UPCNEINEWSSERVICE MAY 12-19.2019
——-
District thar hawnna :
Kum 2019 General Conference-in District thar din a lo rel tawh bawhzuiin May 19, Pathianni hian District thar hawnna Lawngtlai-ah neih a ni dawn a, District thar tur hi ‘Tuithlang District’ tih a ni ang.
Tuithlang District Headquarters thuthmun atan Lawngtlai ruat a ni a, District ramri tur hi General Conference-in a lo rel tawh dungzuiin, District thar hian Tuithlang area chin zawng a huam ang a. A ramri tur chu hmarlamah Lunglei District va riin mother District, Chhimtuipui nen an inrina tur chu Chhimtuipui (R. Kolodyne) chin a ni ang. Tui chhak lam zawng chu mother District, Chhimtuipuiin a huam ang.
General Suptd Rev. Lalmalsawma Sailo, General Secretary Rev. R. Lalrinsanga, General Treasurer Rev. Zohmingthanzama, General Missions Director Rev. R. Lalhawia, General Sunday School Director Rev. R. Laichhingpuia te chuan District thar hawnna Programme leh District Board thutpuiin hun an hmang dawn a, May ni 17, Zirtawpni khan Aizawl chhuahsanin Lawngtlai hi an pan a ni. May ni 19, Pathianni hian District thar hawnna leh hlanna neih a ni dawn a, ruahman dan chuan General Hruaitute hian May ni 21, Thawhlehni hian Aizawl an let ang.
——-
Pension-in chhuak :
Lunglei District Superintendent mawhphurhna la mek tu Rev.R.Lalrosanga chu May 12 khan Superannuation Pension-in a chhuak ta a, amah thlahna inkhawm hi May 12 Pathianni khan Headquarters biak inah hman a ni.
He inkhawm hi Rev.C.Lalrintluanga, Treasurer, Lunglei District-in a kaihruai a, Rev.PC.Nghakliana, Pukpui bialtu Pastor chuan tawngtaina a inkhawm hlanin, thusawina District Secretary Rev.C.Vanlalenan a nei a, Headquarters bial PYD zaipawlte an zai bak ah District Department hrang hrang leh mimal tam takin thlahna thilpek hlanin, Rev.R.Lalrosanga chuan thusawina a nei a, General Executive board-in Superintendent atana a ruat thar Rev.C.Vanlalena hnenah Superintendent mawhphurhna hlanin he hun hi Thlarau lam hla nen chhunzawm a ni. Rev.C.Hmingthanfala chuan he thlahna inkhawm hi tawngtainain a tin a ni.
————-
District Board :
May 13 thawhtanni khan Lunglei Dist.board vawi 196-na chu Dist.Conf.hall ah Superintendent thar Rev.C.Vanlalena kaihhruainain neih a ni. An rorel tlangpuite:
1. Pastor atan heng mite hi interview leh written test kaltlangin lak an ni.
– Evan R. Lalengzauva, zotlang.
– Evan K. Lalnunpuia, Ramthar.
2. District Secretary atan Rev Pc. Lalfakawma, Theiriat bialtu thlan ni.
3. Dehli kohhran Chaplain, kum 2 chhung deputation atan Pastor Jerry Lalmuanawma, Cherhlun bialtu ruat a ni.
4. Pastor Transfer & posting:
– Bunghmunah – Pastor R. Lalengzauva
– Chhipphirah – Pastor LH. Lalchhandama
– Theiriatah – Pastor k. Lalchhuansanga
– Cherhlun ah Pastor K. Lalnunpuia
5. District PYD Treasurer nilai Evan.K.Lalnunpuia, Pastor atana lak anih tak avangin a aiawh turin Evan.Lalringzuala Pachuau chu ruat a ni.
———
Result chhuak :
May 14 thawhlehni khan Mizoram Board of School Education (MBSE) chuan Higher Secondary School Leaving Certificate (HSSLC) result chu a tichhuak a, Lunglei District UPC in a enkawl Christian Education Centre (CEC) School atanga mi 13 exam zingah mi 12 in hlawhtlinna an chang a, mi 1 hi Subject 1-ah exam nawn a ngai bawk. Pass percentage hi 92% a ni a, Distinction-ah 1, 1st Div.-ah 5, 2nd Div.-ah 5, 3rd Div.ah 1 an pass a ni.
