UPCNEINEWSSERVICE MAY 26-JUNE 2.2019
——-
Meeting pawimawh nei :
Tunkar May ni 28 atanga ni 30 chhung khan General Hqrs Office, Mualpui Salem veng Aizawlah Committee peng pawimawh 3 – Literature, Hqrs Building leh Kokata leh Delhi Field Committee ten meeting an nei.
May ni 28, Thawhlehni khan Literature and Publication Board chuan Meeting an nei a, Board Chairman Rev. R. Lalrinsanga meeting a kaihruai.
Literature and Publication Board hian kum 2019 chhunga Kohhran Beirual thuzir bu tur an thlir ho a ni.
–
May ni 29, Nilaini khan General Building Committee meeting neih a ni a. Meeting hi Chairman Rev. Lalmalsawma Sailo chuan a kaihruai a, kum 2019 chhunga General Hqrs Office sak chhunzawm zel dan tur chungchang an ngaihtuah.
–
May ni 30, Ningani khan Kolkata leh Delhi Field Committee neih a ni a, Chairman Rev. Lalmalsawma Sailo chuan meeting a kaihruai.
Meeting-ah hian Kolkata leh Delhi Field rawngbawlna leh hmalakdan report hrang hrang thlir hovin, zau zawka hmalak dan tur an ngaihtuah a ni.
——-
General Hruaitute Programme :
General Suptd Rev. Lalmalsawma sailo chuan June 2, Pathiannia Chaltlang Kohhrana lawi, Upa Lalnunmawia Chuaungo, Mizoram Chief Secretary te’n Pathian hnena lawmthusawi chawimawina an buatsaihah speaker-ah tangin rawngbawlna a nei.
General Secretary Rev. R. Lalrinsanga leh General Sunday School Director Rev. R. Laichhinpuia chuan June ni 2, Pathianni hian Mualpui Bialtu Pastor Rev. F. Lalchhanhima Pension-a chhuak tur thlahnaah hun a hmang ang.
——-
Biak in hawng :
May 24, Zirtawpni khan Darlawn Bial, Sailutar Biakin hawnna leh Pathian hnena hlanna neih a ni.
Biakin hawnna hi Biakin pawnah hma hmasak niin Aizawl East District Superintendent Rev Rosanga Kawlni, chuan UPC-North East India Biakin pakhat ni turin Pathian hnenah hlanin a hawng a. Pastor Hmingchungnunga Ralte, Khawruhlian Bialtu Pastor chuan tawngtaina a hmang.
Biakin chhungah Biakin thar lawmna hman chhunzawm niin Rev Rosanga Kawlni, District Superintendent hian Pathian thuchah sawina a nei a ni. District Superintendent hian Darlawn bial chhunga Ratu Melkawn Biakin sak lai mek leh Ratu Vengpui Sunday School Hall sak lai mek a enpui nghal a ni.
Khawbung Bial, Khawbung Biakin pawh June 1, Inrinni khan Rev Rosanga Kawlni, District Superintendent hian Pathian hnenah hlanin a lo hawng tawh a.
Biakin thar hawnna-ah hian Bial chhung mai bakah Bial pawn atangin Kohhran member engemaw zat an kal thei a ni. Khawbung Biakin hi hun engemaw chen luah lum lovin alo awm tawh a, Kum 2017 khan Biakin hlui kalh tawh chu hawn niin hemi Kum atang hian Biakin hi sum neih ang anga sak that nghal a ni. He Biakin thatna tur atan hian Kohhran member mi thahnemngai te chuan sum leh pai thawhin District Kohhranpui bakah Department hrang hrangte chuan tanpuina an pe bawk a, tunah hawn alo ni leh ta a ni.
—–
Chawnghei tawngtai :
Aizawl East District, Mualpui bial Missions Department te chuan Kohhran la din lohna Hnahlan bial Tualcheng-ah Home Missionary kum khat atan District Missions kal tlangin an ruai mek a, May 26, Pathianni tlai khan Mualpui bial Mission Department leh Hnahlan bial missions department te chuan Tualcheng pual bik tan chawnghei tawngtai an nei. Hetih lai hian Tualcheng a Home Missionary Evan TC Kapzathanga te nupa pawhin chawnghei tawngtaina an lo nei ve bawk a ni.
—–
Inkhawm kim zan buatsaih :
Bethlehem Vengthlang PYD te chuan May 27, Thawhtan zan khan PYD member inkhawm kim zan an buatsaih.
