GENERAL HRUAITUTE PROGRAMME:
General Superintendent Rev. R. Lalrinsanga chuan July ni 29 inrinni hian North Mizoram District, Headquarters Kohhran ten Pathian chawimawina an neihah telpuiin Speakerah a tang.
General Secretary Rev. Zohmingthanzama chuan July ni 27 khan Arunachal Missions Field Board, Along a neih chu hmanpuiin Field chhunga kohhran te a tlawh bawk a ni.
General Treasurer Rev. Lalmalsawma Sailo chuan Pathianni kalta July ni 23 khan Samtlang Kohhran tlawhin rawngbawlna a nei a, July ni 30 Pathianni zan hian Tlangnuam Kohhran ah thusawi rawngbawlna a nei ang.
General Missions Director Rev. R. Laichhingpuia chuan July ni 30 Pathianni zan hian Mualpui Kohhran ah thusawi rawngbawlna a nei ang.
General Sunday School Director, Rev. Biaksangzuala chuan July ni 29-30 chhung hian Serchhip khawpui chhungah General Sunday School Department leh National Tobacco Control Programme (NTCP) te tang kawp buatsaih Zuk leh hmuam that lohna thupui hmang a Trainers Training neih turah a tel pui ang.
———-
UPC NEI EXECUTIVE BOARD:
UPC North East India rorelna sang Executive Board vawi 193-na chu July ni 19 – 20, 2023 chhung khan General Heqaquarters Office, Mualpui Salem veng-ah neih a ni.
Executive Board hi General Superintendent Rev. R. Lalrinsanga chuan kai hruaiin Executive Board member-te pawh an tel kim thawkhat hle, he Board ah hian District hrang hrang atanga Agenda lo lut bak ah Manipur buaina chung chang a kohhran hmalakna tur te rel a ni a,
Rorel tlangpuite:
1. MANIPUR BUAINA CHUNGCHANG THU:
Manipur-a Meitei leh Zo hnahthlakte inkara inbeihna lo thleng avangin raltlan mi tam tak an awm. Tun dinhmunah hian Manipur buaina avanga Mitthi zawng zawng 124 an awm a, Lamka lamah hian Relief camp hmun 104 ah awmin In leh lo chan mi 16,163 an awm a. Kangpokpi lam Relief center hmun 60 ah awmin, mi 12,542 zet an awm. Hliam 800 zet awmin, Biak In hal 361, khaw hal 290, In hal sak zat 5,000 a ni. Imphal District chhunga kohhranho tawrhna kan hriat theih chu In halsak In 42, Biak In 4 hal a ni.
UPC NEI chuan Manipur ram chhunga thil thleng mek chu pawi a ti hle a, rawva taka chetna te, mihring zahawmna mualpho taka pholang a, hnam tlem zawkte chunga diriamna leh hmuhsitna lantir a, mihring nunna hlu tak ransa ang maia an chandarh mai nate chu UPC NEI chuan nasa takin a dem a, tun hnuah chuan hetianga mihring nihna leh zahawmna te timualpho zawnga che tawh lo turin a duh a ni.
Hetiang hi Manipur boruak a ni a, Manipur buaina avanga tuartute tan UPC NEI chuan cheng Nuai 30 pek turin a ruahman. Sum pek dan tur a hnuaia mi ang hian ruahmanna a siam nghal a ni.
1. Imphal District-ah thawktu Pastor 6, Full time worker 3, Pensioner 4 an awm mek a, Imphal District relief atan Rs 15,00,000 pek a ni.
2. Central YMA hnenah Relief atan Rs 4,00,000 pek ni se.
3. Relief Camp a sum sem dan tur chu hetiang hian ruahman nghal a ni.
a. Lamka Relief Camp Rs 4,00,000
b. Kangpokpi Relief camp Rs 2,00,000
c. Moreh Relief Camp Rs 50,000
d. Barak Relief Camp Rs 1,00,000
4. Kohhran chhungkaw hnena semral atan Rs 3,50,000 ruahman a ni.
2. MANIPUR BORUAK AVANGA TAWNGTAI RUAL CHUNGCHANG:
May ni 3, 2023 atangin Manipur ram chhungah Manipur Meitei leh Zo hnahthlakte inkarah inbeihna a lo thleng avangin UPC NEI kohhran chuan India Hmar Chhak huapin Manipur inbeihna avangin a ruala tawngtaina neih ni se tiin a rel a, Tawngtai rual neih hun tur atan August 6, 2023 Pathian ni zan inkhawmnaa neih tur a ni.
