Aizawl East District, Keifang Bial chhung a awm leh Kohhran la din ngai lohna Tawizo khuaah September 4, Pathianni khan member 14 Kohhran-ah lawmlutin Kohhran thar din a ni.
Tawizo-ah hian District Missions Department rawih Home Missionary Evan HK. Lalhmangaiha chuan kum 2015 September atang khan rawngbawlna a tan a. Rev C Lalhmingthanga leh a team- ten hun engemaw chen rawngbawlna an nei bawk a, damlo natna hrang hrang nei ten an dampui nasa hle a ni. Evan HK Lalhmangaiha rawngbawlna atangin member thar te hi September 4, Pathianni khan District Superintendent Rev Rosanga Kawlni leh District Missions Director Rev Darchhawna te chuan an lawmlut a ni.
Tawizo-ah hian hun rei tak Kohhran din tuma hmalak a ni tawh a, Pathian thlarau thianghlim awmpuina hnuaiah hlim takin September 4, Pathianni khan Kohhran thar duhawm tak hi din a ni ta a ni. Kohhran din tur hian Keifang Bial ten nasa takin tan an la a, Rammut thla pawh hmang hlei thei lovin rawngbawltu tawiawmin hun an hmang thin a ni. Tunah hian Keifang Bial-ah hian Tualchhung Kohhran 4 leh member 500 vel an awm mek a, Pastor V. Lalnienga’n Keifang bial hi a enkawl mek. Tawizo rawngbawlna atan hian a sum leh pai mai bakah a tha leh zung nasa takin a seng a ni. Keifang Local-ah hian tunhnaiah hian thlarau hlimna thleng chho mek bawkin August leh September thla chhung hian Pathian chawimawina pawh vawi 3 ngawt neih alo ni tawh bawk.
Facebook