UPC NEI EXECUTIVE BOARD:
May ni 28-29, 2024 chhung khan UPC North East India rorelna sang Executive Board vawi 197-na chu General Headquarters Office, Mualpui, Aizawl-ah neih a ni.
Board hi General Superintendent Rev. Zohmingthanzama chuan kaihruaiin UPC North East India hnuai a District hrang hrang atangin Board member mi 31 an kal thei a ni. An rorel thenkhatte:
1. Constitution amendment hun chu kum 2025 General Conference thleng pawhsei a ni.
2. Licence dilna form ( BW / Local / General / Ordination)-te chu Mizo leh English in siam thar a ni a, Ordination Licence dilna Fee & Renewal Fee Rs. 100 leh BW/Local / General Licence dilna Fee & Renewal Fee Rs. 50 a ni ang.
3. Delhi Kohhran ten Guest house an siam phalsak a ni.
4. Barak District chhunga awm Zokhawthiang local chu Aizawl East District-a behtir a ni.
5. UPC of Bangladesh chan chhunga mi Chittagong Hill Tract-ah rawngbawl ni se, General Missions leh Lunglei District-ten lo buaipui se tih a ni.
6. India ram chhunga kan thurin ang ring ve te zawn chhuaha intawh khawmna neihpui ni se tih a ni.
7. Guwahati-a kohhran Building sak nan kohhran member tin ah Rs. 20 aia tlem lo khawn tur a ni a, General Missions Department-in bawhzuiin, 2025 January – April thla inkarah lo khawn se ti a ni.
8. Gen. Missons Department hnuaia thawktu heng –
1) Pastor C. Benjamin Lalthankima s/o Lalmuanpuia – Guwahati, Assanm
2) Pastor KVL Ruatmawia s/o Rev. KVL Hmangaihkima – Gaya, Bihar
3) Pastor Kenneth VL Malsawma Sailo – Lakhimpur te chu July 1, 2024 atangin an service hi tih nghehsak (regularize) an ni.
9. UPC NEI hnuai ah Licence nei a rawngbawl turin Bible Woman Certificate – 4, Local Licence – 15, General Licence – 13-te pek thar an ni.
10. Kum (2024 – 2026) atan General Hqrs hnuaia Committee peng hrang hranga mawhphurtute ruat an ni.
Archivist : Rev. VL .Tluanga Sinate
Kolkata Field Director : Rev. V. Biaksangliana
PenNet Co-Ordinator : Evan F. Lalsangliana
Offset Press Asst. Manager : Evan. R. Lalbiakfela
Pentecostal Voice Editor : Rev. R. Vanlalawia
Chaplain, Delhi : Rev Pb Chawngtinliana (2024 – 2025 April, kum 1chhung atan ruat a ni.)
2024 kum chanve audit atanga kum 2025 kum kum tawp audit thleng a Auditors turin heng mi te hi ruat an ni.
1) Rev. K. Lalduhsanga : North Mizoram District
2) Rev. H. Lalropuia : Aizawl East Disrict
3) Rev. K. Vanlalhruaia : Lunglei District
4) Rev. Lals^wmliana Sailo : Lawngtlai West
11. Cyclone Remal thlipui leh rialin in, biak in leh qtrs. a tih chhiatsak – Chhimtuipui District, Lawngtlai West Dist leh Barak District chhunga kohhran mite hnenah Rs. 200,000 sem chhuah ni se; tin, Mizoram CM Relief Fund-ah Rs. 100,000/- pek ni se tih a ni.
12. General Conference 2023 ro rel bawhzuina:
1) Ruih hlo ngaite chhanchhuah leh a la ti lote ven d^n ngaihtuah a, a puala Committee din ni se tih chu sawi ho a ni a; Committee hran din lovin Gen. Admn. Commt-in hma lo la se, District tinah rawn thawn chhuak se kan ti.
2) Thlarau Thianghlim la dawng loten an dawn theih nana beihpui thlak chungchang sawi ho a ni a; District leh Department-ten hma lo lain, Local leh Bial leh District huap hmalaknaah Thlarau Thianghlim la dawng loten an dawn ngei theih nan hma la se tih pass a ni.
———-
UPC North East India Kohhran chuan Mizoram CM Relief Fund-ah sum an chhunglut.
