GENERAL HRUAITUTE PROGRAMME:
General Sunday School Director Rev. Biaksangzuala chuan June ni 30, 2024 Pathianni zan hian Upper Republic Kohhran, Aizawl East District ah thusawi rawngbawlna a nei ang.
———-
REVEREND TITLE HLAN:
1. Pastor Lalruatkima Fanai, North Mizoram District
2. Pastor Vanlalruata, North Mizoram District
3. Pastor K. Vanlalhruaia, Lunglei District
4. Pastor Vanlalhruaia Tlau, Central District
An hming tarlante hian kum 10 chuang Pastor rawngbawl hna rinawm taka thawkin, an rawngbawlna peng hrang hrangah an awmna District Board chuan Reverend title pek tlakah ngaiin an recommend-a, UPC-North East India, General Adminitrative Committee chuan Reverend title a hlan a ni.
Tun hnuah chuan Rev. Lalruatkima Fanai, Rev. Vanlalruata, Rev. K. Vanlalhruaia, Rev. Vanlalhruaia Tlau, tia lam leh ziah tawh tur a ni.
———-
———-
CHHUMTUIPUI DISTRICT
MI THAR LAWM LUT:
Ni 23.6.2024 (Pathian Ni) khan Riasiaka Local Church ah ECM kohhran atangin member thar chhungkaw khat, member pali chu Evan.T.Lalhmingthanga Home Missionary chuan kohhran ah a lawm lut. Tunlai hian Riasika kohhran ah Pathian malsawmna a thleng mek zel a ni.
———-
THLARAU THIANGHLIM DAWNG THAR PUNG ZEL:
Siaha College Vaih Local ah Pathian hnathawh ropui tak a thleng mek zel a, Pathian hnena lawmthu sawi chawimawina tum – 4 hman zawh tawh niin mi sawm hnih chuang zetin malsawmna dawngin Thlarau Thianghlim an dawng thar a, Thlarau Thianghlim dawng tawh mi engemawzatin he chawimawi atang hian siamthar lehna an chang tawh bawk a ni. Pa valai leh thalai lamah Thlarau Thianghlim harhna a thleng nasa hle a. He chawimawiah hian Upa Hc. Hmingtinthanga chu Speaker atan hman niin a Team te nen Home Visit te neiin an rawngbawlna kaltlangin Kohhran hoten malsawmna tam tak an dawng a ni.
Mi inphalte leh Kohhran hmangaihtu ten sum leh pai thawhkhawmin Ni 28.6.2024 (Zirtawp zan) atanga tan turin malsawmna an dawn avanga Pathian hnena lawmthu sawi chawimawina an nei leh dawn a, ruahman lawk ang chuan Ni 29.6.2024 (Inrinni) khian ran talhin tisa ruai buatsaih a ni ang a, chawimawi hian Ni 30.6.2024 (Pathianni) thleng a awh ang.
District Official ten chawimawi programme hi an hmanpui thin bakah khualkhua atangin mi engemawzatin chawimawi hi an chhim thin a, Siaha khawpui chhung atang pawhin Kohhran mi leh sate bakah pawnlam atang pawhin mi engemawzatin he hun hi an chhim thin bawk a ni.
District chhunga Kohhran member zawng zawngte he chawimawi programme hmanpui tur hian min sawm a ni.
———-
CHAWIMAWINA HUN HMANG DAWN:
Evan.N.Thanghnuna rawngbawlna kal zelah Siahatla Local Church ah malsawmna a thleng mek zel a. Nizan Ni 23.06.2024 khan malsawmna dawng thar 7 awm lehin, malsawmna dawng thar 15 vel an awm tawh a ni.
Rbt.J.Rinthanga Statistician te chhungkua chuan, an Nu ber (Bawiuk Nu) in natna (kal ṭhalo) chu ziaawm lam pan zelin Pathian tihdamna a chang zel a. Chumi kal zelah chuan Kohhran kil theih turin chawimawina an puang ta a ni.
