UPCNEINEWSSERVICE FEB 3-10.2019
—–
Executive Board :
North East India UPC kohhran rorelna sang, Executive Board Budget Session Ni hnih awh chu January ni 30-leh ni 31 chhung khan General Hqrs Office Committee Room, Mualpui Salem veng Aizawlah neih a ni.
Executive Board Budget Session ah hian kum 2019 atana North East India UPC Kohhran budget ruahmanna an thlir hova, sawmpakhat ah cheng 265,937,288 (Nuai sang 2,659 sing 3 sang 7,288), Missions rawngbawlna atan cheng 53,687,520/- (Nuai 536, sing 8 sang 7,520), Ladies Auxiliary Department atan cheng 9,124,155 (Nuai 91, sing 2 sang 5,155), Pentecostal Youth Department atan cheng 5,364,955 (Nuai 53 sing 6 sang 4,955), Sunday School pualin cheng 6,788,000 (Nuai 67, sing 8, sang 8,000) te bakah Committee peng hrang hrang budget nen avaiin cheng 371,059,448 (Nuai sang 3,710 sing 5, sang 9,448) an pawm a ni.
Budget bakah hian India hmarchhak pum huapa Pastoral Meet neih nise tih te, Tripura District-Darchawi Biak in sak tanpuinan cheng Nuai 3 leh Chandel District-Novakom Biak in sak tanpuinan cheng Nuai 2 pek nise an ti a. Bial chhung inenkawlna dan siamrem ngaite an thlir ho tel bawk. Board hmasain North East India UPC Map siam tura a ruahman chu lei theih tura peih fel niin District hrang hrang hnenah sem chhuah nghal a ni a, Mizoram chhung bik Map Rs. 1,500/-, North East India Map Rs. 1,700/- in District Office hrang hrang leh General Hqrs Office ah te lei thei nghal a ni.
Executive Board, Budget Session hi General Superintendent Rev. Lalmalsawma Sailo chuan a kaihruai a, Mizoram pawn – Nagaland, Meghalaya, Manipur, Assam leh Tripura atanga Executive Board member te pawh an rawn kal kim a ni.
——
Audit :
Feb ni 5, Thawhlehni atanga ni 8, Zirtawpni thleng khan General Hqrs Office, Mualpui Salem veng Aizawlah General Kohhranpui hnuaia Kohhran sum Annual Audit a ni.
General Kohhran sumpui bakah General Administration hnuaia Department leh Committee peng hrang hrangte sum Audit a ni a. Auditors te hi Rev. C. Lalrammuana, Rev. Biaksangzuala leh Rev. C. Lalrintluanga leh Rev. Joseph L. Thlauhthang te an ni.
———
Hruaitute Programme :
General Superintendent Rev. Lalmalsawma Sailo leh General Secretary Rev. R. Lalrinsanga te chuan Tripura-ah rawngbawlna pawimawh thawktin Feb ni 7 atanga ni 9 chhung khan hun an hmang.
General Superintendent hian Bairabi Bial Kohhranpui Conference-ah Speaker-ah tangin rawngbawlna a nei ang.
General Treasurer Rev. Zohmingthanzama chuan feb. ni 8 atanga ni 10 chhunga Kolasib Venglai Bial ten Bial Confernce an neih ah Speaker ah tangin rawngbawlna a nei.
General Missions Director Rev. R. Lalhawia chuan N. Bengal Sikkim Missions Field ten Field Conference an neihah speakerah tangin hun a hmanpui a, Gen. Missions Secretary Rev. VL. Tluanga Sinate pawhin Assam Missions Field Conference a hmanpui bawk. Gen. Missions Treasurer Evan. PC. Lalrokima chuan Bukpui Bial, N. Mizoram District ten Bial Conference an neih ah Speaker-ah tang in rawngbawlna a nei bawk.
General SS Director Rev. R. Laichhingpuia chuan February 8 atanga ni 10 chhung a Khawlian Bial in Chiahpui hmuna Bial Conference an neihna ah Speaker-ah tangin rawngbawlna a nei.
———-
Lunglei District Bial Conference :
1. Feb.8 zirtawpni atang khan Lunglei District bial 20 zinga bial 6 te chuan bial Conference an hmang a, District hruaituten hengtiangin an hmanpui.
