GENERAL HRUAITUTE PROGRAMME:
General Superintendent Rev. Zohmingthanzama chuan September ni 21 Inrinniah Lengpui bial, Rawpuichhip Kohhranah rawngbawltute pualin seminar a neihpui anga, Pathianni ah revival programme hmanpuiin rawngbawlna a nei bawk ang. September ni 24 Thawhlehni hian Central District, Shillong a tlawh dawn a ni.
General Secretary Rev. Lalmalsawma Sailo chuan September ni 22, 2024 Pathianni zan hian Bawngkawn Kohhran, North Mizoram District ah rawngbawlna a nei ang.
General Sunday School Director Rev. Biaksangzuala chuan September ni 22, 2024 Pathianni hian Tlangnuam Kohhran ah General Sunday School Kumpuan Thianghlimna puala Campaign a nei ang.
———-
MISSIONARY RETREAT:
UPC North East India General Missions Department huaihawtin September ni 18, 2024 Nilaini khan Mualpui UPC Biak In ah Missionary Retreat neih a ni.
He Programme hi General Missions Secretary Rev. VL. TLuanga Sinate chuan a kaihruai a, Chawhma hunah General Treasurer, Rev. R. Laichhingpuia chu resource Person niin Missions Field Administration tih thupuia hmangin zirtirna a pe a, Chawhnu hunah General Missions Director Rev. C. Vanlalena’n chuan Missionary Ethics tih thupui hmangin zirtirna a pe bawk.
General Missions Board in ruahmanna a siam angin tun tum Missionary Retreat hi Mizo tawng hmangte tana buatsaih a ni a, UPC North East India hnuaia Missions Field hrang hrang atang Missionary 35 vel an kal khawm thei a ni.
———-
GENERAL MISSIONS BOARD:
September ni 19, 2024 ningani khan UPC North East India General Headquarters Committee room Mualpui Aizawl-ah General Missions Board neih a ni.
He board hi General Missions Director Rev. C. Vanlalena chuan kaihruai a District leh Missions Field hrang hrang atangin Board member 20 an kal thei a ni.
An rorel lang sar zingah Kum 2025 General Missions Department Budget ah cheng nuai 489 leh sing sarih sangkhat zanga pawm a ni a, Evan Lalawmpuia Lianhna Assam Missions Field Missionary chu Contract in kum 5 a thawh tawh avangin Full time a hlan kai a ni.
———-
GENERAL Sunday School Department :
September ni 22, Pathianni hian General Sunday School Department kumpuan ‘Thianghlimna’ Campaign leh General SS Meet 2024 puala thawhlawm lakkhawm runpui neih a ni dawn.
General Sunday School Conference rorelnaina lo pass tawh angin kumin 2024 November ni 22-24 chhung hian General Sunday School Meet buatsaih tur a ni dawn a, Organising Committee in ruahmanna a siam bawhzuiin Mizoram chhunga District Headquarter thuthmun khawpui lian zualah General Sunday School Kumpuan Thianghlimna puala Campaign runpui neih a ni dawn a, hemi rual hian Pathianni vawi khat thawhlawm lakkhawm runpui tel nghal a ni ang.
Aizawl khawpui chhungah chuan campaigner-ten Tualchhung Kohhran hrang hrangah hun an hmang kual dawn a, General Sunday School hruaitute – General Director Rev. Biaksangzuala chuan Tlangnuam Kohhranah hun a hmang ang a, General Secretary Rev. Jh Zahluna chuan Chawlhhmun Kohhranah hmangin, General Treasurer Evan. R. Lalbiakfela chuan Mission Vengthlang Kohhranah a hmang ang.
Meet Organising Secretary Evan. Ms Dawngliana chuan Dist Hqrs Kohhran, Tuikhuahtlangah hmangin, Organising Treasurer Sis. Betty H. Lawmsangpuii chuan Bawngkawn (Brigate) Kohhranah a hmang ang.
———-
MISSIONARY DAY:
September ni 25, 2024 Nilaini hi UPC North East India Kohhran ni pawimawh Missionary Day ni a, he mi ni hian Kohhran chuan Program-te siamin, urhsun taka hmang thin a ni a, thawhlawm leh thilpekte lakkhawm in Missions rawngbawlna a tana hman thin a ni.
General Missions Director chuan hemi ni pual hian Missionary Day Thuchah siamin tualchhung kohhran hrang hranga chhiar chhuah turin sem a ni bawk.
North East India UPC Kohhran hian tun dinhmunah Mizoram chhung leh State pawnah nen Missionary 260 vel a ruai mek a, Mizoram chhung hmun hrang hrang bakah state pawnah heng : Assam, Dimapur, Upper Assam & East Arunachal, North Bengal & Sikkim, Bihar & Jharkhand, Odisha, Andaman and Nicobar Island, Arunachal Pradesh, Bhutan field, Delhi Church leh Kolkata Missions Field ah te hian rawngbawlna hna a thawk mek a ni.
