General hruaitute Programme:
General Superintendent Rev. Lalmalsawma Sailo, General Missions Director Rev. R. Lalhawia, General Missions Treasurer Evan PC. Lalrokima te chuan North Bengal leh Sikkim Missions Field tlawhin rawngbawlna an nei mek a, June ni 28, Zirtawpni hian Aizawl let turin ruahmanna an siam.
General Superintendent hian Central District Board thutpuiin Seminar a neihpui nghal dawn a, ruahman dan chuan July ni 5, Zirtawpniah Aizawl a let ang.
General Treasurer Rev. Zohmingthanzama chuan June ni 21, Zirtawpni khan Aizawl chhuahsanin Delhi a pan a, Delhi ah hian Pastor awmtur Pastor Jerry Lalmuanawma Induction Service a nei dawn a, Thawhtanni thleng hun hmangin; June ni 25, Thawhlehniah Aizawl a let ang.
——
Hnatlang :
June ni 18, Thawhlehni khan General Hqrs Office Staff te chuan General Hqrs Office Compound chhungah thingphun hnatlang an nei.
Office Staff te hian Kum dangah pawh General Hqrs Office compound chhungah hian thing chi hrang hrang an lo phun tawh thin a, a theih anga enkawl zuiin engemawzat chu a puitling tawh a ni. Tun tum hian Herhse, Chawmzil, April par, Tlaizawng, Vaube te phunin tihfai hna an thawk nghal a; nilengin an hnatlang a ni.
——
Zin chhuak :
Lunglei District Missions Director Rev.R.Vanlalenga chuan June 17 thawhtanni khan General Missions Field-a biak in hawng turin Lunglei a chhuahsan.
Biak in hawng tur hian General Superintendent Rev.Lalmalsawma Sailo leh General Missions Director Rev.R.Lalhawia te nen an kal a, June 22 inrinniah N.bengal Missions Field-a Kumarpara biak in chu General Superintendent Rev.Lalmalsawma Sailo chuan a hawng ang. He biak in hi Lunglei District-a Pu TC.Jonunsanga te chhungkua, Venglai Local a lawi ten an sak a ni.
N.Bengal Missions Field-a Tulsipara biak in pawh June 23 hian Lunglei District Missions Director Rev.R.Vanlalenga chuan a hawng ve leh bawk ang. He biak in hi Lunglei District Missions Department ten an sak a ni.
——
CEC School :
June 14 zirtawpni khan Lunglei District enkawl Christian Education Center C.E.C. School board neih a ni a, School hmasawnna tur thu pawimawh tak tak ngaihtuahin; Board hian C.E.C.School Higher zirtirtu atan Bro.Biaksangpuia Sailo S/o Sailothanga Sailo, Chanmari a la thar.
—-
PCD :
June 23 Pathianni hian Pentecostal Children Department (PCD) Lunglei District hruaitute chuan Mualcheng S Local-ah Campaign an nei dawn a, chawhma leh zan inkhawm naah PCD hruaitute hian PCD pawimawhna an sawi ang a, chawhnuah Mualcheng S PCD te nen fellowship an nei ang.
Campaign hi Rangte N leh S ah neih tawh niin, Mualcheng S bakah hian Hnahthial khaw chhunga Local hrang hrangah Campaign hi neih leh a ni ang.
—-
Delhi Chaplain :
Pastor Jerry Lalmuanawma, Delhi Chaplain Deputation a kum 2 chhung kal tur chuan June 15 khan a hna a zawm a, June 23 Pathianni hian Delhi Local church biak inah Rev. Zohmingthanzama, General Treasurer in Induction Service a nei ang.
——
Seminar :
June 23 Pathianni hian Hnahthial bial Sunday School Department hmalaknain Tuipui D Local-ah Seminar neih a ni dawn a, Resource Person atan District Sunday School hruaitute hman an ni ang.
—–
Financial Campaign :
June 16 Pathianni khan Cherhlun bial S.Chawngtui Local-ah Financial Campaign neih a ni a, hetah hian bialtu Pastor K.Lalnunpuia, bial Secretary Rbt.Lallianzama leh Rbt.Relsanga ten Campaign hi an nei a, June 23 Pathianni hian Khawhri Local-ah Campaign hi neih a ni leh ang.
