GENERAL EXECUTIVE BOARD:
UPC North East India rorelna sang General Executive Board chu July ni 20 leh 21 chhung khan General Heqaquarters Office, Mualpui Salem veng-ah neih a ni.
Executive Board hi General Superintendent Rev. R. Lalrinsanga chuan kai hruaiin District hrang hrang atanga Executive member-te pawh an tel kim thawkhat hle a…….
———-
2022 General PYD Conference Programme Committee:
July ni 16, inrinni chhun Dar 11 khan, Kum 2022 General PYD Conference Programme Committee te chuan Lunglei District Committee Room, Lunglei-ah committee pawimawh tak an nei.
Rev H Lalropuia, General PYD President chuan Committee kai hruaiin, Kum 2022 November ni 10 atanga 13 chhung a UPC North East India General PYD Conference Khawzawl, Aizawl East District a neih tur chungchang sawi ho in, an thurel pawimawh zual te:
1. Kum 2022 General PYD Conference Thupui atan “I pianna ramah chuan lo haw leh tawh rawh” Genesis 31 : 13 chu thlan a ni.
2. 2022 General PYD Confer ence ah hian Theme song neih thatih a ni a, Theme song phuah tur hian Bro Zorammuana, Siaha, Chhimtuipui District chu ruat a ni.
3. Conference Recording Secretaries tur in North Mizoram District PYD, Lunglei District PYD, Chhimtuipui District PYD leh Lawngtlai WDistrict PYD a tangin member ruat an ni.
General PYD Conference ah hian Kum 10 chhung chawl lova District PYD hruaihna thawkte, Zirna lamah State, National & University Top Ten chin leh Sport-ah Nation Level Top three chin te chawimawina pek ni se tih a ni bawk..
———-
———-
CHHIMTUIPUI DISTRICT
KUM CHANVE CHHIMTUIPUI DISTRICT BOARD:
July ni 13 leh 14 chhung khan Chhimtuipui District Board chu District Committee Room ah neih a ni. District Board hi District Superintendent, Rev.Joseph L.Thlauhthang chuan a kaihruai a, board member te an tel kim thei a ni. Chhimtuipui District Board hi General Superintendent Rev. R. Lalrinsanga chuan a telpui a ni. Rorel langsar zual te.
1. Biak In leh Pastor Quarters sak tanpuina Rs.2200000 sanction a ni.
2. Lehkhabu tih chhuah nise. Lehkhabu thupui tur leh a ziaktu turte chu District Official te leh ruat bik ten lo ruahman se.
3. Nasa zawkin Ramlak beihpui thlak nise. Bial tina Crusade neih mai bakah District buatsaih Crusade neih nise. Speaker leh tul dang pawimawh chu official ten lo ngaihtuah se.
4. General Conference November thla a Chandel District a lo awm tura Palai Licence holder te chu kim taka kal tur hriattir nise. A kal turte chu mahni Bial Pastor hnenah October thla chhungin in hriattir nise.
5. Lalpa Zanriah sacrament uaiin leh a chhang hi Local tin ten an mamawh hun a Office a lei theih turin Official ten hma lo la se.
———-
LICENCE HOLDER RETREAT NEI:
July ni 15 2022 khan Chhimtuipui District chhunga Licence holder te tan Retreat neih a ni.
He Licence holder Retreat ah hian Bial hrang hrang atangin Licence neite an kal tha hle a, recources person atan Rev.R.Lalrinsanga General Superintendent leh Rev.Zohmingthanzama General Secretary te hman an ni.First session hi Rev.Joseph L. Thlauhthang District Superintendent in kaihruaiin Second session hi Rev.WL Thanghre District Secretary in a kaihruai thung a,hun hlimawm tak hman anih hnuin, General hruaitute pual a buatsaih zanriah tuihnai tak eiho nghal a ni.
———-
ZIRLAI TI THATE CHAWIMAWINA HUN HMANG:
Sangau-II Local PYD te chuan Kum 2022 chhung a an Local aṭang a Graduate First Division chin chunglamte hnenah lawmpuina thuziak an hlan.
Sangau-II Local atang hian Kum 2022-ah member pa-5 ten chawimawna hi an dawng a ni.