———–
Charge la :
May 15 nilaini khan District Board vawi 196-na in District Secretary atana a ruat thar Rev.PC.Lalfakawma chuan District Secretary nilai tuna District Superintendent nita Rev.C.Vanlalena hnen atangin charge a la a, District Secretary thar hi District Superintendent Rev.C.Vanlalena, Treasurer Rev.C.Lalrintluanga leh Missions Director Rev.R.Vanlalenga ten tawngtaina an neihsak bawk.
———-
Silver Jubilee Conference :
May 9 atanga 12 chhung khan Aizawl East District Inkhawmpui Vawi 25-na, Silver Jubilee Inkhawmpui chu Pathian Thlarau Thianghlim awmpuina hnuaiah hlim taka hman zawh a ni.
He Inkhawmpui hi May 9, Ninga zan atang khan Bethlehem Biakin-ah hman niin Inkhawmpui tan zan khan Rev Rosanga Kawlni, District Superintendent chuan inkhawm a kaihruai a, Rev K.Satinvela, Former General Superintendent chuan Pathian hnenah hlanna nei a ni. Rev Lalrema, Bialtu Pastor hnen atangin Palai lawmna thu ngaihthlak a ni bawk. Tarlan tawh angin kumin inkhawmpuiah hian Thupui hranpa nei lovin heng mite hnen atang hian Pathian thuchah ngaihthlak thin a ni.
Ninga zanah- Upa Lalhlunchhunga, New Vervek
Zirtawp zanah- Evan H.Lalrinliana, Upper Republic
Inrinni zanah- Rev R.Lalhawia, General Missions Director
Pathianni Chawhma-ah Rev R.Lalrinsanga, General Secretary
Pathianni Chawhnu-ah Rev Ralkapliana, Kalay 1 District Superintendent, Myanmar leh Rev Rothlamuana, Kalay 1 District Secretary, Myanmar
Pathianni zanah Rev Lalmalsawma Sailo, General Superintendent.
Kuminah hian District Sunday School leh LAD te chuan a hrana inkhawmpui an neih loh avangin May 10, Zirtawpni khan rorelna an nei a, LAD te hian Bethlehem Biakin-ah Sis Zionparmawii B/W, Vice President kaihruaiin rorelna an nei a, hetah hian palai mi 250 chuang kalin Kum 2019 LAD Day thawhlawm District-in a chan chu District chhunga Kohhran harsa zual Biakin sak tanpui nan hman ni se an tih bakah Kum 2020 LAD Day thawhlawm chu Shillong Guest House sak bul tan nan hman ni se tiin General LAD -ah thlen a ni ang. Heng bakah hian Aizawl East District chhungah nupui pasal nei an awmin mo leh mo thianin lulhum (Veil) khum ngei ni se, Kohhranpuiah hmanlak pui tura thlen ni se an ti a, Bial leh District LAD Inkhawmpui-a thawhlawm vawi khat khawn chu District Superintendent relief fund-ah dah ni se, Cancer veite tanpuina tur khawn thin chu chhunzawm zel tura tih niin District chhunga In tinin chhungkaw maicham bu an neih theih nan Bial leh Tualchhung ten mahni hmunah theuh hma lak nghal ni se an ti bawk a ni.
Sunday School Department te hian Bethlehem YMA Hall-ah Rev C.Mawizuala, Director kaihhruaiin rorelna an nei a, palai 250 chuang kalin Sunday School Kumpuan “Kan fate i chhanhim ang u” tih bawhzui nan Bial hrang hrang ten Bial hmalakna atan ruahmanna uar zawka siam ni se District hruaitute pawhin a tam thei ang ber bialah Campaign neih ni se an ti a, ruahmanna lo siam turin District Board kutah dah a ni. Aizawl khawpui chhung Bial 7 te tan Sunday School meet neih tura tih niin Kum 2019 chhungin thawhlawm uar ni bik siam ni se tha tih a ni a, Kohhran Dan bu Art 41, Sec 219-a Bial Sunday School Board member-ah Naupang Sunday School aiawh Director chauh a dah chu Secretary leh Treasurer te pawh telh ve tawh ni se tha tih niin General-ah thlen chhoh a ni ang.