Ni 29.06.2024 (inrinni) khian ruai buatsaih a ni anga he crusade chhung zawng hian District Evangelist N.Thanghnuna chuan rawngbawlna a nei leh anga. Rev.WL.Thanghre chu crusade chairman a ni thung ang.
———-
DISTRICT CHOIR INDUCTION SERVICE NEI:
Chhimtuipui District, District Choir hmasa ber tur te (2024-2025) chu Ni 23.6.2024 khan Hqrs Biak In ah lak luhna programme hi hlim taka hman a ni a. District choir lak luhna hun hi District Music committee Chairman Rev.MH Robin Lalthanmawian a kaihruai a, Rev.Kholy Hlychho District Superintendent in District choir te lak luhna a nei a ni.
———-
———-
LUNGLEI DISTRICT
MISSIONS BOARD VAWI 139-NA NEIH A NI:
June ni 21, Zirtawpni khan District Board Room-ah Lunglei District Missions Board vawi 139-na chu Director Rev. C.Lalhriatpuia kaihhruainain neih a ni a, an rorel pawimawh zualte:
1. Zote S, Tlabung Dinthar a thawktu leh Free Evangelist kaihhruaina dan pawm a ni.
2. General Field, Bihar and Jharkhand Field Revival Crusade neihna atan Rs.50000 pek tha tih a ni.
3. Bangladesh rawngbawlna General lam atanga beisei angin a theih anga buaipui nise.
4. Buknuam leh Mautlang tan Inverter/Solar lei sak.
5. Missions Awareness Campaign neih.
6. Designation Plate, General-in Colour a neih anga ruahman tha tih a ni.
———-
PBS-TE RAWNGBAWLIN AN FEHCHHUAK :
June 23 Pathianni khan Pentecostal Bible School (PBS) zirlaite leh zirtirtute chu rawngbawlin Thuampui Local-ah an fehchhuak.
He hun ah hian chawhma inkhawmah Rev. R Lalramhluna, PBS Teacher chuan hun a kaihruai a, Bro.Lalramdintluanga, chuan tanna hun hmangin Sist. Malsawmkimi chuan zaiin rawngbawlna a nei a, PBS Registrar Rev.K.Vanlalhruaia chuan thusawi rawngbawlna a nei.
Chawhnuah PBS Student te hi Thuampui Local PYD te nen Fellowship hlim takin an hmang.
Zan lam inkhawmah PBS Teacher Pastor Lallawmsanga chuan hun a kaihruai a, Sist.Lallawmzuali Sailo chuan tanna hun a hmang a, Sist.H.Lalnunfelin zaiin rawngbawlna a nei a, PBS Dean Rev.PC.Lalfakawma chuan thusawi rawngbawlna a nei a ni.
Kuminah hian PBS zirlai hi mi 28 an ni a, July 2-4 chhung hian an exam ang a, July ni 7 ah Graduation Day an hmang ang.Kumin hian mi 4 ten an zir chhuak dawn a ni.
Pentecostal Bible School (PBS) chuan June 26 thawhlehni atangin exam an nei tan dawn a ni.
———-
———-
AIZAWL EAST DISTRICT
HSLC leh HSSLC passed tharte hnenah lawmpuina hlan:
June 23, Pathianni chawhnu khan District PYD Education Sub-Committee te buatsaihin tun hnaia MBSE in HSLC leh HSSLC result a tihchhuah taka passed tharte lawmpuina hun District Hqrs. Biakin-ah neih a ni. He hunah hian HSLC leh HSSLC passed thar mi 46 kalin, fuihna thu tha tak Bro Lalremtluanga, MFAS hnen atanga an ngaihthlak bakah Certificate leh Education Compendium Vol. II hlan an ni. District PYD Education Sub-Committee te hian kum dangah pawh hetiang hian zirlai passed tharte lawmpuina hun an lo hmang tawh thin a ni.