He hunah hian District PYD President, Rev R Laltlankima chu Speaker ah hman niin Sis. F Lalhriatchhungi, Sis Laldinthari leh Sis. Lianthangpuii ten zaia rawngbawlna an nei a. He hunah hian PYD member zinga kum 2019, HSSLC Result chhuak a Pass thar mi 7 te hnen ah chawimawina an hlan bawk.
Bethlehem Vengthlang PYD Member zingah hian General Missions Department hnuaia Missionary thawk lai pahnih bakah District Revival Speaker, Pentecostal Choir member, Engedy Ministry member te leh Distric Level Sub Committee peng hrang hrangah te PYD member engemaw zat an tel a ni.
——-
Revival Programme :
May 25 atanga 26 chhung khan Thingsulthliah Bial, Tlangnuam Kohhranah Revival programme buatsaih a ni.
Revival programme-ah hian rawngbawltu hran chah lut lovin, bial chhunga Tirhkoh leh Upa ten rawngbawlna an nei thin a. May ni 26, Pathianni zan thlenga he prog hi hmang tura ruahman ni mahse May 27, Thawhtanni khan Pathian hnena lawmthusawi Chawimawina neih chhunzawm a ni a, he hunah hian Speakerah Evan. Samuel Laldinsanga an ruai. Chawimawina hi mi thahnemngaite sum leh pai thawhkhawm hmanga neih niin Lalpan mal a sawm hle a a ni.
Revival Prog an hman chhung hian Inkhawm ban a piangin Zaikhawmna an nei thin a, Bial Department OB ten Zaikhawm hruaina hna thawkin hlim takin hun an hmang a ni.
——-
Revival Crusade :
Bethlehem Bial buatsaihin May 26, Pathianni chawhnu leh zan hmang khan Bethlehem Vengthlang Biakin-ah Revival Crusade an buatsaih.
He hunah hian Pathianni chawhnu khan Rev Lalrema, Bialtu Pastor chuan inkhawm kaihruaiin Evan C.Thasiama hnen atangin thuchah ngaihthlak niin Pathianni zan khan Evan Lalchhuanmawia Zote hnen atangin thuchah ngaihthlak leh a ni bawk.
——-
OTS tan dawn :
Aizawl East District ten Pathian thu zirna a neih mek Oneness Theological Seminary chuan June 3, Thawhtanni atang hian Kum 2019 Session atan Class an kal tan leh dawn a, Class hi District Hqrs. Sunday School Hall-ah neih a ni ang. Kuminah hian Zirlai engemaw zat te chuan Admission ti tharin heng mite hian zirtirna an pe thin dawn a ni.
Rev Rosanga Kawlni – Christian Living
Rev Biaksangzuala – Missions & Evangelism
Rev Vanlalfela Ramtiam – Bible Survey
Rev K.Satinvela – Acts
Rev R.Laltlankima – Life of Christ
Rev P.Chunga – Bible Geography
Evan C.Laltanpuia – Pentateuch
——
Seminar :
1. May 26, Pathianni khan Khawlianah Rawngbawltute pualin Seminar buatsaih a ni.
Aizawl East District Secretary Rev Biaksangzuala, chu Resource person-ah hman niin a ni hnen atang hian Leadership tih thupui hmangin zirtirna ngaihthlak a ni a, kalkhawm ten hlawkthlak an ti hle a ni.
2. May 26, Pathianni khan Rev Rosanga Kawlni, District Superintendent Resource person a hmangin District Hqrs. Kohhran te chuan Seminar an buatsaih a, Thupui-ah Chhungkaw maicham tih hman niin Kohhran nu leh pa, Upa leh Tirhkoh te tan tangkai tur engemaw zat ngaihthlak a ni a, Kohhran hoten an hlawkpui hle.
——-
Fehchhuak :
May ni 25 leh 26 chhung khan Thuampui bial missions Dept chuan Suangpuilawn kohhran tlawhin rawngbawlna an nei.
Fehchhuah programme neih chhungin Inrinni zanah Sis RC Rinliani
Pathianni chawhmaah Upa F Zuiliana, chawhnuah Upa CCKhuma, Pathianni zanah Upa C Lalthanthuama te hnen atangin Pathian thuchah ngaithlak thin a ni a, Bial zaipawl leh Bial chhunga zaimi ten zaia rawngbawlna an nei thin bawk. Thuampui bialte hian Khuangpui leh khuangte tha tak an present ani.
——-
Kumpuan pual inkhawm :
May 27, Thawhtan zan khan Bawngkawn Bial, Peniel PYD Kumpuan Sub-Committee te buatsaihin Kumpuan Intodelh puala inkhawm an buatsaih.