UPC North East India rorelna sang Executive Board in a rel angin, Mizoram chhung hmun hrang hranga khuarel chhiatna thleng a vanga tuartute tanpui nan May ni 30, 2024 Ningani khan Chef Minister Relief Fund atan Chief Minister hnenah Rs. 100,000 (Nuaikhat) an hlan a ni.
———-
GEN. HQRS. OFFICE STAFF WELFARE TEN REV. R. LALRINSANGA THLAHNA HUN HMANG:
May 31, 2024 Zirtawp ni khan UPC North East India General Office Staff Welfare-te chuan Rev. R. Lalrinsanga thlahna hun an hmang.
Hunserh hi General Superintendent, Rev. Zohmingthanzama chuan kai hruaiin, General Office Staff Welfare-aiawhin Rev. VL Tluanga Sinate chuan Thlahna thilpek hlanna a nei a, General hruaitute hnen atangin thlahna thu sawi ngaihthlak a ni bawk.
Rev. R. Lalrinsanga hian Kohhranah full time-in kum 44 leh thla 4 leh ni 28 chiah rawngbawl hna a thawh hnuah April ni 29, 2024 thawhtanni khan superannuation pension-in a chhuak ta a ni.
———-
THUTTHLENG DONATE:
UPC North East India Driver Welfare-te chuan May ni 29, 2024 Nilaini khan Calvary Bible College Office a hman atan Thutthleng sei pahnih an hlan.
Calvary Bible College CBC hi April ni 24, 2024 khan Shillong atangin Mualpui, Salem veng, Aizawl-ah Building thar sain sawn chhoh a ni a, Office mamawh tak mai UPC North East India Driver Welfare-ten an rawn donate avangin CBC Faculty chuan lawm thu an sawi a ni.
———-
———-
AIZAWL EAST DISTRICT
OTS te class tan dawn:
Kumin 2024 Session atan June 3, Thawhtanni atang hian Aizawl East District hnuaia Short Term Course Pathian thu zirna, Oneness Theological Seminary (OTS) chuan class an tan leh dawn ta a, June 3, Thawhtanni-ah hian Kum 2024 atan Opening day an hmang dawn a ni. Kumin OTS-ah hian zirlai 6 zirin-hetiang hian Zirtirtu leh an subject lak dan tur a ni ang:
1. Rev R. Laltlankima- Bible Doctrine – 1
2. Rev. C. Laldintluanga – Bible Doctrine -2
3. Pastor Laltlanhlua Hnamte – Major religions
4. Rev VL Hnemtluanga – Personal Evangelsm
5. Rev Rosanga Kawlni – Manual
6. Rev. KVL. Hmangaihkima – Sermon & Ministry
———-
N. Vanlaiphai Bial, Lungkawlh Biakin sak thar hawn a ni:
May 24, Zirtawpni khan North Vanlaiphai Bial, Lungkawlh Biakin sak thar chu Rev. H. Lalropuia, District Secretary chuan UPC- North East India Biakin pakhat ni turin a hawng. Biakin tuala hun hmanah hian Bialtu Pastor B. Lalhmingliana chuan hun kaihruaiin chumi hnuah Rev. H. Lalropuia, District Secretary chuan Biakin hawnna hi a nei a, tawngtaina a hmang nghal bawk a ni. Biakin chhungah Bialtu Pastor B. Lalhmingliana kaihhruaiin Biakin thar lawmna Programme hman chhunzawm a ni a, hetah hian Rev H. Lalropuia hian thusawina a neih bakah inhmelhriattirna te neih niin zaithiam tak tak ten Pathian fak hla an sa a ni. He hun hi North Vanlaiphai Bial Kohhranpui hruaitute bakah Bial chhunga Kohhran member engemaw zat ten telpuiin Biakin thar lawmna atan thilpek an pe hlawm bawk a ni.
Lungkawlh Kohhran Biak In sak nan hian 14.Lacs vel leh tha 3250 vel se a ni a, Member 192 an lawi mek a ni.
———-
CBC-ah Work Camp neiin dawhkan siam a ni:
Aizawl East District Kohhranpuiin ruahmanna a siam angin May 29 leh 30 khan CBC-ah Work Camp neia hna thawh a ni. May 29, Nilaini khan mi 20 vel thawkchhuakin Zirlaite hman tur Dawhkan engemaw zat siam a ni. May 30, Ningani pawh khan thawh chhunzawm leh niin CBC faculty ten lawmthu an sawi a ni.
