GENERAL HRUAITUTE PROGRAMME:
General Treasurer Rev. Lalmalsawma Sailo chuan June ni 1 atanga ni 4 chhung hian Chhimtuipui District, Siaha Bial Rawngbawltu retreat, Siaha tla Kohhran a neih chu hman puiin, resource personah a tang ang.
General Sunday School Director, Rev. Biaksangzuala chuan June ni 4 Pathianni hian Tlangsang Bial, North Mizoram District ah Sunday School Seminar & Retreat neihpuiin rawngbawlna a nei ang.
———-
LITERATURE & PUBLICATION BOARD
May ni 31 Nilai ni khan UPC North East India Literature & Publication Board chuan General Headquarters Committee Room, Mualpui Salem Veng, Aizawl ah Kum 2023 Beirual thupui zir tur Edit na an nei.
Literature & Publication Board Chairman Rev. Zohmingthanzama kaihhruaiin Editting hi neih a ni a, kummin 2023 a UPC North East India Beihrual Thupui zir tur hi ” Ramthim rawngbawlna” tih niin Rev. K. Satinvela’n a ziak a ni.
———-
UPC NEI GENERAL HEADQUARTERS TLAWH
May ni 31 Nilai ni khan North Vanlalphai Bial Church Board member te chuan UPC North East India General Hqrs. Office an tlawh.
North Vanlalphai Bial Church Board member te hi an Bialtu Pastor B. Lalhmingliana hovin Kohhran hmunhma pawi mawh leh CBC Building sak mek te bakah Aizawl a District Office awmte tlawh turin member 11 an rawn thawk chhuak a ni. General Office ah hian General Hruaitu ten lo dawngsawngin in kawmkhawmna hun hman a ni a, Kohhran hmalak na hrang hrang leh hmachhawp neihte report ngaih thlak a ni bawk. North Vanlalphai Bial Church Board member te hian General Hqrs. Office tan thil pek tha tak an pek bakah CBC Building sak meka a tul anga hman a tan sum an hlan tel bawk a ni.
———-
———-
CHHIMTUIPUI DISTRICT
DISTRICT SS BOARD NEI:
May ni 19 2023 khan Chhimtuipui District Committee Room ah District S.S Board neih a ni a, Board hi Evan. John District Director chuan kaihruaiin, General Sunday School Director, Rev. Biaksangzuala’n a telpui a ni.
Thu rel tlangpui:
1. Home Missions field bikah Puitling ten June atangin Doctrinal zirlaibu zir se, naupang zir tur chu home missionary ten lo thlang bawk se. Heng an zirlaibu turte hi a thlawn a pek nise.
2. Dist S.S Conf in Mara tawng in Doctrinal zirlaibu lehlin nise a lo tih chu letling tura ruat Evan.V.John chuan a lehlin zawh tawh avangin Rbt.S.Vabeima Siahatla Local chu computer a chhut luh leh a bu siam te pawh min lo buaipui tura ngen nise.
3. Sunday School campaign hi Dist hruaitu ten General hruaitute be rawn in campaign nei turin ruahmanna lo siam se.
4. Zirlaibu hlui Office a awm te chu tih ral nise. A tih ral dan tur leh tul leh pawimawh lo buaipui turin Dist S.S Secretary leh Treasurer te ruat an ni.
5. Zirtirtu training hi kumin chhung hian bial tinah neih ngei tura hmalak nise. A neih dan tur chu bial tinin ruahmanna lo siam se. Zir tur hi General Director in June thla chhung in lo siam fel tura ngen nise.
———-
EVANGELICAL TOUR HLAWHTLING TAKA NEIH A NI:
Chhimtuipui District Official te ruahmanna a, Sangau I Local, Lungtian Local, Archhuang Local leh Vawmbuk Local te a, Evangelical Tour nei a rawngbawlna chu a hlawhtlingin Pathianin mal a sawm hle a, Lungtian a rawngbawl a fehchhuak Evan.G.Lalnunzira leh Evan.Lalthafamkima te rawngbawlna kal tlangin May ni 22 Thawhtanni khan Lungtian Local Chairman Upa H.Vanchunga te chhungkua in Pathian chawimawi na neiin hun hlimawm tak hman a ni.
