UPCNEINEWSSERVICE April 28-May 5. 2019
———-
Missionary tirchhuak dawn :
May ni 5, Pathianni hmang hian General Missions Department hnuaia Missionary a kaltur tirhchhuah programme Thuampui Kohhran Biak inah hman a ni dawn.
April ni 3, Nilainia General Missions Department-in Missionary tura a lak thar mi 2, Upa H. Israela, Lawngtlai vengpui leh Evan. J. Malsawmdawnga, Siaha tlangkawn Kohhrana lawite hi Chhimtuipui District chhunga mite ve ve niin; May ni 5, Pathianni hian Aizawl East District, Thuampui Kohhran Biak Inah tirhchhuahna hun hman a ni dawn ta a ni. Missionary tura lak tharte hian May ni 1, Nilaini khan General Hqrs Office ah Joining report an pe a, May ni 2, Ningani khan Missionary hna chungchang bik atana Traning an lo nei fel tawh bawk.
Missionary-a kal turte tirhchhuahna hi General Treasurer Rev. Zohmingthanzama chuan neiin, General Suptd Rev. Lalmalsawma Sailo chuan fuihna thuchah a sawi ang a, General Missions Secretary Rev. VL Tluanga Sinate in Hriatthihna leh tawngtaisakna a nei thung ang.
Missionary tirhchhuah inkhawm hi General Director Rev. R. Lalhawia chuan kaihruaiin, Rev. C. Lalthantluanga’n Hunserh a hmang ang a, Missionary te chanchin sawina General Missions Treasurer Evan PC Lalrokima chuan neiin North Mizoram District Choir leh General PYD Choir ten zaia rawngbawlna an nei dawn a. Aizawl East District Director Rev. R. Lianzama’n malsawm tawngtaiin he inkhawm hi a tin ang.
—–
CBC kal tur Exam leh Interview :
May ni 1, Nilaini khan Calvary Bible College, Shillong chuan B.Th zir turte tan Entrance Examination leh Personal Interview a nei.
Entrance Exam leh Personal Interview te hi Mizoram chhung leh pawn tan hmun hnihah a rualin neih a ni a, Mizoram chhunga mite tan General Hqrs Office, Mualpui Salem veng Aizawlah neih niin, Mizoam pawn lam mi tan Calvary Bible College, Shillong-ah neih a ni bawk. Entrance Exam leh Personal Interview tute hi an vaiin mi 26 niin, Aizawlah mi 13 leh Shillong-ah mi 13 ten an hmachhawn a ni. Result kimchang erawh karleh pennet programme ah tarlan a ni ang.
—–
General Hruaitute Programme :
General Superintendent Rev. Lalmalsawma Sailo, General Treasurer Rev. Zohmingthanzama, General Missions Director Rev. R. Lalhawia te chuan May ni 5, Pathiannia Missionary Tirhchhuah Programme, Aizawl Thuampui Kohhrana neih turah hun hmangin, rawngbawlna an nei ang.
General Secretary Rev. R. Lalrinsanga chuan April ni 29, Thawhtanni khan Aizawl chhuahsanin Tripura a pan a, Tripura ah hian Kohhran rawngbawlna hna tul thawkin May ni 2, Ningani thleng hun a hmang a. May ni 3, Zirtawpni khan Tripura chhuahsanin Bairabi a pan a. Bairabi bial te hian bial huapa Seminar leh Revival Programme an buatsaihah Speaker-ah tangin May ni 5, Pathianni zan thleng hian rawngbawlna aneih chhunzawm nghal dawn a ni.
—-
LAD Day hmang dawn :
Tunkar lo awm tur May ni 10, Zirtawpni hi Kohhran ni pawimawh LAD Day a ni a, he ni hi India hmarchhak pum huapa hman thin niin Kohhran Office, Bookstall, zirna in leh Kohhran hmun pawimawh dangte khar a ni ang.
LAD Day hi kum tin May ni 10, ah hman thin a ni a, LAD te chuan he ni hi intihhlimna leh infuihtharna bakah vantlang tana hna tha thawhna ni atan an hmang thin a, kumin pawh hian chutiang lam hawi zawnga hman turin LAD te an inbuatsaih nasa hle niin thu kan dawng.
Kohhran dan buin a sawi angin he ni hi Nute hriatrengna ni-Mother’s Day a ni nghal bawk. General LAD Hruaitute President Sis. Lalchanglian Sailo B/W, Secretary Sis. Lalramthangi B/W, Treasurer Sis. F. Rohlupuii B/W te chuan LAD Day hlim taka hmang theuh turin LAD member zawng zawng te duhsakna an hlan a, General Suptd Rev. Lalmalsawma Sailo pawhin LAD member zawng zawngte duhsakna chibai bukin, he ni hi LAD Day bakah Nu te ni- Mother’s Day a nih tel avangin Nute chawimawina ni atana hmang turin Kohhran hote a chah bawk a ni.
