GENERAL NEWS:
GENERAL HEADQUARTERS OFFICE HAWN A NI:
Hripui leng vanga hun rei tak in kharkhip a nih hnuah August ni 16 2021 Thawhtanni atang khan General Headquarters Office, Mualpui Salem veng chu hawn tan leh a ni a, Ni kar thlakin Sawrkar SOP siamte zawm chunga Office hi kal thin a ni. Tulbik thilah chuan Office hi Kohhran mipui te tan dawr theih a ni.
———-
GENERAL LAD HRIATTIRNA:
Ni 18.08.2021 (Wednesday) a General LAD Executive Meeting vawi 60 – na rorel pakhatna a passed angin Kumin 2021 General LAD Conference 43-na October chawlhni vawi hnihna (Ni 10.10.2021) hmanga Aizawl East District, Serchhip Bial a neih tura lo ruahman tawh chu Covid-19 hrileng mek avangin thulh mai ni se tih a ni.
A tul dan leh boruak en chung zelin Extend Board/Special Conference emawte pawh la neih mai ni se tih a ni.
SIS LALRAMTHANGI B/W
General LAD Secretary
———-
———-
LUNGLEI DISTRICT NEWS:
1. SEPTEMBER NI 1 ATANGIN PENTECOSTAL BIBLE SCHOOL TAN A NI DAWN :
Lunglei District UPC-in thla khat awh Pathian thu zirna a neih, Pentecostal Bible School (PBS) chu hripui leng avangin a hun pangaiah tan theih a nih loh hnuah September ni 1 Nilaini hian tan tur a ruahmanna siam a ni a, October ni 3 Pathianni ah Graduation Day hman a ni ang. PBS kal turte hian September ni 1 (PBS Registration Day-ah) Admission tihfel tur a ni. Kumin PBS ah hian 1st Year-ah mi 3, 2nd Year ah mi 12 leh 3rd Year ah mi 5 an awm dawn a ni.
———-
2. ONLINE SERVICE CHUNGCHANGA KOHHRAN MEMBER-TE NGENNA:
Hripui leng avangin nunphung a khaihlak nasa em em a, kohhran ho te pawh Biak inah kan inkhawm theih loh avangin mi thahnemngai ten a remchan dan angin inkhawmna Online Service-in kan buatsaih thin niin a lang a, a lawmawmin kan thlarau nun kan inchawm tawnna pawimawh tak a ni a, chhunzawm zel theih pawh nise a duhawm hle a ni.
Chutih rual chuan Lunglei District huam chhunga Online Service buatsaih tur ten District pawn lam mi Speaker-a kan hmang dawn anih chuan Dist. Superintendent remtihna lak hmasak tur a ni tih kan in hriattir a ni.
Lunglei District kohhran Member-te rawngbawlna zau zawk nei zel turin thahnemngai takin i thawk zel ang u.
Rev.C.Vanlalena
Superintendent
United Pentecostal Church
Lunglei District
———-
3. TNT AH TANPUINA HLAN :
Lunglei Dist. PYD Conference-in TNT Theiriat ah tanpuina hlan ve nise tia a lo rel bawhzuiin August ni 14 inrinni khan Lunglei District PYD hruaitute chuan TNT Hrangchalkawnah tanpuina ₹ 10,000/- an hlan.
———-
———-
LAWNGTLAI WEST DISTRICT NEWS:
District Board nei dawn:
August ni 25 2021 Nilaini thlenkim ni a hmangin, Dt.26.08.2021 Thursday hian Lawngtlai West District Board neih tur a ni dawna, General lam hotu te pawh he board ah hian lo tel tura beisei an ni bawk a ni.
Diltlang south Bial Pastor Quarter sak chhunzawm:
Hripui avanga enge maw chen Pastor quarter sak chawlhsan chu sak chhunzawm leh niin kohhran hote an phur hle a ni.
———-
———-
NORTH MIZORAM DISTRICT NEWS:
District Puipa Meeting nei:
North Mizoram District hruaitu pathum thukhawm (Officer Meeting) Aug ni 16-a neih chuan, North Mizoram District huam chhunga Kohhran member mi harsa zualpui chhawmdawlna pek dan tur chungchang te sawiin; Officer meeting hmasa a neih tawh Kum 2021 kum chanve Audit Aug ni 9-a neih tura rel tawh. Covid hrileng avanga Total lockdown neihin a tih sukuk chu Aug ni 30 atanga Sept ni 1 chhunga neih an rel bawk.
