Beihrual thuzir tur thawnchhuak mek :
Tunkar atang khan kumin 2019 chhunga Beihrual thupui zirtur Thuthlung fate puitlinna tih lehkhabu chu General Hqrs Office, Mualpui Salem veng Aizawl atangin semchhuah tan a ni.
Kumin thuzir tur Thuthlung fate Puitlinna tih hi Rev. Ellic Hnehzova Fanai ziah niin a bu chhungah hian bung 20 a awm a; Thuthlung fa te puitlinna tur kawng hrang hrang thupuiah siamin Kohhran hoten kan hlawkpui ngei a beiseiawm hle.
Literature and Publication Board Chairman Rev. R. Lalrinsanga chuan he lehkhabu kaltlang hian hlawkna leh malsawmna duhawm tak chang theuh turin Kohhran hote duhsakna a hlan a. Hun tawite chhunga zir zo mai lova, inbuatsaihna tha tak nen uluk taka zir theuh turin Kohhran hote min ngen bawk.
General Suptd Rev. Lalmalsawma Sailo pawhin; Pathian thuin min zirtir ang taka Thuthlung fate hi puitlinna kawng dik zawha thanglian zel tur kan nih avanga he zirlai hi buatsaih a ni a ti a, Beihrual thuzir kaltlanga Kohhran hote malsawmna dawng theuh turin duhsakna a hlan bawk.
——–
Hnatlang :
Aug 12, Thawhtanni leh ni 15, Ningani khan Mualpui Bial LAD te chu General Hqrs compound ti faiin an hnatlang.
Bial LAD te hian General Hqrs Office panna kawng tihfai leh chei mawi hna thawk turin an inbuatsaih a, an hnathawh a ropui hle. Bial chhunga LAD member a thei thei te thawkchhuakin thahnemngai takin an thawk a ni.
——–
General Hruaitute Programme :
General Treasurer Rev. Zohmingthanzama chuan Aug ni 16, Zirtawp ni khan Aizawl chhuahsanin Phainuam a pan a, Phainuam Bial ah hian Seminar neiin Pathianni zan thleng rawngbawlna a nei dawn a ni.
General Missions Director Rev. R. Lalhawia leh General SS Director Rev. R. Laichhingpuia te chuan Aug ni 17, Inrinni khan Aizawl chhuahsanin Kolkata an pan a, Pathianni hian Kohhran hote inkhawmpuiin rawngbawlna an nei dawn a; Aug ni 21, Nilaini ah Aizawl an let ang.
General Suptd Rev. Lalmalsawma Sailo leh General Secretary Rev. R. Lalrinsanga te erawh chu zin chhuak loin an lawina Kohhranah an awm thung.
——
Lunglei District :
Thianghlimna Committee hmalakna :
Lunglei District Thianghlimna Committee-te chuan Aug.18 Pathianni hian Leite Local leh Lungsen N Local-ah te Campaign hi an neih chhunzawm dawn.
Leite Local-ah hian Evan.C.Lalremchhunga leh Upa C.Fakzuala ten hun hmangin, Sist.B.Vanlalropeki chuan zaiin rawngbawlna a nei ang a, Lungsen N Local-ah hian District Treasurer Rev.C.Lalrintluanga leh Upa Lallawmawma te chuan Campaign hi an nei dawn a ni.
Thianghlimna Campaign hi Aug.11 Pathianni pawh khan Rawpui leh Thingfal Local-ah te neih a ni a, Rawpui Local-ah hian District Missions Director, Rev.R.Vanlalenga, District Thianghlimna Committee Secretary Evan.T.Lalzawmsanga leh Rev.Ralkpakunga Khiangte te chuan hun an hmang a, Sist.H. Lalengzami chuan zaiin rawngbawlna a nei bawk. Thingfal Local-ah hian District PYD President Evan.V.Lalduhawma leh Upa Sailova ten hun an hmang bawk.
Haulawng bial Thianghlimna Committee- pawhin an bial chhungah hma an la chho mek a, September chawlhni hmasa berah hian bial chhung Local zawng zawngah Thianghlimna thupuiah hmangin Sermon neih nise an ti a, Bial chhung Local hrang hranga kum 15 chunglam zuk leh hmuam nghei te hming bial Thianghlimna Committee Secretary Evan.Simona Hmar hnenah thehluh vek nise an ti bawk.
