GENERAL HRUAITUTE PROGRAMME:
General Treasurer Rev. R. Laichhingpuia leh General Missions Director Rev. C. Vanlalena te chuan June ni 18 -24, 2024 chhung hian Kohhran thilpawimawh buaipuiin Arunachal Missions Field ah hun an hmang ang.
General Sunday School Director Rev. Biaksangzuala chuan June ni 19, 2024 Nilaini khan Lawngtlai West District Sunday School Board neih chu a hman pui.
———-
GENERAL SUNDAY SCHOOL DEPARTMENT :
June ni 13, Ningani khan General Sunday School hruaitute leh Series thara Sunday School Zirlaibu ziak tu tura ruat ten General Hqrs office-ah meeting an nei.
General Sunday School Board in a lo pass tawh angin kum 2026 atang hian UPC North East India huamchhunga Naupang Sunday School Department, Beginners atanga Doctrinal Department inkar ten Series thar an zir tawh dawn a, a hming atan Post Modern Series tih a ni. He Series thar atana zirlaibu ziaktur pawh General Sunday School Board chuan ruatin, zirlaibu kalphung tur a duang fel tawh a. Tun tum meeting-ah hian kum khatna ziaktu turte koh khawm niin zirlaibu kalphung tur leh a chhung thu in rem dan turte an thlir ho a ni. Post Modern Series kum khatna ziak tu tur te :
Doctrinal Kum 1-na : Rev. K. Vanlalhruaia, Lunglei
Senior Kum 1-na : Evan. R. Lalbiakfela, Aizawl
Intermediate Kum 1-na : Rev. Joseph L. Thlauhthang, Saiha
Junior Kum 1-na : Rev. Lalruatkima Fanai, Kawnpui
Primary Kum 1-na : Pastor K. Vanlalhlimpuia, Khawzawl
Beginners Kum 1-na : Rev. Jh. Za Hluna, Aizawl
Meeting hi General Director Rev. Biaksangazuala’n a kaihruai a, General Secretary Rev. Jh Zahluna chuan report leh kaihhruaina pharhin sawi fiahna a nei bawk.
———-
LITERATURE & PUBLICATION BOARD
June ni 19 Nilaini leh 21 Zirtawpni khan UPC North East India Literature & Publication Board chuan General Headquarters Committee Room, Mualpui Salem Veng, Aizawl ah Kum 2024 Beirual thupui zir tur Edit na an nei.
Literature & Publication Board Chairman Rev. Lalmalsawma Sailo kaihhruaiin Editting hi neih a ni a, kummin 2024 a UPC North East India Beihrual Thupui zir tur hi ” Thuawihna” tih niin Evan. Lalchhuanmawia Sailo ziak a ni.
———-
CBC ZIRLAITE INKHAWMNA NEIHPUI:
June ni 16, 2024 Pathianni chawhnu khan Tuikual North Kohhran, N. Mizoram District-te chuan Calvary Bible College CBC zirlaite an tlawh.
Tuikual North Kohhran te hi Member 50 chuang thawkchhuakin CBC Warden, Rev. C. Malsawmzela chuan CBC zirlai te leh staff te introduction a nei a, Upa Malsawmdawnga, Secretary Tuikual chuan introduction a nei bawk. Tin, Upa Lalrosangpuia, Treasurer, Tuikual chuan thu tawi sawiin CBC te sana 10 a hlan a, Pastor BD Kowarson, Bursar chuan thil pek dawngin thu tawi sawina a nei ve bawk.
———-
———-
CHHUMTUIPUI DISTRICT
MI THAR LAWM LUT:
June ni 16.2024 Pathianni khan Riasika Local Church a lawi turin Chhungkaw khat member 6 chu Local Chairman Upa Biaksanglura chuan kohhran ah a lawm lut.
———-
REVIVAL CRUSADE & CHAWIMAWINA:
Siaha West Bial chuan District leh bial rorelna bawhzuiin June ni14.2024 zan atang khan Council Veng Local Church ah Thlarau Thianghlim baptisma la dawng lo ten an dawn theih nan Revival crusade an buatsaih a, Thupui ah “Thlarau Thianghlim nei rawh u” (Joh 20:22) thu hmangin Rev. V. Lalhlimpuia Sangau Bialtu Pastor chu speaker ah hman a ni bawk.
Lawngtlai West District, Siahatla Local pawhin Evan. N. Thanghnuna District Evangelist speaker-ah hmangin Crusade a nei mek a. Sermon rawngbawlna bakah Bible study te neiin kohhran ten malsawmna an dawng nasa hle a ni.
College Vaih Local, Siaha ah Pathian hnathawh ropui tak thlengin, Chawimawina tum thum neih tawh a ni a, Thlarau Thianghlim dawng thar leh siamthar lehna chang engemaw zat awm tawh a ni. June ni 20 – 23 chhung khan Pathian hnen a lawmthu sawi chawimawina hi neih chhun zawm leh niin, Upa Hc. Hmingtinthanga chu Speaker ah hman a ni.
