Archive Cell Meeting :
Aug ni 21, Nilaini khan Archive Cell Committee chuan General Hqrs Office, Mualpui Salem veng Aizawlah meeting an nei.
Meeting-ah hian Kohhran record hlui pawimawh vawn that leh humhalh dan tur hrang hrang ngaihtuahin ruahmanna an siam a, Mizorama Isua hminga Sual ngaihdamna Baptisma chantirna hmasa ber, Rev. Ellis Luther Scism-an Pu Zakamlova Baptisma a chantirna hmun Bawrhsap Tuikhuah/Varak dil a chhinchhiahna emaw lungphun siam nise a ti a, North Lungleng khuaa Baptisma chantirna hmun pawh zawngchhuak a, Kohhran hminga chhinchhiahna siam turin ruahmanna a siam bawk.
Heng bakah hian General Level-a Kohhranpui hruaitu lo ni tawh zawng zawngte thlalak leh International General Suptd te thlalak, General Hqrs Office ah tar nise tih te leh Archive Cell hmalakna tur hrang hrang an ngaihtuah bawk.
——–
General Hruaitute Programme :
General Suptd Rev. Lalmalsawma Sailo chuan Aug 25, Pathianni hian Bawngkawn bial Church Board member-te pual seminar, Peniel biak inah neiah Resources Person ah tangin rawngbawlna a nei a, zan lam thlengin rawngbawlna a nei ang.
General Treasurer Rev. Zohmingthanzama chuan Aug 25, Pathianni hian Sihphirah hun a hmang ang.
———
UPC Khawvel thuthar :
1. Zambia UPC General Conference chu August 15 atanga Lusaka khawpuia neih tan chu Aug ni 18 Pathianni khan a tiak. Conference thupuiah hian THO LA, Tirhkohte 8.26 (Arise – Acts 8.26) tih hman a ni a, Rev. Kevin Borders leh Rev. Randy Adams te guest speaker an ni.
He conference ah hian Zambia ramchhung atangin mi 5,450 chuang an tel a, inkhawmpui chhungin mi 55 in Thlarau dawng tharin mi 17 ten Pathianni chawhnu khan Isua hmingin baptisma an chang bawk.
Conference zawh veleh hian Zambia UPC Bible School graduation hman nghal a ni a, an bible school hi Global Association of Theological Studies (GATS) buatsaih/enkawl a ni nghe nghe.
Zambia hi Africa khawmualpuia awm niin an ram khawpui ber Lusaka khawpuiah kan unaute hian Headquarters neiin Bible College an nei nghal bawk.
Zambia ramah hian 1979 khan UPC ding tanin Missionary te kaihhruaina hnuaiah rei tak an awm a,2014 Gen. Conference an neih tum khan Gen. Supdt. atan Rev. Morgan Muwanza an thlang a, ani hi Zambia mi leh sa zinga Zambia UPC General Superintendent hmasa ber a ni chauh nghe nghe. Zambia ramah hian UPC hi kohhran thangchak berte zinga mi a ni.
—
2. Pathianni kal ta August 18 khan Phillippines rama Quezon khawpuia UPC, Phillippines Apostolic Revival Centre PARC kohhranah mi 8 in Isua hmingin baptisma an chang leh.
Phillippines hi Khawvel pum huapa UPC pun chak berna ram a ni mek a, tunah hian UPC member 12,51,030, local church 2,570 a awm mek a ni.
———
Lunglei District :
District Day :
Aug.22, Ningani kha United Pentecostal Church (NEI) Lunglei District Day vawi 54-na a ni a, he ni hi Lunglei District UPC kohhran ni pawimawh anih angin kohhran office pawh khar a ni a, Local hrang hrang ten an remchan dan ang theuhin a lawmna an buatsaih bawk.
Dt.19.2.1950-a Mizorama UPC kohhran din anih hnu khan Dt.22.8.1965 ah Mizoram chhim lamah chuan District hran din a ni a, a hming atan South Mizoram District tih niin, he hming hi 1979 thleng khan a pu zui a, 1980 atangin Lunglei District tia thlak a lo ni ta a ni.
South Mizoram District tia a din ni hi Lunglei District din ni atan hman chhunzawm zel a ni a, tun kum hi Lunglei District a indan atanga kum 54- na a ni.
Tun dinhmunah Lunglei District-ah hian Pastor 24 awmin members 18615 an awm a, bial 20-ah in thenin, Local 112 a awm a ni.
Tun dinhmuna Lunglei District UPC hruaitute
Superintendent : rev.C.Vanlalena
Secretary : Rev.PC.Lalfakawma
Treasurer : Rev.C.Lalrintluanga
———
Biak in lungphum phum :
Aug.26 thawhtanni hian Sertlangpui bial a awm, Buarpui Local-te chuan an biak in sak tur lungphum an phum dawn a, District Superintendent Rev.C.Vanlalena chuan lungphum hi a phum ang. District Superintendent hian Buarpui Local-ah hian Aug.25 pathianni hun a hmang bawk ang.
——
Aug.25 Pathianni hmang hian District Missions Director Rev.R.Vanlalenga chuan District Missions Field Thiltlang-ah rawngbawlna a nei dawn a, Thiltlang biak in sak mek a tlawh nghal ang.