——
Camping :
Dawn Local PCD te buatsaihin Aug.10-11 chhung khan Camping Cum Crusade Dawn Local UPC biak inah neih a ni a, Speaker atan District Superintendent Rev.C.Vanlalena hman a ni . Hlim taka hun hman a ni a, Aug.11 Pathianni chawhnuah Praise & Worship-a hun hman a ni bawk.
He hun hi Headquarters bial PCD te chuan an hmanpui bawk.
—–
Training :
Aug.11 Pathianni khan bial rorel angin Sesawm vengchhak leh Vengthlang a rawngbawltute pualin Sesawm vengchhak Local biak inah Rawngbawltu Training neih a ni a, resource person atan bialtu Pastor Lalengzauva an hmang.
He Training ah hian mi 17 an kal thei a, Bunghmun bial hruaitute pawhin an hmanpui bawk.
——-
Member thar :
Aug.11 Pathianni khan Dawn Local-ah bialtu Pastor Rev.K.Lalchhuansanga chuan mi thar 8 kohhranah a seng lut.
—–
Fehchhuak :
Aug.11 Pathianni khan Lunglei Electric Local, Lunglei Missions Department bultumin Headquarters bial Missions Department-in a enkawl mek Bualte Missions Field ah rawngbawlna neih a ni a, member 70 chuang an fehchhuak.
Tlai lamah Electric Local-te buatsaihin chawhlui kil ho nghal a ni a, Kohhran hoten hlim takin hun an hmang a ni.
—–
Jubilee lawm :
Aug.10 inrinni khan Chawngte Local-te chuan an Local kum 50 tlinna (Golden Jubilee) kharna hun hlim takin an hmang.
He Jubilee kharna inkhawmah hian bialtu Pastor Rev.B.Kamliana chuan Souvenir tlangzarhin hlim takin hun an hmang a, tlai lamah ruai an kilho bawk.
Chawngte Local Golden Jubilee hi nikum February 15 kha a ni a, hlim takin a lawmna hun hi an hmang tawh a, Aug.10 inrinni khan a kharna hun hi an hmang leh a ni.
——–
North Mizoram :
Pastor Quarters hawng :
North Mizoram District, Zawlnuam Bial Pastor Quarters chu Aug ni 11 Pathianni khan, North Mizoram District Superintendent Rev. Laltluanga chuan Pathian hnenah hlanin a hawng.
Pastor Quarters hawn Programme hi Pathianni tlai dar 3:00 Pm-ah tanin Quarters kawtah kohhran mipuite an pungkhawm a, Dist. Supdt. Rev. Laltluanga chuan Deut 20:5 thu a chhiar a “ Zawlnuam Bialte’n Pastor Quarter tha tak kan neih leh Lal Isua hminga a hawnna leh a hlanna nei theia kan awm hi Pathian malsawmna ropui tak a ni” a ti.
Pastor Quarters hawn hnu hian a chhungah lutin Quarters thar lawmna thingpui in ho a ni a, Zawlnuam Bial Secretary Evan. Lalrinawma’n Zawlnuam bial Pastor Quarters neih chungchangah report pein Quarters hmun chu kumin June ni 1-a lei a nih thu te, Quarters neih theihna tura Dist. hruaitute hmalakna leh Bawrai kohhran ten theihtawp an chhuah thu te sawiin; Quarters hawnna hun ropui tak buatsaih a nih avanga a lawmthu te a sawi bawk a ni.
Zawlnuam Bialtu Pastor K.Malsawmkima pawhin thu sawiin Quarters len zawng a dung fit 36 avang fit 24 a nih thu te, bed room 3 a awm thu report ngaihthlak a ni bawk. Dist. Supdt. Superintendent pawhin thu sawi lehin Zawlnuam bial te tan la sauh sauh tura fuihin Kohhranhote an hma laknaah lawmthu a sawi a. N.Mizoram Dist. ten Pathian malsawmna tam tak kan dawn hi chapo nan leh uan nana hmang loin nasa zawka Lalpa rawngbawl zel nana hmang turin kohhranhote a chah a, Headquarters pawimawhna kawng hrang hrang a sawiin Zawlnuam kohhran pawh Bial Hqrs. an nihna zawnah fuihna thu tha tak tak a sawi bawk a ni.