Cherhlun bial te hian Cherhlun Local-ah Conference hi an hmang a, District Superintendent Rev.R.Lalrosanga chuan a hmanpui. Bunghmun bial te hian Tleu Local-ah Conference hi hmangin District Secretary Rev.C.Vanlalena chuan a hmanpui a. District Treasurer Rev.C.Lalrintluanga chuan Sekhum Local-a neih Chhiphir bial Conference a hmanpui bawk. Luangmual bialte hian Thangte hmunah Conference hi an hmang a, District Superintendent Represent-in Pukpui bialtu Pastor Rev.PC.Nghakliana chuan a hmanpui. Headquarters bialte chuan Farm vengah bial Conference hi hmangin, District Superintendent Represent-in Rahsiveng bialtu Pastor Rev.C.Lalhriatpuia chuan a hmanpui bawk. District Missions Director Rev.R.Vanlalenga chuan Lungsen bial Conference Lungsen S biakin a neih mek hi a hmanpui bawk a ni.
Feb.1-3 chhung khan Lunglei District Pukpui bial, Rahsiveng bial leh S.Vanlaiphai bial te chuan bial Conference hlim takin an hmang.
Pukpui bialte’n an bial Conference vawi 34-na chu Zotlang biak in an hmang a, District Secretary Rev.C.Vanlalena chuan a hmanpui. Feb.1 zirtawpni khan kohhranpui leh Sunday School Department ten rorelin Feb.2 inrinni khan LAD leh Missions Department te pawhin rorelna an nei bawk.
An rorel langsar zingah Kohhranpui chuan bial PCD in PCD pual Sunday hman an dilna an phalsak a, kumtin May pathianni vawi 3-na chu PCD pual Sunday atan hman an phalsal bawk. Tin, District-a thlen tur thu pawimawh tak tak an rel a, nakum 2020 bial Conference chu Zohnuai Local-ah an nei ang.
Bial Sunday School Department te chuan District-a thlen tur thu pawimawh tak tak an ngaihtuah a, Section Fund atan Rs.5000 an pawm bawk.
Bial LAD te chuan Missionary 2 chawm nise an ti a, Manigong Pastor Quarters-ah Steel Almirah dah nise, ASC Home Sponsor leh nise, CEC School tan thilpek pek leh bible chhiarchhuak lawmman pek leh nise tih te an rel a ni.
Rahsiveng bial Conference vawi 34-na chu Vanhne Local-ah neih a ni a, District Treasurer Rev.C.Lalrintluanga leh Former General Superintendent Rev.K.Darsailova chuan an hmanpui a. Feb.2 inrinni khan rorelna neih a ni a, bial kohhranpui chuan rawngbawltu leh Department OB thi/boralte inralna tih danglam nise pawisafai bakah thuziak hlan tel tawh nise an tih bakah District-a thlen tur thu pawimawh tak tak an rel a, nakum 2020 Conference-na hmun atan Rahsiveng Local nise an ti bawk.
Bial PYD te chuan kumin chhungin Meet Cum Crusade neih nise an ti a, District-a thlen tur thu pawimawh tak tak an ngaihtuah bawk.Tin, nakum 2020 hi bial PYD Conference ahranga an neih kum a nih angin Venghlun Local-ah neih nise an ti bawk.
S.Vanlaiphai bial Conference vawi 4-na chu District Superintendent Rev.R.Lalrosanga bakah Pangzawl bialtu Pastor R.Lalramhluna ten an hmanpui a, Kumin May thlaa Pension-a chhuak tur District Superintendent Rev.R.Lalrosanga thlahna hun chu Feb.3 Pathianni zan khan an hmang nghal bawk. Feb.2 inrinni khan rorelna neih a ni a, rorel langsar zingah . Pastor Quarter Rawng hnawih that te, Bial huapa Hnahthial Venglai a rawngbawla fehchhuah te, Seminar neih te a tel a, nakum 2020 bial Conference na hmun atan Darzo Local nise anti bawk.
———
District Literature Board :
Feb.5 thawhlehni khan Lunglei District Literature Board chu District Superintendent Chamber-ah Chairman Rev.Ralkapkunga Khiangte kaihhruainain neih a ni a, hetah hian lehkhabu hrang hrang tihral dan tur ngaihtuah a ni a, District UPC Office-ah lehkhabu zawrhna tur leh hralh chhuahna tur hmun siam dil nise an ti a, kumin 2019 leh nakum 2020 PCD zirlaibu chu hralh zawh anih tawh avangin reprint leh nise tha tih a ni a, kumin chhungin a remchan dan angin lehkhabu published tura hmalak leh nise an ti bawk.