——-
India Unit Conference hmanpui :
April ni 25 atanga ni 28 chhunga UPC india Unit General Convention & Conference, Adoor Kerela-ah neih a ni a. Conference na hmun hi Marthoma Youth Center, Adoor niin India Unit huamchhunga Pentecost mi thahnem tak an fuan khawm.
Kan rawn tarlan tawh angin Conference hmanpui tur hian Indiar Hmarchhak UPC Kohhran atangin palai mi 4, NEI-UPC General Suptd Rev. Lalmalsawma Sailo, Lunglei Dist Suptd Rev. R. Lalrosanga, Chhimtuipui District Suptd Rev. Thanchunga Sailo leh Imphal District Suptd Rev. Thangtinlien Singson te an kal a ni. Conference chhung hian General Suptd Rev. Lalmalsawma Sailo chuan NEI hminga chibai bukna leh Pathian thuchah sawina hun a hmang nghe nghe.
UPC in India/India Unit General Conference hi vawi 70-na ni tawhin an Conference pawh Pathian thlarau thianghlimin a chenchilh hle a ni. Conferece report kimchang erawh Pennet Interview kaltlangin Kohhran Proramme leh youtube lamahte phochhuah a la ni ang.
Adoor, Kerela-ah hian India rama UPC Kohhran rawn dintu pawimawh Missionary ropui Rev. Ellis Luther Scism-a chuan awm hmun bengbelin, Bible School-a din a, chungte chu vawiin ni thleng hian chawl lovin nghet takin ala ding a ni. Hei hi hre rengin, kan hruaitute hian Conference zawh velah Adoor Bible School, 1957 a din tawh; North East India atanga kan hruaitu hmasate Bible School lo zu kal thinna chu tlawhin hun hlimawm tak an hmang.
April 29, Thawhtanni khan Adoor atanga lo haw chhuakin May ni 2, Ningani khan mahni hmun dam takin an thleng a ni.
——-
Bial Revival hmang mek :
May 3 atanga ni 5 chhung hian Lunglei District L.A.D. Conference rorel angin, Lunglei District Headquarters bial LAD, Cherhlun bial LAD, Thingsai bial LAD leh S.Vanlaiphai bial LAD-te chuan Cherhlun Local-ah bial 4 infin Revival an hmang mek.
Bial 4 Joint Revival-ah hian bialtu Pastor-te theuh bakah District LAD President, Sist.Lalramlawmi Sailo B/W chuan thusawi rawngbawlna an nei dawn a ni.
An ni bial bakah hian May 3-5 chhung vek hian Rahsiveng bial LAD, Thenhlum bial LAD, Zawlpui bial LAD leh Bunghmun bial LAD te chuan Thenhlum biakin ah bial 4 revival hi an hmang mek bawk.
——
Mi thar :
April 28 Pathianni khan Lunglei District, Pangzawl Khuanghlum Local-ah bialtu Pastor R.Lalramhluna chuan mi thar pakhat baptisma chantirin Pentecost kohhranah a seng lut.
——–
Kumpuan hawnna :
May ni 2, Ningani zan khan PYD Lunglei District hnuaia kumpuan Committee-te chuan Kumpuan (Intodelh) hawnna District UPC Conference Hall, Chanmari-ah an hmang.
He hun hi Kumpuan Comtt Treasurer Rbt.C.Lalrosanga chuan a kaihruai a, Lunglei Dist Suptd Rev.R.Lalrosanga chuan hunserh hmangin, Kumpuan thupui hi Lunglei District PYD President Evan.V.Lalduhawma chuan Pathian hnenah hlanin a hawng. Bro. TC.Jonunsanga chuan thusawina neiin Kumpuan Committee Secretary Bro. Eddie Zonunkima chuan report a pek bakah District chhunga zai mi ten zaia rawngbawlna an nei bawk.
——-
District PYD Choir :
April 28 Pathianni khan 2019-2020 chhung atana Lunglei District PYD Choir member a ruat thar te lawmluhna inkhawm (Induction service) Dist Headquarters biak in ah neih a ni.
