GENERAL HRUAITUTE PROGRAMME:
General Secretary Rev. Zohmingthanzama chuan April ni 2 Pathian ni hian Aizawl East District, Thuampui Bial tu tur, Pastor. C. Laldintluanga chu lak luhna induction Service a nei ang. Zan lamah North Mizoram District Headquarters, Tuikhuahtlang Kohhranah Kesil rawngbawlna a nei bawk ang.
General Treasurer Rev. Lalmalsawma Sailo chuan April ni 2 Palm Sunday ni hi Hliappui Kohhran ah rawngbawlna a nei ang.
General Missions Director, Rev. R. Laichhingpuia chuan April ni 1-2 chhung hian Bihar Missions Field Conference, Patna a neih chu hmanpuiin rawngbawlna a nei ang.
———-
———-
CHHIMTUIPUI DISTRICT
PYD DAY HMANG
Ni 21.3.2023 Thawhleh ni khan Siaha bial leh Siaha West bial ten Joint in District Hospital ah a mamawh apiang ten an hman turin Thisen an pe.Thisen pe zawng zawng hi mi 45 niin,mipa 35 leh Hmeichhia 10 te an ni.
Zan lam ah Siaha West bial ten Dist Hqrs Sunday school hall ah programme hlimawm tak hmangin hun an hmang leh bawk ani.
———-
DISTRICT CONFERENCE HLAWHTLING TAKA HMAN A NI:
Chhimtuipui District Conference vawi 47na chu Ni 16-19.3.2023 khan Iana (Ainak) hmunah hlawhtling taka hman a ni. General Superintendent aiawh Rev.R.Laichhingpuia General Director Missions Dept.in conference hi a hmanpui a, District chhung bial hrang hrang atangin palai mi 684 thleng khawmin thlenkim zan atangin thlarau lam hlapui nen hun hman tan nghal a ni. Inkhawm boruak leh zaikhawm boruak a nuam hle a, fakna hlate, thlarau lam hlate, leh hlapuite nen Pathian chawimawina neih thin a ni. Pathian mi hman lai ten ‘Dinthar lehna’ thupui hmangin rawngbawlna an nei thin a, Conference Speaker te : Evan.K.Rinthara President District PYD, Rev.R.Vanlalawia General Secretary Missions Dept., Rev.R.Lalrosanga Former District Superintendent Lunglei District, Rev.R.Laichhingpuia General Director Missions Dept., Evan.V.John Director District SS Dept. leh Rev.Pc Lalfakawma District Treasurer Lunglei District te hnen atangin Pathian thuchah tha tak tak ngaihthlak thin niin District Choir te leh zai mi ten rawngbawlna nung tak an nei thin bawk a, District Conference rual hian District LAD te leh District Sunday School Dept ten a hrang in rorelna an nei ve bawk a, District Kohhranpui rorelna pawh rorel palai ten tluang takin an nei bawk a ni.
Rorel pawimawh zual :
1. 2024 District Conference hi a hun ngaiah Bualpui Ng Bial ah neih ani ang.
2. District pumah Thlarau dawng lo ten an dawn/chan ngei theih nan hmalak nise.
## Local tinah Sunday zan apiangah Thlarau dawng lote tan tawngtaina leh dilpuina neih thin nise.
## Ni 28.5.2023 Pentecost Day Zing hian District pum Local tinah Thlarau dawng lo ten an dawn theih nan chawnghei tawngtaina neih nise.
## Local tinah April leh May thla chhung hian Sunday zan a sermon tu apiangin thlarau thianghlim baptisma pawimawhna leh hlutna sawi thin nise.
## Local tin leh Bial tinin mahni remchan dan ang zelin Thlarau la dawng lo ten an dawn ngei theih nan hma lo la bawk se.
3. District hmalakna a School din chungchang chu Jubilee building te sak zawh hunah sum leh pai dinhmun a zirin ngaihtuah that leh nise.
4. Bio – Data siam mek hi kumin chhung ngei a peih fel nise.
5. Rawngbawltute tan retreat Local tunah neih nise. Hlawhtling taka neih anih theih nan Local tin ten ruahmanna lo siam se. Retreat huna zir tur Rawngbawltu mawhphurhna Pastor V.Lalhlimpuian lo ziak se. Rawngbawltu Nungchang leh Nun dan tur Rev.MH Robin Lalthanmawian lo ziak bawk se.