———-
———-
LUNGLEI DISTRICT
LITERATURE AND PUBLICATION BOARD AN THUKHAWM:
June ni 10, Thawhtanni khan District Superintendent Room-ah Lunglei District Literature and Publication Board chu an chairman Evan.F.Lalhmangaiha kaihhruainain an thukhawm a, an thurel pawimawh zualte:
1.Nakkum 2025-a PCD Zirlaibu tur chu District PCD atangin publish sak turin an rawn dil a, an dil ang hian publish sak nise tha tih a ni. Nakkum a PCD zirlaibu tur hi a lian hi Rev.Ralkapkunga Khiangte ziah a ni a, a te hi Evan.R.Ropianga ziah a ni.
2.Nakkum 2025 ah hian UPC Lunglei District Conference Diamond Jubilee lawmna neih tur a ni a, hetah hian Souvenir buatsaih chu Literature and Publication Board te kutah dah anih angin hmalak nise tha tih a ni a, Editorial Board indin nise tha tih a ni a, heng mite hi hruaitu atan ruat an ni.
-Editor : Evan.Lalringzuala Pachuau
-Asst Editor : Rbt.C.Lalramluahpuia, Rbt.K.Lalrintluanga
3. Literature Board chu Literature and Publication Board tia thlak anih tak avangin Logo siam thar nise tha tih a ni a, hmala turin OB te ruat an ni a, Committee leh hmasa berah en ho atan dah a ni.
CONFERENCE DIAMOND JUBILEE CELEBRATION COMMITTEE AN THUKHAWM :
June ni 14 Zirtawpni chawhma dar 11:30 khan District Superintendent Room-ah UPC Lunglei District Conference Diamond Jubilee Celebration Committee chu an Chairman Rev.C.Lalrintluanga kaihhruainain an thukhawm a, thu pawimawh tak tak an ngaihtuah. An thurel tlangpuite :
1. District Board-in Diamond Jubilee puala hla inphuahsiak buatsaih nise, pakhatna atanga pathumna thleng lawmman siam nise a tih chu tul leh pawimawhte buaipui turin Music Committee, Lunglei District-te ngen nise tha tih a ni a, lawmman atan hian pakhatna Rs.10000, pahnihna Rs.7000 leh pathumna Rs 5000 nise tha tih a ni.
2. Conference Diamond Jubilee lawmna turah Sub Committee peng hrang hrang, Refrehment, Decoration, Usher & Receiption, Jubilee Lung, Light, Sound, Traffic and Security, Tui, Medical leh Sanitation-te ruahman a ni a, hruaitu turte ruat a ni.
3. Conference Diamond Jubilee pual hian Conference hun Pathianni zing (March ni 2, 2025) leh chawhnu inkhawm ah te Jubilee pualin hun hman nise tha tih a ni a, tlai lamah Jubilee ruai buatsaih tha tih a ni. Pathianni zing (March ni 2, 2025) inkhawm tan hmain Jubilee lung hawn nise, Biak In chhung luh hnu ah Jubilee dar hi mi 6 in vawi 10 theuhin vawi 60 vua se tha tih a ni a, dar vaw tur hian hian District Official 3, Rev.C.Lalrintluanga, Rev.PC.Lalfakawma, Rev.K.Vanlalhruaia te bakah Rev.C.Lalhriatpuia, District Missions Director, Rev.VL Hmuaka leh Rev.B.Kamliana te ruat an ni.
4. District Board-in Conference Diamond Jubilee lawmna atan Pastor nilai leh pension tawh la damte chawimawina Memento hlan nise a tih chu lo bawhzuia hma la turin Pennet Lunglei te ruat an ni.
———-
REVIVAL COMMITTEE AN THUKHAWM, REVIVAL CRUSADE AN BUATSAIH DAWN :
June ni 6 Ningani chawhnu dar 2:30 khan District Superintendent Room-ah UPC Lunglei District Revival Committee chu an Chairman Rev.R.Lalsangzuala kaihhruainain an thukhawm a, an thurel tlangpuite :
1. Town chhunga Crusade buatsaih chungchang rorel hmasain a lo ngaihtuah tawh chu bawhzui dan tur ngaihtuah a ni a, Crusade hi July ni 25-28 chhungin Headquarters Local-ah nghah nise, hetiang hian Speaker leh inkhawm hun turte ruahman a ni.
– Dt.25.7.24 (Thu) zan Speaker atan Pastor Lallawmsanga, Haulawng Bial.
– Dt.26.7.24 (Fri) zan Speaker atan Pastor Lalengzauva, Chhipphir Bial.