———-
Relief fund atangin tanpuina hlan:
May 24, Zirtawpni khan District Treasurer, Rev. VL. Hnamtluanga chuan Darlawn Bial, Sunhluchhip-ah tun hnaia khuarel chhiatna avanga harsatna tawk chhungkua te hnenah Relief fund atangin tanpuina a hlan. He hunah hian tun hnai thli leh ruah, rialin a tih chhiat Kohhran chhungkua, In riat (8) te hnenah Relief Fund hi hlan an ni. Dist Treasurer hi Bialtu Pastor Lalhmingmawia leh Bro C Zoramliana ten an tawiawm a ni.
———-
Thisen pe:
May 25, Inrinni khan Kahrawt Bial PYD bul tumin District Hospital Champhai ah thisen pek a ni. He hunah hian member 45 vel kal khawmin, thisen hi unit 23, mipa-17 leh hmeichhia-6 ten an pe thei a ni. Kahrawt Bial PYD te hian a tul tul a hman atan District Hospital Champhai tan hian thutthleng 2 Bial PYD hmingin a pek tel bawk a ni.
———-
Mithar
May 26, Pathianni khan Melbuk kohhrana lawi turin member pahnih chhungkaw khat chu Kohhranah sengluh an ni. Melbukah hian Evan F.Zirliana an rawng a bawl mek a ni.
———-
Relief fund hlan:
May 23, Ningani khan District Missions Department te chuan District Relief fund atan Rs 100,000/- (Nuai khat) an hlan a, Rev.VL.Hnemtluanga, District Treasurer in alo dawng a ni. District Relief fund hi khuarel chhiatna leh tanpuina ngaite tanpuina atan tangkai takin hman thin a ni.
Aizawl East District OB meeting chuan District chhûnga chhiatna hrang hrang thleng mekte a thlirin Relief fund khâwn mai ni se tiin a rel a. Chumi atan chuan Tualchhung Kohhranah ngenna te pawh siamin tunah hian Tualchhung hrang hrangten hma an la mek zel a ni. Kumin 2024 chhung ngawt pawh hian District Relief fund atang hian chhungkua engemaw zat hnenah tanpuina hlan an ni tawh a, sum leh pai pawh engemaw zat sem ral a ni tawh bawk a ni.
Khuarel chhiatna lo thlengah District in relief fund tangkai taka a hman thin avangin Kohhran mipuite chu an remchan ang apiang hemi atan hian hmalakpui turin ngenna siam a ni.
———-
———-
NORTH MIZORAM DISTRICT
Hruaitute Programme
UPC, North Mizoram District Superintendent Rev. K. Lalduhsanga chuan tunkar chhung khan North East India General huap Meeting pahnih a nei a, May ni 27 Thawhtanni khan Theological Executive Board meeting neiin. May ni 29 Nilaini khan General Exe Board meeting a nei bawk.
UPC, North Mizoram District Secretary chuan Mamit Bial PYD buatsaih Meet cum revival a hmanpui hnuah, May ni 29 (Nilaini) khan Gen Exe Board General Office Mualpuia neihah a tel.
North Mizoram District Treasurer Rev. C. Lalmuanpuia chuan May ni 25 thawhtanni khan tun hnai ruah surin Sumsuih Biak in bula leimin a siam a hmunah enin District aiawhin Sumsuih Kohhran te relief a pe a, May ni 29 (Nilaini) khan Gen Exe Baord General Office Mualpuia neihah a tel bawk.
———-
PSM REGISTRATION DAY HMANG:
May ni 31 Zirtawpni khan United Pentecostal Church of North East India, North Mizoram District hnuaia Bible zirna Pentecostal School of Ministry Registraion Day chu May ni 31 Zirtawpni chawhnu dar 1:00Pm khan hman a ni.