———-
THLARAU THIANGHLIM DIL TAWNGTAINA NEI:
May ni 28 Pentecost Day ni khan Chhimtuipui District rorelna bawhzuiin, Thlarau thianghlim la dawng lo ten an dawn a, Thlarau malsawmna thar a thlen theih nan Local tinah chawnghei tawngtaina neih a ni.
———-
HOME MISSIONARY RETREAT NEI:
May ni 30 thawhleh ni khan District Committee Room ah Home Missionary Retreat neih a ni a, Home Missionary te an tel kim vek thei a ni.
He hun hi first leh second session a hman niin first session hi Rev.Lalhnehchunga District Missions Director in a kaihruai a, Rev. Dr. C. Sihmo Pensioner (Senior Pastor) in “Practical Ministry” thupui a hmangin zirtirna a nei a ni. Second session ah Rev. Kholy Hlychho District Treasurer chuan kaihruaiin, Rev. Joseph L.Thlauhthang District Superintendent chuan “Ministerial Ethic” tih thupui a hmangin zirtirna a nei bawk, sawihona te neiin hlim tak leh hlawhtling taka hman a ni. Tlai lam Rev. Lalhnehchunga District Missions Director te chhungkua in Home Missionary te pual a chawhlui an buatsaih chu hlim taka kilhona neih nghal a ni.
———-
APOSTOLIC BIBLE SCHOOL KAL TAN LEH DAWN :
Chhimtuipui District Bible school, Apostolic Bible School chu June ni 1, 2023 Ninga ni atang khan kal chhunzawm leh a ni a, Apostolic Bible school kal turte hian May ni 31, 2023 Nilaini Zing dar 10:30 khan District Committee Room ah interview an nei a ni..
———-
———-
LUNGLEI DISTRICT
PBS TAN A NI DAWN :
June ni 1 Ningani atang hian Lunglei District UPC in thla khat awh Pathian thu zirna a neih Pentecostal Bible School (PBS) chu kal tan a ni leh dawn.
Kumin PBS ah hian 1st Year ah mi 12, 2nd Year ah mi 4 leh 3rd Year ah mi 6 (an vain mi 22) an kal dawn a, Subject 5 an zir dawn a ni.
June ni 1, chawhnu dar 2 hian District UPC Conference Hall-ah Registration Day hman a ni dawn a, he hun hi Principal Rev.C.Vanlalena chuan a kaihruai ang a, inhmelhriattirna leh thusawina PBS Dean Rev.PC.Lalfakawma chuan neiin zirtirtute atangin thusawi ngaihthlak a ni ang a, zirlai hruaitu tur thlanna neih chhunzawm a ni ang a, he hun hi PBS Registrar Pastor K.Lalnunpuia chuan tawngtainain a titawp ang.
PBS hian July ni 2 Pathianni hian Graduation day an hmang ang.
———-
CEC SUNDAY :
June ni 4 Pathianni hi Lunglei District UPC in a enkawl School, Christian Education Centre (CEC) Sunday a ni a, kohhran ni pawimawh a ni.
June ni 4 Pathianni zing inkhawmah hian District chhunga Local hrang hrangin CEC School pual hian thilpek an la khawm ang a, heihi CEC School ah chhunluh a ni ang.
CEC School-ah hian Kg-I – Class XII zirna a awm mek a, kumin session ah hian tun thlengin Student 270 vel an awm mek a, Hostel-ah hian Student 64 an awm mek bawk. Tun ah hian CEC School ah hian zirtirtu 20, non teaching 5 an awm a ni.
Kum 2016 atang khan CEC School-ah hian Higher zirna hawn tan a ni a, 2017 atangin Class XII hi hawn chhunzawm a ni. Higher-ah hian Political Science, Education leh Geography zirnate a awm a ni.
———-
———-
NORTH MIZORAM DISTRICT
DISTRICT HRUAITUTE PROGRAMME:
North Mizoram District hruaitu 3 Supdt. Rev. Chhiarpuia, Secretary Rev. K. Lalduhsanga leh Treasurer Rev. C. Lalthantluanga te chuan Pentecost School of Ministry (PSM) Graduation Day June ni 1 hian, District Camping Centre Sakawrtuichhunah an hmanpui ang.