He hun hi Music Committee Chairman Upa C. Lalhmangaiha chuan a kaihruai a, Report & Introduction Rbt. R. Lalnunthara Music Committee Secretary chuan pe in, District PYD Secretary Evan Laldinpuia Sailo in thutawi sawina a nei a, Lunglei District Secretary Rev. C. Vànlalèna’n member thar te lawmluhna neiin, fuihna thuchah a sawi bawk. Term hmasaa District PYD Choir member mi 5, chawl turte hnenah thlahna thilpek Citation hlan a ni bawk.
Lunglei District PYD choir-ah hian member 24 (Mipa-12, Hmeichhia- 12) te ruat thar an ni a, chungte chu:
HMEICHHIA
1) C. Hmingthanmawii – Rahsivêng
2) C. Lalchhanhimi – Electric Vêng
3) K. Lalrinkimi – AOC
4) LH. Lalmuanzuali – Electric Vêng
5) PC. Lallàwmsângi – Rahsivêng
6) C. Vànlalzâmi – Farm Vêng
7) Lalhmangaihzuali Chongthu – Rahsivêng
8) LP. Lalrèmpuii – Rahsivêng
9) Zohlupuii Râlte – Vênglai
10) Vànlalhmangaihkimi Sailo – Ramthar
11) Angela Lalnunhlimi – College Vêng
12) R. Lalnunfeli – Luangmual
MIPA
1) C. Lalnunpuia – AOC
2) R. Lalawmpuia – Farm Vêng
3) C. Lalbiakdika – Zotlâng
4) Laldampuia Pachuau – Pûkpui
5) C. Ramdinthara – Farm vêng
6) C. Lalmuanpuia – Pûkpui
7) PC. Lalrintluanga – College Vêng
8) B. Lalruatsânga – Luangmual
9) H. Lalfamkima – Electric Vêng
10) Lalvenhima – Bazâr
11) Laltlanhlua Sailo – Rahsivêng
12) A. Lalmuanpuia – Headquarters
———
Jubilee turin inbuatsaih :
Aizawl East District ten District an nih atanga a Kum 25-na, Silver Jubilee lawm turin inbuatsaihna an kalpui mek zel.
Jubilee lawmna hi ruahmanna ang chuan May 8, Nilaini-ah District Building chunga Pandal sakah lawm tur niin Chawhma Dar 10-ah tan a ni ang a, Inkhawmna neih hma in Rev Biaksangzuala, District Secretary kaihhruaiin Jubilee Building Rev Rosanga Kawlni, District Superintendent chuan hawnna neiin ruatbik mi 25 ten Jubilee dar an vua ang. Pandal chhungah inkhawm chhunzawm tur niin District chanchin lehkhabu tlangzarhna Rev P.Chunga, Former Gen.Superintendent chuan neiin Rev Biaksangzuala, District Secretary hnen atangin report ngaihthlak a ni ang a, Thusawi tawi mi hrang hrang hnen atangin ngaihthlak a ni bawk ang.
Chawhnu Inkhawm-ah Souvenir review, Evan Lalramzauva, Souvenir Chairman chuan neiin mi hrang hrang ten thusawina a nei leh anga tlai-ah Jubilee ruai kilho a ni ang.
Silver Jubilee hi zanah pawh chhunzawm tur niin Report leh Video Clip tlangzarhna, Jubilee Organising Secretary Evan VL Nghaka Chawngthu, chuan neiin mi hrang hrang ten thusawina a nei leh bawk ang.
Aizawl East District Silver Jubilee lawmna programme-ah hian inkhawm apiangin mimal zai bakah Jubilee Choir leh General Choir te hnen atangin Pathian fak hla ngaihthlak a ni ang. Jubilee hmang tur hian tlang tin leh mual tina Pentecost Member te chu sawm vek kan ni.
——–
District Conf turin inbuatsaih mek :
May 9 atanga 12 chhunga Bethlehem Biakin-a Aizawl East District Inkhawmpui vawi 25-na, Silver Jubilee hman tur atan inbuatsaihna peih thawkhat a ni ta.
He inkhawmpui hi Bethlehem Bial te chuan Bethlehem Biakin-ah an thleng dawn a, Bial chhunga Kohhran member te nasa taka inbuatsaih tawhin tunah hian hnatlangin Biakin leh a chhehvel buatsaih hna an thawk mek a. Kumin Inkhawmpui hi tarlan tawh angin a vawi 25-na, Silver Jubilee a nih angin ropui taka hman tum a ni. Silver Jubilee Conf hi May 8.1994-a General Superintendent mawhphurhna chelhtu leh Aizawl East District, District-a hawngtu ni bawk Rev K.Satinvela chuan a hawng dawn a. Conference ah hian Thupui bik nei lovin mi hrang hrangte hnen atangin thusawi ngaihthlak thin a ni ang. Mizoram pawn, Kalay 1 District, Myanmar Superintendent leh Secretary ten inkhawmpui hi an hmanpui dawn a ni.
