Pennet News Service : Aug 9 – 16

UPCNEINEWSSERVICE Aug 9-16.2020
———-
Office khar :
Aug ni 12, Nilainia General Administrative Committee chuan hri pui leng avanga Aizawl khawpui chhung Local council hrang hrang ten an veng chhungah inkharkhipna an kalpui avangin General Hqrs Office, Mualpui Salem veng Aizawl pawh ni hnih Aug ni 13 leh ni 14 chhung khan an khar a, Aizawl khawpui chhung veng hrang hranga awm office staff te pawh fimkhur tur leh, hrileng ti darhtu nih theihna kawng hrang hrang pumpelh tum theuh turin ngenna an siam a.

Office dawr turte tan pawh ngenna siamin, a hma aia uluk leh fimkhur zawkin office kalpui an tum tawh tih thuchhuah an siam.
———-

July thla chhunga Africa kawmualpui hmun hrang hranga rawngbawlna report   :
MAURITIUS
Mithar 25 ten Isua hmingin baptisma an chang a, mi 5 in Thlarau an dawng.

LIBERIA
Mithar 52 ten Isua hmingin baptisma an chang a, mi 43 ten Thlarau an dawng thar.

TANZANIA
Mi 251 in Thlarau an dawng thar a, mithar 71 in baptisma changin mi 33 ten Damna an chang.

Africa khawmualpui mipui 1.2 billion chuang zet awmnaah UPC kan pung zel a ni.
———-

District hrang hrang rawngbawlna chanchin thar   :

Lunglei District:
Chhipphir Bial PYD te chuan Bial Conference rorel bawhzui nan Aug 7, Zirtawpni khan Lunglei Civil Hopital tan thisen Unit 64 an pe.

Chhipphir Bial PYD te hi Sekhum Kohhran Hall-ah an kal khawm a, Chhipphir, Mualthuam North, Kanghmun, Bualpui leh Sekhum Kohhran atangin thalai member 120 vel thinsen pe tur hian an thawkchhuak a, Bialtu Pastor Rev. LH. Lalchhandama’n a telpui. Thisen pek hmain hun serh tawi an hmanah  Bial PYD Secretary PC. Chuaudingliana’n hun kaihruaiin, Chhipphir Bial Kohhranpui Secretary Upa PC Lalzarmawia’n hunserh a hmang.
Lunglei Civil Hospital atangin Dr. Lucy Ramhmingliani Renthlei leh a Team ten Sekhumah kal chilhin thisen hi an la a, Mipa 48 leh hmeichhia 16 ten avaiin  unit 64 an pe a ni.

Thisen pek zawh hian inkhawm tawi buatsaih lehin Rbt. R. Lalrinzuala, Bial P.Y.D Treasurer in a kaihruai a, Bialtu Pastor, Rev. LH Lalchhandama’n lawmthu sawiin malsawm tawngtaiin kalkhawmte a tin a ni.

Dr. Lucy chuan hetianga thingtlang bial atanga thisen pek na chang hria an awm thin chu lawmawm a tih thu sawiin, thahnemngai taka tan la zel turin a fuih a, Chhippir Bial PYD President Evan. Engzawnga pawhin Bial PYD member 225 atanga mi 120 chuang kalkhawmin thinsen unit 64 lai an pe thei chu lawmawm a ti hle a. Lunglei, Aizawl leh Mizoram hmun hrang hrangah zirna leh eizawnna hna avanga thawk chhuak engemawzat an awm laia Bial chhunga thalai member awm ang ang te kim taka thawkchhuaka midang tanpuina tura inpe te zawng zawng chungah Lalpa Isua hmingin lawmthu a sawi mawlh mawlh a ni. (Pic : Thsen pe)
——–
Thilpek :
Aug.ni 7 zirtawpni khan Headquarters bial LAD te leh Pukpui bial PYD te chuan C.E.C. School tan thilpek an hlan.
Headquarters bial LAD te hian kumin HSSLC result chhuak ah C.E.C. School te 100% an pass avanga lawmpuinan Rs.10000 an hlan a, Pukpui bial PYD te pawhin C.E.C. School tanpuina atan Rs.10000 an hlan ve bawk a ni.