– Dt.27.7.24 (Sat) Chhun, inkhawm tan hun dar 11:00, Speaker atan Pastor T.Zahmingliana, Thingsai Bial. Chawhnuah Zaikhawm neih tur a ni ang a, ke sil rawngbawlna neih tur a ni bawk ang, kaihruaitu atan District Secretary Rev.PC.Lalfakawma ruat a ni.
– Dt.27.7.24 (Sat) zan Speaker atan Pastor PC Zionrammawia, Lungsen Bial.
– Dt.28.7.24 (Sun) Chawhma Speaker atan Rev.C.Lalrintluanga, District Superintendent.
– Dt.28.7.24 (Sun) chawhnu Speaker atan Pastor K.Lalnunpuia, S.Vanlaiphai Bial.
– Dt.28.7.24 (Sun) zan Speaker atan Rev.R.Lalramhluna, Sertlangpui Bial.
Crusade chhunga zaia rawngbawlna nei turin heng mite hi ruat an ni.
– Sist. Amber Lalmuanpuii
– Bro.PC.Lalrinsanga
– Bro.Obadia Lalneihtluanga
– Sist. Jenet Lalruatfeli
– Sist. B.Vanlalropeki
– Sist. Lalduhawmi Chawngthu
– Sist. Lalbiaksangi
– Evan Sangthuama Sailo
– District UPC Choiir
– Pukpui Bial PYD
– Rahsiveng Bial PYD
– Headquarters Bial PYD
Inkhawm apiangin thawhlawm a awm ang a, tan zan atangin zaikhawm nghal tur a ni.
———-
LAWMMAN PAKHATNA DAWNG:
June ni 14, Zirtawpni khan World Blood Donor Day hman a ni a, hetah hian June 2023 leh June 2024 inkara a thlawna thisen pe tam te lawmman sem a ni a, hetah hian PYD Lunglei District chuan Church Base zingah thisen pe tam ber lawmman pakhatna a dawng.
PYD Lunglei District hian June 2023 leh June 2024 inkarah hian thisen Unit 526 a pe a ni. Kohhran huangah hian PYD Lunglei District hnuaiah TKP Bazar Bial Thisen Unit 152 petu leh Thisen Unit 123 petu Lunglawn Pastor Bial te an awm a ni.
Kumin ah pawh hian PYD Lunglei District Conference-in a lo rel angin thisen hi bial hrang hrang ten an pe chho leh mek a, thisen unit engemawzat an pe leh tawh a ni.
———-
LUNGPHUM PHUM:
Theiriat Bial Pastor Quarters sak thar tur Lungphum chu June ni 18, Thawhlehni zing 7 khan District Superintendent Rev.C.Lalrintluangan a phum.
Lungphum phum inkhawmah hian District Secretary Rev.PC.Lalfakawma chuan Pastor Quarters sak dan tur leh hmalak anih dante a sawi a, June ni 18 khan a sak hna hi tan nghal a ni.
He hunah hian District hruaitute, Building Committee members, Theiriat Bial hruaitute leh Theiriat Local hruaitute an tel a ni.
———-
THIANGHLIMNA CAMPAIGN:
District Thianghlimna Committee hmalaknain Thianghlimna Campaign/Seminar chu Thenhlum Local-ah June ni 15-16 hmang khan neih a ni.
He hun hmang tur hian Rev. Pc. Lalfakawma District Secretary, Upa PC. Lalnunmawia Rahsiveng, Rbt. T. Lalhmingliana Farmveng te an kal a, kohhran hote nen hun hlimawm tak an hmang a ni.
June ni 15 Inrinni zan inkhawmah Rbt. T. Lalhmingliana’n hun hmangin, Sunday zingah Rev. Pc. Lalfakawma’n thu a sawi a, Sunday zanah Upa Pc. Lalnunmawia’n hun a hmang ve thung. Sunday chawhnuah seminar neih a ni a, group 3 ah inthen in Upa leh rawngbawltu ten Rev. Pc. Lalfakawma hoin Seminar neih a ni a, Upa PC. Lalnunmawia’n PYD-te hovin Rbt. T. Lalhmingliana’n LAD a ho thung. PCD inkhawmah hun hman leh a ni bawk.
———-
———-
AIZAWL EAST DISTRICT
District Kohhranpui buatsaihin Live Crusade hlawhtling taka neih a ni:
June 12, Nilai zan atanga Pathianni zan thleng khan Champhai Bethel Bial, Hqrs. Biakin-ah Live Crusade hlawhtling taka neih a ni a, Speaker-ah Rev. VL. Hnemtluanga, District Treasurer leh Rev. KVL. Hmangaihkima te hman a ni. June 12, Nilai zan atang khan he Live Crusade hi neih tan niin Pathianni zan thleng khan hman a ni a, Crusade hman chhung hian Bethel Bial mai bakah Kahrawt Bial leh hmun hrang hrang atangin chhimtu engemaw zat awmin Pathianni thlarau thianghlim chenchilhna hnuaiah hlim takin hun an hmang a ni.