District Inkhawmpuiah hian hranghlui zaithiam tak tak, District hawn a nih bawr vela zaia rawngbawlna nei thin Sis Lalhmunmawii Parte, Bro Lalkima Zote, Sis Lalchhanhimi Ralte, Bro F.Ramhmingmawia, Evan CS Lallawmzuala, Sis Laltanpuii bakah Upa Rodailova Zote bakah Sis Lalchhanhimi Khiangte te hnen atangin Pathian fak hla ngaihthlak thin a ni dawn a. Silver Jubilee a nih angin Pathianni tlaiah Inkhawm zawng zawngte tan Jubilee lawmna ruai theh tura ruahmanna siam a ni bawk.
Kuminah hian District Sunday School leh LAD te chuan a hrana inkhawmpui an neih loh avangin May 10, Zirtawpni-ah rorelna an nei anga, Sunday School hian Bethlehem YMA Hall-ah neiin LAD ten Bethlehem Biakin-ah an nei thung anga Kohhranpuiin May 11, Inrinni chawhma dar 10-ah Bethlehem Biakin-ah rorelna neih a ni bawk ang. Kumin-ah hian Department te chuan lawmman sem tur an neih ang angte chu rorelna an neih hunah sem tur tih a ni bawk.
——-
Bial Huap Lang camp :
April 27, Inrinni khan Mualpui Bial Sunday School Department buatsaihin Mualpui Kohhran Biakin-ah Intermediate atanga Doctrinal Department te tan Bial huap lang camp buatsaih a ni.
Lang Camp-ah hian Speaker-ah Evan HMS Dawngkima, Ebenezer Revival Team Speaker chu hman niin Bial chhung atangin naupang bakah zirtirtu mi 80 ve an kalkhawm a, Thlarau Thianghlim dawngthar mi 7, siamtharleh chang mi 8 bakah sual ngaihdamna baptisma chang mi 1 an awm bawk. Lang Camp Followup Programme hi Pathianni chawhnu leh zan thleng khan an hmang chhunzawm a ni a. Rawngbawltute rawngbawlna Pathianin mal sawmin Naupang SS bakah Kohhran hoten an hlawkpui hle.
——-
Bial Huap Seminar :
April 28, Pathianni chawhnu khan Thuampui Bial te chuan inruat thar kuma an lo tih thin angin Thuampui Biakin-ah bial huap Seminar an hmang.
He hunah hian bial chhunga Bial Department hrang hrang leh Tualchhung Department hrang hranga OB te leh Church Board memberte bakah S S Zirtirtu mi 70 vel kalkhawmin hlawk takin hun an hmang a ni. Seminar-ah hian Bial Kohhranpui hruaitute chu Resource person-ah hman niin Bialtu Pastor Rev KVL Hmangaihkima hnen atangin Administration chungchang ngaihthlak a ni a, Evan C.Lalchhuanga, Bial Secretary chuan Leadership chungchang zirtirna pe in Treasurer, Evan Vanlaltluanga te hnen atangin Financial chungchang ngaihthlak a ni bawk. He huna kalkhawmte hian hlawkthlak an ti hle a ni.
——-
Lawmthusawi chawimawina :
Upper Republic Bial, Republic Vengthlang Kohhrana Good Friday pual Crusade neih chu Pathian hnathawh a thlen mek zel avangin chhunzawm zel a ni a, a vawi li-na atan May 4, Inrinni khan Upa Laltawnga te chhungkua chuan Pathian hnena lawmthusawi chawimawina neiin Kohhran hoten hlim takin hun an hmang.
He Crusade leh chawimawina-ah hian Speaker-ah Evan H.Lalhlimpuia, District Revival Speaker chu hman niin Sis Lalngilneii leh Sis Lalremsangi te hnen atangin Pathian fak hla ngaihthlak thin a ni. Crusade-ah hian Pathian hnathawh a thleng mek zel a, mi engemaw zatin Thlarau Thianghlim dawng tharin mi 2 in sual ngaihdamna baptisma an chang tawh bawk a ni.
——–
Fehchhuak :
Mualpui Bial Missions Department te chuan ruahmanna an siam tawh angin April 28, Pathianni hmang khan Hnahlan bial tlawhin hun hlimawm tak an hmang.
