Mihlim khuang Archive Cell in an la ta

June 25 khan Durtlang Aizawl a Mualveng kohhranah hoten hun engemaw chen an kawl Mihlim khuang chu Archive Cell a dah turin lak a ni.

Thlarau thianghlim hnathawh an chan vanga hmuhsit leh nuihza siamnana hman thin mihlim hmasa te’n Pathian an fakna leh an chawimawina hmanraw tangkai, khuang tha tak mai Durtlang kohhranten an kawl thu Archive Cell chuan a hriatin a ngaihven hle a. Committee in ruahmanna fel tak siamin Durtlang kohhran hruaitute hnenah dilna a thlen a, chumi bawhzui chuan June 25, Pathianni khan Rev R Lalrinsanga Gen. Secretary, Rev. R. Vanlalawia, Archive Cell Chairman, Rev Lalngailiana, Archive cell Secretary leh  Cell member Bro C. Lalrammawia ten Durtlang kohhran hi han tlawhin kohhran hruaitute nen an in bia a. Chawma inkhawm hian Rev. R. Lalrinsanga’n thuchah a sawiin Inkhawm banah Durtlang lal Pu Ch.Ngura tupa Upa C Lalbiakliana inah, Church board te nen inkawm khawm in Chawhnu inkhawm ah khuang chu inhlan turin ruahmanna an siam a.

Senior Upa Zangenga’n khuang chanchin sawiin Archive Cell te kawl atan Rev. R. Lalrinsanga, General Secretary hnena a hlan a, lawm taka dawngin Rev. H. Lalngailiana, Archive Cell Secretary chuan lawmthu a sawi a. Rev. R. Vanlalawia, Archive Cell Chairman chuan he inkhawmah hian thuchah a sawi thung.

 Senior Upa Zangenga kum 82 mi leh a u Sis. Zatlingi leh Sis. Lalchhuangi, mi hlimte an hnawl laia tel vete chu he khuang chanchin leh an hun laia mihlimte kawmin khuang chanchin leh a hun lai thil thleng sawiin inkhawmna hun duhawm tak an nei thei bawk.

He khuang hi Durtlang lal Pu Ch.Ngura u fapa Dr. Zokhuma lei a ni a, A ni  hi Assam ram hmun hrang hranga thawk kual a ni. Mizorama a lo chhuah chhoh hian khuang, dar tha mi a siam pahnih a rawn hawn a, a te zawk hi Presbyterian kohhran chuan Biak inah an hmansak a. Durtlang ah hlimna a lo thleng a, tawnghriatloh zaite nen an han tih tak mup mupah chuan kohhran hruaitute chuan tha ti lovin khuang chu an hmang duh ta lova, khuang khat chauh, solfa a zai turin he khuang hi an hnawl ta a.

Khuang an hnawl hnu rei vak lo kum 1951 khan hlim na chu a reh thei ngawt si lova, Upate chuan khauh zawka invawn tumin Harhna hruaina chungchang An Kohhran hmunpui in a tihchhuah te chu chhiarin thlarau thianghlim harhna changa mi hlim ho chu an zilh ta a. Thlarau lam tulna bei nasa zualte chu lamtual atangin an nam chhuak a, nu pakhat nau pua tul lutuk phei chu a samah kekin an hnuk chhuak a, chuti taka an Upate an khauh takah chuan an petromax chu pa pakhat hian a khai chhuak a, pawn lam atanga lo thlir tu tlangval te pawhin mi hlim ho thlavang hi lo hauh vein  mi hlim ho chuan biak in thlang a in pakhatah chuan an zaikhawm chhunzawm ta a, chuta tang chuan an inkhawm hrang ta a ni.

Kum khat zet an inkhawm hran hnu chuan han belh tur mumal an neih loh avang leh hmun hrang hrangah mi hlimte nekchep a nih zel tak avangin an inkhawm mumal thei ta lova. Pu Ngura chuan an Khuang pawh chu a in lamah kawl leh ta a.

Kum 1955 khan Rev Zakamlova leh a thiante chuan an chanchin hi lo hriain Durtlangah hian rawng an bawl a, Krismas pawh an hman pui ta a. Tichuan Feb 18. 1956 khan Lalpa Isua hminga sual ngaihdamna baptisma chantirin UPC an din ve ta a. Chutia kohhran an lo din takah chuan Pu Ngura khuang kawl chu dil lehin biak inah an hmang zui ta a. An hlimna duhloh vanga an hnawl tawh ngei  chu hlim taka Lalpa faknan an hmang chhunzawm ta a. A ruhrel hi Dar tha tak a ni a, a hmai lam erawh savun dangin an thlak fo tawh a, an hmang tangkai hle a ni.

Hun a lo kal zel a, kohhran hote pawh an lo pun zel tak avangin he khuang hi kohhrante tan a te laklawh ta deuhva, lenzawng hi khuang lai tiat, hawlhtlanga khap hnih ang vel a nih vangin khuang pui atan a te deuh tiin an hmang zui ta lo va. Amaherawhchu Lalpa Thlarau hlimna vanga kohhranin hmang duh lova hnawl, mahse Thlarau rawngbawlna ngaipawimawh Pentecost kohhran te tana hlu em em si a nih vang hian vawiin thlengin Durtlang kohhran te hian roh takin an  vawng tha ta a ni.

Mizoram kohhran a  chanchin pawimawh tak paitu he khuang hi Synod leh Theological College pawhin laklet tumin tum hnih an lo dil tawh a; mahse an phal lova. Archive Cell te dilna ngaipawimawha Kohhran hmunpui ngei a kawl that an remtih avangin Archive Cell pawh an lawm hle a ni.

Archive Cell hi chang tlung zawka siam turin hmalak mek a ni a,  India Hmarchhak huamchhungaa kohhran chanchin leh a kaihhnawih thil, bungrua, thlalak leh thu ziak te kawl that tumin ke kan pen mek a. Hemi chungchangah hian Archive Cell in tual-chhung kohhran tin hnenah  in kohhran din dan chanchin thehlut tura a ngenna te, Bial leh Local Jubilee Souvenir a bu a chhuah apiangte chu a copy thehlut turin ngenna a siam a, kohhran hoten lo ngaipawimawha a theihna apianga lo thawpui zel turin tualchhung kohhran tinten an sawm nghal bawk a ni.