——
Biak in sakna tur lungphum phum :
North Mizoram Dstrict PYD hmalaknaa rawngbawlna neih mekna hmun Rengdil Bial Kawrthahah Biak in sakna tur lungphum phum a ni.
Biak in sakna lungphum hi Aug ni 6 Thawhlehni kalta khan neih a ni a, hunserh inkhawm Dist. PYD President Evan. F. Lalngaihawma’n kaihruaiin Rengdil Bialtu Pastor. C.Lalthlengliana chuan Biak In sak lungphum hi Lal Isua hmingin a phum a ni.
Tun dinhmunah kawrthahah hian District PYD rawihin rawngbawltu Evan Lalliansawta’n rawngbawlna a nei mek a ni.
Biak in lungphum phum Programme-ah hian Rengdil bial P.Y.D hruaitu te, Rev.R.Lalhmangaiha Maubawk bialtu Pastor te bakah Bial chhung Evangelist te leh P.Y.D member engemaw zat an kal bawk a ni. Kawrthah Biak in hmun hi District board in Rs 600,000 (Cheng nuairuk) in a lo lei tawh a, a sakna tur sum hi Dist.P.Y.D in tumin Dist. P.Y.D leh Rengdil bial chhung atangin Biak In sak work camp hi neih tura hmalak mek a ni.
——
Fehchhuak :
West Phaileng Bial chhunga awm Phulpui Missions Field chu Aug 3 & 4 Inrinni leh Pathianni hmang khan Phuldungsei kohhran te chuan an tlawh.
Phuldungsei Kohhran atang hian PYD leh LAD member thahnem tak an thawk phei a, inrinni zan atanga Maicham buatsaihin Missionary Sist Lalbiakzualin inkhawm hruaina inkhawm apiangin a thawk a, inkhawm Programme buatsaihah Bro. Albert Lalruatkima, Sist. Vanlalhmangaihi leh Phuldungsei LAD Secy Sist. Lalparmawii ten tanna hun an hmang thin bawk.
Inkhawm chhung hian Sist. Zokhumi, Phuldungsei LAD president, Sist.Lalramluahpuii, Phuldungsei LAD treasurer leh Upa F. Lalsangzuala, West Phaileng Bial Secy. ten Pathian thuchah sawiin rawngbawlna an nei thin bawk.
Pathianni chawhnu lamah kohhran in tlawhkualin a tul angin rawngbawlna an nei a, Kohhranhote’n an hlawkpui hle.
Phuldungsei Kohhranten Phulpui Ms Field tlawha hun an hman chhung hian, Thlarau boruak tha tak hnuaiah hun an hmang thin a a ni. Kohhran intlawhte Lalpan a awmpui a, khamlo takin Dar 9 ah inkhawm bangin, inkhawm banah Quarter-ah inkawmkhawmna duhawm tak an nei thei bawk a ni.
———-
Rammut thla pualin fehchhuak :
District Ramtlan Evan Zoramthara leh a Team te chuan Aug ni 14 – 18 chhung hian Maubawk bial Bungkawn kohhranah rawngbawl an nei mek a. Pentecost Revival Team pawhin District PYD tirhin Kawrthahah Rammut Programme an hmang mek bawk.
Apostolic Revival Team te chuan Aug 6 atanga ni 11 Pathianni chhung khan kolasib venglai Kohhranah Revival crusade an buatsaih.
Revival Team te rawngbawlna Pathianin mal a sawm a, Kohhran hote an hlim hle. Aug 10, inrinniah khan Bro. Vanlalrawna te chhungkuain Pathian hnena lawmthu sawi chawimawina an nei a. Pathian Thlarau hna thawh ropui tak nen hlim taka hun hman a ni.