May 11, Inrinni nileng khan Inkhawmpui neihna hmunah hian Rev Rosanga Kawlni, District Superintendent kaihhruaiin rorel a ni a, palai 250 chuang an kal a ni. He hunah hian Rev P.Chunga, Former General Superintendent chuan hunserh hmangin an rorel langsar zual zingah Kum 2021 Inkhawmpui chu North Vanlaiphai bialah nghah a ni, ruatsa angin Kum 2020 chu Zemabawk Bial ten an thleng ang. District chhungah School din tura hmalak ni se tih niin District PYD ten School din tura an lo passed tawh, a zirchiang tura an ruatte zirchianna chu rin ve nghal mai ni se an tih bakah Dan-a awm sa tawh angin Pathiannia ruai buatsaih thin chu tihtawp tura hmalak ni se an ti bawk a ni.
Kumin Aizawl East District Inkhawmpui hi a vawi 25-na, Silver Jubilee a nih angin inkhawm apiangin Zaipawl zai bakah District hawn a nih bawr vela zaia rawngbawlna nei thin Sis Lalhmunmawii Parte, Sis Lalchhanhimi Ralte, Bro F.Hmingthanmawia, Evan CS Lallawmzuala, Sis Laltanpuii, Upa Rodailova Zote bakah Sis Lalchhanhimi Khiangte te hnen atangin mal zai ngaihthlak thin a ni.
Zirtawp zan inkhawmah khan District Sunday School Department te chuan Kum 15 chawl lova Sunday School Zirtirtu mawhphurhna lo chelh tawh mi 31 te hnenah chawimawina an hlan bakah District Hruaitu mawhphurhna lo chelh tawh mi engemaw zat hnenah chawimawina an hlan bawk a ni. Inrinni zan inkhawmah khan District Thianghlimna Committee te chuan Bial hrang hranga zuk leh hmuam nghei thar tam leh Bial zuk leh hmuam nghei tamte hnenah hetiang hian lawmman a hlan bawk.
Zuk leh hmuam nghei tam bial
1-na- Serchhip Bial, nghei zawng zawng- 683
2-na, Zohmun Bial, nghei zawng zawng – 304
3-na, Bawngkawn Bial, nghei zawng zawng- 261
Zuk leh hmuam nghei thar tam bial
1-na, Zohmun Bial, Nghei thar zat 58
2-na, Hnahlan Bial, Nghei thar zat- 30
3-na, Serchhip Bial, Nghei thar zar- 26
Pathianni chawhma inkhawmah khan Rev Rosanga Kawlni, District Superintendent kaihhruaiin Sr.Upa, Upa, T.Upa bakah Licence holder boral mi 14 te sunna hun hman niin Upa Lalnunmawia Chuaungo, IAS, Mizoram Chief Secretary chuan thutawi sawina a hmang bawk a, Pathianni chawhnu khan Upa leh Tirhkoh Kum 25 chawl lova lo chelh tawhte leh Sr.Upa hlankai tharte hnenah chawimawina hlan ni bawkin Pathianni zan khan Buhfaitham bakah Sawma pakhat bial leh mimal pe tha te hnenah lawmman sem a ni bawk.
Aizawl East District Inkhawmpui hi a vawi 25-na, Silver Jubilee a nih angin Pathianni tlai khan inkhawm zawng zawngte tan Jubilee ruai buatsaih niin hlim takin kilho a ni a Pathian thlarau thianghlim awmpuina hnuaiah he inkhawmpui hi Pathianni zan khan a tiak ta a ni.
——–
Missionary Retreat :
May 7, Thawhlehni khan District Committee room-ah Missions Department buatsaihin Home Missionary te tan Missionary retreat buatsaih a ni.
He hun hi Session hnihah then niin Chawhma session hi Evan Lalramzauva, Secretary chuan kaihruaiin Rev R.Lianzama, Director hnen atangin Evengelism leh Evan Lalthuthlunga, Treasurer hnen atangin Financial chungchang ngaihthlak a ni. Chawhnu Session hi Rev R.Lianzama, Director chuan kaihruaiin Rev Rosanga Kawlni, District Superintendent hnen atangin Administration leh Evan Lalramzauva hnen atangin Correspondence leh Report chungchang ngaihthlak a ni bawk. He hunah hian Home Missionary rawih lai te telkim thawkhatin sawihona hun tha tak neih a ni a, kalkhawm ten hlawkthlak an ti hle a ni.