NMD Supdt. Rev. Chhiarpuia chuan thawhlehni kalta May ni 30 khan Thenzawl Bial kohhrante tlawhin, Thenzawl Bial Pastor Quarters sak mek a hmunah a enpui bawk. Hei bakah hian Dist. Supdt. Hian June ni 2 Zirtawpni khan Kanghmun Bial Pastor quarters sak a hmunah a en bawk.
———-
CHANMARI WEST BIAK IN LUAH LUT:
May ni 21 Pathianni khan, UPC –NEI ten kum 27 chuang zet kohhranin harsatna a tawh avanga an luah tawh lo Chanmari UPC Biak in chu, Supreme Court-in a neitu a chian tak hnuah NEI-UPC Chanmari West kohhran te chuan an luah lut leh.
Biak in luah luh Progamme hi Chaltlang Bialtu Pastor Rev. P. Vanlalfela’n kaihruaiin, he inkhawmah hian Chaltlang Bial chhung bakah Bial dang dang atangin kohhran mi thahnem tak an pungkhawm a, heng zingah hian N.Mizoram District Puipa pathum Rev. Chhiarpuia, Dist. Supdt. Rev. K. Lalduhsanga, Dist. Seceretary leh Rev. C. Lalthantluanga, Dist. Treasurer te bakah Aizawl East Dist. Atang pawhin rawngbawltu pawimawh tak tak ten inkhawmpuiin, hlim takin hun an hmang a ni.
Chanmari West Biak in luahluh inkhawmah hian NMD Supdt. Rev. Chhiarpuia’n Pathian thuchah sawiin, Dist. Hruaitu pahnih Rev. K. Lalduhsanga leh Rev. C. Lalthantluanga te pawhin Chanmari West kohhran te lawmpuina leh duhsakna thu an sawi bawk a, hei bakah hian rawngbawltu pawimawh tak tak ten thusawi pawimawh tak tak an sawi bawk.
———-
PENNET COMMITTEE NEI:
May ni 23 thawhlehni chawhma dar 11:00 khan, UPC-NEI, North Mizoram District chuan an District Media Cell Pentecostal Network hmalak zel dan tur chungchangah Meeting neiin; Rev. C. Lalthantluanga, Dist. Treasurer in meeting a kaihruai a, Dist. Supdt. Rev. Chhiarpuia’n a ho bawk.
Meeting thurel pawimawh zingah Media rawngbawlna hmasawn zelah PenNet bungraw mamawh lei ngai awm Video, Still Cam etc leh a kaihhnawih thil te lei nise an ti a, Hun remchang hmasa berah North Mizoram District huapin Media Training neih an rel bawk. Hei bakah hian PenNet buatsaihin thupui leh Zirtir nei Short Film siam-a intihsiakna District huap neih nise tih a ni bawk a, hemi chungchanga hma lo la turin Implementing Committee siam nghal a ni. Chairman atana Evan. MS Dawngliana niin, Secretary-ah Bro. Johny Lallawmkima te an ni.
———-
KOHHRAN DING THAR BETHLEHEM KOHHRAN TLAWH:
May ni 22 thawhtanni khan Kol Rengtekawn Bial chhunga awm Pangbalkawn kohhran atanga Kohhran ding thar Bethlehem Kohhran te District Missions hruaitute’n an tlawh.
Bethlehem kohhran dingthar te hi District kohhranpuite chuan District Missions Dept te enkawl turin mawhphurhna a pe a. Bethlehem kohhran te enkawl hna hi District Missions kutah a awm a ni. Dist. Missions Exe Committee rorel angina Bethlehem kohhranah hian rawngbawltu Bro. Jonathana Bualpui chuan June thla atangin rawngbawlna a nei nghal dawn a ni.
May ni 22 khan Bethlehem Kohhran te tlawh hian Director Rev. C. Lalramthanga leh Dist. Missions Treasurer Evan. M.S Dawngliana te fehchhuakin Kohhrante’na biak in leh Quarters hmun hma tura an lo zawn te a hmunah an enpui bawk.
District hruaite pahnih hian Bethlehem kohhran ten Lalpa Maicham an buatsaihna hmun te tlawhin tawngtaina neiin kohhranhote hi an tinsan a ni. District Hruaitute hi Pangbalkawn kohhran leh Bethlehem kohhran hruaitute’n lo dawngsawngin tukthuan an lo buatsaih sak a ni.
