———-
General hqrs Office khar :
Mizoram sawrkarin Aizawl Municipal Council (AMC) huam chhunga Total lockdown a puan avangin General Hqrs Office pawh August ni 17 atanga ni 21 chhung khan khar a ni a, Hqrs awmna hmun Mualpui Salem vengin an veng chhungah total lockdown an puan avangin Aug ni 24 atanga ni 28 chhungin office hi kan khar chhunzawm nghal bawk.
General Superintendent Rev. Lalmalsawma Sailo chuan sawrkar thupek ngaichang chung zela Kohhran office leh hmun hma pawimawh dang pawh kalpui a nih tur thu sawiin; Dan zawm hi himna a ni tih hriaa thuawi tlang taka awm zel turin Kohhran hote a ngen a. Pastor te, Tirhkoh te, Kohhran Upa leh rawngbawltu te pawh mamawhtu Kohhran hote tan englai pawha penchhuak tura an in huam reng thu a sawi bawk. Hemi rual hian Aizawl khawpui chhunga awm, North Mizoram District, Tuikhuahtlang leh Aizawl East District, Ramhlun South te pawhin an office an khar ve bawk.
———–
Aizawl East District
Office khar:
Aizawl East District Office awmna, Ramhlun South chu Covid-19 hri leng avangin August 25, Thawhlehni atang khan Total Lock Down puan a ni a, hemi avang hian August 25, Thawhlehni atang khan thu leh awm hma atan District Office chu dawr theih lovin khar ve nghal a ni. Hemi hun chhunga Office dawr duh, harsatna nei an awm chuan District hruaituten hriatthiamna an ngen a ni. Office kal zel dan tur chu Sawrkar leh LLTF thuchhuak ngaichang chunga la inhriattir leh tur a ni dawn a ni. District Office staff bakah Kohhran mipuite pawh he hrileng laka humhima kan awm zel theih nan fimkhur taka awm turin leh Sawrkar leh VLTF/LLTF thuchhuak te zawm hram hram turin District hruaitute chuan min ngen a ni.
Theological Education Board cum OTS Faculty meeting neih a ni:
Aizawl East District hnuaia Short Term Course Pathian thu zirna enkawltu Theological Education Board leh OTS Zirtirtu, Faculty meeting chu August 24, Thawhtanni khan District Superintendent room-ah neih a ni. He hun hi Rev.Biaksangzuala, Chairman TEB chuan a kaihruai a ni. Thu pawimawh tak tak ngaihtuah niin an rorel langsar zualte:
1. Kumin 2020 Session-a Class kal lai chu Covid-19 hrileng mek avangin thu awm leh hma atan tihtawp a ni.
2. Exam hun leh Graduation Day pawh ruahmanna awm sa thulh niin hun remchang hmasaberah ngaihtuah a ni anga, Zirlaite la in hriattir leh tur a ni ang.
3. Zirlaite hetiang hun harsa kara hun an hmang hi TEB chuan a lainat hle a, tun atang chuan anmahni hmun lamah an remchan anga awm phal an ni tawh a, Aizawl khawpawn te pawh an khaw lama haw remtih a ni.
Theological Education Board cum OTS Faculty meeting-ah hian memberte an telkim thawkhat a ni.
Baptisma changthar:
August 24, Thawhtan zan khan Thingsulthliah bial, Thingsulthliah hmunah mithar pakhat in Bialtu Pastor V.Lalnienga kutah sual ngaihdamna baptisma a chang thar. Thingsulthliah bialah Sesawng leh CTI Kohhranah thla hmasa khan mithar 1 ve ve Kohhranah sengluh an lo ni tawh bawk a ni.
Tawngtai rawngbawlna nei:
Serchhip bial, Electric Kohhran PYD te chuan Kohhran In tin tlawhchhuaka tawngtai rawngbawlna an neih chu August 25, Thawhleh zan khan an zo fel. He tawngtai rawngbawlna hi July 23 atang khan lo tan tawhin In tin tlawhchhuakin tawngtai hona neih thin a ni a, member pawh engemaw zat kal thinin member kalte leh Kohhran chhungkua te hian hlawkthlak an ti hle a ni. Electrict Veng PYD-ah hian tunah hian member 80 an awm mek a ni.
