GENERAL HRUAITUTE PROGRAMME:
General Treasurer Rev. Lalmalsawma Sailo chuan July ni 2 Pathianni chawhnu hian Aizawl East District Oneness Theological Seminary (OTS) Graduation Day Progrramme, Armed Veng South a neihah telpuiin, Graduate te Certificate hlanna a nei ang.
———-
LITERATURE & PUBLICATION BOARD
June ni 27 Thawhleh ni khan UPC North East India Literature & Publication Board chuan General Headquarters Committee Room, Mualpui Salem Veng, Aizawl ah thu khawmin Kum 2023 Beirual thupui zir tur ” Ramthim rawngbawlna” tih Rev. K. Satinvela a ziak chu Edit na an nei.
———-
GENERAL SUNDAY SCHOOL EDITTING BOARD
June ni 28 Nilai ni khan UPC North East India Sunday School Editting Board chu General Headquarters Committee Room, Mualpui Salem Veng, Aizawl ah thu khawm in Kum 2024 North East India UPC Puitling Sunday school zir tur ” Thuhriltu leh Hla thlankhawmte” tih Rev. K. Malsawmtluanga ziak chu Edit na an nei.
———-
———-
CHHIMTUIPUI DISTRICT
MI THAR 6 LAWM LUT:
June ni 25 Pathianni zing khan Pastor V. Lalhlimpuia Sangau Bialtu chuan Sangau I Local Church a lawi turin Chhungkaw khat member 6 awmna chu UPC North East India Kohhran ah a lawm lut.
———-
KUM CHANVE EXAM NEI:
June ni 25 Pathianni khan Siaha West Bial Naupang Sunday School Department ten Local hrang hrangah kum chanve (Half yearly) exam an nei. Siaha West bial te hian an Bial din tirh Kum 2022 atang khan Naupang S.S Department kum chanve exam hi an neihpui thin a, hlawk thlak an tiin neih chhunzawm zel turin ruahmanna an siam a ni.
———-
CRUSADE HLAWHTLING TAKIN NEI MEK:
Chhimtuipui District, Meisatla Local ah June ni 3 a tang khan zan tin Crusade neih chhunzawm zel a ni a, Evan. N. Thanghnuna rawngbawlna kal tlang hian Thlarau malsawmna nasa tak thlengin mi 30 velin Thlarau baptisma an chang tawh a ni. Chawimawina vawi 2 awm tawhin July ni 1 Inrinni hian Meisatla Local Secretary, Upa Lalrothuama te chhungkua chuan Pathian chawimawina an nei leh dawn a ni.
———-
INTLAWHTAWN PROGRAMME HLAWHTLING TAKA HMAN A NI:
June ni 23-25 chhung khan Bualpui Ng Bial LAD te chuan South Lungpher Local tlawhin programme hlawhtling tak a hman a ni a, Pathian thuchah tha tak tak bakah, Zaipawl leh mal zai thiam tak tak te ngaihthlak thin a ni bawk. S. Lungpher Local te hian mikhual te pualin June ni 24 (Inrinni) khan tisa ruai tuihnai tak an buatsaih bawk a ni.
———-
PASTOR QUARTERS SA MEK:
Sangau Bial Pastor Quarters chu sak chhunzawm mek zel a ni a, a chung pawh (Dynaroof) khuh zawh tawh niin, Pastor Quarters hi 47feet leh 34 feet a lian tur a ruahman a ni, District Kohhranpui atangte, Bial sum leh mimal thahnemngai te thilpek tling khawm atanga sak a ni.
———-
ABS ZIRLAITE ZINGAH THLARAU THIANGHLIM MALSAWMNA THLENG:
Kumin 2023 hian, Chhimtuipui District Pathian thu zirna Apostolic Bible School ah Bial hrang hrang atangin zirlai 22 an awm mek a. Tun tum Meisatla Local a hlimna thleng, an chhimna atangin zirlai mi 3 in Thlarau thianghlim baptisma an dawng thar a, siamthar lehna chang mi 4/5 vel lai zirlaite atang hian an awm bawk a ni. Ni 26.6.2023 (Thawhtanni) leh Ni 27.6.2023 (Thawhlehni) a, class an kalnaah Chapel Service an hmanna atangin Thlarau malsawmna thar a thleng leh a, Thlarau lam hla te nen hun hmangin ABS zirlaite zingah hian malsawmna a thleng mek zel a, zirtirtute pawn kumin a zirlaite chungah hian beiseina sang tak an nei a ni.
