GENERAL HRUAITUTE PROGRAMME:
General Superintendent Rev. Zohmingthanzama chu June ni 6 – 17, 2024 chhung hian, Kohhran tul pawimawh tiin Field leh District hrang hrang a tlawh ang.
General Sunday School Director Rev. Biaksangzuala leh General Sunday School Treasurer Evan. R. Lalbiakfela te chu June 5 – 12 chhung hian Chhimtuipui District Board leh Sunday School Seminar neihpui turin an zin chhuak.
———-
General Sunday School Department, UPC NorthEast India leh National Tobacco Control Programme (NTCP), NHM ten Inremna thuthlung ziak:
June 3, Thawhtanni chawhnu dar 12:00pm khan UPC North East India General Sunday School Department leh National Health Missions hnuaia National Tobacco Control Programme (NTCP) te chuan Zuk leh hmuam (Vaihlo) leh a kaihhnawih thil hrang hrang dona tur kawnga thawh hona thuthlung MoU an sign.
He hun hi Mission Director Office Chamber, National Health Mission, Dinthar-ah neih niin Rev. Biaksangzuala, General Sunday School Director chuan tawngtaina hun a hmang a, Dr. Eric Zomawia, Mission Director, NHM chuan thusawiin, he thawh hona hian ram leh hnam, Khawtlang leh Kohhran siamthatna kawngah hna tangkai tak a thawh ngei a beisei thu a sawi.
Inremna tur thuthlung sawi hawnna neih chhunzawm nghal a ni a, General Sunday School Secretary Rev. JH. Zahluna leh Dr. H. Lianthangpuia, State Nodal Officer, NTCP ten hun an hmang chhunzawm a ni.
He inremnaah hian thawh hona tur thluthlung point (8) tarlan a ni a, zuk leh hmuam that loh zia in zirtirna chi hrang hrang, Awarenes Campaign, Seminar, Trainning buatsaih thin te, Television Programme ah Talkshow, Discussion programme buatsaih dan turte ziah lan a ni.
Kohhran aiawhin Rev. Biaksangzuala leh, NHM aiawhin Dr. Eric Zomawia leh Dr. H. Lianthangpuia ten hming an sign a ni.
General Sunday School Department chuan kummin 2024 chhung a hmalakna tur Road map siamin, Mizoram chhung khawpui lian leh State pawnah te National Tobacco Control Programme (NTCP) nena tang kawpin Zuk leh hmuam that lohna tih thupuia hmangin Trainers Training an buatsaih dawn.
Siaha, Chhimtuipui District – 8&9 June 2024
Lawngtlai – 29&30 June 2024
Champhai, AED – 2&3 November 2024
Thenzawl, NMD – 13&14 July 2024
Alo, Arunachal Field – 5&6 October 2024
Dimapur – 14&15 December 2024
North Bengal\Sikkim – 10&11 August 2024
Tripura – September 2024
———-
———-
LUNGLEI DISTRICT
SEMINAR TLUANG TAKA NEIH A NI:
February ni 3, 2024-a Bunghmun Bial Conference vawi 44-na, rorel no 2 na-in, “Bial chhunga Upa leh Rawngbawltute pualin seminar buatsaih ni rawhse” ti a alo rel bawhzuiin, hetiang hian tluang taka hun hman a ni.
1. May ni 31, Zirtawp zanah Sesawm Vengthlang Local-ah hun hman niin, Bial Treasurer Evan.H.Thangkunga’n hun bul tanin, bialtu Pastor-in Seminar paper a present a. Mi 16 kalkhawmin an kal kim thei a, hlim taka hun hman a ni.
2. June ni 1, Inrinni chhunah Sesawm vengchhakah hun hman leh niin, bial Treasurer Evan.H.Thangkunga’n hun bul tanin, bialtu Pastor-in Seminar Paper a present a. Mi 8 kalkhawmin, member pakhat a tel lo va, hun hlim taka hman zawh a ni.
Bialtu Pastor-in (F.Lalsanglura) Vengthlangah sunday hmang nghalin, nau pakhat a hlan nghal bawk.
———-
MI THAR:
June ni 2, Pathianni khan Kikawn Local-ah mi thar pakhat lawmluh a ni a, bialtu Pastor Rev.H.Rothuama kutah Baptisma a chang nghal.
District Missions Department hnuaia Free Evangelist Rbt. C.Zodinpuia chuan Mautlang, Zehtet Home Mission Field-a rawngbawlna a nei a, May ni 26 Pathianni khan mi thar 2 a lawmlut.
