UPCNEINEWSSERVICE Aug 2-9.2020
—–
Baptisma chang thar :
Phillippines rama Mindanao Province chhunga Koronadal khawpuia Pentecostals of Centrala UPC a lawi turin July ni 28, 2020 Thawhlehni khan mithar 27 ten Isua hmingin baptisma an chang. An zingah hian pawl dang pastor 3 an tel nghe nghe a ni.
Heng mithar te hi Radyo Rapido 92.5FM kaltlanga Tingog sa Kamatuoran Radio Broadcast an lo ngaihthlak aṭangin Tirhkohte 2:38, Matthaia 28:19, Marka 16:16 thu hrefiaha thuthlung huanga rawn lut an ni.
Pentecostals of Centrala UPC ah hian July ni 17 khan mithar 20 ten Isua hmingin baptisma an lo chang tawh a, hemi hma July ni 4 ah mithar 4, July ni 15 ah mithar 19 zetin Isua hminga baptisma changin UPC an lo zawm tawh a ni.
——
Lunglei District :
Lunglei District UPC in thla khat awh Pathian thu zirna a neih Pentecostal Bible School (PBS) chuan August ni 4 thawhlehni chawhnu dar 2 khan District UPC Conference Hall, Chanmari-ah Registration Day an hmang.
Registration Day hi PBS Dean Rev.PC.Lalfakawma chuan a kaihruai a, PBS Teacher Rev.C.Lalrintluanga chuan zirtirtu leh zirlaite inhmel hriattirna neiin, Pastor K.Vanlalhruaia PBS Registrar chuan thusawina a nei a, PBS zirlaite atangin thusawi ngaihthlak a ni bawk, PBS Dean Rev.PC.Lalfakawma kaihhruainain zirlai hruaitu thlanna neih chhunzawm a ni. He hun hi District Missions Director Rev.R.Vanlalenga chuan tawngtainain a ti tawp a ni. August ni 5 nilaini atangin PBS hi Class kal tan a ni ang.
PBS ah hian kumin hian zirlai 24 an awm a, 1st Year ah Student 12, 2nd Year ah Student 4 leh 3rd Year ah Student 8 te awmin, Subject 7 an zir ang. PBS hian August ni 30 Pathianni hian Graduation day an hmang ang.
Kumin PBS zirtirtu atan hian Rev.PC.Lalfakawma, Rev.C.Lalrintluanga, Pastor K.Vanlalhruaia leh Bro.Joliantluanga Tlau te hman an ni ang.
——–
Baptisma chang :
August ni 2 Pathianni chawhma dar 11:30 khan Rahsiveng UPC Biakin kawtah Baptisma rawngbawlna neih a ni.
Bialtu Pastor, Rev. C. Lalhriatpuia’n rawngbawlna neiin mi 10(member nisa) in sual ngaihdamna baptisma an chang a ni. Bialtu Pastor hian Rahsiveng ah nausen 1 a hlan bawk. Lockdown chhungin Rahsiveng Kohhran ah hian Baptisma chang 26 awmin mi thar 1 a awm a, nauhlan thar 6 a awm bawk a ni. (Pic.Rahsiveng Baptisma chang)
——-
Hla bu siam :
Assam Missions Field a Kohhran hote tana hla bu siamsak peih fel a ni ta.
National Hardware, Venglei Lunglei neitu Bro. C. Lalramchhana Zobawk te chhungkua chuan he hla bu hi buatsaih sakin theih tawp an chhuah pui a, hla chi hrang 119 awmin, hla hi tawng chi nga in an dah a ni.
——–
Aizawl East District :
Kum tina hman thin angin August thla hi Rammut thla a ni a, Aizawl East District chhungah pawh he Rammut thla hi urhsun taka hmang turin ruahmanna siam a ni.