Heng thilpek te hi School aiawhin Principal leh zirtirtu thenkhat ten an lo dawng a, thilpek hlan tute chungah lawmthu an sawi bawk.
———-

Aizawl East District rawngbawlna chanchin :
August 7, Zirtawp zan khan Rabung Bial chhunga Kohhran dingthar, Rabung Vengchhak chu Aizawl East District hnuaia Preaching Point pakhat ni turin Rev. VL.Hnemtluanga, District Treasurer chuan hawnna a nei. Preaching Point hawnna hi Bialtu Pastor J.Lalhmingsanga chuan kaihruaiin Thlarau lam hla nen he hun hi hman a ni. He Preaching point tharah hian member 80 chuang an lawi mek a ni. Preaching point hruaitute:
Chairman: Upa R.Lianhnuna, Secretary: T.Upa K.Lalthlamuana, Treasurer: T.Upa V.Lalhruaitluanga te niin Member-ah T.Upa Laltanpuia, T.Upa Zoramliana leh T.Upa Thangthuia te an ni.
———–
Biak in lungphum phum :
August 8, Inrinni khan Rev Biaksangzuala, District Superintendent chuan Suangpuilawn bial, Vanbawng Kohhran ten Biakin thar an sakna tur lungphum phumna a nei. He hunah hian Church Board hruaitute telin Biakin sak tur chu Pathian hnenah hlanna neih nghal a ni. Biakin hi ft 24 X 40-a liana sak tura ruahman a ni. Vanbawng-ah hian tunah hian Kohhran member 120 chuang an awm mek a ni.

August 8, Inrinni tho hian Rabung bial, Aiduzawl Kohhran ten S.S Hall an sak tharna tur lungphum phumna, Rev VL Hnemtluanga, District Treasurer chuan a nei bawk a ni. Aiduzawl Kohhran Sunday School hall sakna tur atan hian District Sunday School Department leh Upper Republic Kohhran ten tanpuina an pe a ni. He hunah hian Aiduzawl Kohhran hruaitute bakah Bialtu Pastor J.Lalhmingsanga ten an telpui bawk a ni.
———–
Sunday School Hall hawng :
August 9, Pathianni khan Rev HL.Thakunga, District Sunday School Director chuan Darlawn bial, Darlawn Kohhran leh Ratu Vengpui Sunday School Hall hawngin Pathian hnenah a hlan.

He hun hi Darlawn leh Ratu Vengpui-ah hman ve ve niin heng Sunday School hall hawnnaah hian Kohhran member thenkhatten an telpui bakah Evan C.Laltanpuia, District Sunday School Secretary leh Bialtu Pastor, Rev T.Lalbiakliana te pawhin an telpui a ni. Rev HL. Thakunga chuan Darlawn leh Ratu Vengpui Kohhran ten Sunday School Hall tha tak an neihnaah lawmthu sawiin Sunday School Hall hi Pathian pek niin Lalpa fak reng turin kalkhawmte a chah a ni. Darlawn leh Ratu Vengpui Sunday School Hall hawnna hun tawi hi Hall chhungah neih ve ve niin Rev T.Lalbiakliana, Bialtu Pastor chuan a kaihruai a ni. Darlawn Kohhran S.S hall hi ft 27 leh ft 15 a lian niin Ratu Vengpui S.S Hall hi ft ft 30 leh ft 15 a lian a ni bawk. Heng Sunday School hall pahnih sakna tur atan hian District Sunday School Department atangin tanpuina pek an lo ni tawh a ni.
——
Pass thar chawimawina :
Bawngkawn Bial, Peniel PYD te chuan August 9, Pathianni khan tun hnaia MBSE in result a tihchhuah HSLC leh HSSLC-a pass tharte chawimawina hun an hmang.

Peniel PYD te hian kum dangah chuan HSLC leh HSSLC a pass tharte hi Kohhranpui inkhawm-ah lawmpuina an hlan thin a, kuminah erawh hripui leng avanga inkhawm theih a nih loh avangin zirlaite inah kalchilhin lawmpuina hi an hlan ta zawk a ni. He hun hi PYD Hruaituten an kaihhruai bakah fuihna thu tha tak sawi ngaihthlak a ni bawk. PYD member chawimawina hlante hi mi 5 niin chungte chu: Sis.Laldinpuii D/o Sis Ngurtlansangi, Bro Jonathan Vanneihtluanga S/o Upa Joseph Lalhruaitluanga, Bro Vanlalone-a S/o Ngurthanga, Sis VL Rohlui D/o Bro Zochuangliana leh Sis Saidingpuii Sailo D/o Bro Malsawma Sailo te an ni.
———
Thilpek pe :
August 6, Ningani khan Khawlian Bial LAD te chuan Phuaibuang PHC-a Doctor leh Staff ten tangkai taka an hman atan thutthleng an pe. Bial LAD Hruaitute leh Bialtu Pastor ten Phuaibuang PHC-ah hian kalin hlanna hun an hmang a ni. Phuaibuang PHC-a thawktuten lawmthu an sawi a ni.
———-
Member thar leh Baptisma :
Kohhran hoten rammut thla kan hmang mek a, hripui leng avangin kum dang angin hmang thei lo mah ila, Aizawl East District chhung Bethlehem bial, Bethlehem Kohhran leh Mualpui bial, Salem Veng Kohhranah mithar bakah baptisma chang thar neih a ni.