Heng lawmpuina an pek te hi –
1.Ls Ramthazuali
D/o LS Lalhmingthanga BA (Pol sc)
2. B Ramhersangi
D/o B.Thangtua (L) BA(Eco)
3. Vandawhpari
D/o NC Liannawla BA(Polsc)
4. Lalventluanga
S/o S.Lengkama BA (History)
5. George Ramthanzuala
D/o B Thangtua(L) BHMS.
———-
———-
LUNGLEI DISTRICT
KUMPUAN COMMITTEE :
July ni 16 Inrinni khan PYD Lunglei District Kumpuan Committee chu Rahsiveng Local Committee Room-ah an thukhawm a, Chairman Evan. Lalringzuala Pachuau chuan a kaihruai.
He Committee hian Topic Discussion neih chungchang bakah Kumpuan Thuthlung puan uar bawhzui nan Crusade buatsaih nise an ti a, bial leh Local hrang hrangah Thuthlung puan uar anih theih nan hmala tura ngen nise an ti bawk.
———-
BIAK IN HAWNG
July ni 16 Inrinni khan MUALLIANPUI kohhran Biak in chu District Superintendent Rev.C.Vanlalena chuan a hawng.
Biak in hawn inkhawm hi S.Vanlaiphai bialtu Pastor Rochungnunga Renthlei chuan a kaihruai a, Local LAD te an zai bakah Sist.Amber Lalmuanpuii chuan zaiin rawngbawlna a nei a, Upa Biakchhunga chuan biak in sak dan report pe in District Superintendent Rev.C.Vanlalena chuan thusawi rawngbawlna a nei a, tlai lamah Biak in thar lawmna ruai an kilho nghal a ni.
Muallianpui biak in hi a dung 56ft , a vang 26ft a sak a ni a, tunah hian kohhran member 135 vel an awm mek a ni.
———-
MI THAR
July ni 17 Pathianni khan Venghlun Local-ah Member thar 3, Rev. P. Lalthanga kohhran Chairman chuan a lawm lut. Lungsen S Local ah pawh Pastor PC Zion Rammawia chuan mi thar puitling pakhat (1) a lawmlut bawk.
———-
———-
NORTH MIZORAM DISTRICT
HRUAITUTE PROGRAMME RUAHMANNA
SUPERINTENDENT: District Supdt. Rev. Chhiarpuia chuan kar kal ta Pathianni khan chhan pawimawh hrang hrang avangin Aizawl lam hnai kohhran thenkhat a tlawh bakah July ni 18 thawhlehni khan Theological Education Board (TEB) Committee General Office-a neihah a tel.
SECRETARY: Dist. Secretary. Rev. K. Lalduhsanga chuan July ni 18 thawhlehni khan NMD LAD buatsaih a thlawha puan thui zirna ‘Ladies Tailoring Centre’-a Zirlai puan thui zir chhuak 1st batch te puala thlahna inkhawm hovin; Tailoring Board Adviser a nihna angin Zirlai zirchhuakte Certificate hlanin thu a sawi bawk.
TREASURER: Dist. Treasurer Rev. C. Lalthantluanga pawhin July ni 18 thawhlehni khan Ladies Tailoring Centre Zirlai zirchhuak thlahna inkhawmah telin hunserh a hmang a, fuihna thu tha tak a sawi bawk.
Dist. Treasurer hian July ni 23 leh 24 (Inrinni leh Pathianni) -a Samtlang Kohhrana Pathian chawimawina awmah Speaker niin rawngbawlna a nei bawk ang.
DIST MISSIONS DIRECTOR: NMD Missions Director Rev. C. Lalramthanga chuan kar kalta July ni 16 leh 17 (Inrinni leh Pathianni) hmang khan Missions Field tul pawimawh hna thawkin Tumpanglui Missions Field a tlawh a, hetih rual hian Rengdil bial chhunga Casual worker awmna W. Mualthum-a Biak in sak tura hmalakna kal mek te a hmunah a enpui bawk.
District Missions Director, Secretary leh Treasurer te hian October thlaa NMD Missions Confe dawngtu tur Maubawk Bial Organising te nen, Dist Missions Confe neih tur chungchangah committee an nei ho.
