UPCNEINEWSSERVICE Aug 30-Sept 6. 2020
———-
Kum 70 tlin lawmpuina hlan :
United Pentecostal Church of North East India kum 70 tlin lawmpuinan UPC International, Global Missions Director Rev. Bruce Howel leh Asia khawmualpui min bial tu, Regional Director Rev. Lynden Shalm te chuan lawmpuina thuziak (citation) America atangin Kohhran hote an rawn thawn vang vang a, he thuziak hi Aug 31, Thawhtanni khanGeneral Suptd Rev. Lalmalsawma Sailo chuan Office Devotion-ah Kohhran hote tan a tlangzarh a, tlang tin leh mual tina Pentecost Kohhran member zawng zawng te kum 70 tlin lawmna chibai a buk.
Kum 70 tlin lawmna leh hemi puala Souvenir siam pawh, April thlaa General Conference-ah khun khan taka lawmna hun ruahman a ni nain, hripui leng avangin ruahmang angin thil a tih theih ta lova. General Conference pawh November thla tawp Pathianni hmanga neih tura ruahman a ni ta ngawt mai a ni.
———
Beihrual thuzir zir tan :
September ni 1, Thawhleh zan atang khan India hmarchhuak huamchhung Tualchhung Kohhran hrang hrangah Beihrual thuzir tan leh a ni ta.
Kumin hian Chhung lam leh pawn lam Thianghlimna, Rev. K. Darsailova ziak chu zir tura ruahman a ni. Kum dang anga hman theih a nih loh avangin mahni tualchhung Kohhran ten, chhungkua leh group anga insiamin, mahni remchan dan angin ruahmanna an siam hlawm a ni.
———-
PenNet chhuah hun :
September ni khat atang khan Zonet rinna channel-a Kohhran programme chhuah hun chu darkar khatin a tawlh hma leh ta a, September thla chhung hian nitin tlai dar 6 atanga chhuak tanin zan dar 11, a tuk zing dar 4, chawhma dar 9 leh chawhnu dar 2 ah te a chhuak nawn thin dawn a ni.
LPS 12 channel-a Kohhran programme kal lai erawh a hun bi a la ngai rih a, nitin tlai dar 5 ah a chhuak tan a, zan dar 11, a tuk zing dar 5, chhun dar 11 ah te a chhuak nawn thin bawk.
————
Khawvel ram danga UPC Kohhran rawngbawlna thu thar :
Member thar leh rawngbawlna report :
Pacific region, hmun hrang hrangah Krista Chanchin tha rawngbawl hna a darh zau mek zel a, hri pui leng karah pawh Lalpa’n ram neih a thulh thei lo. Heng hmunah te hian member thar leh rawngbawlna report ngaihnawm tak tak neih a ni :
Solomon Islands :
Aug ni 29, Inrinni khan mi 21 zet sual ngaihdamna Baptisma changin Kohhranah sengluh an ni a, mi 2 in Thlarau Thianghlim Baptisma changin tawng tharin an tawng nghal. Kohhran thar pakhat din a ni tawh bawk.
Fiji :
Fiji ramah pawh Aug ni 26, Nilai zan khan hmeichhe pahnihin sual ngaihdamna Baptisma an chang thar.
Timor Leste :
Chawlhkar liam ta khan, Timor Leste ram, Dili Kohhrana lawi turin mi 3 in sual ngaihdamna Baptisma an chang.
New Caledonia :
Aug ni 23, Pathianni khan mi thar 3 in Lalpa Isua hmingin sual ngaihdamna Baptisma an chang.
Samoa :
Aug 30, Pathianni khan Pentecostals of Sinamoga Kohhranah mi thar 4 in Thlarau Thianghlim dawngin sual ngaihdamna Baptisma an chang.
Vanuatu:
Aug ni 14-16 chhunga Vanuatu UPC Hqrs, Port Villa-a Revival Crusade buatsaih pawh a hlawhtling hle.