Bethlehem Kohhran-ah Kohhran pawl dang atangin mi 10 sengluh niin nau piang thar 4 bakah Kohhran member, pem thar mi 10, an vaiin mi 24 Kohhranah ziah luh thar an ni a, August 10, Thawhtan zan khan Mualpui bial, Salem Kohhran mi 5 in sual ngaihdamna baptisma Bialtu Pastor, Rev H.Lalropuia kutah chang tharin an zinga pali hi mithar an ni a, nau pakhat hlan a ni bawk. August 8, Inrinni zan khan Ngopa bial, Kawlbemah mi pakhatin sual ngaihdamna baptisma, Bialtu Pastor K.Vanlalhlimpuia kutah a chang bawk. Tarlan tawh angin he Rammut thlaah hian District Kohhranpui pawhin heng hmunah te hian District-in a chhawr lai Full Time Evangelist leh Evangelist ram tlan te rawngbawl turin a tirchhuak mek a, rawngbawlna kalpui mek a ni bawk. Evan R.Vanchhunga- Upper Republic bial, College Veng-ah, Evan Lalamena, Bawngkawn Bial chhungah, Evan H.Malsawmthanga, Bethlehem bial, Bethlehem Vengthlangah, Evan H.Lalbiakzauva Rabung hmunah leh Evan V.Kamneihthanga, Khawzawl Bial, Ngaizawl hmunah te a ni.
———
District PYD hruaitu in Ph.D hmu thar :
Bro.R.Vanlalpeka S/o Evan.R.Vanchhunga, Bazar Bial, Bazar Kohhrana lawi chuan MZU hnuaia Department of Botany, School of Life Sciences atangin Ph.D a hmu thar. A thesis Title chu: “Diversity and Phytochemistry of Pteridophytes from Different Reserve Forests in Mizoram” tih niin Bro.R.Vanlalpeka hian tunah hian Aizawl East District PYD-ah Secretary mawhphurhna a chelh mek a ni.
———-

Chhimtupui District   :
Chhimtuipui District Mission Director Rev Dr, Sihmo chuan Aug ni  8, Inrinni Khan Bualpui Ng bial chhung Tialdawngilung kohhrante tlawhin hun ahmang a, Bialtu Pastor Rev H. Lalhnehchunga Leh Bualpui Ng Local  Chairman Upa K Lalfela ten telpuiin hun hlimawm tak an hmang. Aug ni 09, Pathianni khan Tialdawngilung kohhran ten chaw hlui te siam sakin, Pathian thu te sawina nei in hun an hmang a ni.

Aug ni 10, Thawhtan ni khan Tialdawngilung Local ah Tirhkoh Quarter sakthatna hnatlang an neih chhunzawm a, Bial chhung PYD Vawmbuk leh Archhuang kohhrante an chhuak ṭha hle.
——–
Bial Board :
Aug ni 8, Inrinni khan Sangau bial Board chu  Pastor quarter ah neih a nia, bial hrang hrangin report an pe a, Rawngbawltu ni hman chung chang leh Bial Crusade neihchung chang te sawiho a nia,  Covid-19 a vanga kan dinhmun te thlir chung in Bial OB ten ruahmanna lo siam te tiin thu an dah.
——
Tanpuina :
1. Ainak PYD member Sist. Lc.Sunami D/o Lc.Buimawng tuna China a awmmek chuan Kohhran hote tawngtaina leh duhsakna a dawn lawmthusawi nan  sumfai cheng 10,000/- chu PYD kaltlangin kohhran ah a rawn pe a, Kohhran hote an lawm hle.

2. Aug ni 9, Pathianni khan, tunhnai ruah sur avanga in sak lai leimin in ahnawl neitu Bro N Pawtha H/o T Lallianmawii BW President CTP Dist LAD techhungkua chu Dist LAD hruaitu ten ṭanpuina an hlan. He hunah hian Rev Joseph L Thlauhthang Dist Superintendent chuan fuihna thu sawiin, ṭawngṭai sakna anei a. Dist LAD tehian Rs.5000/- ṭanpuina an hlan a ni.
——–
Induction service :
Aug ni 9, Pathianni khan Chhimtuipui Dist Hqrs local, New Siaha ah kum 2020-2021 chhunga Dist PYD Choir member thar induction service neih a ni.

He lakluhna programme hi Dist PYD Treasurer leh Dist PYD Music & Sound Committee T Upa N Lalchhuanmawia’n a kaihruai a, Rev Joseph L Thlauhthang Dist Superintendent in hriak thihna leh lakluhna hun hmang in ṭawngṭaina a neihsak. Dist PYD hruaitu Evan Robert B Lalnunsiama T Vice President leh Asst secretary Rbt LS Lalhmingmuana ten fuihna thuchah an sawi a, Sist Baby Zirkhumi leh Sist Helen Lalkrawsparmawii ten zaia rawngbawlna an nei bawk.