——-
Pentecostal Choir :
General PYD Executive Board in alo rel tawh angin Pentecostal Choir member leh District PYD OB thenkhatte chuan India Unit hnuaia thalai intawhkhawmna lian Joshua Generation Youth Camp, Chennai hmunah rawngbawlna an nei mek.
Pentecostal Choir te hian he hun hmang tur hian May 12 khan Aizawl an chhuahsan a, Chennai hi May 15, Nilaini khan an thleng a ni. Joshua Generation Youth Camp hi May 16 atanga 18 chhung khan Scripture Youth Camp, Mahabalipuram, Chennai hmunah hman niin zaia rawngbawlna mai bakah Cultural Programme-ah hnam lam entirin Bible Quiz buatsaihah an tel bawk a ni. He hunah hian India Unit hnuaia thalai bakah Speaker turin America atangin an chah chhuak bawk a ni. Joshua Generation Youth Camp-ah hian Pentecostal Choir member 19 bakah District PYD atangin member 6, an vaiin mi 25 an kal thei a, ruahmanna ang chuan May 23, Ningani hian Aizawl an let ang.
——-
Chawimawina dawng :
Sis Lalthasangzuali D/o Roluahpuia, Champhai Kahrawt chuan May 7, Thawhlehni khan National Bravery Award, huaisen chawimawina a dawng.
He Chawimawina hian Medal, Trophy, Citation bakah sum fai nuaikhat a keng tel a ni. Sis Lalthasangzuali hi Govt. GM High School-ah Class X zir mekin Kum 2017 khan LAD Picnic Spot, Champhai-ah School picnic an neih tumin a thiannu tuia tla thi mai tur nunna a chhan a ni. Amah hi tui thiam pawh ni lovin hetia a thiannu tui tla, thi mai tur nun chhan nan hian tuiah a zuang thla tawpa, vanneih thlak takin harsatna awm lovin a thiannu chu a chhanchhuak ta a ni. Sis Lalthasangzuli hi tunah hian Champhai Kahrawt Kohhranah lawiin PYD Member a ni mek a ni.
——–
District Board :
May 9, 14 leh 15 chhunga khan Aizawl East District Board neih a ni.
Board hi District Commitee room-ah neih niin Rev Rosanga Kawlni, District Superintendent chuan kaihruaiin General Superintendent, Rev Lalmalsawma Sailo pawhin a telpui a ni. An thu ngaihtuah langsar zualte:
1. November kar khatnaa Orphanage Sunday leh No Tobacco week kharna insu buai thin chu November 2nd Week-ah No Tobacco week hman tawh ni se tih a ni.
2. Sawma pakhat leh Buhfaitham lawmman in pek thin chu chhunzawm zel tura tih a ni.
3. Aizawl East District chhungah nupui pasal nei an awmin mo leh mo thianin lukhum (Veil) khum ngei tura tih a ni.
4. Pastor PB Chawngtinliana, Deputation-a Arunachal Missions Field-a Director mawhphurhna chelh mek chu lakchhuah tura tih niin Chhingchhip Bial-ah awm tura tih a ni a, June 16.2019 hmaa Biala lut tura beisei a ni.
5. Rev F.Lalchhanhima, Mualpui Bialtu Pastor-in Voluntary-a Pension a dilna chu pawm niin Mualpui Bial hi Rev Rosanga Kawlni, District Superintendent chu hmui rih tura tih a ni.
6. Rev Rosanga Kawlni, District Superintendent leh Rev Biaksangzuala, District Secretary chu Super Senior Grade-ah hlankai niin Rev KVL Hmangaihkima chu Senior Grade-ah hlankai a ni bawk.
7. Nilai zan thupui zir zel turah Environment (Thing leh mau, tui leh nungchate) humhalh chungchang hir tura telh ve turin Literature Committee-ah thlen tura tih a nih bakah Biakin leh Sunday School Hall thiah leh sak that dilna awmna tu chu an pawm bawk a ni.
District Board-ah hian Bial 30 atangin palai an telkim thei a ni.
