United Pentecostal Church of North East India Kohhran thalai inkhawmpui lian – General PYD Conference vawi 44-na Khawzawl khuaa nghah chu hlawhtling taka neih a ni. Zuchhip Field-ah pandal mawi taka sak hnuaiah hlim leh lawm takin thlarauva khatin inkhawm thin a ni. Conference hi 10 November 2022 (Ningani) zan atanga tanin 13 November 2022 (Pathianni) zan khan Pathian Thlarau awmpuina nen ropui takin a tiak. Conference Palai kal zat hi thlen belh an awm deuh reng a, Palai kal hi mi 2000 bawr anga chhinchhiah a ni.
Conference theme atan “I pianna ramah haw leh rawh” (Gen 31:1) tih chu hman a ni a. Thupui hi – Thianghlimna ah, Rinawmna ah, Thuthlung ah, Thlarau Thianghlim ah tih tea then hrang lehin, Speaker hrang hrang hman a ni a, anni hnen atangin rawngbawlna nung Pathian thu chah tha tak ngaihthlak thin a ni. Chennai, India Unit atangin mikhual duhawm tak – Pastor Ruban Hobday leh Sis. Dr. Shandhya Ruban te nupa lo mikhual an ni a, 11 November 2022 (Zirtawpni) zan inkhawmah thusawi rawngbawlna ropui tak an nei.
Conference-ah hian lehkhabu pakhat – “Pathian thu bawm: thupui thlan bikte” Aizawl East District PYD Kumpuan Committee buatsaih chu Rev. H.Lalropuia (Gen PYD President) chuan tlangzarhna a nei nghal. Conference inkhawm hi Youtube PenNet Channel-ah LIVE-a pek chhuak thin a ni a. Media rawngbawlna ngaih pawimawh niin video coverage bakah official photographer pawh in ruat a ni a, conference service enlet theih turin PenNet Youtube, Facebook page leh Instagram lamah te pho chhuah thin a ni.
CONFERENCE ROREL
Rev. H. Lalropuia, General PYD President kaihhruaiin Conference rorel inkhawm chu Headquarters Biak In, Khawzawl Vengthar hmunah neih a ni a. Agenda pakua (9) rel zingah paruk (6) chu lungrual taka pass a ni. Rorel palai mi 300 bawr awmin tluang taka rorelna neih a ni.
Thu rel tlangpuite chu:
1. Kum 2024-a General PYD Conference hmun atan Lunglei thlan niin Lunglei District ten an thleng ang.
2. PYD Day – March 21 ni ah North East India huam chhungah a rualin member thar lawmluh neih thin a ni ang.
3. North East India dan bu Article 48, Section 252 siam that turin General Kohhranpui-ah thlen tum a ni.
4. General PYD Executive rel turin North East India Unit pawn hmun hrang hranga PYD member awmte pawh khawm a Pathian thu lama kaihhruai tura hmalak tum a ni.
Conference thu relah hian General Kohhranpuia thlen tur pahnih leh General PYD Executive-a rel tur pahnih dah a ni.
Facebook