———-
District PYD OB te fehchhuak:
District PYD OB ten ruahmanna an siam angin June 24, Thawhtanni khan Thuampui Bial tlawhin hlim takin hun an hmang a, Thuampui Bial te hian Thuampui Kohhranah an lo thleng a ni. Inkhawm hi Evan Zothansiama, Bial PYD President chuan a kaihruai a, District PYD Secretary, Evan Lalfelkima’n thusawi rawngbawlna a nei thung a ni. He hunah hian Thuampui Bial PYD Secretary Bro. Zosangliana leh Pastor J. Lalhmingsanga, District PYD President te hnen atangin inhmelhriattirna leh hmalakna hrang hrang ngaihthlak a ni bawk. Thuampui bial atang hian zaithiam tak takte hnen atangin Pathian fak hla ngaihthlak a ni bawk.
District PYD te hian kumin chhung hian Aizawl khawpui chhung Bial hrang hrangte tlawhchhuak turin ruahmanna an siam a, May 20 khan Zemabawk Bial-ah hun hmang tawhin June 3, khan Zemabawk North Bial-ah hun an hmang leh a Bawngkawn Bial-ah July 8, Bazar Bial -ah July 15, Bethlehem Bial -ah August 5, August 19-ah Upper Republic Bial bakah Mualpui Bial -August 26 te ruahmanna an siam a ni.
———-
Sport leh zirna lama mi hmingthate hnenah chawimawina hlan:
June 28, Zirtawpni khan District Hqrs. Biakin-ah District Sunday School hmalakna in District chhunga Sport leh zirna lama mi hmingthate hnenah chawimawina hlanna hun hman a ni. He hun hi Evan. Lalramzauva, District S.S Treasurer chuan kaihruaiin fuihna thu, Rev. C. Lalengliana, District S.S Director hnen atangin ngaihthlak a ni bawk. Evan. K. Lalmuansanga, District S.S Secretary kaihhruaiin chawimawina hlanna hun neih a ni bawk.
District S.S buatsaih Sport leh zirna lama mi hmingthate hnenah chawimawina hlanna hunah hian zirna lamah mi pakhat leh infiamna lamah mi 18 te chawimawina neih niin Bawngkawn Bial atangin mi pakhat, Upper Republic Bial atangin mi 8, Zemabawk Bial atangin mi 2, Bethlehem Bial atangin mi 2 leh Serchhip Bial atangin mi 5 bakah Bazar Bial atangin mi 1 ten chawimawina hi an dawng a ni.
Aizawl East District S.S Department te hian Mizoram State Sport Council in a pawmpui leh funding-ah pawh a recommend te, Sport discipline hrang hrang chi 23-a State level leh a chunglam intihsiaknaa Gold, Silver leh Bronze medal dawng te bakah Zirna lamah HSLC leh HSSLC-a Top 10 chinte leh Graduate chinah Topper/ Gold Medalist te hnenah chawimawina pek thin ni se tiin inkaihhruaina alo neih tawh angin tun hunah hian chawimawina hi hlan a ni ta a ni.
———-
OTS Graduation Day:
July 7, Pathianni chawhnu hian Mualpui Bial, Salem Biak Inah kum 2024 Session-a OTS zirlai pass chhuakte pualin Graduation Day hman a ni dawn. He hun hi Rev.R. Laltlankima, Principal chuan kaihruaiin Graduate Confering & Certificate hlanna, Rev.K. Malsawmtluanga, CBC Principal chuan a nei dawn bawk a ni. OTS Graduation Day hmanaah hian District Kohhranpui hruaitute bakah District Department hrang hrang hruaitute an tel anga, Result puanna, Pastor Laltlanhlua Hnamte, Secretary Theological Education Board chuan a nei ang. Kumin-ah hian mi 7 ten an Graduate dawn a ni.
———-
Kum chanve Board:
June 28, Zirtawpni khan District LAD te chuan District Committee room-ah District Board tluang takin an nei a, Sis. R. Lalramsiami B/W, President chuan a kaihruai a ni. He hunah hian District Kohhranpui hruaitute pawhin telpuiin Bial atang leh Official atanga agenda lut te an ngaihtuah a, an thu ngaihtuah langsar ziangah Elpida Rehabilitation Centre puala tanpuina hlan ve thu te, LAD inkhawm vawi khat thawhlawm Zemabawk Cancer bei te tanpuina tura khawn thute bakah CBC library tihchangtlun nan District LAD in tanpuina pek ve rawtna te bakah District LAD Conference hman dan tur chungchangte an ngaihtuah a ni. He hunah hian Board member an kal tha hle a ni.