Dist choir member atan hian mi 31 ruat niin, conductor atan Bro Zorammuana leh Bro LS Vanlalchhuanga te chu ruat anni. Music and Sound Secretary Bro. J Lalhriatchhunga’n zaipawl inhmelhriat tirna neiin, Comtt Chairman T Upa L Khaiu chuan file hlanna a nei bawk.
——–
Member thar :
Aug ni 9, Pathianni khan Phura Local Church ah  chhungkaw 6, member  23  te chu Pastor MH Robin Lalthanmawia Tuipang Bialtu Pastor in Isua hmingin Kohhran ah a seng lut a, nau pakhat hlanna a nei nghal bawk. Bialtu Pastor hi Vahai Field Worker Evan.E.Khaching leh Laki Kohhran Upa ten an tawiawm a ni.

Aug ni 10, Thawhtanni khan Phura Kohhranah lawi tur hian  chhungkaw 1 member 3 te chu Tuipang bialtu Pastor MH Robin Lalthanmawia’n Kohhranah a seng lut a, member thar te fa nausen pawh Pathian hnenah hlan nghal a ni bawk. He hmunah hian Home missionary Evan Khaching Aineh chuan  rawngbawlna a nei mek a ni.
——–
Chanvo insem :
Aug ni 5, Nilainia Chhimtuipui Dist PYD Enlarge & Editing Board meeting chuan Dist PYD Inkaihhruaina dan bu lo zirchiang  turin hetiang hian chanvo an insem:-

1. Evan Robert B Lalnunsiama T – Chairman : Dist PYD

2. T Upa H Lalduhsanga – secretary : Dist PYD Music & Sound Committee leh Dist PYD Choir inkaihhruai na.

3. T Upa N Lalchhuanmawia – member : Dist Kumpuan Board & Dist Education Board

4. T Upa L Khaiu – member : Sectional PYD & Local PYD

October chawlhkar hmasa berah meeting hi an nei leh ang.
——
Bial Board :
Aug ni 7, zirhtawp ni khan Bualpui Ng bial PYD chuan board pawimawh tak an nei a, Board hi sectional Pastor H Hnehchunga’n a telpui. An rorel tlangpui te :

1. Tialdawngilung home mission field missionary Quarters sak tanpui nan Bial PYD hmingin Rs 5000/- pek nise.

2.Lock down chhung a Bial PYD Member  chatuan rampan te chu August 2020 chhung hian Bial PYD hmingin ralna neih nise.

3,Bial PYD hmingin Pastors Quarter ah thil Donated nise.

4. Blood donation leh Bial Meet cum Sport neih dan tur chu Bial OB kut ah dah ani.

5. Bial PYD sum tuakna chikhat atan Local tin PYD ten nikhat tal sum tuak in hlawhna neih nise.
———
Bial SS Board :
Aug ni 8, Inrinni khan Niawhtlang Bial SS  board chu Ainak Local ah neih a ni a, Bial leh District Conference rorelin passed tawh bawhzui ngaite ngaihtuah ani a, rorel pawimawh zualte :

1. District SS Departmentin SS campaign bial tinah neih nise tia alo rel chu,District hruaitute vahchhuah hun a piangah Bial hruaitu leh Local tina SS department hruaituten lo  tawiawm nise.

2. Bial SS Conference rorelin  a pass tawh SS zirtirtu Training leh Seminar bial chhunga loacal tin ah neih nise tih chu,remchan hunah neih nise.
Bial board ah hian member an kal tha hle a,Bialtu Pastor V.Lalhlimpuia leh Bial Secretary Evan.Hc.Hmingtinthangaten Bial board hi an telpui a,an hnen atangin District target hrang hrang, Local tinten an tlak ngei theihna tura hmalak dan tur leh fuihna thu tha tak tak ngaih thlak ani.
———
Chawnghei tawngtai :
Aug ni 16, Pathianni hian Chhimtuipui Dist pum huap in LAD ten awmni khama chawnghei a ṭawngṭaina an nei dawn a, Distirct chhung a mi leh Kohhran mi a thei a piang te tawiawm turin an sawm a ni. Tawngtai thupui tura thlan chhuan te :
1. Tu leh Fate tan malsawmna leh Pathian hruaina
2. Covid 19 hrileng a reh theih nan.
———-
Rawngbawlna report :
Covid 19  hrileng  karah Sawrkar dan zam te bawhchhe chuang silovin Dist chhung Bialtu Pastor te leh Home Missionary ten anmahni bial leh awmna ah theuh ah aremchan dan ang anga Kohhran te tlawh kualin rawngbawlna an nei reng a, Kohhran te pawh an thlamuan puiin bial hrang hrang ah Kohhran ten malsawmna an dawng chho mek zel.

Inkhawm leh puipun theihloh mahse heng local Ainak, Vawmbuk, Siahatla, Sangau II, Meisatla, Niawhtlang, Ṭialdawngilung leh Siaha College veng te chuan ruat bik neiin ruahmanna ṭha tak hnuaiah Biak In sak an chhunzawm zel. South Lungpher Bial tepawhin Pastor’s Quarters saṭha turin ruahmanna ankalpui a, hnatlang an thawk mek bawk a ni.