May ni 22-ah vek hian District Missions hruaitute hian Rengdil Bial Sihthiang Missions Field-a Biak in leh quarters sak dan tur ruahmanin Sihthiang hmun an pan nghal a, tihtur tul hrang hrang te an ti bawk. Sihthiang Biak in hi North Mizoram District Missions Dept. Bial 16 tena an sak tur niin; Hqrs Bial Missions Dept kaihhruaiin hma an la dawn a. Sihthiang hmunah hian District Missions hruaitute ruahmanin hmarua leh tul pawimawh te a hmunah dah fel a ni tawh bawk.
———-
THIANGHLIMNA CAMPAIGN RUNPUI NEI:
Kawnpui Bial Thianghlimna Committee buatsaihin, May ni 21, 2023 Pathianni chawhma inkhawmah, bial chhung local hrang hrangah THIANGHLIMNA CAMPAIGN RUNPUI neih a ni. Hemi rual hian zuk leh hmuama fihlim tura intiamna ‘Signature Campaign’ neih nghal a ni bawk.
‘Zuk leh hmuamin kan taksa a tihchhiat theih dan te; tihchhin a pawizia leh, kan inthiar fihlim thiam a pawimawhzia bakah chhunglama thianghlim hi pawnlamah a lang chhuak tur a ni’ tih sawiin local hrang hrangah an fehchhuak hlawm a ni:-
Kawnpui Bial Thianghlimna comt te hian Thianghlimna Campaign kumin chhungin ṭum 4 tal nei turin ruahmanna an siam.
———-
THILPEK PE:
May ni 28 Pathianni khan Sialsuk bial Chamring local LAD te chuan Sailam preaching point kohhran tlawhin Sist Chhuanpari te chhung tan Gas cylinder pakhat an pe.
———-
SAILAM KHUA UPC EVANGELIST QUARTER SAK ANI:
Hun rei tak chhung Sailam khuaa kohhran din tura hmalak a nih hnuah Samlukhai khuaa Crusade neihah Evan. C. Lalruatsanga rawngbawlna kaltlangin a hmasa ber atan Sailam mi Sist. Chhuanpari chuan Pathian thuthlung hmuin Pentecost kohhran an chhungkuain an zawm a. Pentecost boruak kal chho zelah May ni 26 leh 27 hian a hmasa ber atan Sailamah Pentecost rawngbawltu Quarters sak tan a ni.
Tunah hian Evan. Lalramthara Sailo chu District rawihin rawngbawlna a nei mek bawk a ni.
———-
PASTOR QUARTER-AH HNATLANG:
Kohhranin harsatna a tawh avanga kum 27 chuang zel Kawnpui Pastor quarters luah tawh loh chu Supreme Court-in NEI-UPC a pek let leh avangin quarters chhung leh a vel tih fail eh compound hung hnatlang neiin may ni 27 May 2023 Inrinni khan Bial PYD bultumin bial huap hnatlang neih a ni. Hnatlangah hian Local hrang hrang atangin Member thahnem tak thawkchhuakin, a chhehvel tihfai leh compond hung that bakah kum 1993 a phun, kohhran buai avanga cheithat loha hunrei tak awm tawh, Bial PYD Silver Jubilee Lungphun cheithat nghal a ni bawk.
———-
———-
AIZAWL EAST DISTRICT:
Pentecost Day:
May 28, Pathianni khan Pentecost Day a nih angin District chhunga Tualchhung Kohhran hrang hrangte chuan hlim takin hun an hmang. Pentecost Day-ah hian District atangin a hman dan turah ruahmanna hranpa siam ni lovin Church Board Committee ten an remchang angin Programme an ruahman a, tualchhung Kohhran thenkhat chuan awmni khamin Pathianni chawhma, chawhnu leh zan hun an hmanga, Tualchhung thenkhat chuan Pathianni chawhma leh zan hun an hmang bawk a ni. Tisa lam ruai theh an awm laiin tualchhung Kohhran thenkhatah chuan thingpui leh chhang ruai an theh bawk a ni. Pentecost Day-ah hian Speaker hranpa nei an awm laiin Tualchhung Kohhran hruaituten thusawi rawngbawlna nei an awm bawk a ni. Pentecost Day denchhena Pathian hnena lawmthusawi chawimawina nei an awm bawk a ni.