Tawngtaina thupui hrang hrang chu kohhran te hnenah circular siama inhriattir leh a ni ang.
3. KOLKATTA BATANAGAR HMUNA BUILDING LEI TURA PASS ENNAWN LEHNA:
Executive Board hmasa rorel No 2 of dt 1-2 Feb 2023 in Kolkatta Batanagar biak in bula building lei tura a lo passed tawh ennawn leh tura an rawn chhawp chhuah chu sawiho a ni a, an phalna hniam ber cheng nuai 53 a lei ngei ni se tih a ni.
4. LAL TAWNGTAINA SAWI DAN INRUALKHAI NEIH RAWTNA:
Inkhawm ban dawn tawngtai “ Lal tawngtaina” thu sawi ah hian kohhran huang chhungah kan tih dan in ang lo lai , thenkhatin “Chatuana i ta a ni si a ti te, / Chatuanin i ta a ni si a ti te, / Chatuan i ta a ni si a ti tein sawi a ni thin. ” Hei hi Pathian fakna leh chawimawina thu sawina tawngkam nia kan hriat avangin “ Chatuanin i ta a ni si a” tih hi kohhranten kan hman zui zel atan pawm a ni ta a ni.
5. GENERAL CHOIR-TE SUM HMAN TUR KOHHRAN BUDGET-AH TELH NI SE:
He mi chungchang thu hi sawihona kan nei a, General Choir sum hman tur UPC NEI Budget-a dah ni ve thin turin thu tlukna siam a ni.
6. THURIN KALHA RAWNGBAWL KHAPNA CIRCULAR SIAM THU:
UPC NEI chhungah kohhran thurin zirtirna kawngah pawm General Headquarters atangin Licence holder zawng zawng leh Local Church zawng zawngah circular siam a ni ang. Kohhran member tu pawh Circular chhuah a nih hnua tawngka emaw ziak emaw a he zirtirna dik lo hi lo la tilui an awm a nih chuan District Board/ Execurive Board in member a nihna paih thlengin an chungah action a la ang” ti a rel a ni a, Circular pawh chhuah a lo nih tawh bawk a. Chuvangin tuna tang chuan hetiang zirtirna dik lo kengtute reng reng chu UPC North East India khawi kohhranah pawh rawih khap tlat a ni a.Hetiang zirtirtute chu an lawina kohhranin ti tawh lo turin an zilh tur a ni a, zilh an nih hnu pawha la zirtir luite chu an rawngbawlna tihtawp nghal tur a ni.” tiin.
7. REV. C HMINGTHANFALA PENSION THLAHNA LEH THIL PEK THU;
Rev C. Hmingthanfala, Member, Executive Board member a ni. Ani hi Lunglei District Headquarters biala a awm lai superanuation a pension in a chhuah a lo hun ta a, Rev. C. Hmingthanfala hian UPC NEI hnuaiah full time in kum 26 leh thla 7 a thawk a ni. Vawiin ni 20.07.2023 hi kum 65 a tlin hun a ni a, Kohhran dan angin a pension thlahna thilpek citation leh Rs 5,000 chu Executive Board aiawhin Rev.Lalmalsawma Sailo in a hlan a ni.
———-
KOHHRAN SUM AUDIT
July ni 25 thawhleh ni atanga ni 27 chhung khan General Hqrs. Office, Mualpui Salem veng, Aizawl ah Kohhran sum kum chanve Audit a ni.
General Hqrs. Account hrang hrang bakah General Administration hnuaia Department, Field leh Committee peng hrang hrang te sum Audit a ni a, Auditors te hi Rev. H. Lalropuia leh, Rev. PC. Lalfakawma te an ni.