District hruaitute chuan hri leng karah pawh tlang hrang hranga Kohhran hoten tha thlah hauh lova theih tawp an chhuah chu lawmawm an tih thu sawiin, thilpek leh rawngbawlna peng hrang hrangah pawh chawl lova theih tawp chhuah zel turin Kohhran hoten an ngen nghal bawk.
——
Project :
Chhimtuipui Dist PYD ten Mission field puala kum tin project an neih “Church roofing fund” Rs.10,000/- chu Ṭialdawngilung Home missionary Evan G Lalnunzira hnenah an hlan a, Kohhran hote an lawm hle.
——-
District PCD :
Chhimtuipui Dist PCD hmalakna a Live Music home record singing competition an buatsaih chu Dist chhung PCD ten an hlut hle. He intihsiakna ah hian category-2 a ṭhen niin, kum -10 chunglam leh kum -10 hnuai lam tan siam ani. Top 10 tlingte hming puanchhuahna neih niin, intihsiak tehi PENNET Chhimtuipui youtube channel aṭanga en theih a ni.

Audition round hi zawh tawh niin Top 10 thlan chhuah ten Official lam aṭanga hla thlan bik hmangin intihsiakna an bei leh mek.

Top 10 te intihsiakna hi harsatna dang a awm loh chuan Aug ni 15 Inrinni zan dar 8:00pm ah live premiere pek chhuah leh a ni ang. Chhimtuipui District PCD chuan district chhung mai bakah tlang hrang hranga  kohhran chhungkua te he intihsiakna hi lo thlir ve ṭheuh turin an sawm nghal bawk.
———-

Lawngtlai West District :
Aug ni 9, Pathianni khan District Superintendent Rev. R.Ramthatzawla leh District Mission Director Rev. F. Lalbiakthuama te chu Khawmawi Kohhran ho tlawhin an fehchhuak a, Upa leh Rawngbawltu te nen inkawm khawmna neiin an hlim tlang hle. Local in thil pek leh kawng hrang hrang a an hmalakna te fakawm an ti in Kohhranho in hma a sawn nasa hle a ni.
——–
Member thar :
Aug ni 9, Pathianni khan Chawngte ‘P’ Local ah member thar 3 Kohhranah sengluh an ni a, Evan. T. Ngurchhuana’n  member thar te hi  Baptistma chantirin Kohhranah a senglut a ni.
——–
Thilpek :
Hmunnuam Local ten an Biakin Extend mek in an mamawh hrang hrang heng mi te hnen aṭang hian an dawng :
1. Upa C. Lalhmingliana Council veng – Rs.10,000/-
2. Upa MC Doṭhuama  Headquarters Local – Rangva bandle khat
3. Upa B. Sangtlunga Bazar Local – Silpoulin pakhat
Heng baka an daih lohna chu District in a la ngaihtuah pui dawn a ni. Hmunnuam Local tan hian Chhimtuipui District Superintendent Rev. Joseph L. Thlauhthang chuan Rs.40,000/- a lo pe bawk a ni.
———
Fehchhuak :
Lawngtlai West District Superintendent Rev. Ramthatzawla leh District Secretary/Treasurer Pastor Lalsawmliana Sailo te chuan Aug ni 16, Pathianni hian  Sihtlangpui Kohhran tlawhin an fehchhuak.
———
Office hawng :
Tunlai hrileng mek avang leh Lock Down avanga inkhawm te a la rem loh bawk a vangin, Lawngtlai West District Office chu kar khat ah ni thum Monday, Wednesday leh Friday ah te hawn a ni.
———
Sum sanction :
Diltlang Bial Pastor Quarters sakna tan District Kohhranpui chuan Rs.3,00,000/- a sanction a, Bial in sum an lo khawl tawh te nen Quarters ṭha tak sa turin Bial mipui te an inbuatsaih mek a ni.

District Kohhranpui hian Saizawh West Kohhran Biak in sak mek tanpuinan pawh  Rs.1,00,000/- a pe a, M Kawnpui Kohhran Biak in pawh a rang thei ang bera sak tum mek a ni a. District aṭang in Rs.1,00,000/- pek tur a ruahman sa  a ni.
———-
Bial Board :
Aug ni 9, Pathianni khan Vathuampui Bial Board neih a ni a, Bial Kohhranpui, Bial Missions leh Bial PYD ten board an nei a, an rorel tlangpui te :
Bial Kohhranpui :
1. Bial board hmasain Dt.27-29 November 2020 hmanga bial chhung revival khawmpui Vathuampui hmuna neih tura a lo rel tawh chu, kan hun tawn leh tunlai boruak hian a zirloh em a vangin kumin a tan chuan neihloh mai nise.