—–
District Thianghlimna Committee :
Aug. 16 zirtawpni khan Lunglei District Thianghlimna Committee-te chuan District UPC Conference Hall-ah Committee an nei a, an rorel langsar zualte:
– Campaign la neih lohna bial 8 ah Campaign neih chhunzawm leh nise.
– Servey form siam nise, hetah hian District chhunga rawngbawltu,upate zuk leh hmuam nghei leh nghei lo chhinchhiah nise, hei hian Department hruaitute huam vek se tha tih a ni a, Survey hi bial Thianghlimna Committee te hmalak tura tih a ni.
– Heng bakah hian bial Thianghlimna Committee-te mawhphurhna tur chin siam nise.
——
Thianghlimna Campaign :
Aug.19 Pathianni khan Leite leh Lungsen N Local-ah te Thianghlimna Campaign neih a ni. Leite Local-ah hian Evan.C.Lalremchhunga leh Upa C.Fakzuala ten hun an hmang a, Sist.B.Vanlalropeki chuan zaiin rawngbawlna a nei bawk.
Lungsen N Local-ah hian District Treasurer Rev.C.Lalrintluanga chuan Thianghlimna Campaign hi a nei a, Aug.19 pathianni chawhnuah Seminar neih puiin members 50 chuang an kalkhawm a, Aug.19 Pathianni zanah Lungsen S Local-ah hun a hmang bawk.
Aug.25 Pathianni pawh hian Thianghlimna Campaign hi Thuampui Local-ah neih a ni dawn a, Upa C.Lalhmangaiha chuan Campaign hi a nei ang. Tin, Pukpui bial Thianghlimna Committee-te chuan Aug.25 Pathianni hian bial chhung Local hrang hrangah Thianghlimna Campaign hi an nei bawk ang.
——
Gospel Meeting :
Lunglei District UPC-in a enkawl Christian Education Centre (CEC) school chuan kumtina an tih thin angin Aug.20-23 chhung khan Gospel Meeting hlim takin an hmang.
Gospel Meeting-ah hian zirlaite chu hmun hnihah then an ni a, Kg – Classs V chu hmun khatah dah niin hetah hian Speaker atan Evan.R.Lalnunthara chu hman a ni a, Class VI – XII chu hmun khatah dah niin hetah hian Speaker atan Pastor K.Lalnunpuia chu hman a ni bawk.
Gospel Meeting neih chhung hian ASC Home pualin bawm hun a ni a, heta pawisa tlingkhawmte hi hun remchang hmasa berah ASC Home hnenah hlan a ni ang.
Tun dinhmunah CEC school ah hian Student 300 vel awmin zirtirtu 20 an awm mek a ni.
—–
Thingphun :
Aug.17 inrinni khan College veng Local PYD te chuan Tlawng kama an thingphunna hmunhma tihfai hnatlang an nei a, kung 14 an phun belh bawk. College veng Local PYD te hi members 23 an thawk chhuak a, an thingphun enkawl mek hi avaiin kung 32 a ni.
——
Seminar :
Aug.19 pathanni khan Sertlangpui bial PYD hmalaknain Sertlangpui Local-ah Leadership tih thupuiah hmangin Seminar neih a ni a, Resource Person atan Upa C.Malsawmkima District PYD Asst.Secretary an ruai.
District PYD Fin.Secretary Rbt.H.Lalhmingmawia pawhin he hun hi a hmanpui bawk.
——-
Workshop :
Aug.17 inrinni khan Thenhlum Local Church board members leh Department hruaitute pualin workshop neih a ni a, he hunah hian thupui hrang hrang chhiat ni/that ni a members te leh hruaitute mawhphurhna, Inkhawm service zahawm leh fel zawka kal theih dan tur, Thuthlunga thalai rualte sawh ngheh lehzual theih dan tur bakah hruaitute inpumkhatna tha lehzual zawk neih theih dan turte zir ho a ni a, resource person atan bialtu pastor PC.Zion Rammawia chu hman niin members 30 chuang an kalkhawm a, tlai lamah chawhlui an kilho nghal bawk.
——–
Member thar :
Aug.18 Pathianni khan Thenhlum Local-ah bialtu Pastor PC.Zion Rammawia chuan mi thar 1 Kohhranah senglutin sual ngaihdamna baptisma a chantir.
—–
Awareness Campaign :
Aug.25 Pathianni hian Luangmual bial PYD hmalaknain Luangmual Local SS Hall-ah HIV/AIDS Awarness Campaign neih a ni dawn a, Resource Person atan Luangmual bial atanga Trainers Rbt.B.Lalrozama chu hman a ni ang. Hemi rual hian bial PYD Project Laptop fehchhuah a tuakna neih nghal a ni ang.
———-
PCD Sunday :
Aug.25 Pathianni hian Rahsiveng bial chhunga Local pahnih Venghlun leh Hauruang Local-te chuan PCD pual Sunday an hmang dawn.
PCD pual Sunday-ah hian PCD in inkhawm programme zawng zawng an hmang vek anga, PCD pawimawhna te puanchhuah a ni ang. Venghlun Local-ah hian Bro.C.Lalhriatzuala Local PCD Secretary chuan thusawina neiin, PCD ten items hrang hrang an present dawn a ni. Bial PCD hruaitute chuan PCD pual Sunday hi an hmanpui ang.