Hripui leng karah Rev. Lonnie Vestal chu speaker atana rawih niin a rawngbawlna Lalpa’n mal a sawm hle. Crusade tawp zanah phei chuan mi thar 7 in sualngaihdamna baptisma an chang.
Greece khawpui pawimawh Athens (Bible-a Atheni khawpui) ah mi 3 in tui baptisma leh Thlarau baptisma an chang thar.
England(Victoria) ah mi 2 in Isua hmingin baptisma an chang.
Belgium ramah mi 13 in baptisma an chang.
Brazil rama Brasilandia-ah mi 2 in baptisma an chang.
Mauritius ramah March thla aṭanga tun thlengin mi 22 in baptisma an chang.
Venezuela ramah rawngbawltu minister 107 ordain an ni.
Trinidad and Tobago ramah mi 28 ten Isua hmingin baptisma an chang.
Botswana & Zimbabwe rama Global Missions hnuaia Missionary Rev. Michael Long leh a ho te rawngbawlna report :
1. Athlone khawpuia inkhawmpui (assembly) neihnaah mi 26 in Thlarau baptisma an chang a, mi 40 teh meuhin Isua hming ṭawmin baptisma an chang.
2. Binga khua hmun 2-a inkhawm buatsaihah mithar 48 ten sual ngaihdam nan baptisma an chang a, mi 35 ten Thlarau baptisma an chang.
3. Zimbabwe capital Harare khawpuiah mi 42 ten Thlarau an dawng thar a, mithar 48 ten September ni 5 hian baptisma an chang ang.
4. Lupane khuaah mi 41 ten Thlarau an dawng thar a, mithar 60 zet mai baptisma chang tur an awm tawh a, September thla laihawl velah hian Lalpan rem a tih chuan baptisma chan tir an ni ang.
———–
District hrang hrang rawngbawlna chanchin thar :
Lunglei District :
Aug.ni 30 Pathianni khan Lunglei District UPC in thla khat awh Pathian thu zirna a neih Pentecostal Bible School (PBS) chuan District UPC Conference Hall, Chanmari ah Graduation Day an hmang.
Graduation day programme hi PBS Teacher Rev.C.Lalrintluanga chuan a kaihruaia, Pukpui bialtu Pastor Rev.PC.Nghakliana chuan hunserh hmangin, PBS Principal Rev.C.Vanlalena chuan fuihna thuchah a sawi a, PBS zirlaite chu Pathian thu zir an nihna ang takin an nunah lang chhuak se, kohhran leh khawtlang tana tangkai taka nung tura a duh thu a sawi.
PBS Registrar Pastor K.Vanlalhruaia chuan result puangin Former PBS Principal Rev.Ralkapkunga Khiangte chuan Graduate Student-te Degree hlanna a nei zui a, Graduate Student aiawhin Lalhmunmawia chuan thu sawiin, 1st Year leh 2nd Year zirlaite chuan Gradute Student te thlahna hla mittui nen an sa bawk. PBS Dean Rev.PC.Lalfakawma chuan lawmthu sawina a neih hnuin Theiriat bialtu Pastor Rev.K.Lalchhuansanga chuan tawngtainain he hun hi a titawp a ni.
Lawmman chi hrang hrang sem a ni a, heng mite hi lawmman dawngtute an ni.