2. Kum 2021 bial khawmpui Mautlang local a lo awm turah hian Rev R Sangthanga chu speaker a tan sawm nise.

3. M. Kawnpui Biak In sak work camp bial huapin neih ni se.

4. Bial chhung local tinah district board rorel bawhzuiin December inrinni hmasaber hian  rawngbawltu ni mahni local theuhah programme te siamin hman theuh tur a ni.

5. Department lam atanga dilna lut angin Kum 2020-2021 a tan department office bearer tih len tha an ti tlang a hetiang hian department te hruaitu ruatbelh sak an ni :

LAD
1. Vice president : sist Lalnunmawii vaseikai
2. Asst secretary : sist R Darchiri mautlang
3. Fin secretary : sist Vanthangliani chamdurtlang

PYD
1. Vice president : bro Zoparenga chikhurlui
2. Asst secretary : bro Hmingthanzual Mautlang
3. Fin secretary : sist Zairemmawii Mkawnpui

Sunday school department
1. Treasurer : Upa T Rorelliana vaseikai
———

Bial Mission department board chuan Chhotaguisury II hmuna rawngbawltu an rawih chu tunlai hun tawnin a zirloh em a vangin kumin a tan chuan tihtawp mai nise, Kum 2021 conference board ah la ngaihtuah nawn leh nise an ti a, Bial Mission department in bial pastor quarter bathroom siam nan Rs 10,000 thawh nise an ti bawk.

PYD board rorelte
1. Bial huapin chhotaguisury II hmunah rawngbawlna neih nise, a hun leh tul dang chu bial hruaitu ten lo ngaihtuah se.

2.Pastor quarter ah bookself dah tur a board hmasain a lo rel tawh chu Bial hruaitu ten lo lei nise.

3. District PYD conference a huhova kal a remchan dawn takloh a vangin bial aiawha rorel palai intirh mai nise.

4.  Bial PCD hruaitu turte hetiang hian ruat an ni:
Leader : Bro C Malsawmtluanga Mautlang
Asst Leader : Bro L Vanlalvuana Vathuampui
Secretary : Bro C Lalchhanliana Mautlang
Asst secretary : Bro Hallelui Lallawmkima Chamdurtlang
Treasurer : sist C Lalfamkimi Vathuampui
Fin secretary : Bro Lallungawia Mautlang
———

North Mizoram District  :
Rengdil Bial Kawrtethawvengah Pathianni kalta Aug ni 9 khan Bialtu Pastor C. Lalthlengliana Bial fang chuan Mithar 1 Pentecost Kohhranah lawmlutin Lal Isua hmingin sual ngaihdamna Baptisma a chantir. Kawrtethawveng Kohhran hi Preaching Point ni mek a ni a, Kohhranhote pawh an tangrual hle.
———
Inneih tir :
N. Mizoram District-in rawngbawlna beihpui a thlakna Kananthar Kohhranah Kohhran din a nih atanga a vawikhatna ni turin Aug ni 11 thawhlehni khan Bialtu Pastor Lalhmuakliana hnamte chuan Nupa tuak a inneihtir.

Inneihna hi Kananthar Biak inah hmangin Hindu sakhaw be thin an ni a, heng nupa tuak te hi Pathian thuthlung hmuhna tura mit var an neih hnuah Pentecost kohhranah lawmluh niin; Sual ngaihdamna Baptisma an chan hnuah inkutsuihtir an ni.
Kananthar-ah hian Evan. Ramnunsanga chu rawngbawltu ni mekin Pathianin a rawngbawna a awmpuiin mi thar neih kawngah pawh malsawmna a dawng nasa hle.
———
Member thar :
August ni 8 Inrinni zan khan Aibawkah chhungkaw khat mithar 2 te chu Bialtu Pastor PC Lalrokima’n UPC-NEI kohhranah Lal Isua hmingin a seng lut. Heng Mi tharte hi Zemabawk aṭanga Aibawka  pem niin, Aibawk Kohhran Church Board member te hnathawh kaltlangin UPC-NEI-a awm duhna an nei a, Bialtu Pastor hian a seng lut ta a ni.
——–
Retreat :
Chawlhhmun Bial Hqrs., Chawlhhmun Kohhran te chuan Pathianni kal ta Aug ni 9 khan Kohhran chhunga rawngbawltu RETREAT Cum REPORT hun an hmang.
Programme dar  11:00- ah tanin Chawlhhmun Biak Inah hun hman a ni a, Chawlhhmun kohhran Deptt hrang hrang Ob chin leh Church Board member chin ten Retreat neiin; anmahni zawn theuha an rawngbawlna report an pe bawk.
Chawhnu lamah Sharing hun neiin; rawngbawltute’n an thil tawn leh hriat atang leh an vei zawng thilte sawiin, intihsawttawnna hun tha tak an nei a, an hun hman te hlawkthlak an ti hle. Rawngbawltu Retreat Programme-ah hian mi 25 kalin, Bialtu Pastor Rev  Lalramthanga kawlni chuan inkhawm a kaihruai a, a hnen aṭang hian fuihna thu bakah General leh Dist report te a pe bawk.
Tin, Evan. R. Lalrema te chhungkua aṭangin lockdown ṭan tirh aṭanga Aug ni 9 thleng, kohhran inkhawm hun Nilai, inrin, SS leh Sunday zan Kohhran inkhawm pangngai anga an kalpui aṭanga Thawhlawm hrang hrang SS,  sunday zan, Second sunday thawhlawm an khawn ṭhin aṭangin cheng Sang sarih chuang an thehluh chu a kawltu ṭheuh treasurer te hnenah hlan a ni bawk. Rawngbawltu Retreate neite hian Zanriah chaw tui tak an kilho nghal bawk a ni.
——-
Biak in sa :
North Mizoram District PYD ten PYD Motto behchhana rawngbawlna an neihna hmun Rengdil Bial Kawrthahah Biak in an sa.

