North Mizoram District Rammut Report

1. North Mizoram District, Aizawl Chaltlang kohhrana Upa H.J. Ronghinglova, Sis. K. Lalhmachhuani B/w, Bro. P.c. Lalliantluanga, Evan. Pc. Lalrokima leh bialtu Pastor Rev C. Lalbiakzuala te  chuan kar khat August 10- 17  chhung khan rammuin North Chaltlangah an fehchhuak.
Zan tin inkhawmin zing tin tawngtai inkhawm buatsaih a ni a, kohhran in tlawhkualin tawngtai rawngbawlna an nei a, Rammua kalten thusawi rawngbawlna an in chansem thin. August 15 Thawhtanniah Bethel neih niin mi engemawzatin thlarau dawng tharin hun hman chhungin siamtharna engemaw zatin an chang a, thlarau malsawmna dawngin an hlim hle. Zaikhawmna boruak hlimawm tak neih thin a ni bawk.
August 16 Thawhlehniah Bro. Lalthuthlunga te chhungkuain an vawk thawhin Pathian hnena lawmthu sawi chawimawina neih a ni a, he chawimawina hi N. Chaltlang kohhrana kum 16 hnua chawimawina neih leh hmasakna ber nia hriat a ni. Chawimawinaah hian Sis. K. Lalhmachhuani leh Evan. Pc. Lalrokima ten rawngbawlna an nei. Rammut hian rah duhawm tak a chhuah a, Kohhranah hlimna leh lawmna, thlarau malsawmna leh siamtharna chang engemawzat an awm. Chaltlang Kohhran hian N. Chaltlang Kohhran te August 29 Pathianni hmanpui tur hian an kal leh a ni.
2. N. Mizoram District, Maubawk Bial Missions Department leh Lawipu Kohhran tangkawp te chuan Rammut thla denchhenin August ni 1 atang khan Lawipu kohhranah Rawngbawltu ruaiin Crusade an nei a, rawngbawlna Pathianin hriak a thih a, Pathian chawimawina tum 2 awmin, member thar 18 ten Pentecost Kohhran an zawm thar bawk.
Tin, N. Mizoram District, Chanmari West Kohhran te chuan an Biak Inah Aug. 20-21 chhung khan Revival Crusade Speaker atana Sis J.Lalmuankimi (Nutei) hmangin an nei a, Speaker hi Serkhan atangin mi pakua in an tawiawm. August 21 Pathianni chawhnuah Serkhan khua member 2 ten Isua hminga Baptisma Evan. C. Lalremthanga kutah an chang a, pakhat zawng hi mithar a ni. Baptisma chang tharte hi Sister J. Lalmuankimi rawngbawlna kaltlanga thuthlung hmu an ni. Sist. J. Lalmuankimi hi Serkhana rawngbawl mek lai a ni.
3. August 21 khan N. Mizoram District, Kawnmawi Local-ah Pathian chawimawina neih a ni a, chawimawina inkhawmah hian mi thar 10 ten Evan. Lalramthara Sailo kutah Isua hmingin Baptisma an chang. Pathian chawimawi inkhawm hi Bialtu Pastor Jacob Lalremsanga leh Bilkhawthlir Bialtu Pastor Lalpianthanga, West Phaileng Biala Rammu mek ten an hmanpui.
Baptisma chang tharte hi West Phaileng atangin mi 8 leh Kawnmawi atangin mi 2 te an ni. West Phaileng Bialah hian Pathianin hna nasa takin a thawk a, Rammu mek  Bilkhawthlir Pastor Lalpianthanga pawhin kar thar hian a Rammut a chhunzawm leh ang.
Rawngbawltute hian Pathian chakna ringin Pentecost Maicham la din ngai lohna West Phaileng Veng chungah Maicham tundin an tum a, kohhranhote tawngtaipui turin an ngen a ni.
4. North Mizoram District Bukpui Bial, Bukpui kohhranah July  28, Pathiannni khan Tlangval pakhatin Isua hmingin Baptisma a chang. Baptisma chang hi mithar niin; Bialtu Pastor R. Thanglura’n Baptisma rawngbawlna a nei a ni.
5. N. Mizoram District, Chaltlang Bial Chanmari kohhran ten Rammut Programme hmangin Aug. 21 Pathianni hmang khan Tlangnuam Bial Melthum kohhranah an fehchhuak a Pathian fak leh chawimawina hun an hmang ho.
Member thar :
1. August 21 Pathianni khan Lunglei District Missions Field Putlungasih khuaah member thar panga (5) Putlungasih Home Missionary Evan. Simona Hmar chuan kohhranah a lawmlut.
2. Central District, Tura section chhungah Rev. R. Lalthanzuala, Bialtu kutah mi thar 2 in sual ngaihdamna Baptisma an chang.