———-
———-
AIZAWL EAST DISTRICT
Hruaitute Programme:
Rev R. Laltlankima, District Superintendent chuan September 22, Pathianni hian N. Vanlaiphai Bial chhungah rawngbawlna neiin hun a hmang ang.
Rev H. Lalropuia, District Secretary chuan September 16 leh 17 khan Kawlkulh hmuna District LAD Conference hman tur inbuatsaihna a enpui bakah Zokhawthar Biakin sak mek a enpui bawk a, September 18, Nilaini khan Aizawl a let leh a ni. Rev. H. Lalropuia hian September 22, Pathianni hmang hian a bial hmui mek Suangpuilawn Bial-ah Bial fan Programme hmangin rawngbawlna a nei ang.
Rev VL. Hnemtluanga, District Treasurer chuan September 13 atanga 15 chhung khan Armed Veng South Kohhrana Pathian chawimawina neihah Speaker-ah tangin rawngbawlna a nei a, Crusade neih chhung hian Thlarau Thianghlim dawngthar pawh engemaw zat an awm a ni.
———-
REFRESHER COURST HMANG:
Aizawl East District Office-a thawktute chuan September 10, Thawhlehni khan Staff Welfare Committee buatsaihin intuaitharna, refresher course District Committee room-ah hlawhtling takin an hmang.
He hun hi Evan. K. Lalbiaknunga, Staff Welfare Committee Chairman chuan kaihruaiin Sis. Laldinpuii, Treasurer, Staff Welfare Committee chuan hunserh a hmang. Chawhma lamah Resource Person atan Upa C. Lalnunmawia, MPS hman a ni a. Chawhnu lamah Sharing & Discussion hun hman chhunzawm niin thawktute infuihtharna an nei a, hlawk takin hun an hmang a ni. Tun dinhmunah Aizawl East District Office-ah hian District hruaitute bakah Full Time Evangelist te nen thawktu mi 19 an awm mek a ni.
———-
DISTRICT PYD OB FEH CHHUAK:
September 15, Pathianni hmang khan Aizawl East District PYD hruaitute chuan Saitual Bial PYD tlawhin, N. Lungpher hmunah hun an hmang.
He hunah hian Pentecostal Choir te chuan zaia rawngbawlna an nei bawk a. District PYD OB ten Saitual Bial PYD an tlawhnaah hian Inrinni zan atanga hun hmang tanin thusawi rawngbawlna an in neih chhawk thin a ni.
Aizawl East District PYD OB te hian kumin hian Aizawl khawpui chhung Bial hrang hrang tlawhchhuak tawhin khawpui pawnah Saitual Bial-ah hun an hmang leh a ni.
———-
BIAK IN SAKNA TUR LUNGPHUM PHUM:
September 17, Thawhlehni khan Rev. H. Lalropuia, District Secretary chuan Champhai Bethel Bial, Zotlang Biak In sakna tur lungphum phumna a nei.
He hunah hian Bialtu Pastor, Rev. E. Vanlalpeka Zote bakah Kohhran hruaitute leh member te an tel a ni. Zotlang Kohhran Biak In hmun hi avang 40ft, a dung 100ft a zau a ni a, Member 60 vel Kohhran ah hian an lawi mek a ni.
———-
DISTRICT LAD CONFERENCE:
Kumin October ni 4 atanga ni 6 chhunga Kawlkulh Bial ten Kawlkulh Vengthar Biakina Aizawl East District LAD Conference an hman turah inbuatsaihna chak taka kalpui mek zel a ni.
Kawlkulh Bial te hian Kawlkulh Vengthar Biakina pandal zar zawmin District LAD Conference hi an thleng ang.
Kumin District LAD Conference-ah hian Thupui-ah “Taimak chhuah” II Petera 1:10 thu hman tur niin Rev. H. Lalropuia, District Secretary, Sis. R. Lalramsiami B/W, District LAD President, Sis. Saimawii, Asst. Secretary, District LAD leh Barak District atanga lokal bakah Pastor C. Thandawla, Jharkhand Filed Director ten Pathian thuchah an sawi thin dawn a.
District LAD Conference hmang tur hian Kawlkulh Bial leh District LAD hruaitute chuan a tam thei ang ber kal turin Kohhran member te an sawm a ni.
———-
CRUSADE:
Aizawl East District Missions Department leh Thingsulthliah Bial Missions Department tangkawp te chuan September ni 11 atanga ni 15 chhung khan Sesawng Vengthar Biakinah Revival Crusade hlawhtling tak an hmang.