June 12, Nilai zan atanga Inrinni zan thleng leh Pathianni zan khan Rev. KVL. Hmangaihkima hnen atangin thusawi ngaihthlak thin a ni a, Pathianni chawhma leh chawhnu khan Rev. VL. Hnemtluanga hnen atangin thusawi ngaihthlak a ni bawk. He hunah hian Sis. Lalhmangaihkimi leh Evan F. Zirliana ten Pathian fak hla an sa thin bawk a ni.
District Kohhranpui buatsaih Live Crusade hi Champhai-a Cable Network pahnih- LCN leh CCN te chuan Live-a pe chhuakin CCN Youtube channel-ah Live-a pekchhuah a ni bawk.
Kumin District Conference in Aizawl East District chhunga District Capital tinah Crusade lian tham tak buatsaih ni se tia alo passed tawh angin a hmasaber atan Champhai khawpui chhungah Live Crusade hi neih niin July 24 atanga 28 chhung hian Serchhip District, Serchhip Dinthar hmunah Live Crusade hi nei turin ruahmanna siam leh a ni bawk.
———-
Naupang Sunday School te pualin hun hmang:
June 15 leh 16 khan Thingsulthliah Bial Sunday School Department hmalakna in Naupang pual Lâng Camp leh Revival, Sesawng Kohhran-ah hman a ni a, Speaker-ah Rev.C.Lalengliana, District Sunday School Director chu hman a ni.
June 15, Inrinni khan Lâng Camp neih niin, Chhandamna tih thu hmangin Pathian thu zirhona neih ni a, Isua Pathianna tih thu hmangin Bialtu Pastor Hmingchungnunga Ralte in a nei bawk. Chawhnu lamah Peniel hun hman a ni bawk. Inrinni zan atanga Pathianni zan thlengi khan Revival inkhawm neih a ni a, Speaker hnen atangin Pathian thu chah ropui tak tak ngaihthlak thin a ni. Bial chhung Naupang ten mal zai, group zai leh Recitation te an nei thin bawk a ni. Pathianni chawhnu inkhawmah Kumpuan, Thianghlimna -Zuk leh hmuam leh Media hman sual tih thu hmangin hun hman a ni leh bawk. Speaker rawngbawlna Lalpan mal a sawm hle a, Lâng Camp leh Revival atangin mi pathum in sual ngaihdamna Baptisma changin, mi paruk in Thlarau thianghlim Baptisma an dawng thar bawk a ni.
———-
Crusade hlawhtling taka neih a ni:
Kawlkulh Bial Vanchengpuiah June 14 atanga 16 chhung khan District Missions Director, Rev. C. Lalmalsawma leh District Full-Time Evangelist Evan R. Vanchhunga te Speaker-a hmangin Crusade hlawhtling taka neih a ni. He hunah hian Sis. Vanlalhriatdiki chuan zaia rawngbawlna nei thinin Bialtu Pastor, R. Lalfamkima bakah Kawlkulh Bial Missions Director Upa Psl Zoramthanzaua leh Asst. Secretary Upa C. Lallawmzauva ten bial Missions aiawhin an telpui bawk a ni.
June 16, Pathianni chawhma inkhawmah khan District Missions Director, Rev C. Lalmalsawma hian Member thar 1 a senglut a, inkhawm banah Baptisma chantirna a nei nghal bawkin Bialtu Pastor R. Lalfamkima’n nau pakhat a hlan bawk a ni.
———-
Thing phunna nei:
June 15, Inrinni zingkarah khan Serchhip Bial Environment Protection Sub-Committee hmalakna in Chanmari Vengthar kawng, sipai tlang-ah thingphun hnatlang an nei. He hunah hian mi 13 thawkchhuakin thing tiak 30 phun a ni a. He hunah hian Serchhip Bial PYD hruaitute pawhin telpui bawkin thingphunna neih zawh a nih hnuah Serchhip Bial PYD ten Chanmari Vengthara ram an neih samfai hna an thawk nghal bawk a ni.
———-
District PYD hruaitute fehchhuak:
June 16, Pathianni hmang khan Aizawl East District PYD hruaitute chuan North Vanlaiphai Bial tlawhin hun hlimawm tak an hmang. June 15, Inrinni zan khan Lungkawlh Kohhranah inkhawmna neih a ni a, Pathianni chawhma leh chawhnu khan Bial Hqrs. Kohhranah inkhawmna neih leh a ni bawk. He hunah hian District PYD hruaitute hian thusawi rawngbawlna an inneih chhawk thin a, Sis. Lalruatpuii’n zaia rawngbawlna a nei bawk.
Kum 2025 hian North Vanlaiphai Bial te hian District PYD Conference an thlen dawn avangin District PYD Conference Organising Committee te nen inkawmna hun an hmang bawk a, ruahmanna te siam hovin hlim takin hun an hmang a ni.
