February 22, Zirtawpni khan North Mizoram District, Kanghmun bial chhunga Kohhran Upa leh Bial hruaituten General Hqrs Office tlawhin hun an hmang.
Kanghmun Bial Upa te hi Bialtu Pastor Lalruatkima Fanai chuan hovin General Hqrs Office thawktute nen hun hman ho a ni a. General Suptd Rev. Lalmalsawma Sailo, General Secy Rev. R. Lalrinsanga leh General Treasurer Rev. Zohmingthanzama ten General huapa Kohhran rawngbawlna leh hmalakna report hrang hrang pein, kanghmun bial pastor leh Bial hruaitute pawhin Kohhran hmun pawimawh an tlawh chhan leh Bial chhunga rawngbawlna hna an thawh dan report an pe a, General Hqrs Office tan Hmunphiah thahnem tak an pek bawk.
General Suptd Rev. Lalmalsawma Sailo chuan Kanghmun bialten a neitu chan changa Kohhran Office tlawhna chang an rawn hria chu lawmawm a tih thu sawiin; General hi hruaitu bawr leh office a thawktute ta chauh a ni lova, India hmarchhak Kohhran hote ta a ni tih hriat thar a tulzia sawiin, General hruaitute, Office thawktute pawh hi Tualchhung Kohhran ta vek kan ni a, Kohhrana kan activities hrang hrang te, kan thilpek zawng zawng pawh kan lawina tualchhung Kohhranah theuh a lut vek a, chuvang chuan Tualchhung Kohhran ta kan ni. General hi tu ta bik mah ni lovin, kan zavaia ta a ni tih kan hriat thar leh a tul a ni a ti. General Hqrs hi inti neitu taka Tualchhung leh Bial hrang hrangte pawhin rawn tlawh zel turin a sawm a, hruaitu leh thawktute pawh nasa zawka tawngtaipui thin turin a sawm nghal bawk.
Kanghmun Bial Kohhran Upate hian General Hqrs Office bakah North Mizoram District Office leh Aizawl East District Office te, Aizawl khawpui leh a chhehvela hmun pawimawh hrang hrang an tlawhkual nghal bawk.
Facebook