Kumin July thlaa District Kohhranpui Board chuan he Rammut thla hi Pastor Bial tinah a hlawk thei ang bera hman tum ni se a tih bakah a hman dan tur pawh Bial kutah dah a ni. District OB meeting chuan he rammut thlaah hian District-in a chhawrlai Evangelist te pawh rawngbawl turin a tir chhuak mek a, Evan H.Lalbiakzauva chu Rabung hmuna rawngbawl tura tirin, Evan V.Kamneihthanga chu Khawzawl Bial, Ngaizawl-ah tirin Evan H.Malsawmthanga chuan Bethlehem Bial, Bethlehem Vengthlangah rawngbawlna a nei mek a, Evan R.Vanchhunga pawh Upper Republic bial, College Vengah rawngbawlna nei tura tih a ni bawk. District Missions Department pawhin he rammut thla hi Bial leh Tualchhung tinte chuan urhsun taka hman ni se, a hman dan tur chu Bial emaw Tualchhung MIssions Department ten an remchan anga hmangin ramlak ngei tum ni se, rinna kawnga hnung tawlh ten thlaraua chak tharna an neih leh theih nan hmalak ni se a tih bakah ruihhlo bawiha tang ten chhanchhuahna an chan theih nan hmalak ni se a ti bawk a ni. He Rammut thlaah hian kum dangah chuan mithar pawh engemaw zat sengluh thin niin kuminah erawh hripui leng avangin duhthusamin Bial leh Tualchhung ten hma an la thei dawn lo nia hriat a ni.
——-
Oneness Theological Seminary :
August 3, Thawhtanni khan District Committee room-ah Aizawl East District ten Short Term Course Pathian thu zirna a neih, Oneness Theological Seminary chuan Kum 2020 Session-a lut turte pualin Registration Day an hmang.
He hun hi Rev Biaksangzuala, Theological Education Board Chairman chuan kaihruaiin inhmelhriattirna leh hriattur tulte Rev H.Lalropuia, TEB Secretary hnen atangin ngaihthlak a ni. Zirtirtute hnen atangin fuihna thu tha tak tak ngaihthlak a ni bawk. OTS Registration Day hi Rev C.Lalengliana chuan tawngtaina in hun a khar a ni. OTS te hian August 4, Thawhlehni atang khan District Office Building-a District Hqrs. Sunday School Hall-ah Class hi an kal tan nghal a ni.
Kumin 2020 Session-ah OTS-ah hian 1st Year-ah zirlai 12 an awma, 2nd year-ah 10 leh 3rd year-ah zirlai 9 an awm mek a ni. Zirtirtu leh an subject turte: Rev Biaksangzuala- Life & Work of Christian Minister, Rev Vanlalfela Ramtiam- Pneumatology, Rev VL Hnemtluanga- Epistles, Rev H Lalropuia- Bible Doctrine, Rev C Lalengliana- Church history, Rev VL Dika Sailo- Minor Prophets, Rev Ellic Hnehzova- Tabernacle te a ni.
OTS hi UPC- North East India ten Pathian thu zirna kan neih, Calvary Bible College (CBC)-a in affiliate niin Kum 1998 atang khan bul tan a ni a, mi engemaw zat ten an lo zirchhuak tawh a, Bialtu Pastor pawh engemaw zat lo chhuak tawhin rawngbawlna a kal pawh mi engemaw zat an awm tawh bakah District dang atangin he OTS-ah hian zirlai an awm thin a ni.
——–
District Board thulh :
August 6, Ningani-a District LAD Board neih tura ruahmanna siam chu Covid-19 hrileng mek avangin thulh a ni a, District Board hi neih leh hun tur hriat a ni tawh rih lo a ni.
——-
Bial Sunday School Conference insiam rem:
Kumtina September Pathianni vawihnihnaa Bial Sunday School Inkhawmpui hman thin chu Covid-19 hrileng mek avangin Bial engemaw zat chuan Inkhawmpui nei lovin rorel inkhawma nei turin ruahmanna an siam chho mek zel. District Sunday School Department chuan he bial inkhawmpui neih tur hi Bial kutah a dah angin District chhunga Bial hrang hrangte chuan Bial Boardte neiin hri leng mek avangin Inkhawmpui nei lovin rorel inkhawm chauh neih ni se tiin an rel hlawm a ni.