Hruaitute Programme:
Rev Biaksangzuala, District Superintendent chuan August 25, Thawhlehni khan Champhai lamah Kohhran thil tul pawimawh tiin a kal a, August 26, Nilaini khan Kohhranin a mamawh em em New Champhai-ah Kohhran hmun hma tur Pu.T.Lalthlamuana ram chu lei fel a ni. Ram lei tak hi a hmunah en nghalin tawngtaina hun hman a ni bawk. District Superintedent hi Champhai Bethel bialtu Pastor Lalhmangaihawma Parte bakah Driver C.Lalpianthanga ten an tawiawm a ni.
———
North Mizoram District :
Hruaitute Programme:
Aug ni 26 Nilaini khan District Supt. Rev. Laltluanga chuan Rengdil Bial chhunga District in rawngbawlna beihpui a neihna hmun New Eden Kohhran a tlawh
Ram lak beihpui thlak:
District Confe. In a passed North Mizoram District huam chhunga ram lak beihpui thlak chu District hmalaknain ngawrh taka neih chho zel niin; tun dinhmunah NMD hian District, Bial leh Local bakah mimal chawmin Tirhkoh 40 chuang tirh chhuah a ni a; Kumin Jan – Aug chhung khan Mithar 73 rawngbawltute rawngbawlna kaltlangin neih a ni tawh a ni.
Pastor Qtrs sak, sum hmanna Audit nei: North Mizoram District Building Committee rorelin an District huam chhunga Pastor Quarters sak zawh tawh sum hman dan Audit nise a tih angin, Auditor tura ruat Rev. C. Lalramthanga leh Rev. C. Laltlanchhuaha te chuan Aug ni 25 Thawhlehni atang khan Audit an nei tan.
Audit thawhkhatna hi Kawnpui Pastor Quarters sak zawh takah neiin; tluang takin an zo va, Aug. Ni 26 (Nilaini) khan a thawhhnihna nei lehin Durtlang Pastor Qtrs sak mek sum hmanna audit neih thung a ni.
Lengpui Bial: August ni 23 Pathianni khan Lengpui Bial Dapchhuah kohhranah mithar chhungkaw khat member 3 awmna Pentecost kohhranah he hmuna rawngbawla awm T.Upa Hmangaihzuala’n a seng lut.
Lengpui Bial Dapchhuaha rawngbawl tur hian Maubawk Bial Missions Department hma laknain Tirhkoh T.Upa Hmangaihzuala hi dah a ni a, ani rawngbawlna leh a ruaitu Bial Maubawk bakah a bial neitu Lengpui bialte thawhhona Lalpan mal a sawm a, tunah hian member thahnem tham tak awm tawhin, he hmunah hian Lalpan a khat tawkin mi thar a pe ve reng a, District in Biak in a sak sak pawh luah theih mai a ni tawh bawk a ni.
Mamit Bial: Mamit Bial Phaizau Preaching Point-a rawngbawla awm Bro. K. Pzawna chuan Aug ni 23 Pathian Ni khan Pentecost kohhrana lawi turin mi thar 2 a lawm lut.
Vairengte Bial: Pathianni kal ta Aug. Ni 23 khan Vairengte Bial, North Chhimluang Preaching Point-ah Mi thar chhungkaw khat, member 4 awmna chu Vairengte Pastor Rev. K. Malsawmtluanga’n United Pentecostal Church of North East India-a lawi turin Lal Isua hmingin a lawm lut. North Chhimluangah hi North Mizoram District in ram lak beihpui thlak thupuia a neih, bawhzuia, rawngbawlna neih mekna hmun a ni a. He hmunah hian Evan. C. Lalthlamuana’n rawngbawlna neiin rawngbawltu rawngbawlna kaltlanga mi thar neih te hi kohhranhote’n an lo lawm hle. Mi thar lawmluh ni tlai hian mi thar lawmna ruai kilho a ni. North Chhimluangah hian Biak in nei turin North Mizoram District chuan hma a la mek bawk.
Tlangsang Bial: Tlangsang bial chhunga a tulna apianga Lalpa rawngbawl hna thawka in volunteer Sist. Vanlalpeki rawngbawlna chuan hma sawn chho zelin; a rawngbawlna kaltlangin Aug ni 14 khan mi thar pahnih neih a ni a, Pastor K. Ainawna’n Sual ngaihdamna Baptisma heng mi thar te hi a chantir. Baptisma changte hian zan inkhawmah Thlarau Thianghlim baptisma an chang nghal bawk. Tin, he zan inkhawm hi Lalpan hna thawhpuiin member pakhat thla thum thi nei thei tawh lo, kawng leh tai na chu Pathian atanga damna changin Pathianah a hlim em em a ni.