———-
PBS IN ORIENTATION DAY AN HMANG :
June ni 3 Thawhtanni chawhnu dar 2 khan Lunglei District UPC in thla khat awh Pathian thu zirna a neih Pentecostal Bible School (PBS) chuan Orientation Day an hmang.
He hun hi District UPC Office hluiah hman a ni a, Principal Rev.C.Lalrintluanga chuan kaihruaiin, zirlaite leh zirtirtu inhmelhriattirna a nei a, PBS Dean Rev.PC.Lalfakawma chuan hriat tur pawimawhte puangin zirlai hruaitu tur thlanna a kaihruai chhunzawm a, Registrar Rev.K.Vanlalhruaia chuan thu a sawi bakah Zirtirtute atangin thusawi ngaihthlak a ni a, Rev. PC.Lalfakawma chuan tawngtainain a titawp a ni.
Kumin PBS ah hian 1st Year ah mi 13, 2nd Year ah mi 11 leh 3rd Year ah mi 4 (an vaiin mi 28) an kal dawn a, Subject 5 an zir dawn a ni.
PBS hian July ni 7 Pathianni hian Graduation day an hmang ang.
Kumin PBS ah hian zirtirtu atan Rev.C.Lalrintluanga, Rev.PC. Lalfakawma, Rev.K. Vanlalhruaia, Rev.R.Lalramhluna leh Pastor Lallawmsanga te an ni ang.
———-
———-
AIZAWL EAST DISTRICT
Oneness Theological Seminary Opening Programme hman a ni:
June 3, Thawhtanni khan Aizawl East District hnuaia Short Term Course Pathian thu zirna, Oneness Theological Seminary chuan Kum 2024 Session atan Opening function hman a ni. He hun hi District Committee room-ah hman niin Rev. R. Laltlankima, Principal chuan a kaihruai a, hunserh, Rev. C. Lalmalsawma, District Missions Director chuan a hmang a ni. Pastor Laltlanhlua Hnamte, Secretary, Theological Education Board chuan zirlaite hriattur hrang hrangte sawina neiin fuihna thu, Rev. H. Lalropuia, District Secretary chuan a nei thung a ni. He hunah hian Rev. VL. Hnemtluanga, District Treasurer chuan zirlaite hriattur hrang hrang a sawi bawk a ni. Rev Rosanga Kawlni, Teacher OTS chuan huntawp tawngtaina a nei. Kumin 2024 Session atana OTS opening programme-ah hian Zirlai leh Zirtirtute an kal tha hle a, hlim takin hun an hmang a ni.
Kumin OTS-ah hian 1st Year-ah Zirlai 14 awmin, 2nd Year-ah zirlai 13 an awm a, 3rd Year-ah zirlai 7 an awm mek a ni. Heng zirlaite hian June 4, Thawhlehni atang khan zirlai an tan nghal a ni.
Zirtirtu leh an subject lak dan hetiang hi a ni:
1. Rev R. Laltlankima- Bible Doctrine – 1
2. Rev. C. Laldintluanga – Bible Doctrine -2
3. Pastor Laltlanhlua Hnamte – Major religions
4. Rev VL Hnemtluanga – Personal Evangelsm
5. Rev Rosanga Kawlni – Manual
6. Rev. KVL. Hmangaihkima – Sermon & Ministry
———-
Bro. F. Lalthangliana Pension thlahna hun hmang:
May 24, 2024-a Pension-a chhuak, Bro. F. Lalthangliana, Aizawl East District Chowkider thlahna hun chu May 31, Zirtawpni khan District Office-ah hman a ni. He hun hi Evan. K. Lalbiaknunga, Staff Welfare Secretary chuan kaihruaiin Rev. VL. Hnemtluanga, District Treasurer in hunserh a hmang a ni. He hunah hian Bro. R. Lalengliana, Chairman, Staff Welfare Committee chuan Bro. F. Lalthangliana chanchin tlangpui sawiin Rev. R. Laltlankima, District Superintendent in thlahna thuchah tawi sawina a neih bakah Bro. F. Lalthangliana leh Rev. KVL. Hmangaihkima, Former District Superintendent ten thusawina an nei bawk a ni. Staff Welfare Committee atanga thlahna thilpek Sis. H. Lalthuamluaii, Welfare Treasurer chuan hlanin Office-a thawktu mi engemaw zatin thlahna thu an sawi bawk a ni. He hun hi Rev. C. Lalmalsawma, District Missions Director chuan tawngtaiin a ti tawp a ni.