6. Rev.Dr.C.Sihmo Director District Missions Dept. chu pension a a chhuah tak avangin Rev.Lalhnehchunga chu Director District Missions Dept. atan ruat a ni a. Niawhtlang Bial a awm turin Pastor Larry Lalliandinga chu ruat a ni bawk. 4th April,2023 ah District Committee Room ah charge an inhlan anga mahni post ah 15th April 2023 aia tlai loah an lut ang.
———-
CAMPING NEI MEK
Ni 27 March-1April thleng awh tur Camping chu Siata Local church ah neih mek ani.Speaker atan Pastor Robert B Lalnunsiama T Tuipang bialtu chu hman niin,Kohhranten tisa leh thlarauah malsawmna tamtak an dawng chho mek zel ani.
———-
———-
LAWNGTLAI WEST DISTRICT
BIAL PAWN TLAWH LEH PASTOR QUARTER SAK LUNGPHUM PHUM
March ni 25-26 chhung khan Lawngtlai South LAD te chuan Chawngte ‘P’ Local church an tlawh,Speaker ah Rev.Lalsawmliana Sailo Lawngtlai South bialtu chu hmangin Mikhual pawh thahnem tak an kal a ni. Pathianni chawhnu ah fellowship neiin in tihlimna hrang² nena in pawlhona neih a ni bawk.
Pathianni inkhawm bangah chawngte bial Pastor Quarter Lungphum phumna programme neih niin Rev.F.Lalbialthuama Dist.Supdt chuan quarter sak lungphum phumna a nei a ni.
———-
Mithar lawm luh leh Baptisma:
March ni 26 Pathianni khan Lunghauka Local church ah Pastor K Lalzawmsanga bungtlàng bialtu chuan mithar chhungkaw khat member pariat(8)awmna chu lawmluhna neiin,sual ngaihdamna baptisma mi panga(5)a chantir bawk a ni.
———-
Vathuampui bial salvation camping:
March ni 20-26, 2023 chhung khan Vathuampui bial huapin Vathuampui hmunah salvation camping neih ani a, Pathian kaihhruaina leh awmpuina zarah tluang takin camping zawh fel a ni.
Campingah hian campers riaklut 27 awmin a langa chhimtu leh upa leh rawngbawltute nen mi 40 chuangin he rawngbawlna hi an chhim a ni.
Camping chhung hian Pathian hnathawh ropui tak tak lo thlengin sual ngaihdamnan Isua hminga Baptisma chang mi-13 awmin, thlarau Baptisma chang thar leh taksa lama natna nei ten damna chawplehchilhin an chang a ,Tin, camping kan neih chhunga min buaipuitu organising hruaitute leh bial chhung upa te chungah kan lawm em em a, min thlengtu Vathuampui local te chungah leh khawtlang hruaitute pawl leh mimal ang a min puihbawmtute chungah pawh Isua hmingin lawmthu kan sawia, tlang hrang hranga unau ten min lo tawngtaipuina ropui kan tiin Lalpa malsawmna in chan theuh theih nan duhsakna kan hlan che u a, kan District hruaituten camping kan neihna tur a tana min buaipuina leh kan mamawh chhanna min pe a min phurpuia min fuih chak mawlh mawlh te kha kan lawm em em a ni.
———-
OFFICE HMUN TUR LAI TAN
Date 27.March.2023
March ni 27, 2023 khan Lawngtlai West District Hqrs Office Building hmun tur chu laih tan a ni ta, Rev. R.Sangthang’n tawngtai na in thawktute leh Khawl te Pathian hnenah a nei a ni.
———-
———-
LUNGLEI DISTRICT
PSM TAILORING CENTRE-A PUANṬHUI ZIR TUR LA FEL:
March ni 24 Zirtawpni khan Pentecostal Social Ministry, UPC Lunglei District chu District UPC Conference Hall-ah an thukhawm a, PSM Tailoring Centre-a puanṭhui zir tur mi 10 interview kaltlangin an la fel.