———
Cherhlun Biak in hawng :
Feb.8 zirtawpni khan Cherhlun Local UPC Biak in chu Lunglei District Superintendent Rev.R.Lalrosanga chuan Pathian hnenah hlanin a hawng.
Biak in hawn inkhawm programme hi bialtu Pastor Jerry Lalmuanawma chuan a kaihruaia, Secretary Lallianzama chuan biakin sak dan report pein, Lalrinmawia Chawngthu chuan zaiin rawngbawlna anei bawk. He biak in hi A dung 27 ft. avang 60 ft. a sak a ni a, tlai lamah biakin thar lawmna ruai kilho a ni bawk.
—————
Bial Inkhawmpui hmang mek :
Aizawl East District chhunga Bial hrang hrangte chuan February 8, Zirtawp zan atang khan Bial Inkhawmpui a rualin an hmang mek. Inkhawmpui tan zan khan Local hrang hrang te hnen atangin report ngaihthlak a ni a, Inrinni nileng khan Bial chhung inawpna leh District-a lut tur ngaihtuahin rorelna hun neih niin Inrinni zan atangin Revival Inkhawm a hun hman nghal a ni. Bial Khawmpui-ah hian Speaker hranpa leh Thupui nei an awm laiin Bial thenkhat-ah chuan Speaker hranpa nei lovin Bial hruaituten thusawi rawngbawlna an nei thung a, Bialtu Pastor Speaker-a hmang an awm bawk a ni. Pathianni Chawhnu Inkhawm-ah hian Lalpa Zanriah Sacrament kil hona neih a ni anga Bial chhunga kohhran member boral sunna hun hman a ni bawk ang.
Aizawl East District chhungah hian Bial 30 awm mek in Bial Inkhawmpui hi District Hruaitute’n hmun hrang hrang-ah hetiang hian an hmanpui.
District Superintendent Rev Rosanga Kawlni chuan Chhingchhip Bial-ah hmanpuiin Speaker-ah atanga
District Secretary Rev Biaksangzuala chuan Rabung Bialah hmanpuiin
District Treasurer Rev Vanlalfela Ramtiam chuan Zemabawk Bial-ah a hmanpuia
Rev R.Lianzama, Missions Director chuan Bethlehem bial a hmanpui bawk a ni.
Kumin 2019 hi Aizawl East District Kum 25-na, Silver Jubilee a nih avangin Kum dang ang lovin May 8 atanga 12 chhung hian District Conference hmang turin inbuatsaihna chak taka kalpui mek zel a ni a, ruahmanna ang chuan May 8, Nilaini-ah District Office building-ah Jubilee lawmna ropui taka neih tum a ni a, May 9, Ninga zan atangin Bethlehem Biakin-ah Inkhawmpui vawi 25-na hmang turin ruahmanna siam mek a ni.
———
District sum Audit :
Aizawl East District chhunga Department hrang hrang: PYD, LAD, Missions, Sunday School leh Kohhranpui sum te chu February 5, Thawhlehni atang khan Audit neih mek niin karleh hian zawh hman tura beisei a ni. Auditor atan hian Pastor H.Lalropuia, Pastor B.Lalengzauva, Pastor Lalhmangaihawma Parte bakah Upa Joseph Lalhruaitluanga te hman an ni a, Bial Inkhawmpui Zirtawp zan atanga hman tan a nih avangin Audit hi karleh-ah chhunzawm leh a ni dawn a ni.
——-
District LAD Executive Meeting :
February 5, Thawhlehni khan District Superintendent room-ah District LAD executive meeting pawimawh tak neih a ni. He hun hi Sis F.Lalawmpuii B/W, President chuan kaihruaiin thu pawimawh tak tak ngaihtuah a ni a, an thurel pawimawh zualte:
1. General LAD Conference, North Mizoram District Kolasib Diakkawn bial ten kumina an thlen turah Upper Republic LAD, Bazar bial LAD, Bawngkawn bial LAD, Serchhip bial LAD, Thingsulthliah bial LAD te chu zai thei tura beisei ni se, an zai theih dawn leh dawn loh April 2019 ral hmain District Hruaitute hnenah inhriattir ni se an ti a ni.