———-
GENERAL SUNDAY SCHOOL DEPARTMENT:
July ni 29-30 hmang hian General Sunday School Department chuan Serchhip khawpui chhungah National Tobacco Control Programme (NTCP) nena tang kawpin Zuk leh hmuam that lohna thupuia hmangin Trainers Training an buatsaih dawn.
Serchhip khawpui chhunga Tualchhung Sunday School zirtirtu leh Sunday School hruaitute bakah Bial Sunday School hruaitu chinte pualin Seminar hi buatsaih a ni dawn a, Serchhip Dinthar Kohhran Biak inah neih a ni ang. Seminar bakah hian Inrinni zan, Pathianni zing leh zan lamah General Sunday School hruaitute : General Director Rev. Biaksangzuala, General Secretary Rev. Jh Zahluna leh General Treasurer Evan. R. Lalbiakfela ten Serchhip khawpui chhunga Tualchhung Kohhran hrang hrangah rawngbawlna an nei kual dawn a ni.
———-
REVEREND TITLE HLAN:
UPC-North East India, General Aministrative Committee chuan July ni 17, 2023 Thawhtanni khan UPC North East India hnuai Pastor thawk lai mi 5 hnenah kum 10 chuang Pastor rawngbawl hna rinawm taka an lo thawh tak avangin Reverend title a hlan a ni.
Reverend Title hlante:
1. Pastor SK Gina, s/o Satzakap (L), Barak District
2. Pastor L. Kapma, s/o Pastor K. Chonglai (L), Barak District
3. Pastor V. Lalhlimpuia, s/o V. Lalzara (L), Chhimtuipui District
4. Pastor Paovum Singson, s/o Sehkholal Singson (L), Imphal District
5. Pastor Thangminlen Khongsai, s/o Thangkholam Khongsai (L), Imphal District
Tun hnuah chuan an hming lam leh ziah apiangin Reverend telh tawh tur a ni ang.
———-
———-
AIZAWL EAST DISTRICT
District Board:
Aizawl East District Board vawi 135-na, ni hnih chhung neih chu tluang takin July 13, Ningani khan zawh fel a ni. District Board hi Rev. KVL. Hmangaihkima, District Superintendent chuan kaihruaiin thu ngaihtuah tur engemaw zat lutin an thu passed langsar zualte:
1. Disable Sunday thawhlawm khawn hun leh thawhlawm lut hman dan tur mumal zawka kalpui ni se tih niin Disabled Sunday-a thawhlawm chu Pathianni zan zela khawn ni se, hruaituten Disabled Report form siamin report lo thlen dan a zirin a pek chhuah dan tur chu ruahmanna siam thin ni se tih a ni.
2. Hostel siam tur chungchangah lo zirchiang tura District Board-in Committee a ruatte
hnen atangin an zirchianna-te thlirho a ni a, zirchiangtute zirchiannate uluk taka ngaihtuah a nih hnuah Hostel chu siam ve ngei nise tih a ni. Hostel Managing Board hetiang hian din nghal a ni. Chairman : District Secretary
Secretary : Rev. C.Lalmalsawma
Treasurer : District Treasurer
Ex-Offio : District Superintendent
Committee Members:
1. Director Missions Department.
2. Pastor Laltlanhlua Hnamte
3. Pastor F.Malsawmtluanga
3. District PYD ten Zokhawthara an hmunlo ramte chu, tangkai zawka kohhran hoten
an hman theih nan, Dt.13/7/2023 (Thurs) ni hian United Pentecostal Church of North East
India, Aizawl East District hnenah lawm takin an hlan a. He ram tha tak hi tangkai taka hman
a nih theih nan ruahmanna tha tak siam nise tih a ni.
4. Khawzawl bial-tu Pastor, Rev. Lalhmangaihawma Parte chu Calvary Bible College-a
BD zira a kal avanga District Treasurer Rev.H.Lalropuia’n Khawzawl bial alo hmui mek
chu hmui tawh lovin Khawlian Bialtu Pastor K. Vanlalhlimpuia chu Khawzawl Bialtu Pastor atan dah niin Khawlian Bial hi Rev R. Laltlankima, District Secretary chuan lo hmui se tih a ni. Darlawn Bial pawh Rev VL. Hnemtluanga, District Missions Director chuan hmui rih se tih a ni a, August 6, Pathianni-ah induction nei tura tih a ni bawk.