He hunah hian Speaker-ah Evan. HK. Lalhmangaiha, District Fulltime Evangelist chu hman a ni a. Crusade neih chhung hian Sesawng khuaah mual inkhawm vawi hnih neih a ni a, Pathian thuthlung nasa takin puanchhuah a ni.
———-
SEMINAR HLAWHTLING TAKIN NEI:
September 15, Pathianni khan Sakawrdai Bial PYD te chuan Vaitin Naupang Sunday School-ah Adolescent Reproductive & Sexual Health chungchang-ah Awarness Campaign hlawhtling takin an nei.
He hunah hian Sis. Lalvohbiki chu Resource person-ah hman niin hun hlimawm tak hman a ni a, kalkhawm ten hlawkthlak an ti hle a ni.
———-
MI THAR LEH BAPTISMA CHANG THAR:
Thuampui Bial, Zuangtui Kohhranah Upa Laldingliana te chhungkua in Pathian hnenah lawmthusawi chawimawina an nei a, Bro Vanlalhruaia Speaker a hman a ni. September 15, Pathianni khan member 2 Nupa chu Bialtu Pastorin Kohhranah sengluhna a nei.
Tuirial Kohhranah pawh member pahnih chu September 15, Pathianni khan sengluh an ni bawk.
———-
———-
LUNGLEI DISTRICT
GENERAL PYD CONFERENCE NEIHNA TUR PANDAL SAK HNA THAWH TAN A NI:
October ni 31 atanga November ni 3 chhunga neih tur General PYD Conference vawi 46-na dawngtu tur Hnahthial te chuan September ni 14 Inrinni khan Pandal sak hna an tan.
Pandal sak hna thawh tan a nih hmain hunserh tawi hman hmasak a ni a, he hun hi Upa Rongura Sailo, Chairman, Organising Committee-in a kaihruai a, bialtu Pastor Rev. K. Lalchhuansanga chuan hunserh hmangin, Evan C. Lalremchhunga, President, PYD Lunglei District chuan thu a sawi hnuah Rev K. Vanlalhruaia, District Treasurer in District aiawhin inkhawmpui puihna Rs 3,00,000 a hlan a, District Superintendent Rev C. Lalrintluanga hnen aṭangin thu tawi ngaihthlak a nih hnuah hna thawh ṭan niin Pandal hi Hnahthial N-II VC Field-ah sak a ni.
Hnatlang ah hian Bial chhung Local 6 aṭangin mi engemawzat an thawk chhuak a, District PYD hruaitute bakah bial pawn aṭangin mi engemawzatin hnatlang an thawk bawk. Hnatlang zawng zawng hi mi 100 chuang an ni.
Hnatlang te hian Pandal structure tundin leh mual chhunga phul awm te sam hnatlang an thawk a ni.
Conference budget atan hian Rs.1500000 (nuai sawmpanga) ruahman a ni a, General aṭangin Fund hmuh tawh a nih bakah Bial hrang hrang aṭanga puihna an dawn thu te, District PYD-in Pandal Structure man leh a phurhna (one-way) bakah Sound man an tumsak thu te dawn a ni.
———-
TRAINERS TRAINING CUM SEMINAR NEI:
September ni 15 Pathianni chawhnu khan Rahsi Veng bial S.S Department buatsaihin kumpuan pual Trainers Training cum Seminar an nei.
Seminar hi Rahsi Veng Local SS Hall ah neih niin Bial S.S. Director Rev. P. Lalthangan kaihruaiin District S.S. Director Evan. P.C. Zosanglianan hunserh a hmang. Resource Person Evan. R. Ropianga Dist S.S. Secretary hnen atangin S.S. Kumpuan Thianghlimna, Social media hman sual, zuk leh hmuam leh ruihhlo tih thu ngaihthlak a ni a, booklet tha tak a buatsaih chu zirho a ni bawk
———-
MI THAR :
September ni 15 Pathianni khan Pukpui bial Venglai Local-ah, mi thar pakhat bialtu Pastor Rev.H.Rothuama chuan a lawmlut a, Baptisma a chan tir nghal.
September ni 15 Pathianni vek khan Rawpui ah bialtu Pastor Rev.Lalbiakdika Chawhte chuan a lawmlut a, Baptisma a chantir nghal.
Tihian Kumin (May-Sept 2024) chhung hian Pangzawl bialtu Pastor hian mi thar 10 a lawmlut tawh a ni.
