Pennet News : October 28, 2022

CHHIMTUIPUI DISTRICT

Hruaitute Programme:

October ni 22 Inrinni khan Chhimtuipui District Superintendent, District Secretary, District Treasurer leh District Missions Director te chuan Laki Local Church an tlawh a, Laki Kohhran Biak In sak mek chu ban phun puiin ruahmanna te an neihpui a ni.

———-

DIST PYD CONFERENCE DRIVE TLUANG TAK NEIH ANI

46th Chhimtuipui District PYD Conference Drive chu Sangau bial ah tluang taka neih a ni. Chhimtuipui District chhung Bial tin atangin bial PYD OB te kal khawmin, Sangau bial chhung local hrang hrang te inkhawm puiin hun hlawkthlak tak hman a ni. Sangau Bial hi District PYD conference thlengtu tur te an ni.

———-

BIAL PYD HNATLANG THAWK

October ni 15 khan Siaha West bial PYD te chuan Amobyu Vaihthie biakin a dah tur thuthleng eng emaw zat Council Vaih Local ten an donate chu ahmun ah kal chilhin siamthat chei hnum hnatlang an thawk.

———-

DISTRICT JAIL TLAWH

October ni 16 khan Siaha bial leh Siaha West bial PYD te chuan Siaha District jail ah rawngbawlna an nei a, Member 70 vel kal khawm in Siaha West bialtu pastor pastor C. Lalchhuanthanga chu thusawi rawngbawlna a nei a ni.

———-

CRUSADE NEI

October ni 21 2022 atanga tanin Niawhtlang lll (km 10) Local ah Evan N Thanghnuna District Evangelist leh a thianten  Crusade neiin, kohhranten tisa leh thlarau ah malsawmna dawngin an hlawkpui hle.

———-

BAPTISMA RAWNGBAWLNA NEI

October ni 23 Pathian ni khan Niawhtlang Local ah mi 9 in sual ngaihdamna Baptisma Rev.H.Lalhnehchunga bialtu pastor kut ah an chang a, Nau hlan rawngbawlna te neih nghal a ni bawk.

October ni 23 vek hian Sis.Lalngilneihi te nupa chuan Niawhtlang kohhran te hman tur Sound System tha tak an leisak a, Niawhtlang kohhranhote an lawm hle a ni.

———-

BIAK IN THAR HAWNG DAWN

October ni 27-30 hmang hian Siah West bial chuan Amobyu Vaihthie hmun ah Crusade an nei a, Speaker ah Evan N Thanghnuna District Evangelist chu hman a ni. October ni 29 khan Amobyu Vaihthie biak in thar chu Rev Joseph L Thlauhthang District Superintendent chuan hawnna a  nei bawk a ni..

———-
———-

LAWNGTLAI WEST DISTRICT

Hruaitute Programme:

Lawngtlai West District Superintendent, Rev.F.Lalbiakthuama chuan Oct. ni 28 khan Rev.Dr.T.Tumsanga Sulhnu leh Sermon te tih lehkhabu tlangzarhna ah hun hmanpuiin, Oct. ni 30 hian Lawngtlai North bial LAD leh PYD join Conference ah speaker ah a tang ang.

District secretary, Rev.Lalsawmliana Sailo chuan Lawngtlai College Kohhranah nauhlan rawngbawlna a nei ang.

District Treasurer, Pastor S.Vanlallunghnema chuan Oct. ni 28-30 chhunga Lawngtlai North bial LAD leh PYD Join conference ah speaker niin rawngbawlna a nei ang.

———-

DISTRICT PYD IN CRUSADE HMANG

October ni 21-23, 2022 hmang khan Lawngtlai West District PYD chuan Ngengpuikai Home Mission field ah District Crusade an nei a, Speaker ah Rev.F.Lalbiakthuama Dist.Supdt., Rev.Lalsawmliana Sailo.Dist.Secy leh Pastor S.Vanlallunghnema Dist.Treasurer te hman an ni.

———-

MITHAR LAWMLUT

October ni 23 Pathianni khan Upa F.Chungnunglura, Chandmary Local Chairman chuan Mithar  Member pahnih (2) chu kohhran ah Lalpa Isua hmingin a lawm lut a ni.