2. Tripura District, Bakafa Section Pastor Quarters sakna atan Rs 30,000/- pek tura tih a ni.
3. Kum 2019 Bial LAD Conference hetiang hian hmanpui ni se an ti:
President, Sis F.Lalawmpuii B/W, Bawngkawn bial
V.President, Sis Zionparmawii B/W, Chhingchhip bial
Secretary Sis Rodingliani B/W, Thuampui bial
Asst.Secretary, Sis R.Lalramsiami, Kawlkulh bial
Treasurer Sis Lalramliani Sailo, Mualpui bial
Fin.Secretary, Sis H.Lallianzauvi, E.Lungdar bial
4. Aizawl East District ten Kumin 2019-a Kum 25, Silver Jubilee a thlen tur hriatreng nan District Committee room leh Office inbiakpawhnan Intercom dah ni se
5. May 10,2019 LAD Day hi Kuminah chuan District Kohhranpui Inkhawmpui lai a nih avangin May 5.2019-ah Bial leh Local ten Day Ip lakkhawm vek ni se an tih bakah rorel awm sa angin ni chanve hlawh thun tura ngenna siam ni se an ti a, LAD Conference-a agenda nei tur ten April 15 hma in thehluh vek ni se an ti bawk a ni.
———
Biak In thar hawng :
February 2, Inrinni khan Thuampui Bial, Falkland East Biakin thar hawnna leh Kohhranpuia hlankaina Rev Rosanga Kawlni, District Superintendent chuan a nei. Biakin thar hawnna hun tawi Biakin pawnah hman niin Rev KVL Hmangaihkima, Thuampui Bialtu Pastor chuan a kaihruai a, Rev Rosanga Kawlni, District Superintendent chuan UPC-North East India Biakin pakhat ni turin a hawng a ni.
Biakin hawnna neih zawhah Biakin chhungah Programme hman chhunzawm a ni a, hetah hian Thuampui bial PYD Zaipawl bakah Sis Zomuanthangi te hnen atangin fak hla ngaihthlak a nih bakah Upa Vansangzela hnen atangin report tawi ngaihthlak a ni. Rev Rosanga Kawlni, District Superintendent hian Falkland East hi Kohhranpuiah hlankaina nei nghalin Kohhran hruaitute nemnghehna a nei nghal bawk. Pathian thuchah sawiin Pathian duhzawnga tlawm taka rawngbawl turin leh rilru thar nena rawngbawl turin Kohhran mite a chah a ni. He hunah hian Biakin thar lawmna bakah Upa Vansangzela te chhungkua in Pathian chawimawina atana ran an pek hmangin Kohhran hoten hlim takin tisa lam ruai an kilho a, Inrinni zan atanga Pathianni zan thleng khan Revival Inkhawma hun hman chhunzawm niin Speaker-ah Rev Rosanga Kawlni, District Superintendent hi an hmang nghal a ni.
Falkland East Kohhran hruaitute:
Chairman: Upa J.Lalramzauva
Secretary: Upa Vansangzela
Treasurer: Rev H.Enmawia te an ni.
——–
Lawmthusawi chawimawina :
February 2 leh 3 hmang khan Champhai Bial Hqrs Kohhrana lawi Upa C.Biakthanzauva te chhungkua chuan Thlarau lam tuikhuah neiin Pathian awmpuina hnuaiah Kohhran hoten hlim takin hun an hmang.
He hunah hian Rev VL Hnemtluanga, Bialtu Pastor, Evan Zonunsanga bakah Upa Dr.Charles Romalsawma te hnen atangin thuchah ngaihthlak thin a ni. He hun hman chhung February 3, Pathianni khan Chhungkaw 2, member 12 te chu Kohhranah sengluh an ni.
——–
Dist PYD Conf Inbuatsaihna :
February 14 atanga 17 chhunga Champhai Bethel bial ten Bethel Field, Chhura hmuna Aizawl East District PYD Inkhawmpui Vawi 25-na, Silver Jubilee an thlen tur atan inbuatsaihna peih fel thawkhat a ni ta.