———-
NMD FORMER DIST. SUPERINTENDENT REV H. VANTLUANGA THLAH LIAM:
UPC-NEI huapa rawngbawltu pawimawh leh Senior Minister Rev. H. Vantluanga Dinthar chu July ni 19 (thawhlehni) zan dar 7:55Pm khan a chenna veng Dinthar-ah a thi.
RRev. H. Vantluanga hi kum 1944 ah North Mualcheng khuaah piangin rawngbawlna kawngah hian sulhnu pawimawh tam tak a hnutchhiat a, amah hi ziak mi niin; kohhrante tan literature kawngah a thawh hlawk hle. Kum 1975-ah Pastor hna thawkin Serchhip, Champhai, Bethlehem, Kolasib leh Dinthar te a bial tawh a, kum 1994-ah NMD Treasuer-ah thlan niin, kum 1995-ah NMD Secretary hna a thawk leh a, 2000-2002 chhung khan District Supdt. Hna a thawk leh a ni.
Rev. H. Vantluanga hi a chhung leh khatte mai bakah NEI -UPC chuan a ui hle a, a vuina hunah pawh hian amah thlahin AED leh NMD pastor pension te leh khawpui chhung leh pawn atangin Pastor te an fuankhawm tha hle. (Video/Picture)
———-
NORTH MIZORAM DISTICT LAD HMALAKNAA EIZAWNNA TLAK PUAN THUI ZIRNA AN BUATSAIH MEKAH 1ST BATCH THLAHNA INKHAWM NEIH A NI:
July ni 18 thawhlehni chawhnu dar 1:00 khan NMD LAD ten eizawnna tlak Puanthui zirna an buatsaih ‘Ladies Tailoring Centre’ -ah Puan thui zirlai batch 1st na zir zo thlahna inkhawm NMD Hqrs. Kohhran Biak in Tuikhuahtlangah neih a ni.
Zirlai zir chhuak te thlahna inkhawm NMD LAD President Sist. K. Lalhmachhuani BW-in a kaihruai a, hun hmanpui tura sawm Gen LAD hruaitute, Khawpui chhung Pastor leh NMD Dept hruaitute leh District Puipate inhmelhriattirna neiin, Hunserh NMD Treasurer Rev. C. Lalthantluanga’n hmangin Pathian thu Thuf. 11:6 thu a chhiar a, North Mizoram Dist LAD te NU an nih anga an tihtur âwm tak midang te eizawnna tlák thiamna nei tura a thlawnna puanthui zirna an buatsaih chu fakawm a tih thu a sawi.
Zirlaite result puanna Dist. LAD Treasurer Sist. Chhuankungi BW chuan neiin; NMD Secy leh Tailoring Board Adviser ni bawk Rev. K. Lalduhsanga’n Zirlaite Certificate hlanna a nei a, Heng zirlaite hnenah Certificate hlan an ni.
1. Sist Catherine Lalrinngheti, Mission Vengthlang
2. Sist. Lalrithangi, Phuldungsei
3. Lily Lalnunpuii, W. Phaileng
4. Sist. H. Ramnunzuali, Lawipu
5. Sist. H. Lalhruaitluangi, Lawipu
6. Sist. Jeny Lallawmsangi, W. Phaileng
Sawm angin Gen LAD Treasurer Sist. Rohlupuii chuan Gen. LAD aiawha thu sawiin NU rilru nena inhmeh tak a thlawhna mitena eizawnna an neih theihna tura Puan thui zirna NMD LAD ten an buatsaih chungchangah fak tlak a tih thu sawiin; Heng ang hmasawnna hi District dang zawng zawng te pawhin hmalakna atana hman ve tha a tih thu a sawi. Gen LAD te hian NMD LAD te an thiltih ropui tak avangin lawmpuina thilpek an pe bawk a, Thilpek hlanna hi Gen LAD Secretary Sist. Lalramthangi B/W chuan a hlan bawk.