——-
Hruaitute Programme:
Rev Biaksangzuala, District Superintendent chuan Inrinni khan Suangpuilawn bial, Vanbawng Kohhran Biakin sakna tur lungphum phumna neiin hun a hmang a ni.
Rev VL.Hnemtluanga, District Treasurer chuan Rabung Bial, Rabung Mission Veng Preaching point hawnna Pathianni hian neiin hun a hmang ang.
Rev HL Thakunga, Sunday School Director chuan Pathianni hian Darlawn bial, Ratu Sunday School Hall sak thar hawnna neiin hun a hmang ang.
——–
Chhimtuipui District rawngbawlna chanchin :
UPC North East India Kohhran Dan bu siam thar ber 7th Edition chu District Office atanga zawrh chhuah a ni a, a mamawh apiangte tana lam theih a ni.
———
Dist PYD Enlarge & Editing Board :
Aug ni 05, Nilaini khan T Upa H Lalduhsanga Inah Dist PYD Enlarge & Editing Board te chuan meeting an nei.
He Board hian Dist PYD Conference vawi 43-na rorel bawhzuiin, “Dist PYD inkaihhruaina Dan bu, PCD & Dist PYD Choir inkaihhruaina” te an duang dawn a ni.
—–
Rawngbawltu ruat thar :
Aug ni 02, Pathianni khan Siata Bethlehem Local a rawngbawltu ruat thar mi Pathum techu Bialtu Pastor V.Lalhlimpuia’n lakluhna hun leh tawngtai sakna hun a hmang a. Bial Secretary Evan.HC.Hmingtinthanga hnen atangin duhsakna leh fuihnathu ngaih thlak a ni bawk.
——
Baptisma :
Aug ni 01, Inrinni khan Sangau Bethel local church ah sual ngaihdam nan, Isua hmingin mi 4 in Rev K Kawngkharmawia sectional pastor kutah Baptisma an chang. An zinga pakhat hi mi thar a ni.
Aug ni 02, Pathianni khan Siata Bethlehem kohhranah Baptistma khur hawn niin mi 7 in Isua hmingin sual ngaihdam na Baptistma an chang a. Bialtu Pastor V Lalhlimpuia kaltlangin Baptisma rawngbawlna hi neih a ni.
Baptisma chang zing 3 hi mi thar an ni.
——-
Fehchhuak :
1. Siahatla local PYD executive Member te chuan Aug ni 02, Pathianni khan Ephatha/Non Mizo home mission field an tlawh.
Siahatla local te hian rawngbawlna hlimawm tak neiin field a kohhran te hman tur Belpui an hlan a ni. Non Mizo home mission field ah hian K Vanlalchhardiki BW chu home missionary atana awmin rawngbawl hna a thawk mek a ni.
2. Niawhtlang bialtu Pastor V Lalhlimpuia leh Evan HC Hmingtinthanga Bial secretary techuan, tunlai hian bial chhung local hrang hrang fang/tlawhin aṭul angin rawngbawlna an nei mek.
Hripui leng karah pawh bial chhung local hrang hrang tehian malsawmna an dawng hle a, kohhrante an hlim hle.
——-
Biak in sak tanpuina :
Aug ni 02, Pathianni khan Chhimtuipui District kohhranpui chuan Bethlehem Local Biakin sak tanpuina Rs.100,000/- an hlan. District hruaitute aiawhin Bialtu Pastor V Lalhlimpuia’n tanpuina sum leh pai te hi a hlan a ni. Siata Bethlehem Local hruaitute an lawm hle.
——–
Competition :
Chhimtuipui Dist PCD techuan Dist chhung kohhran chhungkua a naupang thu leh hla a hma ansawn zel theih nan Live Music Home record singing competition an buatsaih.
