhun lam programme chauh ruahman a ni a, March ni 6 Pathianni zing leh chhunah sermon inkhawm neih niin; Pathianni zing inkhawmah Rev. R. Lalrinsanga Gen. Supdt. UPC NEI chuan thuchah sawiin; chawhnu inkhawmah Dist. Sudpt. Rev. Laltluanga’n thuchah a sawi thung a ni. Pathianni zing inkhawm hian kum 2020 Conference leh Confe inkara member kaltate sunna Rev. C. Lianchama Former Dist. Supdt. Hqrs. Bialtu Pastor chuan a nei bawk.
Chanchin buatsaih lai hian Confe. Rorel leh chanchin hriattur tul pawimawh te hriat hman a nil ova, kar thar PenNet Programme-ah kim chang zawka puan theih beisei a ni.
———-
District PYD Rising Day lawmna bul tan:
UPC NEI-North Mizoram District PYD te chuan, kum 60 an tlin lawmna Diamond Jubilee chu March ni 4 Ningani chawhma dar 11 khan District Hqrs. Kohhran Biak in, Tuikhuahtlangah a lawm bul an tan.
North Mizortam District PYD Diamond Jubilee lawm Prog bul tanna hi Prog chhawng Biak in pawn leh a chhung lam Prog tea ruahman niin; Biak in pawn Programme, Jubilee Organising Chairman Evan. C. Lalruatsanga’n a kaihrui a; Diamond Jubilee Lungphum hawnna Dist. Supdt. Rev. Laltluanga’n neiin; he mi hnu hian Jubilee Baloon District PYD Board Members nilai mek ten chhuahin, Jubilee T Shirt tlangzarhna Evan. F. Lalngaihawma, Former District PYD President (2016-2020) chuan a nei bawk a ni. Biak in pawn Programme-ah hian District PYD Zaipawlte’n fak hla mawi tak an rem bawk a ni.
Biak in Pawn lama Prog. hman zawh hnuin Biak in chhungah lutin Dist. PYD President Evan. J. Vanlalruata’n Inkhawm a kaihruai thung a; North Mizora District PYD Diamond Jubilee mei chu Rev. Lalmalsawma Sailo, Gen Treasurer UPC NEI chuan a det a ni. Hemi hnu hian District PYD Report Evan. K. Rotluanga, NMD PYD Secretary chuan neiin; Bro. Lalruatdika Dinthar chuan fakhla mawi a sa bawk. Solo ngaihthlak zawh hnuah Thusawi tawi District Kohhranpui atang te, District PYD hruaitu lo ni tawh atang tein thu ngaihnawm tak tak ngaihthlak a ni a, Dist. PYD Diamond Jubilee lawmna bul tan inkhawmah hian Sis. H. Ramtharzuali’n fak hla sain pathian thu chah Gen. Supdt. Of NEI Rev. R. Lalrinsanga a sawi a, General Choir te leh District PYD Zaipawl ten rawngbawlna an nei bawk; Jubilee lawmna inkhawm hmasa chu Rev. C. Lalthantluanga, NMD Missions Director chuan malsawm tawngtainain a khar a ni.
———-
Chawlhhmun Bial Missions Dept. work camp:
North Mizoram District Mission Department enkawlna hnuaia awm West Phulpui Missions Field Sunday School Hall tur sain Chawlhhmun Bial Missions Dept te Feb ni 22 thawhtanni khan an feh chhuak.
Phulpui Missions Field SS Hall Work camp-a sa tur hian Chawlhhmun Bial atangin member 10 an thawk chhuak a, Phulpui MF Kohhrante’n lawm taka lo dawngsawng a ni. Feb ni 23 Thawhlehni zingkar atangin SS Hall sak hna an thawk nghal, hnathawka an bun tan ni hian Hall Seal leh Liang bakah bangrel an vuah hman a, a tuk nilaini zing atanga thawk tan lehin inchhun leh chum an vuah bakah inchung an chih hman vek bawk. West Phulpui MF SS Hall lenzawng hi a dung ft 24 leh a vang ft 12 a lian a ni.