——-
Seminar :
Sertlangpui Local LAD te chuan bial LAD board rorel bawhzuiin Aug.19 thawhtanni khan Thianghlimna tih thupuiah hmangin Seminar an buatsaih a, member thahnem tak kalin Resource Person atan bialtu Pastor T.Zahmingliana an hmang.
——-
Kumpuan bawhzui :
Lunglei District Headquarters Local Sunday School Department-te chuan General Sunday School Kumpuan ‘Kan fate I chhanhim ang u’ tih chu chak takin an bawhzui a, kumpuan thupui hi hmun thumah thenin hmalak a ni.
Hmalak thawh khatna hi June 16 Pathianni khan neih a ni a, hetah hian kan fate I chhanhim ang u ‘Thuthlungah tih thupui hmangin District Superintendent Rev.C.Vanlalena chuan thusawina a nei a, July 21 Pathianni khan kan fate I chhanhim ang u ‘zuk leh hmuam ruihtheih thil lakah tih thupui hmangin kumpuan bawhzuina hi neih leh a ni a, hetah hian resource person atan Sorkar lam atangin H.Zonunmawii Psychiatric Nurse leh National Tobacco Control Society atangin Vanlalruata Social worker te hman an ni.
Kumpuan bawhzuina thupui then tawp berna ‘kan fate I chhanhim ang u’ Social Media hman chungchangah tih chu Aug.18 Pathianni khan in zirtirna neih leh a ni a, resource person atan Dist.PYD Secretary Evan.Laldinpuia Sailo chu hman a ni.
Kumpuan bawhzuina atana an hmalakna hrang hrangah hian Headquarters Local te chuan an hlawkpui hle a ni.
———-
Fehchhuak :
Aug.24-25 chhung hian Rangte N Local PYD-te chu Lungsen S Local-ah rawngbawlin an fehchhuak dawn a, Rangte S Local PYD te pawh Lungsen N Local-ah rawngbawlin an fehchhuak bawk ang.
————-
Aizawl East District :
District Missions :
August 22, Ningani khan Director room-ah Aizawl East District Missions Department Executive meeting neih a ni a, Director Rev R.Lianzama’n a kaihruai a ni.
Meeting ah hian Kumin October thlaa Thingsulthliah bial ten District Missions Inkhawmpui an thlen tur chungchangte bakah home Missionary rawih lai mekte chungchang te ngaihtuah a ni.
Aizawl East District Missions Department te hian October thla hian Thingsulthliah Bial-ah Inkhawmpui vawi 26-na an hmang dawn a, he inkhawmpui thlenna tur atan hian Thingsulthliah bial te pawh nasa takin an inbuatsaih chho mek zel a ni. Inkhawmpui hi ruahmanna ang chuan pandal saka hman tur niin thil tul leh pawimawh te pawh an la fel thawkhat tawh a ni.
Tun dinhmuna District Missions Department-in Home Missionary a rawih lai leh an awmna hmun lo tarlang ila:
1. Sis Sangkhumi B/W- Khawlian Bial, Daido/ Tlangnuam
2. Evan H.Lalrinfela- Khawbung bial, Leisenzo
3. Evan H.Lalbiakzauva- Serchhip Bial, Hmunzawl/ Lungpho
4. Evan H.Malsawmthanga- Thuampui Bial, Thuampui Vengthar
5. Evan F.Zirliana- Khawhai bial, Sialhawk/ Biate
6. Evan TC Kapzathanga- Hnahlan bial, Tualcheng
7. Evan Vanlalrosiama- N.Vanlaiphai bial, Lungchhuan
8. Evan Vanlalnghaka- Khawzawl bial, Tualte
9. Evan Thangneihsanga- Zemabawk bial, Bungbangla
10. Bro Ramdinmawia- Champhai Bethel bial, Champhai Zote
11. Evan V Kamneihthanga- Rabung Bial, Saichal
12. Bro RK Lalnunsanga- Suangpuilawn bial, Saichal
13. Sis Lalthanpari B/W- Kawlkulh bial, Dulte
14. Evan Lalduhawmsanga- E.Lungdar bial,
15. Evan HK Lalhmangaiha- Keifang bial, Ruallung
16. Evan V Lalramenga- Thingsulthliah bial, Darlawng.
—–
Rammut thla rawngbawlna report :
August thla hi rammut thla a nih angin Aizawl East District chhunga Bialtu Pastor, Tirhkoh leh Tualchhung Kohhran hrang hrangte chuan urhsun takin an hmang hlawm a, hmun hrang hrangah mithar, Pathian chawimawina leh Revival Crusade te neiin Tualchhung thenkhat chuan rawngbawltu ruaiin hun an hmang hlawm a, Bialtu Pastor te pawhin an phak ang tawkin he rammut thla hi urhsun takin an hmang hlawm a ni. Rammut thla denchhena programme hmanah hian mithar pawh engemaw zat Kohhranah sengluh tawh niin Aizawl East District hmun hrang hrangah hlimna boruak a kal chho mek zel a ni.