1. Gold Medalist, Rev.Zalawma (L) Award (Graduate student zinga ti tha ber) – Lalhmunmawia, Lungmawi, 3rd Year.
2. Topper, Upa R.Sapchhawna (L) Award (Kumina Student zinga pakhatna) – Lalhmunmawia, Lungmawi, 3rd Year.
3. Best Character – Lalliantluanga, Sesawm Vengthlang, 3rd Year.
4. Best Promising : HC.Lalmuanpuia, Rangte N, 3rd Year.
5. Student of the Year – Lalhmunmawia, Lungmawi, 3rd Year.
Kumin hian Graduate hi mi 6 an ni a, chungte chu:
1. Lalthazuala, Tleu
2. R. Vanlalhmangaihkimi, Tuipui D
3. Lalliantluanga, Sesawm Vengthlang
4. PC. Lalhriatkimi, Chhipphir
5. HC. Lalmuanpuia, Rangte N
6. Lalhmunmawia, Lungmawi.
Kumin hian PBS ah hian zirlai 22 an awm a, an zingah hian Lawngtlai District atangin Student 1 a tel ve bawk.
———-
Thisen pe :
1. Lunglei District UPC in thla khat awh Pathian thu zirna a neih Pentecostal Bible School (PBS) zirlaite chuan Aug.29 inrinni khan Civil Hospital, Lunglei ah a mamawhtute hman turin thisen Unit 10 an pe.
PBS zirlaite’n thisen an pek hma hian District UPC office ah PBS Dean Rev.PC.Lalfakawma chuan tawngtaina a neih sak a, thisen hi Civil Hospital Blood Bank ah kal chilhin an pe a ni.
Kumin hian PBS ah hian zirlai 22 an awm a, taksa lamah engemaw harsatna nei tih loh chuan thisen hi an pe thei a, thisen petute hi mipa 9 leh hmeichhia 1 an ni. (Pic.PBS Thisen pe)
2. August ni 28 zirtawpni khan Theiriat Bial PYD te chuan District PYD Conference rorel bawhzui in Zobawk Local UPC Sunday School hall ah a mamawh apiangte hman turin Civil Hospital, Lunglei tan Thisen Unit 25 an pe.
Thisen pek hma hian Zobawk Local Sunday School Hall-ah hian hunserh tawi hman hmasak a ni a, he hun hi bial PYD President Rbt.C.Lalzawmdika chuan a kaihruai a, C.Vanlalthlani, Counsellor Tobacco control Cell hnen atangin thusawi ngaihthlak a ni bawk. He hunah hian bialtu Pastor Rev. K. Lalchhuansanga chuan tawngtaina neiin hunserh a hmang a, Dr. Lucy, Blood Blank Officer, Civil Hospital Lunglei hnen atangin Thusawi ngaihthlak a ni.
Theiriat bial PYD thisen petu te hi mipa hlir an ni a, thisen pe tur hian mi 70 chuang kalkhawmin Theiriat, Hrangchalkawn, Lungpuizawl leh Zobawk Local atang ten thisen hi an pe a ni.(Pic.Theiriat bial PYD thisen
——-
Rawngbawltu Ni :
Aug.ni 30 Pathianni khan United Pentecostal Church Rahsiveng-a Rawngbawltute chuan Rawngbawltu Ni an hmang. He rawngbawltu ni hi hun hnih ah then a ni a, Chawhma lam hi Upa LH.Sanghluna, Local Chairman in a kaihruai a, Evan. V. Lalduhawma buatsaih , Thlaler Biakbuk chu Projector hmangin zirho a ni.
Chawhnu lam hun hi Evan. Laldinpuia Sailo Local Secretary in a kaihruai ve thung a, Bialtu Pastor, Rev. C. Lalhriatpuia buatsaih Rawngbawltu mawhphurhna tih chu thupui then 7 hmangin zirho a ni a, Thupui tin hi sawiho nghal zel a ni.
Rahsiveng UPC ah hian Kohhran member 747 awm mekin Licence Holder 9, Upa 10, Sr. Upa 1 leh Rawngbawltu 11 an awm mek a, Rawngbawltu Ni hmanna ah hian 31 atangin 25 an tel thei a ni.
