January 16 thawhlehni khan North East India UPC enkawl fahrah chawmna in Audrene Scism Children Home, Khuangpuilam Kolasib chuan a din cham kum 25-na Silver Jubilee an lawm.
Audrene Scism Children Home hi North East India UPC General Superintendent Rev. K. Satinvela hnena Pathian hriattirna ropui danglam tak avangin kum 1993, January 16 khan din tan a ni a. He Home din a nih theihna tur atana bul tantu chu Australia rama Pentecost Pastor Rev. JW Downs te nupa an ni. Vawiin ni thleng hian Rev. JW Downs-a te enkawl Australia rama Calvary Chapel Kohhrante chu Main Sponsored an la ni reng a ni.
Silver Jubilee lungphun hawnna leh Buiding sak hlan tharna inkhawm Home Project Director Rev. R. Lalrinmawia’n a kaihruai a, Silver Jubilee Lungphun hawn a nih bakah Jubilee puala Home Building sak thar chu Rev. Lalmalsawma Sailo, North East India Unit General Superintendent chuan Pathian hnenah hlanin a hawng bawk. Tin, Jubilee lawmna inkhawm chu Rev. Lalmaslawma Sailo, General Superintendent chuan a kaihruai thung a, Rev. R. Laichhingpuia’n hunserh hmangin; Rev. Zohmingthanzama’n Jubilee Souvenir a tlangzarh bawk.
Audrene Scism Children Home Projector Director Rev. R. Lalrinmawia’n Home chanchin a report a, ASC Home-ah hian Naupang 41 awmin thawktu mi 12 an awm mek a, Home Superintendent 6-na Evan C. Vanlalruata’n tunah hian a enkawl mek. ASC Home din tirh atanga vawiin thlengin Naupang 173 chuang a enkawl tawh. He Home hian Eizawnna kawng zawha mi puitlingah naupang engemawzah a chherchhuak tawh a. Tun hnaiah Steel Fabrication a training chhuak leh BSC Nursing zirchhuak te awmin hna tha tak an hmu tawh hlawm bawk a ni.
Home Compound chhungah hian Home-a awm naupangte lehkha zirna tur Susane Downs Boarding School din nghal a ni a, Compassion Center Project Committee hnuaiah Project Director chuan a enkawl mek a ni.
Jubilee lawmna Programme ah hian North East India UPC, General Head Quarters leh Chhimtuipui District leh North Mizoram District hruaitute bakah Kolasib Khawpui chhunga khawtlang mipui thahnem tak an kalkhawm. Rev. R. Lalrinsanga, Rev. K. Satinvela, Rev. C. Lalrammuana, Rev. W.L Thanghre, Rev. V.L Dika Sailo, Rev. K. Darsailova ten thutawi an sawi a, General PYD Choir ten zaia rawngbawlna neiin ASC Home Naupang ten items hrang hrang an entir bawk. Tlai lamah Jubilee lawmna ruai hlim takin an kil ho bawk a ni.
Facebook