—–
Mi thar :
June 16 Pathianni khan Chhipphir bialtu Pastor LH. Lalchhandama chuan Chhipphir Local-ah Pentecost Kohhrana lawi turin member thar 5 kohhranah a senglut.
—-
Account Traning :
June 16 Pathianni khan Lunglei Electric Local-te chuan rawngbawltu, upa, Tirhkoh leh Department tin Executive Committee member-te tan Account Training an buatsaih a, Resource person atan District S.S. Director Evan.F.Lalhmangaiha chu an hmang.
——–
Mi thar :
Chhimtuipui District, South Lungpher bial Lungtian localah June ni 16, Pathianni khan Dist Suptd Rev.Thanchunga Sailo chuan mithar-1 Pentecost Kohhrana lawi turin Kohhranah a senglut.
Dist superintendent hian June ni 15-16 chhung khan Lungtian localah rawngbawlna a nei a ni.
—-
District hruaitute fehchhuak :
June 15-16 chhung khan Chhimtuipui Dist Secretary Rev.Joseph L Thlauhthang chuan Cheural localah rawngbawlna a nei a, Dist Treasurer Rev.WL.Thanghre chuan South Lungpger localah rawngbawlna a nei thung.
——
Rawngbawlin fehchhuak :
June ni 14-16 chhung khan Siata I local chuan Laki local tlawhin an fehchhuak a,
He hun hmang hian Siata a?ang member 51 an thawk chhuak a, Tuipang bialtu Pastor.Robin.MH.Lalthanmawia chuan a telpui a ni.
June ni 17, Thawhtanni khan Laki local te hian Pathian hnena lawmthusawi chawimawina an buatsaih a, Kohhran hoten hlim takin hun an hmang.
——-
Revival Crusade :
Chhimtuipui District Revical Pastor C.Lalchhuanthanga, Dist Evangelist N.Thanghnuna leh Sist Hmangaihpari te chuan June ni 15 atang khan Tuipang L ah rawngbawlna an nei a. Pathianni zana tiak mai tura an inbuatsaih laiin June ni 17 atang khan Tuipang L local te hian Revival crusade an buatsaih chhunzawm a, Revival Pastor leh Dist Evangelist te hi speaker ah ruai chhunzawmin thuthlung humhalhna lam thupuiah hmangin rawngbawlna an neih chhun zawm a ni.
—–
Lungphum phum :
June ni 17, Thawhtanni khan Sangau bialtu Pastor.K.Kawngkharmawia chuan Pangkhua Biak In sakna tur lung aphum.
—–
No Tobacco Day :
June ni 30, Pathianni khian Chhimtuipui Dist PYD chuan No tobacco Day a hmang dawn.
Dist PYD Conference vawi-42 chuan zuk leh hmuam dona atana a ruahman No tobacco to PYD bawhzuina tura he programme hi ruahman niin; zuk leh hmuam do na kawnga nasa zawka tha a thawhna tur atan ruahmanna hrang hrang a siam a, zuk leh hmuam dona lam hawi slogan, signboard ah ziakin bial tinah an thawnchhuak a, khawchhung hmun remchang laiah tarin chak takin hma an la. Sign Board siamna atan hian mi inphal te atangin hetiangin thilpek an dawng :
1. Sis.Elisia VT Suidangi(VT Agency)- Rs.3500
2. Bro.C.Lianhmingthanga re nupa (Students book store)-Rs.3000/-
3. Bro.B.Lalrinchhana te nupa (LS.Computer house)-Rs.3000/-
4. Upa.C.Liangnghinga te Nupa(C.Sangi Tailoring)- Rs.3000/-
Heng thilpek petute chungah hian District PYD chuan lawmthu a sawi a ni.
——
Tihdam rawngbawlna :
Rev.Lalhmingthanga chuan tunlai hian Dist Hqrs Local, New Siaha ah tihdam rawngbawlna a nei kal mek a, kohhran leh khawtlang huapin he rawngbawlna hian ngaihhlut a hlawh hle.
——
Trainers Training :
June 16, Pathianni chawhnu Dar 1:30 khan Aizawl East District PYD te buatsaihin Aizawl khawpui chhunga Bial PYD OB, Local PYD OB leh District PYD Sub-Committee te tan HIV/AIDS Trainers Training buatsaih a ni.