Hei bakah hian hrileng dinhmunin zia lam a pan lutuk loh karah Kohhran hna pawimawh awm dan thlir chungin Office hawn tawh an rel a, Aug ni 16 atangin Partial Lockdown dan thlir chungin Office an hawng tan. Hetih rual hian Sorkar lam thuchhuak leh General Office kal dan dungthulin Office staff te chu August 2021 chhung chu kartin thawhtan, Nilaini leh Zirtawpni kal tura ruahman niin; hetah hian Office Staff te kal dan tur detailment siam a nib awk.
———-
LAD Executive committee nei:
UPC NEI North Mizoram District LAD te chuan Executive meeint Aug ni 16 thawhtanni khan, District Office Committee room-ah an nei a, Meeting Sist K. Lalhmachhuani B/W Dist Lad President in kaihruaiin; kumchan District LAD Board hrileng avanga neih theih tak loh chungchang sawi hovin; boruak thlir chungin board neih dan tur chu ruahmanna siam thar tha an ti. Meeting-ah hian District-in tirhkoh tira rawngbawlna a neihna hmun Zawlnuam Bial, Bungthuam kohhran Biak in sak mek chu electric wiring leh Ceiling siamnan Rs. 25000-a tanpui ve an rel bawk. District LAD inenkawlna dan siam mek an thlir ho a, siam rem ngai lait e siamrem tura dah a nih bakah North Mizoram District Camping center pulpit leh maicham siamtha tura ruahmanna an kalpui chu peih tawh niin; tun dinhmnah Camping Center chu Sorkar in Quaratine Centre atana a hman avangin; remchang hmasa berah dah tura rel a ni.
———-
Sum Audit nei mek:
Tunlai hian NMD huam chhunga Biak in leh Pastor Quarters sakna tura District in sum a sanction, Pastor Bial thenkhat hmalakna mek a sum hman dan te Audit neih mek a ni a, Auditor atan Rev. C. Lalramthanga Dist. SS Director leh Rev. C. Laltlanchhuaha, Dinthar Bialtu Pastor te hman a ni.
Aug ni 17 thawhlehni khan Auditors te hian Bairabi Bial leh Bilkhawthlir Bialah te audit hna an thawk tawh a, Aug ni 18 Nilaini khan Thenzawl Bialah Audit hna hi an thawk leh a ni.
———-
Member thar nei:
Kawnpui Bial: Aug ni 18 Nilaini zan khan Kawnpui Kanan Preaching Point-ah Presbyterian Kohhran aṭangin member thar pali sengluh niin; member tharte hi Bialtu Pastor Rev. PC Laltlankima’n an chenna inah a lawmlut.
Kanan Preaching Point-ah hian District tirhin, Evan. F. Lalnunhlua chuan kumin March thla aṭang khan rawngbawlin a awmchilh a; ani awm hnu hian member 9 (Presbyterian kohhran aṭang vekin) laiin Kanan Kohhran an pun belh a ni.
Kanan Preaching Point-a rawngbawlna hi kum 2018 aṭang khan Kawnpui Bial PYD bultumin bul ṭan a ni a. Rawngbawltu pali rawih tawh niin, tunah hian member 29 lai an ni tawh a ni.
Rengdil Bial:
Kolalian: Aug ni 15 Pathianni khan Kolalian Mission Field- ah Hindu aṭangin Mi thar – 1 seng luh niin; missionary awm mek Evan Hrangchhankhuma’n Lalpa Isua hmingin a lawm lut a ni, kumin 2021 chhung hian Kolalian M.F ah Mi thar -40 sengluh tawh niin; rawngbawltute pawh Pathianin a awmpui hle a ni.
———-
———-
AIZAWL EAST DISTRICT NEWS:
PASTOR QRTS.HAWNG:
Aug.15, Pathianni khan Serchhip bial Pastor Qrts. sak thar chu Rev.Biaksangzuala, District Supdt.chuan hawnna a nei. Hawnna hun hi Rev.B.Lalengzauva, Bialtu Pastor chuan kaihruaiin Bial Secy.leh Bial Trea.te hnen atangin report ngaihthlak a nih bakah Dist.Superintendent hian thuchah tawi a sawi bawk a ni. Pastor Qrts.hlanna tawngtai rual neih a ni bawk. He hunah hian a duh apiang tan thusawi hun hawn niin Rev.C.Laldintluanga, Serchhip Dinthar bialtu Pastor chuan malsawm tawngtaiin hun a titawp a ni.