Registration Day inkhawm hi District Supdt. Rev. K. Lalduhsanga PSM Principal ni bawk chuan a kaihruai a, Dist. Supdt. hian zirlaite fuihin ‘PSM zirlaite chu kohhran hmathlir an nih thu leh an zirlaiah theihtawp chhuah turin a fuih a, Tanna hun Sist. PC Vanlalhmangaihi B/w in hmangin, Dist. Secretary Rev. C. Lalthantluanga’n Zirlaite hming lamna a neih hnuah PSM kalphung leh zirlaite kal dan tur leh hun hman dan tur te, Dist. Treaurer Rev. C. Lalmuanpuia’n a puang a, malsawm tawngtaina sawiin inkhawm tihtawp a ni.
Kum 2024 Batch –ah hian PSM zirlai 35 an sawm a ni.
———-
UPC, NORTH MIZORAM DISTRICT BUILDING COMMITTEE NEI:
May ni 24 Zirtawpni chawhma dar 11:00 khan North Mizoram District Building Committee chu Dist. Office, Supdt. room-ah neih a ni. Committee hi Rev. K. Lalduhsanga Dist. Supdt. chuan kaihruaiin an rorel pawimawh zual zingah:- North Mizoram District Office chung-a Pennet Studio siam tha tiin District Board-a thlen te. District Committee room tih len chungchang te, Mamit Pastor Quarters mikhual room repair te, District Quarters kawmchhak Garrage chung, cement (Slab) chhûna, a chunga tuizem dahna tur ruahman te, Bairabi quarters Hlui repair te, Kum 2024 atana Quarters sak sanction pek Vairengte, Rengdil leh Damparengpui Quarters te, Drawing chu uluk taka en hovi’n pawm tlan a ni bawk, Pentecostal Gateway Higher Secondary School (PGHSS) sak chungchang sawi bawkin Engineer drawing siam hmasain AMC permit hruaitute’n lo bawhzui se tih an rel bakah Kum 2024-2025 atan Building sum Auditor atan Rev. Lalruatkima Fanai leh Rev. K. Vanlaldika te ruat an ni bawk.
———-
District Missions:
UPC, North Mizoram District Missions Department chuan May ni 29 Nilainia District Board an koh tawh chu. Tun hnai ruah sur nasain kawng leh thil dangah harsatna a thlen nual avangin, thingtlang hmun hlaa awmte tan Board kal a harsa dawna an hriat avangin hun remchang hmasa nei turin an thulh.
———-
2024-2025 DISTRICT LAD TAILORING BOARD HMASA BER THUKHAWM:
May ni 27, 2024 chawhma dar 10:00 khan UPC. N.Mizoram District Committee room-ah NMD LAD, Ladies Auxilliary Tailoring Centre (LATC) Board thutkhawm a ni. Meeting District LAD President Sist. F. Rohlupuiin a kaihruai a, Dist Kohhranpui hruaitu District Suprintendent leh District Treasurer ten an ho bawk. LATC Board-ah hian Sist. Lalrinzuali (Instructress) pawh Tailoring Centre-in a mamawh leh tul dangte Board member te hnena sawi turin hun pek a ni.
Board rorel tlangpuite :
1. District LAD conference hunah Tailoring centre puala thawhlawm khawn chauh ni lovin appeal neih ni se.
2. Zirlaite exam hun tur atan October ni 28, 29 leh 30 te an ruat a, Inthlahna hun leh Result puan ni atan October ni 31 an ruat bawk.
3. Tailoring centre pualin budget-ah nuai 2 dah an rel.
4. Tailoring centre mamawh hrang hrang te ngaihtuah a ni a; Board member thenkhat ten heng a hnuaia mite hi an lo leisak theih tur thu hriat a ni a, lawmawm an ti hle: (i) Thingpui lumna lian – Sist. C. Laltleipuii, Hqrs (ii) Sana lian – Sist. F. Lalrohlupuii, Dinthar bial (iii) Kawr thuisa khaina : Sist. Lalzuiliani BW, Chawlhhmun bial (iv) Khawl thar – Board member ten khawl thar pakhat leina tur Rs.500 theuh thawhkhawm a ni a, vawiin bika lut nghal zat hi Rs. 4500 a ni (v) Tailoring centre-a tlawha kal board member te chuan Visit Book-ah an hmuh dan ziah zel tawh ni se an ti a, Visit book atana hman tur register thar tha tak Rev. K. Lalduhsanga, District Superintendent hnen atangin an dawng nghal a, an lawm hle
5. Tailoring Inenkawlna Dan bu ennawn a ni a, siam that ngai te siam thain belh ngai te leh paih ngai te ziah belha paih then a ni bawk a, a hma thei ang bera hman theih turin District kohhranpui Approve theih tura thehluh thuai an tum.