October ni 24 Thawhtan zan khan Ngengpuikai Mission field ah mithar member paruk(6) chu Evan PC. Vanlalpeka Home missionary chuan Ngengpuikai kohhran member ni turin Lalpa lsua hming in a Lawm lut bawk..

———-

HRIATTIRNA

Lawngtlai West Dist. Emergency board chuan General Conference kal dan tu he tiang hian ruahmanna a siam a ni.

1.Gen.Conference palai chin Licence nei chu oct.thla ral hma in district official te hnenah in report tur a ni dist.official ten kal dan tur an ngaihtiuah dawn a ni.

2.Palai kal tur zawng² te Conf.thlenna Zemabawkah in report vek tur a ni.

3.Licence Renew a lo hun leh ta a,a form hi bialtu pastor hnenah lam tur a ni ang.
Licence renew tur ten bialtu pastor kaltlanga renew zel tawh tur a ni ang.
October thla chhunga tih fel vek hman tum tur a ni bawk.

———-
———-

LUNGLEI DISTRICT

BIAK IN HAWNG DAWN:

Lunglei District Missions Director Rev.R.Vanlalenga chuan October ni 30 Pathianni hian Assam Missions Field-a awm Hatisar biak in chu a hawng dawn.

Hatisar hi Bhutan Border a awm a ni a, Kumin 2021 Sept thla khan Assam Missions Field Director Rev. Lalmuanpuia rawngbawlna atangin Christian Revival Church ( CRC ) atangin an Pastor chhawr lai Sanjay Nursery hoin members – 80 an lo lut a, Biak in pawh phelsep chirhdiaka zut hian an tung ding a, an Biak in sakah hian an leng loh avangin Biakin thar sak a ngai ta a ni.

Biak in thar tur  hmun hi  ₹. 150000 in Lunglei District Missions Department in a lei sak a, Biak in sak nan hian Bro Lalhmachhuana of Lungsen te chhungkua chuan ₹. 350000 an pe bawk. Tin, Hatisar biak in Pulpit hi Sist. R. Lalsangzuali of Bazar local sum pek atang a siam a ni bawk a ni.

———-

MI THAR :

October ni 24 (Mon) zan khan Tlabung Local ah mi thar pahnih, Mizoram UPC atang in pakhat, Buddis atanga kristian rawn ni thar pakhat, Bialtu Pastor R.Lalremsiama’n Isua hming in a lawm lut.

October ni 23 Pathianni zing  Inkhawmah khan Mualthuam North Venglai Local ah mi thar pakhat Kohhran ah lawm luh a ni.

———-

TAWIPUI BIAL PCD SPORT MEET CUM RALLY NEIH A NI.

Oct 21-23, 2022 chhung khan Tawipui Bial PCD Sport Meet Cum Rally chu Mualcheng  South Local ah neih a ni a, member leh hruaitu te140 vel an kal thei a ni.

District PCD atangin President, Rbt. C.Lalramluahpuia leh Rbt.V.Lalromawia Vice President ten hun an hman pui a, Bialtu Pastor-te chhungkuain an tel pui bawk. Speaker ah Pastor K.Vanlalhruaia, Rbt.C.Lalramluahpuia leh Rbt.V.Lalromawia te hman an ni a, an ni hnen atangin thu tha tak tak ngaihthlak a ni.

Zirtawp zan leh Inrinni zan ah Indoor items hrang hrang- Solo (Mipa leh hmeichhia), Recitation (Hmeichhia), Sermon (Mipa), Mittuama khuangvuak, Zaipawl, Group zai te hmangin intihsiak a ni a, Inrinni zing leh chhun ah- Volleyball (Mipa leh Hmeichhia), Spoon race, Secondhand thin, Tug of War (Mix) hmanga intihsiak a ni. Pathian ni zing ah Bialtu Pastor hnen atangin thu tha tak tak ngaihthlak a ni a, chawhhnu ah Fellowship hlimawm tak neih a ni a, Zan ah District PCD President hi hun a hmang bawk.