Mualpui Bial Missions Department te hian Hnahlan Bial chhung Tualcheng hmunah District Missions kaltlangin Home Missionary an ruai a, tunah hian Evan TC.Kapzathanga chuan rawngbawlna a nei mek a ni. Home Missionary hnathawhna enpui pahin Hnahlan bial Kohhran hrang hrangah inkhawmna neiin Bial Missions leh Bialtu Pastor Rev F.Lalchhanhima ten rawngbawlna an nei thin a ni.
——-
Pastor Quarters thar :
April 27, Inrinni Chawhnu khan Aizawl East District, Thuampui Bial Pastor Quarters building chu luah luh niin Rev Rosanga Kawlni, District Superintendent chuan Pathian hnenah hlanna a nei.
Thuampui bial hi April 5.2009 khan hawn niin Quarters neih theih nan hian chak takin hma an la nghal a, Building Committee te dinin nasa takin bial chhung Kohhran ten sum leh pai an thawhkhawm a ni. District atanga Quarter sak tanpuina an dawn nen Thuampui Bial Pastor Quarters hi Rs 22,00,000 chuang senga sak puitlin a ni ta a ni.
Thuampui bial Pastor Quarters hlanna hi Rev KVL Hmangaihkima, Bialtu Pastor chuan kaihruaiin Building Committee hruaitute, Rev H.Dingliana, Upa Jimmy L.Renthlei leh Evan Vanlaltluanga ten hnen atangin thusawi ngaihthlak niin Bial Board member leh Building Committee hruaituten tlai-ah chawhlui an kilho nghal a ni.
———-
Silver Jubilee lawm :
May 1, Nilaini atanga Pathianni zan thleng awh tur hian Upper Republic Kohhran te chuan an Kohhran Kum 25-na, Silver Jubilee an lawm.
Jubilee lawmna pui ber hi May 1, Nilaini khan hman niin Chawhma hun Evan Lalhmachhuana chuan inkhawm kaihruaiin District Superintendent, Rev Rosanga Kawlni, chuan Souvenir a tlangzarh a, Evan K.Lalmuansanga hnen atangin report ngaihthlak a ni bawk.
He hunah hian Upper Republic Bialtu Pastor mawhphurhna lo chelh tawh te bakah Rev Biaksangzuala, District Secretary te hnen atangin thusawi tawi ngaihthlak niin mimal zai bakah Jubilee Choir leh LAD ten zaia rawngbawlna an nei bawk. Chawhnu-ah Jubilee Lungphun hawnna leh Jubilee dar vuakna neih niin Rev Vanlalfela Ramtiam, District Treasurer chuan Jubilee Lungphun hawnna neiin Kohhran Committee member leh Bialtu Pastor lo ni tawh ten Jubilee dar vuakna an nei a, Bro H.Lalrinmawia leh Bro R.Thangkunga te kaihhruaiin Jubilee pual Ballon chhuahna neih niin, tlai-ah Jubilee ruai hlim takin an kilho a ni.
Zan lamah Jubilee meidetna Upa K Bawlliana chuan neiin Bialtu Pastor, Rev C.Lalengliana hnen atangin thuchah ngaihthlak a ni. May 3, Zirtawp zan khan PYD te puala hun hman niin hetah hian Item chi hrang hrang hmangin intihhlimna Biakin chungah an nei a ni. Jubilee lawmna hi Inrinni zan, Pathianni Chawhma leh zan khan chhunzawm leh a ni ang.
————
Revival Crusade :
April 26 atanga 28 chhung khan Sesawng Vengthar Kohhranah Thingsulthliah Bial PYD buatsaihin Revival Crusade hlawhtling taka neih a ni a, Speaker-ah Evan. R Vanchhunga, District Fulltime Evangelist chu hman niin Sis. Ramdingpuii leh Sis. Laldinthari ten zaia rawngbawlna an nei thin.
April 27, Inrinni khan Biakinah sharing neih niin tlaiah chawnghei ?awng?ai an neih bakah Pathianni tlai khan Peniel neih a ni bawk. Crusade neih chhung hian mithar pakhat sengluh niin sual ngaihdamna baptisma mi 2-in changin Thlarau Thianghlimna dawngthar mi 2 an awm bakah zuk leh hmuam nghei thar pakhat a awm bawk.
Crusade hi Pathian thlarau thianghlim chuan awmpuiin thu leh hla lamah hlawk takin hun hman a ni a, Pathianni zan inkhawm banah Thuthlung rawngbawlna neih a ni a, Speaker Evan. R Vanchhunga kutah mi pahnihin sual ngaihdamna Baptisma an chang a ni.
——–
Bial Sunday School inkhawmpui :
Aizawl East District, Rabung bial te chuan remchang zawkna avangin April 27 atanga 28 chhung khan Bial Sunday School Inkhawmpui vawi 40-na, Rabung Biakinah an hmang.
