Vairengte Bial: Vairengte Bial chhung Local hrang hrangah Pathian Thlarauvin hna thawkin Vairengte Bialah kumin chhungin Pathian Chawimawina Tum 6 neih tawh a ni a, July thla chhung khan Kohhrana Mithar sengluh hi mi 38 lai an tling bawk. Thla liamta Aug. thla Rammut chu Bial chhung kohhran hrang hrangte’n urhsun taka hmangin mahni phak ang tawka ram beih hna an thawh bakah Kohhran sawhngheh hna nasa takin an thawk bawk a ni.
Vairengte Bial PYD te chuan Mizoram UPC tena General PYD Conference Vairengte Joint YMA Playground-a an neih turah hnatlanga puih an rel angin Sept. 2, Zirtawp ni khan Pandal sak hna an thawhpui bawk a ni.
Tlangsang Bial: Tlangsang Bial Behliangchhipah August thla Rammut thla khan Lengpui Bialtu Pastor B. Vanlalruata leh a thiante chuan rawngbawlna neiin Pathian Thuthlung hmu thar mi 1 a awm, Rammutnaa Pastor B. Vanlalruata tawiawmtu Bro. Jakob Ngursangkhuma chuan Behliangchhip kohhran Biak in pualin ama sum cheng singthum (30000) a hlan bakah Biak In sak bul tan nan Rs, nuaikhat (100000) remchanga an rulh atan a hman tir bawk.
Rammua fehchhuakte hian Behliangchhip hmun hi Aug. ni 29 Thawhtanni khan an chhuahsan a, Tlangsang Bialtu Pastor K. Ainawna’n Ni 29 Thawhtan zan vek atang khan Behliangchhipah Rammut hna a thawk ve nghal a ni.
Aibawk Bial: Aibawk Bial chhungah Pathian hnathawh thlengin Aug. 27 Inrinni khan Aibawk bial Aibawk Kohhranah Evan. Dawla te chhungin Pathian chawimawina an nei a, hlim takin Pathian fak leh chawimawina hun an hmang. Chawimawina boruak kal zelah Aug Ni 29 Thawhtanni khan Bro. Lungkhama te chhung kaltlangin Pathian Chawimawina neih leh a ni bawk.
Aibawk Bialte hian an Bial chhunga Rammua hna thawk Rev. K. Malsawmtluanga Tlangnuam Bialtu Pastor chu Aug. ni 27 Inrinni khan tawiawmin Pathian Chawimawina Hualngohmunah an buatsaih a, Hualngohmun kohhrante bakah Tlangnuam Bial leh Aibawk Bial atanga chawimawina chhimtute nen hlim takin hun an hmang a ni.
Aug. 28, Pathianni chawhnu khan Hualngohmunah hian Mual inkhawm buatsaih niin Tlangnuam Bialtu Pastor Rev.K.Malasawmtluanga Chanchin tha hril rawngbawlna a nei. (Aibawk 1)
Durtlang Bial: Durtlang Bialte chuan kar kal ta August Ni 27 Inrinni khan Rammut Programme hmangin Selesih-ah Revival Crusade an nei a. District Tirhkoh Ramtlan Evan. K. Malsawmkima Speaker ah tangin rawngbawlna an nei a, Bialin Pathian chawimawina hun an buatsaih bawk a, hlim takin hun an hmang a ni. Durtlang Bialte hian Selesih-ah hian Thuthlung Crusade an nei tel bawk.
Chaltlang Bial: Tarlan tawh angin Chaltlang Bial Chanmari Kohhrante chuan Rammut Programme hmangin Aug. ni 21 khan Tlangnuam Bial Melthum Kohhrante an tlawh a, mi 35 an fehchhuak, hetah hian kohhran pahnih maicham buatsaihte an hlawk hle a, kohhran pahnihte inchawkphur thar lehin hun hlimawm tak an hmang.
Chaltlang Kohhran te pawhin an Bialtu Pastor Rev. C. Lalbiakzuala hovin Rammut fehchhuah tum hnihna atan Aug. ni 24 Nilaini khan Bukpui Bial N. Chaltlang panin an thawkchhuak a, Aug. ni 29 thawhtanni khan Bro. C. Sangnunkhuma te chhung kaltlangin Pathian chawimawina hun neih a nih bakah Pentecost huangah Mithar 7 lai sengluh a ni bawk.