———-
District LAD ten raltlan tanpui:
Aizawl East District LAD ten ruahmanna an lo siam tawh angin District chhunga Kohhran mi raltlan tanpuina Bialtu Pastor te kaltlangin an hlan. District chhunga raltlan mi 270 te hnenah tanpuina hi hlan niin cheng nuaihnih singli sangthum an sem ral a ni.
District LAD te hian District chhunga raltlante tanpuina pek ve ni se tia lo rel angin Bial hrang hrangah tanpuina tur sum hi khawn a ni a, a tanpui dan tur leh pek zat tur hruaitute kuta an dah angin District LAD hruaitute chuan Bial hrang hranga Bialtu Pastor te kaltlangin tanpuina hi an hlan ta a ni.
———-
Chawnghei tawngtai nei dawn:
Aizawl East District PYD Kum chanve Board in District chhungah Kum 2023 chhung hian thupui neiin, vawikhat tal a ruala chawnghei tawngtai neih nise a tih, District PYD OB kutah a hun a dah angin District PYD Executive Meeting chuan July 31, Thawhtan tlai-ah chawnghei tawngtai nei turin a ruahman. He hun hi District PYD hnuaia member zawng zawngte chuan urhsun taka hmang tura ngenin a hnuaia thupui tarlan hmang hian chawnghei tawngtai hi neih a ni dawn a ni.
1. Burma leh Manipur ram buai tan
2. Mizoram inthlanpui lo awm turah hruaitu tha tak kan neih theih nan leh inthlan fel fai
leh thianghlim tak kan neih theih nan.
3. Thalai ruihhlo ngaite tan.
———-
District PYD Executive meeting July 3 a neih hian District PYD Board in Live Crusade nei tura ruahmanna a siam chu November 3 atanga 5 chhungin Zemabawk Biakin-ah neih ni se, Speaker-ah Rev KVL. Hmangaihkima, District Superintendent ni se a ti bawk a, hemi bakah hian Ngur PYD ram chu humhalh ni se, District Secretary a kal theih hunah a kal ruala a hmun entura OB te kal phawt nise tiin remchang hmasa berah Darlawn Bial tlawh ni se an ti bawk a ni.
———-
Seminar:
July 22, Inrinni nileng khan Zemabawk Bial buatsaihin Tuirial Biak In-ah Bial chhunga rawngbawltute tan seminar neih a ni. He hunah hian Resource person-ah Rev. KVL. Hmangaihkima, District Superintendent chu hman niin Bial chhung atangin Bialtu Pastor, Rev R. Malsawma nen mi 30 vel an kalkhawm a ni. Resource person hnen atang hian rawngbawltute hriattur pawimawh tak tak ngaihthlak niin hlim takin hun an hmang a ni.
———-
Mithar leh baptisma chang thar:
July 23, Pathianni khan Zemabawk Bial, Bungbangla Kohhranah mi panga in Baptisma an chang a, Nau 7 hlan a ni bawk. Heng Baptisma chang te hi tun thla tir lam a Kohhran a sengluh tawh te niin Baptisma rawngbawlna hi Evan Thangneihsanga’n a nei a ni. Bungbanglah hian July 23, Pathianni zan khan member thar pakhat chu Kohhran ah sengluh a ni leh bawk.
July 23, Pathianni khan Thingsulthliah Bial, Sesawng Kohhranah Bro.Joshua Lalnunsanga rawngbawlna kaltlangin mithar 1 sengluh a ni. Sesawng Kohhranah hian Bial hmalaknain Bro Joshua Lalnunsanga chu rawih mek a ni a, a rawngbawlna atangin Kohhran ten malsawmna an dawng hle a ni. T.Upa P Lalhlimpuia te chhungkua in chawimawina pe in, mi 5 in Baptisma an chang a, mi engemawzat Thlarau Baptisma dawng thar an awm tawh bawk a ni.