Inkhawmpui hi April 27, Inrinni khan tan niin Bialtu Pastor J.Lalhmingsanga chuan hawnna a nei a, Bial Secretary hnen atangin report ngaihthlak a nih bakah Puitling lamin Lengkhawm zai hmangin intihsiakna bul an tan.
Pathianni chawhma khan Evan Lalrinsanga kaihhruaiin Doctrine sawirualna neih niin member boral sunna Bialtu Pastor kaihhruaiin neih a ni bawk. Pathianni zanah Bro.K Lalthansanga, Bial S.S Secretary hnen atanga report ngaihthlak a nih bakah Bialtu Pastor J.Lalhmingsanga’n thusawina hun hmangin result puanna leh lawmman semna neih a ni. Rabung bial S.S inkhawmpuiah hian naupang lamin Thu leh hla bakah Thu Inchhang, Recitation leh Solo hmangin intihsiakna an nei a, a pumpuiah Rabung Local te pakhatna an ni. Inkhawmpuiah hian Bial chhung atangin palai riak lut 150 dawn awmin Thawhtanni khan Pathianni chawimawina neih chhunzawm a ni a, hetah hian Bialtu Pastor, J.Lalhmingsanga chu Speaker-ah hman a ni.
———-
Crusade :
Chhimtuipui District Evangelist Evan.N.Thanghnuna rawngbawlna kaltlangin April ni 27, Inrinni thleng khan Siaha Council Veng Local ah mi 16 in Sual ngaihdam nan baptisma an chang tawh a, an zing a 4 hi mi thar an ni. Mi engngemaw zatin Thlarau Baptisma dawng tharin siamtharna engemawzat an awm bawk.
Crusade chhung hian mi inphal leh inpe te inpekna avangin Pathian hnen a lawmthu sawina leh Pathian chawimawina vawi 4 lai neih tawh a nia a, Kohhran ten tisa leh thlarau lamah malsawmna an dawng hle a ni.
—–
Mi thar :
April ni 28, Pathianni khan Chhimtuipui District Home Missionary Evan.K.Lalzawmsanga chuan Siazawh West Local ah Mi thar 4 Kohhran ah a seng lut a. Hemi ni vek hian Ainak Kohhran lawi turin mi thar pakhat Kohhranah sengluh a ni bawk.
——–
Work Camp :
1. Chhimtuipui District, Siaha Bial chuan April ni 29 atanga May ni 1, chhung khan kum kaltaa kohhran din tharna Riasika ah Biak In ansa in work camp an nei.
Work Camp ah hian Bialtu Pastor.Rev.Kholy Hlychho, Bial Secretary Upa.H.Ramhluna, Bial Treasurer Upa.John.VT.Hniehu ten ruahmanna siamin Bial chhunga Department hrang hrang hruaitute bakah District Secretary Rev. Josepht L. Thlauhthang chuan a telpui a. Work Camp a thawk chhuak te hi an vaiin mi 19 niin an hnathawhah Riasika Kohhran hote leh he humuna Missionary a awm mek Evan. Robert B. Lalnunsiama te an lawm hle a ni.
—
2. Chhimtuipui District, Khawmawi local PYD te chuan April ni 25-30 chhung khan Chawngte ‘C’ Missionary Quarter sain work camp an nei.
He work camp hi Bial PYD member thahnemtak bakah Saizawh West kohhran te an fehchhuak a, District atangin tanpuina Rs.50,000/-, Chawngte ‘C’ Kohhran atangin Rs 13, 000/, Saizawhah ‘West’ Kohhran atangin Rs.2100/- bakah mi thahnemngai te hnen atangin sum fai bakah Qtrs sakna tur bungraw mamawh hrang hrang an dawng bawk. He hmunah hian Evan.Lalzawmsanga chuan rawngbawlna a kalpui mek a ni.
——
District PYD fehchhuak :
Dist PYD chuan April ni 27-28 chhung khan Chhimtuipui District PYD chuan Riasikah local ah rawngbawlna an nei.
He hunah hian District PYD President Evan.K.Rinthara leh Vice President Upa.B.Sangtlunga ten Pathian thuchah puangchhuakin, Sis. Helen Lalkrawsparmawii chuan zai rawngbawlna a nei thin bawk. Dist PYD hian Kohhran hote hman turin Lecturn tha tak an hlan nghal a. Biak In sak lai mek chhungkhuh nan Rs.10000/- in tanpuina an lo pe tawh bawk.