NMD aiawhin Rev. K. Lalduhsanga’n thu sawiin Tailoring Centre Zir chhuakte duhsakna a hlan rualin Tailoring centre din a nihna tura rilru lo neia ngaihtuahna hmasawn tak neitu LAD te chungah lawmthu a sawi a, Zirlai zir chhuak a chhuan thu te, Zirlai zir chhuak mi 6 te a hmasa ber an nih avanga an puanthui zirnain hma a sawn zelna tura mawh an neih san thu te sawiin; Tailoring Centre in hma a sawn zel theihnan zirlai zirchhuak te pawh an thiamna leh finna te tithang lian deuh deuh tur te, mahni lawina theuh kohhranah inkhawm taima a malsawmna ni turte’n a fuih a, He Tailoring Centre hi a tir anih avangin thil zawng zawng changtlung taka a kal theih loh thu a sawi bawk. Dist. Secy leh Tailoring Board Adviser hian Tailoring Centre tluang taka a kal theihna tura mamawh Sponsor-tute chungah lawmthu a sawi bawk.
Puanthui zirtirtu Sist. Mary Remruatkimi’n thu sawi bawkin – Zirlaite’n tihtakzet rilru pua puan thui an zir dan te, hnung tawlh an tum loh dan te sawiin, zirlai chhuak ta te pawh, ke pen tantir tur an nih thu sawiin; an kal zelna turah duhsakna a hlan bakah zirlaite chu puanthuina kawnga harsatna an neihah Tailoring centre lakah inthlahrung lo turin a chah a, engtiklai pawha an inhawn reng thu a sawi bawk a ni.
Zirlai kal chhuakte aiawhin Sist. Chatherine Lalrinngheti of Mission Vengthlang chuan thu sawiin; NMD LAD ten Puanthui an thiam theih nana sum leh pai leh tha leh zung nasa tak senga a thlawna puanthui zirtir an nih chu zirlaite aiawhin lawmthu a sawi a, Zirtirtu thiam tak leh fel tak pek an nih avanga an lawmna te, anmahni zai ngai taka enkawltu Dist. LAD hruaitu leh Tailoring Board member te hnenah te lawmthu sawiin; Puan an thui theihna tura Khawl leh a behbawm pe a Sponsor-tute chungah thinlung taka an lawm dan te a sawi chhuak bawk.
Inkhawm chhung hian Sist. Jeny Lallawmsangi W. Phaileng (Zirlai naupang) leh Sist. R. Lalpianfeli te chuan fak hla mawi tak an hlanin Rev. C. Lalramthanga NMD Missions Director chuan Malsawm tawngtainain inkhawm hi a tin ta a ni.
N.Mizoram District Tailoring centre hi kumin 2022 Jan ni 17 khan Registration neiin; Jan ni 18 khan zirna kalpui tan niin; a tirah zirlai 10 neiin; hrisel lohna leh harsatna dang avangin mi 4 ten an chhunzawm thei lova, Zirlai 6 te chuan thiamna tha tak neiin an zirlaite an chhuak thei ta a ni.
Tailoring Centre-ah hian Sist. Mary Remruatkimi Mission Vengthlang chu zirtirtu niin; a ni hi Puanthui kawnga zirna sang lo zir chhuak tawh leh tawnhriat nei tha tak niin; M.sc (Fashion Designing) Diploma in Garment Technology (Pubjab) leh Mizoram State Council-ah Diploma in Garment technology kum 3 zirchhuak tawh a ni bawk.
District Lad te hian Puanthui zirna 2nd batch kalpui tura ruahmanna nei mekin, July ni 25 thleng puanthui zir duh tan dilna hun a hawng a, July ni 26-ah Interview neiin; Aug ni 1-ah Registration Day hmangin Puithui zirna hi an chhunzawm nghal dawn a ni. (LAD Tailoring Centre)
———-
MI THAR LAWM LUH LEH BAPTISMA CHANG THAR:
July ni 20 Nilai zan khan Sailut kohhranah rawngbawltute rawngbawlna kaltlangin mithar 1 sengluh a ni. (Sailut)
Pathianni kal ta July ni 7 khan Bairabi Bialtu Pastor Rev. C. Lalhmunliana chuan Bairabi South Local ah Mithar 1 lawmlutin inkhawm banah mi 6 in Sual ngaihdamna Baptisma Lal Isua hmingin an chang bawk. (Bairabi)
July ni 17 vek khan W.Mualthuama Missionary Lalsawmliana chuan Hindu atangin chhungkaw khat member 7 chu Kohhranah Isua hmingin a lawm lut bawk. (W. Mualthuam)
July ni 17 Pathianni khan N.Mizoram Dist missions Director Rev C.Lalramthanga chuan Tumpanglui missions field tlawhin inkhawm banah baptisma khur hawn a ni in.mithar hlak 12in Director kutah Lal Isua hminga sual ngaihdamna baptisma an chang nghal a ni.