July 23, Pathianni vek khan Sis. Vanlalpari, BW rawngbawlna atangin Keifang Kohhranah Member 3 sengluh an ni bawk a, Kohhrana sengluh tawh pakhatin Baptisma a chang bawk a ni.
Zohmun Bial, Zohmun Kohhranah July 23, Pathianni zan khan Bialtu Pastor Vanlalnghaka chuan Chhungkaw khat Members 5 a senglut bawk.
July 23, Pathianni khan Thuampui Kohhranah member thar mi 8 te chu Kohhranah sengluh an ni. Mi pakhat in Evan Zothansiama kutah sual ngaihdamna baptisma a chang nghal. Midang hi remchang hmasa berah chan tir leh an ni ang.
Peniel Kohhran, Bawngkawn South-ah pawh Pathianni zan khan Evan H.Lalsiamliana, Church Board Chairman kutah Kohhran mi ni sa, Manipur atanga lokal mi pakhatin sual ngaihdamna baptisma a chang thar bawk.
Serchhip Bial, Ngentiang Kohhran ah Evan H Lalhmingmawia rawngbawlna atangin Mithar 7 chu July 23, Pathianni zan khan sengluh an ni bawk. Mi thar te hi Nu 2 leh an fate panga an ni a, an fate hi Pathian hnenah hlanna neih nghal a ni.
July 23, Pathianni chawhnu khan Khawzawl Bial, Hmuncheng Kohhranah member thar pakhat Kohhranah sengluh an ni a, member thar hian Evan H.Lalhlimpuia kutah sual ngaihdamna baptisma a chang a ni.
———-
Hruaitute Programme:
Rev. H. Lalropuia, District Treasurer chuan July 23, Pathianni hmang khan a Bial hmui mek, Khawzawl Bial fan programme hmangin Tualchhung Kohhran hrang hrang tlawhin rawngbawlna hlawhtling takin a nei a, July 22, Inrinni nileng khan Bial LAD Board neihpuiin Pathianni khan Bial Hqrs. Kohhranah nauhlan rawngbawlna a nei bawk a ni.
———-
———-
———-
NORTH MIZORAM DISTRICT
HRUAITUTE PROGRAMME
District Supdt. Rev. Chhiarpuiachuan July ni 25 – 27 chhungawh NMD District Board rorelkaihruaiin, July ni 28 zanatanginHqrs. Kohhran ten Pathianchawimawina an neihturahDistric an sawmangin a telpuiang.
District Secretary Rev. K. Lalduhsangachuanchuan July ni 25 – 27 chhungawh NMD District Board-ah a tel a, July ni 30 PathiannizanahDintharBialChawnpuikohhrantetetlawhinrawngbawlna a neiang.
District Rev. C. Lalthantluangachuanchuan July ni 25 – 27 chhungawh NMD District Board-ah a tel a, July ni28 zirtawpzanatangataninHqrs. Kohhrante’nPathianchawimawina Programme an buatsaihah a telbawkang.
District Missions Director Rev. C. LalramthangachuanUPC-NMD, Hqrs. KohhrantenaPathianchawimawina July ni28 leh 29-a an neihturahZirtawpzanah Speaker niinrawngbawlna a neiang.
———-
UPC-NEI, NMD ten kumchanve District Board an nei:
Ruahman lawk angin North Mizoram District chuan July ni 25-27 chhung khan District Kumchanve Board an nei. District Board hi District Committee Room-ah neiin Dist. Supdt. Rev. Chhiarpuia’n Board meeting a kaihruai a, General Supdt Rev. R. Lalrinsanga pawhin Board hi a telpui bawk.
District Board rorel pawimawh zingah District Sunday School Secretary & Treasurer Part time-a thawk turin Evan. Challiana ruat a ni a, Biak in hmun tur Samlukhai, Lengte leh Saikhama kawn kohhran te lei sak turin an rel bawk. Hei bakah hian North Mizoram District atanga Gen. Exe Board member 1 ruat belhin Rev. H. Zabiaka ruat a ni a, General Choir te Phillipenes Confe an hmanpui torah Rs. 300000 –a puih ve an remti bawk.
