UPCNEINEWSSERVICE FEB 2-9.2020
——–
Missionary la thar :
Feb ni 5, Nilaini khan General Hqrs Office, Mualpui Salem veng Aizawlah General Missions Department hnuaia Missionary tur interview neih a ni.
Missionary atan hian mi 2, David Lalhmingliana, S/o Chinzathanga Champhai Bethel a lawi leh Bro. Beihluatlai Khuly, S/o Caleba Lalramluahfela Siaha Council venga lawi te lak an ni. April ni 1, 2020 ah Joining report an pe dawn a ni.
Bro. David Lalhmingliana hi Bihar Missions Field ah a awm dawn a, Bro. Beihluatlai Khuly hi Odisha Missions Field-ah a awm dawn a ni.
——–
Audit :
February ni 4 atanga ni 7 chhung khan General Hqrs Office, Mualpui Salem veng Aizawlah Kohhran sum Audit a ni.
General Hqrs Account hrang hrang bakah General Administration hnuaia Department, Field leh Committee peng hrang hrang te sum Audit a ni a. Auditors te hi Rev. C. Lalrammuana, Rev. Biaksangzuala , Rev. C. Lalrintluanga leh Rev. Joseph L. Thlauhthang te an ni.
——–
General hruaitute Programme :
General Suptd Rev. Lalmalsawma Sailo chuan Feb ni 7 atanga ni 9 chhunga Champhai Bethel Bial Inkhawmpuiah Speaker-ah tangin rawngbawlna a nei a, ni 10, Thawhtanni hian Khawzawl Bial huapa Upa te pual Seminar buatsaihah resources person-ah tangin rawngbawlna a neih chhunzawm ang.
General Secretary Rev. R. Lalrinsanga chuan Feb 7 atanga ni 9 chhunga Sialsuk Bial inkhawmpui, Lungsei Kohhran Biak ina neihah speaker-ah tangin rawngbawlna a nei.
General Treasurer Rev. Zohmingthanzama chuan Feb ni 7 atanga ni 9 chhunga Sumsuih bial inkhawmpui, Sumsuih Kohhran Biak inah neihah Speaker-ah tangin rawngbawlna a nei.
General Missions Director Rev. R. Lalhawia leh General Sunday School Director Rev. R. Laichhingpuia te chuan Barak District Missions Department leh Sunday School Department, Joint Conference Jan ni 7 atanga ni 9 chhunga Phaitoul-a neihah Speaker-ah tangin rawngbawlna an nei.
General Sunday School Secretary Rev. R. Vanlalawia chuan Chhingchhip bial inkhawmpui, Chhiahtlang Kohhran Biak ina neihah Speaker ah tangin rawngbawlna a nei a, Feb ni 7, Zirtawpni khan Sunday School puala seminar buatsaihah resources person-ah tangin rawngbawlna a nei bawk.
General Missions Treasurer Evan Pc Lalrokima chuan Serchhip Bial Conference, Chanmari Kohhrana neih hmanpuiin Speaker-ah a tang.
———-
District hrang hrang rawngbawlna chanchin :
Lunglei District :
Bial Conference
January 31 atanga February 2 Pathianni chhung khan Pukpui bial, Zawlpui bial leh S.Vanlaiphai bialte chuan bial Conference hlim takin an hmang.
A. PUKPUI BIAL : Pukpui bial inkhawmpui vawi 35-na hi Zohnuai Local biak inah neih a ni a, District Treasurer Rev.C. Lalrintluanga chuan a hmanpui. January 31 zirtawpniah Kohhranpui leh S.S. Department-te chuan rorelna an nei a, Feb.1 inrinni hian L.A.D. leh Missions Department-te chuan rorelna an nei bawk. Bial kohhranpui chuan kum 2020 Project atan Section Pastor Quarters chhung leh pawn rawnghnawih bakah Quarters hnuai chhuat Plaster bakah pastor Quarters-ah khum pahnih dah nise tih te an rel a, nakum 2021 bial Conference chu Kikawn Local-ah neih a ni ang. Bial Sunday School Departement-te chuan kumin chhungin bial Sunday School Meet buatsaih nise an ti a, General Sunday School Kumpuan ‘Kan fate I chhanhim ang u’ tih chu mahni Local-ah theuh bawhzui nise an tih bakah District-a thlen tur thu pawimawh tak tak an rel a ni.