Puan ṭhui zir tur atana thlan te:
1.F.Laltanpuii D/o F.Zothankhuma, Thingsai
2.Lalramsangi D/o T.Lalsangzuala, Thualthu
3.Nichanhnem, D/o Hmangaihdinga, Luangmual
4.Christina T.Vanlalpeki, D/o T.Lalrinawma, College veng
5.Ngurzampuii, D/o R.Vanlalliana, Kanghmun S
6.B.Lalruatkimi, D/o B.Lalmalsawma, Lunglawn Zaia veng
7.Ngurzampuii Sailo, D/o Lalhmangaihzuala, Tleu
8.Lalromawii, D/o Sapchhawna, Hnahthial Chanmari
9.Ramdinsangi, D/o Lianchhunga, New Haulawng,
10.J.Lalthapari, D/o J.Lalrohlua, Dawn
Panel list :
1. Miriam Lalenpuii D/o F.Lalsangliana, Tawipui N-II
2. Lalpianpuii D/o Lalremmawia, Tleu
Puan ṭhui zirna Course khat rei zawng hi thla 6 a ni a, April ni 10 Thawhtanni chawhnu dar 2 ah puanthui zir thar turte pual hian hun hman a ni ang a, April ni 11 atangin class kal tan tur a ni ang.
———-
REVIVAL HAWNNA HUN HMANG DAWN :
Lunglei District UPC hnuaia Revival Committee hmalaknain April ni 2 Pathianni hian Revival hawnna Programme Venglai Local Biak inah buatsaih a ni dawn a, he hun hi Evan. T. Lalzawmsanga, Secretary Revival Committee chuan a kaihruai ang a, Revival Committee Chairman Rev. C. Lalhriatpuia chuan a hawng ang.
He inkhawm ah hian Upa C. Lalramhluna, Asst Secretary, Revival Committee chuan Report pe in Lunglei District UPC Choir leh Headquarters bial PYD Zaipawl te an zai ang a, District Superintendent Rev.C.Vanlalena chuan thu a sawi ang.
Revival hawnna Programme hi chawhnu leh zan lamah hman chhunzawm a ni ang a, chawhnuah hian District Treasurer Rev.PC.Lalfakawma chuan thusawiin zan lamah District Secretary Rev.C.Lalrintluanga chuan thu a sawi bawk ang.
———-
SUNDAY SCHOOL TRAINING:
March ni 26 Pathianni khan Headquarters bial Sunday School Department Conference rorel bawhzuiin, Heqdquarters Local te chuan Sunday School Training, Conference hall ah an buatsaih.
Evan Zoramchhansa Sailo, Director, Naupang Sunday School, Headquarters Local chuan Training hi kaihruaiin, First Session-ah Bial Sunday School Director Evan MS Dawngliana’n Teaching Technique and Skills tih thupui hmangin zirtirna a pe a, Second Session-ah Bial Sunday School Secretary Evan Remruatpuia Fanai chuan Sunday School kumpuan “Kan fate i chhanhim ang u” tih hmangin paper a present ve thung a ni.
Headquarters Local Sunday School Mawhphurtu te leh Department OB leh kohhran hruaitute te he trainingah hian an kal \ha hle a hun hlimawm tak hman a ni.
Headquarters bial Sunday School Department hian Traning-na tur Subject pahnih hi a bu a siamin, Local tinah Training hi neih tur a ni a. April ni 16 hian Ramthar Local-ah nei lehin April ni 23 hian Ramthar AOC –ah neih leh tur a ni ang. Training pe tur hian Bial OB te bakah Evan R. Ropianga, District Sunday School Secretary leh Evan F. Lalhmangaiha, Headquarters Local-te pawh sawm tel an ni. Training hi Sunday School Hruaitu leh zirtirtu mai bakah Department OB leh Rawngbawltu te tana ruahman a ni a. March leh April thla chhunga neih zawh hman turin ruahmanna siam a ni.
———-
MUALCHENG SOUTH P.C.D. TEN GOLDEN JUBILEE AN LAWM:
March ni 25 Inrinni khan Tawipui bial chhunga awm Pentecostal Children Department (PCD) Mualcheng S Local chuan an kum 50 na (Golden Jubilee) hlim takin an lawm.