He inkhawmpui hi Pandal a dung ft 130 leh a vang ft 80-a liana sakah hman tur a ni. Inkhawmpui hlanna Rev Biaksangzuala, District Secretary chuan a nei anga, Jubilee meidet-na District PYD Secretary chuan a nei bawk ang.February 15, Zirtawp zanah District PYD Sub-Commitee peng hrang hrang ten lawmman semna neiin Inrinni zanah District PYD in a nei veleh anga, Hruaitu chawimawina hun hman a ni bawk ang. Pathianni Chawhmaah Rev Vanlalfela Ramtiam, District Treasurer kaihhruaiin member boral sunna neih a ni ang. Thupui-ah “Pathian beisei rawh” Sam 42:5 thu hman tur niin Thupui hi thensawm lovin mi hrang hrang, District PYD Hruaina hna lo thawk tawhte leh thawk mek te hnen atangin hetiang hian ngaihthlak a ni ang.
February 14, Ninga zan- Evan C.Lalnunsanga leh Evan VL Nghaka Chawngthu
February 15, Zirtawp zan- Evan Lalramzauva leh Evan C.Lalchhuanga
February 16, Inrinni zan- Pastor H.Lalropuia leh Upa R.Lalhmangaihzuala
February 17, Pathianni Chawhma- Rev Rosanga Kawni, District Superintendent
February 17, Pathianni Chawhnu- Evan R.Vanchhunga
February 17, Pathianni zan- Rev R.Laltlankima, District PYD President
Pathian thuchah sawi tur Ninga zan atanga Inrinni zan thleng hi Minute 20 chhung vek hun pek an ni.
Tarlan tawh thin angin Kumin Aizawl East District PYD Inkhawmpui Vawi 25-na, Silver Jubilee-ah hian February 15, Zirtawpni-ah rorel inkhawm neih a ni anga, kum danga tih ngailoh angin rorel ve lo tan vantlang inkhawm Pandal-ah neih tur a ni a, hetah hian Evan HMS Dawngkima, Daido hmuna District PYD-in rawngbawl tura a rawih thin chu Speaker-ah hman a ni dawn a ni.
He Inkhawmpui thleng tur hian Champhai bethel bial te pawh nasa takin an inbuatsaih chho mek zel a, tunah hian Pandal cheimawi hna thawk mekin Pandal sak hi Bethel bial chhunga Kohhran hrang hrangte pawhin an thawhpui bakah mikhual sem leh hmuah hi YMA te kuta dah a nih angin ruahmanna engkim peih thawkhat a ni tawh a ni. He Inkhawmpui kal tur Palaite chu Mut bu lum bakah mahni mamawh ang chi hrang hrangte kim taka keng tur leh Inkhawmpui palai a tam thei ang ber kal turin Organising Committee te chuan min ngenin min sawm a ni.
——–
Barak District PYD Conference :
Feb ni 1 atanga ni 3 chhung khan Kangrengdawr, Pherzawl District, Manipur-ah Barak District PYD Conference hlawhlting takin hman a ni.
Conference thupui hi Pianthar Dik tih a ni a. District Treasurer Evan Hmangaithanga’n a hmanpui. Conference chhungin hetiangin Pathaian thuchah ngaithlak thin a ni :
Feb 1st Zirtawp zanah – Dr.Lalthakim Hmar
Theme:”Piantharna Dik – “Kan nitin Nunah”
Feb ni 2nd Inrinni zan – Dr.Lalthakim Hmar
Theme: Piantharn Dik -Thlarau Nunah”
Feb ni 3rd Pathianni zing – Evan.Hmangaithang, Barak District District Treasurer
Theme: Piantharna Dik – Mimal nunah
Pathianni zan – Pastor.L.Kapma
Theme:Piantharna Dik – Kan unuauteah
Feb ni 2, Inrinnichawhma lamah rorel inkhawm neih a ni a, an thurel langsar zualte :
1. Kum 2023 Golden Jubili hmang dan tur.
2.PYD flag chungchang:
General atanga PYD Flag size inang veka siam tur tih chu BARAK DISTRICT PYD pawhin bawhzui nise