He bial inkhawmpuiah hian District Treasurer Rev.C. Lalrintluanga, bialtu Pastor Rev.PC.Nghakliana leh Rev.T. Aichhunga ten thusawi rawngbawlna an nei a ni.
B. ZAWLPUI BIAL : Zawlpui bial inkhawmpui pawh Tuisenchhuah biak inah neih a ni a, Kohhranpui, Mission Department leh S.S. Department ten bial Conference-ah hian rorelna an nei a, Speaker atan Rev C. Vanlalena District Superintendent chu hman a ni. Rorel langsar zualte :
KOHHRANPUI :
1. Bial chhung local hrang hrang te inkal thleng a financial campaign neih ni se..
2.Dist inkaihhruaina zirlaibua hmangin rawngbawltu exam neih ni se.
3. Pastor quarters fencing chu project-a neih chhunzawm zel ni se.
4. Bial chhung Biak in sa te chu workcamp-a inpuih chhunzawm zel ni se.
5. Pastor quarters rawng hnawih tura hmalak ni se.
6. 2020 hi chhungkaw maicham uar kuma neih ni se.
8. Bial chhung khawi local berah emaw crusade cum camping ngei tura hma lak ni se.
9. Nakum 2021 bial inkhawpui neihna hmun atan Zawlpui Local nise. Tih te an rel a ni.
MISSIONS DEPT.
1.District Missions Finance hnuaiah Crusade buatsaih tura dil leh ni se..
2. District Missions rinna thutiam Local tina Appeal neih tur chu bial hruaitute Local tina kalkualin Appeal neih ni se tha tih a ni.
SUNDAY SCHOOL DEPARTMENT :
District Sunday School Department hian kum 10 chhung a zawna sunday school kaikimte chu lawmpuina/Award pe ve ṭhin se tih chu District-ah thlen nise tha tih a ni a, hei hi dist-a a tlanglo anih chuan bialin in pek ni se tha tih a ni.
C. S.VANLAIPHAI BIAL : S.Vanlaiphai bial Conference vawi 5-na pawh Darzo Local-ah hman a ni a, District Secretary Rev.PC.Lalfakawma chuan a hmanpui. February 1 inrinni khan bial kohhranpui, Missions Department leh S.S Department-ten rorelna an nei a, an rorel langsar zualte:
KOHHRANPUI :
1. Bial kohhranpuiin kum 2020 chhungin Thlarau bo sengkhawm beihpui thlak nan Crusade buatsaih nise.
2. Pastor quarters hnuai siamna tur atan Rs. 20000 budget-ah dah nise .
3. Nakum 2021 bial Conference neih na hmun atan Muallianpui Local nise. Hei bakah hian Buhfai thamtha lawmman sem kal zel nise tih chu tha tih a ni.
MISSIONS DEPARTMENT :
1. Kumin 2020-ah Rammut thla neih nise tha tih a ni.
2. Faith promise chu bial hruaituten Local tinah appeal neih pui se, Local-in lo bawhzui bawk se tih a ni
SUNDAY SCHOOL DEPARMENT :
1. Kum 2020 May thla ah SundaySschool naupangte tan bial huap Rally neih nise.
2. kum 2020 chhungin Pastor Rochungnunga Renthlei bialtu Pastor-in local tin sunday school mahni local theuh ah Seminar min neih pui se.
—————–
Lunglei District chhunga Bial 6-in Conference an hmang mek :
Feb.7 zirtawp zan atang khan bial paruk, Luangmual bial, Chhipphir bial, Lungsen bial, Cherhlun bial, Bunghmun bial leh Headquarters bial te chuan bial Conference an hmang.
A.LUANGMUAL BIAL : Luangmual bial Conference vawi 21-na hi Luangmual Local-ah neih a ni a, District Superintendent Represent-in Rev.VL Hmuaka, Hnahthial bialtu Pastor chuan he Conference hi a hmanpui a, Feb.7 zirtawpni khan bial Missions Department leh L.A.D.te chuan rorelna an nei a, Feb.8 inrinni khan Kohhranpui leh Sunday School Department-te chuan rorelna an nei bawk.