Biak in sak hna hi Kolasib Diakkawn Bial Khuangpuilam Kohhran ten workcamp in an thawk a, rim taka an thawh hnuah Biak in chu luah theih turin an peih fel ta a ni. Kawrthah hmun hi N.Mizoram District P.Y.D te hmalakna in hun rei tak rawngbawltu Evan Lalliansawta dah a ni a, District PYD ten hun engemaw chen atanga an lo beisei leh an lo nghahhlelh em em Lalpa Biak Buk tundin a lo ni ta hi Kawrthah Kohhrante leh District PYD hruaitute chuan lawmthu an sawi.
Biak In sakna tura District PYD member ten an phak tawk te te an thawh khawm piah lamah Sum leh Pai, Hun leh tha ui hauh lo va thahnem ngai taka workcamp-a Biak in sak hna thawktu Kolasib Khuangpuilam Kohhran te chungah N.Mizoram District PYD chuan thinlung takin lawmthu a sawi a ni.
———
Intuaitharna :
Aug ni 9, Pathianni  khan Sumsuih Bial Thiak kohhranah rawngbawltute intuaitharna neih a ni.
Thiak kohhran buatsaih intuaitharna hun hi Bialtu Pastor hova neih niin; rawngbawltu mi 30 chuang an kal khawm a.  Bialtu pastor Rev. HF Malsawmaa hnen atang hian  kohhranhote chakna tur leh hma an sawnna thu thu tha leh bengvar thlak tak tak ngaihthlak a ni.
——-

North Mizoram District chhunga Biak in sak report :

Tlangsang Bial Headquarters Tlangsang Kohhran ten hun engemaw chen atanga an Biak buk sak, kumin kumtir lama an luah luh chu zawi zawia sak chhoh belh zelin, tunah hian Biak in hma lam chei hna an thawk mek.
Tlangsang Kohhranhote member tlemte ni mahse, an tumruhnain Biak in tha tak an nei thei a, He mi chungchangah hian Tlangsang Kohhran Chairman Pastor K. Ainawna chuan Kohhran mipuite thawhhona leh hruaitute inlungrualna rah a ni a ti. Tunah hian Biak in thuthleng tur pawh ruahman mekin Pathianin rem a tih chuan kum 2021  February/March  thla velah hawn an tum.

Hunthar Bial, Hunthar Kohhrante chuan an Biak in sak mekah hmasawnna nei chho zelin; tunah hian Biak in Celing siam hna an thawk mek. Hunthar Kohhrante hian kar lohva Pathian chenna Biak Buk mawi leh tha tak kohhranhote inlungrualna a zarah an neih theih a rinawm.

Damparengpui Bial chhunga awm Sidon Kohhran Biak in sak mek pawh tluang taka kalpui zel a ni. Sidon Biak in sak tanpuinan hian Chaltlang Bial Missions Dept Rs. 35000 District Missions kaltlanga pein; Dinthar Bialte’n  Rs. 20,000/- an pe bawk a, Biak in hi a chung chih zawh tawh niin; a bang thlengin bel phui vek a ni tawh bawk.

Biak In A dung   ft 42 leh A vang   ft.22 –a sak niin; kohhranhote an tang hle. Tunah hian Biak in chhuat siamna tur sum khaihlak a nih avangin Lalpaa mi inphalte thinlung kik hawn a nih theih nan Kohhranhote an tawngtai thin a ni.
Biak in sakna tura tha thawhtute leh sum leh paia puitute chungah Bialtu Pastor R. Thanglura chuan lawmthu Lalpa Isua hmingin a sawi.

