Khawvelin a manganpui Covid -19 hri leng chuan khawvel ram hrang hrang a nuai mek a, India ram ngei pawh he hrileng avang hian a buai hle a, mi tam takin nunna an chan tawh a ni. North East India huam chhungah pawh hri kaiin kiam lam a la pan thei rih lo va, nitinin mi za tam takin nunna an chan mek a ni. Hripui leng hi khawvela thil thleng thin a nih rualin, Lal Isuan lo kal leh dawn hnaia thil lo thleng tur a sawite zinga mi kha tunah hian a lo thleng mek a ni tih hriain, kohhran mi zawng zawngte chu mi thianghlimte lam tura Isua Krista lo kal tur chu lo hmuak tura, inbuatsaih theuh turin kan inngen a ni.
He hripui leng rapthlak tak avang hian North East India huam chhungah hian hri kai enkawl mek leh nunna chan hialte mi tam tak awmin, chhungkaw tam tak lungngaiin an rum mek a ni. chu mai ni lovin hripui leng hian nasa takin kan nunphung a ti khaihlak a, zirna In zawng zawng Primary atanga University
thlengin a kal pui theih lo va, eizawnna hrang hrang pawh kal pui theih a ni hek lo, chuvangin ram economy in nasa takin a tlakchhiat phah a, chhungkaw tam takin eizawnna kawngah harsatna an tawk mek a ni. Tin, kohhran rawngbawlna kawng hrang hrang: biak in inkhawm te, pawlho chakna tura thiltih hona kawng hrang hrangte, biak ina zing tawngtai inkhawmte thlengin kalpui theih a ni ta lo va,chuvangin, UPC NEI General Administrative Committee chuan North East India huapin kohhran chhungkaw tin ten a hnuaia tarlan ang hian a ruala tawngtai beihpui thlak nise tih a rel a, chhungkaw tin ten he hun hi lo ngai pawimawh theh turin kan ngen a che u .
Tawngtai beihpui thlak hun: Ni 20th June 2021( Pathianni zan dar 7: 00 pm)
Tawngtai thupui
1. Pathian hruaina kan chan avanga lawm thu sawina.
2. Covid-19 natna tuar mek te (Covid Care Center leh damdawiina awmte) an lo dam thuai theih nan.
3. Covid dona kawnga thawktu hrang hrang Doctor,Nurse,Lab Technician etc. leh Police te, Local level-a Task Force te, sorkar hruaitute tan.
4. Covid hripui leng a lo reh a,biak ina Pathian biak inkhawm kal dan phung pangngaia kan kal leh thuai theih nan te, rawngbawlna leh kohhran hmasawnna hna peng hrang hrang thawh a nih thuai theih nan.
5. Ram hmasawnna leh ei zawnna kawngah chhungkaw tinin nunphung pangngai kan zawh leh thuai theih nan.
6. Harsatna kan tawh mek hi Pathian min hnaihtirtu leh zau zawka chanchin tha tihdarhna hmanrua a lo nih theih nan.
Pathian hian a kohhrante hi hun harsa leh hun khirh tak min lo kaltlang pui tawh thin a, tuna hun harsa tak kan tawh mek lai pawh hian kohhranhote hi min vengin min kalsan ngai lo tih hriain a hnenah lawmthu i sawi ang u.
Facebook