3. Dist PYD in Projector nei nise
4. Kum 2020 Conference na hmun tur – silchar Section.
—
Conference chhunga intihsiakna lawmman dawng tute :
Solo Competition :
1 na- Sis Thethem ( Jiribam Section )
2 na- Sis. Valentina Lal?anpui ( Headquarter Scetion )
3 na- Lalhmingthanga (Vangai Section)
LENGKHAWMZAI
1na- Chikhur Local
2.Kangrengdawr Local
3. Muolhoi Local
Bible Quiz
1. Vangai Section
2. Jiribam Section
Zaipawl intihsiak :
1. Haflong Section
2. Headquarter Section.
————–
North Mizoram District Bial 30 ten a rualin Bial Conference an hmang mek:
Bial Conference aruala neihaah hian District hruaitute pawhin Bial hrang hrang hmanpui dan tur relin Dist. Supdt. Rev. Laltluanga chuan Zawlnuam Bial hmanpuiin; Dist. Secretary Rev. Chhiarpuia’n Sumsuih Bial, Dist. Treasurer Rev. K. Lalduhsanga’n Chaltlang Bial a hman pui ang.
Hei bakah hian Department hruaitu District Missions Director Rev. C. Lalthantluanga chuan Assam Missions Field Nepalpara Mission Field Conference hmanpuiin speaker-ah a atang anga, Dist. Sunday School Director Rev. K. Malsawmtluanga’n Tlangnuam Bial Conference Saikhamakawnah a hmanpui ang.
Bial Conference hi Feb ni 8 zirtawpzanah tanin Feb ni 10 Pathianni zanah a tiak dawn a ni.
Bial conference neih chhung hian kumin 2019- chhunga Bial hrang hrangte hmalak dan tur relin Feb ni 9 inrinniah conference rorel neiin, Inrinni zan atang zirtawp zan thleng revival Programme hman a ni ang.
——
District SS Department Executive meeting :
Feb ni 6 Nilaini khan North Mizoram District SS Department Executive meeting chu Dist. Office Supdt. Chamber-ah an thukhawm.
District Sunday school Conference in SS Manual neih a rawtna bawhzuiin SS inenkawlna dan draft chu an thlir ho. Meeting hi Dist. Sudnay School Director Rev. K. Malsawmtlaunga’n kaihruaiin, District puipa pahnih Supdt. leh Secretary ten an ho bawk. (Pic. Dist. SS Exe Meeting)
——
Golden Jubilee lawm :
Hunthar Bial Sairang Kohhrante chuan Inrinni kal ta Feb ni 2 khan an kohhranin kum 50 a tlinna Golden Jubilee an Biak inah an lawm.
Jubilee lawmna Programme hi Feb ni 2 Inrinni chawhma dar 10:30Am-ah tanin Biak in kawtah inkhawm hmasa neiin; North Mizoram District Rev. Laltluanga’n Golden Jubilee Lungphum Lal Isua hmingin a hawng a. Golden Jubilee dar vuak a ni bawk.
Biak in chhungah Programme hmang chhunzawmin Hunthar Bialtu Pastor Rev. C. Lalhmunliana’n inkhawm a kaihruai a, Upa C. Lalsanglura’n mipui kalkhawmte chibai bukna leh lawmna thu a sawi bawk.
Golden Jubilee Souvenir an buatsaih chu North Mizoram District Secretary Rev. Chhiarpuia’n tlangzarhin Sairang Kohhrana Tual Upa lo ni tawh te chawimawina Upa C. Lalsanglura kaihhruainain neih a ni. Inrinni chawhmaah thuhril rawngbawlna Norh Mizoram Dist. Treasurer Rev. K. Lalduhsanga’n a nei a ni.
Chawhnu inkhawm Evan. ZD Lalhmangaiha’n kaihruaiin Sairang kohhrana Upa lo ni tawh te chawimawina Upa C. Lalsanglura kaihhruai vekin neih leh a ni a, hei bakah hian Bialtu Pastor C. Lalhmunliana kaihhruaiin Sairang lo bial tawhtu Pastor te Chawimawina neih a ni bawk. Chawhnu inkhawmah hian Rev. Laltluanga North Mizoram District Supdt. chuan Thurhil rawngbawlna a nei a, Upa M. Lalrinawma’n Lawmthu sawina a nei bawk.
Jubilee lawmnaah hian sairang kohhran lo bial tawhtu Pastor Rev C.Lalramthanga, Rev PC Lalfela, Rev R. Pahlira Rtd, Rev C.Lalhmunliana (bialtu Pastor) te telin, Gen. Missions Treasurer Evan PC Lalrokima Chaltlang pawhin a hmanpui bawk. Jubili lawm Programme-ah hian Sis Lalthansangi leh Mawimawii ten zai rawngbawlna an nei bawk thin a ni.