Bro. F. Lalthangliana hi Kum 2006 April thla atang khan District Office-ah Chowkider hna thawkin bul a tan a, Kum 18 chhung a Service hman a ni. Tunah hian District Office-ah Staff Quarters-ah a nupui leh fanaute nen an cheng mek a ni. May 24 kha Pension-a a chhuah hun ni mahse remchan zawkna avangin May 31 khan thlahna hun hman a ni ta zawk a ni.
———-
District PYD OB te fehchhuak:
District PYD OB ten ruahmanna an siam angin June 3, Thawhtanni khan Zemabawk North Bial tlawhin hlim takin hun an hmang a, Zemabawk North Bial te hian Zemabawk Kohhranah an lo thleng a ni. Inkhawm hi Bro. Lalengmawia Ralte, Bial PYD President chuan a kaihruai a, District PYD Vice President, Evan Dr. R. Vanlalpeka’n thusawi rawngbawlna a nei thung a ni. He hunah hian Zemabawk North Bial PYD Secretary Bro. Lalrintluanga leh Evan F. Malsawmdawngliana, District PYD Asst. Secretary te hnen atangin inhmelhriattirna leh hmalakna hrang hrang ngaihthlak a ni bawk.
District PYD te hian kumin chhung hian Aizawl khawpui chhung Bial hrang hrangte tlawhchhuak turin ruahmanna an siam a, May 20 khan Zemabawk Bial-ah hun hmang tawhin Thuampui bial-ah June 24, Bawngkawn Bial-ah July 8, Bazar Bial -ah July 22, Bethlehem Bial -ah August 5, August 19-ah Upper Republic Bial bakah Mualpui Bial -August 26 te ruahmanna an siam a ni.
———-
District Sunday School Extended Meeting neih a ni:
May 31, Zirtawpni khan District Committee room-ah District Sunday School Extended Meeting Rev C. Lalengliana, Director kaihhruaiin neih a ni. He hunah hian Aizawl khawpui chhunga Bial Sunday School hruaitute an tel tha hle a, thu pawimawh tak tak ngaihtuah niin Sunday School Kumpuan neih mek hmalakna beihpuithlak dan tur hetiang hian ruahmanna a siam a. Bial tinte theihtawp chhuaha bawhzui theuh turin an inngen e.
July ni 14 ah a rualin campaign beihpuithlakna hi Naupangah neih tur a ni a. Bial leh bial intlawh thelh tur hetiang hian duan a ni:-
(1) Zemabawk leh Bawngkawn
(2) Thuampui leh Zemabawk N
(3) Bazar leh Bethlehem
(4) Upper Republic leh Mualpui
Fehchhuak turte hi Bial hruaitute lo inbe tawnin ruahmanna lo siam se tih a ni.
———-
Mithar:
June 2, Pathianni khan Rabung Bial, Murlen Kohhrana lawi turin member 4 chu Bialtu Pastor HMS Dawngkima’n Kohhranah a senglut a, a fate 3 hi hlan nghal niin mi 2 in Baptisma an chang bawk a ni.
Champhai Bethel Bial, New Champhai kohhrana lawi tur Chhungkaw 1, member 6 Kohhran member ni sa, hmun dang atanga pem chu Evan.Dingtean, June 2, Pathianni chawhma inkhawmah a lak luhna a nei bawk.
———-
Missions Evangelist la thar:
May 30, Ningani khan District Missions Department chuan Missions Evangelist atan Evan Laldinsanga S/o P. Lalmuanzova (L) Bawngkawn chu an la thar. Evan. Laldinsanga hian Chhingchhip Bial, Hmuntha Kohhranah June thla atang hian rawngbawlna a nei tan ang.
———-
Hruaitute programme:
Rev H. Lalropuia, District Secretary chuan June 8, Inrinni hian E. Lungdar Bial, Leng hmunah Leadership tih thupuia hmanga Seminar neihah Resource person-ah tangin Pathianni thleng hun a hmang ang.
Rev C. Lalmalsawma, District Missions Director chuan Pathianni hmang hian Rabung Bial-ah rawngbawlna neiin hun a hmang ang.
