GENERAL HRUAITUTE PROGRAMME:
General Secretary Rev. Lalmalsawma Sailo chu June ni 15 – 16, 2024 chhung hian, Ramhlun Vengthar Kohhran, Bawngkawn Bial ah rawngbawlna a nei ang.
General Treasurer Rev. R. Laichhingpuia chuan June ni 16, 2024 Pathianni zan hian Mualpui Kohhranah Thusawi rawngbawlna a nei ang.
General Missions Director Rev. C. Vanlalena chuan June ni 18, 2024 Thawhlehni hian Arunachal Mission Field tlawhin Field Board a neih pui ang.
———-
GENERAL SUNDAY SCHOOL DEPARTMENT :
June ni 13, Ningani khan General Sunday School hruaitute leh Series thara Sunday School Zirlaibu ziak tu tura ruat ten General Hqrs office-ah meeting an nei.
General Sunday School Board in a lo pass tawh angin kum 2026 atang hian UPC North East India huamchhunga Naupang Sunday School Department, Beginners atanga Doctrinal Department inkar ten Series thar an zir tawh dawn a, a hming atan Post Modern Series tih a ni. He Series thar atana zirlaibu ziaktur pawh General Sunday School Board chuan ruatin, zirlaibu kalphung tur a duang fel tawh a. Tun tum meeting-ah hian kum khatna ziaktu turte koh khawm niin zirlaibu kalphung tur leh a chhung thu in rem dan turte an thlir ho a ni. Post Modern Series kum khatna ziak tu tur te :
Doctrinal Kum 1-na : Rev. K. Vanlalhruaia, Lunglei
Senior Kum 1-na : Evan. R. Lalbiakfela, Aizawl
Intermediate Kum 1-na : Rev. Joseph L. Thlauhthang, Saiha
Junior Kum 1-na : Rev. Lalruatkima Fanai, Kawnpui
Primary Kum 1-na : Pastor K. Vanlalhlimpuia, Khawzawl
Beginners Kum 1-na : Rev. Jh. Za Hluna, Aizawl
Meeting hi General Director Rev. Biaksangazuala’n a kaihruai a, General Secretary Rev. Jh Zahluna chuan report leh kaihhruaina pharhin sawi fiahna a nei bawk.
———-
LITERATURE & PUBLICATION BOARD
June ni 12 Nilaini leh 14 Zirtawpni khan UPC North East India Literature & Publication Board chuan General Headquarters Committee Room, Mualpui Salem Veng, Aizawl ah Kum 2024 Beirual thupui zir tur Edit na an nei.
Literature & Publication Board Chairman Rev. Lalmalsawma Sailo kaihhruaiin Editting hi neih a ni a, kummin 2024 a UPC North East India Beihrual Thupui zir tur hi ” Thuawihna” tih niin Evan. Lalchhuanmawia Sailo ziak a ni.
———-
———-
LUNGLEI DISTRICT
CEC SCHOOL IN ZIRLAI TI THA TE LAWMPUINA HUN HMANG:
June ni 7, Zirtawpni chawhnu dar 1:45 khan Christian Education Centre (CEC) School chuan kumina Class X leh XII Result chhuak a zirlai ti tha te lawmpuina hun District UPC Conference Hall-ah an hmang.
He hun hi Principal P.Samson Vanlalfela chuan a kaihruai a, District Superintendent Rev.C.Lalrintluanga chuan hunserh hmangin C.Lalrosanga kaihhruainain zirlai ti tha te lawmpuina hun hman chhunzawm a ni a, Class X leh XII a letter hmu mi 10 te hnenah Rs.500 (Letter hmuhna Subject-ah) hlan a nih bakah Class XII pass thar zinga zirlai ti tha ber Esther PC Lalthlengliani hnenah Zakamlova Award hlan a ni a, Rev. CS Pachhunga Award chu Pricilla Ramdinsangi, Class X pass thar zinga ti tha ber hnenah hlan a ni bawk. Tin, Chalthantluangi leh Lalrinpuia te Award (Distinction-a pass te pek thin) chu Pricilla Ramdinsangi hnenah hlan a ni. Hei bakah hian Pass tharte lawmpuina thilpek hlan vek an ni.
Zirtirtute aiawhin Lalramhmuaka chuan fuihna thu a sawi a, Class X leh XII-a hlawhtlinna chang te aiawhin R.Lalchhanchhuaha leh Vanlalhriata ten lawmthu an sawi bawk.