THILPEK PE: July ni 16 Inrinni khan Rengtekawn Local Church Board in a lo rel angin, Rengtekawn Kohhran chuan Orphanage home Khuangpuilam, Kolasib chu thilpek an pe, kohhran aiawhin Rev C.Lalthlengliana, Bialtu pastor chuan thilpek hlanna a nei. (Rengtekawn)
QUARTERS SA: NMD PYD hmalaknaa rawngbawlna neih mekna hmun Kawrthahah rawngbawltu awmna tur Quarters sak hna thawh mek niin; Rengdil Bialtu Pastor C. Laltlanchhuaha hovin ngawrh taka Quarters sak hna hi kal chho pui a ni. (Kawrthah Quarters)
———-
N. MIZORAM DISTRICT OFFICE TLAWH
July ni 12 Thawhlehni khan Lengpui Bial Church Board Member leh Department OB ten North Mizoram District Office an tlawh.
Kum 2019 Lengpui bial Inkhawmpui chuan Aizawl khawpuia Kohhran pisa-te tlawh nise tiin a rel a. Hripui leng avangin tihhlawhtlin mai theih a nih loh hnuah July ni 12 khan Kohhran pisa hrang hrangte tlawh a ni a.
Lengpui bial chhung tualchhung hrang hrang aṭangin Upa, T. Upa leh Bial Department OB te mi 24 lai kal thei in, Kohhran pisa tan hian Hmunphiah 10 vel ṭheuh kan pe bawk a ni.
———-
———-
AIZAWL EAST DISTRICT
District Board tluang taka neih zawh a ni:
Ni thum awh Aizawl East District hnuaia rorelna sang, District Board chu tluang takin July 14, Ningani khan zawhfel a ni. District Board hi July 12, Thawhlehni atang khan Rev.KVL.Hmangaihkima, District Superintendent kaihhruaiin neih a ni. Board-ah hian thu ngaihtuah tur engemaw zat lutin an thu passed langsar zualte.
1. Aizawl East District huamchhunga raltlan tanpuina pek tha tih niin Bial tinah Bialtu Pastor ten raltlan awm dan report pek ni se tih a ni.
2. Cancer hospital Zemabawk-ah cancer enkawlna infusion khawl pek ni se tih niin a tul angin hruaituten lo bawhzui se tih a ni.
3. Environment humhalh kawnga hmalakna atan District chhungah Plastic lam kaihhnawih hmang tlem tura in zirtirna kalpui ni se tih a ni.
4. August rammut thla chu tualchhung tinah a hlawk thei ang bera hmang tura hmalak ni se tih a ni.
5. Rev.Pc.Lalnghakliana’n hrisel lohna avanga Voluntary pension a dil chu remtih niin a bial enkawl Thuampui Bial chu Rev.R.Laltlankima, District Secretary in a hmui rih ang.
6. District Superintendent Rev.KVL.Hmangaihkima’n Khawlian Bial a hmui mek chu Rev.H.Lalropuia, District Treasurer in hmui tawh tura tih a ni a, July 20, Nilaini khan District Office-ah charge an inhlan a ni.
———-
Lehkhabu semchhuahna hun hmang:
July 17, Pathianni chawhnu khan District Hqrs.Biak Inah District PYD chuan Rev.KVL.Hmangaihkima lehkhabu ziak Chhandamtu leh Chhandamna tih chu Aizawl khawpui chhung Bial te hnenah a thlawna sem turin a semchhuak.
He lehkhabu Chhandamtu leh chhandamna tih hi District Kohhranpui chuan miten Chhandamtu leh Chhandamna an lo hriat a, chanchintha puandarh a nih theih nan a thlawnin semchhuah ni se, District PYD ten a tul angin hma lo la se a tih angin District PYD Executive meeting chuan Aizawl khawpui chhung bial hrang hrang bakah Aizawl khawpui pawn Bial thenkhatah te a thlawna semchhuah ni se a tih angin semchhuahna leh hlanna hi neih a ni ta a ni. Heng lehkhabute hi Kohhran pawn lamah sem tura ruahman niin Bial hrang hrang ten an huamchhung Damdawiin, School/College, Office etc.ah te sem tura tih a ni.