B. CHHIIPPHIR BIAL : Chhipphir bial Conference vawi 35-na hi Chhipphir Local biak inah neih a ni a, District Superintendent Represent in Rahsiveng bialtu Pastor Rev.C.Lalhriatpuia chuan he inkhawmpui hi a hmanpui a, inkhawmpui thupuiah hian ‘Thil tha tih I ning suh ang u’ Galatia 6:9 chu hman a ni. Feb.7 zirtawpni khan bial L.A.D. leh P.Y.D. te chuan rorelna an nei a, Feb.8 inrinni khan kohhranpui leh Sunday School Department-te chuan ro an rel bawk.
C. LUNGSEN BIAL : Bial Conference vawi 50-na (Conference Golden Jubilee) hi Lungsen N Local biak inah neih a ni a, District Treasurer Rev.C.Lalrintluanga chuan a hmanpui bakah District PYD Choir leh Rev.R.Lalrosanga ten an hmanpui bawk. Feb.7 zirtawpni khan bial Sunday School Department chuan rorelna neiin, Feb.8 inrinni khan kohhranpui chuan rorelna a nei bawk.
D. CHERHLUN BIAL : Cherhlun bial Conference vawi 44-na hi New Ngharchhip biak inah hman a ni a, Thupui atan ‘Chanchin tha famkim’ tih chu hman a ni a, Feb.8 inrinni khan Kohhranpui, Sunday School Department leh Missions Department ten rorelna an nei a ni. He inkhawmpuiah hian District Superintendent Rev.C.Vanlalena bakah District PYD President Evan.V.Lalduhawma leh bialtu Pastor K.Lalnunpuia ten thusawi rawngbawlna an nei ang.
E. BUNGHMUN BIAL : Bial inkhawmpui vawi 47-na hi Sesawm Vengchhak Local-ah neih a ni a, District Secretary Rev.PC.Lalfakawma chuan he inkhawmpui hi a hmanpui a, Feb.8 inrinni khan bial kohhranpui chuan rorelna an nei.
F. HEADQUARTERS BIAL : Ramthar Local biak inah Headquarters bial inkhawmpui vawi 40-na hi neih a ni a, District Missions Director Rev.R.Vanlalenga chuan a hmanpui. Feb.7 zirtawpni khan Missions Department, Sunday School Department leh L.A.D te chuan rorelna an nei a, Feb.8 inrinni khan kohhranpui chuan rorelna a nei bawk.
—————
District PCD Board :
Feb.4, Thawhleh zan khan District PCD Board chu District Secretary Quarters-ah neih a ni a, an rorel langsar zualte :
– Nikum 2019-a bial chhunga PCD zirtirtute Seminar la nei lo ten kumin chhungin nei turin hma la se tha tih a ni.
– Kumin chhungin PCD Campaign neih leh nise
– PCD Aw chhuah chhunzawm leh nise tha tih a ni a, Editor atan C.Lalramluahpuia, News Editor-ah Jacob Ramengmawia leh Cir.Manager-ah K.Lalrintluanga te ruat an ni.
– PCD hruaitu kum 10 chhunh chawl lova thawk tawhte hnenah hruaitu hlun chawimawina pek nise tha tih a ni a, hei hian District PCD a din 2006 atanga hruaitu nihna chelh zawn te a huam ang. (PIC.DIST.PCD BOARD)
—————
Churachandpur District :
Bial Conference leh hruaitute Programme :
Dist.Supdt Rev.Lalzawm chuan Feb ni 7-9 chhunga Thanlon Section conf.vawi 37 na Thanlon Kohhrana neiah Speaker ah tangin rawngbawlna a nei.
Dist Secretary Rev.Paosei chuan Feb ni 7-9 chhunga Tuibong Section conf.Tuibong Local a neihah Speaker ah tangin rawngbawlna a nei. An confenrence ah hian “Pe rawh u, chutichuan pekin inawm ang” tih an hmang.