Inkhawm boruak a tha in, Pathanni zan ah zaikhawm niin zai leh lam a nuam hle a, naupang ten hlimna an chang a, Thlarau lam hla nen hun hman niin Thlarau thianghlim dawng thar engemawzat an awm bawk a ni.

———-

CRUSADE :

October ni 28-30 chhung hian Headquarters bial LAD te chuan Electric veng Local biak in ah Crusade an buatsaih dawn a, Speaker atan District Secretary Rev.C.Lalrintluanga chu an hmang ang.

———-

CHURCH LEADER RETREAT :

October ni 24 Thawhtanni khan Ramthar AOC Local-te chua Church Leader Retreat an buatsaih a, hlim leh hlawk takin hun an hmang.

He hun hi Upa K.Lalhmunmawia chuan a kaihruai a, Headquarters bialtu Pastor Rev.C.Hmingthanfala chuan telpuiin hunserh a hmang.

Church Leader Retreat ah hian Resource Person atan mi 4 hman an ni a, Resource Person leh an thupui te hengte hi an ni.

1. Rev.PC.Lalfakawma, District Treasurer – Church Administration

2. Sis. Lalremruati  Hmar,. Advocate, Legal Adviser, Lunglei Dist. UPC. – Dan leh hrai

3. Upa LH. Sanghluna, Superintendent Retired (Mizoram Secretariat Service).- Accountancy

4. Evan. C. Lalremchhunga, Dist. PYD President – Rawngbawltu leh a nungchang.

He Retreat ah hian rawngbawltute bakah Department hrang hrang hruaitute an kal tha hle a ni.

———-
———-

NORTH MIZORAM DISTRICT

DISTRICT HRUAITUTE PROGRAMME:

North Mizoram District Puipa pathum Rev. Chhiarpuia, Dist. Supdt., Rev. K. Lalduhsanga, Dist. Secretary leh Rev. C. Lalthantluanga Dist. Treasurer te chuan NMD Missions Dept Confe vawi 42-na Maubawk Biala neih turah telin;  Dist. SUpdt. Rev. Chhiarpuia hian Oct. ni 30 Pathianni zanah rawngbawlna a nei ang.

Dist. Missions Director Rev. C. Lalramthanga chuan kar thar Nov. ni 1 thawhtanni hian Arunachal Field-a Daparizo Biak in sak lungphum phum turin Aizawl a chhuah san ang.

———-

NMD MISSIONS CONFERENCE VAWI- 42NA MAUBAWK BIAL, MAUBAWK KOHHRANAH NEI MEK:

NMD Confe vawi 42 chu Oct. ni 28 zirtawp zan atang khan Maubawk Bial, Maubawk Biak inah tan a ni. Dist. Missions Confe hi Rev. P. Chunga Former Gen. Supdt. chuan hawngin; Confe in Thupui atana a thlan ‘chhuah ‘I rawngbawlna kha hlen rawh – Mahni inhlannaah’ tih chu Zomuantlang Missionary Evan. C. Lalrampana hnen atanga ngaihthlak a ni.

Confe hun hman tur ruahmannaah Confe- rorel Oct. ni 29 Inrinni Dar 11:00Am -ah neih tur niin; Secretary Report leh Financial Report ngaihthlak a ni ang a, hemi hnu hian Conference rorel Rev. C. Lalramthanga Dist. Missions kaihhruaia neih a ni ang.

Inrinni zan atangin Revival Programme-a inkhawm chhunzawm tur niin; Thupui ‘I rawngbawlna kha hlen rawh – Kohhrana kan mawhphurhnaah’ tih chu Rev. C. Lalhmunliana, Bairabi Bialtu Pastor chuan a sawi ang.

Oct. ni 30 Pathianni zingah Rev. Biaksangzuala Gen. Missions Director chuan rawngbawlna neiin; ‘I rawngbawlna kha hlen rawh – Thlarau bo veinaah’ tih thupui hmangin rawngbawlna a nei ang.

Pathianni chhunah Rev. C. Lalramthanga, Dist. Missions Director chuan rawngbawlna neiin ‘I pianna ramah kir leh rawh – Thilpeka rawngbawlnaah’ tih a sawi ang a, Pathianni zanah Rev. Chhiarpuia, NMD Supdt. chuan rawngbawlna nei thungin thupui khaikhawmna ‘I rawngbawlna kha hlen rawh’ tih thupui hmangin rawngbawlna a nei dawn a ni.