———-
———-
LUNGLEI DISTRICT
OFFICE LUAHLUH PROGRAMME HMANG :
June ni 26 Thawhtanni khan United Pentecostal Church, Lunglei District Office thar chu luahluhna neih a ni a, hemi pual hian programme hman a ni.
He hun hi District Secretary Rev.C.Lalrintluanga chuan a kaihruai a, District Treasurer Rev.PC.Lalfakawma chuan lawmthu sawina neiin, report hrang hrang a pe a, District Superintendent Rev.C.Vanlalena chuan lawmthu sawi tawngtaina a neih bakah Building sak bultan dan leh hmalak dan Report hrang hrang a pe bawk. Hemi hnu hian sawm bikte hnen atangin thusawi ngaihthlak chhunzawm a ni a, District Missions Director Rev.C.Lalhriatpuia chuan tawngtainain he hun hi a titawp a ni.
Office thar luahluhna Programme ah hian Office Staff-te bakah Pensioner, District Board Members thenkhat leh District Department hrang hrang hruaitute an tel a ni.
Lunglei District UPC Office Building thar hi Ni 8 February 2017 khan a hunlaia District Superintendent Rev.R.Lalrosanga chuan lungphum phumin a sak bul tan a ni a, kum 6, thla 4 leh ni 18 sak anih hnuah luah luh a ni a, hun remchang hmasa berah a hawnna hun hi buatsaih a ni ang.
———-
IN KANG TANPUINA PSM IN HLAN:
Bro.J. Rualkhuma, Hauruang Local-te In chu June ni 24, Inrinni zan dar 11 vel khan a kang a, June ni 25, Pathianni chawhnu khan PSM Chairman Rev.PC.Lalfakawma chuan kang tuarte tanpuina atan hian PSM in dan a an lo neih angin Rs.5000 a hlan bakah hnatlang thingpui in nan Rs.2000 YMA Present hnenah a hlan nghal bawk.
———-
SANA LIAN PE:
June ni 27, Thawhlehni khan Headquarters bial PYD hruaitute chuan Office-a tar turin SANA lian tha tak mai District Superintendent Rev C. Vanlalena hnenah an hlan.
Headquarters bial PYD-te chungah District hruaitute an lawm hle a, Office thar luahluh a ni a, tul leh mamawh hrang hrang an la ngah avangin Office tana thilpek an dawng hi an lawm hle a ni.
———-
MI THAR
June ni 24, Inrinni zan khan Zehtet Missions Field, Zehtet Local-ah Chhungkaw 1, Member 2 BBC (Bru Baptis Church) atangin, Zehtet Local-a lawi turin lawmluh an ni. Heng mi thar lawm luhte hian Baptisma an chang nghal bawk.
Lawmluhna leh Baptisma rawngbawlna hi Home Missionary Evan. R. Lalrokhawma chuan a nei a ni.
———-
———-
NORTH MIZORAM DISTRICT
HRUAITUTE HUN HMAN:
Supdt., Secy & Treasurer: June ni 27 Thawhlehni khan NMD PYD te board District board District Committee Room-ah neiin, District hruaitu pathum Rev. Chhiarpuia, Dist. Supdt., Rev. K. Lalduhsanga, Dist. Secretary leh Rev. C. Lalthantluanga, Dist. Treasurer te chuan hovin meeting hi an neihpui.
Secretary: District Secretary Rev. K. Lalduhsanga chuan Pentecostal School of Ministry zirna kalpui mekah June ni 26 atanga June ni 30 zirtawpni thleng zirtirna pein Camping Centre sakawrtuichhunah hun a hmang ang.
District Missions Director: Dist. Missions Director Rev. C. Lalramthanga chuan July ni 1 Inrinni zan leh a tuk zing inkhawm Bukvannei PP-ah hun a hmang ang a, July ni 2 Pathianni zan chu Pangbalkawn atanga kohhran indang thar Bethlehem kohhran tlawhin Pathian thuchah a sawi ang.
NMD Outgoing Supdt. Rev. Laltluanga Pension thlahna hun hmang dawn: North Mizoram District Office leh Dinthar Bial kohhran te chuan June ni 30 Zirtawp Ni hian Rev. Laltluanga, Dinthar Bialtu (Outgoing Supdt.) chu a Pension a hun tak avangin; a thlahna hun Dinthar Biak inah hman a ni ang.
———-
PGHSS TEN ZIRLAITE PUALIN SEMINAR NEI:
UPC-North Mizoram District enkawlna hnuaia awm PG Higher Secondary School naupangte pualin June ni 19 thawhtanni chawhnu Dar 1 : 00Pm khan seminar neiin Thupuiah Career & Guidance tih an hmang.