Dist Trea Rev.Haungama chuan Feb. 6-9 chhunga Pangzawl Section Conf., V.Munhoi ah hman hmanpuiin rawngbawlna a nei bawk.
——–
Member thar :
Feb 5, Nilaini khan Chiengkon Local ah mi thar mi pathum Lalpa Isua hminga sual ngaihdamna Baptisma changin Evan.Kamkholun chuan he rawngbawlna hi neiin Kohhranah a senglut a ni.
———
Aizawl East District :
Bial Conference :
Aizawl East District chhunga Bial hrang hrangte chuan February 7, Zirtawp zan atang khan Bial Conference a rualin an hmang mek.
Conference tan zan khan Local hrang hrang te hnen atangin report ngaihthlak a ni a, bial thenkhat chuan Revival inkhawmin hun an hmang nghal a ni. Inrinni nileng khan Bial chhung inawpna leh District-a lut tur ngaihtuahin rorelna hun neih a ni.
Bial Conference-ah hian Speaker hranpa leh Thupui nei an awm laiin Bial thenkhat-ah chuan Speaker hranpa nei lovin Bial hruaituten thusawi rawngbawlna an nei thung a, Bialtu Pastor Speaker-a hmang an awm bawk a ni. Pathianni Chawhnu Inkhawm-ah hian Lalpa Zanriah Sacrament kil ho a ni anga Bial chhunga kohhran member boral sunna hun Conference chhung hian bial hrang hrangte hian an hmang bawk ang.
Aizawl East District chhungah hian Bial 30 awm mek in Bial Conference hi District Hruaitute’n hmun hrang hrang-ah hetiang hian an hmanpui a ni.
District Superintendent Rev Rosanga Kawlni chuan Mualpui Bial-ah a hmang a, District Superintendent aiawhin District hruaitute dangten heng bial-ahte hian an hmanpui bawk a ni.
District Secretary Rev Biaksangzuala chuan Thuampui Bialah hmanpuiin
District Treasurer Rev Vanlalfela Ramtiam chuan Bethlehem Bial-ah a hmanpuia
Rev R.Lianzama, Missions Director chuan Keifang bial a hmanpui bawk a ni.
District-in Fulltime Evangelist a neih mek Evan R.Vanchhunga chuan Bazar Bial-ah Speaker-ah tangin Bial Conference a hmang anga, Evan Lalamena chuan Sakawrdai Bial-ah Speaker-ah tangin rawngbawlna a nei bawk ang.
——–
Home Missionary tirchhuak :
February 2, Pathianni zan khan Zemabawk Vengpui Biakin-ah District Missions Department hnuaia Home Missionary lak thar mi 10 te tirhchhuahna hun hman a ni.
He hun hi Rev R.Lianzama, Director chuan kaihruaiin Upa Zelthuama, Zemabawk Bial Missions Department Director chuan tawngtaina a nei. Evan Lalthuthlunga, Treasurer, District Missions Department chuan Missionary tirhchhuah turte hming puanna leh inhmelhriattirna neiin tirhchhuahna leh hlanna Rev Rosanga Kawlni, District Superintendent chuan a nei a, Missionary te hriak hnawih rawngbawlna a nei nghal a ni.
He hunah hian Rev Biaksangzuala, District Secretary hnen atangin fuihna thu tha tak tak, Missionary chhuak turte tana pawimawh tur hrang hrang ngaihthlak niin Zemabawk Bial Zaipawl bakah Sis Lalhruaitluangi te hnen atangin fak hla ngaihthlak a ni a, Rev Vanlalfela Ramtiam, District Treasurer in malsawm tawngtaiin inkhawm a titawp a ni. Missionary tirhchhuah inkhawmah hian Aizawl khawpui chhunga Bial hrang hrang Missions Department hruaitute bakah Missionary tirhchhuah tak chhungte mi engemaw zat telin Pathian thlarau thianghlim awmpuina hnuaiah hlim taka hun hman a ni.