——–
Zin chhuak :
Aizawl East District hruaitute, Rev Rosanga Kawlni, Superintendent, Rev Biaksangzuala, Secretary leh Treasurer Rev Vanlalfela Ramtiam te chuan Lawngtlai hmuna Tuithlang District thar hawnna May 19, Pathianni hmanga neihah telin Executive Board neihah an tel nghal.
——-
LAD Day :
Chhimtuipui District chhunga LAD te chuan hlim takin an Day vawi-31 an hmang.
Dist Hqrs bial Siaha bial chuan bial huapa awmni khamin hun an hmang a.
Siahatla local a Day hmanna hi H.Vanlalthangi BW President Siaha bial LAD leh TT.Duhtinthluaii Secretary ten an kaihruai a, Dist puipa ten hmanpuiin Rev.Joseph L.Thlauhthang chuan, “Church administration” thupui hmangin zirtirna hun ahmang.
Rev.Thanchunga Sailo leh Zoramthangi BW ten thutawi ansawi. Zanlamah N.Lalmuani’n kaihruaiin Upa.John.VT.Hniehu hnen atang, “Leadership” thupui hmangin zirtirna ngaihthlak a ni a. Rev.WL.Thanghre leh T.Lallianmawii BW President Dist LAD hnen atang thutawi ngaihthlak leh a ni. Bial LAD tehian lawmman chi hrang hrang semna annei bawk.
South Lungpher, Sangau II local, Lawngtlai Chanmary, Lawngtlai Bazar techuan DAY hi ruai nen hmangin, Niawhtlang local LAD hlim takin DAY pual inkhawm neiin Dist chhung hmun hrang hrangah DAY hi hlim takin an hmang a ni.
——–
HSSLC Result tha :
Kumin HSSLC result chhuakah, Chhimtuipui District chhunga PYD member-2; Bro. Lalzawmsanga s/o Upa VL. Mawia Khenglawt Dist Hqrs local chu Arts stream ah Mizoram
Top – 7 niin, Bro. Lalremruatkima S/O V.Bawiliana Lawngtlai College veng chu Mizoram pum ah Science stream ah top-8 na a ni a. An hlawhtlinnaah kohhran ho ten an lawmpuiin an kalzelna turah duhsakna an hlan a ni.
———
Work Camp :
May ni 14, Thawhlehni atang khan Siaha bial te chuan Riasika Biakin sak mek chhunzawmin Work Camp an nei.
He work camp ah hian bial chhung kohhran nember thahnem tak kalin Biak In hi achung khuhin, a bang leh a chhuat pawh zo in, apumpui a luah maitheih a zawh a ni.
———
Ramthim pual Fehchhuak :
May ni 12, Pathianni khan Siaha bial Missions Dept huaihawtin Siahatla localah Ramthim pual fehchhuahpui hman a ni.
He hun hi Pastor.J.Chawnthanga Bial MS Dept Director in a kaihruai a, hetiangin thuchah ngaihthlak a ni.
Bial Secretary Upa H.Ramhluna “Nang nin an eitur perawh u”
District Secretary Rev.Joseph L.Thlauhthang “I kir leh ang u”
Rev.C.Valy “Kohhran chakna hnar chu ramthim vei hi a ni”
He fehchhuahpui ah hian thawhlawm thahnem tak hmuh niin, General lam Mission puala luanchhuahna hnathawh nan hman a ni ang.
———–
LAD Day hmanna :
May ni 10 Zirtawpni LAD Day khan North Mizoram District chhunga kohhran hrang hrang te chuan mi dang tana malsawmna ni tura ke pen chhuahna ni atan an hmang.
LAD Day hi North Mizoram District kohhran hrang hrangah Bial huapa hmang tam tak awmin, Bial huapa hman remchang lo Kohhran mala hmang thahnem tak an awm bawk.
Kumin 2019 LAD Day hi District atanga thuchhuak awm angin khawtlang tana thil tha tih nan leh mi dang te tana malsawmna ni tura ke penna ni atan hman tur a ni a, hei bakah hian LAD Day ip sem chhuakin thawhlawm atanga sum lut chanve General LAD ah chhung lutin a chan ve dang chu District in Tirhkoh Ramtlan a rawihna tura ruahman a ni.
