Chhimtuipui District-a Niawhtlang khuaa Thlarau Thianghlim harhna chu chhunzawm chhoh zel a ni a, Lalpan a Thlarau Thianghlim la dawng lo tam tak dawng duha pan te hnenah malsawmna a pe mek zel a, thuthlung hre lo leh Lalpa ngaihdamna la chang lo te pawhin suam ngaihdamna Baptisma an chang chho mek zel bawk a. August 14 (Pathianni) pawh khan mi 5 in Thlarau Thianghlim Baptisma an chang thar leh a ni.
August 21, Pathianni hian Sis. Lunghnemi te chhungkua chuan Pathian chawimawi nan an vawk pa sum 6 an pe a, midang engemaw zatin sum fai an thawh bawk hmangin chawimawina an nei leh dawn a ni. Chawimawi nana ran leh sum fai pe thinte hian Thlarau malsawmna an dawn avangte, an fate leh an tuten Thlarau Baptisma an chan avangte in lawmthu sawi nan ran leh an thil neihte an pe thin a ni.
Niawhtlang hlimna hian Chhimtuipui Local hrang hrang a kap eng mek a, Saiha khawpui veng hrang hrangah revival inkhawm leh chawimawina a awm chho mek bawk. Saiha District Headquarter Kohhran te pawh Bus hmanga Niawhtlang hlimna chhim a an kal boruak kal zelah Thlarau Baptisma mi engemaw zatin an chang thar a, Kohhran boruak a nuam hle. Hlimna chang tharte pualin August 8 (Thawhtanni) zan atang khan zan tin follow up programme hmangin revival inkhawm an nei. Saihatlangkawn Kohhranah pawh harhna thlengin a kang kai zel a, LAD leh PYD ten August 15, Thawhtanni zan atang khan Kohhran chhungkaw tinah Home Crusade an nei chho zek bawk.
Facebook