Revival team te rawngbawlna kal zelah Aug ni 12 thawhtan zan khan Bro. Lalrengpuia Pathian Thuthlung hmuh avanga Baptisma chang tawh chu Project veng Biak inah sengluh inkhawm neih a ni a. Rev.B.Vanlalruata Bialtu Pastor chuan Kohhranah senglutin Kohhan hote an hlim hle a ni.
——
Work Camp :
Chaltlang Bial Chanmari Kohhran PYD chuan Aug ni 12, Thawhtanni khan North Mizoram District Missions Field Vawngawnzo Biak in sak hna thawk turin an fehchhuak.
Vawngawnzo hi Mizoram khawthlang lama awm niin; Mamit District huam chhunga awm a ni a, Aizawl atanga Km 112 – a hlaa awm a ni. Kohhran Bial thenah Mamit Bial chhunga awm a ni bawk.
Chanmari PYD te hi Work camp-a fehchhuak tur hian an phurin member 19 lai thawkchhuak turin an inpe a, Aug. ni 13 zing atang khan Biak in sak hna hi an tan a ni.
Workcamp-a fehchhuak te hi
1. Vanlaldika (President)
2. Lalrosanga Sailo (Secy.)
3. Pc Lalrindika (V. Presi)
4. Lalramliana
5. Vanlaltanpuia
6. K Zoramthanga
7. Lalhruaitluanga
8. Lalrochana
9. Immanuel Zodinthara
10. Pc Lalbiakdika
11. Lalruatkimi Ralte
12. Lawmsangzuala
13. Immanuel Lalrinhlua
14. Lalnghatliana
15. Lalrammuana Sailo
16. C Lalmalsawma
17. Lalthankhuma
18. Evan. Lalkrosthanga
19. Evan. C Hmingchungnunga
Chanmari PYD te hian Vawngawnzo Biak in sak nan hian theih tawp chhuaha sumtuakin BP check leh Thisen test te an nei thin a hei bakah hian mimal inpe te hnen atangin sum thahnem tak an dawn bakah Kohhran leh District Missions pawhin phak ang tawkin an pui bawk a ni. (Chanmari PYD Workcamp)
——
Rammut thla rawngbawlna :
August thla Rammut thla denchhenin Hunthar Bial Kohhranpui chuan Aug 2 atang khan Lungverh Kohhranah Crusade rawngbawlna neih a ni.
Crusade-ah hian Tisa leh thlarau lamah Pathian thawhpuina lawmawm tak changin, Aug 10 Inrinni zan khan mi pariatin Speaker Evan.R.Lalrinchhana kutah Lalpa Isua hmingin sual ngaihdamna Baptisma an chang. Baptisma chang zinga mi panga (5) te hi Pentecost mi la ni ngai lo mithar an ni.
Evan.R.Lalrinchhana hi Bro.B.Rengkhuma leh Sist. Hmangaihpuii of Tlangsang (soloist) ten an tawiâwm bawk.
Kolasib Diakkawn Bial, Vengthar kohhran pawhin Aug ni 5 atang khan Rammut Programme hmangin Crusade an nei a. Hun tir lamah Biak Inah Programme tanin, Crusade Speaker atan Evan. Lalchhuanawma (Chhuantea) hman a ni. Crusade-ah hian Mike service, Mual inkhawm bakah home crusade te nei chhovin Rammut hlawhtling tak an hmang a ni.
Damparengpui Bial Dampa Tlangnuamah kar kalta chhung khan mithar 11 neih a ni.
Rammut thla a nih anga Rammut Programme hmang Sist. J Lalmuankimi, Rengdil leh a rawngbawlpui te chuan U.P.C. La dinlohna khua Tumpanglui khuaah Rammut prog. an hmang.
Rammua fehchhuak te Pathianin a thawhpui a, Aug 12 2019 Thawhtan zan inkhawm ah mithar Chhungkaw khat (member -5 ) bakah member pakhat chu Pentecost Kohhrana lawi turin sengluh an ni. Mitharte sengluhna hi Bialtu Pastor C.Lalthlengliana’n neiin, Upa Lalengzama : Rengdil in a tawiawm bawk a ni.
—-
Dinthar bial Missions Department hmalaknain Kanghmun bial, Darlung ah rammut rawngbawlna neih mek a ni.