————
North Mizoram District :
Dist. Supdt Rev Laltluanga chuan kar kalta Aug ni 26 Nilaini khan North Mizoram District in rawngbawlna beihpui a thlak mek zinga rawngbawlna hmun pakhat Rengdil Bial, New Eden a tlawh, New Eden Biak in compound-ah leimin awmin Lungrem dan tur Dist. Supdt. Hian a enpui a, kohhranhote’n harsatna an tawh chhawmdawlnan Rs. 20000 (Singhnih) pek Officer meeting chuan a rem ti.
District Supdt. Hian New Eden tlawh pah hian khawthlang tlangdunga kohhran hrang hrang Kawrthah Biak in sak lai te, Tuidam Biak in sak laite bakah Zawlnuam Biak in sak mek te a tlawh bawk. (New Eden Biak In)
——-
Book let tichhuak dawn :
North Mizoram District Lit. & Pub. Board Committee-in hmachhawp a neih kohhran mamawh mil ang zela booklet KAWNG ENTU tihchhuah a rel chu, a vawikhatna atan Kumin September thla hian chhuahkhatna tihchhuah tum a ni.
Kawng Entu chhutkhatnaah hian Thupui 7 dah a ni a, mipuite tana chhiar leh zir manhla tak tura duan a ni, he lehkhabua thupui zirtur te chu 1) World Council Churches (WCC) 2) Unique Indentification Number (UID) 3) Mizoram Kohhran Hruaitu Committee (MKHC) 4) Bible Society of India 5) Bible College 6) Pentecostal (UPC) Zeizia, Kohhran nihphung leh Rawngbawltute hlutna tih te an ni.
Kawng entu booklet hi Copies 5000 siam tur niin, tun thla (September) thla chhung hian released theih beisei a ni.
Literature Board hian kum 2021-a Nilai Thupui zir tur, ziaktute’na an ziah zawh tawh chu Aug ni 31 thawhtanni khan Edit hna an thawk tan a, Thawhlehni Sept. Ni 1 thawhlehn i khan an zo.
——-
Work Camp :
N. Mizoram District Headquarters Bial Missions Department te chuan Conference-a an lo rel tawh, ‘North Mizoram District Missions Field chhunga a tulna hmun apianga Work Camp-a hnathawh ni se,’ an tih chu hrilengin harsatna a siam avangin remchanna zawngin West Phaileng Bial chhunga Phulpui Missions Field Biak in sak chhawmdawl nan Rs. 50000 District Missiions Department-ah an hlan (Hqrs. MS Dept)
District Hqrs Local Missions Dept te hian Aug ni 29 Inrinni zan khan Tlangsang Biala Volunteer-a Pathian rawngbawla awm mek Sis Mapeki tanpui nan NMD Missions Dept kaltlangin tanpuina an hlan. Tanpuina sum hi remchan zawkna avangin Dist Missions Treasurer AC ah Rs. 8000 transfer-in Tlangsang Bialtu Pastor K. Ainawna hnenah thawn thlak nghal a ni.
——-
Member thar :
1. Aug. Ni 29 Inrinni zan khan Tlangsang Bial Sailut khuaah Sist. Mapeki rawngbawlna kaltlangin Mithar nu pakhat leh a fate pathum, member 4 chu Pentecost kohhranah lawmluh an ni. Heng mithar neih te hi Pathian remruat niin; Rawngbawltu Mapeki hian Mi thar Lalpa pek chungchangah Tharma khaw lama rawngbawlna sialtu a nih a rin thu a sawi.
2. Aug ni 23 Pathianni khan Rengdil Bial Sihthiang-ah Pentecost kohhrana lawi turin mi thar -1 sengluh a ni. Mi thar hian Evan F.Lalbiaknia kutah Sual ngaihdamna baptisma Lalpa Isua hmingin a chang nghal a ni, hun engemaw chen atang khan Sihthiang kohhranah hian Evan F. Lalbiaknian rawngbawlna a nei mek a, Lalpan a rawnbawlna mal a sawm hle (Sihthiangah mi thar)
3. Aug ni 30 Pathianni khan North Mizoram District Missions Field South Chhimluangah member thar-1 neiin; rawngbawltu Evan. E. Lalrawngbawlzela’n lawmlutin Sual ngaihdamna Baptisma a chantir nghal bawk. Rawngbawltu rawngbawlna hi S. Chhimluang Upate’n an tawiawm a ni.