He competition hi category-2 ah ṭhen niin, category 1 ah hian kum 10 chung lam awmin, category – 2 ah hian kum 10 hnuai lam anawm thung ani. Dist chhung PCD ten an hlut hle.
——
Joint Meeting :
Aug ni 2, Pathianni khan Siahatla local ah Siaha bial LAD & Bial PYD techuan joint meeting an nei. He meeting hi Sist H Vanlalthangi Bial LAD President leh S Vabeima Bial secretry ten an kaihruai. Kum 2019 aṭang khan Siaha bial LAD & PYD techuan hmun khatah conference anlo hmang tawh a ni.
——
Lawngtlai West District :
Aug ni 3, Thawhtanni khan College veng Lawngtlai Biakin lei min in a tih chhiat avangin District Superintendent Relief fund aṭangin ₹ 5,000/- chu Rev.R.Ramthatzawla District Superintendent in a hlan a, Upa H. Lalhmachhuana leh Upa Fakfela ten Kohhran aiawhin an dawng a. Kohhran hote an lawm hle.
——–
North Mizoram District :
North Mizoram District Building Committee-in a rel angin thawhtanni kalta Aug ni 3 chawhnu lam khan District Puipa pathum Dist. Supdt. Rev. Laltluanga, Dist. Secretary Rev. Chhiarpuia leh Dist. Treasurer Rev. K. Lalduhsanga te bakah Building Committee member engemawzat te, Building Committee thu bawhzuiin Sihphir Bial Pastor quarters sak dan tur a hmunah an en ho.
——
Feh chhuak:
Aug ni 06 Ningani khan North Mizoram District PYD hruaitu pahnih Evan. K. Rotluanga District PYD Secy. Leh Evan. C. Lalruatsanga Dist. PYD Treasurer te chuan hun rei tawh tak atanga District PYD hma laknaa rawngbawlna an lo kalpui tawhna hmun Kawrthah an tlawh. Tunlai hian Kawrthah kohhran Biak in sak hna chu Kolasib Khuangpuilam Kohhrante’n work camp in an sa mek a, District PYD hruaitute hian an zuk enpui dawn a ni.
——-
Missions Field tan khum :
Aug ni 3 Thawhtanni khan District Missions Department in Home Missions Field Quarters-a dah tur khum a siam chu District Office-ah thlenin; remchang angin Missions Field-a dah turin ruahman nghal a ni a, Missionary ten an remchan angin Field-a dah tur Khum an hawn nghal zel bawk.
——
Bial Board :
Maubawk Bial te chuan Aug ni 2 Pathianni khan Bial Board neiin; Meeting hi Rev. R. Lalhmangaiha’n a kaihruai a, Bial huap sum audit hun te ruatin Bial kohhranpui leh Departmnet sum Audit hun atan Aug ni 8 an ruat a, Bial huapa Conference hman hmabak Bial Missions Dept. Leh Bial Sunday School Dept te, a hun leh a hmun pangngaiah Conference neih an passed a, Conference ah hian rorel inkhawm chauh neih turin an rel bawk.
——–
Work Camp :
North Mizoram District PYD ten an hmalaknaa hun rei tawh tak atanga rawngbawlna an lo neih tawhna hmun Kawrthah Kohhranho te inkhawmna turin Work camp-in Biak in an sa, Kolasib Khuangpuilam Kohhrante hian Aug ni 4 Thawhlehni tlai khan Work Camp neihna hmun tur Kawrthah thlengin, an thlen thlak ni atang hian Biak in sak hna an tan nghal a, Biak In ban te phunin Chokut te an vuah nghal bawk a, zan lamah pawh Biak in sak hna hi an chhunzawm zel a ni. Khuangpuilam kohhrante an Biak in sakah an thawkrimin an tangrual hle a, Kawrthah Kohhranhote pawh an lawm hle.
