District PYD leh LAD Inkhawmpui hlim taka hmanzawh a ni

1. DISTRICT PYD : Aizawl East District PYD Inkhawmpui Vawi 23-na chu Khawlian Playground-a Pandal sakah February 16 atanga 19 chhung khan hlim taka hman zawh a ni. Thupui-ah “I Pathian tawk turin inpeih rawh” Amosa 4:12 thu hman a ni a, thupui thensawm hmangin Rev. C. Lalengliana, Pastor H. Lalropuia, Rev. Rosanga Kawlni, Evan. H. Lalrinliana leh Rev. R. Laltlankima te hnen atangin Pathian Thu ngaihthlak thin a ni.
February 16, Ninga zan atangin inkhawmpui hman tan niin Evan Lalramzauva, Ex-President, District PYD chuan hawnna a nei a,  Bial hrang hrang atangin report ngaihthlak a nih bakah District PYD hnuaia Sub-Committee peng hrang hrang Education, Kumpuan, Fund Raising, Music & Sound leh Pentecostal Choir te hnen atangin report ngaihthlak niin Palai lawmna thu, Pastor Lalhmangaihawma Parte, Bialtu Pastor hnen atangin ngaihthlak a ni bawk.
February 17, Zirtawpni nilengin Pandal-ah rorel palai mi 486 ten rorelin Daido-a District PYD Missionary rawih mek Evan H.Lalbiakzauva’n Daido rawngbawlna report pe in District Treasurer leh Secretary te hnen atangin report ngaihthlak a ni bawk. Report atanga a lan danin District chhungah PYD member 6265 awmin khaw 133-ah PYD hi a ding a, Kum 2016 chhung khan mi 325 ten zuk leh hmuam nghei tharin PYD member zingah Lehkha tara Innei tuak 38 an awm a, PYD rawngbawlna atangin member thar 10 sengluh an ni a Thlamuantu Copy 1397 lak a ni bawk.
An rorel zingah Kum 2021 Inkhawmpui leh chu Sakawrdai Bial-ah nghatin ruatsa angin 2019 chu Champhai Bethel Bial-ah hman tur a ni. Inkhawmpui ninga zan atanga hman thin chu Kum 2021 atang chuan Zirtawp zan atanga hman tawh tura tih te, Kum 2018 atangin kumtirah PYD Inkhawm kim zan leh member thar lawmluhna neih tura tih a ni a, Family Guidance and Councelling Cell din ni se tih chu Kohhranpui-ah thlen tura tih a ni bawk.
Rorel Inkhawm neih zawhah District Board neih nghal a ni a, hetah hian Kum 2018-a Hla Kutpui hman turah Organising Committee hetiang hian siam a ni:
  • Chairman-ah Evan C. Lalchhuanga, District Treasurer
  • Secretary-ah Bro Vanlalropeka, Mualpui Bial
  • Treasurer-ah Bro Lawmsangkima, Bethlehem Bial te niin Bial hrang hrang atangin Committee member turte siam nghal a ni bawk.
February 17, Zirtawp Zan atangin Revival Inkhawma hun hman a ni a, Evan C. Lalremruata, District PYD Asst. Secretary chuan Inkhawm kaihruaiin, Rev C.Lalengliana, Rabung Bialtu Pastor hnen atangin “Mimal-ah” tih hmangin thuchah ngaihthlak a ni. Kumpuan Committee ten Bial leh Tualchhunga hma la tha te hnen-ah lawmman semna an nei bawk a, Evan Hr.Lalrindika, Ex-Chairman, Thlamuantu Magazine chuan Thlamuantu Campaign a nei bawk a ni.
February 18, Inrinniin Pandal-ah Fellowship-a hun hman niin hunserh Evan Lalzarzoliana Parte, Hnahlan Bial chuan hmangin Bro C.Lalrammawia, Chairman, District Education Committee leh Upa K. Lalramhluna, Chairman, District Kumpuan Committee te hnen atangin thusawi tawi ngaihthlak a ni. Fellowship-ah hian mal zai bakah Zaipawl hmangin Pathian fak hona neih niin Chhingchhip Bial PYD ten lemchan hmuhnawm tak an entir bawk a ni. Fellowship neih zawh-ah hian District hruaitute bakah Bial PYD OB leh mi thahnemngai engemaw zat ten ruahman angin Daido-a rawngbawlna hun tawi neih niin, hetah hian Daido Quarters pualin mithahnemngai te hnen atangin cheng singhnih chuang hmuh leh a ni bawk.
February 18, Inrinni zanah Evan F.Malsawmtluanga, District PYD Secretary chuan Inkhawm kaihruaiin Pastor H.Lalropuia, General PYD President chuan “Chhungkua-ah” tih hmangin Pathian thuchah ngaihthlak a ni a, District chhunga Budget pe tlak hmasa Rabung Bial leh Khawlian Bial te hnenah lawmman hlan an ni bawk. Bro Lalramchhana Pautu, Rabung Bial kaihhruaiin PYD thiltum sawi rualna neih a ni bawk.
February 19, Pathianni Chawhma Inkhawmah Rev R.Laltlankima, President chuan inkhawm a kaihruai a, Rev F.Lalchhanhima’n member boral mi 25 te sunna a kaihruai. Rev Rosanga Kawlni, District Superintendent hnen atangin “Thianghlimna-ah” tih hmangin Pathian thuchah a sawi a, Pathianni Chawhnuah Evan. H. Lalrinliana, Ex-President, District PYD  chuan “Thuthlungah” tih hmangin Pathian thuchah a sawi. Pathianni zanah Rev R.Laltlankima hnen atangin “Kohhran-ah” tih hmangin Pathian thuchah a sawi.
Aizawl East District PYD Inkhawmpui hi Khawlian khawtlangin lo thlengin mikhual Organising Committee-ah pawh Chairman-ah YMA President chu hman  a ni a, mikhual hmuah leh sem pawh YMA ten thawkin Pandal sakna-ah pawh nasa takin an lo pui tawh a ni. Khawtlang mipuite inpekna a ropui em em a ni.
2. DISTRICT LAD : Churachandpur District L.A.D. chuan the 50th Annual Conference-cum-Golden Jubilee lawmna February 16-19, 2017 chhung khan Dist.Hq. Lamka Local ah hlim takin an hmang zo ta. General LAD hruaitu pathum te pawh an hmanpui a, Thuhrilh rawngbawlna leh Seminar an neihpui bawk. February 19, 2017 Pathianni tuk 10 khan Jubilee lung hawnna Biak in kawtah an nei a, chumi zawhah Jubilee dar vuakna, member thlan bik ten an nei a, Jubilee dar vawtu zingah hian kum 90 aia tam LAD member eng emaw zat an tel thei bawk. PYD Lamka Local zaipawl in Jubilee hla thar Bro. Jacob Lalengtluanga PYD Lamka Local phuah chu an sa a, mi rilru a hneh hle.
Chhun inkhawm an hman hnuin chawhnuah lenkhawmna nei leh in, tlai 3 pm khan ruai an kilho nghal bawk a ni.