Chaltlang Bial, Bawngkawn kohhrante chuan an Biak in sak mek chu ngawrh takin a sak hna an kalpui mek. Bawngkawn Kohhrante hi kohhran naupang te niin; Lalpan a kut a hman em em Rawngbawltu Evan. Lalsawivel’an an kohhrana rawng a bawlna atangin mite hriat a hlawhzual a, Kohhranhote inpekna leh thawhhothatna avangin an kohhran hian hma an sawn chak hle. Bawngkawn Brigate-ah Assamtype Biak in pangngai tak an neih thin chu member te an pun chhoh zel avangin khawvel hmasawn zelah tunah hian Concrete in Biak in an sak chho mek a, Inrinni kal ta Aug ni 8. Khan hnatlang runpui neiin; Chantlang Bial kohhran hrang hrangte’n Biak in sak hna hi an pui a, District Supdt. Rev. Laltluanga pawhin an Biak in sak hi a hmunah a tawiawm bawk.
———-
Rawngbawlna report :
North Mizoram District Ram lak beihpui a thlak bawhzuinaa rawngbawltu a dahna hmun Rengdil Bial K. Sarali-ah hian tunah hian Evan. Lalrindika awmin, Evan. Lalrindika awm chhunga K. Sarali Kohhran dinhmun hetiang hi a ni.
1.K. Sarali Biak in sak mek chu Rengdil PMF ten workcamp-a chhunzawmin Biak in chu luah theiha sak pum a ni.
2. K. Sarali Tirhkoh Quarters luah lai a awngrawp tawh avanga a thar Chaltlang Bial missions ten Biak in bul maia  Quaters an sak sak chu. Biak in hawn ruata hawn theih tura buatsaih a ni bawk.
3. Tirhkoh Quaters a hman turin Sintex Litre 1000 lei ni bawkin; Hei hi Rengdil Bial missions Dept in K. Sarali a an mamawhna piang a hman turin cheng 3000 hmang leh thawhbelha lei a ni.
4.Rengil  Bial LAD ten Quater ah Thuthleng sei tha tak Pahnih an dah bawk
5. Chanmari Kohhran ten quarters-a hman turin Choka bungrua Dekchi lian tak mai pahnih bakah bungraw dang tha tak tak an pe bawk.
6. K. Saralia rawngbawla awm hmasa ber Evan. Chhuantea’n Biak ina hman tur ceiling fan a tum sak bawk.
7. Rawngbawltu hmasate thawh bak Rawngbawltu K. Vanlaldika awm hnuah Member thar 16 neih belh leh a ni.
8. Pathian tana thilpek kau ki hrang hrangah Kohhrante’n hmasawn lam an pan zel.
9. Tirhkoh qtrs ah hian T. Upa Lalkohchhuaha Rengdil Bial PYD secy chuan Khum tha tak a pe bawk.
Kanghmun Bial: Vawiin Dt 9 sunday hmangin Bial Mission hruaitute leh Pastorte an kal a,Bawngthah ah Upa VanlalDika inah inkhawmna neih a ni.
———
Member thar :
Aug ni 12 Nilaini zan khan Hunthar Bial Phunchawng Mel 10-ah Nupuak tuak khat Pentecost kohhranah seng luh niin; Bro. Malsawma hi rawngbawltu Evan. R. Lalrinchhana’n Sual ngaihdamna baptisma a chantir nghal. Lalpan kohhranhote mi thar a pek avangin an lawm hle.
———
Ralna hun hmang :
August ni 12 Nilaini chawhma dar 11:00 khan North Mizoram District Office staff te chuan an thawhpui Bro. R. Lalnuntluanga pa Rev. Lalramzauva Sailo chu, Tlangnuamah ralna hun an hmang.

Rev. Ramzauva Ralna inkhawm hi Dist. Sudt. Rev. Laltluanga’n kaihruaiin, Thlamuanna thuchah Dist. Secy. Rev. Chhiarpuia’n a sawi a, Ralna thilpek Dist. Treasurer Rev. K. Lalduhsanga’n a hlan a, hunserh khar tawngtai Dist. Sunday School Secretary Evan. H. Lalrinngheta’n a hmang bawk.
Hemi ni vek chawhnu dar 1:00-ah Tlangnuamah vek District Missions Director Rev. C. Lalthantluanga, a Pa Rev. C. Damchungnunga’n a kalsan tak chu ralna neih chhunzawm a ni bawk. Rev. C. Lalthantluanga te chhung ralna Prog. Hi Dist. Supdt. Rev. Laltluanga’n kaihruaiin; Ralna thilpek Dist. Secretary Rev. Chhiarpuia leh Staff aiawhin Sist. R. Lalpianfeli ten an hlan a, Dist. Treasurer Rev. K. Lalduhsanga’n Thlamuanna thuchah sawi bawkin Rev. C. Lalthantluanga’n Office staff te chungah lawmthu a sawi. Staff zing atangin Rev. C. Damchungnunga Pentecost rawngbawltu pawimawh uina thu mi engemaw zat hnen atangin ngaihthlak a ni bawk.