Conference chhung hian Zaipawl 1) Gen Choir 2) Dist. PYD Choir 3) Maubawk Bial PYD leh 4) Maubawk Bial LAD te an zai ang a, Solo 1) Sist. Lalfakzuali 2) Sist. Lalneihpuii 3) Bro. Lalruatdika 4) Sist. C. Lalhriattluangi leh Sist. Lalthansangi ten fak hla an sa bawk ang. Tin, heng bakah hian Kananthar MF leh Tumpanglui MF ten special item an nei bawk ang.

———-

NMD MISSIONS CONFE RESOLUTION NEI:

Oct. ni 21 Zirtawpni khan NMD Missions Dept ten District Missions Confe. Oct. ni 28-30 chhunga Maubawk Biala Dist. Confe an neih turah Agenda chhawpchhuah tur ennawnin resolution committee an nei. Meeting hi Rev. C. Lalramthanga, NMD Missions Director chuan kaihruaiin Dist. Supdt. Rev. Chhiarpuia’n a ho bawk.

Reso Committee hian Confe- Agenda tur 10 chhawpchhuakin engemaw zat District Board-a rel tur a dah bawk.

———-

NMD SS CONFE RESOLUTION NEI:

Oct. ni 24 Thawhtanni khan NMD Sunday School Dept ten Nov. ni 18 Zirtawpni chhung leh zan hmanga District SS Confe rorel leh inkhawm an neih turah Confe rorel Agenda thlitfimna neiin; meeting Pastor Lalruatkima Fanaiin a kaihruai a, Disrt. Sudpt Rev. CHhiarpuia’n a ho bawk. Reso Comt hian DIst. SS Confe rorel tur chhawp chhuah engemaw zat neiin; Dist. Board-a pharh tura ruahman an nei bawk.

———-

RAMHLUN BIAK IN HAWNG:

Ni 24.10.2022 thawhtanni khan Ramhlun UPC Biak in, hun rei tak kalh a awm tawh chu Pathian remruatnain Court sang berin neitu nihna a tihchian tak avangin Ramhlun kohhrante chuan hawngin, a hmunhma tihfai leh hung that hnatlang Bial huapin an nei.

He hunah hian bial Kohhranpui hruaitute bakah bial chhung Kohhran member te khawchhe hnuaiah țhahnem tak thawk chhuakin biak in leh a vel te sam fai a ni a, kawng ân lam pal hung țha in gate siam anih bakah a chhung bungrua thutthleng la tha tak te chu biak in thar lamah suan luh a ni bawk. Rev C.Lalthantluanga, NMD District Treasurer chuan Bial huap hnatlang hi a tawiawm bawk. Ramhlun Biak in hawnga thenfai hnatlang neih zawh hnu hian Bialtu Pastor Rev. P. Vanlalfela chuan Pathian hnenah lawmthu sawi tawngtai a nei bawk.
———-

Bungkawn Biak in hmun hawng:

Oct. Ni 22 lnrinni khan Bungkawn Biak ln hmun kum 1995 Nov 30  a Aizawl DC in a kalh chu, India ram rorelna sang Supreme Court chuan neitu nihna tichiangin Bungkawn Kohhrante chuan luah chho in hmunhma thenfai hnatlangpui an nei. Biak in hmun hawn leh a thenfai hnatlang hi Maubawk Bial chhung kohhran member thahnem takin tawiawmin Bialtu Pastor Rev R Lalhmangaiha hovi’n Member 60 zet hnatlang hian an thawk a ni.

———-

Workcamp in fehchhuak:

Oct. ni 22 Inrinni khan Dapchhuah Preaching Point kohhrana rawngbawla awm mek Evan. ZD Lalhmangaihzuala leh a rawngbawlpui te chuan Dilzawl MF Ceiling Missionary Quarters Ceiling siam turin an fehchhuak a. Ceiling tha tak an siam sak a ni. Dapchhuah kohhrante chungah Dilzawl Missions Field kohhhran member te an lawm hle.