———-
Lamchhip Crusade report:
SumsuibBialLamchhipkohhrantechuan July ni12-16chhung khan Gospel Crusade buatsaihinSpeaker atan Evan IsakLalhmingliana, Maranatha Revival Team hman a ni.Maranatha Revival Team terawngbawlnaLalpan a hmang a, rawngbawlna neih chhungin Pathian thu tak kohhranho ten an dawng a, Crusade neihhunturabitukpiahlamahrawngbawlnaboruakkalzelahPathianchawimawinavawi 4lai a awm a, Mi 13 in IsuahminginsualngaihdamnaBaptisma an changa, Hriakthihrawngbawlna a ṭangadamnachangbakahThlarauthianghlimdawngtharpawh mi engemawhzat an awmbawk.
———-
BAWNGVA LAWMTHU:
MamitBialchhungakohhran ding thar Bawngva kohhrante chuan Inkhawma dar vuak tur an mamawh tih hriain Lungleng 1 Kohhrante chuan an dar roh em em chu Bawngva kohhrante tan an pe.
Lungleng I kohhrantena an darpektur hi Bro. Lalhmingsangaleh Bro. Joseph VL Remruata ten Lunglengah zuk lamin Bro. Hmingsanga kaltlangin Bawngva hmuna rawngbawl Bro. Vanlaltanpuia hnenah hlan a ni. Bawngva kohhrante leh a bialtu Mamit bial hruaitute’n lawmthu an sawi.
———-
Vairengte State veng-ah Seminar nei:
July ni16PathianniChawhnu khan, Vairengte bial chhunga awm State Veng Preaching Point –ah kohhran in a mamawh hrang hrang chung changah Seminar neiin; Rawngbawltu Evan. Vanrammawia’n paper a present.
Rawngbawltu Seminar neihah hian thupui hrang hrang heng- Committee chungchang, Chairman, Secretary leh Committee Member te mawh phurhna hranghrangte, Sunday School Naupang leh Puitling zirtirtute mawhphurhna leh zirtirna pek dan leh inbuatsaih dan chung changte, Tantu leh Chairman dinhmun leh mawhphurhna, inkhawm kaihhruai dante leh Thuhril tumawh phurhna leh thusawi inbuatsaih dante an zirho a, kohhran member ten seminar hi hlawk thlak an tihle.
———-
KOLASIB RENGTEKAWN BIAL:
July ni 26 Pathianni khan Rengtekawn Kohhranah Mithar chhungkaw khat (Member -11) chu kohhran dang atangin lawm luh a ni. Mithar lawm luhna hi Bialtu Pastor Rev C. Lalthlengliana’n neiin amah vek hian Nau – 5 hlanin, Sual ngaihdamna Baptisma Isua hmingin Puitling -6 in Pastor kutah hian an chang nghal bawk a ni.
———-
HqrsBialThianghlimnaComthmalakna:
Hqrs. Bial Thianghlimna Committee hmalakna in July ni 16 Pathiannni zan khan Local tin Thianghlimna Committee hruaitute leh committee member te chuan Missions Vengthlangah rawngbawlna neiin; Bialtu Pastor Rev. Lalremtluanga’n rawngbawlna a nei a, Rawngbawltu hian ‘Lalpa mite hi Lalpan a ram luttura a bung bel Thianghlimte kan ni a, Daniela te thian za ho anga khawvel chaw tui Lalpa mit hmuha thianghlim si lo lakah hian kan in ti thianghlim tur a ni’ tiin, Thianghlimna thu hmangin Pathian thu chahngaih nawm leh tha tak a sawi a, kohhran mipuite’n hlawk thlak an tihle a ni.