Report hriat theih china LAD Day hman dan hrang hrang:-
* Chaltlang Bial te chuan Bial huapa hmang lovin; Bial chhunga kohhran awmte’n mahni remchan dan angin hun an hmang. Chaltlang LAD te chuan Chaltlang YMA HALL tihfai hna thawkin Chhun dar 12-ah DAY pual inkhawm an nei a, Bialtu Pastor, Rev. C. Lalramthanga zirtirin Seminar Rawngbawlna kawnga hmasawnna tur hrang hrang an zir.
Bawngkawnin kohhrante’n Jubilee puala thil tha tih denchhenin Biak Inah Water cooler an dah bawk. Ramhlun kohhrante’n Dusbin 3 Sist. Vanlalveni, Bial LAD President in a sponsor chu vantlang tan dahin vantlang hmun thenkhat an tifai bawk a ni.
* Mamit bial H/S Veng kohhrante chuan Mamit kawngpui dung tifaiin hnatlang an nei a, kawng khuar te Rawra-a chhungkhatin tlaiah Day pualin ruai hlim takin an theh bawk.
* Maubawk bial LAD te chuan LAD Day pualin Tawngtai bethel camping Center Lungverh-ah Lad DAY pualin, Alu bag 2, Dal bag 2, Purun bag 1, Tel case 2, chi kg 10 an pe.
* Mission Vengthlang LAD te chuan LAD Day pualin Kulikawn Damdawi ina Dam lo leh a awmpuitute bakah Damdawi inah thawk Staff zawng zawng te Artui leh Bawnghnute an sem a ni.
* Bairabi Bethel kohhrante’n vantlang hman turin khawchhungah bawlhhlawh bawm thahnem tak an dah a, Bairabi North kohhrante’n SBI bank Bairabi branch ah thutthleng dahin thilpek an hlan bawk.
* Diakkawn Bial LAD te chuan chawhma lamah veng chhung kawng dunga bawlhhlawh chhar fai hnatlang an nei a, chawhnu lamah Khuangpuilam Biak Inah Day pual inkhawm hmang lehin Day Pual tawngtai thupui neih hmangin tawngtai hona an nei bawk.
* Hunthar Bial LAD te chuan Sairang damdawi inah leh lungverh damdawi inah bawlhhlawh bawm dahin thilpek an hlan.
* Thenzawl bial LAD te chuan chawhma lamah khawlai tifaiin hnatlang an nei a, chawhnu lamah Day pual variety Programme hmangin kum 70 chin chung lam day hmangtute hnenah chawimawina parthi awrh tirin thilpek an hlan bawk. Hei bakah hian C.H.C Poor fund atan Rs 4000 an pe bawk a ni.
* Mamit Headquarters kohhrante chuan chhun lamah District Hospital Mamit ah Drip Stand an pe a, zanah Day pual inkhawm hunserh an hmang bawk.
* Mamit High School veng kohhrante chuan Field atanga Biak In panna kawngpui thenfai hnatlang an nei a, kawng khuar lai te rora in an hnawh bawk.
* Luangpawl kohhrante’n Chhunah Biak In thenfai hnatlang neiin; Darlak LAD ten Biak In sakna tur rora chhu in hnatlang an nei bawk.
* CHAWLHMUN Bial LAD ten Camping center-ah Day hlimawm tak an hmang. Chawhma lamah Bialtu pastor leh Bial LAD President hneng atangin Seminar Paper present neih ani a, Day lawmna ruai kil ho a ni bawk.
* Tlangsang bial LAD te chuan khaw chhung kawng dung tifaiin hnatlang an nei a, hmun hnihah inthenin hna an thawk a ni.
——-
Work Camp :
May ni 10 Zirtawpni khan Rengdil Kohhran Pentecostal Mens Fellowship (PMF) te Kanhmun kohhrante tlawhin an Biak in sak lai, a chung an chih mek chu hnatlangin an thawh pui a, member 16 an thawk chhuak.
Kanhmun hi North Mizoram District Kohhran Bial thenah Zawlnuam Biala awm niin; Rengdil PMF te hian Kanhmun kohhrantena Biak in an sak hi an lo pui ve fo tawh thina ni. Kanhmun kohhran te hian an biak in sak mek hi an zo ve tep tawh a, June thla chhung hi chuan peih thei tawh turah an inngai a ni.
An Biak in sak hi A dung 45 leh A vang 24 a zau a ni.