Trainers Training hi District Hqrs.Biakin, Ramhlun South-ah neih niin Rev R.Laltlankima, District PYD President chuan a kaihruai a, hunserh Evan C.Lalchhuanga, District PYD Vice President chuan a hmang.
He hunah hian MSACS lam atangin Pu Henry Zohmingthanga leh Pi Vanlalruati te chu resource person-ah hman niin resource person te hnen atang hian Kum 1990 Oct atanga Kum 2018 September thla thleng khan thisen singsarih chuang Test tawhah singkhat sangriat chuangin HIV positive an vei thu te, a vei tam ber te hi Sex hmansual vang a nih thute, Kum 25 atanga 34 inkar ten an vei tam ber thute leh HIV positive te hi thinhrik mai lova, hmangaih taka enkawl an pawimawh zawk thu leh Aizawl khawpuiah chauh nilo, Thiangtlang lamah pawh HIV/AIDS hi a hluar viau thu te sawiin nupui pasal neih dawna thisen test a pawimawh thu te ngaihthlak niin India rama HIV/AIDS vei tam ber Population base-a kan nih thute ngaihthlak a nih bakah PYD Member te chu an theihna kawng zawn apianga thawhpuiah an sawm nghal a ni.
Trainers training on HIV/AIDS-ah hian Aizawl khawpui chhunga Bial PYD OB, Local PYD OB bakah District PYD hnuaia Sub-Committee te tel tura tih an nih angin PYD member 130 vel kalkhawmin sawihona hun tha tak neih niin he huna tel te hian hlawkthlak an ti hle a ni. He HIV/AIDS Trainers Training-ah hian Evan F.Malsawmtluanga, District PYD Secretary chuan lawmthu sawiin Rev R.Laltlankima’n malsawm tawngtaiin a titawp a, Pentecostal Choir ten zaia rawngbawlna an nei bawk.
Kum 2018 General PYD Inkhawmpui rorelnain Mizo thalaite zinga HIV/AIDS hluar zel chu veiin General PYD angin chak zawka hmalak ni se a ti a, General PYD chuan District PYD kuta a dah angin Aizawl East District PYD chuan hma chak takin ala chho ta a ni. Tun dinhmunah UPC-Aizawl East District hnuaiah hian Pastor bial 30 awm mekin PYD Member hi sangruk chuang an awm mek a ni.
He hun hmanna kalzelah June 17, Thawhtan zan PYD Inkhawmah khan Aizawl East District PYD in ruahmanna alo siam angin District chhunga Tualchhung PYD te chuan HIV/AIDS chungchang zirhona hlawhtling takin an nei a. He hun hmang tur hian Aizawl East District PYD chuan Tualchhung PYD tinte hnenah ngenna a siam angin Tualchhung PYD te chuan an mahni remchan angin an hmang hlawm a ni. Tualchhung thenkhatah chuan Resource person hranpa te sawmin hun an hman laiin Tualchhung thenkhat chuan thupui sawi bik turte ruatin hun an hmang hlawm a ni.
Aizawl East District PYD Inkhawmpui 2017 neih chuan kan rama HIV/AIDS hluar zel chu veiin hemi kawnga inven a nih theih nan chak zawka hmalak a rel a, General PYD-ah thlen chhoin General PYD Inkhawmpui 2018 chuan District hrang hrangte chu an District chhungah chak zawka hmalak tura a tih angin District hrang hrangte chuan hma an la mek zel a, Aizawl East District PYD pawhin thalaite zingah HIV/AIDS hluar zel chu veiin hetiang hian Tualchhung PYD te chu HIV/AIDS chungchang zirhona/ sharing nei vek turin ngenna a siam ta a ni.
——
Lawmthusawi chawimawina :
June 17, Thawhtanni khan Zohmun Bial, Mauchar Church Board Chairman Upa Lalthaliana te chhungkua chuan Pathian hnena lawmthusawi chawimawina neiin Kohhran hoten hlim takin hun an hmang.
Chawimawina neih chhung hian sual ngaihdamna baptisma mi 4 ten an chang.