He hun hi Rev.CS Pachhunga chuan tawngtainain a titawp a ni.
———-
LITERATURE AND PUBLICATION BOARD AN THUKHAWM:
June ni 10, Thawhtanni khan District Superintendent Room-ah Lunglei District Literature and Publication Board chu an chairman Evan.F.Lalhmangaiha kaihhruainain an thukhawm a, an thurel pawimawh zualte:
1.Nakkum 2025-a PCD Zirlaibu tur chu District PCD atangin publish sak turin an rawn dil a, an dil ang hian publish sak nise tha tih a ni. Nakkum a PCD zirlaibu tur hi a lian hi Rev.Ralkapkunga Khiangte ziah a ni a, a te hi Evan.R.Ropianga ziah a ni.
2.Nakkum 2025 ah hian UPC Lunglei District Conference Diamond Jubilee lawmna neih tur a ni a, hetah hian Souvenir buatsaih chu Literature and Publication Board te kutah dah anih angin hmalak nise tha tih a ni a, Editorial Board indin nise tha tih a ni a, heng mite hi hruaitu atan ruat an ni.
-Editor : Evan.Lalringzuala Pachuau
-Asst Editor : Rbt.C.Lalramluahpuia, Rbt.K.Lalrintluanga
3. Literature Board chu Literature and Publication Board tia thlak anih tak avangin Logo siam thar nise tha tih a ni a, hmala turin OB te ruat an ni a, Committee leh hmasa berah en ho atan dah a ni.
———-
———-
AIZAWL EAST DISTRICT
Literature & Publication Board thutkhawm neih a ni:
June 3, Thawhtan zan khan District Superintendent room-ah District Literature & Publication Board thutkhawm, Rev.H. Lalropuia, Chairman kaihhruaiin neih a ni. He hunah hian member an telkim thei a ni. Thu pawimawh tak tak ngaihtuah niin an thu passed langsar zualte:
1. Literature and Publication Board Meeting hmasain “Rev KVL Hmangaihkima kam chhuak’ May 5, 2024 ah release nise a tih, a lehkhabu siam zawh hman a nih loh avanga release theih takloh chu, release hun tur ngaihtuah a ni a, District LAD Conference ah release tum ni se, District LAD hruaitute pawh release-na hun siam sak tura dil nise tih a ni.
2. Pastor Hmingchungnunga Ralte lehkhabu ziak ‘Thuthlung hlui rawngbawltu nge i nih, Thuthlung thar rawngbawltu’ tih siam zawh tawh chu a rang lama zawrh chhuah a nih theihnan Rev R Laltlankima, District Superintendent chuan release-in Pathian hnenha hlanna nei nghal mai se tih niin Committee neih hun chhungah hian release na leh Pathian hnena hlanna hun hman nghal a ni.
3. Evan Rohmingliana lehkhabu ziak “Baptisma chungchang” tih Literature and Publication Board
Meeting hmasa in copy 500 (zanga) chhut tir ni se ti a alo rel tawh chu a rang lama bawhzui nghal ni se tih a ni bawk.
4. Kum 2025 Nilai zan thupui zir tur ngaihtuah niin “Zirtirna dik” chungchang zir ni se, hetiang hian thupui hi thensawm nghal niin a ziaktu tur pawh thlan nghal a ni:
(1) Pathian pakhat chungchang – Pastor Mangthangvunga
(2) Thlarau Thianghlim leh a hnathawh – Rev Rosanga Kawlni
(3) Chhandamna thu – Pastor J Lalhmingsanga
(4) Kohhran chungchang – Rev H Lalropuia
(5) Lalpa Isua Krista lokal lehna – Rev C Lalengliana
(6) Mitthi thawhlehna – Rev E Vanlalpeka Zote
Thupui ziaktu tura beisei te hian September, 2024 ral hmain Literature and Publication Board ah thehlut se tih a ni bawk.
———-
Live Crusade neih mek a ni:
Kumin District Conference in Aizawl East District chhunga District Capital tinah Crusade lian tham tak buatsaih ni se a tih angin June 12, Nilai zan atang khan Champhai Bethel Hqrs. Biakinah Live Crusade neih mek a ni a, Speaker-ah Rev. KVL. Hmangaihkima leh Rev. VL. Hnemtluanga, District Treasurer te chu hman a ni. He Live Crusade hi Champhai-a Cable pahnih CCN & LCN-ah te Live-a pek chhuah thin a ni.