Feb ni Ni 25 (nilaithawhtan) ah a bang pin hna thawk zo lehin, SS Hall chhuat an plaster hman a, zirtawpni feb ni 26-ah Hall chhuat an plaster zo vek a, Hall panna Step an siam hman bawk.
Chawlhhmun Bial Missions Dept te hian hna an ulukin an thawk chak e mem a, Hall hma lam skarting chin brick-in an rem mai bakah Sunday school hall chhung Electrict wiring an ti vek bawk a, Feb ni 27 (inrinni) zing dar 6 khan Work campers te hian West Phulpui chhuahsanin Aizawl panin an haw leh ta a ni. West Phulpui Missions Field kohhran member te leh North Mizoram District hruaitute chuan hun leh tha tam tak seng a, Missions Field tana hnathawktu chawlhhmun Bial Missions Dept. te chungah lawmthu an sawi.
———-
Districrt LAD ten thilkpek dawng:
Kar kalta February ni 22 thawhtanni khan Sist. Lalramtiami Sailo W/o Evan. Vanlalliana (L) chuan, A pasal Evan. Vanlalliana hriatreng nana North Mizoram District Camping Centre Sakawrtuichhun-a dah turin Camping Speaker room a mi tur dawhkan leh a tul apianga hman atan thosilen engemaw zat, NMD LAD hruaitute hnenah a hlan.
Sist Lalramtiami Sailo thilpek hlu tak tak te hi NMD LAD hruaitute chuan Pi Tiami te in Tlangnuamah dawngin; he mi ni vek hian NMD LAD hruaitute hian District Kohhranpuiah an thilpek dawn te hlan nghalin, District Kohhranpui aiawh in Dist. Secretary Rev. Chhiarpuia chuan lawm takin Sist. Lalramtiami Sailo thilpek chu a lo dawng a ni.
———-
Darchawi rawngbawlna:
Feb ni 20 Inrinni khan NMD Tlangsang bialtu Pastor K. Ainawna leh a rawng bawlpui member pariatte ṭawngṭai rawng bawlna kal tlangin, Pathian hnathawh ropui tak a rawngbawlna hmun Darchawiah thleng. Pastor K. Ainawna kut hmanga Pathian tihDamna chang nghal mi 9 lai awm lehin, damna chang zingah hian beng chhet pakhat chu chawp leh chilhin a dam nghal a, Zan inkhawmah Pathian thlarau thianghlim dawng thar engemaw zat an awm bakah thlarau thianghlim siamtharna chang mi thahnem tak an awm bawk.
———-
Sumsuih Bial chhunga Local hrang hrang Upa ten N. MIZORAM District Pisapui an tlawh:
Feb ni 22 (Thawhtanni) khan NMD Sumsuih Bial chhunga Kohhran hrang hrang Sumsuih, Thiak leh Lamchhip te chuan N. Mizoram district Office tlawhin, Sumsuih Bialtu Pastor Rev HF Malsawman rawngbawltute a rawn ho. Sumsuih Bial atang hian Rawngbawltu pawimawh tak tak member 22 an rawn kal a ni.
Sumsuih Bial chhunga rawngbawltu upate te hi, NMD Office hian thingpui leh a hmeh tuihnai tak nen lo dawngsawngin inkhawm tawi buatsaih a ni a, Dist Missions Director Rev C. Lalthantluangan hun kaihruaiin Rev. K. Lalduhsanga Dist Treasurer chuan mikhual lawmna thu a sawi a, hemi rual hian NMD dinhmun tlangpui report a nei a, Sist R. Lalpianfelin Office Accountant chuan Office-a thawkte inhmelhriattirna a nei bawk.
Dist Office rawn tlawh Sumsuih Bialte hian NMD Office tan hian thilpek hlu tak Hmunphiah phiah 10 leh Kurtai tuitak an hlan a, Dist Office a thawktute an lawm hle. Inkhawm tawi hmannaah hian thusawi tawi Dist. SUpdt Rev. Laltluanga, Dist. Secretary Rev. Chhiarpuia leh Sumsuih Bialtu Pastor Rev. HF Malsawma te hnen atangin thusawi ngaihnawm tak tak ngaihthlak a nib awk.