Bethlehem Bial te chuan rammut thla denchhen hian Evan Vanlalramnghahmawia chu Bial chhunga rawngbawlna nei turin an ruai a, Church Board ten lenna hmun tur an kawhhmuhah rawngbawlna nei thinin August 18, Pathianni chawhma inkhawmah khan mithar pakhat, Bethlehem Vengthlang Kohhrana lawi turin Church Board Chairman chuan sengluhna a nei a ni.
Khawzawl hmunah pawh rammut thla denchhen hian Evan Lalbiakmuana leh Team member te chuan tunah hian rawngbawlna an nei mek bawk a, Evan HMS Dawngkima leh Team member te pawhin E.Lungdar Bial, Leng hmunah rawngbawlna an nei mek bawk a ni.
New Serchhip Kohhran te pawhin Rammut thla denchhen hian Revival Crusade, Rev R.Sangthanga Speaker-a hmangin August 3, Inrinni zan atang khan an hmang a, rawngbawlna hlawhtling taka kal chho mek zelin August 18, Pathianni chawhnu khan mual inkhawm neih niin Pathianni zan inkhawm banah khan mi 8 in sual ngaihdamna baptisma an chang a ni. Crusade neih chhung hian Chawimawina pawh vawi hnih neih tawh niin August 20, Thawhlehni khan Upa Lalchhuanmawia te chhungkua chuan Pathian chawimawina hi an nei bawk a, Kohhran ten hlim takin hun an hmang a ni.
Serchhip Biakinpui PYD te pawhin he rammut thla hi urhsun takin an hmang a, Bial chhungah rawngbawltu Evan Philip VL Hmuchhuaka ruaiin tunah hian Sialhau hmunah rawngbawlna a nei mek a, a rawngbawlna kaltlang hian August 18, Pathianni khan mithar pakhat Kohhranah sengluh a ni. Serchhip Biakinpui PYD te hian ruahmanna ang chuan thla hnih chhung rawngbawltu hi an ruai dawn a ni.
August 15 atanga 19 chhung khan District Missions Director, Rev R.Lianzama pawhin Khawhai bial, Biate hmunah rammut programme hlawhtling takin a hmang a, Upa Lalsailova te chhungkua chuan August 17, Inrinni khan Pathian chawimawina an nei a, August 19, Thawhtanni khan mi inphalte kaltlangin Pathian chawimawina hi neih leh a ni bawk.
Heng bakah hian Bial leh Tualchhung Kohhran hrang hrangte chuan rawngbawltu ruaiin he rammut thla hi hlawktakin an hmang chho mek zel a, Bialtu Pastor te pawhin anmahni bial chhungah rammu-in tunah hian rawngbawlna an kalpui mek hlawm a ni.
—–
Revival Crusade :
Thuampui Bial, Muanna Veng Kohhrana Evan K.Vanlaldika Speaker-a hmanga Revival Crusade neih chu Pathian thlarau Thianghlim awmpuina hnuaiah hlim taka hman chhoh mek zel a ni a, Kohhranah hlimna nasa tak thleng chho mek zelin June 26 atang khan Revival Crusade hi neih chhoh alo ni tawh a, July 6, Inrinni atang khan Pathian chawimawina neih chhoh reng niin a vawi 8-na ni turin August 24, Inrinni pawh hian Kohhrana mi thahnemngaite kaltlangin Pathian chawimawina hi neih leh a ni bawk.
Bethlehem Vengthlang Kohhran pawhin Evan H.Lalhlimpuia Speaker-a hmangin Crusade neih chhoh mek zel a ni a, August 24, Inrinni hian Evan Lalramzauva, District Missions Secretary te chhungkua chuan Pathian chawimawina hi an nei a, Kohhran ten hlim takin hun an hmang a ni.
Khawruhlian Bial, Khanpui hmuna Evan Lalamena, District Fulltime Evangelist rawngbawlna kal zelah August 18, Pathianni zan khan mithar pakhat Kohhranah sengluh a ni. Evan Lalamena hian tunah hian Khanpui hmunah hian rawngbawlna a nei mek a ni.
E.Lungdar Bial, North Mualcheng hmunah pawh August 18, Pathianni khan mithar kohhranah Bialtu Pastor K.Lalhmingmawia chuan sengluhna a nei bawk.
——
Member thar :
August 18, Pathianni vek khan Ngopa Bial, NE Khawdungsei hmunah mithar pahnih Kohhranah sengluh a ni.
Bawngkawn Bial PYD te pawhin August 14 atanga 18 chhung khan Peniel Biakin-ah Revival Crusade hlawhtling takin an hmang a, Speaker-ah Sis Lalhmangaihzuali B/W chu hman niin August 14, Nilai zan atang khan zantin inkhawmna neih thin a ni a, August 18, Pathianni zan khan Crusade hi tihtawp a ni. He Crusade-ah hian Bial PYD Hruaitute chuan inkhawm kaihhruaina hna thawk thin Pathian thlarau thianghlim awmpuina hnuaiah hlim takin hun an hmang a, siamtharlehna chang mi engemaw zat an awm bawk a ni.