Seminar hi Conference Hall, Kohhran Office chungah neiin, Principal Evan JH Malsawmdawngliana’n kaihruaiin Pathian hnenah inhlanna a neih zawhah program hi tan a ni.
Resource Person-ah hian Pu JH Biakdiktluanga, Municipal Finance Officer, UD & PA hman niin; Resource Person hian Projector nen fiah takin Naupang zirtirna a pe a, hei bakah hian zawhna leh chhanna hunte hmangin Career Guidance Programme hi Naupangte’n hlawkthlak an ti hle. Seminar neih chhung hian Sist Lalfakzuali, Tlangnuam chuan thiam takin zirlai kalkhawmte zaiin a awi bawk. Seminar Programme hi zirlai naupangte bakah Zirtirtute’n an tawiawm vek bawk a ni.
———-
BUALPUI ‘N’ HMARVENGAH MITHAR LAWMLUH A NI:
June ni 18, 2023 Pathianni chawhma leh zan hmang khan Bialtu Pastor Rev. PC Laltlankima Bial fang Programme hmang chuan Bualpui ‘N’ Hmarveng Local tlawhin a hun hman chhungin chhungkaw khat member pathum chu Pentecost kohhranah a lawmlut.
Mithar chhungkua te hi Salvation Army aṭanga rawn lut an ni a, lawmluh rual hian Nau Hlan rawngbawlna neih a ni bawk.
———-
SAILAM PREACHING POINT EVANGELIST QUARTER HAWN A NI TA:
Sailam khua hun engemaw chen atang tawha Pentecost kohhrante’n Lalram din tuma an lo beih tawh leh rawngbawltu engemaw zat an lo dah tawhna hmun Sailam Sialsuk bialah June ni 18, 2023 (Pathianni) kalta khan Tirhkoh Quarters tur hawn a ni.
Quarter hawnna hi Bialtu Pastor Rev.K.Vanlaldika’n neiin Quarters chhun inkhawm hunserh Upa Upa HV. Ramzirliana, Bial Secretary-in a kaihruai a, Financial Report Evan. Sr. Thansanga, Bial Treasurer in a pe bawk.
Hun Hmasa Evan. Lalramthara (Sailo) Sailam Tirhkoh in a hmang a, Pathianthu chah Report leh tuldangte Rev. K.Vanlaldika Bialtu Pastor in a nei a, Inkhawm banah Ruai kilho a ni.
Quarters hawn Programme hmang hian Bial chhung mipui an kal tha hle a, hetiang hi Local tin kal dan a ni:- Sialsuk 52, Chamring 52, Lungsei 48, Samlukhai 14, Sailam 8 niin; an vain mi 174 lai an fuankhawm.
Sailam Quarters hawnah hian Thenzawl Bial atangin pawhin mi thahnem ngai mi engemaw zat ten an tawiawm ve bawk a ni. Sailam Quarters sak puitlin nana Bial sum leh mimal thilpek suma chantir atanga senral zat 1,63,235 lai a tling bawk.
Hetia Sailam khuaa kohhran a din theihna tura mel lung pawimawh tak phuna Quarters neih a ni hi, Sialsuk Bialte chu an lawm hle a, hetiang dinhmun thleng thei tura Sailama lo awm tawh rawngbawltute chungah lawmthu an sawi bawk.
Tun dinhmunah Sailamah hian Sist Chhuanpari te chhungkua members awm mekin Evan Lalramthara (sailo) in Rawngbawlna anei mek a, Kohhran Duhawm tak a din theihnan kohhranhote tawngtaipui an ngen a ni.
———-
TLANGNUAM BIAK IN SAK TUR LUNGPHUM PHUM:
Tlangnuam biak in sak lungphum chu June ni 18, 2023 khan Tlangnuam Bialtu Pastor tanglai Pastor Lalruatkima Fanai chuan Lal Isua hminga phumin; June ni 20, 2023 thawhlehni aṭangin engineer te nen a ban phunna tur an tifel nghal a, hemi kar vek hian Biak in sak hna an tan nghal a ni. Tlangnuam Biak in tur hi A dung 80ft leh a vang 50 ft a sak tura ruahman a ni.
———-
LADIES AUXILIARY DEPARTMENT: NORTH MIZORAM DISTRICT TAILORING COMMITTEE VAWI – 9NA NEI:
June ni 21, 2023 chawhnu dar 2:00Pm khan, NMD LAD hmalaknaa Puanthui zirna Committee chu Sist. Lalzuiliani B/w In, Zonuamah neih a ni.