He hunah hian Kumpuan Hruaituten inkhawm kaihruaiin Sis. Lalnunsangi, Upper Republic Kohhran hnen atangin Intodelh- Sum leh paiah tih thupui hmangin thusawi ngaihthlak a ni.
——-
Bialtu Pastor thlah dawn :
June ni 2, Pathianni chawhnu hian Mualpui Bialtu Pastor Rev. F. Lalchhanhima Pension-a a chhuah dawn avangin Mualpui bial chuan Bial huapin thlahna hun an hmang dawn.
He hun hi Bial Secretary Upa C. Zahnuna chuan a kaihruaiin, Bial aiawhin Upa PC Biakmawia, Bial Treasurer chuan thlahna thu a sawi ang a, Thlahna thilpek hlanna leh thu tawi sawinna hun siamin; Bialtu Pastor Rev. F. Lalchhanhima hian thusawina a nei dawn bawk a ni.
——-
Thianghlimna Committee :
May 24 zirtawpni khan District UPC Conference Hall-ah Lunglei District UPC Thianghlimna Committee chu Chairman Rev.C.Vanlalena kaihhruainain meeting an nei. An rorel langsar zualte:
i. Bial tinah thianghlimna Committee din turin hmalak nise, July thla ral hmain District-ah Committee hruaitu dinte hi report nise tih a ni.
ii. Local tina Department OB leh rawngbawltu chin te thianghlimna kawnga thianghlim turin ngenna siam nise.
iii.Thianghlimna kawngah hma kan sawn leh zual theih nan Awarness Campaign neih nise.
——
Charge in hlan :
May 28 thawhlehni khan Lunglei District Superintendent chamber-ah District Board vawi 196-nain District PYD Treasurer atana a ruat thar Evan.Lalringzuala Pachuau chuan District PYD Treasurer nilai Evan.K.Lalnunpuia hnen atangin Treasurer charge a la.
Charge in hlanna hi District Superintendent Rev.C.Vanlalena bakah Treasurer Rev.C.Lalrintluanga leh District PYD President Evan.V.Lalduhawma ten an telpui a ni.
——-
Bial 4 revival :
May 31 zirtawp zan atang khan Lunglei District LAD Conference-in bial li infin revival neih nise tia a lo rel bawhzuiin Hnahthial bial, Luangmual bial, Tawipui bial leh Pangzawl bialte chuan Hnahthialah bial li infin revival an hmang tan a, an ni rual hian Haulawng Lalveng Local-ah Haulawng bial, Chhipphir bial, Sertlangpui bial leh Pukpui bial ten he bial 4 infin revival hi an nei bawk. June 2 pathianni zan thleng he hun hi hman a ni ang.
——–
District LAD Board :
May 29 nilaini khan Lunglei District LAD Board chu President Sist.Lalramlawmi Sailo B.w kaihhruainain neih a ni. An rorel langsar zualte:
1. Dist.LAD conference in Home Missions field-ah biak in sak nise tia a lo rel chu a sakna tur hmun ngun taka an ngaihtuah hnuin MAUTLANG (Zehtet Missions Field) biak in chu sak nise
2. General LAD conference neih hunah Dist.LAD te chuan ASC home tanpuina pek nise an ti a, district chhunga bial leh Local te pawhin tanpuina hi an hlan ang.
———–
Biak in hawng dawn :
June ni 1 atanga ni 2 chhung hian Chhimtuipui District Riasika Biak in hawnna leh hlanna neih a ni dawn.
He Programme hi June ni 1, Inrinni zan atang khan hman tan a ni a, tan zan hian District Secretary Rev. Joseph L. Thlauhthlang chuan Pathian thuchah a sawi.
June ni 2, Pathianni hian Biak in thar hawnna leh hlanna neih tur niin District Suptd Rev. Thanchunga Sailo chuan Pathian hnenah hlanin he Biak in hi a hawng dawn a, Pathian thuchah a sawi nghal ang.
Pathianni zan lamah pawh he programme hi hman chhunzawm tur niin; District Treasurer Rev. W.L Thanghre chuan Pathian thuchah a sawi dawn a ni.
——
PSM Committee :
May ni 15 Nilaini khan North Mizoram District hnuaia Pathian thu zirna Pentecostal School of Ministry Committee neih a ni.
Committee hi PSM Principal Rev. Laltluanga’n kaihruaiin kumin June thlaa PSM kal dan tur leh Zirtirtu ten an subject lak tur an ruahman fel bawk.
PSM Registration Day kalpui dan tur ruahmanna neiin; June ni 3 thawhtanni-ah Registration Day hman a ni ang a, District Hqrs. Kohhran Biak inah hman niin; PSM Principal Rev. Laltluanga’n inkhawm a kaihruai ang.