Khuangpuilam kohhran Work Camp-a fehchhuakte hi member 16 niin; Kohhran Church Board Chairman, Secreatry leh Treasurer, L.A.D hruaitute bakah P. Y. D. Hruaitute nen an thawkchhuak tha hle. Work Camp nan hian Kolasib Khuangpuilam Kohhran mi inphalte hnen atangin sumfai engemaw zat thawhkhawmin Work Camp te ei tur chawhmeh tuihnai tak tak te an thawhkhawm bawk.
District PYD te hmalaknaa rawngbawlna neih mekna hmunah mahni insengso va rim taka Biak in sak saktu Kolasib Diakkawn Bial chhunga awm Khuangpuilam kohhrante chungah District PYD Hruaitute chuan lawmthu an sawi a ni.
—–
Audit :
North Mizoram District hnuaia Kohhranpui leh Departmnet Account hrang hrang sum vawn dan Aug ni 4 atanga neih chu Aug ni 6 tlai khan an zo.
Auditors te hian Kohhranpui Sawmapakhat leh Buhfaitham bakah Committee peng pawimawh hrang hrang te bakah Missions Dept., Sunday School Depart, Ladies Auxilliary Department bakah Pentecostal Youth Department sum te audit hna an thawk a, Pentecostal Gateway Higher Secondary school leh District Camping Centre sum pawh audit hna an thawk bawk a ni. Heng Account hrang hrangte hi District Board in Auditor atana a ruat- Rev. C. Lalrammuana, Evan. F. Lalngaihawma leh Upa C. Lalnunmawia ten an audit a ni.
——–
Pastor Induction service :
North Mizoram District Board kumtir Board in Pastor atana a lak thar Pastor PC Lalrokima Aibawk Bial vawng tura tih leh Durtlang Bial vawng tura tih PC lalfela te chu hrileng avanga hunrei tak chhung Induction sevice nei lova bial an vawn hnuin Pathianni kalta Aug ni 2 khan Induction neih a ni.
Aibawk Bial vawngtu tur Pastor PC Lalrokima hi District Supdt. Rev. Laltluanga’n Bial Hqrs. Biak in Aibawk Biak inah induction service neiin; Bial chhung kohhran hruaitute bakah Aizawl lam atangin tawiawmtu engemaw zat an nei bawk a ni.
Hetihrual hian Rev.Chhiarpuia District Secretary chuan Durtlang Bial enkawltura ruat Rev PC Lalfela chu induction neih sak bawkin Durtlang Bial Treasurer Upa K.Hranglawta’n Pathian hnenah ṭawngṭaina a nei a, chumi hnuah Rev. PC Lalfela leh a chhungte chu Durtlang Bial enkawl turin Lal Isua hmingin lawmluhna a nei nghal a ni.
He Induction prog. hmang tur hian Durtlang bial board members leh bial department hruaitu hrang hrang te leh tualchhung rawngbawltute an kalkhawm bawk a ni.
——
Literature Board thukhawm :
July ni 31 Zirtawpni chawhma dar 11:00 khan North Mizoram District Literature Board thutkhawm a ni.
Board Meeting hi Chairman Rev. Chhiarpuia’n kaihruaiin Kum 2021 Nilai Thupui zir tura ruahman, thupui ziaktute thuziak endik chungchang ngaihtuah a ni a, August ni 10 leh 11 ah thupuite endik hna thawh nise an ti. Hei bakah hian Literature lama District in hma a sawn zel theihnan Media kaltlanga Discussion neih nise tih an rel bawk.
——
Thilpek pe :
North Mizoram District PYD te chuan UPC-NEI, North Mizoram District-in kum 70 a tlinna Platinum Jubilee hriatrengna atan District Office-ah hna tangkai thawh nise an tih chu bawhzuiin; July ni 31 Zirtawpni khan Dist. Office, Superintendent Chamber ah awm turin Air Conditioner tha tak an dah, He mi chungchangah hian District hruaitute chuan North Mizoram District PYD te chungah lawmthu an sawi.