Tlangsang Bial, Tlangsang Kohhran Church Board Committee te chuan Aug. Ni.15 Inrinni zan khan rawngbawlna kauki hrang hranga chak zawk leh Thlarau zawka rawng an bawl theinan Tlangsang Biak inah intuaitharna an nei a, Bialtu Pastor K. Ainawna hova neih a ni. Hei bakah hian Aug ni 16 Pathianniah Tlangsang biak in ah vêk Church board member zawng zawng bakah kohhran Dept tin O.B, bial dept OB, Tlangsang a lawi leh bialpui OB, Tlangsang a lawi ten bialtu pastor hovin intuaitharna an nei leh bawk.
Tlangnuam Bial: North Mizoram District Tlangnuam Bial te chuan Bialin kalphunga an neih, an Bial chhunga Biak in sa te an theih ang anga an puih thin chu kalpui chhunzawm zelin Aug ni 16 khan Bial Missions Department te chuan Lungleng-1` Biak in leh Samtlang Biak in sak mek pualin Rs. 23150 ve ve an pe.
Kohhran pahnihte sum hlannaah hian Bialtu Pastor Lalruatkima Fanai chuan hovin thusawina a neih bakah Tlangnuam Bial Missions Director Evan. C. Lalramngaihzuala, Bial Missions Secy E van. J. Vanlalruata leh Bial Missions Treasurer Evan. Rengthuama ten thu an sawi bawk. Biak in sak Tanpuina kohhran pahnih Lungleng I leh Samtlang Kohhhran ten an dawnah hruaitute chuan lawmthu Lal Isua hmingin an sawi.
RENGDIL BIAL: Rengdil Bial Sihthiang kohhran Aug ni 23 Pathianni khan mithar -1 lawmluh niin; Sihthianga rawngbawla awm Evan F.Lalbiaknia kutah Sual ngaihdamna baptisma Lalpa Isua hmingin a chang nghal a ni.
———
Lunglei District ;
1.DISTRICT DAY:
Aug.ni 29 inrinni hi Lunglei District UPC Day a ni a, he ni hi Lunglei District UPC kohhran ni pawimawh anih angin kohhran Office pawh khar a ni ang.
February 19, 1950-a Mizorama UPC kohhran din anih hnu khan August 29, 1965-ah Mizoram chhim lamah chuan District hran din a ni a, a hming atan South Mizoram District tih niin, he hming hi 1979 thleng khan a pu zui a, 1980 atangin Lunglei District tia thlak a lo ni ta a ni.
South Mizoram District din ni hi Lunglei District din ni atan hman chhunzawm zel a ni a, tun kum hi Lunglei District a indan atanga kum 55- na a ni.
Lunglei District UPC Day hi kum dangah chuan Aug.ni 22 ah hman thin a ni a, kumina neih Lunglei District UPC Conference vawi 55-na chuan Lunglei District UPC dinni hi Aug.29 anih zawk avangin Aug.ni 29 ah hian hman tawh turin a lo rel a ni.
Tuna Lunglei District hruaitute:
Superintendent – Rev.C.Vanlalena
Secretary – Rev.PC.Lalfakawma
Treasurer – Rev.C.Lalrintluanga
———
2. HEADQUARTERS BIAL PYD TEN THISEN AN PE:
Aug ni 21, zirtawpni khan UPC North East India Kohhran thalai pawl, Lunglei District Headquarters Bial PYD te chuan Lunglei Civil Hospital tan thisen unit 25 an pe.
Headquarters bial PYD te hian Lunglei District PYD Conference in Blood Donation neih nise tia a lo rel bawhzui nan thinsen hi an pe a, Lunglei District UPC office tualzawl ah hunserh tawi an hman naah Bial PYD Vice President Eddie Zonunkima chuan hun a kaihruai a, bialtu Pastor Rev.C.Hmingthanfala chuan tawngtaina a nei sak. Ramthar AOC, Farm veng, Electric veng leh Headquarters Kohhran, Chanmari atangin thisen pe tur hian an kalkhawm a, Lunglei Civil Hospital ah kal chilhin thisen unit 25 an pe a, thisen petu te hi mipa vek an ni.