———-
———-
NORTH MIZORAM DISTRICT
HRUAITUTE PROGRAMME
North Mizoram District Superintendent Rev. K. Lalduhsanga chuan June ni 4 thawhlehni dar 11:00 a Meeting neih Literature Committee a ho bakah, PSM-ah zirtirna la in Camping Centre Sakawrtuichhunah hun a hmang a, June ni 9 Pathianni hian North Mizoram District PYD Zaipawl 2024-2025 term thar lakluhna inkhawm Chaltlanga Bial, Chantlang kohhran Biak ina neih turah Zaipawl member tharte lakluhna hun a hmang bawk ang.
North Mizoram District Secretary Rev. C. Lalthantluanga chuan June ni 4 leh ni 5 khan District Literature Board tena kum 2025 Nilai Thupui zir tur endik hna an thawhnaah telin, kar thar June ni 10-15 thlengin Pentecostal School of Ministry (PSM)-ah class lain a subject lak a zirtir ang.
North Mizoram District Treasurer Rev. C. Lalmuanpuia chuan kar kal ta June ni 1 atanga June ni 8 chhung khan Pentecostal School of Ministry (PSM) Bible zir Class neih mek a, zirtirna pein hun a hmang.
North Mizoram District Missions Director Rev C. Lalramthanga chuan tun hnai ruah sur avanga Marpara Missionary ten harsatna an tawh leh a sutkian dan tur te relpui turin West Phaileng Bial a awm Marpara Missions Field a tlawh a, June ni 9 Pathianni hmangin a lo haw leh ang.
———-
LITERATURE COMMITTEE NEI:
North Mizoram District Literature Committee chuan June ni 4 leh ni 5 thawhlehni leh Nilaini khan kum 2025 Nilai Thupui zir tur ziaktute’na an ziah chu uluk taka endik hna thawkin zo.
North Mizoram District hian Nilai Thupui kum 2025-a an zirtur ah hian Thupui hlawm 7:
1. Ringtu nun leh Tawngiaina
2. Pentecost Zia
3. Kohhran Ni pawimawhte
4. Pathian chungchang
5. Kohhrana Department-te
6. Unau Inhmangaih Kohhran
7. Khawtlang rawngbawlna neiin Heng Thupui hlawm sarih (7) te hi thupui ziaktute’n zan 45 zir turin an ruahman dawn a ni. ( Literature Comt Video)
———-
PSM REGISTRATION DAY HMANG:
May ni 31 Zirtawpni khan United Pentecostal Church of North East India, North Mizoram District hnuaia Bible zirna Pentecostal School of Ministry (PSM) chuan Registraion Day, District Camping Centre, Sakawrtuichhunah an hmang.
Registration Day inkhawm hi District Supdt. Rev. K. Lalduhsanga PSM Principal ni bawk chuan a kaihruai a, Dist. Supdt. hian zirlaite fuihin ‘PSM zirlaite chu kohhran hmathlir an nih thu leh an zirlaiah theihtawp chhuah turin a fuih a, Sist. PC Vanlalhmangaihi B/w, Tuikual in hunserh hmangin, Dist. Secretary Rev. C. Lalthantluanga PSM Registrar ni bawkin Zirlai First Yrs, Second Yrs leh Third Yrs te hming lamin zirlaite inhmelhriattirna a nei nghal a ni, kum 2024 PSM Batch-ah hian zirlai inregister mi 35 awmin registration Day ni hian khuarel chhiatna avanga hun bul tan thei lo zirlai 6 an awm a, Registration Day-ah hian zirlai 29 an tel thei a ni.
Dist. Treasurer Rev. C. Lalmuanpuia, District Treasurer chuan PSM zirna neih chhunga zirlaite hriat tur PSM Rules te chhiarin hun hman dan tur routine chhiar chhuahna te a neih hnuah inkhawm tihtawp nan tawngtaina a nei a, Registration Day inkhawm chu tih tawp a ni (Registration Day Video)
———-
NORTH MIZORAM DISTRICT BUILDING COMMITTEE NEI:
May ni 24 Zirtawpni chawhma dar 11:00 khan North Mizoram District Building Committee chu Dist. Office, Supdt. room-ah neiin, Committee Rev. K. Lalduhsanga Dist. Supdt. in a kaihruai.
Rorel pawimawh zual zingah:- North Mizoram District Office chung-a Pennet Studio siam tha tiin District Board-a thlen te. District Committee room tih len chungchang te bakah Kum 2024 atana Quarters sak sanction pek tawh Vairengte, Rengdil leh Damparengpui Quarters sak dan tur Drawing te en hovi’n pawm tlan a ni a, Pentecostal Gateway Higher Secondary School (PGHSS) sak chungchang sawi bawkin Engineer drawing siam hmasain AMC permit hruaitute’n lo bawhzui se tih an rel bawk.