———-

RAWNGBAWLNA REPORT

Doctrinal Camping nei: Maubawk Bial Bungkawn Kohhrante chuan Oct Ni 22 inrinni khan Doctrinal Camping neiin; Camping neih hlawkna ropui tak rah neiin Oct. ni 23 Pathianni  khan Bungkawn kohhranah mi 7 laiiin Evan K Vanlalhruaia kutah sual ngaihdamna Baptisma an chang.

———-

Thuthlung Crusade nei:

Aibawk Bial PYD te hmalaknain Oct ni 21-23rd Zirtawp zan atanga Pathianni hmang khan Thuthlung Crusade neiin; Oct. ni 24 thawhtanni khan Pathian chawimawina neih a ni pawh.

He Crusade-ah hian Speaker atan Evan. T. Vanlalruata (Apostolic Revival Team) leh a rawngbawlpuite’n rawngbawlna neiin; rawngbawlna neih chhungin Pathian thuthlung awmzia te, a thiltihtheihna leh a pawimawhna ten gun taka zir niin; he rawngbawlna kaltlang hian Thlarau Thianghlim dawng thar mi 4 an awm a, hei bakah hian siamtharna chang mi thahnem tak an awm bawk. He rawngbawlnaah hian Aibawk Bial PYD Zaipawl, Sist. Lalneihpuii, Falkawn leh Sist. HP Lallawmzuali te chuan fak hla sain rawngbawlna an nei bawk.

Aibawk Bial PYD buatsaiha rawngbawlna kal zelah Oct. ni 24 thawhtanni khan Bro. Lalthuneiha Sateek chuan Pathian chawimawinan tangkafai Rs. 30000 kohhranah pein; Kohhran kaltlangin Pathian chawimawina ropui tak neih a ni bawk.

———-

HEADQUARTERS BIAL:

Hqrs. Bial PYD te chuan Confe rorel bawhzuiin Oct. ni 21 – 23 chhung khan Revival Crusade Mission Vengthlang Kohhran Biak inah an hmang a, Speaker atan Evan. Benjamin Lalnunzira Maubawk hmangin, he rawngbawlna kaltlang hian Pathianin hna a thawk nasa hle. Thlarau Thianghlim dawng thar bakah Thlarau THianghlim khawihnawn leh siam thar mi thahnem tak an awm bawk. Revival Crusade hman hi revival thlengtu Mission Vengthlang PYD te ruahmannain Oct. ni 24 Thawhtan zan thleng an chhunzawm bawk a ni.

———-

Pathian chawimawina tum 7 neih tur:

Chaltlang Bial, Chanmari West kohhrana Pathian thlarau thianghlim hnathawh thlengin Kohhranho zingah Thlarau Baptisma chang thar engemaw zat awmin Oct. ni 21 atang khan Pathian Chawimawina tum 7 neih turah a tum 1na tan niin; Oct. ni 24 thawhtanni khan Upa Vanromawia te chhung kaltlangin Pathian chawimawina a tum 3-na neih a ni bawk.
Thlarau mite’n an hmuh angin Pathian chawimawina hi tum 5 dang la awm leh tur a ni a, kohhranho zingah Thlarau Baptisma chang thar bakak siamthar leh mi thahnem tak an awm bawk.

———-

Kanghmunah Revival Crusade nei:

Pentecostal Apologetics Revival Team te chuan Kanghmun-ah Revival Crusade Oct. ni 18-23 chhung khan an nei. He rawngbawlnaah hian Evan. H. Zoramsanga chu Speaker niin Oct. ni  22 inrinni khan sunday school lang camp neih a ni a, Thlarau dawng thar mi 7 awmin siamtharna chang mi engemawzat an awm bawk

———-

MITHAR LAWMLUH

Hunthar Bial Edenthar Local:

Pathianni kal ta Oct. ni 23 chawhma inkhawm khan Edenthar kohhranah UPC (NEI) Edenthar kohhrana lawi turin member thar duhawm tak chungkaw khat member paruk awmna chu Evan K. Tlangthanmawia chuan Lalpa Isua hmingin a lawmlut.