——
Missionary a kal tur thlah :
Chhimtuipui District atanga Missionary a kal tur Evan.J.Malsawmdawnga Siahatla chu April ni 26, Zirtawp zan khan Siahatla local PYD ten thlahin, Upa.H.Dopianga local secretry leh T.Upa.H.Lalduhsanga S.Adviser ten Pathian thu kaltlangin fuihna thuchah an sawi a.
PYD tehian apualin thawhlawm lakkhawmna leh lilamna an nei nghal a. Mimal ten thlahna thilpek an hlan bawk.
Siahtla Local kohhranpui te pawhin April ni 28, Pathianni Missionary a kal tur hi thlahna hun an hmang a, tawngtai sakna bakah thlahna thilpek thahnemtak an hlan.
Evan.H.Israela Lawngtlai Vengpui local a lawi pawh April ni 26, Zirtawp zan khan Lawngtlai North bial PYD ten thlahna hun an hmang a.
He hun hi Rbt.H.Thangkinlia,n a kaihruai a, sectional Pastor.S.Vanlallunghnema leh Upa.B.Sangtlunga Dist PYD Vice President ten fuihna thu an sawi a, Dist PYD, BIAL PYD leh mimal ten thil pek hrang hrang hlan ani.
Tin, Lawngtlai vengpui local pawhin April ni 28, Pathianni khan missionary thlahna leh thilpek hlanna hi an lo nei tawh bawk.
———-
Tanpuina hlan :
April ni 4 thawhlehni tlaia ruah leh rial tlàin North Mizoram District chhunga kohhran hmun hma leh In leh lo chhiatna a thlen te avanginApril ni 23 leh 24 chhung khan District hruaitu pathum Rev. Laltluanga, Dist. Supdt., Rev. Chhiarpuia, Dist Secy leh Dist. Treasurer Rev. K. Lalduhsanga te chuan District huam chhunga chhiatna thlenna hmun hrang hrang an tlawh.
Thlipui tleh avanga chhiatna thlenna hmun Sialsuk leh Lungseiah In 27 bakah Sunday School Hall chhia 1 awmin, heng chhiatna tawkte pual hian Dist. Supdt. Rev. Laltluanga chuan relief Fund atangain tanpuina a pe.
He chhiatna hian Hmar lamah Phainuam Bial leh Vairengte pawh tuamin kohhran atanga chhiat tawkte tanpuina pein Dist. Secretary Rev. Chhiarpuia leh Treaurer Rev. K. Lalduhsanga te an fehchhuak bawk.
———
Jubilee Souvenir Committee thukhawm :
April ni 29 thawhtanni khan North Mizoram District Platinum Jubilee Souvenir Committee chu North Mizoram District Office-ah Souvenir Committee chairman Pastor Lalruatkima Fanai kaihhruaiin an thukhawm.
Meeting-ah hian Souvenir Committee member thar tur ruatin Upa K. Hranglawta Durtlang North, Evan. R. Lalthakima Chaltlang, Bro. Jony Lallawmkima Dinthar, Bro. Lalhmudika Varte Mission Vengthlang te an ruat a, Souvenir bu kalphung tur duanna an nei bawk.
——-
Missionary thlah :
N. Mizoram District Missions Board, April ni 3-a neiin Missionary a lak thar Evan. Vanlalawia Marpara Missions Field a awm tura ruahman chu a awmna Kohhran Thingdawl kohhran te chuan April ni 24 Nilai zan khan a thlahna inkhawm an buatsaih.
Missionary thlahna inkhawm hi Upa Lalzara’n kaihhruaiin Bialtu Pastor Rev. C. Lalmuanpuia’n a thlahna thuchah a sawi a, Diakkawn Bial hruaitute’n fuihna thu an sawi bawk a, hei bakah hian Tualchhung Upa atangin fuihna thu ngaihthlak a ni bawk.
Evan Vanlalawia hi May ni 4-ah a awmna tur Marpara-ah Induction neiin; Dist. Missions Secretary Evan. RK Vanlalngaiha’n induction hi a nei dawn a ni.
———-
Bial LAD Fehchhuak :
April ni Ni 28 Pathian khan Chaltlang Bial LAD te chuan Bial Board lo ruahman tawh angin Sihphir Kohhran an tlawh.
He fehchhuah programme hian Pathianni nileng bakah zan thleng hun a awh a, inkhawm hi Sihphir Bialtu Pastor Rev. C. Lalrammuana’n a kaihruai thin a ni. Chawhma lam inkhawmah Sist. Lalsangpuii, Chanmari West LAD Vice President in hun hmangin; Sis. K. Lalhmachhuani, B/W, Chaltlangin Thuchah a sawia, Sist. R. Lalpianfeli’n zaia rawngbawlna a nei bawk.