July 5, Zirtawpni hian District Committee room-ah District PYD Kum chanve Board neih a ni dawn bawk a, Pastor J. Lalhmingsanga, President chuan he hun hi kaihruaiin Bial atang leh Official atanga agenda lutte an ngaihtuah dawn a ni.
July 4, Ningani khian District Missions Department pawhin District Committee room-ah kum chanve Board an nei dawn bawk a, Rev. C. Lalmalsawma, Director chuan he hun hi a kaihruai ang. He hunah hian Bial atang leh Official atanga thu ngaihtuah tur lutte an ngaihtuah dawn a ni.
———-
Audit:
Aizawl East District hnuaia Kohhranpui leh Department hrang hrang bakah Sub-Committee te Kum chanve sum chu July 2, Thawhlehni atang khan District Office-ah Audit neih a ni dawn a, July 5, Zirtawpni hian zo fel hman tura beisei an ni. District Board in heng mite hi Auditor atan a ruat a ni: Rev Rosanga Kawlni, Rev C.Laldintluanga, Pastor HP. Ramfangzauva bakah Upa Jimmy L.Renthlei.
———-
Mithar leh baptisma chang thar:
June 23, Pathianni khan Darlawn ah nauhlan rawngbawlna leh Baptisma rawngbawlna neih ani a, mi pahnih in baptisma an chang a, Pakhat zawk hi mithar a ni. Darlawn ah hian Bro H Vanlalhruaia leh a team ten rawngtan nei a ni.
Thingsulthliah bial Sesawng Vengthar Kohhranah pawh June 23, Pathianni khan mi thar 8 Kohhranah sengluh an ni. Sesawng Vengtharah hian Evan Lalzuisanga’n rawngbawlna a nei a ni.
———-
Hruaitute Programme:
Rev. C. Lalmalsawma, District Missions Director leh District Missions Department hruaitute chuan Pathianni hmang hian Hnahlan Bial chhungah Missionary Support zawngin rawngbawlna an nei ang.
———-
———-
NORTH MIZORAM DISTRICT
HRUAITUTE PROGRAMME (OFFICE)
District Superintendent: NMD Supt Rev. K. Lalduhsanga chuan District in ruahmanna a neih bawhzuia Rawngbawltu Pastor Nupuite puala seminar NMD Office Committee room-a neihah
District Secretary: NMD Secretary Rev. C. Lalthantuanga chuan June ni 28 Zirtawpni khan, NEI UPC General Literature Board buatsaih Beihrual Zirbu kum 2024 atana buatsaih chu endik hna thawkin meeting an nei
District Treasurer: June ni 25 thawhlehni khan District Treasurer Rev. C. Lalmuanpuia chuan NEI UPC Official Organ, Pentecostal Voice Committee-ah telin Committee a nei.
Missions Director: NMD Missions Director Rev. C. Lalramthanga chuan June ni 24 thawhtanni khan Bukvannei Missions Field-ah Quarters sak kal lai dinhmun enin bungraw mamawh te a enpui a, Field dang remchang a tlawh bawk.
June ni 28th Zirtawpni khan District Missions Board neihah Meeting Missions Director hian a kaihruai bawk.
———-
PASTOR NUPUI SEMINAR:
June ni 27, 2024 Ningani nileng khan United Pentecostal Church of North East India, North Mizoram District buatsaihin, North Mizoram District huam chhunga rawngbawltu Pastor Nupuite pualin Seminar hlawhtling tak neih a ni.