Lengpui Bial Dapchhuah Local:

Oct. ni  16 Pathianni khan Dapchhuah Preaching point ah member thar pasarih neiin; Dapchhuaha rawngbawla awm mek Evan. ZD Lalhmangaihzualan heng mitharte hi Lalpa Isua hmingin a lawmlut a ni.

———-
———-

AIZAWL EAST DISTRICT

District Missions Conference hman mek a ni:

Aizawl East District Missions Department hnuaia inkhawmpui lian ber District Conference vawi 29-na chu Zemabawk Vengpui Biak Inah October 28, Zirtawp zan atang khan hman mek a ni a, Pathianni zan thleng a awh ang. Inkhawmpui hi Rev R.Lalhawia chuan Pathian hnenah hlanna a nei a ni. Kumin District Missions Inkhawmpui-ah hian Thupui hranpa nei lovin heng mite hnen atang hian thusawi ngaihthlak thin a ni:

Zirtawp zanah: Evan Philip VL.Hmuchhuaka, Missions Evangelist
Inrinni zanah: Evan R.Vanchhunga, Bazar Bial Director
Pathianni chawhma: Rev Dr.C.Sihmo, Director, Chhimtuipui District
Pathianni Chawhnu: Rev VL.Hnemtluanga, District Director
Pathianni zan: Rev KVL.Hmangaihkima, District Superintendent

Inrinni nileng khan Zemabawk Vengpui Biak In-ah hian Bial atang leh Official atanga agenda lutte ngaihtuahin rorel inkhawm neih a ni a, Rev VL.Hnemtluanga, Missions Director chuan kaihruaiin Secretary leh Treasurer hnen atangin report ngaihthlak a ni bawk.

———-

Mithar leh baptisma chang thar:

Bro Joseph Lalremruata rawngbawlna Kawlkulh Khuanglak Kohhranah October 18, Thawhleh zan khan mi pakhatin baptisma chang lehin, October 19, Nilai zan khan member thar pakhat bialtu Pastor R. Lalfamkima chuan senglutin inkhawm banah baptisma a chantir nghal. Khuanglak-ah hian Kohhranhote  thawhkhawm hmangin Inrinni khan Pathianni chawimawina neih a ni.  Bro Joseph Lalremruata-a rawngbawlna ah hian mi 12 in baptisma chang tawh in, mi thar 1 a awm a, thlarau baptisma dawngthar leh siamtharna chang engemaw zat an awm bawk a ni.

Kawlkulh Venglaia rawngbawlna nei District Revival team Evan JH Lalhminghlua te rawngbawlna ah October 18, Thawhleh zan khan mithar 1 sengluh a ni a, sengluhna hi Church Board Chairman Upa Vanlalhluna’n a nei a ni. Inkhawm banah mi thar nen mi 3 in sual ngaihdamna baptisma Evan JH Lalhminghlua kutah an chang nghal a ni. Evan JH Lalhminghlua rawngbawl chhung hian mi 8 in baptisma chang in, mi thar 1 neih a ni a, Thlarau thianghlim baptisma mi 17 in an chang thara Chawimawina vawi 1 a awm bawk a ni.

Zemabawk North bial, Bethel Kohhranah pawh District in Ramlak beihpui thlak tura rawngbawltu a dah, Evan.Lalbiakmuana rawngbawlna kaltlangin October 21, Zirtawp zan khan mithar 3 Kohhranah sengluh an ni bawk. Mithar te hian Evan Lalbiakmuana kutah hian sual ngaihdamna baptisma an chang nghal a ni.

District in ramlak beihpui thlak atana a lak Bro. Malsawmdawnga rawngbawlna Kawlkulh Vengthar ah October 23, Pathianni klhan mithar pakhat Bialtu Pastor R. Lalfamkiman a senglut a, inkhawm banah mi 6 in sual ngaihdamna baptisma Isua hmingin an chang nghal bawk.

Champhai Bethel bial, Zokhawthar Kohhranah Mizoram UPC atangin chhungkaw hnih, an vaiin member 9 te chu October 23, Pathianni khan sengluh an ni. Member thar sengluhna hi District Sunday school Secretary Evan K Lalmuansanga’n a nei a ni.