———-
OTS Opening function neih a ni:
May 31, Nilaini khan Kumin 2023 Session atan OTS Opening function District Committee room-ah hman a ni. He hun hi Rev KVL. Hmangaihkima, Principle chuan kaihruaiin Report & Announcement, Pastor Laltlanhlua Hnamte, Secretary- Theological Education Board chuan pe in District hruaitute leh Zirtirtute atangin thusawi tawi ngaihthlak niin Rev. R. Laltlankima, District Secretary chuan huntawp tawngtaina a nei a ni.
Kumin Session atan hian OTS hian June 1, Ningani atang khan Class an tan nghal a, Kumin OTS-ah hian zirlai 30- 1st Year-ah zirlai 13 awmin 2nd year-ah 9 leh 3rd year-ah 8 awmin, Rev.Rosanga Kawlni, Rev. Vanlalfela Ramtiam, Rev. VL. Hnemtluanga, Pastor Laltlanhlua Hnamte leh Rev.C.Lalmalsawma ten zirtirna an pe thin ang.
———-
District PYD OB ten N. Vanlaiphai Bial tlawh:
May 20 atanga 21 chhung khan District PYD hruaitute chuan ruahmanna an lo siam tawh angin N. Vanlaiphai Bial tlawhin hun hlimawm tak an hmang. District PYD Hruaitute Rev. C.Lalmalsawma, President, Evan Dr. R. Vanlalpeka, Secretary leh Evan K. Lalbiaknunga te kalin May 20, Inrinni zan leh 21, Pathianni chawhma kha N. Vanlaiphai khaw chhung Kohhran thumah an insem darh a, Hqrs. Kohhranah Rev. C.Lalmalsawma chuan rawngbawlna neiin Rawlkhang Kohhranah Evan Dr. R. Vanlalpeka’n hun hmang bawkin Leilet Kohhranah Evan K. Lalbiaknunga’n rawngbawlna a nei bawk a ni. May 21, Pathianni chawhnu leh zanah khan N. Vanlaiphai Bial Hqrs. Kohhranah Bial huapin hun hman chhunzawm niin Chawhnu hunah Evan Dr. R. Vanlalpeka hnen atangin thuchah ngaihthlak a ni a, zan lamah Rev C. Lalmalsawma’n rawngbawlna a nei leh bawk a ni. District PYD hruaituten N. Vanlaiphai Bial an tlawhnaah hian Sis. Vanlaltluangi, Serchhip Dinthar chuan tawiawmin zaia rawngbawlna a nei thin a ni.
District PYD hruaituten N. Vanlaiphai Bial an tlawhnaah hian Bial chhung atangin PYD member an kalthain hlawktakin hun an hmang a ni.
———-
District Kohhranpui hruaituten rawngbawlna nei:
Aizawl East District Kohhranpui hruaituten ruahmanna an siam angin May 20, Inrinni zan leh May 21, Pathianni khan Bawngkawn Bial-ah rawngbawlna neiin hun an hmang. May 20, Inrinni zan khan Bawngkawn Kohhranah hun hmangin Rev KVL. Hmangaihkima, District Superintendent chuan thusawi rawngbawlna a nei a ni. May 21, Pathianni chawhma khan Peniel Kohhran, Bawngkawn South-ah rawngbawlna nei lehin Rev R. Laltlankima, District Secretary in thusawina a nei a, Pathianni zanah Ramhlun Vengthar Kohhranah Rev H. Lalropuia, District Treasurer in thusawina a nei bawk a ni. District hruaituten hun an hmannaah hian Kohhranpuiin hma a lakna hrang hrang report ngaihthlak thin ni bawkin hlim takin hun an hmang a ni.
Aizawl East District Kohhranpui hruaitute hian Aizawl khawpui chhung Bial hrang hrangte tlawh tawhin Thuampui Bial, Zemabawk Bial leh Zemabawk North Bial te remchang hmasaberah an tlawh leh dawn a ni.
———-
Kohhran puitlingah hlangkai:
Bawngkawn bialin kum 2017 August thla atanga Ramhlun Sports Complex khaw thar hmuna rawngbawltu a rawih atanga a kum nga (5) naah Preaching Point Kohhran te tia kohhranin a lo kalpui mek chu 21st.May.2023 Pathianni chawhnu khan bialtu Pastor Rev. Vanlalfela Ramtiam kaihhruaina hnuaiah District Superintendent Rev. KVL Hmangaihkima chuan Kohhran puitling ah hlan kaina a nei a ni.