Golden Jubilee lungphun bialtu Pastor Rev.R.Vanlalenga chuan a hawng a, Jubilee dar ruat bik ten an vuak hnuah Jubilee lawmna inkhawm neih chhunzawm a ni.
He inkhawm hi Organising Chairman Rbt.C.Lalengzuala chuan a kaihruai a, PCD te hian fak hla mawi taka an sak bakah PCD thiltum an sawi rual bawk. Bro.Laithangpuia Organising Secretary chuan Report a pek bakah Souvenir a Preview a, hruaitu hluite chawimawina thilpek hlan an nih hnuah bialtu Pastor Rev.R.Vanlalenga chuan Souvenir a tlangzarh a, PYD Mualcheng S zaipawlte an zai bawk.
PCD member atangin Sist.C.Vanlalmalsawmzuali, Sist.Nisa B.Lalremtluangi, Sist. Mary T.Vanlalremruati bakah Sist.T.Lalruatfeli ten zaiin rawngbawlna an nei a, Sist. Rosy Lalrinkimi leh Sist.Sylvia B.Lalngaihsaki ten Recitation thiam takin an sawi bawk. Bialtu Pastor Rev.R.Vanlalenga chuan Jubilee thuchah puanchhuahna a nei a, tlai lamah Jubilee lawmna ruai theh a ni.
He hun hi Rbt.V.Lalromawia District PCD Vice President leh Secretary Bro.Jacob Ramengmawia ten an hmanpui a ni.
Mualcheng S ah hian kum 1973 khan PCD hi Naupang pawl tiin din a lo ni tawh a, tun dinhmunah Mualcheng S Local-ah hian kohhran member 524 awmin PCD member 114 an awm mek a ni.
———-
———-
NORTH MIZORAM DISTRICT
DISTRICT HRUAITUTE PROGRAMME:
Superintendent: NMD Sudprintendet Rev. Chhiarpuia chuan March ni 26 Pathianni kal ta khan Rengtekawn Bial Pangbalkawn kohhrante tlawhin, Pangbalkawn kohhran atanga in dang tur kohhran member dinhmun te a hmunah a enfiah a, hemi ni hian Mi thar engemaw zat Pentecost kohhrana lawi turin Lal Isua hmingin a lawmlut a ni.
Rev. Chhiarpuia hian April ni 2 Psalm Sunday zan hian Lengpui Bial vawngtu thar Pastor C. Zoramthara leh a chhungte induction service a nei ang.
District Secretary: District Secretary Rev. K. Lalduhsanga chuan Tlangsang Bial Post-a awm tur Pastor R. Thanglura Induction nei turin April ni 1 Inrinni-ah Aizawl a chhuahsan a, Induction hi April ni 2 Pathianni zanah neiin; April ni 3 thawhtanni-ah an lo let leh ang.
District Treasurer: District Treasurer Rev. C. Lalthantluanga chuan kar kalta Pathianni hmang khan AED Hnahlan Bial LAD Conference hmanpuiin rawngbawlna a nei. He mi hnu March ni 31 Zirtawpni khan Vairengte-a Pathian chawimawina buatsaihah speaker niin rawngbawlna a nei leh bawk a ni.
Missions Director: NMD Missions Director Rev. C. Lalramthanga chuan ruahmanna awm angin March ni 31 atanga April ni 3 chhunga Bihar Field Conference Bodhgaia- hmuna neih tur a hmanpui ang.
———-
District LAD Board nei:
March ni 31 Ningani khan North Mizoram District LAD te chuan District LAD Board neiin; President Sist. K. Lalhmachhuani B/w in a kaihruai. District LAD Board hi District Committee Room-ah neiin, Board member pawh an kal tha hle a, District hruaitu pahnih Rev. Chhiarpuia Dist, Supdt. leh Rev. K. Lalduhsanga Dist. Secy ten an ho bakah General LAD atangin Gen. LAD President Sist. Lalramthangi’n a rawn ho bawk.
Dist. Board-ah hian Rev. CHhiarpuia chu thusawi tura sawm a nih angin; District LAD Board te chibai a bukin, Bial LAD Board member te chu Bial khat meuh aiawhtu an nih angin, rilru leh ngaihtuahna zau tak nei leh engemaw mai mai avanga phili mai lo tura fuihin, Kohhran hmasawnna kawng hrang hrang report a pe bawk a ni.
