North Mizoram District Pastor Bial 28 ten a ruala Bial Conference February ni 10 – 12 chhunga an hman Bial hrang hrang report thenkhat lo tarlang ila:-
1. Aibawk Bialte chuan Conference vawi 38-na Sateek Kohhran Biak inah hmangin Speaker atan Evan. H. Lalrinpuia an hmang. Kum 2018-ah Aibawk Biak In ah Conference nghatin, Muallungthu-a tirhkoh dah District-a dil te leh Financial Campaign neih te Conference hian a rel.
Aibawk Bial Conference hman thlarau boruak kal zelah Sateek Upa Lalhruaia’n Pathian chawimawi leh lawmthu sawina nei chhunzawmin Mikhual tam zawk ten an cham chilh bawk.
2. Bairabi Bial ten Confe vawi 39 na hmangin Bairabi North Biak Inah confe an an nei a, District Treasurer Rev. Chhiarpuia chu Conference speaker atan an hmang. Conference Thupuiah Thianghlimna I Petera 1:15-16 hmangin, Kum 2018-ah Bial Conference Saikhawthlirah an nghat a, Kum 2017 chhunga Chhandamna Camping neih te, Kumin chhunga Missionary rawih te bakah Bial huap Seminar neih te conference hian a rel a ni.
3. Bilkhawthlir Bialte chuan Conference Vawi 35-na Buhchangphaiah hmangin an hlim hle a, Conference tiak tuk February ni 13-ah kohhran member Lalbuatsaiha te in sak sakin Bial huapin work camp an nei nghal bawk.
4. Bukpui Bial Conference vawi 28-na Lungmuat Biak Inah an hmang a, Confe. chhung hian Sakrament rawngbawlna Bialtu Pastorin a buatsaih bakah Thianghlimna Sermon tha tak tak ngaihthlak a ni bawk.
5. Chaltlang Bialte’n Conference vawi 46-na Chaltlang Kohhran Biak Inah neiin; Rev. P. Chunga, Former General Superintedent chuan Conference hawnna a nei a, Conference rorel pawimawh zingah kum 2018 Bial Conference thlenna tur atan Bawngkawn Kohhran ruat a ni a, Account enkawl dan leh Leadership Training neih te, Bial chhunga Thianghlimna committee leh Camping Committee neih te, Kumin chhunga Revival Crusade neih te, Kumin chhunga Camping neih te an rel bawk.
6. Chawlhhmun Bial te chuan Bial Conference vawi 25-na Conference Silver Jubilee Chawlhhmun Biak Inah hmangin hlim takin Conference an nei. Kumin March Ni 28 hian Bial Silver jubilee lawm turin an inbuatsaih a, Silver Jubilee hi Ni 2 chhung lawmin Bial huapa ruai theh an tum bakah Bial chhunga Kohhranin member a phuar tawh zawng zawng pawh phelh vek tur a ni bawk. Biak Ina tawngkam hman dan leh rawngbawltute vantlang rawngbawlna kawnga mawhphurhna tih hmanga seminar neih an tum bawk a ni.
7. Durtlang Bial ten Conference vawi 34-na Durtlang North kohhran Biak Inah hmangin confe rorel pawimawh zingah Conference thlengtu tur rotation-a kal te, Rawngbawltu retreat programme hman leh Bial Revival neih te an rel.
8. Dinthar Bialte hian Conference vawi 37-na Dinthar Kohhran Biak Inah Isua lokal lehna tih thupuia hmangin an nei a, Conference hman an hlim hle. Conference ah hian kumin chhunga hmalakna turin Bial chhunga Ram lak beihpui thlak an rel bawk.
9. District Headquarters Bialte’n Conference vawi 50-na Golden Jubilee Conference Headquarters Biak In Tuikhuahtlangah an hmang a, Conference vawi-50 na hriatrengna Souvenir chu Souvenir comt. chairman Evan. Lalchhuanmawia Sailovin a tlang zarh bawk. Conference rorel pawimawh zingah Home Missions leh General Missions Department tanpui leh Bial huap leadership training neih te an rel a ni. Conference-ah hian Evan. Lalchhuanmawia Sailo leh Bialtu Pastor H. Zabiaka’n Thusawi rawngbawlna hun an hmang.