——-
Pentecostal Gateway Higher Secondary School :
July ni 31 Zirtawpni khan North Mizoram District School enkawl Pentecostal Gateway Higher Secondary School te chuan Staff Meeting pawimawh an nei a, Meeting hi Principal Evan. JH Malsawmdawngliana chuan a kaihruai. An rorel pawimawh zual te:-
1) 2020 – 2021 session chhunga Zirtirtute mawhphurhna / incharge tur hrang hrang ruatfel a ni.
2) August 2020 atangin Online class kalpui tur a ni.
3) School luh huna Naupangte Uniform hak dan turah ruahmanna fel tak siam a ni.
4) Sorkar atanga ngenna hmuh angin, Zirtirtuten kum 2020 leh 2021 chhung kartin Nilaini apiangin Mizo Traditional dress a inthuam nise an ti a, Zirtawpni-ah School T Shirt hak thin a ni ang.
4)2019 – 2020 HSLC leh HSSLC result thlirletna neih a ni a.
PGHSS hian HSLC hi 60% result neiin; Letter mark subject 2 a hmu an nei.
Tin, HSSLC ah 84% result an nei a, Distinction 2 an neih bakah Letter mark subject 5 a hmu an nei bawk a ni.
Result ngun takin an thlir a, Pathian malsawmna ropui tak an dawn avangin an lawm hle a ni.
5) Teachers Meeting ah hian Managing Board Agenda turte pawh relho a ni.
Tin, Zirtirtute zawng zawng hnenah lawmpuina thilpek hlan vek an ni a.
2019 – 2020 session chhunga 100% attendance a kal Sir Zoliana, HS Section Teacher hnenah lawmpuina leh lawmthusawina thilpek hlan a ni bawk.
—–
Member thar :
July ni 30 Ningani zan khan Tlangsang bial Vitor Kalagang-ah missionary C. Sangliana chuan kohhran dang aṭangin chhungkaw khat member 5, puitling 3 leh naupang pakhat te chu Pentecost kohhranah a senglut.
Tlangsang Bial chhunga Missionary Volunteer Sis. Vanlalpeki leh Bro. Lalrivunga leh Sist. Kroschhuanawmi te nupa Sihphira awm ten an rawih mek Upa C. Sangliana te hian Tlangsang Bial chhung khaw 3-a Pentecost kohhran din tawhna khua Khakchang, Vitor Kalagang leh Lungthirah te rawng an bawl kual mek a. An ṭawngṭaina aṭanga Lalpa tihdamna chawp leh chilha chang nghal panga lai awm tawhin, rawngbawltute rawngbawlna hi an kalna apiangah mipuite’n an lo hlut hle thin a ni.
Upa C. Sangliana hi Bro Lalrivunga leh Sis KrossChhuanawmi te nupa Sihphir in Rs. 5000/- in an chawm mek a. Sis Vanlalpeki hi mahni inpeknain Tlangsang bialah rawng a bawl bawk a ni, anni rawngbawlna kaltlang hian Sailut khuaah Pentecost kohhran duhawm tak Lalpa zarah din a lo ni tawh bawk.
——-
Tuidam rawngbawlna :
July ni 30, Ningani khan Rengdil P.M.F te chuan Tuidam kohhran biak In sakpuiin an hnatlang a , mi -28 lai hnatlangah hian an chhuak a ni, Tuidam kohhranah hian member- 28 vel awm mekin , Evan PC.Lallianmawian rawngbawlna a nei mek a ni.
Tuidam kohhran hian District atangin biak In sak tanpuina Rs.250,000 dawngin, Bialtu Pastor C.Lalthlenglianan biak In sak lungphum hi a lo phum tawh bawk a, chak takin biak In sak hna hi an thawk mek a, kohhran te an phur hle.