Tarlan tawh angin heng Home Missionary te hi January 16, Ningani khan Interview hmangin lak lo ni tawhin February 1, Zirtawpni khan District Office-ah training neihpui an lo ni tawh bawk a ni. Missionary tirhchhuah takte leh an awmna hmun turte:
1. Sis Sangkhumi B/W- Khawlian bial, Daido
2. Evan Vanlalrosiama- N.Vanlaiphai Bial, Lungchhuan
3. Evan H.Lalhmingmawia- Khawbung bial
4. Evan HK Lalhmangaiha- Champhai Bial, Champhai Dinthar
5. Evan Vanlalnghaka- Bawngkawn bial- Ramhlun Sport Complex
6. Evan H.Lalbiakzauva- Khawhai bial, Sialhawk
7. Evan H.Malsawmthanga- Champhai Bethel bial, Zote
8. Evan K.Vanlaldika- Thuampui Bial, Thuampui Vengthar
9. Bro H.Lalfakzuala- Thingsulthliah bial, Khumtung
10. Bro Ramhuapliana- Kawlkulh bial- Dulte
———
Audit :
Aizawl East District hnuaia Kohhranpui leh Department hrang hrangte sum chu February 11 atanga 14 chhung hian Audit a ni dawn. Auditor atan Pastor H.Lalropuia, Pastor Lalhmangaihawma Parte bakah Pastor B.Lalengzauva leh Upa Joseph Lalhruaitluanga te chu District Board chuan alo ruat tawh a ni.
—–
Silver Jubilee :
February 2, Pathianni khan Champhai Bethel Bial, Zion Local te chuan an Kohhran Kum 25-na, Silver Jubilee hlim takin an hmang.
He hun hi Bialtu Pastor Lalhmangaihawma Parte chuan kaihruaiin Jubilee lungphun hawnna Rev K.Hrangvunga, Bialtu Pastor lo ni tawh chuan neiin Chawhma Inkhawmah Rev Pc.Lalnghakliana’n thusawina rawngbawlna a nei a, zanah Rev K.Hrangvunga hnen atang hian thuchah an ngaithla leh bawk a ni. He hunah hian Kohhran member engemaw zat telin Jubilee ruai hlim takin an kilho a ni.
——–
Mithar leh baptisma chang:
January 29, Nilai zan khan Sakawrdai bial, Vaitin Kohhranah mi pahnihin sual ngaihdamna baptisma changin mithar pakhat Kohhranah sengluh a ni bawk.
Kawlkulhah pawh February 5, Nilai zan khan mi 10 zet mai Pentecost Kohhrana lawi turin Bialtu Pastor R.Malsawma chuan a senglut. Kawlkulhah hian Crusade neih chhoh mek zel niin Speaker-ah Rev H Vanlalchhana hman a ni a, a rawngbawlna kal tlangin heng mithar te hi Kohhranah sengluh an ni ta a ni.
————
North Mizoram District :
Bial Conference :
North Mizoram District chhunga Pastor Bial 30 te chuan Feb 7-9 chhung khan a rualin Bial Conference an hmang mek.
North Mizoram District hi UPC-NEI Unit District Upa ber District, Mother Church District tia koh thin a ni a. He District hian Hmar lamah Vairengte thleng awhin Chhim lamah Thenzawl thleng a huam a ni.
Bial Conference a ruala neihah hian North Mizoram District hruaitute leh Department hruaitu thenkhat te chuan hetiang hian Bial thenkhat Conference an hmanpui
Dist. Supdt. Rev. Laltluanga’n Thenzawl Bial hmanpuiin;
Dist. Secy. Rev. Chhiarpuia’n a Bial hmui mek Durtlang Bial leh
Dist. Trea. Rev. K. Lalduhsanga’n Kolasib Venglai Bial a hmanpui bakah
Dist. Missions Director Rev. C. Lalthantluanga’n Lengpui Bial a hmanpui bawk dawn a ni.
——–
Souvenir Committee :
Feb ni 5, Nilaini khan North Mizoram District Platinum Jubilee Committee chu North Mizoram District Office Secretary Chamber-ah thukhawmin, Souvenir Committee Chairman Pastor Lalruatkima Fanaiin Meeting a kaihruai. Dist. Secy Rev. Chhiarpuia’n Meeting Pathian hnenah hlanin a tawngtai.