Sairang kohhran hi kum 1969 Jan ni 26 khan din niin; Kohhran member ???? an awm mek a, tunah hian hunthar Bial chhungah awmin Kohhranhote’n nasa takin hmasawnna rahbi an rap chho mek a ni.
——–
Biak in leh Tirhkoh Quarters sakna tur ram lei:
Thawhtanni kal ta Feb ni 3 khan Kol Venglai Bial South Chhimluangah Biak in hmun tur leh Tirhkoh quarter tur hmun rem tha tak chu North Mizoram District chuan a lei.
South chhimluang kohhran hmun hma tur lei hian Feb ni 4 khan NMD Supdt. Rev. Laltluanga leh Dist. Secetary Rev. Chhiarpuia te kalin, Kol. Venglai Bial atangin Bialtu Pastor B. Vanlalruata, Upa Lalremmuana Bial. Secretary leh Evan. Zorema Hlondo te an kal bawk a; Chhimluanga rawngbawlna nei mek Evan. Rawngbawlzela’n lo dawngsawngin, South Chhimluang Field bul tlang thengthaw nuam tak chu lei a ni ta a ni. North Mizoram District Supdt. Rev. Laltluanga chuan kohhrante tana hmun lo ram lei phalsak tu te chhungkaw chungah lawmthu a sawi bakah, an chhungkaw tan malsawmna dilin a tawngtai sak bawk a ni.
South chhimluanga Kohhranhote’n hmunlo ram an leiah hian a hma thei ang bera kutthlaka biak in sak leh Tirhkoh quarters sak ruahmanna neih nghal tur niin; Ram neitute chhungin march thla thlenga an ram la luah hawh tura an dilna chu an remtihsak bawk.
—–
Missions Field-ah luangchhuak dawn :
Feb ni 5 zana Headquarters Bial Missions Department Bial Board rorel chuan Kum 2018 Bial Missions Deppt Conference rorel angin Missions Field atanga damlo bawihsawm ngai Hospitala Admit te chu Sumpaia tanpui nise tih a rel.
Hei bakah hian Hqrs. Bial Board meeting chuan North Mizoram District Conference, Headqaurters Bialin kumin Oct. ni 25-27-a a thlen tur chung chang thlirlâwkin; District Missions Confe. chu Department mala thleng lovin; Bialpui kutah thlen nise tiin a rel bawk.
—–
Missionary chawm an pung zel:
North Mizoram District chhung kohhran member te chuan Missions rawngbawlnaah nasa takin tan a la mek.
North Mizoram District Missions Conference vawi 39-na in Home Missionary chawm theihna dan ruahmanna a siam anga thla 12 chhung thlatina Rs. 500 pe te chu Missionsary chawm an ni a, kumin January thla laihawl atang khan Missionary chawmna leh Support zawn hna Dist. Executive Commmittee ruahman anga neihah District huam chhunga Bial 10-ah fehchhuah tawh a ni a. Missionary chawmtu member 400 hmuh tawh a ni.
District Mission Department Director Rev. C. Lalthantluanga chuan Pentecost Kohhran mipuite Missions rawngbawlna kawnga nasa zawka an hmasawnna chuan tha tak tak a chhuah zel an beisei thu an sawi a. Chanchin tha famkim thehdarhna kawnga nasa zawka tan la zel turin kohhran mipuite an chah a ni.
Mamit Bial rawngbawlna:
Feb ni 2 inrinni zan vek khan Mamit Headquarter Kohhrana lawi turin chhungkaw khat member 4 te chu Mamit Bialtu Pastor Rev.K.Vanlaldika’n lawm luhna a nei bawk.
——
Member thar :
1. Feb ni 3 Pathianni khan Mamit bial Damdiai Mission Field-ah Hindu atangin chhungkaw1 member 7 awmna chu Bialtu Pastor Rev.K Vanlaldika’n Kohhranah senglutin; an zinga mi 3 in sual ngaihdamna Baptisma changin; nau 5 hlan a ni bawk.