Inkhawm tawi hman hi Upa F.Lalthlangliana, V.President chuan kaihruaiin Secretary Evan.R.Vanlalpeka hnen atangin report ngaihthlak a ni a, Lehkhabu ziaktu Rev.KVL.Hmangaihkima, District Superintendent hnen atangin thusawi tawi ngaihthlak ni bawkin Rev.C.Lalmalsawma, District PYD President chuan lehkhabu semchhuahna leh hlanna a nei bawk a ni. He hunah hian Aizawl khawpui chhung Bial hrang hrang atangin Bial OB te an kal tha hle a ni. Lehkhabu hi Copy 100 theuhin Aizawl khawpui chhung Bialah hian semchhuah a ni.
———-
District Missions Board:
Aizawl East District Missions Department kum chanve Board chu tluang takin July 22, Zirtawpni khan District Committee room-ah neih a ni.
Rev.VL.Hnemtluanga, Missions Director chuan a kaihruai a ni. District Missions Board-ah hian Bial atangin board member an tel kim thawkhat a, thu ngaihtuah tur engemaw zat lutin he thu buatsaih lai hian an thu pass kan hre hman lova, karleh lamah tihchhuah tum a ni.
———-
District PYD Executive meeting neih a ni:
July 15, Zirtawp zan khan District Superintendent room-ah District PYD Executive meeting neih a ni. Rev.C.Lalmalsawma, President kaihhruaina hnuaiah neih niin member an telkim thei a ni. An thu passed langsar zualte:
1. District Board Vawi- 55, Rorel 1-na in Street Ministry kalpui nise tia alo passed tawh, Executive Meeting a kalpui dan tur ruahman tura dah chu ngaihtuah niin District PYD kaihhruainain Committee din nise tha tih a ni a, hetiang hian ruahmanna siam a ni.
Chairman: Rev. C. Lalmalsawma, President District PYD
Secretary: Evan. R. Vanlalpeka, Secretary District PYD
Treasurer: Evan. K. Lalbiaknunga, Treasurer District PYD
Adviser: Rev. R. Laltlankima, District Secretary
Ex- Officio: 1. Upa F. Lalthlangliana, Vice President, AED PYD
2. Evan. Lawmsangkima, Asst Secretary, AED PYD
3. Evan. C. Lalropuia, Fin. Secretary, AED PYD
Member atan hian Aizawl khawpui chhung Bial hrang hrang atangin ruatchhuah an ni.
2. District Board Vawi- 55, Rorel 7-na in, District PYD bul tumin Pathian thu zirna siam nise tia alo passed tawh chu a vawikhat nan hetiang hian Pathian thu zirhona nei turin ruahmanna siam a ni.
Ahun: 23rd July, 2022(Saturday), Dar 10:30 AM
Ahmun: District Hqrs Biakin, Ramhlun South
Chairman: Upa. F. Lalthlangliana, Vice President, AED PYD
Resource Person: Rev. R. Laltlankima, District Secretary
Hun hman tur hi PYD members a duh piang tan nise tih a ni.
3. District Thianghlimna Committee atanga Bial PYD te tan Thianghlimna (Zuk leh hmuam) lam Short film siam intihsiakna an buatsaih turah, District PYD te hmalak pui tur leh ruahmanna siam tura an ngenna chu hetiang hian ruahmanna siam a ni.
Thupui: Zuk leh hmuam that lohna
Film rei zawng: 15 minutes aia reilo
Hmanraw hman thei: Hmanraw hman tur bik siam anilo a, mahni remchan dan ang zelin (Phone
camera, Dslr camera, Camcorder. adt) a hman theih.
Film Resolution: Video siamte a entlakin, a fiah pangngai tur ani a. A video resolution hi
SD(480p) aia hniam a siam loh tur a ni.
Thehluh hun chhung: December, 2022 thla ral hmaa thehluh tur a ni.
Thehluh dan tur: Video siamte hi CD, DVD, Pendrive, Telegram app emaw Google Drive ah
upload a, download na link thawn in a thehluh theih bawk.