Meeting hi Sist. K. Lalhmachhuani B/w, Dist. LAD President-in kaihruaiin, District LAD hruaitute an kima, District kohhranpui Puipa pahnih Rev. Chhiarpuia, Dist. Supdt. leh Rev. C. Lalthantluanga, Dist. Treasurer ten an ho bawk.
An Committee rorel pawimawh zual te:
1. Ladies Auxilliary Tailoring Centre-a Zirtirtu lawmman pek thin chu ennawn a tul tawha hriaiin 50%-a tihpun tha tih a ni.
2. Puanthui zirna tur Puanthan zirlaiten hnianghnar zawka an neih theih dan tur sawiin, Batch kal lai mek pualin Puanthan leinan Rs. 20000/- dah tha tih a ni a, hei bakah hian mamawh huna hman theih mai turin Zirtirtu hnenah Rs. 5,000/- kawltir ni se.
3. Overlock khawl pakhat(1) lei belh nise sum neihsa atanga hman ni se.
4. 3rd Batch Exam hun tur leh thlahna hun tur ngaihtuahin, hetiang hian ruahmanna siam a ni.
a) Theory Exam October ni 27 2023 (Fri.)
b) Practical Exam October ni 30 2023 ( Mon )
c) Certificate hlan leh Farewell Programme Oct ni 31, 2023 (Tue)
5. Zirlai 4th Batch lak hun tur leh an tan hun tur hetiang hian ruahmanna siam a ni:
a) 4th Batch atan December 2023 Chawlhkar hnihna atangin Advertisement tih chhuah nise, 20th Jan 2024 thleng dilna thehluh hun hawn nise. 23rd Jan.2024 ah Interview neih nise. 1st Feb. 2024 ah Class tan nise. Course hun chhung hi Thla kua (9 months) nise.
Zir hun chhung leh a hun (Course duration & Period) hi a nghet a neih nise. 4th Batch zul zuia neih thin nise, hetiangin:-
a) Course Duration :- Thla kua (9 Months)
b) Period :- February to October
c) Advertisement chhuah hun :- Kumtin December Chawlhkar hnihna
———-
NORTH MIZORAM DISTRICT HEADQUARTER BIAL PYD BUATSAIHIN THUTHLUNG HLA ZAN NEIH A NI
June ni 26 Thawhtanni zan khan Hqrs. bial PYD te chuan Bial PYD conf rorel bawhzuiin Thuthlung Hla zan Hqrs Local Biak in Tuikhuahtlangah an nei. Prog hi Bial PYD Vice President Bro Zion Ramnghahmawian kaihruaiin Fak hla saa inpawlkhawmin hlim takin hun an hmang a, he hunah hian thusawi tawi 10mins Evan. MS Dawngliana Dist. Missions Treasurer hnen atangin ” Thuthlunga Rinawmna; Nupui pasal neih kawngah” tih leh Evan K. Rotluanga, Dist. PYD Treasurer hnen atangin ” Thuthlunga rinawmna- incheina kawngah tih thu ngaihthlak a ni bawk. Thusawitute thusawi Lalpan mal a sawm a, Thalai kalkhawm Nula leh Tlangval te pawhin hlawkthlak an ti hle.
Inkhawm chhung hian fak hla saa rawngbawlna 1) Sist. Lalfakzuali, Tlangnuam 2) Sist. FC Ramthanzuali, Tuikual S leh 3) Bro. C. Malsawmtluanga, Nursery ten neiin; fakhla satute rawngbawlna pawh Pathian Thlarauvin a awmpui hle bawk.
Programme buatsaih Thuthlung Hla zan tih a nih angin; Thuthlung hla lung tileng tak tak rimawi hmanrua chikimin sak ho a ni a, Programme hman zawh tawh hnu ban hlaa bro. ROdingoiana hla ‘Khawpui mawi’ tih hla sak lain van lam hla sak chhunzawm a ni a, Thlarau boruak duhawm tak lo thlengah khawihnawn leh Siamtharna chang mi thahnem tak an awm bawk.
Thuthlung Hla zan chu Zar dar 11:00Pm-ah kham lo takin Lalpa tawngtaina zirtir sawirualin tin a nita a ni.
———-
CHALTLANG BIAL PYD ZAIPAWL THAR THAWH LEH A NI:
Hripui vanga hun rei tak chawlh anih hnuah Chaltlang Bial PYD te chuan Bial Music Committee bul tum in Bial PYD zaipawl rawngbawlna chhunzawm turin June ni 26 thawhtanni zan khan Chanmari West Kohhran Biak In ah Zaipawl Induction Service neih a ni a.