4. August ni 23 Pathianni khan Lengpui Bial Dapchhuah kohhranah mithar chhungkaw khat member 3 awmna Pentecost kohhranah he hmuna rawngbawla awm T.Upa Hmangaihzuala’n a lawm lut.
Lengpui Bial Dapchhuaha rawngbawl tur hian Maubawk Bial Missions Department hma laknain Tirhkoh T.Upa Hmangaihzuala hi dah a ni a, ani rawngbawlna leh a ruaitu Bial Maubawk bakah a bial neitu Lengpui bialte thawhhona Lalpan mal a sawm a, tunah hian member thahnem tham tak awm tawhin, he hmunah hian Lalpan a khat tawkin mi thar a pe ve reng a, District in Biak in a sak sak pawh luah theih mai a ni tawh bawk a ni.
5. Mamit Bial Phaizau Preaching Point-a rawngbawla awm Bro. K. Pzawna chuan Aug ni 23 Pathian Ni khan Pentecost kohhrana lawi turin mi thar 2 a lawm lut.
6. Pathianni kal ta Aug. Ni 23 khan Vairengte Bial, North Chhimluang Preaching Point-ah Mi thar chhungkaw khat, member 4 awmna chu Vairengte Pastor Rev. K. Malsawmtluanga’n United Pentecostal Church of North East India-a lawi turin Lal Isua hmingin a lawm lut. North Chhimluangah hian North Mizoram District in ram lak beihpui thlak thupuia a neih, bawhzuia, rawngbawlna neih mekna hmun a ni a. He hmunah hian Evan. C. Lalthlamuana’n rawngbawlna neiin rawngbawltu rawngbawlna kaltlanga mi thar neih te hi kohhranhote’n an lo lawm hle. Mi thar lawmluh ni tlai hian mi thar lawmna ruai kilho a ni
North Chhimluangah hian Biak in nei turin North Mizoram District chuan hma a la mek bawk.
7. Tlangsang bial chhunga a tulna apianga Lalpa rawngbawl hna thawka in volunteer Sist. Vanlalpeki rawngbawlna chuan hma sawn chho zelin; a rawngbawlna kaltlangin Aug ni 14 khan mi thar pahnih neih a ni a, Pastor K. Ainawna’n Sual ngaihdamna Baptisma heng mi thar te hi a chantir. Baptisma changte hian zan inkhawmah Thlarau Thianghlim baptisma an chang nghal bawk. Tin, he zan inkhawm hi Lalpan hna thawhpuiin member pakhat thla thum thi nei thei tawh lo, kawng leh tai na chu Pathian atanga damna changin Pathianah a hlim em em a ni.
Tlangsang Bial, Tlangsang Kohhran Church Board Committee te chuan Aug. Ni.15 Inrinni zan khan rawngbawlna kauki hrang hranga chak zawk leh Thlarau zawka rawng an bawl theinan Tlangsang Biak inah intuaitharna an nei a, Bialtu Pastor K. Ainawna hova neih a ni. Hei bakah hian Aug ni 16 Pathianniah Tlangsang biak in ah vêk Church board member zawng zawng bakah kohhran Dept tin O.B, bial dept OB, Tlangsang a lawi leh bialpui OB, Tlangsang a lawi ten bialtu pastor hovin intuaitharna an nei leh bawk.
District Confe. In a passed North Mizoram District huam chhunga ram lak beihpui thlak chu District hmalaknain ngawrh taka neih chho zel niin; tun dinhmunah NMD hian District, Bial leh Local bakah mimal chawmin Tirhkoh 40 chuang tirh chhuah a ni a; Kumin Jan – Aug chhung khan Mithar 73 rawngbawltute rawngbawlna kaltlangin neih a ni tawh a ni.