——-
Inkantawn programme :
Bawngkawn Bial PYD te hian Conference rorel bawhzuiin August 19, Thawhtan zan khan Bawngkawn Biakin-ah inkantawn programme hlim takin an hmang bawk a, hetah hian Bro.Lalnunpuia, Peniel Local hnen atangin thuchah ngaihthlak a ni. Bawngkawn Bial PYD te hian Ramhlun Vengthar Local-ah leh Peniel Local-ah inkantawn programme hi an lo hmang tawh a ni.
———-
Competition :
August ni 18, 2019 Pathianni Chawhnu khan Dist. Hqrts. PYD Education Sub-Committee-te buatsaihin, Aizawl East District, Committee Room, Ramhlun South ah Essay/Article writing competition neih a ni.
He competition hi Dist. Hqrts Kohhran mipui zawng zawng huap a buatsaih niin, PYD member mai bakah Sunday school naupang atangte, Kohhran Upa leh Bible Woman te pawhin ngaipawimawhin he intihsiak ah hian an tel bawk.
Topics pathum siam niin, an thupui duh ber pakhat hmangin intihsiak hi an hmachhawn a ni.
Thupuite
1) Kei, rawngbawlna leh social media.
2) Musical Instrument & Pentecost Mite.
3) Rawngbawlna kawnga rilru hriselna tih te a ni.
He Competition hi LPS leh National Mental Health Programme te sponsor a ni a, Lawmman pawh tha tawk tak siam in
Pakhatna in Rs 1500 leh Certificate
Pahnihna in Rs 1200 leh Certificate
Pathumna in Rs 1000 leh Certificate bakah,
Consolation Prize mi 3 tan siam a ni bawk.
———–
Chhimtuipui District :
Rammut Programme :
District Supt Rev.Thanchunga Sailo chuan Tuipang V ah Pathian ni hian rawngbawlna neiin rammut programme a hmang.
District Secretary Rev.Joseph L.Thlauhthang chuan Aug ni 23, Zirtawpni khan Vahai ah rammut programme hmangin a fehchhuak.
District Treasurer Rev.WL Thanghre chuan Tuipang V ah Pathian ni hmang hian rammu in a fehchhuak.
District Missions Director Rev.Dr.C.Sihmo chuan Aug ni 23, Zirtawpni khan Lakiah rammu in a fehchhuak.
—–
Hnatlang :
Chhimtuipui Dist Office staff zawng te leh an chhungkua te chuan Aug ni 23, zirtawp ni khan District Office Building sak mek chhunzawmin hnatlangin an thawkchhuak.
——-
District chhunga rammut programme :
Rev.Dr Lalkima chuan Aug ni 13-15 chhung khan Sangau -I local church ah rawngbawlna a nei a. Aug ni 16-18 chhung hian Sangau -II local church ah rawngbawlna a nei chhunzawm a. Local hranghrang ah a tul dan ang zelin rawngbawlna a nei chhunzawm dawn a ni.
2. Aug ni 17, Inrinni atangin evan.Joseph Lalremruata Aizawl Bethlehem chuan Sangau -I local church ah rawngbawlna a nei.
3. Aug ni 17, Inrinni atang khan Bualpui NG section Pastor Hnehchunga leh a thian te chuan Sentetfiang local church ah rammut rawngbawlna an nei.
4. Aug ni 17, Inrinni atangin Bible Women Suilenzingi(Masuii) leh a thian te Niawhtlang te chuan Pangkhua local church ah rammut rawngbawlna an nei tan bawk a ni.
——–
Thilpek :
Chhimtuipui District-in General Mission Dept hnuai a Odisha mission field Puri khuaa kohhran ram leina tur atan theih tawp an chhuah kalmek a, District hrang hranga Kohhran hoten hetiangin thawhlawm an lakhawm :
1. South Lungpher Bial leh local a tangin – Rs. 9000/-
2. Meisatla local, Siaha bial – Rs. 6200/-
3. College veng local, Siaha bial – Rs. 5000/-
4. Hqrs Local, Siaha bial – Rs. 21850/-
5. Sihatla local, Siaha bial- Rs. 7000/-
Total:- Rs. 49050/-
Heng thawhlawm te hi odisha field incharge Pastor J.Lalnunmawia an hlan a ni.
——-
Lawmthusawi chawimawina :
Upa.J.Lalduhawma Siahatla chu hunrei tak natna khum a amut hnuin Pathian tihdamna achang chho mek zel a, Pathian humhimna leh akuangkuahna an dawn zawng zawng avang tein kohhran kaltlangin Pathian hnenah Lawmthusawina annei ang.
Aug ni 30 atanga Sept ni 1 chhung hian he hun hi an hmang dawn a ni.
———
Lawngtlai west District :
Lawngtlai west District hruaitute District Superintendent Rev.R.Ramthatzawla leh District Secy Pastor Lalsawmliana Sailo, Dist SS. Director Rev.TV Mawngchina te chuan Diltlang Bialah rawngbawlna hlawhtling tak an nei.
Inrinniah Chawngte P Kohhran hote tlawhin Kohhran ho nen chawhlui an kil hova. zan lamah Biakin pathum ah inkhawmin, Chawngte C ah Rev. R. Ramthatzawla, Saizawh E ah Dist Secretary Pastor Lalsawmliana Sailo, Chawngte P Local Rev. Tv Mawngchina.