Aug Ni 10 khan member 20 in Darlung hi an pan a, YMA Hall-ah awm hmun siamin a hu hovin an thleng a, Fehchhuakte hian Rawngbawlna theih tawpa kalpuiin Pathianin hna a thawhpui a, member paruk chu kohhranah sengluh an ni tawh.
Ram ala inhawn zel avangin ruahmanna thar siam a ni a, Aug ni 17 inrinni hian member tam zawk Dinthar bial atangin kal turin ruahmanna siam mek a ni a, bial PYD zaipawl te pawh kal turin an inbuatsaih mek bawk. Bus leh lirthei dang hmangin bial chhung local hrang hrang atangin kal tura ruahmanna siam mek a ni.
Dinthar Bial Missions Dept. ten Rawngbawlna an neih mekna hmun Darlung khuaah hian bialtu pastor Rev. C. Laltlanchhuaha leh bial Missions Director Upa H. Lalrinmawia te leh member dang engemawzatin an chamchilh mek a, Hetih lai mek hian Dinthar bial PYD hmalakna in Sumsuih bial, Chawilung ah Rammut rawngbawlna nei turin hmalak mek a ni a, engkim ruahmanna an peih fel tawh bawk a ni.
———
NPSS Lang Camp ;
Tlangnuam Bial, Saikhamakawn kohhran Sunday School Department buatsaihin Aug ni 9 Zirtawp zan – Aug 12 Thawhtan zan chhung khan Naupang pual lang camp neiin; Speaker atan Jehova Rapha Revival Team Speaker Evan. Lalduhsaka Saza hman a ni.
Rawngbawltute rawngbawlna Pathianin mal a sawm a, naupang zing atangin mi 4 in sual ngaihdamna Baptisma an chang a, kohhranhote’n an hlawkpui hle.
——-
Rawngbawltu awmhmun sawn :
North Mizoram District in Ram lak beihpui a thlak mek puala rawngbawltu a rawih tun hnaia an awmhmun hruaituten an siksawi ten an rawngbawlna hmun tur an thleng fel.
Aug ni 9 Zirtawp khan Sihphir Bial, Serkhana rawngbawltu Evan. R. Lalchhanchhuaha chuan a awmna thar tur Bukvannei thlengin Evan. C. Lalthlamuana Vanghmuna rawngbawl tura District a rawih pawh Vairengte Bial Chhimluanga awm tura tih a nih angin Chhimluang a thleng fel tawh bawk a ni. N. Chhimluanga awm thin Evan H. Vanlalhmudika pawhin a rawngbawlna hmun tur Sihphir Bial Nisapui chu tluang takin a thleng bawk.
———
Sports meet cum Revival :
Sihphir Bial PYD te chuan Aug 9-11chhung khan Sports meet cum Revival hlim takin an hmang.
Sports Meet Aug 9 zirtawpni nilenga hman a ni a,Bialtu Pastor Rev. C. Lalrammuana pawhin a ho bawk a ni. Aug ni 9 zan atangin Revival inkhawm hman chhunzawm nghalin Speaker atan Rev.VL Hmangaihkima an hmang a, Revival Programme hian Aug ni 11 Pathianni zan thleng a awh a ni.
——
Seminar :
Chaltlang Bial SS deptt buatsaihin Aug ni 11 Pathianni chawhnu dar 1:00 khan Ramhlun Biak In ah Bial chhung SS zirtirtu tan seminar neih a ni.
Seminar inkhawm Evan.Vanlalpeka Fanai, Bial SS Deptt Director in a kaihruai a, Bialtu Pastor Rev.C.Lalramthangan thu tawi sawiin; resource person Rev.K.Malsawmtluanga,North Mizoram District Sunday School Director paper buatsaih SUNDAY SCHOOL PAWIMAWHNA LEH ZIRTIRTUTE MAWHPHURHNA tih chu zirho a ni. Resource Person kaihhruainain Semianr chhimtute Group nga (5) ah inthenin group tinah Secy ruat a ni a, group tin ten sawihona an neih chu record-in an hnen atang hian SS Deptt kal zel dan tura tha te, zirtirna kawng a hma sawn dan tur te ngaihthlak ho a ni. Seminar hi Chaltlang Bial chhung atangin Zirtirtu 60 vel in hi an hmang a ni.