———-
Hruaitute Programme
Rev.R.Laltlankima, District Superintendent chuan June 21, Zirtawp zan atanga Pathianni zan thleng hian Lawipu Kohhran, North Mizoram District-a Revival Crusade neihah Speaker-ah tangin rawngbawlna a nei mek a ni.
Rev.VL.Hnemtluanga, District Treasurer chuan Kohhran thil tul pawimawh tiin Kawlkulh hmunah hun a hmang a, Bial Pastor Quarters sawn dan tur ruahmanna a enpui nghal a ni.
———-
———-
NORTH MIZORAM DISTRICT
HRUAITUTE PROGRAMME
Dist. Supdt. Rev. K. Lalduhsanga chuan June ni 20 Ningani khan, Vairengte Bial, Vairengte Sate venga kohhran Biak in sak mek Foundation khuarel chhiatna avanga min chu a hmunah enin hmalak zel dan tur an ngaihtuah ang.
District Secretary Rev. C. Lalthantluanga chuan June ni 19 Nilaini khan NEI UPC Literature hmalaknaa kumin 2024-a beihrual THupui bu zirtur an buatsaihah Editing board a nih angin edit hna thawkin hun a hmang.
Dist. Secretary Rev. C. Lalthantluanga leh Rev. C. Lalmuanpuia Dist. Treasurer te chuan June ni 20 Ningani khan North Mizoram District Literature buatsaih Kum 2025 a zirtur Nilai Thupui endiknaah telin hun an hmanpui bawk.
———-
N MIZORAM DISTRICT PYD CHOIR MEMBER LA LUT :
UPC-NEI, North Mizoram District PYD Music Committee chuan Kum 2024-2026 chhunga North Mizoram District Choir member tur te, lawmluhna hun an hmang.
Choir member te lakluhna hun hi June Ni 9 Pathianni chawhnu dar 1:30 khan Chaltlang Biak Inah hman niin, District PYD Music Committee chairman Evan. K Rotluanga, inkhawm kaihruai a, T Upa C Lalthazuala, comt. member, District Music Comt. in hunserh a hmang. Evan. Lalmuanawma, Dist. Music Committee Secretary leh Choir Conductor ni bawk chuan Zaipawlte rawngbawlna report pein; Zaipawl member mi 22 te NMD Supdt Rev. K Lalduhsanga’n Lal Isua hmingin a lalut a, Rev. K. Lalduhsanga hian ‘member thar te chu Zaipawl rawngbawlna kaltlanga Pathian thu taka thanglian zel tur te; rawngbawlna kawngah rim taka thawk tur te; Zai rawngbawlna bakah kohhran leh chhungte tana mi tangkai ni tur tein member thar te a fuih a ni.
NMD PYD President Rev. B Vanlalruata’n thuchah sawi bawkin fakna thiltihtheihna hmangin kalkhawm te leh zaipawl member thar te hnenah thuchah tha tak sawiin District PYD choir te chu Pentecost zaipawl an nih hre reng turin a chah bawk.
He inkhawmah hian Chaltlang bial PYD zaipawl ten fak hla remin, Sis. Lalhmingmawii, Zonuam leh Bro. C Malsawmtluanga, Nursery ten fakhla an sa bawk
Member thar lawmluh rual hian Zaipawl term hmang zova chawl tawh tur mi 6 te thlahna hun hman nghal a ni a, T Upa Albert C Lalfakawma, Treasurer, District Music comt. in he hun hi kaihruaiin chawl turte hnenah rawngbawlna kawnga an tha leh zung, sum leh pai an senralna zawng zawngah lawmthu sawiin Pathian malsawm tlaka rawngbawl zui zel turin a chah bawk
Zaipawl member lawmluh te hi hmeichhia 15 leh mipa 14 niin an vain mi 29 an ni a, hetiang hi bial tin aiawh dan a ni :
Chawlhhmun bial – 3
Chaltlang bial – 2
Dinthar bial – 5
Durtlang bial – 1
Headquarters bial – 3
Hunthar bial – 5
Maubawk bial – 3
Sihphir bial – 3
Tlangnuam bial – 4
———-
NORTH MIZORAM DISTRICT PYD TEN DISTRICT OFFICE SUPERINTENT ROOM-A DAH TURIN AIR CONDITION PE:
UPC (NEI) North Mizoram District PYD te chuan June ni 20 Ningani khan District Supdt. Room-a dah turin AC tha tak an pe.
Thilpek hi District PYD President Rev. B.Vanlalruata’n hlanin District Supdt. Rev. K. Lalduhsanga kohhran tul pawimawha a chhuahlai a nih avangin Rev. C. Lalthantluanga, District Secretary leh Rev. C. Lalmuanpuia District Tresurer ten District aiawhin lawm takin an lo dawng a ni.
Dist. Supdt. room-ah hian District PYD term hmasa hruaituten AC hi an lo dah tawh a, AC an lo dah tawh hi District PYD & LAD Room-ah sawn a ni dawn thung a ni.