Serchhip bial Pastor Qrts.hi Jan.6.2020 khan sak that tura thiah niin thiah zawh a nih hnu atang hian a thar sak chhunzawm nghal a ni. March 16.2020 khan Bialtu Pastor, Rev.B.Lalengzauva chuan lungphum alo phum tawh bawk a ni. Qrts.sakna atan hian Bial chhung leh pawn atangin hnatlang tha 700 chuang sen a ni a, Bial chhunga Local hrang hrangte an in hnatlan chhawk thin a ni. He Qrts.sak nan hian District atanga tanpuina bakah bial in budget a siam atangin cheng nuai 36 chuang senral a ni. Serchhip bial Pastor Qrts.hi a dung, a zau lai berah ft 55 leh inches 9 niin a vang, a zau lai berah ft 33-a liana sak a ni.
———-
PENSION THLAH:
Aug.8, Pathianni hian Sawrkar SOP zawm chungin AED Bazar bialtu Pastor, Rev HL.Thakunga pension thlahna Bazar biakinah sawmbik mi tlemte ten an hmang. He hun hi Evan Hr.Lalrindika, Bial Secy.chuan a kaihruai a ni. Rev.Biaksangzuala, Dist.Supdt.chuan thlahna thu a sawi bawk.
Rev.HL.Thakunga hi July 28 khan Pension-in alo chhuak tawh a, hrileng avanga thlahna hun buatsaih lawk a nih theih loh hnuah vawiin Pathianni hian thlahna neih a ni ta a ni. Bazar bial hi Bethlehem bialtu Pastor, Rev.Rohmingliana chuan alo hmui rih dawn a ni.
———-
TANPUINA HLAN:
Aizawl East District chuan Covid-19 hrileng avanga Sawrkarin hun rei tak chhung AMC Area-ah Total Lock Down a puan avanga Kohhran chhungkua harsate tanpuina atan District chhung AMC Area (Aizawl khawpui chhung) Bial hrang hrangah District Superintendent Relief fund atangin tanpuina a pe. He tanpuina sum ₹340,000/- hi bial hrang hrangah hian a rualkhai thei ang bera sem niin Bial te hian anmahni bial chhung theuhah tanpuina hi an remchan angin Kohhran chhungkuaah an hlan ve leh a ni.
———-
LIVE CRUSADE:
Aizawl East District PYD chuan ruahmanna an siam angin August 6-8 chhung khan Kahrawt Biakin, Champhai Live Crusade hlawhtling takin an nei. Speaker-ah Rev.VL Hnemtluanga leh Rev KVL Hmangaihkima te hman niin Sis.F.Lalhriatchhungi’n zaia rawngbawlna a nei thin bawk a ni. Live Crusade hi District PYD hruaitute chuan an inkaihhruai chhawk thin a ni.
District PYD Live Crusade hi Champhaia cable pahnih, CCN leh LCN te chuan cable tv-ah live a pe chhuakin CCN Youtube channel-ah live a pekchhuah a ni bawk.
———-
Mithar:
Aug.11 (Nilai zan) khan Kawlkulh Bial, Vengthar kohhran-ah Nupa tuak khatte chu Bialtu Pastor R.Malsawma’n kohhranah sengluhna a nei.
August 15, Pathianni khan Saitual Bial N.Lungpher Kohhran-ah mithar 3 sengluh niin Kohhran mi 29 leh mithar 1, an vaiin mi 30 tem sual ngaihdamna Baptisma an Bialtu Pastor, Rev.T.Lalbiakliana kutah an chang a, nau Pakhat hlan a ni bawk.
———-
District board:
August 20, Zirtawp zan khan District PYD Kum chanve board chu Online, Google meet hmangin tluang taka neih a ni. Rev.C.Lalmalsawma, President chuan he board hi a kaihruai a ni. District PYD board-ah hian bial atang leh Official atanga agenda lutte ngaihtuah niin District Kohhranpui hruaitute pawhin an telpui bawk a ni.
District PYD Board hi ruahmanna ang chuan July 2-a neih tura tih a ni a, hrileng avanga neih theih a nih loh hnuah a hun hi sawn niin tun hunah hian Online hmangin neih a ni ta a ni.
———-
———-
CHHIMTUIPUI DISTRICT NEWS:
CHHIMTUIPUI DIST GOLDEN JUBILEE BUILDING HAWN ANI.