——–
Luangchhuak :
Rengdil Bial Missions Director Upa Rohnuna’n Kolalian Missions Field Kohhran tan Baptima khur siamnan Rs. 4000 a pe a, He mi hmang hian Hriphaw Pentecostal Mens Fellowship (PMF) te chuan hnatlang neiin baptisma khur tha tak RCC in an siam sak a, Kolalian Missions Field kohhran te an lawm hle.
——–
Tihdamna chang :
North Mizoram District chhunga awm Tlangsang Bial, Tlangsang Kohhrana member pakhat, Chhul lama dik lohna nei thi put reng chu, Lalpaa damna a beisei angin Bialtu Pastor K. Ainawna leh Kohhranhote’n LALPA ISUA hmingin hriak thihna leh tui hlan rawngbawlna an neihsak Aug ni 4 thawhlehni zingkar khan damlo ka atangin Pathianin a tihdam thu hriat a ni. Tihdamna chang dam lo leh Kohhranhoite chuan Pathian hnenah lawmthu an sawi.
——
Member thar :
1. Lengpui Biala awm Dapchhuah kohhran, Maubawk Bial Missions Dept ten Missionary an rawihna hmunah Pathian hnathawh thlengin rawngbawltu rawngbawlna kaltlangin Pathian thuthlung hmuhna mit tihvar zel a ni a, Pawl dang atangin tunhnai khan mi 7 ngawtin Pentecost kohhran an zawm.
2. Aug. Ni 2 Pathianni khan Kawnpui Bial chhunga awm Rajtali home missions field ah hindu sakhua a tangin chhungkaw hnih te chuan Pentecost kohhran zawmin Lal Isua hminga lawmluh an ni. Heng chhungkaw 2 te hi an vaiin member 6 an ni a, mi pathumin sual ngaihdamna Baptisma Isua hmingin an chang a, Nau 2 Lal isua hnena hlan an ni bawk.
Rajdali Kohhrante’n malsawmna an dawn chhan hi July ni 13-a Rasdali atanga damlo Missionary in a rawn hruai, Sist Sunari, kohhrante leh mimal tlawmngai ten theihtawp chhuah a sum leh pai leh tawngtaina nen an lo puihna avang a ni. Tiin Rajtali Missionary Evan. Hrangchhankhuma chuan a sawi a ni.
3. Rengdil bialtu Pastor C.Lalthlengliana leh Tual upa J.Lalhmingthanga te chuan Rammut thla denchhenin Rengdil Kanan veng leh Dinthar vengah rawngbawlna an nei a, an rawngbawlna kaltlang hian Aug ni 2 Pathianni khan Pawl dang atangin mithar -16 sengluh a ni , Bialtu Pastor C. Lalthlengliana’n heng mitharte hi Lalpa Isua hmingin a lawmlut a, puitling -7 in Sual ngaihdamna baptisma an chang nghal a, nau- 10 hlan nghal a bawk.
——-
Infuihtharna :
Pathianni kal ta Aug. Ni 2 khan Sumsuih Bial Lamchhip kohhrana rawngbawltute chuan infuih tharna neiin; tawngtaina nen Pathian hnenah chakna te an dil a, hei bakah hian Bialtu pastor Rev. HF Malsawma hnen atangin fuihna thu bervar thlak leh hlawhthlak tak tak an ngaihthla bawk.
——
Bial Board :
Rengdil Bialte chuan Bial Board rorel neiin; Bial huapa Confe an neih hmabak Bial S.S. department leh bial missions department chu Rorel inkhawm chiah neih nise tiin thu an pass.
1. Rengdil Bial chhunga awm Tumpanglui home missions field biak In sak chungchang relin, Rengdil PMF te chu hun remchangah work camp-a Biak in sa turin an ruat.
