UPCNEINEWSSERVICE Aug 16-23.2020
———–
General Hqrs Office khar :
Mizoram sawrkarin Aizawl Municipal Council (AMC) huam chhunga Total lockdown a puan avangin General Hqrs Office pawh August ni 17 atanga ni 21 chhung khan khar a ni.
General Superintendent Rev. Lalmalsawma Sailo chuan sawrkar thupek ngaichang chung zela Kohhran office leh hmun hma pawimawh dang pawh kalpui a nih tur thu sawiin; Dan zawm hi himna a ni tih hriaa thuawi tlang taka awm zel turin Kohhran hote a ngen a. Pastor te, Tirhkoh te, Kohhran Upa leh rawngbawltu te pawh mamawhtu Kohhran hote tan englai pawha penchhuak tura an in huam reng thu a sawi bawk.
———
Calvary Bible College :
Aug ni 17, Thawhtanni khan Calvary Bible College, Shillong chuan Online Class neih tura ruahman chu ṭan a ni a. He mi ni hian dar 10:00 AM-ah a hawnna programme hman a ni a, Principal Rev. Lalpeklien Sungtein hawnna thuchah tawi sawiin, Registrar Rev. L. John Gangtein ṭawngṭaina a nei a, chumi hnuah staff-ho zawng zawngin ṭawngṭairualna an nei. Kuminah hian zirlai 42 an awm a, Final year 13, 2nd year 13 leh 1st year 16 an ni.
———-
Tawngtai tura ngenna :
Mizoram Kohhran Hruaitute Committee (MKHC) chuan August ni 23 (Pathianni) zan dar 7:00 hian Covid-19 chungchang avangin kohhran mipuite mahni awmna hmunah theuh thahnemngai taka tawngtaina nei turin Kohhran hote hnenah ngenna a ti chhuak a, India hmarchhak huam chhunga United Pentecostal Church kohhran Members zawng zawngten he ngenna hi ti hlawhtlinga thahnemngai taka tawngtai turin Kohhran hote min sawm a ni.
Tawngtai thupui turte:
1. Pathian venhimna avanga Mizoramah Covid-19 avanga nunna chan kan la awm loh avanga lawmthu sawina.
2. Covid-19 hripui vei mekte an lo dam thuai theih nan.
3. Damlo enkawltute tan : Covid-19 inthup leh Symptom lang lote pawh an hmuh chhuah zel theih nan.
4. Pathian venhimna dila kan ramah Covid-19 avanga nunna chan kan awm loh nan.
5. He hripui hian min kalsan thuai theih nan leh Pathian biak in atang ngeia Lalpa kan biak leh thuai theih nan.
———-
Member thar :
August ni 16, Pathianni khan Africa khawmualpui khawthlang lam ram zinga Kristian awm tamna Benin ramah mithar 28 zetten Isua hminga baptisma changin UPC an rawn zawm leh ta.
Benin ram hi France awp ram ṭhin niin kum 1960 August ni 1 khan Independence a hmu a, a ram pumpuiah hian French ṭawng hi ṭawng tualleng niin ram mipui nuai 100 chuangah hian Kristian an tam ber a ni. Kumin January ni 19 khan mithar 16 seng luh an lo ni tawh bawk.
————-
District hrang hrang rawngbawlna chanchin :
Lunglei District :
Joining report :
Lunglei District UPC Board vawi 200-na in Pastor nghet atana a lak Sertlangpui bialtu Pastor T.Zahmingliana chuan August ni 14 zirtawpni khan District Superintendent hnenah Joining report a pe.
Pastor T.Zahmingliana hi District Superintendent Rev.C.Vanlalena, District Secretary Rev.PC.Lalfakawma bakah District Treasurer Rev.C.Lalrintluanga ten lo dawngsawngin fuihna leh tawngtai sakna an nei a ni.
Kum 2018 Aug.ni 15 khan Pastor hna thawk tura lak a ni a, Sertlangpui bialah awmin kum 2 chhung a thawh hnuah Pastor nghet atan lak a ni ta a ni. (Joining report pe lai)
——————-
District Kumpuan Committee :
Aug.ni 16 Pathianni khan District UPC Conference Hall-ah Lunglei District PYD Kumpuan Committee te chuan Chairman Evan.Lalringzuala Pachuau kaihhruainain Committee an nei a, an rorel tlangpuite:
1. Kohhran Members zingah eizawnna kawnga hlawhtlingte pualin Video siam nise tha tih a ni a, hemi kawngah hian Pennet Lunglei nen thawh ho nise.