Kohhran hmingah UPC Ramhlun Sports Complex tih vuah a ni. Kohhran puitlinga hlan kai inkhawmah hian District Superintendent hi District Secretary leh District Treasurer ten tawiawmin, anni hnen atangin Kohhran thar te fuihna thu tha tak tak ngaihthlak a ni bawk. Hemi hunah hian bial chhung atangin Tualchhung tin kohhran hruaitute leh bial member te an tel tha hle.
Bialtu Pastor Rev. Vanlalfela Ramtiam-in UPC Ramhlun Sports Complex Kohhran hruaitu tura a lo form tawh Upa Deacon 3 tur te leh Tual Upa 2 tur te chu District Superintendent hian hriak thih tawngtai sakna nei nghalin a nem nghet nghal bawk a ni.
———-
Rawngbawltu pual Seminar nei:
May 21, Pathianni chawhnu khan Bethlehem Bial Kohhranpui buatsaihin Rawngbawltu pual Seminar, Hermon Biakinah hlawhtling taka neih ani a, mi 80 chuang an kalthei a ni. Kohhranhote an hlimin, hlawk an intitlang hle a ni. Evan. Lalchhuanmawia Zote, Bial Treasurer chuan kaihruaiin Seminar Thupui:- Rawngbawltu (Hruaitu) pawimawhna leh Rawngbawltu (Hruaitu) mawhphurhna tihte chu Resource Person: Rev.T.Lalbiakliana, Bialtu Pastor hnen atangin ngaihthlak a ni.
———-
Revival Crusade nei:
District Revival team ‘Healing Ministry te chuan May 13 atanga 21 chhung khan Kawlkulh Bial Vankal ah rawngbawlna an nei a. Vankal kohhran ten an hlawkpui hle. Zantin inkhawmna neih thin niin Kohhran dang atangin inkhawm chhimtu an awm tam reng a, Speaker Rev. H. Vanlalchhana hnen atangin thusawi ropui tak tak ngaihthlak thin a ni. June 22, Thawhtanni khan Kawlkulh ah chhuk thla in Kawlkulh Vengthar kohhran ten PYD inkhawm zanah PYD kaihhruaina in inkhawmpuina neih a ni.
———-
District Missions hruaituten Missions Field-ah rawngbawlna nei:
Aizawl East District Missions Department hruaitute chuan General Missions Field hmun hrang hrangah rawngbawlna an nei. May 22, Pathianni khan Arunachal Missions Field chhunga Mechuka Biak in sak tura tih chu hmalak dan tur ruahman turin Aizawl East District Missions Department hruaitute an kal.a, Biak In thar sakna tur lungphum chu Rev VL Hnemtluanga’n a phum nghal a, Biak In sakna bul tan nan Rs.3,00,000/-(Nuaihthum) hlan nghal a ni bawk.
May 25, Ningani khan District Missions Department hruaitute hian Upper Assam & East Arunachal Missions Field tlawh nghalin thliin a tihchhiat, Boikunthapur Biak In chu an tlawh nghal a, Field Director lehkohhranho ten lawm takin an lo dawngsawng a ni. He Biak In hi Aizawl East District Missions Department ten Project-a an neih niin Biak In hi sak nghal ni se an ti a. Biak In sakna atan Rs 3,00,000/-(Nuaihthum) chu Field Director, Rev James Lowrence hnenah an hlan nghal a ni.
May 28, Pentecost Day khan Dimapur Missions Field a Paklangso Biak In thar chu, Rev. VL. Hnemtluanga’n hawnna a nei nghal bawk a ni. Biak In hmun hi Upa. Jimmy L. Renthlei Thuampui in Rs 35,000/(sing thum leh sang nga) in a leina a tum a ni. Biak In sak na tur tanpuina hi , Aizawl East Dist. a tang in Rs 2,70,000/ (nuai hnih leh sing sarih) pek a ni a. Bethlehem local Missions Dept. ten Work camp in an sa a ni. Field chhung a thawk tu Director leh thawktu dang ten theih tawp chuah in tha an seng a, a ropui hle. Biak In hi 34×20 ft. a zau a ni a. Kohhran member hi Sawmthum leh paruk an awm a ni.
