Oct 2, Zirtawpni kha North East India UPC Kohhran thalai pawl Pentecostal Youth Department (PYD) Social Work Day a ni a, India hmarchhak pum huapa hman a ni.
Kumin hian kum dang anga hman theih ni lo mahse sawrkar dan siam leh hri leng a darh lohna tura in veng chungin a theih ang anga vantlang tana hna thawk turin thalai te an pen chhuak.
Social Work Day hmanna pui ber, Aizawl khawpuiah chuan Aizawl City PYD Co Ordination Committee huaihawtin Sept ni 28 atanga October ni 1 inkarah Blood Donation Week buatsaih a ni a, Aizawl khawpui chhunga Pastor bial 17 ten avaiin thisen unit313 Aizawl Civil Hospital tan an pe.
Hri pui len avangin social distancing kalpui a nih theihna tur hmun General Hqrs Building ah Blood donation week hi buatsaih a ni a, Week hawnna pual inkhawm tawi buatsaihah City PYD Chairman Upa F. Lalthlangliana chuan hun a kaihruai a, General PYD President Rev. H. Lalropuia’n Week hawnna leh Pathian hnena hlanna a nei a, thisen pe tura Kohhran thalai te inpekna hi hman atang tawhin a la pangai reng. Phur na leh chakna nen inhuam takin thalai kan pung khawm thin hi a lawmawmin a ropui tak zet a ni a ti.
City PYD Secretary Evan. C. Lalruatsanga hnen atangin report ngaihthlak a ni a, Association for Volunatary Blood Donation (AVBD) atangin information Secretary K. Zothanpara hnen atangin thu tawi ngaithlak a ni bawk.
Week ni khatna Sept ni 28, Thawhtan ni ah Zemabawk North, Hunthar, Mualpui leh Dinthar Bial PYD ten thisen Unit 72 an pe a, thisen petute hi Mipa 65 leh hmeichhia 7 an ni.
Ni hnihna Sept ni 29, Thawhleh niah Zemabawk Bialtu Pastor Rev. R. Laltlankima chuan telpuiin, Zemabawk, Chawlhhmun, Durtlang, Upper Republic leh Sihphir PYD ten thisen unit 68 pe in thisen pe tute hi mipa 53 leh hmeichhia 15 an ni.
Week ni thumna, Sept ni 30 Nilaini ah General Sunday School Director Rev. R. Laichhingpuia chuan telpuiin huserh hmanah tawngtaina a nei a, North Mizoram District Hqrs Bial, Bazar bial, Bawngkawn Bial leh Chaltlang bial ten thisen unit 71 an pe a, thisen pe tute hi mipa 60 leh hmeichhia 11 an ni.
Blood Donation Week tawp kharni hian UPC North East India General Superitendent Rev. Lalmalsawma Sailo chuan telpuiin hunserh a hmang a, Tita 3:8 ‘Pathian ring tawh te chuan thil tha ti zel turin ngaihtuah rawh se’ tih thu la chhuakin fuihna thu tawi a sawi a, tawngtaina a nei.
Oct ni 1, Ningan hi khan Bethlehem bial, Tlangnuam bial, Maubawk bial leh Thuampui bial ten thisen unit 102 an pe a. Thisen pe tute hi mipa 88 leh hmeichhia 14 an ni.
Social Work Day denchhena Blood Donation Week-buatsaih hi UPC North East India General Hqrs Office building ah Aizawl Civil Hospital Blood Bank a thawk tuten kal chilhin thisen hi an la a. Week neih chhunga Aizawl City PYD te thisen pek tlingkhawm hi avaiin unit 313 niin thisen pe tute hi mipa 266 leh hmeichhia 47 an ni.
Thisen pek zawhah Week kharna programme hman chhunzawm nghal a ni a, City PYD Vice Chairman Evan K. Rotluanga’n hun a kaihruai a, Secretary Evan C. Lalruatsanga hnen atangin report ngaihthlak a ni. Week hman chhunga Thisen pe tam ber lawmman dawngtu Mualpui bial PYD hnenah City PYD Chairman Upa F. Lalthlangliana’n lawmman a hlan a, Mualpui bial PYD te hian thisen unit 38 an pe thei a ni. Bethlehem Bial PYD ten dawtin unit 37 an pe a, District Hqrs bial te pathumna niin unit 31 an pe bawk.
General PYD Secretary Evan. Jh Malsawmdawngliana chuan thu tawi sawiin Aizawl khawpui chhunga PYD member te in pekna chuan thinlung a ti lawm takzet tih a sawi a. General PYD President Rev. H. Lalropuia’n malsawm tawngtaiin he inkhawm hi a tin a ni.
Lunglei khawpui chhunga Social Work day hmang tu, Town Area PYD te chuan Social work day pual hian September ni 29 zing karah khan Sazaikawn bula PYD ten zun in an siam chu a bul vel an sam fai bakah chei tha in rawng an hnawih thar a, Town Area PYD te hian Bethel Centre, Vanhne ah thilpek an hlan bawk.
Siaha khawpui chhungah chuan thalai ten Blood Donation camp an buatsaih a, Kolasib, Serchhip leh hmun dang dangah pawh a khawpui huapa hman engemaw zat an awm bawk. Thingtlang lam bial tamzawk chuan khawchhung thenfai, vantlang hmun hma chei that leh tihfai hna an thawk a ni.
General PYD Presiden Rev. H. Lalropuia chuan he ni hmang tu Indiar hmarchhak huam chhunga PYD Member zawng zawng te hnenah lawmthu a sawi a, khua leh tui tana mi tangkai leh chhenfakawm ni zel turin PYD te duhsakna chibai a hlan a ni.
Facebook