10. Hunthar Bialte’n Conference vawi-4-na Edenthar Kohhranah hmangin kumin chhungin Bial huapa Rammut thlaa rammut te, Bial chhunga Mual inkhawm neih te, revival Crusade neih te, Phunchawng leh Phunchawng Mel-10 Biak in thawm that appeal neih te, Rawngbawltu Seminar neih te leh Bial thar hawnna tur Budget dah te an rel a ni.
11. Kanghmun Bial ten Conference vawi 22-na Bawngthah Biak inah hmangin Delhi Chaplain Pastor Vanlalruata chu Speaker atan an hmang. Conference rorel pawimawh zingah Darlung khuaa rawngbawltu dah te, District in Revival team nei leh tura District-a thlen te an rel.
12. Kawnpui Bialte’n Conference vawi 66-na Kawnpui Venglai kohhranah neiin Kum 2018-ah Bial Conference Khamranga neih an pass a, hei bakah hian Rawngbawltu seminar neih te leh Upa thi te biak ina vuina hun hman loh leh Thianghlimna committee din te an rel a ni.
13. Kolasib Diakkawn Bialte’n Bial Conference chu Kolasib Vengthar Biak Inah “Lal Isua lo kal lehna” tih thupui hmangin an nei a, an rorelah Conference rotation-a kal te, Khuangpuilam hmuna Seminar cum revival neih te leh Financial Campaign neih te an rel.
14. Kolasib Venglai Bialte’n Conference vawi 57-na chu Kolasib Venglai Biak inah an hmang a, Thupui atan ‘Isua lo kal lehna’ tih an hmang. Conference hi District Superintendent Rev. C. Lalrammuana’n hmanpuiin Speaker-ah a tang a, an rorel pawimawh zingah Kum 2018 Conference na tur atan Tumpui Biak In passed in Pastor Quarters sum ke nghet siam te, Financial Campaign neih, Camping buatsaih leh Upa leh Tual Upa te tan training siamte an rel a ni.
15. Lengpui Bialte’n Conference vawi 41-na Speaker atan Rev. K. Lalduhsanga District Missions Director hmang in an nei a. An rorel pawimawh zingah Kum 2018-ah Lengte-ah Conference nghatin Dilzawla rawngbawlna chhunzawm te, kumin chhunga Dapchhuah khuaa Kohhran din tura Crusade neih te, Revival Crusade neih te an rel bawk.
16. Maubawk bialte’n Bial Conference vawi 8-na Maubawk Biak Inah hlim takin an hmang.
17. Mamit Bial Conference vawi 26-na chu High School veng Kohhranah hman niin thupui atan “I din thar leh ang u” tih an hmang. Conference rorel zingah kum 2018 ah Conference chu Bial Headquarters-a hman tur in an passed a, 2019 – ah Luangpawlah an nghat thung. Bial chhunga preaching point pahnih leh Missions Field pahnih awm te inchhawka tlawh te, Preaching Point-ah thla 3 chhung tirhkoh rawih te an rel bawk.
18. Phainuam Bial ten Conference vawi 8-na Saipum Localah hmangin Kum 2018-ah Phainuam Bethel kohhranah Conference nghah a ni. Rorel pawimawh zingah Bial pui ram enkawlna tur Budget dah te an passed a, February 12 Pathianni chawhnuah Sakrament an kil bawk.
19. Rengdil Bial kohhranpui Conference Vawi-45 na hlim taka hmangin Confe. -ah hian Zawlpui Tirhkoh rawihna Appeal neiin Rs. 50,000/- an hmuchhuak. Conference ah hian Kawrthah khua chu Preaching point atan siam a ni bawk. Hei bakah hian Bungthuam-ah emaw Thinghlun-ah emaw tirhkoh dah leh tura District-a thlen te an rel bawk. Conference neih chhung hian mi 2 in baptisma an chang a ni.
20. Sialsuk Bialte’n Conference vawi-53 na Lungsei-ah neih a ni a, District Secretary Rev. Laltluanga’n conference a hman pui thusawi rawngbawlna a nei. Kum 2018 Conference Sialsukah nghah a ni. Conference tiak tuk February ni 13 -ah Kohhran te kaltlangin Upa Thangfela leh Tual Upa Lalhrechiang te chhungin ran an pek hmangin Pathian chawimawina Lungsei khawnawtin an nei. Chawimawinaah hian Rev. Laltluanga chu Speaker atan hman a ni.