——
Audit :
North Mizoram District Building Committee rorelin an District huam chhunga Pastor Quarters sak zawh tawh sum hman dan Audit nise a tih angin, Auditor tura ruat Rev. C. Lalramthanga leh Rev. C. Laltlanchhuaha te chuan Aug ni 25 Thawhlehni atang khan Audit an nei tan.
Audit thawhkhatna hi Kawnpui Pastor Quarters sak zawh takah neiin; tluang takin an zo va, Aug. Ni 26 (Nilaini) khan a thawhhnihna nei lehin Durtlang Pastor Qtrs sak mek sum hmanna audit neih thung a ni.
———
Tanpuina :
North Mizoram District Tlangnuam Bial te chuan Bialin kalphunga an neih, an Bial chhunga Biak in sa te an theih ang anga an puih thin chu kalpui chhunzawm zelin Aug ni 16 khan Bial Missions Department te chuan Lungleng-1` Biak in leh Samtlang Biak in sak mek pualin Rs. 23150 ve ve an pe.
Kohhran pahnihte sum hlannaah hian Bialtu Pastor Lalruatkima Fanai chuan hovin thusawina a neih bakah Tlangnuam Bial Missions Director Evan. C. Lalramngaihzuala, Bial Missions Secy E van. J. Vanlalruata leh Bial Missions Treasurer Evan. Rengthuama ten thu an sawi bawk. Biak in sak Tanpuina kohhran pahnih Lungleng I leh Samtlang Kohhhran ten an dawnah hruaitute chuan lawmthu Lal Isua hmingin an sawi.
————
Lawngtlai West District :
District chhunga rammut rawngbawlna kalpui zelah Aug ni 25-30 chhung khan Evan Henry H Ramthianghlima leh Rbt.Lalduhkima ten Tuidangchhuahah member thar 8 Kohhranah sengluh an ni a, mi thar te hi Aug ni 30 khan Evan. Henry.H.Ramthiangthliman Kohhranah a senglut a, mi pathum(3) in sual ngaihdamna Baptisma an chang nghal.
Aug ni 31, Pathianni zingah chhungkaw khat member paruk (6) awmna chu Evan Henry H Ramthianghlima vek hian Tuidanchhuah Pentecost Kohhrana lawi turin a senglut leh bawk.
———
Member thar :
Aug ni 21 atanga ni 30 chhung khan Darnamtlang ah District Missions Director Rev. R. Lalbiakthuama, Upa H. Lalfakfela leh Rbt George Lalawmpuia te Ram mu in an fehchhuak a, an rawngbawlna kaltlangin member thar 20 zet Kohhranah sengluh an ni.
Mi 10 in Missions Director Rev.F.Lalbiakṭhuama kutah sual ngaihdamna baptisma an chang a, Pastor K.Lalzawmsanga Bialtu Pastor in nau 6 a hlan bawk. Rev.F.Lalbiakṭhuama Director Missions Dept. hova neih a ni a. Upa.H.Lalfakfela College Veng leh Rbt.George Lalawmpuia Council Veng ten an tawiawm a ni.
Aug ni 23, Pathianni khan Vaṭhuampui Bial Chikhurlui Kohhranah mi 6 in Pastor B. Lalbiakchhunga kutah sual ngaihdamna Baptisma changin member thar 3 Kohhranah sengluh an ni a, Nau 2 a hlan bawk.
Aug ni 23, Pathianni vek hian Lawngtlai College veng ah District Secretary Bialtu Pastor ni bawk Rev. Lalsawmliana Sailo chuan nau hlan rawngbawlna leh Baptistma rawngbawlna a nei a, nau 1 hlan in mi 8 in Baptistma an chang bawk.