Bialtu Pastor Rev. P. Vanlalfela’n lawmluhna Prog leh fuihna thu sawiin hun a hmang a, Bial PYD Vice President T.Upa Vanlalpeka Fanai in fuihna thu tha tak a rawn sawi bawk a, Bro. MS Dawngzela, Bial Music Secretary in report te pe in Sis. Brenda Lalremdiki, Bairabi in Pathian fakna hla mawi tak a rawn sa in hun hlimawm tak hman a ni.
———-
FORMER DISTRICT SUPERINTENDENT REV C. LIANCHAMA NMD OFFICE IN RALNA HUN A HMANG:
UPC-NEI: North Mizoram District Office Staff hruaitute leh staff te chuan June ni 26 Thawhtanni chawhnu dar 2:00 khan UPC-NEI, NMD Former Dist. Supt kal chhuak June 4, 2023 a chatuan ram pan ta ralna neih a ni a, hunserh inkhawm Dist Supdt. Rev. Chhiarpuian kaihruaiin, Ralna thilpek Rev. C.Lalthantluanga, NMD Treasurer chuan a hlan.
Ralna inkhawmah hian khawhar chhungte aiawhin Rev. C.Lianchama fapa Bro. C. Lalchungnunga’n lawmthu a sawiin, NMD Secretary Rev. K.Lalduhsanga’n Pathian thuchah sawiin, Khawhar chhungte Thlamuanna leh fuihna thuchah a sawi. Thusawina hun hawnah Rev. C.Lalramthanga dingin khawhar chhungte fuihna thu a sawi a, amah vêk hian malsawm tawngtaina neiin Rev. C.Lianchama ralna hunserh chu tihtawp a ni ta a ni. (Rev. C. Lianchama Ralna)
———-
NORTH MIZORAM DISTRICT PYD KUMPUAN COMMITTEE TEN CENTRAL JAIL-AH RAWNGBAWLNA AN NEI:
N.Mizoram Dist PYD Kumpuan committee ten alo ruahman lawk angin June ni 25 (Pathianni) khan Central Jail-ah rawngbawlna neih niin chawhnu dar 1 atanga dar 2:30 hun pek an ni.
Jail chhunga rawngbawlna Inkhawm hi Kumpuan Chairman Bro. V.Lalneihkima’n kaihruaiin NMD Secretary Rev. K. Lalduhsanga’n Pathian thuchah sawiin- Chhandam kan nih theihna turin Pathian thu hi ngun taka chhut a tul tiin, thuchah a sawi a, rawng an bawlsak ten an ngaithla tha hle. Inkhawm chhungin Sis. F.Lalhriatchhungi Bethlehem leh Sis. Lalhmingmawii Chawlhhmun bial ten fak hla sain inkhawm te an awi a, Evan Lalmuanawma General kumpuan Treasurer chuan tawngtaiin inkhawm a tin a ni, inkhawm ban hnu hian Kumpuan tena ei leh in tur an ken te hlim taka ei leh inin Frooty ₹ 18000 man hu zet sem zawh a nih bakah Kumpuan committee buatsaih Chanchin tha famkim ziahna booklet chhandam nih theihna thu sem a ni bawk.
Kumpuan Commttee ten Jail chhungah mitang ten an Lalpa fak hovin hlim takin hun an hman hnuah inkhawm hi dar 2:40Pm ah bangin Central jail-a Kumpuan Committee tena rawngbawlna an neih chu kham lo takin an tinsan leh ta a ni.
———-
AIBAWK BIAL KOHHRAN HRUAITUTE SEMINAR NEIH A NI:
June ni 25 2023 Pathianni khan Falkawn Kohhran Biak Inah Aibawk Bial chhunga kohhran/department hrang hrang hruaitute pual Seminar neih a ni. Resource Person atan Bialtu Pastor, Pastor PC Lalrokima hman niin, a paper buatsaih ‘Hruaitu mawhphurna leh chanvo’ tih chu zirho a ni. Hlawk tlang taka hman ho a ni.
He Seminar ah hian Bial Department hrang hrang OB, Bial Kohhranpui hnuaia Sub-Committee OB te leh Local tin Church Board OB te an tel a ni. Seminar hi Dar 1:00 pm ah tan a ni a, Evan. C. Zairemtluanga, Bial Secretary in a kaihhruai a, Upa Pazawna, Hualngohmun in hun bul tawngtaina a nei a, Evan. Lalramnunsanga Sailo, Muallungthu Kohhran Chairman in hun tawp tawngtaiin a khar.