—-
May ni 15 Nilainia Pentecostal School of Ministry Committee thukhawm chuan kumin 2019 PSM in zirna a kalpui dan tur hetiang hian an rel:-
PSM Subject neih hrang hrang leh zirtirtu tur te:
1) Tirhkohte Thiltih : Rev. C. Lalrammuana
2) Life of Christ : Rev. Chhiarpuia
3) Missions & Evangelism : Rev. C. Lalthantluanga
4) Pentateuch : Rev. K. Malsawmtluanga
5) Christian Living: Rev. Laltluanga
6) Bible Geography: Rev. C. Lalmuanpuia
7) Bible Survey : Rev. K. Lalduhsanga
PSM Registration Day hman hun atan June ni 3 Thawhtanni ruat niin; Registration Day inkhawm Rev. Laltluanga PSM Principal in a hruai anga, Dist. Secy. Rev. Chhiarpuia’n Zirlaite hming ziahluhna a nei ang. Thusawi ngaihthlakna Dist. LAD aiawh leh zirtirtu aiawh ngaihthlak a ni bawk dawn a ni.
—-
General LAD Conf inbuatsaihna :
General LAD Conference Golden Jubilee North Mizoram District ten Kumin October ni 10-13 chhunga a neih tur chungchangah, Conference thlengtu tur bial Kolasib Diakkawn te leh North Mizoram District hruaitute May ni 14 zan khan Diakkawn Bial Pastor Quarters ah an thukhawm.
Organising Committee leh District aiawhte hian Khawmpui nghahna hmun tur ngaihtuahin Organising ten ruahmanna an lo neih tawh chu tha ti tlangin Audrene Scism Children Home Field chu Genenral LAD Confe. thlenna hmun atan an nem nget a ni.
—-
Seminar buatsaih :
North Mizoram District Board in District huam chhunga Upa leh Tual Upate Seminar neih a lo rel tawh chu May ni 29 Nilaini khan a thawhkhatna North Mizoram District Hqrs. Kohhran Biak in Tuikhuahtlangah neih a ni.
Upa leh Tual Upa Seminar hi North Mizoram District huam chhungah neih vek tur niin; seminar neih dan tur hi zone thum (3)-ah then a ni a, Mamit District, Kolasib District leh Aizawl District ti tea then a ni. Aizawl District hnuah hian Kolasib District-ah June ni 10-ah Kolasib Venglai Biak inah neih leh tur niin; Mamit District-ah July ni 24-ah neih leh tur a ni bawk ang.
Seminar thawhkhatna Nilaini kaltaa neihah Aizawl District area atangin Rawngbawltu mi 242 an kalkhawm a, District Treasurer Rev. K. Lalduhsanga’n inkhawm a kaihruai a, Dist. Supdt. Rev. Laltluanga paper buatsaih Kohhrana Upate mawhphurhna tih te, Dist. Secy. Rev Chhiarpuia buatsaih Kohhran Statistician tih te leh Dist. Treasurer paper buatsaih Sum leh pai lam tih te zir ho a ni.
——
Biak in hawng :
May Ni 26 Pathianni khan Bairabi Bial Kananthar Kohhran Biak In sak thar chu North Mizoram District Suptd Rev. Laltluanga’n Pathian hnenah hlanin a hawng.
Kananthar-ah hian District rawihin Evan. Ramnunsanga chuan awm chilhin rawng a bawl mek a ni.
Dist. Supdt. Rev. Laltluanga’n Biak In a hawn hnuah hian biak in chhungah inkhawmna neih nghal niin Bialtu Pastor Rev.Lalhmuakliana Hnamte chuan inkhawm a kaihruai a, Rawngbawla awm mek Evan. Ramnunsanga’n hun hmangin Kananthar kohhran report tlangpui a a pe bawk. Biak in hawn inkhawm hi Pathian Thlarauvin awmpuiin an hlim hle a, Bairabi Bethel LAD zaipawl ten zaiin rawngbawlna an nei a, Sist. Laldinpari leh Sist. Lalrinkimi ten zaiin rawngbawlna an nei bawk.
Kananthar Biak In hi a dung ft 30 leh a vang ft 15 -a sak a ni a, Members 120 chuang an awm mek bawk a ni. Biak in hawn inkhawmah hian members 14 lai Dist.Suptt hian a lawmlut nghal bawk a ni.
Dist.Suptt. Rev. Laltluanga hian Thuhril rawngbawlna neiin, Kananthar kohhranten zaipawlin fak hla mawi tak an rem bawk. Kananthar Biak in sak Technical report Upa Lalmakthanga Bairabi bial Trea. chuan pein Biak In sak nana tha leh sum thawh tu te leh thilpek pe tute chungah lawmthu a sawi.