Pathianni zingah Chawngte P ah inkhawm hovin hlim takin hun an hmang a. Zan lamah superintendent leh Director te Saizawh E lamah inkhawm in Secretary in Chawngte P ah huna hmang thung. Thawhtan niah Diltlang Kohhran tlawh lehin zan lamah inkhawm an buatsaih a, District Ss Director Rev. Tv. Mawngchina’n thutawi a sawi a. District Superintendent in thusawi rawngbawlna a nei thung. An rawngbawlnaah Kohhran hote an lawm hle.
——
District hruaitute Programme :
District.Supdt. Rev.R.Ramthatzawla chuan Aug ni 25, Pathianni hian Lawngtlai Council vengah rawngbawlna a nei ang.
Dist.Secretary Pastor Lalsawmliana Sailo chuan Aug ni 24, Inrinni hian Saizawh west ah rawngbawlna a nei ang.
Aug thla hi Ram mut thla a nih angin Lawngtlai West District Missions Director Rev.F.Lalbiakthuama chuan Bial hrang hrang fangin rawngbawlna a nei kual a, Aug ni 24, atanga Sept ni 1, Pathianni thleng hian rammut programme hmangin vaseikai, hmawngbu, Sabualtlang LEH Lunghauka
ah te rawngbawlna a nei ang.
———-
North Mizoram District
Pastor quarters sa tha dawn :
N. District Building Committee in a rel angin Kawnpui Bial Pastor Quarters Assamtype-a kum 2002-a sak tawh chu RCC building-a sak that turin ruahmanna siam a ni.
Kawnpui Bial Pastor Quarters hi Aug. ni 12 Thawhtanni kalta khan Bial chhung kohhran hnatlang kohvin member 48 zet chhuakkhawmin hnatlangin an thiat tawh a. Aug ni 20 thawhlehni khan Dist.Suptt. Rev.Laltluanga chuan a hmuna en puiin, tawngtaia Pathian hnena inhlan chungin Hnathawh bul a tanpui a ni. Pastor Quarters thar tur hi a beam thlawk te nen vek ft32 leh ft 46 vela lian tura ruahman a ni a, Aug ni 20 thawhlehni atang hian bankhur lai tanin; Kawnpui Bial chhunga Kohhran hote’n Bankhur hi hnatlangin an in laih sem thin a ni.
——–
Work Camp :
Chaltlang Bial Chanmari Kohhran PYD te chuan Aug ni 12 atanga 17 chhung khan North Mizoram District Missions Field Vawngawnzo Biak in sak hna an thawk a, hun reilo te chhungin RCC ban 10 leh tie Beam an chhung vek hman a ni.
Chanmari PYD ten Biak in sak hna an thawh chhung hian mithar 6 lawmluh a ni a, Mithar te hi work camp-a kal Evan. Lalkrosthanga’n lawmluhna a nei a, Pathianni kal ta Aug ni 18 khan District Missions Director Rev. C. Lalthantluanga’n Sual ngaihdamna Baptisma a chantir a ni.
Work camp-ah hian Chanmari kohhran atangin member 22 thawkchhuakin hlim takin hun an hmangin Chaltlang Bial Missions Director Evan. C. Hmingchungnunga’n workcamp nei thalaite a ho bawk a ni.
——
Member thar :
1. Aug ni 18, Pathianni khan Damparengpui bial Dampa zodinah Mithar 5 lawm luh niin; Dampa Tlangnuamah Nau 4 Lal Isua hnenah hlan a ni bawk. Hei bakah hian Damparengpui ah Mithar 8 lawm luh niin Sual ngaihdamna baptisma 1 in a chang bawk.
2. Mamit Bial Phaizauvah Pathiani kal ta Aug ni 18 khan Mamit Bialtu Pastor Vanlalruata leh rawngbawltu Upa Lalchungnunga ten tlawhin mi thar 4 kohhranah an lawmlut a, Baptisma chang 3 neih a nih bakah Nau pakhat Lal Isua hnenah hlan a ni bawk. Mamit Phaizauvah hian District rawihin rawngbawltu Bro. K. Pazawna a awm mek a ni.
Sist. Lalhmingliani, Headquarters kohhrana lawi chuan Zawlnuam Bial Bezerung Missions Field tlawhin Kohhran memberte tan a thlawnin thawmhnaw a thui sak a, kohhranhote pawh an lawm hle. Sist. Hmingtei puan thui tur hi Hqrs PYD Evangelical Committee ten an tum a ni bawk.
3. Rammut thla a nih anga Rammua fehchhuak Bilkhawthlir Bialtu Pastor Lalpianthanga chuan Kawnpui Bial Rasdali Missions Field tlawhin a rawngbawlna atangin mithar pahnih neiin Isua hmingin Sual ngaihdamna Baptisma chantir nghal a ni. Mithar te hi pawl dang kohhran leh Hindu sakhua atanga lak luhte an ni.
———-
Fehchhuak :
Aug. ni 17 Inrinnni leh a tuk Pathianni Hmangin Rengdil Pastor bial conference in ro a lo rel tawh angin Rengdil bial huapin Zawlnuam bial tlawh a ni a, Zawlnuam Bialte hian bial headquarter Bawrai kohhranah lo dawngsawngin inkhawm Programme pawh Bawraiah hman a ni, Bial pahnih inkhawmte hian Thlarau revival nen hlim takin hun an hmang a ni.