———-
NILAI THUPUI EDIT HNA THAWK CHHUNZAWM ZEL:
North Mizoram District Literature & Publication Board member te chuan June ni 20 Ningani nileng khan North Mizoram District ten kum 2025 a an zir tur Nilai THupui Edit hna a thawh thumna an thawk, Edit hna hi Rev. C. Lalthantluanga, Dist. Secy in kaihruaiin, he mi ni hian zawh an tum editing hna hi zawh an beisei a ni.
———-
MITHAR NEWS:
Sailut One kohhranah mithar lawmlut:
June ni 9, 2024 Pathianni zan khan Sailut-1 Kohhran-a rawngbawltu Missionary Evan. R. Lalremruata chuan a rawngbawlna kaltlangin mithar 1 kohhranah a seng lut. He mithar hi Evan. R. Lalremruata vekin Lalpa Isua hmingin UPC of NEI kohhrana lawi turin a lawmlut a ni. (Sailut One)
Bawngva Missions Field leh Vawngawnzo-ah Mithar:
June ni 16 Pathianni khan Mamit Bial chhunga Missions Field pahnihah Member thar 4 lawmluh an ni. Heng mithar te hi Bawngvaah member 3 lawmluh niin Vawngawnzoah mithar 1 lut te an ni a, rawngbawla awm Missionary ten Lalpa Isua hmingin an lawmlut a ni. (Bawngva mithar)
Masada Revival Team Rawngbawlna kaltlanga Mithar lawmlut:
June ni 15 Pathianni khan Vairengte Bial IOC Kohhran a lawi turin chhungkaw hnih (member pathum ve ve) mithar 6 Bialtu Pastor Rev. Lalpianthanga’n a lawmlut. IOC Local ah hian bial huap revival crusade June ni 5-9 chhung khan neih niin; rawngbawltu atan Evan. H. Lalramhluna (Masada Revival Team) hman an ni a. Bial huap revival crusade zawh hnu hian IOC Local chuan Masada Revival Team te ruai chhunzawmin kar khat dang June ni 10-16 thleng IOC Local ah rawngbawlna an chhunzawm. Masada Revival team rawngbawlna atangin June 15 khan mithar paruk (6) lawmluh an nih mai bakah June ni 16 Patnhianni khan IOC Local Chairman Evan. Lalfâla, Vairengte Bial Treasurer te chhungkua in Pathian hnena lawmthusawi chawimawina an nei bawk a ni.
———-
THLANGNUAM BIALAH THIANGHLIMNA CAMPAIGN NEI:
Tlangnuam Bial Thianghlimna Committee te chuan Campaign thawhkhatna atan June Ni 10 Thawhtan zan khan Tlangnuam Bial chhung kohhran paruk (6) ah fehchhuakin PYD inkhawm zanah Campaign an nei a, LAD te pualin June ni 18 thawhleh Zan khan fehchhuak lehin Bial chhung kohhran 6-ah vek fehchhuak lehin Thianghlimna campaign hi an hmang leh a ni. Hun remchang hmasaah kohhran pumhuapin Campaign hi an nei leh dawn a ni.
Tlangnuam Bial Thianghlimna committee te hian Campaign hi Kohhran pakhatah vawikhat kala tlingtla mai lovin Department anga tlawh turin ruahmanna an siam a, Local pakhat zelah kum khat chhungin vawi 3 Committee hmalaknain tlawh thin a ni ang.
Campain neia fehchhuakte hian zuk leh hmuam bansan tura thutiam neite hming ziahna tur lehkha kengin, kohhran hrang hrangah hetianga ke pen tum hming ziakte pawh hmuh tur an awm a ni.
Tlangnuam Bial chhungah hian Kohhran paruk heng1) Tlangnuam Kohhran 2) Saikhamakawn Kohhran 3) Hlimen Kohhran 4) Samtlang kohhran 5) N. Lungleng Kohhran leh 6) Lungleng One kohhran te an awm a, heng kohhranah te hian Campaign thawh 2-na an neih theuh tawh a ni.
———-
HEADQUARTERS BIAL MISSION DEPT TEN KOHHRAN TLAWH CHHUAH THAWH 4 NA AN HMANG:
June ni 9 Pathianni zan khan Hqrs Bial Missions Dept te chuan Mission Vengthlang kohhran tlawhin Bial chhunga kohhran tlawh thawh 4 na an hmang a, Target intuakpui fehchhuahah Mission Vengthlang pual hian Rs 12000 chuang an thawk chhuak.
Bial Mission Dept ten Vengthlang kohhran tlawha an hun hman hi Mission Vengthlang Local Director Upa R. Rothangpuian kaihruaiin, Bialtu Pastor Rev. Lalremtluangan Pathian thuchah a sawi a, Kohhranhote Pathian hnen thlen theih na turin Thlarau lam chaw kan mamawh fo tiin, chanchin tha hrila inthlahdah lova rawngbawl zel tur kan nih dan a sawi.