Seminar hi District Office Committee Room-ah neiin; Pastor Nupui mi 34 an kalkhawm thei a, Seminar hi hun hnih- Chawhma hun leh chawhnu hunah thenin chawhma hun hi District Secretary Rev. C. Lalthantluanga’n a kaihruai a, Pathian thu chhiarin Sis Lalchhuanawmi W/o Rev. H. Zabiaka chun hun hlanin Pathain hnenah a tawngtai a, chu mi hnuah Rev. R. Lalrinsanga, UPC(NEI) General Sudpt. Kalchhuak ta buatsaih Paper “Pastor Nupuite Mawhphurhna Rawngbawlnaah” tih thupui zir ho a ni. Chawhma lam Paper zir zawh hian paper atanga sawi ho tur te hlawk takin an sawi ho a ni.
Chawhnu hun Dar 1:30Pm-ah tan leh in Rev. C. Lalmuanpuia, District Treasurer chuan hun a kaihruai a, Rev. K. Lalduhsanga, District Supdt. Paper buatsaih “Pastor Nupuite mawhphurhna Nitin nunah” tih thupui hmangin seminar neih leh a ni. Seminar hunhnihna hman zawh hnu hian sawihona tha tak nei lehin seminar hmangtute’n sawihona tha tak an nei bawk.
Seminar zawh hian District buatsaihin Zanriah chaw an kilho nghal bawk.
———-
*NMD UPC Headquarters Bial Sunday School Dept ten Inter, Senior, leh Doctrinal Dept. (I.S.D) Meet hlim takin an hmang. Speaker atan Evan. R. Lalrinchhana hman niin Naupangte zingah Thlarau Thianghlim dawng thar mi 10 an awm: UPC-NEI, North Mizoram District Headquarters Bial Sunday School Dept buatsaihin June ni 22 & 23, 2024 (Inrinni leh Pathianni) hmang khan Mission Vengthlang Kohhranah ISD meet an hmang a, an meet hmang Pathian Thlarau Thianghlimin a awmpui.
Meet Inrinni (June ni 22) Programme hi dar 10:30Am-ah Mission Vengthlang THP Hall II-ah hman niin Bial Sunday School Director Upa Lalkamlova Rokhumin a kaihruai a, Bialtu Pastor Rev. Lalremtluanga’n meet hawnna neiin Pathian thu hmangin I.S.D. Dept naupang tleirawl leh rawlthar te fuihna thu tha tak a sawi a, Programme Pathian hnenah a hlan bawk.
Inrinni chawhma hun Bial SS Director Upa Lalkamlova’n kaihruaiin chawhnu lam Bial SS Treasurer T.Upa Lalthlengliana’n a kaihruai thung a, Inrinni chhunah hetiang hian hun hman a ni 1) Solo-Khatla South leh Tuikual S, Kohhran 2) Fak lam (Worship Dance) – Mission Vengthlang leh Headquarters Kohhran 3) Skit – Headquarters Kohhran 4) Zaipawl-Nursery leh Khatla South Kohhran 5) Musical Drama – Tuikual S Kohhran 6) Recitation – Nursery Kohhran, atang tein Item hmuhnawm leh beng titlai tak tak a awm a ni.
Inrinni chawhma hunah Character Study ‘Daniela’ atanga neih niin; Upa Lalhlimliana, Hqrs. Local SS Secretary hnen atangin zir ho a ni.
Inrinni chawhnu hian Hqrs. Bial Thianghlimna Committee leh Health Dept tangkawpin ‘Zuk leh hmuam that lohzia” Power Point Presentation hmangin zirtirna neih a ni bawk.
ISD naupang te atangin an phaktawka Pathian ropuina tura item an neih an pholan te an titha hlawm hle.
June ni 22 Inrinni chawhnu inkhawm atanga a tuk Pathianni zan June ni 23 thlengin Revival Programme-a hun hman chhoh niin; Speaker Evan. R. Lalrinchhana leh a team member 2 te inpekna leh tawngtaina a zarah hun hlimawm tak hman chhoh a ni. Speaker hnen atang hian Pathian thu “I Piangthar tawh em” tih te “Khawngaihna hun” tih leh “Pathian hnaih rawh” tih thupui pawimawh tak takte hmangin thusawi ngaihthlak thin a ni a, Lalpan Speaker rawngbawlna mal a sawm hle.