Souvenir committee chuan NMD Platinum Jubilee Souvenir chu NMD chhunga Kohhran tinah a thlawha pek relin, NEI chhunga Dist. Hrang hrang te present a tih bakah rawngbawltu pawimawh te pawh a thlawna pek ni se tih a rel a ni.
Souvenir chu Rs. 100 hralh nise, a hralh hna thawk a, a tul anga lo buaipui turin Souvenir Committee Treasurer Evan. J. Vanlalruata leh Evan. R. Lalthakima te chu a ruat nghal.
———
Platinum Jubilee :
North Mizoram District chuan kum 70 an tlinna Platinum jubilee chu February ni 18 atanga March ni 1 Pathianni thleng a lawmna hun an hmang dawn.
Platinum Jubilee lawmna hi Mizoram UPC a din tanna ni Feb. ni 18 thawhleh ni atanga hmangin Department hrang hrang Missions Department, Sunday School, LAD leh PYD ten a lawmna zan hrang theuhin an nei bawk ang.
Jubilawm hawnna hi Feb ni 18 thawhlehni dar 11.00 -ah tanin, District Headequartgers Biak in, Tuikhuahtlangah neih a ni anga, Biak in pawnah Jubilee Organising Committee chairman Rev.K.Lalduhsanga, District Treasurer in kaihruaiin; Jubilee hawnna hla Jubilee Choir ten sain Lungphun hawnna : Rev.Lalmalsawma Sailo, General Supdt. in a nei anga, Jubilee darvuak a ni bawk dawn a ni.
Biak in chhungah Prog hman chhunzawmin Rev.Chhiarpuia, District Secretary in inkhawm a kaihruai anga, District Choir leh General Choir leh Headquarters Bial ten hla remin; Rev.Laltluanga, District Superintendent in thuchah a sawi bawk ang. Sist. F. Rohlupuii BW Gen. LAD Treasurer hnen atangin fakhla ngaihthlak a ni ang.
Platinum Jubhilee Mei chu Evan J.Damhuala’n det in, Kohhran Chanchin Headquarters Local Church Board Secretary in a sawi anga, Souvenir Tlangzarhna Rev. Zohmingthanzama, General Treasurer in a nei thung dawn a ni.
Sist R.Lalchhanhimi hnen atangin Pathian fakna hla ngaithlain, Rev.R.Lalrinsanga, Gen Secy hnen atangain thusawi ngaihthlak a ni anga, Hqrs. Local Jubilee Zaipawl atangin Pathian fak hla an rem ngaihthlak a ni bawk ang.
Rev.C.Lianchama hnen atangin thuchah ngaihthlak a ni anga, Dist. hrang atanga Jubilee lawmpui tura lokal te atangin Thu sawi ngaihthlak a ni bawk ang.
Sist Lalrinawmi’n Pathian fak hla a sak zawh hunah Rev. C.Lalrammuana, Sihphir Bialtu Pastor in Malsawm tawngtaiin inkhawm thawhkhatna a tin ang.
Feb Ni 19 nilai zan atangain Department pual inkhawm neih chhoh a ni anga, PYD in hma an hruai anga, Feb ni 20 ninga zanah LAD ten inkhawm an nei leh anga, Feb ni 21 zirtawp zanah District Sunday School Department te inkhawm lehin Feb ni 22- zanah District Missions Department pual inkhawm neih leh niin; Ni 23 Pathianni zanah Platinum Jubilee Celebration Zan hman leh a ni ang.
Feb ni 23 Platinum Jubilee Celebration inkhawm zan hian Organising chairman Rev. K. Lalduhsanga, District Treasurer in inkhawm a kaihruai anga, Hrang hluite Zan niin; Memento : District Kohhranpui Hruaitu lo ni tawhte hnenah hlan a ni ang a, NEI-UPC Gen. Secy Rev. R. Lalrinsanga’n thuchah a sawi anga, District hruaitu lo ni tawhte atangin leh Rev.K.Satinvela, Former General Supdt ten thutawi an sawi bawk ang.