———-
MEMBER THAR 1 LAWM LUT:
June ni 25 Pathian khan Damparengpui Bial chhunga awm Tuipuibari Center Kohhranah Seventh Day atang Pentecost kohhrana lawi turin member thar duhawm tak pakhat Lal Isua hmingalawm luh a ni a, Tuipuibari Centre-a thawktu Upa Vanlalruatan mithar lawmluh rawngbawlna a nei a ni.
———-
SUNDAY SCHOOL SEMINAR MAMIT BIALAH NEIH A NI:
District Sunday school Department hmalakna in Inrinni kal ta June ni 24 khan Mamit H/S veng kohhranah Seminar neih a ni a, Resource Person atan Pastor Lalruatkima Fanai (Director District Sunday School Department) hman a ni.
Seminar hi T.Upa Lalpianpuia (Director Bial Sunday School Department) in kaihruaiin zing Dar 10:30 a.m ah tan a ni. Bialtu Pastor, Pastor Vanlalruata thusawi tura sawmin bialtu pastor hian chibai bukna leh lawmthu a sawi a, Seminar tur Pathian hnenah hlanna a nei nghal bawk.
Resource person Pastor Lalruatkima Fanai hnen tangin seminar paper zirho niin 1st Session ah Sunday School chanchin leh Sunday School zirtirtu pawimawhna leh mawhphurhna tih thupui zirho a ni a, 2nd Session-ah Sunday School Teaching Technique tih chu zirho leh a ni.
Peper zir zawh hian zawhna leh chhanna hun pawimawh tak neih ho leh a ni bawk.
Seminar hi Bial kohhran hrang hrang Headquarters Kohhran, Luangpawl Kohhran, Bawngva P.P leh H/S Veng Kohhran atangin an kal a ni.
———-
CHALTLANG BIAL PYD ENVIRONMENT COMMITTEE TE THING PHUN:
Green Mizoram Day (June,11), 2023 pualin Chaltlang Bial PYD Environment committee te chuan June ni 24 Inrinni khan Committee rorel bawhzuiin, Calvary Bible College (CBC), Compound, Mualpui Aizawlah thingphunna (Tree Plantation) hun an nei.
He hunah hian thingphun hmain programme tawi hman a ni a, Bro. Daniel PZ Liana Vaiphei, (Chairman, Environment Committee) chuan programme kaihhruaiin Sis. Lalruatdiki (Committee Member) in ṭanna hun a hmang a, Dr. Lalrammuana Sailo (Environment Protection Committee PYD NMD/Secretary, Chaltlang Bial PYD) hnen aṭangin thusawi tawi ngaithlain, environment pawimawhna leh hlutna te a sawi.
Hunserh hman hnu dar 11:45 A.M aṭangin thingphun tan a ni a, dar 2:15 ah zovin, Thing ṭiak 40 lai phun a ni. Heng thing an phun te hi mau hmangin rinawm takin an hung nghal bawk.
Chaltlang Bial PYD Environment committee tena an thing phun te:
i) April Par ( par sen leh a pawl) – 28
ii) Vaube – 3
iii) Lenhmui – 3
iv) Theihai – 6 an ni.
———-
SAIHAPUI ‘K’ : KOLASIB RENGTEKAWN BIAL:
June ni 24 Inrinni zan khan Kol Rengtekawn Bial Saihapui ‘K’ Kohhran ah Wesley Methodist Church aṭangin Chhungkaw -1 ( member-4) awmna chu Pentecost kohhrana lawi turin Rev C.Lalthlengliana Bialtu Pastor chuan Lalpa Isua hmingin a làwm lut a, hetih rual hian Nau -2 hlan nghàl a ni bawk. Heng mithar te hi kohhranhote’n Lal Isua hmingin an lo lawm a ni.
———-
SHORT FILM COMPETION- SIAM DAWN:
United Pentecostal Church of North East India, North Mizoram District PenNet Committee chuan District huang chhunga Media hmanruate tangkai zawka hman a nih zel theih nan “Midia in a nghawng” tih thupui hmangin SHORTH FILM COMPETITION a buatsaih daw a, he intihsiaknaah hian tel vek turin PenNet Committee chuan NMD huam chhung kohhran mipuite a ngen a ni.