———-
N.Vanlaiphai Bial ah LAD seminar leh crusade neih a ni:
May 26 atanga 28 chhung khan N.Vanlaiphai Bialah Seminar leh Crusade neih a ni. He hun hmang tur hian District LAD atangin President Sis.Zionparmawii leh Vice President Sis.Lalramliani Sailo te an lo kal a, Bro.H.Vanlalhruaia’ n a tawiawm bawk. May 27, Inrinni-ah N.Vanlaiphai Headquarters Biak Inah taimakna, chhungkaw maicham, thianghlimna leh buhfaitham tih thupui hmangin seminar neih a ni a, District hruaitute pahnih resource person ah hman an ni. Bial chhung atangin seminar hmang mi 46 zet an kal khawm thei a, hruaitute inpekna a ropuiin member kal ten hlawkthlak an ti tak zet a ni. Pathianni zan thlengin Lungkawlh Biak Inah Crusade hi neih chhunzawm a ni. He crusade chhung hian kohhran member mi 8 in Bialtu Pastor kutah sual ngaihdamna baptisma an chang bawk a ni.
———-
Mithar leh baptisma chang thar:
May 27, Inrinni zan khan Keifang Kohhran ah Member 32 sengluh an ni. An zinga member 20 te hi member thar an ni.
District Evangelist Bro. Lalzuisanga rawngbawlna Kawlkulh bial Dulte ah Pathianni hmasa a lakluh tak fate pahnih phir chu May 28, Pentecost day khan sengluhna neih leh a ni. An pahnih hian bialtu Pastor R. Lalfamkiman hlanna a nei nghal a ni.
District Evangelist Lalhruaizela rawngbawlna kaltlangin May 28, Pentecost Day Sakawrdai Bial Vaitin Local-ah baptisma khur hawn a ni a, mi 7 in (Kohhran member nisa) thluthlung hmu tharin Isua hmingin baptisma an chang.
May 28, Pentecost Day Chawhma lnkhawm-ah khan Bethlehem Kohhranah mithar 3 Kohhranah sengluh an ni.
Khawruhlian local-ah Pentecost day pualin Evan H.Lalhlimpuia’n rawngbawlna a nei a, Pathianni Chawhma inkhawm banah mi 2 in Evan H.Lalhlimpuia kutah baptisma an chang a ni.
Evan Ramhuapliana District Evangelist rawngbawlna Kawlkulh Bial Chhawrtui kohhran ah Pentecost day khan mi 3 in Evan Ramhuapliana kutah baptisma an chang.
May 28, Pentecost Day khan Mualpui Bial Salem veng Kohhranah chhungkaw khat member 3 chu sengluh an ni. ITI Kohhranah Evan C Lalremruata chuan Pentecost Day-ah rawngbawlna neiin Kum 78 mi chuan Thuthlung hmu thar in Isua hmingin Baptisma a chang bawk a ni.
Pentecost Day khan Evan Lalremhlua rawngbawlna, Vapar hmunah mi 2 in sual ngaihdamna baptisma an chang.
May 28, Pathianni hmang khan Chhingchhip PYD te chuan Maite Kohhran tlawhin hun hlimawm tak an hmang. Speaker ah Chhingchhip Bialtu Pastor HP Ramfangzauva hman a ni. He hunah hian mithar pakhat Pathianni zan khan Pastor HP Ramfangzauva’n sengluhnna a nei nghal a ni.
———-
Hruaitute Programme:
Rev. KVL. Hmangaihkima, District Superintendent chuan Pathianni hmang hian Hliappui Kohhrana Bible Seminar an neihah Resource Person-ah tangin rawngbawlna a nei a, ruahmanna ang chuan June 5, Thawhtanni-ah Aizawl a let leh ang.
Rev H. Lalropuia, District Treasurer chuan June 3, Inrinni khan Sialhawk Biakin sak thar hawnna a nei a, Pathianni-a a lawmna hmanah rawngbawlna a nei chhunzawm nghal a ni.
Rev VL. Hnemtluanga, District Missions Director chuan Sialhawk Biakin hawnnaah telpuiin Pathianni chawhma hian thusawi rawngbawlna a nei ang.
Facebook