June 17, Thawhtanni vek hian Armed Veng South Kohhranah Pathian chawimawina neih a ni bawk a, Speaker-ah Rev H.Vanlalchhana an hmang a ni. Armed Veng South Kohhranah hian June 15, Inrinni khan chawimawina hi neih alo ni tawh a, heti hian tun hnaiah Pathian chawimawina hi vawi 5 an nei ta a, Kohhran hoten hlim takin hun hmangin Speaker-ah Rev H.Vanlalchhana an hmang a ni.
June 22, Inrinni hian Upa Thanghmingliana te chhungkua, Zemabawk Vengpui Kohhran te chuan Pathian chawimawina an nei bawk a, Kohhran hoten hlim takin hun an hmang a ni. He hunah hian Speaker-ah Rev Rosanga Kalwni, District Superintendent chu hmangin Pathianni zan thleng hian Revival Inkhawma hun hman chhunzawm tur niin Rev Biaksangzuala, District Secretary leh Rev Vanlalfela Ramtiam, District Treasurer ten thusawina an nei bawk ang.
June 15, Inrinni khan Darlawn Bial, Sunhluchhip Kohhrana lawi Bro Lalnunsanga te chhungkua chuan Pathian chawimawina an nei bawk a, Kohhran ten hlim takin hun an hmang a ni. Darlawn Bial te hian Sunhluchhip hmunah hian rawngbawl turin Evan Ramnghahmawia chu an ruai mek a, rawngbawltu rawngbawlna Lalpan mal a sawmin inkhawm ngai tawh lo te pawhin Biakin lam pan thar lehin Kohhran hoten hlim takin hun an hmang mek zel a ni.
——
Golden Jubilee lawm :
Aizawl East District, Bethlehem Kohhran LAD te chuan an Kum 50-na, Golden Jubilee lawmna hun buatsaihin, Bethlehem Biakin-ah June 15, Inrinni zan atanga June 17, Thawhtan zan thleng khan an hmang.
June 15, Inrinni zan khan Rev Lalrema, Bialtu Pastor chuan Jubilee hawnna neiin Sis Kaisangi’n Jubilee mei detna a neih bakah Secretary hnen atangin report ngaihthlak a ni a, mi hrang hrang ten thusawina an nei bawk.
Jubilee lawmna hi Pathianni atanga Thawhtan zan thleng khan chhunzawmin Pathianni chawhma-ah Rev Zohmingthanzama, General Treasurer leh Bethlehem LAD Adviser lo ni tawh hnen atangin thuchah ngaihthlak a ni a, Chawhnu-ah Sis.Zionparmawii B/W, District LAD V.President leh Secretary Jubilee Sub-Committee ni bawk chuan thusawina neiin Pathianni zanah Sis Lalthanseii Fanai, Chairman Jubilee Sub-Committee hnen atangin thuchah ngaihthlak a ni bawk.
Jubilee lawmna pui ber chu June 17, Thawhtanni khan hman niin Jubilee Lungphun hawnna Rev Vanlalfela Ramtiam, District Treasurer chuan neiin Jubilee Dar vuakna neih a nih hnuah Biakin chhungah inkhawm chhunzawm a ni. Hetah hian Sis Ronguri B/W, Bethlehem LAD President chuan thuchah sawina a nei a, Chawhnu-ah Sis Lalramsiami, B/W, Asst.Secretary, District LAD chuan Souvenir tlangzarhna neiin District LAD aiawhin Sis Lallianzauvi, Fin. Secretary, District LAD chuan thutawi sawina a neih bakah Hruaitu chawimawina hun an hmang a, tlaiah Jubilee ruai hlim takin an kilho a ni. Pathianni zan inkhawmah khan Pentecostal Choir ten zaia rawngbawlna an neih bakah Rev Rosanga Kawlni, District Superintendent chuan thutawi sawina hun a hmang bawk. Bethlehem LAD Jubilee lawmna hi sawm an nih angin General leh District LAD hruaituten an hmanpui a ni.
Bethlehem Kohhran hi Kum 1961 khan lo dingin LAD te hi June 17, 1969 khan alo ding chho tan ve a, hma chak taka la nghalin an phak ang tawkin sum tuakna te an nei thin a, Kum 2015 atangin Rualbanlo Sunday apiangin Kohhran member Rualbanlote hnenah thilpek hlan thinin an Local atanga Missionary-a chhuak tur te hnenah thilpek an hlan thin bakah Christmas dawnah Kohhran mi Kum 70 chin chunglamte hnenah present an hlan thin bawk a ni. LAD Zaipawl din niin hmun hrang hrangah zaia rawngbawlna an neih thin bakah DDK-ah lengkhawm zai an record tawh bawk a ni. Tun dinhmunah Bethlehem-ah hian LAD member 167 an awm mek a ni.