—-
Rammut cum Work Camp :
West phaileng bial chuan West Phulpui Mission field-ah rammut hman paha work camp neih ni se tia a rel angin Aug ni 8- Aug11 chhung khan Rammut cum workcamp hlawhtling taka hman a ni.
Rammut leh Workcamp hman hi Bialtu Pastor Jakob Lalremsanga’n hovin West Phaileng atangin mi member 5, Kawnmawi atang in mi 2 an vaiin mi 7 riak lutin, West Phulpui an thlen atangin biak in chhak chu ruah sur karah a laih hna an thawk nghal a n.
Phulpui Mission field member te pawh an tang hle a, Biak in sa thar turin kohhranhote’n hma an la mek bawk. West phulpui mission field te hian nakum 2020-ah bial khawmpui thleng turin an inbuatsaih mek a, kohhranhote pawh an phur hle a ni.
——
Lawngtlai West District :
Dist.Superintendent Rev.R.Ramthatzawla leh District Secretary Pastor Lalsawmliana Sailo te chuan Aug ni 18, Pathianni hian Chawngte tlawhin rawngbawlna an nei dawn a. District Mission Director Rev.F.Lalbiakthuama chuan Lawngtlai khawpui chhungah rawngbawlna a nei kual thung ang.
——–
Aizawl East District :
August 7, Nilaini khan Aizawl East District Sunday School Department chuan Executive meeting Rev C.Mawizuala, Director kaihhruaiin an nei a, an thu ngaihtuah langsar zualte:
1. September thlaa Bial Sunday School Inkhawmpui hman turah hetiang hian District hruaituten hmanpui ni se an ti:
Director, Rev C.Mawizuala- Bawngkawn bial
Secretary, Evan Hr.Lalrindika- Mualpui Bial
Treasurer, Upa Rodailova Zote- Sakawrdai Bial
2. District Sunday SChool Board, November 22, Zirtawpni chawhma Dar 10-ah District Committee room-ah neih tura tih a ni.
3. General Sunday School Golden Jubilee Souvenir District chan tura tih chu District S. S Library leh Kohhranpui Library-a dah bak chu Bial-ah zawrh tura sem dar ni se an tih bakah Hnahlan UPC Venglai ten Sunday School Hall sak tanpuina an dil chu pek ni se an ti bawk. (Pic: S.S Executive meeting)
——–
Music School :
August 11, Pathianni chawhnu khan District Committee room-ah Aizawl East District PYD hnuaia Music & Sound Committee neih a ni.
He hun hi Evan C.Lalchhuanga, Chairman chuan kaihruaiin Bial hrang hrang atangin member an kal tha hle a ni. An thu ngaihtuah langsar zualte:
1. Kum 2019 chhung hian kum danga lo tih thin angin Music School hawn leh ni se tih niin Kuminah hian Tonis Solfa bakah Guiter leh Keyboard zir theih tura hawn ni se an ti. Class kal hun atan September 2 atanga October 31, thla hnih chhung, Thawhtan atanga Zirtawp zing dar 6:30 atanga 7:30 tura ruahman niin Tonic Solfa zir phawta, a hnuah Guiter leh Keyboard, an duh zawk thlanga zirpui leh tura tih a ni. Course fee atan hian Tonis Solfa leh Instrument-ah Rs 300 ve ve niin Tonic Solfa leh Instrument an duh kawp chuan Rs 500 tura tih a ni. Instructor atan Evan F.Lalsangliana, Mualpui Bial leh Bro Nelson KVL Chhandama, Thuampui Bial te tlawmngaia tura ruat an ni.
2. Pentecostal Choir ten a tul angin Music Video siam tura tih a ni.
3. Pentecostal Choir te tan retreat neih leh tura tih niin Speaker-ah Rev.R.Laltlankima, District PYD President chu ruat niin August 29 atanga 30 chhungin District Hqrs. Sunday School Hall-ah neih tura tih a ni. Retreat hi August 29, Ninga zanah Evan C.Lalremruata, Vice Chairman chuan kaihruaiin August 30, Zirtawp zanah Evan C.Lalchhuanga, Chairman-in kaihruai se an ti a ni.