Kum 2024-2025 atan Building sum Auditor atan Rev. Lalruatkima Fanai leh Rev. K. Vanlaldika te ruat an ni bawk a ni. (Building Committee Video)
———-
2024-2025 DISTRICT LAD TAILORING BOARD HMASA BER THUKHAWM:
May ni 27, 2024 chawhma dar 10:00 khan UPC. N.Mizoram District Committee room-ah NMD LAD, Ladies Auxilliary Tailoring Centre (LATC) Board thutkhawm a ni. Meeting District LAD President Sist. F. Rohlupuiin a kaihruai a, Dist Kohhranpui hruaitu District Suprintendent leh District Treasurer ten an ho bawk. LATC Board-ah hian Sist. Lalrinzuali (Instructress) pawh Tailoring Centre-in a mamawh leh tul dangte Board member te hnena sawi turin hun pek a ni.
Board rorel tlangpui a ni :
1. District LAD conference hunah Tailoring centre puala thawhlawm khawn chauh ni lovin appeal neih ni se.
2. Zirlaite exam hun tur atan October ni 28, 29 leh 30 te an ruat a, Inthlahna hun leh Result puan ni atan October ni 31 an ruat bawk.
LATC Board ah hian Tailoring centre mamawh hrang hrang te sawiin Board member thenkhat ten heng a hnuaia mite an tum theih tur thu an sawi:- (i) Thingpui lumna lian – Sist. C. Laltleipuii, Hqrs (ii) Sana lian – Sist. F. Lalrohlupuii, Dinthar bial (iii) Kawr khaina : Sist. Lalzuiliani BW, Chawlhhmun (LATC BOARD)
———-
BIAL NEWS LAWRKHAWM:
Chhawmdawlna pe turin rel:
North Mizoram District Headquarters Bial Board June ni 6 zinga neih chuan an Bial chhunga Nursery kohhran-a lawi Kohhran chhungkaw 4-ah leimin avanga harsatna tawk awm chu a chhawmdawl dan ngaihtuahin sum leh paia tanpui an rel a. Bial hruaitute’n a rang lamah chhawmdawlna pek nise an ti a ni.
———-
Work camp in fehchhuak:
Tlangnuam bial Missions department chuan an Bial Missions Conference rorel bawhzuiin Rengtekawn Bial Bukvannei ah Quarter Ceiling leh Electric wearing hna thawk turin June ni 6 Nilaithawhtanni chawhma khan an fehchhuak.
Bukvannei –a workcamp tura fehchhuak te hi mi 12 niin, Bialtu Pastor Rev. Vanlalruata’n a ho thei a, Tlangnuam Kohhran Vice Chairman Upa Biaktluanga tawngtaiin workcamp-a fehchhuak tur te hi a thlah ani. (Work camp in fehchhuak)
———-
Senior leh Doctrinal Meet hmang:
Tlangnuam Bial Sunday School Department, Senior leh Doctrinal Department meet vawi 7 – na chu Melthum Kohhran Biak Inah May ni 26 Pathianni chhun leh zan hmang khan neih neih a ni.
Senior Doctrinal Meet hi Bialtu Pastor Rev. Vanlalruata’n hawngin item hrang hrang zaipawl, mimal zai, worship dance, group singing, thu inchhang sawi rual, thusawi (Pathian pakhat thu)-ah te intihsiak niin; hei bakah hian Thianghlimna campaign, Health awareness campaign bakah Bialtu Pastor atangin fuihna thusawi ngaihthlak a ni bawk. Tlangnuam Bial Senior leh Doctrinal Department ten Meet an hman hi an hlawkpui hle a ni (Meet nei)
———-
Dinthar Bial ten Rawngbawltu Seminar an nei:
Dinthar Bial kohhranpui buatsaih Rawngbawltute Mawhphurhna tih hmanga Seminar chu May ni 24 Inrinni Zan Dar 7:00 khan Dinthar Kohhran Biak inah tluang taka neih a ni.