Inkhawm banah Msvt Hall ah thingpui in hovin, Msvt Local Missions dept ten sumtuakna tura fehchhuah thil lìĺám an lo buatsaih chu suma chantirin Rs 12000 chuang lai Bial hian sum a tuakpui a, Mission vengthlang Mission Dept hruaitute an lawm hle. July thlaah local tlawhchhuah kharna neiin Headquarters local ah hmáwr an bawk dawn a ni.
———-
KAWNPUI BIAL LOCAL INKANTAWN NEI:
Kawnpui Bial chhunga Kohhran hrang hrang te chuan June ni Ni 8 – 9, 2024 hmang khan an Bial Conference in a lo rel tawh bawhzuiin Inkantawn runpui thawh khatna an hmang a. Kohhran inkantawn tur hetiang hian an ruahman a ni
1. Headquarter Local-in Kawnpui Chhimveng Local
2. Bualpui ‘N’ Hmarveng Local-in Hortoki Local
3. Khamrang Local-in Kawnpui Kanan PP
4. Kawnpui Banglaveng Local-in Bualpui ‘N’ Venglai Local
Inkantawn thawh hnihna hi Jun Ni 29 – 30, 2024 a neih leh tur a ni ang a; thawh khatnaa fehchhuakte hi a thlengtu-ah an ṭang ve thung ang. Inkantawn programme hi hun engemaw chen aṭang khan kawnpui Bialte hian an lo kalpui tawh thin a ni.
———-
WORK CAMP IN FEH CHHUAK:
June ni 20 Ningani khan North Mizoram District, Hqrs. Kohhran Mission Dept te chuan West Phaileng Biala awm, Pukzing veng thar kohhran Biak in workcamp-a Electrict Wiring ti turin an fehchhuak, workcamp-a fehchhuak te hi mi panga niin; Hqrst Bial Mission Director Evan Challianan a ho thei a ni.
Fehchhuakte hi Hqrs. Kohhran Mission Dept Asst Director T Upa Aldrin Lalngaihawnan a motor thawhah kalin, Pukzing thleng an kal anga, Pukzing atangin pickup hmangin Pukzing veng thar hi an pan leh dawn a ni.
———-
PATHIAN CHAWIMAWINA HUN HMANG:
Chaltlang Bial Chanmari West Kohhranah Pathian hnathawh thlengin Pathian chawimawina June thla chhungin tum 3 neih a ni.
Pathian Chawimawina tumkhatna hi June ni 7-9 khan Upa Vanlalhriata te chhung kal tlanga neih niin; Bialtu Pastor Rev. P. Vanlalfela’n rawngbawl hna a thawk a, June ni 7 Zirtawp zan atangin chawimawi Programme hi an tan a ni. A tum hnihna atan June ni 14-17 chhung khan nei lehin Bro. K. Malsawma te chhung kaltlangin chawimawina hi neih a ni a, hetah hian Evan. T.Vanlalruata rawngbawltu atan hmangin thlarau boruak kal zelah June ni 19-23 hmang hian Pathian chawimawi tum 3-na atan hun hman leh tur a ni ang, Pathian chawimawina tum 3-na hi Sist. Lalzawmliani te chhung kaltlanga neih tur a ni dawn bawk a ni.
———-
KANHMUN KOHHRANTE THILPEK PE:
June ni 19 Nilaini khan Chanmari Missions Department te chuan Kanhmun Kohhran Bial in Ṭhuthleng siamna atan ₹20000 an pe.
Chanmari Missions Dept te hian an thilpek hi North Mizoram District Office kaltlanga pein, kalkawnga harsatna awm avangin G Pay-in Kohhran hruaitute kutah an hlan ani. Kanhmun Kohhrante hian thilpek hlu tak mai an dawn chungchangah Chanmari M/S dept chungah lawmthu an sawi.
———-
DINTHAR BIAL LAD TE PSM TAN THILPEK PE:
Dinthar Bial LAD te chuan 2024 Bial LAD Conference in a lo passed angin, North Mizoram District enkawlna hnuaia Pathian thu zirna Pentecostal Shool of Ministry a Pathian thu zir mek zirlai te tan June ni 12 Nilaini khan chawhmeh tha hnem tak an pe.
He thilpek hi Sakawrtuichhun Camping Centre-ah pein Dinthar Bial atangin i) Sis. F. Rohlupuii, BW President, 2) Sis. Vanlalhliri Fin Secy leh 3) Sis. B. Vanlalthlamuani Tuikual LAD Secretary ten a hmunah an hlan a, Heng thilpek te hi PSM aiawhin PSM Principal Rev. K. Lalduhsanga leh PSM Registrar Rev. C. Lalthantluanga ten lawm takin a lo dawng a ni.