Revival Programme-ah hian fakhla Bro. Austine Lalnuntluanga, Nursery, Bro. Johan L. Chhangte leh Esther Lalhluzuali te hnen atangin ngaihthlak a ni a, Recitation Sist. Estheri of Nursery atangin ngaihthlak a ni bawk
June ni 23 Pathianni chawhnu inkhawmah Speaker kaihhruainain Thlarau Thianghlim dil tawngtai neih a ni a, he hunah hian Pathian hnathawh lo thlengin I.S.D naupang 10 in Thlarau Thianghlim an dawng thar a, Siamthar leh khawihnawn chang mi thahnem tak an awm bawk.
Pathianni zan inkhawm banah Zaikhawm a ni a, Dar 11:00 Pm thleng hlim takin Pathian fakin zaikhawm neih a ni.
———-
ENVIRONMENT PROTECTION AWARENESS CAMPAIGN:
Ni 24 June, 2024 (Thawhṭan) zan khan Dinthar Bial Environment Protection Sub – Committee hmalakna in Tuikual, Chawnpui leh Dawrpui Vengtharah te ‘Environment Protection Awareness’ tih thupui hmangin Campaign neih ani a. Tuikual Local ah Sis. Lallawmzuali Fanai, Dinthar in hun a hmang a, Dawrpui Vengthar Local ah Sis. Jacinta Lalnunsangi, Tuikual in hun hmangin, Chawnpui Local ah Bro. Lalchhandama, Dinthar in hun a hmang ve bawk.
Campaign na atan thupui thlan sa ziak tur atana ruat Bro. Lalchhandam, Dinthar ziah hmangin thupui ṭhensawm,
(i) Single Use Plastic
(ii) Reduce, Reuse, Recycle
(iii) Bawlhhlawh paih kawngah
(iv) Thing phun
(v) Awareness Campaign, tih hmangin ‘kan chhehvel a thil awm te’ kan venhim a, kan tihfai a kan enkawl dan tur te zir ho niin, hun hlawkthlak tak hman ani.
Dinthar leh Zotlang Local ten Programme duan sa an neih avangin hun remchang hmasa berah campaign hi nei tura ruahman a ni.
———-
PATHIAN CHAWIMAWINA NEI:
June ni 23, 2024, Pathianni khan Sis Lalzawmliani, Chanmari West, Chatlang Bial, North Mizoram District- te chhung chuan Pathian chawimawi țum 3-na atan an nei a, he chawimawinaah hian Speaker atan Evan T.Vanlalruata (Valtea), Apostolic Revival Team te hman leh a ni.
He Chawimawina hi ni 19.06.2024, Nilaini zan ațangin hman țan a ni a, ruahman ang chuan Pathianni zan thleng hmang tura ruahman a ni.
Chawimawi niah hian Rev P. Vanlalfela, Bialtu Pastor-in inkhawm a kaihruai a, chawimawina petu chhungkua ațangin Evan Vanlalpeka Fanai in chawimawina an pek chhan te sawiin hun hmasa a hmang a, North Mizoram District, Superintendent, Rev K. Lalduhsanga’n he chawimawina hun hi hmanpuiin Kohhran te chibai bukna hun a hmang bawk a ni. Speaker hnen ațangin Pathian thu ropui tak ngaihthlak a ni a, thlarau lam hlate nen hun nuam tak hman a ni.
Chawhnu lamah zaikhawm a chhunzawm a ni a, Pathian thlarau awmpuina hnuaiah thlarau lam hla te nen hun hman a ni a, tlaiah chawimawina ruai tui tak kilho a ni. He chawimawina hunah hian Pathian awmpuina changin tlarau lam boruak pawh a țha hle a ni.
He hun hmanpuitu District Superintendent Rev K Lalduhsanga, Hq bialtu Pastor, Rev Lalremtluanga te nupa bakah bialchhung leh bial pawn lam ațanga țawiawmtute chungah lawmthu an sawi mawlh mawlh bawk a ni.