Gen. LAD President Sist. Lalramthangai’n thu sawi bawkin LAD te Pasalte chawimawia zahthiam a pawimawh thu te, kohhran rorelna zaha zawm a pawimawh thu te bakah LAD in kumpuan atana a neih “Taimakna” chu theihtawp chhuaha bawhzui turin fuihna thu a sawi bawk.
District Board rorel pawimawh zualte:-
1. General LAD Conference Salem, Churachanpur a awm turah District LAD Zaipawl neih
2. General LAD Confe Churuchandpur a neih turah District LAD hmingin Bus hman ni se. District in a kal man chanve a tum bak a kal turten tum ve bawk ni se.
3. Gen. LAD Kum puan Taimakna bawhzuiin kawngah Bial tin ten theihtawp chhuahin inelna thianghlim neih nise. Kumpuan hma la tha lawmman 1-3 thleng siam ni se. a tehfung tur Dist. OB te lo ruahman se.
4. Thuthlung zirna bu Pastor Lalruatkima Fanai siam chu chhungkaw Maicham neih rualin thlakhatah vawi 1 tal zir thin nise.
———-
Biak in hawng:
NM Dist Secrectary Rev. K. Lalduhsanga chuan hruaitute ruahman angin March ni 26, Pathianni khan Assam Mission Field-a awm Milita biak in chu Lal Isua hmingin a hawng, He Biak in hi Boro kohhrante lawina niin; Biak in hawn ni hian Field hrang hrang atangin kohhran member 300 chuang an kalkhawm a, kohhranhote an hlim hle. He Biak in hi NMD Kohhranpui ten an sak sak a ni. Militha hmun hi Guahati a tangin km 200 leh tlem a hla a ni.
———-
SUNDAY SCHOOL ZIRTIRTU PUALIN TRAINING NEI:
Hqrs. Bial chhunga Local 5-ah March ni 26 Pathian ni chawhnu dar 1:30 Pm khan Bial SS rorel bawhzuiin Zirtirtu pualin training neih a ni. Training-ah hian thupui Teaching Techniques, Leadership leh Dicipline neiin Resourse Person ten hneh takin zirtirna an pe a, kohhranhote’n an hlawkpui hle.
Training Resource Person-ah hian Upa Lalkamlova Rokhum, Upa Lallawmkima, T.Upa Lalthlengliana, Evan. Lalchhuanmawia Sailo leh Upa C. Lalnunmawia te hman an ni.
———-
KOLASIB RENGTEKAWN BIAL :
PANGBALKAWN BETHLEHEM VENGAH KOHHRAN A DING THAR TA: Vawiin Dt 26.3.2023( Pathianni) hian, Rev Chhiarpuia ,District Superintendent chuan Pangbalkawn Bethlehem Kohhran ding thar puanna hun a nei a, mi thar -8 lawmluhna hun nei nghalin ,Superintendent hi mi -3 in an rawn ṭawiawm a ni.
Pangbalkawn Bethlehem vengah hian Pangbalkawn local Missions Department leh Bialtu Pastor ,Rev C.Lalthlengliana hmalaknaa rawngbawlna neih niin, Dt 18.3.2022( Inrinni zan) khan mi thar -12 chu Rev C.Lalthlengliana bialtu Pastorin Lalpa Isua hmingin a lawmlut a, Vawiin Dt 26.3.2023( Pathianni) hian Rev Chhiarpuia District Superintendent chuan Mi thar -8 ( chhungkaw -3) chu Lalpa Isua hminga lawm lut lehin, Bethlehem area a Kohhran member sa -21 nen tunah hian Member- 41 awmin ,Vawiin Dt 26.3.2023( Pathianni ) vek hian Rev Chhiarpuia ,District Superintendent chuan Pangbalkawn Bethlehem kohhran ni turin Lalpa Isua hmingin a puang ta a ni.