21. Thenzawl Bialte hian Conference vawi 27-na Vengthar Local-ah hlim taka hmangin Conference Speaker atan bialtu Rev. Lalramzaua Sailo hman a ni. Kum 2018-ah Conference chu Thenzawl Vengpui Kohhranah an nei leh ang. Conference rorel pawimawh zingah Pastor thuthmuna Kohhran form anih in Vice-Chairman ruat ngei tura District a thlen te, Chhamdamna Camping PYD Agenda anga neih te leh Bial in a tul anga hman turin Samiana lei te an rel a ni.
22. Sumsuih Bial Conference Vawi 4-na chu Sumsuih Kohhranah neiin Speaker atan Sist. K. Lalhmachhuani B/w hman a ni. Conference thupui atan “Hma i sawn zel ang” tih an hmang. Kum 2018 conference neihna tur atan Lamchhip ruat a ni a, kum 2017 chhungin camping neih an rel bakah Bial Zaipawl din te, Thianghlimna Seminar neih te leh Kum 2018 ah Conference Thupui atan “Isua lokal lehna” tih hman an rel.
23. Sihphir Bial ten Sihphir Biak inah Bial conference vawi 22-na hmangin Pathianni chawhnu inkhawmah Sarament ruai an kil ho. Kum 2018-ah Sihphir-ah confe nghatin, kum 2017 chhungin Financial campaign neih te, Rammut thlaah serkhan bialah Revival neih te, kumin chhunga mithar 10 tal sengluh tum te, Bial PYD nen tangkawpa Gospel camping neih te, Thianghlimna committee din leh Thianghlimna beihpui thlak chhunzawm te an rel.
24. Tlangnuam Bial Conference vawi 19-na Samtlang Biak Inah hman niin Conference Speaker atan Bialtu Pastor Rev. K. Malsawmtluanga hman a ni. Conference thupuiah “A ram leh A felna chu zawng hmasa zawk rawh u” tih hman a ni. Conference Agenda 16 zingah 14 pass niin Pulpit rawngbawlna hlutzia inzirtir te, Account Training neih te, rawngbawltute puala retreat neih te, Bial chhunga Ramlak beihpui thlak te, Bial huap Camping neih te, Bial chhung rawngbawltute Bio-data siam te bakah Bial chhungah Thianghlimna Committee nghet neih te an rel.
25. Vairengte bialte’n Bial Conference vawi 24-na hlim taka hmangin an rorel pawimawh zingah Kum 2018- Conference Vairengte Chhim vengah nghatin kumin chhunga Fainancial Campaign neih te, Buhfaitham tham tha lawmman inpek te an rel a ni.
26. Reiek Bialte’n Conference vawi 68-na Ailawng Kohhranah hmangin Bialtu Rev. C. Lalhmuniana, Upa Remsiama leh Bro. Lalchungnunga ten thusawi rawngbawlna an nei a, Pathianni chawhnu inkhawmah Lalpa zanriah sacrament kilho a ni bawk. Kum 2018 Conference thlenna tur atan Rulpuihlim ruat a ni a, Thupui atan “I ram lo thleng rawh se” tih hman tur a ni. Conference rorel-ah Bial Conference Bu neih chhunzawm te leh Pastor quarters tih changtlun te an rel.
27. Tlangsang Bialte’n Conference vawi 17-na chu Tlangsangah hmangin Speaker atan Evan. Lallawmzuala, Evan. R. Lalrinchhana, Pastor K. Ainawna leh Rev. C. Lalhmingthanga te an hmang. Rorel pawhmawh zingah Bial huap chhandamna camping neih, Tlangsang leh Behliangchhip Biak in sak mek tanpuina District-a dilpui, Zomuantlangah Tirhkoh quarters sak, Zomuantlang Biak In sak District-a dil te bakah Zomuantlanga Tirhkoh rawih mek kumin chhung atana dah chhunzawm tura District dil te an rel a, kum 2018-ah Conference chu Behliangchhipa neih turin an rel a ni.
Facebook