———-
BIAL PYD MEET HMAN A NI:
Mamit Bial PYD Conference vawi 34-na in a rel angin Bial PYD Meet chu Dt.24th – 26th May 2024 chhung khan Headquarters Kohhran Biak inah te, VV Futsal Ground ah leh Bungzawl Volleyball Court ah te hman a ni. He hunah hian Rev.C.Lalthantluanga, President, General PYD leh Evan Dr.R.Vanlalpeka, Secretary, General PYD te chu Speaker ah hman an ni a, General Choir ten zai a rawngbawlna an nei thin bawk.
Dt.24th May 2024 (Zirtawp) zanah VV Futsal Ground ah Meet hawnna hun neih niin Upa R.VL Rinchhana, President, Bial PYD chuan a kaihruai a, Meet hawnna hun hi Pastor C.Lalruatsanga, Bialtu Pastor chuan neiin hemi zan hian Futsal leh Dead ball hmanga inelna buatsaih a ni a, hlim taka hun hman a ni.
Dt.25th May 2024 (Inrinni) chhunah Bungzawl Volleyball Court-ah item chi hrang hrang hmanga intihsiakna neih a ni a, zan lamah revival program a hun hman niin Upa R. VL Rinchhana, President, Bial PYD chuan a kaihruai a, Sist.H.Lalchawimawii, Luangpawl chuan hun hmasa hmangin Rev.C.Lalthantluanga, President, General PYD hnen atangin Pathian thuchah ropui tak ngaihthlak a ni bawk.
Dt.26th May 2024 (Pathianni) zing inkhawm chu Pastor C.Lalruatsanga, Bialtu Pastor chuan a kaihruai a, Sist.C.Lalremruati, Hqrs. chuan hun hmasa a hmang a, Evan Dr. R Vanlalpeka, Secretary General PYD hnen atangin Pathian thuchah ropui tak ngaihthlak a ni.
Pathianni chawhnu lamah Fellowship neiIn T.Upa K.Vanlalnghaka, President, Hqrs. PYD chuan a kaihruai a, he hunah hian Thuthlung Seminar neih nghal niin Resource Person atan Evan Dr.R.Vanlalpeka, Secretary, General PYD chu hman a ni.
Dt. 26th May 2024 (Pathianni) zan inkhawm hi Upa R VL Rinchhana, President, Bial PYD chuan kaihruaiin Rev.C.Lalthantluanga, General PYD President hnen atangin Pathian thuchah ropui tak ngaihthlak a ni bawk.
Mamit Bial PYD ten Bial PYD Meet kan hman chhung hian General Choir ten zai a rawngbawlna nung tak an nei thin a, tin, Bro. Laldawngkima, Hqrs., Sist.Malsawmdawngliani, H/S Veng, Sist. Vanlalmuanpuii, Damdiai, Sist. Lalropari Renthlei, General Choir member leh Sist.Tluangtluangi, General Choir member ten zaia rawngbawlna an nei thin bawk a ni.
Bial PYD Meet 2024 chu Pathian thlarau awmpuina hnuaia hlim taka hun hman a nih hnu in Dt.26th May 2024 (Pathianni) zan khan a tiak ta a ni.
———-
Kolasib Venglai Bial Hebron Local Report:
Dt. 20 -23.5.24 chhung khan Evan. H. Vanlalhmudika Speaker-ah hmangin Hebron PP, Kolasib Venglai Bialah Lang Camp neih a ni a, Zirtawpni zan aṭanga Pathianni zan thleng khan follow Up program hman chhunzawm a ni. Evan H.Vanlalhmudika chu Speaker a hman chhunzawm niin rawngbawlna nung tak a nei a ni.
An rawngbawlna aṭang hian mi 7-in Thlarau Thianghlim Baptisma an chang tawh a, Pathianni chawhma inkhawm ban (Dt. 26.5.24) khan mi 8-in Speaker kutah Isua hmingin sual ngaihdamna Baptisma an chang.
Hebron-ah hian Evan. Vanlalhruaitluanga Tirhkohin a awm mek a ni.