Intawhkhawmnaah hian Evan F.Lalchhuangliana, Upa Rohnuna , Upa Sailothanga leh Rengdil Bialtu Pastor C.Lalthlengliana ten Pathian thuchah an sawi.
Rengdil bial member 50 bawr chhuakin Bro.C.Lalthlamuana, Rengdilin Pathianniah lirthei thawhin lángin mi engemawzat an kal bawk a ni. Zawlnuam bial hi Rengdil biala awm thin an ni a, Kum 2017 June 25 khan Zawlnuam bial tiin an indang a, tun tum hi Zawlnuam Bialte an indan hnua Rengdil bialin Bial huapa an tlawh leh hmasak berna a ni.
——-
Rammu :
1. Aug ni 15 – 18 hmang khan Chaltlang PYD te chu Kananthar kohhran tlawhin an rammu a. Hemi hunah hian Chaltlang Thalai mi 10 kalin Adviser Tual Upa Lalthankima Royte-in a ho.
Rammut Programme ah hian Kananthar khuaa in awm zawng zawng luh chhuah vek niin Pentecost kohhran nilo kohhran dang inah a remchan dan ang zela Pathian Thuthlung sawiin tawngtaina neih chhuah vek a ni a.
Kohhran chhungkuaah kohhrana insawhnghehna lam hawi thu sawi bawk niin tawngtaina hman chhuah vek a ni bawk.
Inrinni zan atangin inkhawm Service neiin; Pathianni zan inkhawmah phei chuan pawl dang atangin inkhawm chhimtu thahnem tak an awm bawk.
Kananthar khuaah hian District kohhranpui hmalaknain Evan Ramnunsanga’n rawngbawlna a nei mek a, Tirhkoh rawngbawlna nasa takin Pathianin mal a sawm a. Pentecost kohhran rawn zawm tum an awm nual nghe nghe a. Indona a nasat avangin kohhrana rawn luh tumte pawh chawplehchilha lawm luh mai theih an ni rihlo nachungin Evan Ramnunsanga rawngbawlna kaltlangin kohhran zawm thar tur mi engemawzat beisei an ni.
Kananthar kohhran chhungkaw tin hnenah Chaltlang PYD hian, “PENTECOSTAL HOME” Plate an tar chhuak bawk.
Chaltlang PYD te hian Kanan Biak in chu a chhinchhiahna Signboard Biak in hmalamah an tar bawk a. Hei bakah hian Tirhkoh Quarters-a dah tur Water Filter Tha tak Chaltlang PYD hian an pe bawk a ni.
Bro. Lalthanmawia te chhungkua, Chaltlang te chuan Kananthar kohhrante hman turin Combo tha tak an pe a, an chhungkaw aiawhin Chaltlang PYD President Evan. R. Lalthakima’n a hlan a ni.
Chaltlang PYD ten Rammut Programme an hman chhung hian Chaltlang PYD President Evan R. Lalthakima’n nau pahnih a hlan a. Ani kutah hian mi pahnihin Lalpa Isua hmingin sual ngaihdamna Baptisma an chang bawk.
2. Pentecost Revival Team te chuan Dist.PYD hmalakna in, Kawrthah Preaching Point ah rammuin Aug ni 5th thawhtanni atanga Aug ni 19th chhung khan rawngbawlna an nei a, a rawngbawl chhung hian Home Crusade te neiin kohhran dang dang inah te an fehchhuak bawk a, a tul anga Mike sevice te pawh neih a ni. an rawngbawl chhung hian Mithar 1 chu Sual ngaihdamna Baptisma chantir a ni bawk a ni.
Pentecost Revival Team te hian Sihphir Kohhran Crusade buatsaihah rawngbawlin an awm leh mek a ni
3. Evan. T. Vanlalruata of Tuikual South Kohhran leh a rawngbawlpuite chuan Aug ni 19 Thawhtan zan atang khan Edenthar Kohhranah rawngbawlin an lut.
Apostolic revival team te rawngbawla an luhna hmun Edenthar kohhrante hian Zan tin inkhawm buatsaih chhovin, Chhun lamah kohhran in bakah a tulna hmun hmunah an lengkual a, Ram pawh a inhawng viau zel a ni.
4. Jehova Rapha Revival Team Evan. Lalduhsaka Saza leh a rawngbawlpuite chuan kar kalta Nilani Aug. 14, atang khan Durtlang Ramthar kohhranah lutin rawngbawlna an nei; Rawngbawla an luh chhan ram chhan hna an thawh chu a hlawhtling hle a.
Jehova Rapha Revival Team te rawngbawlna Lalpan mal a sawm a, Aug 21 khan Kohhranin Pathian chawimawina an nei bawk a ni.
5. Rammut thla denchhena fehchhuak Sist. J. Lalmuankimi leh a rawngbawlpui te rawngbawlna chuan hmasawn zelin tun dinhmunah Tumpanglui khuaah Mithar 62 Pentecost kohhranah sengluh an ni tawh.