Chawhnu inkhawm Sist. F. Vanlalpari, Chaltlang President-in tanna hun hmangin Sis.Lalchangliani Sailo B/W Gen. LAD President-in Kohhranhote Chibai bukna thu a sawi.
Sist. Vanlalveni, Chaltlang Bial LAD President-Pathian thuchah sawiin; Sist. R. Lalpianfeli leh Sist. Lalrinawmi, Sihphir ten fak hla sanin hun an hmang bawk.
Zan inkhawmah hian Chaltlang Bialtu Pastor, Rev. C. Lalramthanga chuan Kohhranhote chibai bukna thu sawiin; Pentecostal Lady Magazine Editor, Sist. Zaithangpuii Vuangtu hnen atangin lehkhabu chhiar hlawkzia leh a thatzia thu sawi ngaihthlak a ni a. Tual Upa Rochhari, Chaltlang Bial Vice President-in tanna hun a hmang a, Sist. Lalthangpuii B/W, Chanmari President hnen atangin Pathian thuchah ngaihthlak a ni bawk.Zan Inkhawmah chaltlang Bial LAD te han Sihphir Kohhrante hnenah thilpek- Dekchi leh tangka fai Rs. 3000/- an pe bawk.
Chaltlang Bial atang hian an anmahni tawiawmtu upa te nen mi 61an fehchhuak a, Bus 1 leh private motor engemawzat hmangin an kal a ni.
——
Mi thar :
North Mizoram District Tirhkoh Ramtlan Evan. Zoramthara chuan april 18 atangin Thiak Kohhranah ah rawngbawlna a nei a, a rawngbawlna Lalpan mal sawmin mi 5 in sual ngaihdamna Baptisma an chang a. Biak in thleng zo tawh lo member hla thahnem takin biak in an pan phah bawk.
April ni 30 Ningani khan Kohhranhoten Pathian hnena lawmthusawi chawimawina neiin hlim takin hun an hmang.
——
Lawmthusawi chawimawina :
April ni 26-28 chhung khan N. Mizoram District, Lengpui Bial Lengte-ah Upa Lalthlamuana te chhung kaltlangin Kohhran hoten Pathian hnena lawmthusawi chawimawina an buatsaih.
He Chawimawinaah hian Dist. Supdt. Rev. Laltluanga chu Speaker niin Zaithiam Sist. Lalhlupuii Bawngkawn leh Sist. Lalrinmawii Maubawk ten an tawiawm Dist. Supdt. Rev. Laltluanga hian zirtawp zan atanga Pathianni zan thleng Pathian thuchah sawiin rawngbawlna a nei a ni. (Pic. Lengte chawimawina)
April ni 28 Pathianni vek hmang khan Lengpui Bial Dilzawl Mission Field ah Lal Isua hminga sual ngaihdamna Baptisma chang mi 3 an awm thar a, Evan. H. Lalnunzira chu Dilzawl Kohhran enkawltu Missionary a ni mek a ni.
May ni 4-5 hmang hian Lengpui Bial LAD te chuan Sairang kohhran tlawhin Bial fangin an chhuak bawk ang.
——–
Work Camp :
April ni 27 Inrinni khan Reiek kohhran PYD te chuan Bukvanneiah Kohhrante tan work camp neiin, zun in an siam sak.
Work camp-a fehchhuakte hian Inrinni zan atang vekin inkhawmpuina neiin; hun hlimawm tak hmangin Pathian an fak ho a ni. Reiek Kohhrante’na work camp an neih theihna tura sum leh pai leh tha thawktute zawng zawng chungah Bukvannei kohhran hote an lawm hle a. Tunah hian Bukvannei-ah hian Evan. VLMS Dawngkima chu rawngbawlin District rawihin a awm mek a ni.
——-
Mi thar :
April ni 28 Pathianni khan Rengdil kohhranah Lalpa Isua hminga sual ngaihdamna Baptisma chang mi – 5 awmin an zingah 1 hi mi thar, Pathian Thuthlung hmua Pentecost kohhran rawn zawm a ni. Baptisma rawngbawlna hi Bialtu Pastor C. Lalthlengliana’n a nei a ni.
——
Seminar :
April ni 26 Inrinni nileng khan Bukpui bial LAD te chuan, Leadership training cum Seminar neiin; Resours person atan Bialtu Pastor H. Lalrinpuia leh Upa C Dawngvela bial secretary te hmang.
Bial LAD te hian Seminar hlawkpui hle a, tlaiah zanriah chaw an kilho nghal bawk.
Facebook