October 23, Pathianni zan khan Khuangleng-ah mithar pakhat Evan H.Lalremhlua rawngbawlna kaltlangin sengluh a ni bawk.

October 25, Thawhleh zan khan Keifang Chehrep veng Kohhran Phun tura hma lakna kal zel ah, Evan Philip VL Hmuchhuaka rawngbawlna kal tlangin, MUPC atangin mi 1(pakhat) Kohhranah sengluh a ni.

Zemabawk Bial report:
Zemabawk Bial, Vengpui Kohhranah Chawimawina chawlhkar zawnin a awm chho va, October 15 Sis Biaki te chhungkuain chawimawina an nei. Speaker atan Evan HK Lalhmangaiha hman a ni a, an rawngbawlna Kohhran ten an hlawkpui hle a ni. Chawimawina Unaupa Laldawngliana Sailo te chhungkua in an buatsaih ve leh a, Bro. Dawngtea hi Cancer natnain a tlakbuak lai mek a ni. He chawimawinaah hian Rev VL Hnemtluanga, Director Missions Department chu Speaker atan hman a ni.

Bungbangla kohhran ah hian Bial PYD hmalaknain,  Evan Thangneihsanga’n rawngbawlna a nei mek a, October 22, Inrinni khan Mizoram UPC inti thin,  member zawng zawng chu Inpui (UPC N.E.I) lamah sengluh an ni ta a ni. Sengluhna inkhawm hi Rev. R.Malsawma’n a kaihruai a, Rev H.Lalropuia, Treasurer, Aizawl East District chuan member 19 hi sengluhna a nei a ni.

———-

Chawimawina nei:

A vawithumna’n Serchhip Dinthar Bial, Bungtlang Kohhranah October 22, Inrinni khan Pathian chawimawina neih leh a ni. Bungtlang Kohhranah hia Evan V Kamneihthanga’n rawngbawlna neiin Pathianin a hmang hle a, damlo eng emaw zatin taksa damna an changa, Biak In thleng thei tawh lo te siamthar lehna changin lamtual an mawi leh ta a ni.

Bungtlangah hian October 15 khan mi inphalten thawhkhawmin chawimawina neih a ni a, October 17-ah chhunzawm leh niin October 22 khan neih leh a ni bawk. Kohhran ten tisa leh Thlarau ah Pathian malsawmna an dawng hle a ni.

District in a tirh Bro. Malsawmdawnga rawngbawlna Kawlkulh Vengthar ah October 24, Thawhtanni khan Bro. H. Laldawngliana te chhungin Pathian chawimawina an nei bawk. Bialtu Pastor R. Lalfamkiman inkhawm kaihruaiin, chawimawitute malsawm hriakthihna a nei a. Bro. Malsawmdawnga hnen atangin Pathian thuchah ngaihthlak a ni. Sis. F. Lalropari leh Sis Mawitei te hnen atangin Pathian fakna hla ngaihthlak a ni bawk. Kawlkulh khawchhung kohhran Khuanglak leh Venglai atang te in chawimawina hi an hmanpui bawk a ni.

October 23, Pathianni khan Sis. Engfawni te chhungkua, Bawngkawn Kohhran te chuan Pathian chawimawina neiin Kohhran ten hlim takin hun an hmang. Speaker-ah Evan F.Malsawmdawngliana hman niin October 21, Zirtawp zan atang khan Revival Crusade in hun an hmang a ni.

October 22, Inrinni khan Upa F.Lalzawmliana te chhungkua, Kahrawt Kohhran te chuan Pathian chawimawina an nei a, Kohhran ten hlim takin hun an hmang. He hunah hian Speaker-ah Rev.R.Laltlankima, District Secretary chu hman a ni. Rev R.Laltlankima hian Pathianni khan Kahrawt Kohhranah hian rawngbawlna nei chhunzawmin Kohhran ten an hlut hle a, Pathianni chawhnu inkhawm banah khan Rev R.Laltlankima kutah hian mi 5 in sual ngaihdamna baptisma an chang a ni.