———-
Luangmuatah Mithar lawmlut:
Feb ni 28 Pathianni khanhian Bukpui Bialtu Pastor H. Lalrinpuia chuan UPC-NEI Lungmuat kohhrana lawi turin mithar duhawm tak lawmluhna a nei. Mithar lawmluh hi Pu Thanglura niin; lungmuat kohhrante chuan an lo lawm hle a ni.
———-
Tumpanglui MF Mithar:
Feb. 28 Pathianni khan Rengdil Bialtu Pastor bial fan programme hmang chuan Tumpanglui Home missions field-ah mithar – 1 UPC-NEI, Tumpanglui kohhrana lawi turin Lalpa Isua hmingin a lawmlut.
———-
Pentecostal gateway:
Covid hrileng avanga hun rei tak school kal theih loh hnuah Sorkar thuchhuah anga North Mizoram District School enawl PG Higher Secondary School zirlaite pawhin Feb ni 22 thawhtanni atang khan Regular-in School an kal tan.
Hetiahrual hian School naupangte hi Thermal Screening neih vek tura tih niin; Screening neihna tur Infrared Thermometer Rs 7,999/- man lai mai chu, PG HSS tan hian Bro Jacob Ngursangkhuma te chhung, Durtlang Gosen Veng (Mana Drugs Store neitu) te chuan PG Higher Secondary School hman turin an pe a, PG-a kal naupangte leh zirtirtute an lawm hle.
———-
———-
AIZAWL EAST DISTRICT RAWNGBAWLNA
Hruaitute Programme:
Rev Biaksangzuala, District Superintendent chuan Pathianni hmang hian Darlawn bial, N.Serzawl Biakin hawnna a nei anga ruahmanna ang chuan Thawhtanni-ah Aizawl a let leh ang.
Rev VL Hnemtluanga, District Treasurer chuan Pathianni hian Khawzawl Bial, Khawzawl Lungvar Vengah Preaching Point hawnna a nei ang.
———-
Licence la tharte pualin hun hmang:
March 4, Ningani khan District Committee room-ah Aizawl East District chhunga Licence la tharte pualin hun hman a ni. He hun hi Rev Biaksangzuala, District Superintendent chuan kaihruaiin Rev R.Lianzama, Missions Director in hunserh a hmang a ni. He hun hmanah hian Rev Vanlalfela Ramtiam, District Secretary hnen atangin Administration chungchangah fuihna thu sawi ngaihthlak niin Rev VL Hnemtluanga, District Treasurer hnen atangin Financial chungchang ngaihthlak a ni bawk. Rev Biaksangzuala, District Superintendent chuan Licence la tharte hnenah Certificate hlanna a nei nghal bawk a ni.
———-
Charge inhlanna nei:
Aizawl East District PYD hnuaia Sub-Committee peng hrang hrang hruaitu hlui leh thar te chuan February 28, Pathianni chawhnu khan charge inhlanna hun an hmang. He hun hi Upa F.Lalthlangliana, District PYD Vice President chuan a kaihruai a ni. He hunah hian Kum 2020 chhunga Sub-Committee hruaina hna lo thawk tawh leh Kum 2021 chhunga hruaitu atana ruat tharte an tel thei a ni. Hruaitu hlui leh thar ten Charge inhlanna an neih zawha heng Sub-Committee hrang hrang a member turte Bial hrang hrang atangin ruatchhuahna neih chhunzawm nghal a ni.