——
Fehchhuak :
Upper Republic Bial LAD te chuan June 16, Pathianni chawhnu leh zan hmang khan Bethlehem Vengthlang Kohhran te tlawhin hun hlimawm tak an hmang.
He hunah hian Upper Republic Bial LAD atangin member 60 chuang kalin Pathian thlarau thianghlim awmpuina hnuaiah hlim takin hun an hmang a ni. Upper Republic Bial LAD te hian kumin bial LAD Inkhawmpui rorel in Bial pawn fehchhuah nise tia alo rel tawh bawhzuina niin Pathianni Chawhnu-ah Sis Lalhlupuii sailo B/W, President Upper Republic Local LAD chuan Thusawina hun hmangin, Zanah Upper Republic Bialtu Pastor Rev C Lalengliana chuan Pathian Thuchah a sawi bawk a ni.
——
Revival Crusade :
June 15 atanga 17 chhung khan Khawhai bial, Biate kohhranah Revival Crusade hlawhtling taka neih niin Speaker-ah Bialtu Pastor E. Vanlalpeka Zote chu hman a ni.
Speaker hi Bro. R. Lalauva leh Evan F. Zira ten an tawiawm bakah Pathianni khan bial chhung atangin mi engemaw zatin an tawiawm bawk. Evan. F. Zirliana’n Pathian fakna hla hmangin nung takin zaia rawngbawlna a nei a, Pathianin a hmang hle a. A zai leh dawn tih an hriat avangin mi engemawzat an inkhawm phah nghe nghe a ni. Hun reilote Crusade an hman chhungin Pathian malsawmna nasa tak an dawng a, June 21, Zirtawpni khan T.Upa Lalramnghakate chhungkua in Pathian Chawimawina neiin June 19, Nilai zan atanga Pathianni zan thleng hian Crusade hi chhunzawm tura tih a ni.
Upper Republic Kohhranah pawh Revival Crusade hi June 19, Nilai zan atang khan an hmang chho mek a, Speaker-ah Evan R.Vanchhunga, District Fulltime Evangelist chu hman a ni. Evan Lalamena, District Fulltime Evangelist pawhin Petecost Day kha Tualbung hmunah a hman hnuin tunah hian Bawngkawn bial, Ramhlun Sport Complex-ah rawngbawlna a nei mek a ni.
——-
Thianghlimna Campaign :
Aizawl East District Thianghlimna Committee in ruahmanna alo siam tawh angin June 23, Pathianni hmang hian Zohmun Bial-ah Thianghlimna Campaign neih a ni dawn.
He hunah hian District Thianghlimna Committee hruaitute Rev C.Lalengliana, Chairman leh Upa K.Lalhmunsanga, Secretary te hnen atangin thusawi an ngaithla thin dawn a ni. District Thianghlimna Committee te hian chak taka hma la chho zelin hmun hrang hrangah Campaign an lo nei tawh thin a, tunah hian a hlawhtlinna pawh hmuh chhoh mek zel a ni.
—–
Aizawl East District Hruaitute Programme:
Rev Rosanga Kawlni, District Superintendent chuan June 22, Inrinni khan Upa R. Thanghmingliana te chhungkua, Zemabawk Vengpui Kohhran ten Pathian chawimawina-an neihah Speaker-ah tangin rawngbawlna a nei a, Pathianni hian a Bial hmui mek, Mualpui Bial-ah rawngbawlna a nei ang.
Rev Biaksangzuala, District Secretary leh Rev Vanlalfela Ramtiam, District Treasurer te chuan Zemabawk Vengpui Kohhrana Upa R. Thanghmingliana te chhungkua in Pathian chawimawina an neih kal zelah hmanpuiin Pathianni Chawhma hian Rev Biaksangzuala’n thusawi rawngbawlna a nei anga Rev Vanlalfela Ramtiam chuan Pathianni zan-ah thusawina a nei bawk ang.
Facebook