———-

Thianghlimna leh Sunday School Kumpuan Campaign nei:

October 22 leh 23 khan District Sunday School Department hruaitute chuan Kahrawt Bial, Champhai leh Champhai Bethel Bial-ah Thianghlimna leh Sunday School Kumpuan Campaign hlawhtling takin an nei. He hunah hian District S.S hruaitute hi kalkimin Bial pahnih chhunga Tualchhung Kohhran hrang hrangah inkhawm kualin Campaign hi an nei a, hlawktakin hun an hmang a ni.

———-

Pathian thu zirhona nei:

October 24 leh 25 khan Bethlehem PYD te chuan Pathian thu zirhona hun hlawhtling takin an hmang. Sunday School Hall-a neih Pathian thu zirhonaah hian Resource person-ah Rev.KVL.Hmangaihkima, District Superintendent chu hman niin zan khatna, October 24, Thawhtan khan ‘Isua Pathianna” chungchang zirho a ni a, zan hnihna October 25, Thawhleh zan khan “Baptisma” tih thupuia hmangain zirhona hun an hmang leh a ni. He hunah hian member engemaw zat kalin hlawktakin hun an hmang a ni.

———-

Revival Crusade:

October 19, Nilai zan atanga Pathianni zan thleng khan Zemabawk Vengpui Biak In-ah Revival Crusade hlawhtling taka hman a ni.  He hunah hian Speaker-ah Rev VL.Hnemtluanga, District Missions Director chu hman niin hlim takin KOhhran ten hun an hmang a ni. October 21, Zirtawp zan khan PYD Kumpuan Committee hmalakna in Mual Inkhawm Zemabawk kawnah neih a ni a, hetah hian Rev KVL.Hmangaihkima, District Superintendent hnen atangin thusawi an ngaithla bawk a ni.

———-

Teikhang Biak In hawng:

October 22, Inrinni khan Ngoap Bial, Teikhang Biak In sak thar chu Bialtu Pastor K.Vanlalhlimpuia chuan hawnna a nei. Biak In hawnna programme hmanah hian Bial hruaitute bakah Bial chhung atangin Kohhran member engemaw zat an kal thei a, Kohhran ten hlim takin hun an hmang a, tlaiah Biak In thar lawmna ruai an kilho nghal  a ni.

Teikhang Biak In hi a dung ft40 leh a vang ft 15-a liana sak niin a sak nan hian District atangin tanpuina an dawn bakah mi thahnemngai engemaw zatin sum leh pai an thawh bawk a ni. Biak In sak nan hian tha zali chuang sen niin mimal bakah Bial PYD leh Bial Kohhranpui ten work camp in a sak hna hi an thawk bawk a ni.

———-

General PYD Conference:

November 10 atanga 13 chhunga General PYD Conference hman tur atan a thlengtu Aizawl East District- Khawzawl Bial te chu nasa takin an inbuatsaih mek a, pandal pawh ngawrh taka sak mek zel a ni. Pandal hi Zuchhip Field-ah sak niin a sak hna hi Bial chhunga Tualchhung Kohhran hrang hrang ten an in thawh chhawk thin a ni. October 1, Inrinni khan Champhai Joint PYD- Kahrawt Bial leh Champhai Bethel Bial ten General PYD Conference pandal sak hna hi thawhpuiin Champhai atang hian PYD member engemaw zat an thawk chhuak a ni. October 3, Thawhtanni khan Khawzawl Zuchhip Branch YMA te pawhin pandal sak hnatlang hi an pui bawk a, mi 30 chuang an hnatlang a ni. October 5, Nilaini khan Kawlkulh Bial PYD te pawhin pandal sak hnatlang hi an pui bawk a, October 15 khan Khawhai Bial ten sakpui bawkin hetah hian member 25 an thawkchhuak thei a ni. Pandal hi a dung ft 120 leh a vang ft 80-a liana sak niin Khawzawl Bial te nasa takin an inbuatsaih mek zel a ni.

Kumin General PYD Conference-ah hian “I pianna ramah haw leh rawh” Genesis 31:13 thu hman tur niin mi hrang hrang ten thusawi rawngbawlna an nei thin dawn a ni. Kumin General PYD Conference-ah hian India Unit atangin Pastor Ruben Hobday chuan Conference hi a rawn hmanpui dawn bawk a ni.