Bilkhawthlir Bial: Dist. Supdt. Rev. C. Lalrammuana chuan Bilkhawthlir Bial chhunga Pentecost kohhran hrang hrang te tlawhin kar kalta Aug. ni 27th-29th. Inrinni atanga Thawhtanni zan thleng hmang khan Financial Campaign neiin hun a hmang. District Supdt. hian rawng a bawlnaah thu sawiin Kohhranah chuan hruaitute thlen chin hi Kohhran thlenchin a ni a, Pathian tana thilpekah Kohhran berin thil a tih dik loh chuan tu hi nge thil tidik tur chuanga kan beisei tiin, Kohhran hi kal dik ila, Ram chu a kal dik a ni mai tiin kohhranhote a fuih. (Bilkhawthlir 1,2,3)
Headquarters Bial: Headquarters Bial chhunga Mission Vengthlang Kohhran te chuan Rammut thla hmangin Aug. ni 23 zan atang khan rawngbawltu ruaiin Crusade an nei a, Mithar 2 sengluh a ni. Crusade-ah hian Bro. K. Pazawna’n Headquarters leh Bro. Lalduhawma Armed veng amite’n rawngbawlna an nei a, Aug. ni 27 Thawhlehni khan Bro. Lalbiakliana Chhangte te chhungkua kaltlang Pathian chawimawina hun hlimawm tak neih a ni bawk. (Video msvt & Pic. msvt. 1,2,3,4)
Hqrs. Bial Khatla South Kohhrante chuan Aug. ni 27 Inrinni atang khan Rammut Programme hmangin Crusade an nei a, Spaeker-ah Rev. H. Vanlalchhana Upper Republic Bialtu Pastor an hmang, rawngbawltu rawngbawlna atangin Ni 28 Pathianni zan khan Baptisma chang 3 awmin Bro. Vanlalvena te chhungin Pathian chawimawina vawiin khan an nei a ni. Speaker hian Aug. ni 29 Thawhtanni leh thawhlehni nileng khan Tihdam rawngbawlna a thawk a, kohhran chhung leh pawn lam atangin damna chang thahnem tak an awm bawk.
West Phaileng Bial: Aug. Ni 28 Pathianni khan West Phaileng Bial chhung West Phaileng Electrict Veng kohhran tih hming pu turin Bialtu Pastor Jacob Lalremsanga chuan Preaching Point thar a hawng. West Phaileng Khua Electric Veng-ah hian kohhran din a nih theih nan hun engemaw chen atang khan mimal leh Kohhran ten hma lain rawngbawltu te tirin hmalakna an kalpui a, Rawngbawltu te Pathianin a thawhpui a, member thar hlak mi 15 awmin he kohhrana lawi tur te nen member 20 niin bul an tan dawn a ni. Member tharte hi Aug Ni 28 Pathianni khan lawmluh an ni nghe nghe a ni. (Pic 1,2,3,)
Sihphir Bial: Sihphir Bial te chuan Aug. 28, Pathianni zing, chhun leh zan hmang khan Bial huapin Revival Crusade Serkhan YMA Hall ah an nei a. Speaker atan Sis J. Lalmuankimi (Nute-i) hman a ni a, Sis Ramtharzuali(Tharte-i), Bro Lalrintluanga leh Sis Lalhmingmawii ten zaia rawngbawlna an nei.
Revival ah hian Bial chhung Local hrang hrang atangin member an kal tha hle a, Thlarau Boruak hlimawm tak nen hun hman a ni. Sis J. Lalmuankimi hi Serkhan ah hian a thiante mi paruk (6) nen rawngbawla awm lai mek an ni a, anni hi Thlarau in a tirh luh niin lawmman pawh beisei lovin mi inhnuai luahin an khawsa a ni. An rawngbawlna a nung in Serkhan ah hian an rawngbawlna atanga mithar 7 kohhranah sengluh an ni tawh.
Kol. Venglai Bial: Aug Ni 29 Thawhtanni khan Kol. Venglai Biala Kohhran din thar BUKVANNEI chu Dist.Superintendent Rev.C.Lalrammuana chuan a tlawh. District Supdt. hi Bialtu Pastor C.Laltlanchhuaha rawngbawltu thenkhat ten an tawiawm bawk. (Bukvannei 1,2)
Kawnpui Bial: Kawnpui Bial Missions Dept. leh LAD te chuan Rammut Programme hmangin Aug. ni 27 Inrinni khan kawnpui Bial chhunga Kohhran ding thar Rashtali Kohhran an tlawh. Rashtali hi kea kal ngai niin mi 10 an fehchhuak a LAD ten thawmhnaw bag 30 bawr ken sakin Meidumah kohhran member 30 velin an lo hmuak a, hlim takin hun an hmang a ni.
Kawnpui lam atanga tlawhtute hian Rashtali-a rawngbawlna an neih chhung hian nau 7 hlanin, Isua hmingin Baptisma mi 12 in an chang bawk. August thla chhungin mi thar 14 hming ziah thar a ni. (Pic. Kawnpui 1)
Chawlhhmun Bial: District PYD Board rorel bawhzuiin Chawlhmun Bial PYD te chuan Kawrthah a Crusade nei turin Bial chhung Kohhran hrang hrang atanga thlan bik mi 8 ten Kawrthahah rawngbawlna an nei. Crusade nei tura fehchhuakte Bialtu Pastor P.C Laltlankima leh Bial PYD President Bro. RC. Lalhriatpuia ten hovin Aug. ni 31 Nilaini khan Aizawl an chhuah san a, ruahman ang chuan Aug. ni 31 Nilaini atanga Sept. Ni 4 Pathianni thleng rawngbawl hna thawkin Sept ni 5 Thawhtanniah an lo haw leh ang.
Facebook