———–
Lawngtlai West District chhungah Rammut thla, August thla chhunga member thar sengluh te :-
1. Darnamtlang – 20
2. Tuidangchhuah – 14
3. Lunghauka – 9
4. Sabualtlang – 8
5. Laitlang – 8
6. Saizawh East – 4
7. Chawngte P – 3
8. Chikhurlui – 3
9. Lawngtlai Bazar Local – 2
Total – 71
——–
District Puipa te tunkar an programme :
District Secretary&Treasurer Rev.Lalsawmliana Sailo chuan Mampui Localah Pathianni hmangin rawngbawlna a nei ang.
Missions Director Rev.F.Lalbiakthuama chuan Diltlang South bialah ram lak beihpui thlakin rawngbawlna a nei.
Aug ni 21, Zirtawpni khan Lawngtlai West District dan bu drafting commitee thut a ni a, hma lak zel dan tur te sawiho a ni.
————-
Churachandpur District :
Churachandpur District chhunga Pastor te chuan hripui leng karah pawh a theih ang angin rawngbawlna an kalpui mek zel a, Pangzawl Section Pastor Rev. K. Lalramdina chuan Aug ni 30 atanga Sept ni 2chhung khan Kohhran in tlawh kualin dam lo tawngtai sakna a nei, a mi 3 in chawp leh chilhin damna an chang nghal. Parbung Section Pastor Ngamkholal pawhin chawlhkar tir atang khan bial chhung fangin rawngbawlna a nei mek bawk.
Churachandpur District office chu containment zone seal-a a awm a vang in khar rih a ni.
————
Chhimtuipui District :
Sept ni 1, Thawhlehni khan District Committee Room ah Chhimtuipui District Constitution Amendment board meeting neih a ni. He meeting hian District Constitution thlirho in belh ngai te belhin siamthat ngai lai te a siam tha bawk
District Constitution Amendment Board member te :
Chairman – Evan.V.John
Secretary – Upa H.Ramhluna
Members : 1. Rev.Joseph L. Thlauhthang
2. Rev.W.L Thanghre
3. Rev.Kholy Hlychho
4. Rev.Dr.C.Sihmo
5. Rev.C.Satinkapa
———
Member thar :
Aug ni 30, Pathianni khan Niawhtlang Kohhranah chhungkaw khat member 8 te chu Pentecost Kohhrana lawi turin Bialtu Pastor V.Lalhlimpuia’n Kohhranah a senglut.
———-
Singing competition result puang :
Hripui leng kar a Nauangte tihphurna leh talent haichhuah na atana Chhimtuipui Dist PCD ten Live Record Home Singing Competition anbuatsaih chu zawh niin, Sept ni 1, Thawhtan zan khan Chhimtuipui District Pennet youtube channel aṭang result hi puan a ni.
Intihsiak lawmman dawng te :
CATEGORY – 1 (Kum 11 chunglam)
1st – Judy Hatvanlalmalsawmkimi (Kum 11)
D/o Rbt S Vanlalvena
Dist.Headquarter local.
2nd – Melisa Rualchhingpuii (Kum 11)
D/o Ricky Lalrinchhuana
Niawhtlang local.
3rd – Zonuntluangi (Kum 14)
D/o Krosshmangaiha
Niawhtlang local.
CATEGORY -2 (Kum 10 chin hnuailam)
1st – Sofia Lalnghakrengi (Kum 8)
D/o Ricky Lalrinchhuana
Niawhtlang local.
2nd – Chawngthanzuali (Kum 10)
D/o Ebenezer Lalawmpuia
Siahatla local
3rd – Travis V Lalhruaisanga (Kum 9)
S/o Upa V Lalninghaka
Meisatla local
Sept ni 6, Pathianni hian heng lawmman dawng tute hnenah hian kal chilhin an sem dawn a ni.