——
Sports Meet cum Revival :
Kawnpui Bial PYD te chuan May 10 Zirtawpni zan atang khan Bualpui Hmarveng biak inah Sports Meet cum Revival an hmang. Speaker atan Evan. J.H Malsawmdawngliana Gen. PYD Secretary an ruai.
Meet tan zan May ni 10 hian Pi Lalchhuanzuali HIV Victim hnen atangin HIV/AIDS Awareness Campaign ngaihthlak niin, a ni hnen atang hian thu bengverh leh lungkuai piahlamah, HIV/AIDS veite tuamhlawm kawnga kohhran leh thalai te mawhphurhna tur ni-a lang te thahnemngai takin a sawi. Thalaite’n an hlawkpui hle.
Kawnpui Bialtu Pastor PC. Laltlankima pawhin thalaite chibai bukna thu sawiin; thalaite intawhkhawm buatsaih chu thlarau malsawmna thar dawnna tur a nih theihna turin kalkhawmte a fuih a, Main Speaker tur Evan JH. Malsawmdawngliana, Gen. PYD Secretary pawhin thalaite chibai bukna thutawi sawiin, NEI PYD hmalakna kal mek leh dinhmun tlangpuite a tarlang bawk.
May ni 11 Inrinni nilengin Bualpui Playground ah infiamna chi hrang hrang hmangin nilengin sports Meet neih a ni a, zanah Evan. JH. Malsawmdawngliana hnen atangin Financial Management chungchang zirhona neih a ni bawk.
May ni 12 Pathianni atangin Revival Programme hmangin, Speaker Evan. JH Malsawmdawngliana hnen atangin Pathian thuchah ngaihthlak thin a ni bawk.
——-
Sihthiang rawngbawlna :
May ni 3 Zirtawpni khan Sihthiangah mithar 3 neih niin; Bialtu Pastor C. Lalthlengliana kutah Baptisma an chang. Nupa tuak 1 lehkha tarin inneihtir a ni bawk.
Sihthiang ah hian District rawihin rawngbawltu Bro.Lalhrechianga rawih mek a ni a, a rawngbawlna Lalpan mal a sawm hle a ni.
May ni 11 Inrinni khan Rengdil bial hruaituten Sihthiang kohhran tlawhin Bro. Lalhrechianga rawngbawlna kaltlanga Pathian thuthlung hmu chhungkaw khat member -5 awmna chu Bialtu Pastor C.Lalthlengliana’n Lalpa Isua hmingin lawmluhna a nei a, nau – 3 a hlan nghal a, Sualngaihdamna baptisma chang pakhat a awm bawk.
Sihthiang kohhrante hian biak In an sak mek chu, hawng turin ruahmanna an siam mek bawk.
——-
Sunday School pual Camping :
Chaltlang Bial Sunday School Department buatsaih, Junior – Doctrinal Department naupang pual Camping chu May ni 10 atanga 12 (2019) khan Chaltlang Biak inah hlawhtling taka neih a ni.
He Camping ah hian Speaker atan Evan Pc Lalrokima, General Missions Department Treasurer chu hman a ni.
Camping hi Dt 10th May, 2019 zan khan lutin Campers mi 67 an inziak lut a. Hemi zan atang hian Sermon ngaihthlak nghal a ni. “Inrinni nilengin Speaker hnen atangin Sermon ropui tak tak ngaihthlak chhunzawm a ni a, zan lam Dar 9:15 atangin Bethel neih a ni a. Thlarau Thianghlim Baptisma chang thar mi 37 an awm.
Camping hi Pathianni zing dar 7:00 a.m. ah chhuakin nilengin Follow Up Programme hman chhunzawm a ni. Pathianni chhunah Baptisma khur hawn niin mi 35-in Lalpa thuthlung zawmin sual ngaihdamna Baptisma an chang a ni.
Camping chhung hian Tui leh Thlarau Baptisma chang tawh, mi 13 laiin siamthar lehna an chang bawk.
——–
Zin chhuak :
N. Mizoram District Secretary Rev. Chhiarpuia chuan May ni 14 Thawhlehni khan Kolasib Diakkawn Bial tlawhin, Kumin Oct. thlaa North Mizoram District in NEI UPC General LAD Confe. a thlen tur chungchangah rorelna a neih pui.
Facebook