——
Revival Crusade :
July 24 atanga August 12, Thawhtan zan thleng khan Champhai Bethel Bial, Bethel Kohhran te chun Revival Crusade hlawhtling takin an hmang. He hunah hian Philadelphia Team Speaker- Evan Lalbiakmuana chu Speaker-ah hman niin Team member ten an telpui bawk. Revival Crusade neih chhung hian Thlarau Thianghlim dawng thar mi engeawm zat awmin Kohhran hoten hlim takin hun an hmang a, an cham chhung hian Zokhawtharah leh Bethel hmunah hian Bial huapin Sunday School lang camp an nei bawk. Crusade neih chhung hian Sis Parliani te chhungkua chuan Pathian chawimawina an nei bawk a ni.
Thingsulthliah Bial, Tlangnuam hmunah pawh Bial LAD te buatsaihin Revival Crusade August 9, Zirtawp zan atang khan neih a ni a, Speaker-ah Evan R.Vanchhunga, District Fulltime Evangelist chu hman a ni. He Revival Crusade hi ruahmanna ang chuan August 11, Pathianni zan thleng tura tih ni mahse Kohhranah hlimna thlengin August 12, Thawhtanni khan mi inphalte kaltlangin Pathian chawimawina neih a ni a, hlimna boruak a kal zel avangin August 13, Thawhlehni pawh khan mi inphalte kaltlangin Pathian chawimawina hi neih chhunzawm leh a ni bawk. Revival Crusade neihah hian Biakin thleng ngai tawh lo ten Biakin lam panin lamtual rap ngai tawh lo te pawhin siamtharlehna changin Thlarau thianghlim dawngthar leh siamtharlehna chang engemaw zat an awm a ni. Crusade hi August 13, Thawhleh zan thleng khan an hmang a ni.
Thuampui Kohhranah pawh August 12, Thawhtan zan atang khan Revival Crusade hi neih mek zel a ni a, Speaker-ah Bialtu Pastor, Rev KVL Hmangaihkima an hmang a ni. He Revival Crusade hi August 12, tan zan khan Upa Jimmy L.Renthlei chuan Inkhawm kaihruaiin Rev Biaksangzuala, District Secretary chuan Pathian hnenah hlanna a nei a ni. Ruahmanna ang chuan August 18, Pathianni zan thleng Revival Crusade hi neih tura tih a ni.
Bawngkawn Bial PYD te buatsaihin Peniel Biakin, Bawngkawn South-ah pawh August 14, Nilai zan atang hian Revival Crusade hi neih mek a ni bawk a, Speaker-ah Sis Lalhmangaihzuali B/W, Maubawk chu hman niin Speaker hi Team member engemaw zat ten an tawiawm a ni. He Revival Crusade hi ruahmanna ang chuan August 18, Pathianni zan thleng neih tur a ni ang.
—–
Zemabawk Vengpui Kohhrana Evan H.Lalhlimpuia kaltlanga Revival Crusade neihah August 11, Pathianni zan khan member thar pakhat Kohhranah sengluh a ni.
Zemabawk Bial, Lungbial Kohhranah pawh member thar 11, Kohhranah sengluh niin Evan H.Lalhlimpuia hian nau pahnih a hlan bawk. Zemabawk Vengpui Kohhranah hian hun engemaw chen Revival Crusade hi neih niin Kohhran hote zingah siamtharlehna chang leh hlimna nasa tak a thleng a, mithar leh sual ngaihdamna baptisma chang pawh mi engemaw zat awmin, Pathian chawimawina pawh vawi engemaw zat neih alo ni tawh a, August 11, Pathianni zan thleng khan Crusade hi an nei a ni.
Darlawn Kohhranah pawh August 11, Pathianni khan chhungkaw khat member 3 chu Bialtu Pastor, Rev T.Lalbiakliana chuan Kohhranah sengluhna a nei bawk.