———-
REHOBOTH Revival Team rawngbawlna kal zel:
Rehobot Revival team Evan. PC Lalramchhuanmawia leh a team ten Dinthar Bial Tuikual N Kohhrana rawngbawlna an neih chu Pathian hriatthihna hnuaiah tluag takin a kal zel. Rehobot Revival team terawngbawlna hi Tuikual N Local PYD te huaihawta neih niin; July ni 12 – 16 thleng he rawngbawlna hi neih tura ruahman a ni a, Pathian thlarau Thianghlim hnathawh kal zel avangin rawngbawlna hi Tuikual Local Church Board te ngen angin a ala kal zel a, Pathian chawimawina July ni 23-ah awm tawhin July ni 30 hian Pathian chawimawina neih leh tur a ni bawk a ni.
———-
BukpuiBial N. Chaltlangahmithar:
July ni 16 Pathianni khan Bukpui Bial N.chaltlang Vengthlanga rawngbawla District in a dah Bro. Lalnunpuia rawngbawlna kaltlangin mithar members 7 chu Lalpa Isua hminga lawmluh a ni.
Heng mitharte hi Chhungkaw 2 niin; chhungkaw khat hi kan kohhran nisa an ni a, an vai hian minipur raltlan niin Mizorama awm nghet tur an ni. Chhungkaw khat dang hi Believer church niin chhung khat pa ber hi BA.BE lai niin Manipur lamah chuan zirtirtu hnathawk lai mek a ni. An fate pahnih pawh Pathian hnenah hlan nghal a ni.
———-
Bajerung Missions Field-ah mithar neih a ni:
Bajerung Casual worker Evan. Lallawmpuia Sailo kaltlangin Bajerung khua Presbyterian kohhran atangin mithar duhawm tak rawngbawltu Evan. Lallawmpuia chuan Lalpa Isua hmingin lawmluhna a nei. Mithar hi SIst. Maisarung niin, kohhranhoten an lo lawm hle a ni.
———-
Sailut Mithar lawmlut:
July ni 16 Pathian Ni khan Tlangsang Bial, Sailut 1 Kohhran Bro. Lalremruata awmnaah Baptist Church aṭangin nula 1 chu Missionary hnathawk lai chu Bro.Lalremruata rawngbawlna kaltlangin Pentecost kohhranah lawmluh a ni.
———-
THenzawl Kanan-ah mithar nei:
July Ni 23Pathianni zan Thenzawl Kanan kohhranah Bialtu Pastor Rev. C. Lalrammauana chuan mithar 3 Pentecost kohhranah a lawm lut.
Heng mitharte kohhranhote’n an lo lawm hle a, chhungkaw pa ber Zoramthanga niin fapa 2 neiin Thenzawl Vengthar Local-ah hming an ziak a ni.
———-
Mithar 2 nei:
Damparengpui bial chhunga Dampa Tlangnuam kohhranah Pathianni kal ta July ni 23 khan BBC atangin mi thar 2 lawmluh an ni a. Nau 1 hlan a nih bakah baptisma rawngbawl na neih nghal a ni a, mi 4 in baptisma an chang a ni, he rawngbawlna hi Bialtu Pastor F. Lalchhanhima’n a nei nghal a ni
———-
ZAWLPUI PP MITHAR:
July n i23 Pathianni chawhma inkhawm khan rawngbawltu Evan. C. Lalthlamuana chuan UPC-NEI Zawlpui kohhrana lawi turin Bro. Fredy-a Lalpa Isua hmingin a lawmlut. Zawlpuiah hian Kumin chhung hian mithar 6 in Lalpa Isua hmingin baptisma chang tawhin, nau 1 hlan a nih tawh bakah Bial aṭanga budget neih zawng zawngte pawh tlak a ni tawh a ni.
———-
Tuipuibari Hmar vengmithar:
Inrinni kal ta July ni 22 khan Damparengpui Bial Tuipuibari hmarveng kohhranah rawngbawltute rawngbawlna kaltlangin sist. Lalrinkimi chu BBC kohhran atangin Pentecost kohhranah Lalpa Isua hminga lawmluh a ni.
Mithar hi rawngbawltu Evan. Lalthianghlima’n lawmluhna a neih bakah Sualngaihdamna Baptisma pawh a chantir nghal bawk a ni.