He intihsiaknaah hian Film title atan thupuiin a tum hawi zawng duh ang hman theih a ni anga, hetiang hian Lawmman an buatsaih bawk
1st Price – Rs. 30000.00
2nd Price – Rs. 20000.00
3rd Price – Rs. 10000.00
Consolation Price Rs. 2000.00 a thehlut zinga mi vannei panga (5) tan an buatsaih bawk dawn a ni. Film rei zawng tur atan minute 15 atanga 20 inkar bituk a ni a, Video te en theiha fiaha siam tur niin, khur leh en hahthlak lutuk pawm a ni dawn lo a ni. Short film a Audio te hriat theiha siam tur a ni ang a, tawng ri hriat theih ngei a ni tur a ni. Tin, Short film siam tur hian UPC, North Mizoram District member, Department, Bial, Local, Group leh thianho hming pawhin a siam theih dawn bawk a ni. Short film video hi October ni 31, 2023 (Thawhlehni) ral hma in thehluh tur a ni a anga, Short Film video hi PenNet North Mizoram District Youtube channel-ah Nov. ni 6 ah upload tur niin; Video te hi Like in 10% judge point a keng tel dawn a ni. Film siamte’n NMD Office PenNet Secretary Evan. M.S.Dawngliana hnenah thehluh tur a ni ang a, Result puan hun hi Short Film Implementing Committee in a ngaihtuah leh dawn a ni.
———-
RENGDIL LOCAL PMD TEN MUALTHUAM WEST TIRHKOH QUARTERS SAK SAK:
Rengdil Bial Pentecostal Mens Department te chuan an bial chhunga kohhran dingthar Mualthuam West –a Tirhkoh awm chenna tur quarters tha tak workcamp in an sak sak.
Mualthuam West hi North Mizoram District Missions Department enkawl niin; he hmunah hian Bro. Vanlalsawma chuan awm chilhin kohhranhote a enkawl a, Kum 2022 khan Sist. J. Lalmuankima leh a hote’n rawngbawlna neiin; kohhran din a ni ta a ni.
Mualthuam west-ah hian Biak in sak zawh thawkhat tawh niin; District Missions bungraw lei sa hmangin Rengdil Local PMD te hian June ni 1 khan a ban leh beam lehlanga siamin bul an tan a, Ni 22 chhungin Tirhkoh chenna tur quarters tha tak hi an peih a ni. Quarters sak nan hian tha 99 sengin, June ni 22 khan Mualthuam West tirhkoh hian a luahlut nghal a ni.
Rengdil PMD te hian work camp in Mission Field tan Biak in leh quarters hi hmun 10 laiah an lo sa tawh a ni.
Mualthuam quarters- a dah tur hian Rengdil Bial LAD te chuan thuthleng sei 3 lai an pe bawk a ni.
———-
———-
AIZAWL EAST DISTRICT:
OTS Graduation Day:
July 2, Pathianni chawhnu Dar 1 hian Bazar Bial, Armed Veng Biak Inah kum 2023 Session-a OTS zirlai pass chhuakte pualin Graduation Day hman a ni dawn. He hun hi Rev.KVL.Hmangaihkima, Principal chuan kaihruaiin Graduate Confering & Certificate hlanna, Rev.Lalmalsawma Sailo, General Treasurer chuan a nei dawn bawk a ni. OTS Graduation Day hmanaah hian District Kohhranpui hruaitute bakah District Department hrang hrang hruaitute an tel anga, Result puanna, Pastor Laltlanhlua Hnamte, Secretary Theological Education Board chuan a nei ang. Kumin-ah hian mi 8 ten an Graduate dawn a ni.
———-
Kum chanve Board:
June 30, Zirtawpni khan District Committee room-ah District PYD Kum chanve Board tluang taka neih a ni. Rev.C.Lalmalsawma, President chuan kaihruaiin Bial atang leh Official atangin agenda lut engemaw zat ngaihtuah a ni. District PYD Board-ah hian Board member an tel kim thawkhat a, District Kohhranpui hruaitute pawhin an telpui bawk a ni. Karleh-ah an rorel kimchang tihchhuah a ni ang.
June 29, Ningani khan District LAD te chuan District Committee room-ah District Board tluang takin an nei bawk a, Sis. Zionparmawii B/W, President chuan a kaihruai a ni. He hunah hian District Kohhranpui hruaitute pawhin telpuiin Bial atang leh Official atanga agenda lut te an ngaihtuah a Kum 2024 District LAD Budget an thlirho bawk a ni.
———-
Pentecostal Choir Re-Union nei:
Aizawl East District PYD zaipawl, Pentecostal Choir member hlui leh ni lai mekte pualin June 29, Ninga zan khan Verdant Multipurpose Hall, Laipuitlangah re-union hlawhtling taka neih a ni.