2. Slogan Competition leh Painting Competition buatsaih nise tha tih a ni a, Slogan Competition ah hian thupui atan INTODELH LEH THUTHLUNG PUAN UAR tih chu hman nise tha tih a ni a, Painting Competition ah hian THUTHLUNG LAM HAWIZAWNG/THUTHLUNG LAN TIR THEI LAM HAWI nise tha tih a ni bawk.Hetiang hian lawmman siam a ni.
A. SLOGAN COMPETITION
1-na Rs.1000
2-na Rs.600
3-na Rs.400
B.PAINTING COMPETITION
1-na Rs.3000
2-na Rs.2000
3-na Rs.1000
He Committee hi District PYD hruaitute chuan an telpui a ni.
——————
Lehkhabu buatsaih dawn :
Lunglei District PYD Conference in Khawtlang nun siam thatna lam hawi lehkhabu buatsaih nise tia a lo rel chu bawhzuiin District PYD Board in lehkhabu buaipui tura a ruat te chuan Aug.18 thawhlehni khan District PYD Secretary Evan.Laldinpuia Sailo In Rahsiveng ah Committee an nei a, he Board hi Lehkhabu buaipuitu Committee Chairman Evan.Laldinpuia Sailo chuan a kaihruai.
District PYD Board in lehkhabu a dah tur khawtlang nun siam thatna lam hawi thupui 16 a ruahmante chu a ziaktu tur uluk taka ngaihtuahin thupui 16 hi mi pakhat theuhin an ziah turin an thlang chhuak a, lehkhabu tha leh rotling anih theih nan lehkhabu hi uluk taka buatsaih an tum a ni.
—————–
Missionary chawm :
Aug. ni 17 thawhtanni khan Luangmual bial PYD te chuan Missionary pakhat an chawmna Rs.12000 chu Lunglei District Missions Department kaltlangin General Missions Department hnenah an hlan.
Luangmual bial PYD te hian Missionary chawmna hi kum 2017 atang khan an lo pek tawh bakah thu leh awm hma atan Missionary hi kumtin pakhat chawm nise tiin kumina Luangmual bial PYD Conference chuan a lo rel tawh a ni.
———-
Aizawl East District :
Office khar :
Mizoram Sawrkarin Covid-19 darh zel tur venna tura chak zawka hma lak a nih theihna turin 16/8/2020 zan atanga 21/8/2020 zing dar 4:30 thleng AMC huamchhungah Total Lockdown a puan avangin Aizawl East District Office pawh hemi hun chhung bakah hian Aug.21, Zirtawpni thleng khan Office hi khar a ni a, hetih hun chhunga Office dawr duh, harstana tawk an awm chuan District hruaituten hriatthiamna an ngen a ni. Office staff te pawh mahni awmna hmun theuh-ah hri leng lakah fimkhur a, Sawrkar thuchhuak zawm theuh turin ngena a siam bawk a ni.
Office kal zel dan tur chu Sawrkar thuchhuak ngaichang chunga la inhriattir leh tur a ni ang.
———-
Rammut thla hmang :
Kohhran hoten rammut thla kan hman mekah Aizawl khawpui leh hmun dang dangah hri leng avangin kum danga hman thin angin duhthusamin hmang thei lo mah ila, Aizawl East District chhung hmun hrang hrangah mithar leh Baptisma chang thar neih belh zel a ni a, District Kohhranpui pawhin he rammut thlaah hian District in a chhawrlai Full Time Evangelist te rawngbawl tura tirchhuakin rawngbawlna an kalpui mek reng a ni.
August 13, Ninga zan khan Serchhip bial, New Serchhip Kohhranah mithar 1 sengluh niin Bialtu Pastor, Rev.B.Lalengzauva kutah sual ngaihdamna baptisma a chang a ni.
August 16, Pathianni khan heng Kohhranahte hian mithar leh Baptisma changthar neih a ni bawk.
Champhai bethel bial, Zion Local-ah mi 2 in sual ngaihdamna baptisma, Bialtu Pastor Lalhmangaihawma Parte kutah an chang.
Zemabawk bial, Tuirial Kohhranah mithar 2 Kohhranah sengluh an nih bakah Lungbial Kohhranah pawh mi 11 in sual ngaihdamna baptisma an chang thar a, an zinga 5 hi mithar niin Kohhranah sengluh an ni. Lungbial Kohhranah hian Evan HK.Lalhmangaiha’n rawngbawlna a nei a ni.