———-
Senior leh Doctrinal Meet hmang:
Tlangnuam Bial Sunday School Department, Senior leh Doctrinal Department meet vawi 7 – na chu Melthum Kohhran Biak Inah dt 26th May 2024 (Pathianni) ah neih a ni a, zan lam thlengin hun hman a ni. Bialtu Pastor Rev. Vanlalruata chuan meet hawnna a nei a, item hrang hrang zaipawl, mimal zai, worship dance, group singing, thu inchhang sawi rual, thusawi (Pathian pakhat thu), thianghlimna campaign, health awareness campaign, fuihna thusawi te neih a ni a, bialtu pastor hnen atangin Pathian thuchah ngaihthlak a ni bawk.
———-
LENGPUI LOCAL AH LALPA HNATHAWH ALANG MEK E:
May thlatir atang khan Apostolic Revival Team ten Lengpui kohhranah rawngbawlna tanin Lalpan boruak a hawng zel a,Pathian chawimawina tum 2 awm tawhin a tum thum nan T Upa Mahriata te chhungin Pathian chawimawina kohhran kaltlangin an buatsaih leh dawn a ni.
May ni 26 Pathainni zan thlengin Thlarau Thianghlim dawng thar an awm mek zel bawk.
Reiek Bial Mission Department ten Revival Crusade Ailawng kohhran a an hman chu May ni 26 Pathianni) khan a ṭiak. Report pek tawhin he crusade-ah hian Rehoboth Revival team speaker Evan PC Lalramchhuanmawia chu speaker-ah hman a ni a, a ni hnen aṭangin Pathian thu ṭha tak tak ngaihthlak thin a ni a, An rawngbawlna Pathian Thlarauvin hriak a thih hle.
May ni 26 Crusade hman tawpni Pathianni zing inkhawmah Arunachal mission field Karo biak in sakna tur appea a ni a, appeal hi Bialtu Pastor Rev Lalchuailova’n a nei a, ₹ 26300 hmuh a ni.
———-
Dinthar Bial ten Rawngbawltu Seminar an nei:
Dinthar Bial kohhranpui buatsaih Rawngbawltute Mawhphurhna tih hmanga Seminar chu May ni 24 Inrinni Zan Dar 7:00 khan Dinthar Kohhran Biak inah tluang taka neih a ni.
Rawngbawltu Seminar inkhawm hi Bialtu Pastor Rev. Chhiarpuia’n a kaihruai a, Bial Secretary Evan. K. Laldawla’n report tawi pein Seminar neih chhante sawiin seminar programme Pathian hnenah hlanin tawngtaina a nei a, Resource Person atana an ruat Rev. K. Malsawmtluanga, CBC Principal chuan zirtirna hlawkthlak tak a pe a ni.
Rawngbawltu mawhphurhna hrang hrang an zir te:-
1) Rawngbawltute mawhphurhna sawifiahna
2) Nihna leh Mawhphurhna
3) Kohhran inkhawm leh programme ngaih pawimawh
4) Member te tlawhchhuah
5) Rorelna kawnga mawhphurhna
6) Sum leh pai lama rawngbawlna
7) Kohhran insawrkarna leh dan ngaihpawimawh
8) Thawhhona chungchang
9) Chhiatni thatni mawhphurhna
10) Ruahman lawkna leh hmathlir
11) Mawhphurhna semzai
12) Incheina
13) Inkhawm nungchang/nunphung
14) Intihzahawm
15) Tawngkamchhuak
16) Inzirpeihna
17) Danglam theihna
18) Khawtlanga inhman
19) Thlarau rawngbawlna
———-
Kananthar Home Missions Field ten lawmthu an sawi:
May ni 23-24, 2024 hmangin Tuikual South Missions Department ten Kananthar H/F ah Missionary Quarter Electric Wiring hna an thawh sak a, khaw lum leh boruak uap tak karah an hna thawksak mai piah lamah Home Missions Field tan hian Sana🕐 tha tak mai an pek chungchangah Kananthar Home Missions Field kohhran hruaitute chuan Tuikual S Kohhran Missions Dept te chungah lawmthu an sawi ani. Kananthar Missions Field-ah hian Evan. Jonanthan Zaihmingthanga chu Missionary in a awm mek a ni.
Facebook