Feb ni 24 thawhtan zanah inkhawm chhunzawm zelin Platinum Jubilee Celebration secretary Rev.C. Lalthantluanga, District Missions Director inkhawm kaihruaiin Rev K.Darsailova, Former General Supdt in thutawi sawiin; Rev. Zohmingthanzama, General Treasurer in pathian thuchah a sawi ang. Feb ni 25 Ningani zanah Chairman : Rev.K.Lalduhsanga, District Treasurer niin Rev.P.Chunga, Former General Supdt leh Rev.VL Dika Sailo, Former General Supdt ten thuchah tawi an sawi anga, Sermon Rev.C.Lianchama, Headquarters bialtu pastor hnen atangin ngaihthlak a ni bawk ang.
Jubilee lawmna pui ber leh a kharna chu North Mizoram District Conference neihna tur Bawngkawn South Cultural Centre-ah March ni 1 Chawhnuah neih tur a ni anga, he inkhawmah hian Pastor lo ni tawh zawng zawng te Memento hlanin inkhawm banah jubilee lawmna ruai theh tur a ni dawn a ni.
———
Rising Day :
February ni 3, 2020 Thawhtanni khan Hqrs.LAD (N.Mizoram Dist.) te chuan LAD Rising Day an hmang.
Rising Day inkhawm hi Sist. Lalchhuankungi BW- in a kaihruai a, Sist. Lalhmangaihzuali Sailo in hunserh hmangin, Senior member Sist.Tlangmawii hnen atangin Hqrs.LAD chanchin ngaihnawm tak ngaihthlak a ni a. Kalkhawmte atanga minute 5 thusawina hun Chairman-in a hawnah mi 6-in thu an sawi a, Hqrs. LAD hruaina hna lo thawk tawhtute thawhrimnate, an chhelna leh inpêkna hlutziate an sawi a. Pathianin Hqrs.LAD-te member tlemte atanga a chawikan chhoh dante leh sum tlemtea bul tan ni mah se sum leh paia an than nasat tawh avanga an lawm thute sawiin, Pentecost Kohhran hi Kohhran dik ngei a lo nihnate leh a chhunga cheng thlarau miten nun uluk zâwka nung zêla, rinawm taka thuthlunga din ngheh a tulzia te sawiin an infuih thar bawk. Variety prog. hlimawm tak hmang chhunzawm lehin, LAD member ten hlâwk thlâk an ti hle.
——
Crusade :
Sumsuih Bial Mission Dept. buatsaihin Jan ni 3 atang khan Chhandamna Crusade neih a ni.
Chhandamna Crusade-ah hian Sailam khuaa rawngbawl mek Evan Zoramsanga chu Speaker-a hman a ni a. Evan. Zoramsanga hi team members 4 in an tawiawm bawk. Rawngbawlna buatsaihtu Sumsuih Bial Missions Dept. inpekna leh Rawngbawltu leh a thawhpuite hnathawh Pathianin mal a sawm a, rawngbawltu rawngbawlna kaltlangin Pathiana Siamthar lehna chang mi 3 awmin Mi 7 in Thlarau Thianghlim baptisma an chang thar a, Pathian thuthlung ropui tak hmuin mi thar 2 Jan 29 nilai zan inkhawmah sengluh an ni.
Samlukhaiah hian Crusade neih piah lamah Naupang Sunday School pualin lang camp buatsaih niin; hetah hian Khuang vuak training neih a nih bakah Kohhran chhunga in hrang hrangah inkhawm kualin rawngbawlna neih a ni. Pathian thlarau thianghlim dilin Kohhranho te chaw ngheia tawngtai neih a ni bawk a, Hriak thih rawngbawlna leh Tui damdawi te siamin Damlo te tawngtaiin hun hman a ni bawk. Evan. H. Zoramsanga leh a rawngbawlpuite hian Kohhran in zawng zawng an tlawh chhuak vek bawk.
Samlukhaiah hian Crusade rawngbawlna boaruk kal zelah Feb ni 3 thawhtanni khan Samlukhai Kohhrante kaltlangin Upa Johana te chhungkuain Pathian chawimawina an nei a, hlim takin kohhranhote’n hun an hmang a ni.