Bethlehem bial, Bethlehem Local-ah mi 9 in sual ngaihdamna baptisma an chang thar a, an zinga pakhat hi mithar a ni.
Rabung bial, Khualen Localah rammut thla denchhenin Home Crusade neih a ni a, chumi kal zelah chuan mithar 2 Kohhranah sengluh an ni.
————
Chhimtuipui District :
Member thar :
Aug ni 16, Pathianni khan Tuipang sectional pastor Pastor MH Robin Lalthanmawia chuan Phura hmun ah mi 5 Isua hmingin baptisma a chan tir. An zing a pahnih hi mi thar an ni. Phura Kohhranah hian chawlhkar liam ta mai pawh khan mithar 26 lai Kohhranah sengluh an lo ni tawh bawk.
———
Tanpuina :
Chhimtuipui Dist Hqrs Local PMD ten, Dist Home Mission field Ṭialdawngilung Biak In sak ṭanpui nan ₹ 10,000(singkhat) an hlan a, Kohhran hote an lawm hle.
Tun dunhmun ah Dist Hqrs local PMD hruaitute :-
1. President : V Lalchhuanawma
2. Secretary : C Hminghlua
3. Treasurer : K Lalramtiama
Chhimtuipui Dist Home Mission field Amobyu Vaihthie (Zero) kohhran pawhin Aug ni 20, Ningani aṭang khan an Kohhran Biak In sak hna an chhunzawm a, An biak In sak chhunga tui dahna tur Tuizem 2000 Litre chu Dist.Office in an hman tir avangin an lawm hle. He hmunah hian Evan Robert B Lalnunsiama T chuan rawngbawlna a nei mek a ni.
——–
Member boral ralna hun hmang :
Aug ni 16, Pathianni khan Total Lowkdown lai a Bualpui NG Bial PYD member chatuan ram pantate pualin Ralna hun hman a ni. Bial chhung Local PYD; Bualpui Ng Local, Vawmbuk leh Archhuang atangin thalai member leh hruaitute kalkhawmin he hun hi an hmang a ni.
———
Lawngtlai West District :
District hruaitute programme :
District Supdt Rev.R.Ramthatzawla chuan District headquarters kohhran ah rawngbawlna a nei ang.
District Secretary/Treasurer Rev.Lalsawmliana Sailo chuan Aug ni 23, Pathianni hian Lawngtlai College veng kohhranah rawngbawlna neiin, Baptisma leh Nauhlan rawngbawlna a nei ang.
District Mission Director Rev.F.Lalbiakthuama chuan Aug ni 21, Zirtawpni khan Rammut Rawngbawlna neiin Darnamtlang ah a fehchhuak a, Pathianni hmangin Aug ni 24, Thawhtanniah Lawngtlai a let ang.
——–
Lawngtlai West District chhunga Rammut rawngbawlna report :
Aug ni 16, Pathianni khan Lunghauka local ah Evan Henry H Ramthianghlima rawngbawlna kal tlangin , Pastor K Lalzawmsangan member thar 9 Kohhranah a seng lut a, Mi 12 in sual ngaihdamna Baptisma changin nau pahnih(2) hlan a ni bawk.
Aug ni 18, Thawhlehni khan Evan H Ramthianghlima rawngbawlna kal tlangin member thar 8 Kohhranah sengluh an ni leh a, Pastor K Lalzawmsangan Lawitlang Kohhrana lawi turin mi 8 te hi a senglut a, mi 4 in sual ngaihdamna baptisma changin nau 2 a hlan nghal bawk.
———-
North Mizoram District :
District Hruaitute Programme:
Aug ni 16 Pathianni Zing kar khan North Mizoram District Supperintendent Rev. Laltluanga chuan Kanghmun kohhran a tlawh.
Dist. Supt. In Kanghmun a tlawh chhan hi Kanghmun kohhrante’n Biak in sak sumtuakna atana Pastor quarters hmanraw hlui an dil, a hmuna enpuin, Kanghmun kohhran hruaitute leh District aiawha kal Dist. Supdt. Ho hian hmanruate an en ho va, thutlukna chu District Board kutah an dah a ni.