Live Crusade hi hetiang hian District Capital-ah neih tura ruahmanna siam a ni:
July thlaah Serchhip District
August thlaah Saitual District
September thlaah Khawzawl District
October thlaah Aizawl District
———-
Biakin sakna tur lungphum phum:
June 10, Thawhtanni zingkar khan Khawruhlian Biakin sak thatna tur atan lungphum phumna, Rev. VL. Hnemtluanga, District Treasurer chuan a nei. He hunah hian Bialtu Pastor H. Lalbiakzauva bakah Kohhran member an kal tha hle a ni. Biakin hi a dung ft 46 leh a vang ft 26-a liana sak tura ruahman niin a sakna tur hian Building Committee te hmalakna in chhungtin hnenah thawhlawm khawn thin a ni. Khawruhlian Kohhranah hian tunah hian Kohhran member za chuang awm mekin Biakin sak hna hi kar thar lam atanga tan thei tura ruahmanna siam a ni.
———-
Seminar hlawhtling taka neih a ni:
June 8, Inrinni khan Rev. H. Lalropuia, District Secretary resource person-a hmangin E. Lungdar Bial, Leng Kohhran Seminar hlawhtling taka neih a ni. Thupui-ah “Leadership” tih hman a ni. He hun hi Bialtu Pastor V. Kamneihthanga chuan kaihruaiin Bial chhung atangin rawngbawltu engemaw zat an tel thei a, hlawhthlak an ti hle a ni. Rev. H. Lalropuia hian Pathianni thleng khan E. Lungdar Bial-ah hian rawngbawlna a nei a ni.
———-
Crusade hlawhtling takin nei:
May 15, Nilai zan atanga June 9, Pathianni thleng khan Serchhip Bial, Chanmari Kohhran leh New Serchhip-ah Revival Crusade neih niin Kohhran ten hlim takin hun an hmang.
Chanmari Kohhranah hian Speaker ah Bro H. Vanlalhruaia, District Missions Evangelist chu hman a ni a, New Serchhip Kohhranah hian Khawzawl bialtu Pastor K. Vanlalhlimpuia chu hman a ni a bawk. Crusade neih chhung hian Pathian chawimawina vawi 4 ve ve awmin sual ngaihdamna baptisma chang mi 4 ve ve an awm bawk a ni. Crusade neihna hmunah rawngbawltute Pathianin a hmang hle mai a, Bial chhunga kohhran hoten Thlarau lamah malsawmna tamtak an dawng a ni.
———-
Mi thar:
Mualpui Bial, Mualpui Kohhranah June 9, Pathianni khan Member 4, Chhungkaw khat chu Kohhranah sengluh an ni. Member thar te hi Upa Vanlalhmuaka’n sengluhna neiin Rev R Laichhingpuia’n nau a hlan bawk.
Thingsulthliah Bial Mualmamah pawh Pathianni khan Chhungkaw khat, Member 3 te chu Evan. Rualthankhuma, Bial Secretary chuan sengluhna a nei bawk.
———-
Hruaitute Programme:
Rev R. Laltlankima, District Superintendent chuan Pathianni hmang hian Serchhip hmuna District in Live Crusade July thlaa a buatsaih tur ruahmanna enpuiin hun a hmang a, rawngbawlna a nei nghal bawk a ni.
Rev H. Lalropuia, District Secretary chuan Kohhran ram hrang hrang teh felin hun a hmang chho leh mek a, Pathianni hian Khawlian hmunah hun hmangin rawngbawlna a nei ang.
Rev. VL. Hnemtluanga, District Treasurer chuan Champhai hmuna Live Crusade neih mekah Speaker pakhatah tangin rawngbawlna an nei mek a ni.
Rev. C. Lalmalsawma, District Missions Director chuan Pathianni hmang hian Kawlkulh Bial, Vanchengpui-ah rawngbawlna neiin hun a hmang ang.
District PYD OB te chuan Kum 2025-a District PYD Conference thlengtu tur N. Vanlaiphai Bial te tlawhin District PYD Conference an thlenna turah tul leh pawimawh ruahmanna neiin hun an hmang a ni.
———-
———-
NORTH MIZORAM DISTRICT
DISTRICT HRUAITUTE PROGRAMME
District hruaitu pathum Rev. K. Lalduhsanga, Dist. Supt, Rev. C. Lalthantluanga, Dist. Secretary te chuan Pentecost School of Ministry-a Bible zirna an kalpui mekah Class lain zirtirna an pe. Rev. C. Lalmuanpuia, Dist. Treasurer chuan PSM-a a subject zawhpui tawhin mimal thilah inchekup in Shillongah June ni 11 (Thawhlehni) khan a zin.