2. Feb ni 4 Thawhtanni khan Hunthar Bial Lungverhah chhungkaw khat member 5 awmna te chuan Pathian Thuthlung ropui tak hmuin Sualngaihdamna baptisma Bialtu Pastor Rev. C. Lalhmunliana kutah an chang a ni. —–
Lawmthusawi chawimawina nei:
Feb ni 2 Inrinni khan Headquarters Bial chhunga Nursery venga Upa RC Laldingluaia te chhung chuan Pathian hnenah lawmthu sawina neiin; hun hlimawm tak an hmang a, Bialtu Pastor uapna hnuaiah hlim takin hun an hmang a ni.
February ni 2 Inrinni khan Mamit H/S Veng Kohhrana a lawi Tual Upa V Zothanga te chhungin Pathian hnena lawmthu sawina neiin; rawngbawltu atan Pastor, K Ainawna, Tlangsang Bialtu an hmang a, Thlarau boruak duhawm tak hnuaiah hun hlim taka inkhawmin, Pathian chawimawina Programme hman chhung hian Damna inkhawmte buatsaih a ni a, Rawngbawltu rawngbawlna kaltlangin Damlo na tak tak ten chawp leh chilhin damna an chang.
February ni 3 Pathianni khan Chawlhhmun Kohhranah Upa. K. Laltluanga te chhungkua pawhin Pathian chawimawina maicham buatsaih bawkin Reiek Bialtu Pastor P. Vanlalfela chu Speaker ah hman a ni a, kohhranhote an hlim hle.
—–
Luangpawlah Crusade :
February ni 4 atanga ni 7 thleng awh tura buatsaih Crusade chu Mamit Luangpawl Biak inah neih a ni a, Speaker-ah Mamit Bialtu Pastor Rev. K. Vanlaldika hman a ni.
Luangpawl-ah ian rawngbawltu Bro. K. Lalrindika awm mekin ani hma lakna tang hian member thar 7 neih a ni tawh bawk.
——
Pastor Quarters sa thar dawn :
Feb ni 5 Thawhlehni khan North Mizoram District Building Committee rorel angin Kanghmun Pastor Quarters sak that hna chu thawh tan a ni. Thawhlehni kalta khan Kanghmun Bial kohhran mipuite chuan Pastor Quarters hlui thiah hnatlang neiin member 30 lai an thawk chhuak a, District in quarters sakna tura a sanction tawh sum hmangin sak tan nghal a ni dawn a ni.
———-
HRIATTIRNA
Aizawl East District hnuaia Revival Commitee chuan Kum 2019 atan District Revival Speaker tur a la leh dawn a, dil duh chuan heng a hnuai ami te hi hriattur a ni ang.
1. Dilna hi Chairman, District revival Committee Address-in Plain paper-ah ziah tur a ni.
2. Dilna hi 11th.February.2019 thleng District Office-ah thehluh tur a ni.
3. February 12.2019 (Thawhlehni) Dar 11:00 AM-ah District Superintendent Office Chamber-ah Interview tur a ni.
4. Speaker-in Team member 4 a nei thei ang.
5. Team hming leh member list fel takin thehluh tur a ni. Contact No. pawh ziah lan tel ni se.
6. Zuk leh hmuama fihlim lo tan dil theih a ni lo.
7. Interview tura kalna senso mahni intum tur a ni.
8. Diltu chu License nei chin a ni tur a ni.
INKHAWMPUI SAWMNA
Aizawl East District PYD chuan February 14 atanga 17 chhung hian Champhai Bethel Bial, Bethel Field Chhura hmunah Inkhawmpui vawi 25-na, Silver Jubilee ropui takin a hmang dawn a, he Inkhawmpui-ah hian Thupui-ah “Pathian beisei rawh” Sam 42:5 thu hmangin Thusawi thiam tak takte hnen atangin thusawi ngaihthlak a ni ang. February 15, Zirtawpni-ah rorel inkhawm Bethel Community Hall-ah neiin Inkhawm lo tan vantlang inkhawm pandal-ah neih tur a ni ang. Inkhawmpui neih chhung February 16, Inrinni zingkarah Champhai khawchhung tifaii Social Work neih tur a ni bawk ang. He Inkhawmpui hmang tur hian tlang tin leh mual tina PYD thalaite lokal vek turin kan insawm a ni. Inkhawmpui kal turten mut lum tak bakah mahni mamawh kim taka keng turin kan inngen bawk a ni.
Facebook