———-
———-
LUNGLEI DISTRICT
REV.C.HMINGTHANFALA PENSION THLAHNA HUN HMANG:
July ni 16, Pathianni chawhnu dar 2 khan Headquarters Local Biak Inah July ni 20, Ningani a Superannuation Pension-a chhuak Headquarters bialtu Pastor Rev.C.Hmingthanfala thlahna hun chu Headquarters bial hmalaknain hman a ni.
He inkhawm hi Headquarters bial Secretary Evan.F.Lalhmangaiha chuan kaihruaiin, inkhawm hlanna Rev.R.Lalrosangan a nei a, Headquarters Local PCD leh Headquarters bial PYD zaipawl ten fak hla mawi takin an sa a, bial aiawhin Evan.MS Dawngliana Hnamte, Director bial Sunday School Department chuan thlahna thu sawiin thilpek hlanna a nei bawk.Thlahna thilpek hrang hrang District Kohhranpui, Pastor Welfare, District Department hrang hrangte, bial chhung Local leh Local Department hrang hrang bakah chhungkua leh mimal atang ten hlan a ni a, District Superintendent Rev.C.Vanlalena leh Rev.C.Hmingthanfala hnen atangin thusawi ngaihtlak a ni bawk.
District Secretary Rev.C.Lalrintluangan Rev.C.Hmingthanfala chanchin a sawi a, a rawngbawl chhoh dan tlangpui hetiang hi a ni.
Kum 1987-ah Pukpui Local-ah rawngbawltu atan lak a ni a, 1989-ah Local Licence neiin, 1991-ah General Licence a nei a, 2006-ah Ordination Licence a nei bawk. Kum 1989 – 1996 chhung khan District Missions Department hnuaiah Full Time Evangelist in hmun hrang hrangah a lo thawk tawh a, District Board vawi 113-na chuan bialtu Pastor atan a la a, kum 1997 khan he hna hi a thawk tan a ni. Pastor hna a thawh chhung hi kum 26 thla 6 leh ni 20 a ni a, bial 6 ah a awm hman a, a bial awmna te chu hengte hi a ni.
– Bunghmun bial (01.01.1997 – 15.01.2001)
– Tawipui bial (15.01.2001 – 31.12.2005)
– Pangzawl bial (01.01.2006 – 31.03.2010)
– Luangmual bial (01.04.2010 – 30.04.2014)
– Haulawng bial (01.05.2014 – 14.05.2018)
– Headquarters bial (15.05.2018 – 20.7.2023)
Rev.C.Hmingthanfala hian Baptisma hi mi 195 a chan tir a, nau hi 226 hlanin Mitthi 67 a vui bakah kohhran dan khatna a innei tuak 17 a vawn tir bawk.
He inkhawm hi District Treasurer Rev.PC.Lalfakawma chuan tawngtainain a titawp a ni.
———-
Lunglei District PYD Conference in a mamawhtute tan thisen pek nise tia a lo rel bawhzuiin, vawiin July ni 22, Inrinni hian Pukpui Bial PYD:UPC(NEI)-te chuan Lunglei Civil Hospital Blood Bank-ah a mamawh apiangte hman turin Thisen Unit 56 an pe. Thisen pe tute hi Mipa 46 leh Hmeichhia 10 an ni a, Thisen hi Civil Hospital ah kalchilh in an pe a ni.
Pukpui bial PYD-te thisen pek hma hian hunserh tawi hman a ni a, he hun hi bial PYD President Upa R.Zoramchhana chuan a kaihruai a, District PYD Secretary Evan.Lalringzuala Pachuau chuan hunserh hmangin, Blood Bank lam atangin thusawi ngaihthlak a ni bawk.
Thisen pe tur hian Pukpui bial chhung Local hrang hrang Pukpui, Zotlang, Zohnuai, Kikawn, Bazar veng, College veng leh Venglai atangin mi 90 chuang an kal khawm a ni.
Lunglei District-a bial hrang hrang PYD :UPC(NEI)-te hian thisen hi an pe chho zel dawn a, thisen pek hun tur hi District PYD siam Routine anga kalpui chhoh a ni ang.
Facebook