August ni 10, 2021 @ 11:00 Am khan former Dist Superintendent Rev L Chungling chuan Chhimtuipui Dist Golden Jubilee Building chu luah theih turin hawnna anei. He Building sakna atan hian Dist chhung Kohhran member tinte, local, Bial leh Dist level Department tinte an ṭangrual in, Nuai 143 vel sengin tun dinhmun ah chhawng hnih peihfel ani. Chhungkua lian tham tak tak luah theih tur In 4 leh Dawr atan a hman tur kua hran 6 niin, mi 10 ten In hi an luah ang.
Building hlanna hun tawi hi Dist Superintendent Rev Joseph L Thlauhthang chuan kaihruaiin, Rev Kholy Hlychho Dist treasurer in report ape a. Rev C Valy pensioner hnen aṭang building bul ṭan dan ngaihthlak ani a. Rev Thanchunga Sailo pensioner leh Upa C Raltawna Chairman Dist Hqrs local ten thutawi sawina annei. Tin, Rev L Chungling Former Dist Superintendent hnen aṭang Dist Hqrs Office hmun hma kan neih dan report ngaihnawm tak ngaihthlak ani bawk.
Rev WL Thanghre in lawmthu sawina neiin, Rev Dr.C Sihmo chuan tawngṭaina anei bawk ani.
He building hlanna tawngtaina hi kalkhawm zawng zawng ten kan nei bawk ani.
Tin, pennet ic Bro K Vanrohlupuia chuan Pastor pension te interview na anei nghal bawk ani.
———-
DIST PYD EXECUTIVE MEETING THUREL
1. 45th Dist PYD Conference hun chu, Dist Kohhranpui Board in Dist PYD hruaitute leh Dist Official ten lo ruatmai se atih angin, Dt.4-6, March 2022(First week of March) chu lungrual tak pawm tlan ani. Ahma lamin Dist Board ah approval lak ani ang.
2. Dist PYD ten hun engemaw chen Online service akalpui chu, kan boruak te thlir chungin tihtawp lailawk nise. Chutih rualin kan kalpui chhung a rawngbawlna pawimawh tak thawktu Bro.KC.Gospelmawia Dist Hqrs local chungah lawmthu kan sawi a, hun min hman saktu teleh min hlut saktute chungah Dist PYD chuan lawmthu a sawi.
3. Dist PYD ten Chhimtuipui Dist chhung Local, Bial leh Dist level Department chanchin ziah nise atih. Material lakkhawm hun atan August 2021 ral hma ruat tawh chu hripui leng avangin December 2021 thleng sawn ani. Tun dinhmun ah Dist LAD, Council Veng local, Bethlehem local Siata, Pangkhua local, leh South Lungpher local church aṭang soft copy kan dawng tawh a ni. Ahma lam a thehlut zel turin ngenna siam nise ṭha tih tlan ani.
Heng bakah hian Financial possession leh Mission support fund thlir ho niin, thupawimawh dang chu hun dang rel atan dah a ni.
———-
MEMBER THAR 10
Chhimtuipui District chhung home mission field Vahia hmunah Pathian hnathawh ropui alang zel a. August 2021 thla chhungin, chhungkua 2 aṭangin member 10 techu UPC (NEI) a Member atan lawm luh anni. Vahia hmunah hian Evan Khaching Aineh chuan rawngbawlna neiin a awm chilh mek a, mithar tehi home missionary leh Pastor MH. Robin Lalthanmawia Tuipang sectional pastor ten lawm lutin, Sual ngaihdam nan Isua hmingin tui baptisma an chantir nghal a ni.
———-
JEHOVA JIRE- Biak In sak nan Rs.50000/- thawh
Amobyu Vaihthie Biak In sakna atan JEHOVA JIRE (Hming leh Khua thup) hnen aṭangin Rs.50,000/- dawn a ni. A petu hi thawktu leh Kohhran member te nen in hre ngai pawh an ni lo a. Biak In sak lai a awm a ni tih a hriat avangin sum tam tham tak hi Evangelist hnenah a hlan a ni. Amah hian hetianga puanzar a duh lo em em a. Mahse, Lalpa mite ṭawngṭaina chhanna hi ngawihbopui mai tur atan an phal loh avangin a hming leh khua puangzar lo in hetiang hian JEHOVA JIRE inpuanna ah an ngai nghet tlat a ni.
Facebook