Rawngbawltu Seminar inkhawm hi Bialtu Pastor Rev. Chhiarpuia’n a kaihruai a, Bial Secretary Evan. K. Laldawla’n report tawi pein seminar inkhawm Pathian hnenah hlanin a tawngtain a, Resource Person atana an ruat Rev. K. Malsawmtluanga, CBC Principal hnen atangin hetiang hian zirtirna an ngai thla a ni:-
1) Rawngbawltute mawhphurhna sawifiahna
2) Nihna leh Mawhphurhna
3) Kohhran inkhawm leh programme ngaih pawimawh
4) Member te tlawhchhuah
5) Rorelna kawnga mawhphurhna
6) Sum leh pai lama rawngbawlna
7) Kohhran insawrkarna leh dan ngaihpawimawh
8) Thawhhona chungchang
9) Chhiatni thatni mawhphurhna
10) Ruahman lawkna leh hmathlir
11) Mawhphurhna semzai
12) Incheina
13) Inkhawm nungchang/nunphung
14) Intihzahawm
15) Tawngkamchhuak
16) Inzirpeihna
17) Danglam theihna
18) Khawtlanga inhman
19) Thlarau rawngbawlna (Rawngbawltu Seminar)
———-
KELSIH CRUSADE:
May ni 15 – 31 chhung khan Kelsih kohhranah Revival Crusade hlawhtling tak neih a ni. He Crusade-ah hian Immanuel Revival Team ten rawngbawlna neiin Speaker atan Evan. C. Lalngaihawma, Thenzawl Vengpui hnen atangin Pathian thu chah ngaihthlak thin a ni a. An rawngbawlna kaltlangin malsawmna an dawng nasa hle. May ni 15 ah Crusade hi bul tamin Bial huapin hawn a ni a, May ni 31 zanah bial huapin Crusade kharna neih leh a ni bawk.
Crusade chhungin Thlarau boruak duhawm tak neih thin a ni a. speaker rawngbawlna atangin Pentecost member ni sa mi 2 in Isua hmingin sual ngaihdamna baptisma an chang bawk. (emmanuel revival Team)
———-
THIANGHLIMNA CAMPAIGN THAWH THUMNA NEI:
UPC (NEI) North Mizoram District, Headquarter Bialte chuan June ni 2 (Pathianni Zan) khan kumin (2024) chhunga Thianghlimna Campaign thawh 3-na an nei.
Thianghlimna Campaign hi Mission Vengthlang Local-ah leh Tuikual S Local-ah te nei tawhin a thawh thumna hi Khatla S Local-ah hlawhtling taka neih leh a ni. He inkhawmah hian Bro. Lalhmudka Tuikual S chuan tanna hun hmangin; T.Upa PC Lalringliana, Mission Vengthlang Kohhran Thianghlimna Committee Chairman chuan thuhril rawngbawlna a nei a, a ni hnen atang hian Zuk leh hmuam Thianghlimna bakah Incheina te, rilru puthmang leh Kohhran Dan chungchang thlenga kohhrante’n kan thianghlim a pawimawh thu a sawi a, inkhawmte’n hlawkthlak an ti hle a ni. (Hqrs. Bial Thianghlimna Campaign)
———-
DARLAKAH MI THAR:
June ni 2 Pathainni zan khan Mamit Bial Darlak kohhranah BBCC kohhran aṭangin mithar pakhat Pentecost kohhranah seng luh a ni. He mithar hian Pathian zan inkhawm banah Sual ngaihdamna Baptisma a chang nghal bawk a ni. (Darlak mithar)
———-
THILPEK PE:
Tlangnuam Bial LAD te chuan Inrinni kal ta June ni 1 khan Mamit Biala awm Bawngva Mission Field tlawhin kohhran member te tan Thuam hnaw tha tak tak bag eng emaw zat bakah quater mamawh steel rack tha tak an pe. Bawngva kohhran te an lawm hle. (Tlangnuam Bial LAD fehchhuak)
———-
Tuikual S Missions Dept. Workcamp nei:
May ni 23 leh 24 khan District Hqrs. Biala awm, Tuikual South Missions Department te chuan Kananthar Missions Feild tlawhin Missionary Quarter Electric Wiring hna an thawh sak a, hna an thawksak piah lamah Home Missions Field tan hian Sana🕐 tha tak mai an hlan bawk. Thilpek an dawn chungchangah Kananthar Home Missions Field kohhran hruaitute chuan lawmthu an sawi a ni. Kananthar Missions Field-ah hian Evan. Jonanthan Zaihmingthanga chu Missionary in a awm mek a ni. (Tuikual S MSD)
Facebook