——-
Office khar :
Tun hnaia Mizoramah hri (Covid 19) kai an pun deuh avangin, vantlang zinga a darh palh venthawn thilah Mizoram sorkar thuchhuah Aug ni 17-20 chhung Lock down puan chu North Mizoram District Office chuan sorkar thu zawmin Office a khar a, District hruaitute chuan Kohhran mipuite hriatthiamna a ngen, Tin, hetihrual hian Hrileng hian kian lam aia punlun lam a pan zel avangin District hruaitute chuan Kohhran mipuite fimkhur deuh deuh tur leh hri kai avanga manganga awm mek te theihtawp chhuaha tawngtaipui turin a ngen bawk.
———
Music Committee :
Kar kalta Inrinni Aug 15th khan North Mizoram District PYD Music Committee te chuan District Committee Room-ah Meeting an nei.
Meeting hi District PYD Music Committee Chairman Evan. C. Lalruatsanga’n a kaihruai a, District PYD hruaitute atangin Dist. PYD President Evan. J. Vanlalruata leh Dist. PYD Secretary Evan. K. Lalrotluanga ten an ho.
Meeting hian Dist.PYD choir Asst. Conductor atan Bro Lalbiakhlima a ruat a, Choir Secretary atan Bro K Lalramnuna Central Jail Veng, Chawlhhmun Bial chu ruat a ni bawk. Hei bakah hian District Choir Convener atan Bro Albert C Lalfakawma, Tlangnuam Bial Chu ruat niin; Dist choir form leh ID siam thar tih te, Boruak en chunga Zaipawl Camp neih te, Churachandpur Dist, Pentecostal Wave atanga Music Committee hla Bu siam, Digital Publication atana Soft Copy an rawn dilna chu rem an tihpui bakah kum 2020-2022 term atan Project tur an ruahman bawk.
—–
Member thar :
Aug ni 14, Zirtawpni khan Rengdil Bial, Rengdil kohhranah Chhungkaw khat, member -5 awmna te chuan UPC NEI zawmin Pentecost kohhranah sengluh an ni. Heng mi thar chhungkaw khat zinga Puitling 2 te hian Bialtu Pastor C.Lalthlengliana kutah Sual ngaihdamna baptisma Isua hmingin an chang a , nau -3 hlan nghal a ni bawk.
——-
Member thar :
1. Aug ni 16, Pathianni khan Rengdil Bial chhunga awm District Missions Dept. Enkawl lai Field pahnih Tumpanglui leh Bajerung-ah mithar 8 neih a ni.
Heng mi thar te hi rawngbawltu Missionary te rawngbawlna kaltlanga Pathian malsawmna niin; Sist. Esther Lalrawngbawli awmna Bajerung Missions Field-ah hian chhungkaw khat member 2 awmna te chuan Pentecost kohhran zawmin sengluh an ni a, Bro. Lalhriatkima thawhna mek Tumpanglui Missions Field-ah chhungkaw khat member 6 awmna te chuan Pentecost kohhran an zawm bawk.
2. August ni 16 Pathianni chawhma khan Aibawk Bial Falkawn-ah mi 14 te chuan Isua hmingin Sual ngaihdamna baptisma an chang. Baptisma rawngbawlna hi Aibawk bialtu, Pastor Pc. Lalrokiman a nei a, an zingah hian mithar 1 a tel. Mithar hi Upa R. Lalzuala, Falkawn Kohhran Chairman chuan Pentecost Kohhranah Lal Isua hmingin a seng lut nghal a ni.
August ni 16, Pathianni chawhnu khan Aibawk Bial chhung, Muallungthu kohhranah mithar 1-in Isua hmingin baptisma a chang a, bialtu pastor PC. Lalrokima vekin sual ngaihdamna baptisma hi chantirin baptisma chan zawhah an nupain Upa Lalzahawma Chawngthu, Muallungthu Kohhran Chairman-in Kohhranah a senglut bawk.
——
Tanpuina hlan :
Damparengpui Bial, Dampa Tlangnuama Kohhran member Gomtirung (Zaii), Cancer natna avanga hun rei tak khumbeta na chu Maubawk Bial, Bungkawn Kohhrana lawm David Zodinpuia chuan inenkawlna tura a sum mamawh Rs.35,000/- pein, tunah hian kohhranhote tawngtaipuina kaltlangin Pathian tihdamna a chang a, Dam lo Sist. Zaii hian thilpek petute chungah leh tawngtaisaktu te chungah lawmthu an sawi.
——
Thilpek :
Bairabi Bethel kohhrana lawi Bairabi Bial secretary ni mek Upa C Vanlalzawma chuan Bairabi Pastor quaters sak mekah mamawha hman atan a teak huan atangin Teak tum engemaw zat a pe a, Bial hruaitute an lawm hle.
Facebook