———-
BUKPUI BIAL LAD TE PSM TAN FEHCHHUAK:
Bukpui Bial LAD te chuan Inrinni kal ta June ni 15 khan District Camping Centre-a Pathian thu zir Pentecostal School of Ministry naupang zirlaite pualin chawhmeh thahnem tak an pe.
PSM tana Bukpui Bial LAD te an fehchhuahna hi Bialtu Pastor Rev. R. Lalhmangaiha’n hovin, Bial LAD hruaitu pathum :- 1) Sist. Lalbuatsaihin, Bial LAD President Lungmuat, 2)Sist. C. Chhawkhleipari, Bial LAD Secy. N.Hlimen, 3)Sist. Lalchhandami, Bial LAD Treasurer, Thingthelh, 4) Sist. Thangzuali, Bukpui Local LAD Fin Secy. Te bakah 5)Upa C. Malsawmthanga, Bukpui Bial kohhranpui Secy. N. Hlimena awm leh6) T.Upa Zauva, Lungmuat ten an rawn tawiawm bawk a ni.
Bial LAD te chawhmeh rawn phurhchhoh nan hian Upa C. Malsawmthanga leh T.Upa Zauva ten an lirthei an rawn thawn a, Bukpui Bial LAD te pawh an lawm hle.
Thilpek hi North Mizoram District Secretary Rev. C. Lalthantluanga’n leh PSM zirlai naupangte’n lawm taka lo dawngin Bukpui Bial LAD te hian PSM Zirlai naupang tan hian vawksa kg 6 leh thlai Bag thahnem tak an pe bawk.
———-
HEADQUARTERS BIAL TEN RAWNGBAWLTU SEMINAR HLAWHTLING TAKIN AN NEI:
June ni 17, Thawhtanni khan UPC, NEI, North Mizoram District, Headquarters Bial chuan Bial Conf rorel bawhzuiin Bial chhung Rawngbawltu mi 70 ten Seminar hlawhtling tak an nei.
Seminar hi chawhma dar 11:00Am ah tanin, Bialtu Pastor Rev. Lalremtluangan a kaihruai a, Seminar hi Bial chhung Evangelist, Bible Women, Upa, Tual Upa, Bial Dept OB, Tualchhung Dept OB leh Tualchhunga Thuhriltu te puala buatsaih a ni.
Seminar ah hian Thupui pahnih zir a ni a, chawhma lamah Evan Lalchhuanmawia Sailo in Kohhrana Rawngbawltu Mawhphurhna zirtirin ani’n Chipchiar takin rawngbawltu mawhphurhna hrang hrang zirtirna a nei a ni.
Thupui pahnihna atan Upa C.Lalnunmawian Khawtlang nuna Rawngbawltu mawhphurhna tih zirtir lehin khawvel changkannain a ken tel Ruihhlo leh hursualna lam thil laka Kohhranhote kan inven a pawimawh thu te sawiin sawi hona hlawk tak neih a ni bawk.
———-
PREACHING POINT AṬANGIN LOCAL CHURCH-AH:
Kawnpui Bial rorelna-in local church-a hlankai tura a rel angin, June ni 16 Pathianni chawhma khan Kawnpui Kanan Preaching Point chu Rev. Lalruatkima Fanai, Bialtu Pastor chuan Kawnpui biala Kohhran 8 na turin Kohhran Puitling (Local Church) ah a hlangkai.
bialtu pastor chuan kohhran puitling nihphung leh kohhran puitling ni tura pawimawhte a tarlang a; kohhran kalphung dai pelh zawnga NGO leh khawtlang thila inhambuai lutuk lo tur leh kohhran enkawlna kawnga tih tak zeta ke pen turin kohhranhote a chah bawk. Bialtu pastor hi Bial Secretary Evan. PC Lalnunmawia leh Bial Treasurer Upa H Lalthlamuana ten an ṭawiawm a. Anni hnen aṭang hian thuchah ngaihthlak a ni bawk.
Bialtu pastor hian Kohhran Upa 3 ruat nghalin, ruat tharte :
Chairman – Upa ZK Pauva
Secretary – Upa Lalnghinglova
Treasurer – Upa Lalchungnunga
Upa ruat tharte hi hriak thih rawngbawlna a neihsak bakah ṭawiawmtu bial hruaitute nen ṭawngṭaisakna an nei bawk.
Kawnpui Kananah hian kum 2018 khan Kawnpui Bial PYD chuan tirhkoh ruaiin rawngbawlna bul a ṭan a. Bialpui leh bial department dangte nen ṭanghoa hun engemaw chen enkawl anih hnuah, District-ah thlen a ni. District hian Preaching Pointah dahin biak in hmunte a lei a, tirhkoh ruaiin hun engemaw chen a enkawl a ni.
Rawngbawlna bul ṭan anih aṭangin Tirhkoh 5 in an ṭhutchilh tawh a. Tun dinhmunah kohhran in 8-ah, member 34 kan nei mek a ni.
Facebook