2. Inkhawm theihloh hun chhung atan Hunbi ruata tawngtaina neih thin nise, tawngtai thupui neih thin nise.
3. Rengdil Bial chhunga Kohhran tin ten Rammut thla chu mahni remchan dan anga hman ni se.
——–
Damna chang :
July ni 31 zing dar 7:30 khan Richard Lalruatpuia S/o Bro. Chungnunglura, Lawngtlai IV-a cheng chu, Lockdown tirh March thla atang tawha insawisela Kawng achin hnuai lam zeng, hun rei tak kea kal hlei thei tawh lo, Aizawla inentir tura lo kalin hmasawnna em em a nei chuang lova, dam lo hian UPC Pastor tawngtainaa dam a beisei thu a sawi a. A Pu Upa F. Lalhmingliana thurawn angin Rev. HL Dawngliana (Pensioner) Mission Vengthlang a mi chu an pan a, Pastor hian Isua hmingin hriakthih rawngbawlna a lo neih sak a, Pastor rawngbawlna Pathianin malsawmin, Richard Lalruatpuia chuan chawp leh chilhin damna a chang a, Kea kal hlei thei lo chu a tlan a, a zuang a hlim takin Pathian fakin a chawimawi a ni.
——–
Thilpek :
Aug ni 5 Nilaini khan N.Thinglian Missions field te chuan Bilkhawthlir bial LAD tena an thil pek steel Almirah bakah Bial Kohhranpui leh mi țhahnemngaite thilpek atangin plastic chair leh stool paruk leh Sis. K. Laltlanthangi hnen ațangin tui lumna leh Bro Haleluia Buhchang hnen ațangin Buhfai leh chawhmeh engemaw zat an dawng a, rawngbawltu Nupui dam lova awm mek kan nan Bilkhawthlir Bial LAD , Buhchang Local LAD leh Kanan Local LAD te chuan sum țhahnem tak an hlan bawk. Hemi chungchangah hian N. Thingliana rawngbawla awm mek Evan. Lalramthara Sailo chuan lawmthu a sawi.
——–
Churachandpur District :
July ni 29-31 chhung khan District Kum chanve Board neih a ni a, Board hi District Suptd Rev. Paosei chuan a kaihruai. An rorel tlangpui te :
1. 2020 Kum chanve District Auditor ten Account chi hrang hrang an endikna, Audit Result/ Report an thlir ho va. Auditor ten an hmuh chhuah te lungrual taka pawm a ni.
2. Pension Account a Loan an inpek thin interest 10% per annuam chu August 2020 atang chuan 12% per annum ni tawh se.
3. District Office Bearers ten sum leh pai dinhmun an hriat tlan theih nan kumtin Quarterly ah Financial Statements hi District Treasurer in lo chhuah thin se.
4. Kumin 2020 kumtawp audit atang chuan District, Section leh Local ah audit neih rualin Cash Show/ Cash verification nei ziah ni tawh se.
5. Thawktute Quarter rent luah man siam that a ni a, Auguist 2020 atangin a effect tan ang.
6. District Auditor mi 2 ruat an ni a, ruat belh nise tia rawtna an pek bawhzuiin Evan. K.Lalremmawia (Valtea) lungrual taka ruat belh nghal a ni.
7. Parbung Section in Senvawn Local Sunday School hall thiah a sak thar na tura fund raising phalna an dilna chu an dilna ang taka phalsak an ni. Chu bakah Sitam hi Local anga an awm theih tak loh avanga Biak in sak theihna dinhmun an nih tak loh avangin, Rangva bundle 5 District atanga pek kha Senvawn Local Sunday School hall atan lo hmang mai se tih a ni bawk.
8. Thanlon Section quarter sak mek chhunzawmna tura Brick man tura sum an in daihlohna belh sak tura an ngenna chu ngaihtuah ani a, Brick rem hnua ruah in a hnan leh chu a rem dawn loh avangin, a chung khuhna tur nen Cheng nuaikhat (Rs.1,00,000) pek (sanction) nise tih a ni.
——-
Seminar :
District S.S. Deptt. Chuan Aug.9, 2020 atangin District chhunga Section Hqtrs. leh Local pawimawhna hmun apiangah Seminar an nei dawn a, a hmasa berin Songpikholui ah an nei nghal dawn a ni.
Facebook