———–
Thlaithar kut :
Sept ni 6, Pathianni hi Chhimtuipui District chhunga kum tin an hman thin, Thlaithar kut Pathianni a ni a, Dist chhunga Tualchhung Kohhran hrang hrang te chuan mahni remchan dan angin an hmang hlawm dawn a ni.
——–
Quarters lungphum phum :
Aug ni 30, Inrinni khan Pastor L.Nghakliana S.Lungpher Pastor chuan an Pastor Quaters sakna thar bul tanna tur lungphum a phum a, hemi ni aṭang hian quaters sak hna tan nghal a ni.
——–
Aizawl East District :
Aizawl East District chhunga Bial hrang hrangah ruahmanna ang chuan September 11 atanga 13 chhung hian Bial Sunday School Inkhawmpui hman hun tur a ni a, kuminah erawh hri leng mek avangin Bial Sunday School inkhawmpui hi kum danga hman thin angin hman theih a ni dawn lo.
Bial engemaw zat chuan rorel inkhawm chauh nei turin ruahmanna an siam a, rorel inkhawmah hian sawrkar dan siam zawm chunga kalpui turin an in ruahman hlawm.
———
Rammut report :
August Rammut thla rawngbawlna kal zelah Aizawl East District chhungah mithar leh baptisma chang thar neih belh zel a ni.
August 30, Pathianni khan Bethlehem Kohhranah Bialtu Pastor leh Bethlehem Kohhran hmalaknain Rev.VL.Hnemtluanga, District Treasurer Speaker-a hmangin Thalaite tan Thuthlung pawimawhna tih hmangin zirtirna neih a ni a, thusawi zawhah Baptisma khur hawn niin hetah hian mi 20-in sual ngaihdamna baptisma an chang a ni, an zingah hian mithar pakhat Kohhran dang atangin a tel a ni.
August 30, Pathianni vek khan Thuampui Bialtu Pastor, Rev.KVL.Hmangaihkima chuan Muanna Veng Kohhranah nau pakhat hlanin Kohhran dang atangin mi pakhat sual ngaihdamna baptisma a chantir bawk.
Bawngkawn Kohhranah pawh August 26, Nilai zan khan Baptisma khur hawn niin mi 4 in Bialtu Pastor, Rev.C.Mawizuala kutah sual ngaihdamna baptisma an chang thar a, an zingah hian ringlo mi Hindu atangin mi pakhatin sual ngaihdamna baptisma hi a chang bawk a ni. Bawngkawn bialah hian Evan.Lalamena chuan rammut thla hian rawngbawlna a nei a ni.
August 31, Thawhtan zan khan Rabung bial, Rabung Vengchhak Kohhrana lawi turin mithar pakhat sengluh a ni bawk. Rabung bial-ah hian Evan H.Lalbiakzauva’n rawngbawlna a nei a ni.
District OB meeting chuan rammut thla khan District-in a chhawrlai Evangelist te pawh heng hmunah te hian rawngbawl turin a tir chhuak: Evan H.Lalbiakzauva chu Rabungah, Evan V.Kamneihthanga – Khawzawl Bial, Ngaizawl-ah, Evan H.Malsawmthanga – Bethlehem Bial, Bethlehem Vengthlangah, Evan R.Vanchhunga – Upper Republic bial, College Vengah, Evan Lalamena chuan Bawngkawn bialah.
———
Thil pek :
Hnahlan Hqrs.Kohhrana lawi Bro.Pc.Siamliana te chhungkua chuan an lawina Hqrs.Kohhranah Bawngpa tuai an hlan.
Bialtu Pastor R.Lalfamkima leh Church Board memberte chuan August 31, Thawhtan zingkar khan Bawng khel bengin Pathian hnenah hlanna leh a petu chhungkua te tan malsawm tawngtaina an neih sak a ni. He Bawngpa tuai hi Hnahlan Hqrs.Kohhran te hian an vulh rih anga, Hnahlan bial tho Khuangphah Kohhran te pawn tunah hian an vulh mek bawk a ni.
Facebook