———-
N MIZORAM DISTRICT PYD CHOIR MEMBER LA LUT :
Ni 9.6.2024 ( Pathianni) chawhnu dar 1:30 khan Chaltlang Biak Inah kum 2024-2026 chhunga N Mizoram District PYD Choir member turte lakluhna hun hman a ni. He hun Evan. K Rotluanga, Chairman, District PYD Music Comt. in a kaihruai a, T Upa C Lalthazuala, comt. member, District Music Comt. in hunserh a hmang a, Evan. Lalmuanawma, Secretary/ Conductor hnen atangin report leh member te hriattur pawimawh te ngaihthlak zui a ni. Zaipawl member te hi Rev. K Lalduhsanga, Superintendent, N Mizoram District-in Lal Isua hmingin a lalut a, Zaipawl rawngbawlna kaltlanga Pathian thu taka thanglian tur te; rawngbawlna kawngah rim taka thawk tur te; Zaipawl rawngbawlnaa inhman rualin chhungte tana tangkai tur tein member thar te a fuih a ni.
Rev. B Vanlalruata, President, N Mizoram District chuan fakna thiltihtheihna hmangin kalkhawm te leh zaipawl member thar te hnenah thuchah tha tak a sawi a, District PYD choir te chu Pentecost zaipawl an nih thu hre reng turin a chah bawk.
Chaltlang bial PYD zaipawl ten thiam takin fakna hla an sa a, Sis. Lalhmingmawii, Zonuam leh Bro. C Malsawmtluanga, Nursery te hnen atangin zai mawi tak ngaihthlak a ni bawk.
Member thar lawmluh rual hian chawl tawh tur mi 6 te thlahna hun hman nghal a ni a, T Upa Albert C Lalfakawma, Treasurer, District Music comt. in he hun hi kaihruaiin chawl turte hnenah rawngbawlna kawnga an tha leh zung, sum leh pai an senralna zawng zawngah lawmthu sawiin Lalpa malsawmna an dawn zui ngei a duhsak thu a sawi a, rawngbawlna thuk zawk nei zel turin a thlah zui a ni.
Zaipawl member lawmluh te hi hmeichhia 15 leh mipa 14 niin hetiang hi bial tin aiawh dan a ni :
Chawlhhmun bial – 3
Chaltlang bial – 2
Dinthar bial – 5
Durtlang bial – 1
Headquarters bial – 3
Hunthar bial – 5
Maubawk bial – 3
Sihphir bial – 3
Tlangnuam bial – 4
———-
THIANGHLIMNA CAMPAIGN NEIH A NI:
Ni 10 June 2024 (Thawhtanni) zan ah Tlangnuam Bial Thianghlimna Committee rorel bawhzuiin bial chhunga tualchhung hrang hrang PYD inkhawmah Thianghlimna campaign neih a ni a, hetiang hian hun hman a ni :
Tlangnuam – Rev. Vanlalruata, Bialtu Pastor
Saikhamakawn – Evan. Lalmuanawma
Hlimen – Evan. Vanlalpeka
Samtlang – Upa Lalrinmawia
N. Lungleng – T Upa Lalhmachhuana
Lungleng I – Evan. C Lalramngaihzuala
Bial Thianghlimna Committee in ruahmanna a siam angin, Bial Thianghlimna Committee member te leh tualchhung Thianghlimna Committee member te kalna tur hmun in sem darhin, rawngbawltute hi an tawiawm a ni.
———-
HEADQUARTERS BIAL MISSION CONFE ROREL BAWHZUIIN BIAL MISSIONS DEPT TEN KOHHRAN TLAWH CHHUAH THAWH 4 NA AN HMANG:
June ni 6 Pathianni zan khan Hqrs Bial Missions Dept te chuan Mission Vengthlang kohhran tlawhin Bial chhunga kohhran tlawh thawh 4 na an hmang a, Target intuakpuina an neihah Mission Vengthlang pual hian Rs 12000 chuang an thawk chhuak.
Bial Mission Dept te Bial huapa Mission Vengthlang kohhran tlawha an inkhawmah hian Msvt Local Director Upa R. Rothangpuian a kaihruai a, Sist. Lalrinsangi khatla S MSD Secy. In tanna hun hmangin, Sist. Ramthanzuali Tuikual ‘S’ in fak hla a sa a, Bialtu Pastor Rev. Lalremtluangan Pathian thuchah a sawi a, Kohhranhote hian Van kanan kan thlen theih nan Thlarau lam chaw kan mamawh thu sawiin, chanchin tha hrila inthlahdah lova rawngbawl zel tur kan nih dan ngaihnawm takin a sawi.