Thingsulthliah bial rammut programme hman mekah pawh August 13, Thawhleh zan khan Sesawng Vengtharah Kohhranah mi pahnih in sual ngaihdamna Baptisma Evan Rualthankhuma kutah an chang bawk.
Hnahlan Bial-ah pawh mithar 4 Kohhranah sengluh an ni. Hnahlan Bial-ah hian Rammut programme leh Sunday School Hal sak mek en turin August 8, Ningani khan Rev Vanlalfela Ramtiam, District Treasurer leh Rev C.Mawizuala, District Sunday School Director te chuan Hnahlan hi thlengin August 9, Zirtawp zingkar khan Rev C.Mawizuala hian Hnahlan UPC Venglai Sunday School Hall sak mek chu enpuiin District atanga Sunday School Hall sak tanpuina an pek chu a hlan nghal a ni. Zirtawp zan khan Khuangphah hmunah rammut programme hmang tura kalin Zirtawp zan khan Hnahlan Bialtu Pastor R.Lalfamkima kaihhruaiin inkhawmna neih a ni a, Rev C.Mawizuala hian thusawi rawngbawlna neiin hemi zan hian chhungkaw khat member 3 chu Rev Vanlalfela Ramtiam hian Kohhranah sengluhna a nei a ni. Inkhawm banah mithar 3 leh Kohhran member ni sa pakhat ten Rev Vanlalfela Ramtiam kutah sual ngaihdamna baptisma an chang a ni. August 10, Pathianni chawhma khan Rev Vanlalfela Ramtiam bawk hian mithar pakhat Kohhranah sengluhna nei lehin hriakthih rawngbawlna a nei a, inkhawm banah Kohhran member ni sa mi pahnih ten Rev C.Mawizuala kutah sual ngaihdamna baptisma an chang leh bawk a ni.
——
Bial PYD Meet :
Khawhai Bial PYD te chuan Chalrang hmunah August 10-11 chhung khan Bial huap meet hlawhtling takin an hmang. He hunah hian member engemaw zat kalin HIV/AIDS chungchang zirhona te neiin hlawktakin hun an hmang a ni.
——
Fehchhuak :
August 11, Pathianni hmang khan Sesawng PYD te chuan Mualmam a PR Center-ah fehchhuah Programme hmangin hlawhtling takin hun an hmang. He hunah hian Evan JH Lalhminghlua, PYD President chuan rawngbawlna neiin mi 20 vel an kal thei a, hlim takin hun an hmang a ni.
——–
Seminar :
Upper Republic Bial PYD Kumpuan Sub-Committee hmalaknain August 12, Thawhtan zan khan Upper Republic Kohhranah Kumpuan Seminar hlawhtling taka neih a ni.
He hunah hian Upa K Lalhmunsanga, Bial Secretary chu Resource person-ah hman niin Bial zaipawl ten fakna hla an sa bawk. Seminar-ah hian bial chhung atangin PYD member 80 chuang an kalkhawm thei a, hlawktakin hun an hmang a ni.
——
District Hruaitute Programme:
Rev Rosanga Kawlni, District Superintendent chuan Pathianni zan hian District Hqrs. Kohhranah thusawina neiin rawngbawlna a nei ang.
Rev Biaksangzuala, District Secretary chuan August 9, Zirtawp zan khan North Mizoram District, Sihphir Bial PYD ten Nausel hmuna Sport cum Revival an hmanah hawnna hun a hmang a, August 12, Thawhtan zan khan Thuampui Kohhranah Revival Crusade hman mek hlanna hun a hmang leh bawk. Rev Biaksangzuala hian August 14, Nilaini khan Champhai Bial leh Khawbung Bial-a Kohhran hmun lo ram enfel tur leh rammut programme hmang turin Champhai lam a pan a, Champhai hmunah Kohhran tul leh pawimawh a tih zawh hnuah Pathianni hian Khawbung-ah rawngbawlna neiin hun a hmang leh a ni.
Rev R.Lianzama, Missions Director chuan Biate hmunah Rammut Programme hmangin rawngbawlna a nei mek a, boruak awm dan a zirin a tul chen chen rawngbawlna nei turin ruahmanna siam a ni.
Facebook