Kum 2021 chhunga District PYD hnuaia Sub-Committee neihte:
1. Kumpuan 2. Education 3. Fund Raising 4. Environment 5. Music & Sound 6. Talent Search Organising.
———-
PYD Inkhawmpui:
February 26 atanga 28 chhung khan Darlawn bial te chuan Bial PYD Inkhawmpui vawi 37-na tluang takin Darlawn hmunah an hmang. Inkhawmpui hi Rev T.Lalbiakliana, Bialtu Pastor chuan Pathian hnenah hlanna a nei a, Bro.Solomona chuan palai lawmna thu a sawi bawk. Speaker atan Rev VL Hnemtluanga, District Treasurer chu hman niin Inkhawmpui thupui atan Nangni in Thianghlim tur a ni tih chu hman a ni.
Darlawn bialte hian Inrinni khan thalai te leh social media tih thupuia hmangin Seminar an nei nghal a, resource person-ah Upa Lalfakawma Chhakchhuak, BDO Darlawn an hmang a ni.
Bial PYD Inkhawmpui hi January Pathianni hnuhnungbera hman tur ni mahse Darlawn bial te hian remchan zawkna avangin February 26 atanga 28 chhung khan an hmang a ni.
———-
Work Camp:
February 22, Thawhtanni-a Rabung Bial, Saichal Kohhran biak in sakna tur lungphum Rev. Biaksangzuala, District Superintendent in alo phum tawh chu Rabung Bial PYD, 2020 kum tawp Board in Saichal Biak in sak bul tana work camp neih nise tia a rel angin ni 22 – 25 Feb., 2021 khan Rabung bial PYD chuan work camp neiin Saichal Biak in sak bul an tan. Work camp hi Bialtu Pastor in hovin, hna awm hmasa zawh niin tha 140 sen a ni. Saichal Biak in hi Sis Rindiki, Bethlehem Veng in a pa hriat rengna atan a sak sak a ni.
———-
Mithar leh baptisma chang thar:
March 1, Thawhtan zan khan Darlawn Bial, Darlawn Kohhrana lawi turin Rev VL Hnemtluanga, District Treasurer chuan mithar 9 Kohhranah sengluhna a nei a, an zinga pakhat hian sual ngaihdamna baptisma Rev VL Hnemtluanga kutah hian a chang nghal a ni.
February 28, Pathianni khan Rev R.Lianzama, District Missions Director chuan Khawlian bial Daido hmunah rawngbawlna neiin Pathianni chawhnu khan mi 2 in Rev R Lianzama kutah hian sual ngaihdamna baptisma an chang thar a ni.
February 27, Inrinni zan khan Zemabawk North Bial, Bethel Kohhrana lawi turin member 3 chu Evan H Malsawmthanga’n sengluhna a nei. Zemabawk North Bial-ah hian Evan Malsawmthanga hian rawngbawlna a nei mek a ni.
———-
Zirlaite pualin hun hmang:
February 28, Pathianni zan khan Bethlehem Bial PYD Education Sub Committee te hmalaknain Bial chhung a Class X Exam hma chhawn mai tur te pualin Thlahual Tawngtai sak na leh an harsatna te buaipui tur in Education Campign Programe hman a ni.
He hun hi Bro Oliver Lalthlengliana, Bial Education Sub Committee Chairman chuan kaihruaiin Education Campaign a nei thin a, Bial PYD President Evan H Lalhlimpuia’n tawngtai rawngbawlna neiin fuihna thu a sawi thung a ni. He hunah hian Bial chhunga Class X Exam tur zawng zawngte chu an mahni inah kal chilh in, tlawh chhuah kim vek an ni.
———-
Leadership Training:
February 28, Pathianni chawhnu khan Serchhip Bial PYD buatsaihin Leadership training hlawhtling taka hman a ni. He hun hi Biakinpui hmunah hman niin Rev R.Lalrinsanga, General Superintendent chu Resource person atan hman a ni a, T.Upa Lalramnghaka Kawlni, Bial PYD President chuan a kaihruai a ni. Serchhip Bial PYD ten Leadership Training an buatsaihah hian Bial chhung atangin Local hrang hrang PYD OB leh Bial PYD OB te an telkim hle a, Resource person paper buatsaih chu zirhovin hlawkthlak an ti hle a ni.
Facebook