Tumpanglui khuaa rammua thawkchhuak te hi Speaker Sist. J. Lalmuankimi (Nutei), Bro. Paul LaLrambeiseia, Bro. Lalawmpuia, Sis. Lalhriatkimi leh Sist. Sanghnuni te an ni a, Aug. 8 Ningani khan Tumpanglui khua hi an lut a ni.
Tumpanglui khuaa an luh hma hian Bialtu Pastor C. Lalthlengliana hovin theihtawp chhuahin tawngtaiin an inhlan a, Bialtu Pastor leh Bial Missions Dept OB ten July ni 30 khan inluah tur zawnga fehchhuak hmasain rawngbawltute inluah tur chu awlsam takin an va hmu a, he khuaa rammut hi Pathian remtih leh hriakthih a nih avangin Bial mipuite pawh an lawm hle. Rammua fehchhuak rawngbawltute luh hma hian Tumpanglui khuaah hian United Pentecostal Church member hi pakhat mah an la awm ngai lova, Pawl dang dang pathum erawh an awm thung ni.
Sist. J. Lalmuankimi leh a rawngbawlpuite hian Tumpanglui khuate’n Pathian thuthlung an hmuh theih nan chawngheia tawngtaiin theihtawp chhuahin an bei a, an rawngbawlna malsawma awmin Pathianni kalta Aug 18 khan Tuipanglui khuaa thil la awm ngai lo United Pentecostal Church inkhawm hmasa chu neih alo ni ta a ni. An rawngbawlna kal zelah Pathianin Pentecost member ni turin member 62 ngawt a pe ta a ni. Rawngbawltute rawngbawlna hian hmasawn lam a pan zela reiloteah rawngbawltu uapna hnuaiah kohhran mumal tak a din thuai pawh a rinawm a ni.
6. Rammut thla denchhenia Maubawk bialte’n Bungkawn Kohhran Biak ina Revival Crusade a buatsaih chu a hlawhtling hle.
He Revival Crusade-ah hian District Tirhkoh Ramtlan Evan. Zoramthara leh a rawngbawlpuite chu rawngbawltu atan rawih an ni a, Aug ni 14 khan rawngbawlna tanin Pathianni kalta Aug ni 18 thleng kha ruahmanna awm a nih laiin, an rawngbawlna kaltlanga Pathian hnathawh kal zelah Aug ni 20 Thawhlehni khan Bro. Lalhmachhuana te chhung kaltlangin Pathian chawimawina Bial huapa neih a ni a, he rawngbawlna kaltlang hian Nula fel tak Mithar 1 in Pathian thuthlung hmuin sual ngaihdamna Baptisma Maubawk Bialtu Pastor Rev. R. Lalhmangaiha’n a chantir a ni.
Bro. Hmachhuana te’n Pathian Chawimawina an neih hian boruak duhawm tak hring chhuak zelin Upa Vanlalthlana te chhungin Pathian chawimawina hi an nei chhunzawm dawn bawk a ni.
———-
District hruaitute Programme :
North Mizoram District Supdt. Rev. Laltluanga chuan Aug ni 20 Aug. khan Kawnpui Bial Pastor Quarters sak that tura ruahman chu a hmunah enpuiin hnathawh bul tannaah Pathian hnenah inkawltirn tawngtaina hun a hmang.
District Treasrer Rev. K. Lalduhsanga chuan Building Committee ruahman tawh angin Damparengpui Bial Luimawi Biak in sak dan tur leh sum ngai zat ruahmanin Luimawi kohhrante a tlawh a, Sum mamawh hmasa tur engengmaw zat hlanna a nei. Hei bakah hian Aug ni 11 Pathiannia hawn tak zawlnuam Pastor Quarter enin Zawlnuam a tlawh bawk.
N. District Missions Director Rev. C. Lalthantluanga chuan Pentecost kohhrante’n Augst thla Rmmut nana an hman thin angin Rammut thla denchhenin Missions Field hrang hrang Vawngawnzo, Damdiai, Kolalian, Persang, bakah tuna Rawngbawltu Sist. J. Lalmuankim leh a hote’na Rammua rawng an bawl mekna Tumpanglui khua bakah Dampa Tlangnuam te a tlawh.
N. District Sunday Director Rev. K. Malsawmtluanga chuan Aug ni 25 Pathianni zing, chhun leh hmang hian Maubawk Bial Kohhran hrang hrang Maubawk, Bungkawn leh Lawipuah te Gen SS kumpuan Campaign neiin hun a hmang ang.
North Mizoram District Sunday School Secretar Evan. H. Lalrinngheta leh a hote chuan Aug. ni 17 Inrinni zan atanga a tuk Aug. 18 Pathianni chawhma hmang khan Tlangnuam Bial Lungleng 1 kohhranah leh N. Lungleng Kohhranah te General SS Kumpuan ‘kan fate i chhanhim ang u” tih thupui hmangin Campaign an nei.
Lungleng I kohhranah hian Inrinni zanah hun hmangin Thlarau boruak tha tak hnuaiah hun an hmang a, Kohhranhote pawhin an hlawkpui hle. A tuk Pathianni chawhnu leh zan hmangin N. Lungleng Kohhranah Campaign hi neih chhunzawm leh a ni a, Kohhranhote’n an hlawk pui hle bawk a ni.
Facebook