He hunah hian Rev KVL. Hmangaihkima, District Superintendent chuan tawngtaina hun hmangin member boral sunna, Rev H. Lalropuia, District Traesurer chuan a nei a ni. Thusawi tawi Rev C. Lalmalsawma, District PYD President chuan neiin Pentecostal Choir batch hrang hrang ten fak hla an sa bawk a ni. Choir member hlui atangin Evan K. Lalmuansanga chuan thusawina nei bawkin Female Voice leh Male Voice ngaihthlak a ni bawk. He hunah hian Pentecostal Choir member ni lai mek bakah lo ni tawhte an kal tha in hlim takin hun an hmang a ni.
———-
Thuthlung puanchhuahna hun hmang:
June 26, Thawhtan zan inkhawm ban khan Serchhip Bial PYD Kumpuan sub committee buatsaihin Thuthlung puan chhuahna hlawhtling taka neih a ni. He hun hi Electric veng Biak in tualzawl-ah neih niin Kumpuan campaign hmalakna kalzelah Mike service neih a ni. Speaker atan Evan HK Lalhmangaiha, Full time Evangelist leh Bro. K. Lalchhawnzova te hman an ni. He hunah kalkhawmte hian hlawkthlak an ti hle a ni.
———-
Mithar leh baptisma chang thar:
June 24, Inrinni zan khan Bethlehem Vengthlang Kohhranah chhungkaw khat, member 4 chu Bialtu Pastor, Rev. T. Lalbiakliana chuan Kohhranah sengluhna a nei.
June 24, Inrinni zan vek khan District Evangelist. Evan H. Lalremhlua rawngbawlna kaltlangin Hnahlan Bial, Vapar hmunah member pakhat sengluh a ni bawk.
June 25, Pathianni khan heng hmunahte hian mithar sengluh an ni bawk.
District Hqrs. Kohhran, Ramhlun South-ah mithar 2 Rev KVL. Hmangaihkima, District Superintendent chuan sengluhna a nei.
Serchhip Bial, Ngentiang Evangelist area, Thinglian ah Mithar 3 sengluh an ni. Ngentiang Area ah hian District Evangelist Evan H Lalhmingmawia’n rawngbawlna a nei mek a ni. Heng Mithar te hian Isua hmingin Baptisma an chang nghal a ni
Ngopa Bial, Damaska kohhrana lawi turin member 15 chu Bialtu Pastor, Pastor C Lalropuia’n Lalpa Isua Krista hmingin a senglut. Anni hi Manipur buaina avanga Ngopa khuaa awm nghet tura lo chhuk an ni a, Manipurah chuan Kohhran danga lawi an ni.
Zemabawk Bial, Bungbangla Kohhranah ah member 14 sengluh an ni. Member thar te hi Manipur ram buai avanga raltlante an ni a, Manipur lamah chuan Kohhran danga lawi an ni. Bungbangla ah hian Evan Thangneihsanga’n rawngbawlna a nei mek a ni
Khawruhlian Bial, Khanpui Kohhran ah mithar pahnihin pahnihin Kohhranah sengluh niin Bialtu Pastor Hmingchungnunga kutah sual ngaihdamna baptisma an chang nghal a ni. Khanpui ah hian District Evangelist Bro Malsawmdawnga leh a team ten rawngbawlna an nei a, Baptisma rawngbawlna hi Pastor Hmingchungnunga’n a nei a ni.
Darlawn Bial, Sawleng ah Manipur atanga Raltlan alo lut te, Member 8 chu Sawleng Kohhran a lawi turin Pastor i/c Evan R Vanchhunga’n a senglut. Heng member sengluh te hi UPC member ni sa lo pemlut 5 leh Kohhran dang atangin Mi 3 an ni.
Falkland Kohhranah Evan H Malsawmthanga rawngbawlna atangin mithar pakhat sengluh a ni bawk.
District Evangelists Evan Ramhuapliana rawngbawlna Kawlkulh Bial, Chhawrtui kohhranah Member thar pakhat sengluh a ni bawk. Inkhawm banah Baptisma khur hawn zui a ni a. Member thar leh kohhran ni sa in Isua hmingin Sual ngaihdam nan baptisma an chang nghal a ni.
———-
Sunday School Seminar:
June 25, Pathianni chawhnu khan Upper Republic Kohhran Sunday School Department chuan Puitling leh Naupang zirtirtute pualin Seminar buatsaih a ni. Seminar-ah hian thupui pahnih zirho a ni a. Teaching Skills chungchang Upa C. Zahnuna paper buatsaih leh Psychology chungchang Bro. Johny Lal?hafamkima paper te zirho a ni. He hunah hian kal an tha in hlawhtakin hun an hmang a ni.
Facebook