Biak in sak nan hian Dist. in Rs. 150,000 pein Bairabi Bial PYD leh mimal thenkhat ten Rs. 6,300 an pe a, Biak in hmun lei nan Rs. 17,000 sengin; Biak in sak nana an hman ral zawng zawng hi Rs. 1,56,008 a ni. Bairabi Headquarters kohhran ten biak in chhung electric bungrua leh wiring zawng zawng an tih sak vek bawk.
——-
Rawngbawltu pual Seminar :
May ni 25 Inrinni nileng khan Vairengte Bial buatsaihin rawngbawltu Seminar neih a ni.
Seminar hi zing dar 10:30 -ah tanin Bial chhung kohhran te atangin kohhrana tantu atanga Thuhril rawngbawlna nei mi 50 an pungkhawm a, North Mizoram District Secretary Rev. Chhiarpuia hnen atangin rawngbawltute mawhphurhna leh an pawimawhna uluk takin zirhona an nei.
Inrinni zan atangin Revival Programme-a chhunzawmin Pathianni zan thleng hun hlimawm tak an hmang a, kohhranhote pawh Pathian Thlarau Thianghlimin a awmpui hle a ni. Revival Programme-ah hian Rev. Chhiarpuia chu Speaker atan hman chhunzawm niin; Bial chhung kohhranhote pawhin Programme neih chhungin Biak in an khar a ni.
——
Documentary Film buatsaih :
North Mizoram District Missions Department chuan ruahmanna an lo neih tawh angin Dhoordharshan nena tangkawpin Missions Field Documentary Film an buatsaih mek.
Documentary Film buatsaih mekah a thawh hnihna nei turin Thawhtanni kal ta May ni 27 khan fehchhuah leh a ni a, fehchhuah thawhhnihna hi Dist. Missions Director Rev. C. Lalthantluanga’n hovin Vawngawn zo, Damdiai, Kolalian, Zomuantlang leh Bajirung Missions Field te an tuam leh dawn a ni. Dhoordharshan atangin Programme Director Pi Kroschhuanmawi leh Anchor Nl Vanlalhmangaihi bakah Videographer Pu Lalchhuanawma ten an ho bawk.
——
PG School zirtirtu tur la thar :
PENTECOSTAL GATEWAY HIGHER SECONDARY SCHOOL (PGHSS) chuan May ni 23 Ningani khan Managing Board an nei a, Board thukhawmte hian Lecturers hna dil interview neiin; Lecturers hna dil mi tha tak tak 10 zingah Sist Lalremruati, MA(Education), B Ed, Nursery veng chu lak a ni, Lecturer lak thar hian June 1, 2019 ah Joining report a pe ang.
PG managing Board hian PG Higer Secondary School inenkawlna dan Manual by law ennawn bawkin siamthat ngai laite siamtha a, School Building repair ngai te a theih ang angin repair turin ruahmanna an siam bawk.
——-
Work Camp :
North Mizoram district Missions Dept. in Damparengpui Bial chhung Persang Home Missionary Quarters sa tura a ngen Headquarters Bialte fehchhuak chu an tih tur ang te an thawh hnuah tluang takin Aizawl an thleng.
Hqrs. Bial Missions Department te hian May ni 20 (Thawhtanni)-ah an tum ram Persang panin zan dar 8:00 ah an thleng a, a tuk May ni 21 atangin an thawh tur ang hna thawk nghalin zing, chhun leh zan thlengin rim takin hna an thawk a, Missionary Quarters tura ruahman Ft 18×24 chu a rel leh skirting an zo hman bawk a ni.
Hqrs, Bialte hian Missionary Quarters hi a theih dan ang anga sa zo turin ruahmanna an siam bawk a ni.
——
Solfa Training :
Lengpui bial PYD te chuan Bial PYD buatsaihin May ni 25 Inrinni khan Lengpui Biak inah Solfa training an nei.
He Solfa Training neihah hian North Mizoram District Music Committee chuan an miruatte kaltlang zirtirna tha tak an nei a, Lengpui Bial PYD ten an hlawkpui hle.
——
Mi thar :
May ni 26 Pathianni khan Lengpui Bial Dapchhuahah mithar 11 Pentecost kohhranah sengluh an ni.
Dapchhuah khuaah hian Maubawk Bial Mission Dept. rawihin Tirhkoh Hmangaihzualan rawngbawlna a nei mek a. Kohhrante pawhin hma an sawn hle.
Facebook