Pangbalkawn Bethlehem veng hi Bru awmna veng a nih avangin , District Missions Department in hma an rawn la chhunzawm dawn a , chumi hmaa Kohhran ding thar lo enkawl turin , T.upa C. Lalnuntluanga chu Bial hmingin Thla khat chhung atan rawih rih a ni dawn a ni
Heng mite hian , Kohhran ding thar tan thilpek an pe a,an chungah kan lawm hle-
1.District Kohhranpui – Khuang
2.Bial Kohhranpui – Minute bu leh Cash book
3. Bial L.A.D – Hmeichhe Lukhum -25
4.Pangbalkawn Local Missions Department- Thingpui in no
5.Rev C.Lalthlengliana te chhungkua – Kohhran hla bu, Puitling Zirlaibu,Nilai zan Thupui, File
He Kohhran ding thar puanna inkhawm ah hian, Pangbalkawn local L.A.D leh Pangbalkawn local P.Y.D ten Thingpui ruai an buatsaihsak bawk a ni
Bial chhung aṭangin Bial Kohhranpui hruaitute leh Bial Department hrang hrang hruaitute an kal ṭha hle a, Pangbalkawn kohhran chuan BiakIn kharin a rawn inkhawmpui bawk a, a lawmawm takzet a ni
———-
TLANGSANG LOCAL AH MITHAR 1 BAPTIS KOHHRAN ATANGIN LALPAN MIN PE E:
Tlangsang Local ah mi 4 in Isua hmingin Baptisma an Chang a. An zing ah hian Baptis nu mithar awmin. Zan lamah an fa te Isua hnenah hlan a ni.
———-
KAWNPUI BIAL LEH BIAL DEPARTMENT HMACHHAWP ṬHENKHAT
Kawnpui Bial Sunday School hmalaknain, Naupang Talent Contest nei tura inruahmanin A hun atan April 1, 2023 an ruahman, a hmun atan Hortoki a ni ang a, indoor leh Outdoor, Nileng leh zan hman tur a ni ang.
Mission Department ten Zomuantlang tlawh turin ruahmanna an siam a, a hun atan Dt. 14-16 April, 2023 an ruahman bawk.
Kawnpui Bial PYD te chuan 28-30 April, 2023. Hian Bualpui ‘N’ Venglai-ah Sports Meet cum revival nei turin an inbuatsaih mek bawk , Hetih mek lai hian Bial huapa khuang vuak training nei tura inbuatsaih mek bawkin A hun atan May ni 5 a ni ang a, Trainer atan Rev. Sanghleia Sailo hman a ni dawn a ni. A hmun atan Kawnpui venglai a ni ang.
———-
WORK CAMP NEI DAWN:
Dt 10/4- 15/4/23 chhung hian Chawlhhmun Kohhran Mission Dept te chuan Bawngva hmuna Tirhkoh Quarters tur sa turin Work Camp neih an rel a, District Missions hruaitute an lawm hle. Chawlhhmun Kohhran Missions Dept te hi Quarters sa tur hian an phur tawh hle.
———-
Thilpek pe:
March ni 28, 2023 thawhlehni khan Damdiai Biak in sakna tura hmanraw mamawh tak Silpouline chu Upa H.Lalbuatsaiha te chhung Bawngkawn te chuan a thar hlak 2 Damdiai kohhran tan a pe
Tin, Evan Zorema Hlondo, Kolasib Venglai Bial Secy te chhungkua atangin Damparengpui Kohhran tena an mamawh em em Silpouline Damparengpui kohhrante pawhin an dawng a, kohhranhote an lawm hle.
———-
Kawnpui Bial PYD te fehchhuak:
Kawnpui Bial PYD te chuan NMD Missions Dept. enkawl Bukvannei PP tirhkoh Qrtrs-a hman atan ṭhutthleng nalh leh tha tak an pe a, kohhranhote leh Dist. Missions hruaitute an lawm hle.
———-
Biak in sa turin ruahmanna kal mek:
NMD District Missions Board ruahman angin Mamit bial chhunga awm Damdiai Biak in thar sa turin Pastor Bial 16 te chuan ruahmanna an kalpui mek a, Bial hrang hrang te pawh an phur hle. Damdiai Biak in sa tur hian Dinthar Bial Convener niin Biak in sakna tur chak hrang hrang te pawh lakkhawm mek zel niin; Balu leh rod te pawh a hmunah dah peih a ni tawh bawk.