———-
———-
NORTH MIZORAM DISTRICT
HRUAITUTE PROGRAMME
North Mizoram District hruaitu pahnih Rev. K. Lalduhsanga, Dist. Supdt. Leh Rev. C. Lalmuanpuia Dist. Treasurer te chu Sept ni 17 thawhlehni chawhma khan Bihar & Jharkhan Misions Field-ah Worker Camping Cum Revival Crusade hmanpui turin an fehchhuak.
Disrict Secy Rev. C. Lalthangluanga chuan Sept ni 20 Zirtawp zan khan Lengpui Bial Hqrs. Lengpui Kohhranah a inkhawmpui a, Setp ni 22 Pathian zanah Sihphir Kohhranah a inkhawm bawk ang.. Heng Kohhran pahnihah te hian Financial Campaign a nei a ni.
———-
RESOLUTION COMMITTEE NEI:
September ni 16 thawhtanni khan North Mizoram District LAD te chuan thla thar October ni 11-14-a District LAD Conference an neih turah rorel tur zirchianna Resolution Committee an nei.
He Meetingah hian Kohhranin dan a neih anga President in Resolution comt member 2 ruat bakah District Superintendent Rev. K. Lalduhsanga’n a ho bawk. Resolution Committee kal tlang hian District LAD Conference-a rel turin Agenda 12 an chhawp chhuak dawn a ni. (Dist LAD)
———-
BIAL / LOCAL NEWS
BUKPUI BIAL:
Bukpui bial chhung N. Chaltlang Kohhranah Sep ni 10 – 18 chhung chhung khan Rehoboth revival Team (Evan.PC Ramchhuanmawia te) te chuan rawngbawlin an rawngbawlna kaltlangin
1 mithar 1 lawmluh a ni a, Sual ngaihdamna Baptisma mi 7 in an chan bakah Thlarau thianghlim baptisma changthar mi 8 an awm bawk a ni.
———-
ZAMUANGAH MEMBER THAR 63 LAWMLUH TAWH A NI:
Sept ni 18 Nilai zan khan Rengdil Bial, Zamuang ah mithar chhungkaw khat members 5 awmna chu Apostolic Revival Team te rawngbawlna kaltlangin mithar lawmluh leh niin Evan. T. Vanlalruatan a lawmlut leh a ni, Zamuangah hian Rammut denchhenin Aug ni 28 atang khan Apostolic Revival Team ten rawngbawlna neiin, rawng an bawlh tirh atangin member thar mi 63 neih a ni tawh a ni.
North Mizoram District Missions Field enkawlna hnuaia awm Mamit Bial chhunga Bawngva Biak in leh Missionary Quarters te chu Sept ni 15 Pathianni hian hawn a ni
Bawngva Biak in hi Chawlhhmun Bial Missions Dept hmalaknaa bul tan niin, Aibawk Bial Missions Dept ten work camp in tha engemaw zat an thawhpui bawk a, Bawngva Field Biak in hi North Mizoram District Secretary Rev. C. Lalthantluanga’n a hawng a ni.
Hei bakah hian Bawngva Missionary Quarters hawn nghal niin; Quarters hi Chawlhhmun Local Mission Dept te hma lakna-a sak a ni a, Chawlhhmun Bial Pastor Rev. K. Vanlaldika’n a hawng Bawk a ni. (Bawngva Biak in leh Qtrs)
He mi ni vek Sept ni 15 hian Rengdil Bial chhunga awm Mualthuam W Biak in leh Missionary Quarters hawn ni bawkin. Mualthuam West Missionary Quarter hi Rengdil PMD ten Work Camp-a an sak a ni a, feet 24×21 a zau niin skirting chin cement-a siam a ni a, Assam type a sak a ni. Mualthuam West Biak in hi Feet 40×21 a zau niin; District Missions Director Rev. C. Lalramthanga’n Biak in hi a hawng a, Rengdil Bialtu Pastor Rev. C. Laltlanchhuaha’n Missionary Quarters hi a hawng thung a ni. (Mualthuam Biak in leh quarters)
———-
MAMIT BIAL MITHAR:
Mamit Bial PYD Conference 2024 in alo rel tawh angin September ni 14-15 , 2024 khan Mamit Bial PYD techuan Bawngkawn Local PYD te an tlawh a, member 38 lai an fehchhuak a ni.
He Programme hman a nih chhung hian Chaltlang Bial atangin mi engemawzat in an rawn telpui thei a ni. He Programme hman a nih theihna tur atan a Bawngkawn Church Board leh PYD ten hun remchang an siamsakna ah Mamit Bial PYD techuan lawmthu an sawi mawlh mawlh a ni. Fakna hla leh thlarau lam hla te nen a Lalpa fak hun hman a nih hnu in Mamit Bial PYD te leh Bawngkawn PYD te rawngbawlhona chu a tiak ta a ni. (Mamit Bial PYD)
———-
———-
Facebook