Thehluh na tur:
1. Evan. K. Lalbiaknunga, Treasurer Contact No: 9862996079
2. Evan. Lawmsangkima, Assistant Secretary Contact No: 9612074575
3. Evan. R. Vanlalpeka, Secretary Contact No: 9862366002
4. District PYD dan bu siamthat “District PYD Manual, Third Edition: 2022, Revised and Rearranged” chu September thla ral hmaa release tura ruahman ni se tih a ni.
———-
Mithar leh baptisma chang thar:
July 17, Pathianni chawhma khan Bawngkawn bial, Peniel kohhranah chhungkaw khat, member 4 chu Kohhranah sengluhna neih a ni. Rev.Vanlalfela Ramtiam, Bialtu Pastor chuan sengluhna neiin hriakhnawih rawngbawlna a neih saka an fate 2 hlanna a nei nghal bawk a ni. Inkhawm banah sual ngaihdamna baptisma Bialtu Pastor kutah hian nu leh pate hian an chang nghal bawk a ni.
July 17, Pathianni zan khan Bawngkawn Kohhranah Bialtu Pastor, Rev. Vanlalfela Ramtiam chuan mi thar 3 Kohhranah sengluhna a nei bawk. Bialtu Pastor kutah hian sualngaihdamna Baptisma mi 4 in an chang bawk a ni.
July 17, Pathianni vek khan Bung Bangla Kohhranah Evan K Vanlaldika chuan mithar pakhat Kohhranah sengluhna a nei.
July 17, Pathianni vek khan Seling Kohhranah mithar 2 Kohhranah Evan Vanlalsiama’n sengluhna a nei a, Evan Philip VL.Hmuchhuaka’n naute hlanna a nei bawk.
Khawbung bial, Leithum Kohhranah July 17, Pathianni khan mithar pakhat sengluhna neih a ni. Sengluhna hi Bialtu Pastor H.Lalbiakzauva chuan neiih Evan H.Lalhmingmawia kutah sual ngaihdamna baptisma a chang nghal a ni. Leithum hmunah hian Evan H Lalhmingmawia hian rawngbawlna anei mek a ni.
Thingsulthliah Bial, Mualmam-ah July 17, Pathianni zan inkhawmah Member thar 3 te chu Evan Khumtea’n sengluhna a nei. Mualmam ah hian Bro.Lalrinenga, Thingsulthliah chuan riahchilhin rawngbawlna a nei mek a ni.
Serchhip P&E veng ah Evan F.Malsawmdawngliana Ramhlun Vengthar chuan Crusade nei mek in, kohhran ho an hlim hle. July 17, Pathianni khan Kohhran nisa pakhat in sual ngaihdamna Baptisma chang thar in, Crusade hi July 24, Pathianni thleng pawh sei a ni.
———-
Thisen pe:
July 16, Inrinni khan Champhai Bethel Bial PYD te chuan a thlawnin thisen an pe. Thisen hi Civil Hospital Champhai-ah kalchilhin an pe a ni. Thisen pe tute hi mipa 12 leh hmeichhia 2 niin a vaiin unit 14 an pe thei a ni.
———-
Pathian chawimawina:
July 16, Inrinni khan Bazar Bial, Ramthar Kohhrana lawi, Bro. Zonunsanga te chhungkuain Pathian chawimawina an nei a, Speaker ah Pastor J.Lalhmingsanga hman niin kohhranho zingah thlarau thianghlim malsawmna tam tak a thleng a ni.
Armed veng kohhranah pawh Upa VL Hmangaihzuala te chhungkua in Pathian chawimawina an nei bawk a, Speaker ah Evan R.Vanchhunga hman niin kohhran chhung ah Thlarau thianghlim malsawmna lo thlengin mi 6 in Isua hmingin sual ngaihdamna Baptisma an chang a ni.
July 19, Thawhlehni khan Saitual Bial N.Lungpher Kohhranah Bro.Lalhlupuia Zote te chhungkaw kaltlangin Pathian chawimawina neih a ni a, Kohhran ten hlim takin hun an hmang. He chawimawinaah hian Speaker-ah Bialtu Pastor, Rev.T.Lalbiakliana hman a ni.
Facebook