———-
———-
AIZAWL EAST DISTRICT
Pastor transfer leh lak tharte lakluhna, induction neih a ni:
Aizawl East District Board in Pastor an awmna hmun a sawn leh lak tharte lakluhna, induction hetiang hian April 2, Pathianni hian hmun hrang hrangah neih a ni dawn. Pastor lakluhna inkhawm hi April 2, Pathianni chawhma hian neih tura ruahman a ni. Pastor lakluh turte la lut tu turte:
Rev C.Lalengliana, Thingsulthliah Bial chu Rev. Vanlalfela Ramtiam
Pastor K.Lalhmingmawia, Serchhip Dinthar Bial chu Rev. C.Lalmalsawma
Rev C Laldintluanga, Thuampui Bial chu Rev. Zohmingthanzama
Pastor K. Vanlalhlimpuia, Khawlian Bial chu Rev. H.Lalropuia
Pastor V. Lalnienga, Suangpuilawn Bial chu Rev. R.Malsawma
Pastor Laltlanhlua Hnamte, Upper Republic Bial chu Rev Rohmingliana
Rev T. Lalbiakliana, Bethlehem Bial chu Rev. R.Lalhawia
Rev B Lalengzauva, Saitual Bial chu Rev. KVL.Hmangaihkima
Pastor C.Lalchhuanga, Serchhip Bial chu Rev VL.Hnemtluanga
Pastor V. Kamneihthanga, E. Lungdar Bial chu Rev Rosanga Kawlni
Pastor C.Lalropuia, Ngopa Bial chu Pastor R Lalfamkima’n lakluhna a nei dawn bawk a ni.
Bialtu Pastor an awm hmun sawn te hian March 31, Zirtawpni khan an awmna hmun thar hi an pan hlawm a ni.
———-
Puanthui zirna hawn a ni:
March 31, Zirtawpni Dar 11 khan District Hqrs. Biak In-ah Aizawl East District LAD ten puanthui zirna an buatsaih, Tailoring centre chu hawnna neih a ni. Sis. Zionparmawii B/W, District LAD President chuan kaihruaiin Rev R.Laltlankima, District Secretary in hunserh a hmang a, Tailoring Centre hawnna leh thusawina Rev KVL. Hmangaihkima, District Superintendent chuan a nei a ni. He hunah hian Sis R.Lalramsiami, B/W, District LAD Secretary chuan Tailoring centre din a nih dan leh hmalakna hrang hrang report a pe a ni. Sis F.Lalhriatchungi chuan Pathian fak hla sa in General LAD aiawh, North Mizoram District LAD bakah District Department hrang hrang atangin thusawi tawi ngaihthlak a ni bawk. Aizawl East District LAD ten puanthui zirna an buatsaih, Tailoring centre hawnnaah hian Aizawl khawpui chhung atangin LAD member engemaw zat an kalkhawmin Rev C.Lalmalsawma, District PYD President chuan tawngtaiin hun a titawp a ni.
Kum 2022 District LAD Conference Zohmun-a neih chuan Tailoring Training Centre din ni se a tih angin District hruaituten chak takin hma an laa, tunah hawn theih a ni ta a ni. Puanthui zirtirtu tur atan hian Sis Lalramnghahchhani, Bethlehem chu lak niin a zirtur, 1st batch atan hian Bial hrang hrang atangin mi 10 lak an ni bawk. April 4.2023 hian class an kal tan anga thla 6 chhung an zir dawn a ni.
———-
Pastor Quarters hawng:
March 30, Ningani chawhnu dar 1 khan Suangpuilawn Bial Pastor Quarters sak thar chu hawnna neih a ni. Quarters hawnna hi Rev H. Lalropuia, District Treasurer chuan neiin inkhawm tawi Bialtu Pastor Laltlanhlua Hnamte chuan a kaihruai a, Quarters sak dan report a pe bawk a ni. He hunah hian Bial chhung atangin Kohhran member engemaw zat kalin hlim takin hun an hmang a ni.
———-
Mithar:
March 26, Pathianni khan Zemabawk North Bial LAD Inkhawmpui hmanna, Falkland East Kohhranaah chhungkaw khat, member 3 chu Kohranah sengluh an ni.
Facebook