———-
HUNTHAR KOHHRAN LAWMNA:
Hunthar Kohhranten,Kanan veng a Biak in an sak chu peih a ni tep tawh a,sum lama harsatna an neih chu Church Board ten a tih dan tur ngaihtuaha an buai hle lain Bro Lalremliana te chhungin, Pulpit set ie Pulpit, Maicham te, Chair te, Lecturn te bakah Thutthleng fullset, (Danlopte nen vek) kohhran hmangaihna avanga an rawn tum tur thu an sawi a, kohhranho te an lawm hle.
Hei bakah hian Bro. Michael Zoramthanga te chhungin Rs 30,000/- lai an thawh bawk. Church Board ten lawmthu sawi nan an chenna inah lawmthu sawi tawngtaina an va nei a ni…
———-
MITHAR:
June 23.06.2024 (Pathianni) khan Central Jail Veng Kohhran ah Members pakua (9) lai mai Rev K.Vanlaldika, Bialtu Pastor in lawmluhna a nei. Nau hlan rawngbawlna a nei nghal bawk.
Kohhrana mithar a lawmluh te hi Baptist Church aṭangin mi pali (4)
Presbyterian aṭangin mi panga (5) an ni. Tin, tui Baptisma chang thar mi panga (5) an awm bawk.
———-
KOLASIB RENGTEKAWN BIAL :
June ni 22 Inrinni khan Church Board Committee in a lo passed tawh angin, New Builum Kohhranah Seminar neih a ni a, Resource Person ah Rev.C.Lalthlengliana bialtu pastor hman a ni a , Kohhran hoten he seminar hi an hlut hle
Chawhma session chu Upa Lalsangliana’n kaihruaiin ,Upa R.Tlanglawman ṭawngṭaina a nei a,Sist Selenain zaia rawngbawlna a nei a, Resource Person Rev C.Lalthlenglianan Local Department Administration chungchang paper a present a ni.
Chawhnu session chu Upa Lalṭhahluanan a kaihruai a, Bro Jerry Lalthansangan ṭawngṭaina a nei a, Sist Melody CHawngnuntharin zaia rawngbawlna a nei a, Resource Person Rev C.Lalthlenglianan Kohhran dan hrang hrang chungchang Paper a present leh a, Sawihona hlimawm tak leh hlawkthlak tak neih zui nghal a ni a,Evan Rualhleian ṭawngṭaina in seminar hi a khar ani. He Seminar ah hian Sawhchiar tuihnai tak buatsaih a ni bawk.
———-
DIST HQRS (TUIKHUAHTLANG)KOHHRAN RAWN WORK CAMP: :
Dt. 20/6/2024(Ningani) khan Pukzing Vengthar Mission Field Biak In, Electric wiring rawn ti turin Evan Challiana – Dist SS Secy & Hqrs Bial Missions Director, T. Upa Aldrin Lalngaihawma Asst Director(Local), Bro Lalthangzela Sailo, Sis Thangpuii leh Bro Davida te an rawn kal a.
T. Upa Aldrin Lalngaihawma hian a motor a rawn thawh a, tluang takin Pukzing thleng Car hian kal in. Pukzing ah Car hnutchhiah in, Kawng chhiat vangin Pukzing atangin Pukzing Vengthar hi Pick Up hire in an kal chhunzawm leh nghal a. An thlen zan hian dar 10pm thleng wiring hna an thawk nghal a. June 21/6/2024 zingkar atang khan an hna thawk chhunzawm leh in, chawhnu lamah an tum engkim thawk zo in an rawn haw thei ta.
An tan hian bialtu Pastor K. Ainawna te chhungkua in zanriah an lo buatsaih sak chu an kil hnu in, dar 6:16pm khan Aizawl lam panin, Pathian hruaina in zan dar 9:14pm khan tluang takin Aizawl an lut a ni.
Work Camp a lo kal te hian Biak In a tar turin Sana lian an present nghal a, kohhran aiawhin kan thawktu Evan C. Sangliana’n alo dawng a ni. Work Camp a lokal kan Dist Hqrs kohhran Missions Dept leh kohhran mipui zawng zawng te, bialtu Rev Lalremtluanga chungah te W. Phaileng bial mipuite kan lawm hle a.
Facebook