Inkhawm banah Msvt Hall ah thingpui inhona neiin hemi rual hian Msvt Local Missions dept ten sumtuakna tura fehchhuah thil lìĺám tur an lo buatsaih chu suma chantirin Rs 12000 chuang lai Bial hian sum a tuakpui a, Mission vengthlang MSD hruaitute hian thahnem ngaihpuitu te chungah thinlung takin lawmthu an sawi bawk a ni.
July thlaah local tlawhchhuah kharna neiin Headquarters local ah hmáwr an bawk dawn a ni.
———-
LOCAL INKANTAWN NEI:
Bial Inkhawmpui rorel angin, Kawnpui Bial chhunga local hrang hrangten Ni 8 – 9 June, 2024 hian Inkantawn runpui thawh khatna an hmang dawn a. Inkantawn tur local hetiang hian ruahman a ni.
1. Headquarter Local-in Kawnpui Chhimveng Local
2. Bualpui ‘N’ Hmarveng Local-in Hortoki Local
3. Khamrang Local-in Kawnpui Kanan PP
4. Kawnpui Banglaveng Local-in Bualpui ‘N’ Venglai Local
Inkantawn thawh hnihna hi Ni 29 – 30 June, 2024 ah neih leh a ni ang a; thawh khatnaa fehchhuakte hi a thlengtu-ah an ṭang ve thung ang. Inkantawn programme hi hun engemaw chen aṭang khan kalpui tawh ṭhin a ni a. Bial chhung kohhran hoten zawngchhang tlak an ti hle niin a lang.
———-
TLANGNUAM BIAL LAD TEN SIHTHIANG TLAWH :
June ni 1-2 hmang khanTlangnuam Bial LAD te chuan Sihthiang home m/ f tlawh in hun min rawn hman puia Bial hruaitu pa3 te leh Bial tu Pastor lo kal in kohhran te nen hun hlimawm tak hman ho ania kohhran pawn an rawngbawlna kan hlawk pui viau mai.
Kut ruak maia lo kal lo in Quarter adah tur kan mamawh em2 mai filter tha tawk leh thawmhnaw tam tawk semtur min pea. Tlangnuam Bial LAD te chungah lawmthu kan sawi mawlh2 e
An rawngbawlna Lalpan malsawm zel tawhse
———-
2024 PG HIGHER SECONDARY SCHOOL ANNUAL SPORT TLUANG TAKIN NEIH A NI:
PG Higher Secondary School, Annual Sport 2024 chu June 10, 2024(Monday) ah tanin June 13, 2024(Thursday) ah tluang takin an zofel thei a ni.
Monday zing dar 9 : 30Am ah Tlangnuam Field ah Principal Evan JH Malsawmdawngliana’n thutawi a sawi hnuah tawngtainain Sport hi Pathian hnenah a hlan a ni.
House thum, Red House, Blue House leh Yellow House ah then an niin, House hrang hrang ten inelna hrang hrang an nei a ni
Hetiang hi Sport hman dan tlangpui a ni:-
– 10 – 11.06.2024 – Tlangnuam Field – Football(Boys & Girls), Valley Ball (Boys & Girls) /, Race (100, 200, 400, Relay & Bamboo), Throwing events (Discuss, Javelin), Tug of War, High & Long Jump ah te inelna hlim takin an nei a ni
– 12.06.2024 – Tlangnuam Futsal Ground ah nilengin Boys & Girls bakah a te zual Team No II te nen lam House tin te inelna hlim takin an nei a ni
– 13.06.2024 – Thakthing Zawlbuk Hall – ah Boys & Girls (Debate, Extempore Speech, Quize, Solo, Group singing, Group Dance, Arm Wrestling) hmangin hlim takin inelna neih a ni.
Result khaikhawmna :-
1. Pakhatna – Blue House (Gold medal 12 an la a ni)
2. Pahnihna – Yellow House (Gold medal 11 an la a ni)
3. Pathumna – Red House (Gold medal 8 an la a ni)
– Khamlo takin June 13, 2024 Thursday dar 3 Pm ah PG Higher Secondary School Annual Sport hi Principal in tawngtaina in a khar a ni.
Facebook