——-
Biak in hmun lei :
North Mizoram District chhunga Bungthuam khuaah North Mizoram District chuan Kohhran hote inkhawmna turin Biak in hmun tha tak a lei sak.
Bungthuam khuaah hian Evan. H.Lalnunmawia chuan rawngbawlna neiin a awm chilh a, hun engemaw chen a thawh hnuah tunah hian Kohhran member 14 awmin, Feb ni 1 Inrinni khan Bungthuam kohhran tan Biak in hmun Rs. 180000 in a lei a ni.
Biak In hmun hi a dung 156 fts leh a vang 50ft a ni a, rawngbawltu rawngbawlna kaltlanga Pathianin hna a thawh zel a beisei awm a ni.
Zawlnuam bialah hian Bungthuam hi hmun laili tak niin; kohhrante tan hmun pawimawh tak a ni mek zel a ni.
——-
Biak in sak bul tan :
Feb ni 3, Thawhtanni khan Zawlnuam Bial chhung awm Bawrai kohhran hote chuan Biak in ban tur an phun.
Biak in tundinna tura Ban phun hi hunserh urhsun taka hmangin Sr Upa Lalsanglura’n hunserh tawi hmangin, Biak in ban hmasaber chu a phun a, Kohhran hote pawh an phur hle a ni, Bawrai kohhran hi Zawlnuam Bial headquarters ni mekin, an Bial hi Bial la naupangte nimahse Pathian ram chak takin a thang mek zel a ni.
——
Jubilee T-Shirt tlangzarh :
North Mizoram District Headquarters Kohhran chuan Platinum Jubilee hriat rengna leh a lawmna chikhat atana siam, Jubilee T-Shirt chu Sr. Upa Rozama chuan Feb ni 2(2020) Pathian ni zing inkhawm ban khan Biak In tualah a tlangzarh a ni.
North Mizoram District Headquarters Kohhran te hian Platinum Jubilee an lawm turah North East Indiaa an rawngbawlpui te bakah a lawmpuitu apiang tel vek turin an sawm a ni.
——-
Member thar :
Feb ni 2 Pathianni khan Sihphir Bial Nisapuia District in rawngbawla a rawih mek rawngbawlna kaltlangin Mi thar 2 Kohhranah sengluh an ni.
Mithar 2 te hi Nu fa niin; Sihphir Bialtu Pastor Rev. C. Lalrammuana chuan Kohhranah seng lutin kohhranhote an lawm hle.
———
Fehchhuak :
Feb ni 1 leh ni 2 hmang khan Bairabi Bethel Kohhran LAD te chuan Zawlnuam Bial Zawlpui kohhrante an tlawh.
He hunah hian Bairabi Bethel LAD mi thahnem tak thawkchhuakin, Zawlpui kohhrana rawngbawltu Evan. Lalrinzuala Quarters ah CARPET mawi tak an phah sak a, member 18 lai thawk chhuakin Pavalai leh thalai thenkhatte’n an tawiawm bawk.
———
Member thar :
1. Rengdil Bial Tuidam kohhranah Feb ni 1 Inrinni zan khan Rengdil Bialtu Pastor C. Lalthlengliana chuan chhungkaw khat member -2 te Pentecost kohhranah Lalpa Isua Krista hmingin a seng lut.
Tuidam kohhranah hian Evan P.C.Lallianmawia’n rawngbawlna nei mekin; a rawngbawlna Lalpan nasa takin mal a sawm a, Pathian ram pawh a inhawng mek zel a ni. Tuidam kohhran te hian inkhawmna tur Biak in an sa mek a ni.
2. Pentecost Revival Team te rawngbawlna kaltlangin Feb ni 2 Pathianni khan Hunthar Bial Sairang kohhranah Evan. C. Lalruatsanga’n mithar 2 Sual ngaihdamna Baptisma a chantir a, Kohhranah a seng lut.
Evan. C. Lalruatsanga leh a team member te hian kum kalta December thla atang khan Sairangah rawngbawlna an nei a, Krismas leh Kumthar kohhranhote hmanpuiin Pathianin kohhranhote a awm pui em em a ni.
Facebook