Lunglei District Hqrs Bial PYD te a mamawh a piangte hman turin kum tin thisen hi an pe thin a ni.
———
3. LITERATURE BOARD AN THUKHAWM:
Aug,ni 24 thawhtanni khan District Superintendent Room-ah Lunglei District UPC Literature board vawi 66-na chu Chairman Rev.Ralkapkunga Khiangte kaihhruainain neih a ni a, an rorel tlangpuite:
1. Literature workshop neih nise tia lo rel tawh chu kan boruakin a zir loh avangin kumin atan chuan neih loh mai nise.
2. 2021-a PCD te zirlaibu tur ‘Rawngbawltu leh rawngbawlna’ (rawngbawlna puitu lehkhabu) Pastor Jerry Lalmuanawma ziah chu tihchhuah sak nise tha tih a ni bawk.
3. Literature Committee in a lo tih chhuah tawh Kohhran chanchin chu ennawna siambelh turin hmalak nise tha tih a ni.
———-
4. SOCIAL WORK DAY HMAN DAN TUR REL
Aug.ni 22 inrinni khan Lunglei District PYD hnuaia Social Work Day Organising Committee leh Town Area-a bial panga aiawh te chuan Town Area-a PYD ten Oct.ni 2 Social Work day an hman dan tur relin District UPC Conference Hall-ah an thukhawm a, an rorel tlangpuite:
1. Social work day town area ten a huhova hman thin chu tunlai hripui leng vang leh sawrkar inkaihhruainate a awm avangin a huhova hman loh mai nise tha tih a ni.
2. Social Work Day erawh hman ngei tha tih a ni a. Local tin ten mahni remchan dan anga hman mai nise tha tih a ni.
3. Social workday denchhen hian Sazaikawn bula PYD ten zunin kan siam chu chei that, rawnghnawih that leh a bul vel tihfai nise. A hun thu leh hmalakna te chu Town Area Social Work Day Committee hruaitute kutah a awm.
4. Bethel Centre Vanhne ah hemi ni hian thilpek hlan nise. Ruahmanna hruaituten lo siam se tha tih a ni.
5. Town Area a Social Worday hmang tur local ten, an ruahmanna leh hun hman dan tur Town Area Social Work Day Committee hruaitute hnenah hrilh hriat nise.
________________
5. HLA BU TLANGZARH:
NATIONAL HARDWARE : VENGLAI LUNGLEI neitu Bro.C. Lalramchhana Zobawk te chhungkua in General Missions Field Assam ami te hman atana hlabu an siam sak Assam Missions Field Song book chu Aug.ni 26 nilaini khan Lunglei District UPC Office-ah District Superintendent Rev.C.Vanlalena chuan a tlangzarh.
Hla bu tlangzarh inkhawm hi Lunglei District Missions Director Rev.R.Vanlalenga chuan a kaihruai a, Assam Missions Field Treasurer Evan.Israela Hmar chuan thu sawiin Assam Missions Field Conference rorelin hla bu siam nise tia a lo rel, a hlawhtlinna Bro.C.Lalramchhana te chhungkua kaltlanga an hmu chu a lawmthu leh tangkai taka an hman tur a nih thu a sawi a, hla bu siam saktu Bro.C.Lalramchhana pawhin thu sawina neiin Assam Missions Field amiten he hla bu hi tangkai takin hmang se a duh thu leh Pathian ropui ber se a duh thu a sawi a ni. Hla bu tlangzarh inkhawm kaihruaitu Lunglei District Missions Director Rev.R.Vanlalenga chuan technical report pe in he hla bu ah hian hla 114 a awm thu leh hla te hi tawng chi nga in dah a nih thu a sawi a, he hla bu hi phek 72 a chhah niin Copy 100 siam a ni.
Lehkhabu tlangzarhtu Lunglei District Superintendent Rev.C.Vanlalena chuan Assam Missions Field tana hla bu siam sak a ni chu a lawmthu leh hla bu siam saktute bakah a buaipuitu zawng zawng chungah lawmthu sawiin Pathian ram zauh anih zel theih nan hla bu chu tlangzarhin Pathian hnenah a hlan a ni.
Facebook