GENERAL HRUAITUTE PROGRAMME:
General Treasurer Rev. Lalmalsawma Sailo chuan April ni 4 khan Dinthar Bial-ah Seminar neiin Church Administration chung chang a zirtir, April ni 6 Lungngaih zan ah Salem Kohhran ah Sacrament semin rawngbawlna a nei a, Good friday ni chhun Inkhawm ah Mualpui kohhran ah thusawiin zan ah Tuikual N Kohhranah rawngbawlna a nei bawk. April ni 9 Easter Sunday chhun ah ITI Kohhran ah hun hmangin zan ah Dinthar Kohhran ah hun a hmang bawk ang.
General Sunday School Director, Rev. Biaksangzuala chuan July ni 8 leh ni 9 hian Barak District Sunday School Board, Hmarkhawlian a neih a hman pui ang.
———-
LITERATURE & PUBLICATION BOARD
June ni 27 Thawhleh ni khan UPC North East India Literature & Publication Board chuan General Headquarters Committee Room, Mualpui Salem Veng, Aizawl ah thu khawmin Kum 2023 Beirual thupui zir tur ” Ramthim rawngbawlna” tih Rev. K. Satinvela a ziak chu Edit na an nei.
———-
GENERAL SUNDAY SCHOOL EDITTING BOARD
June ni 23 Zirtawp ni khan UPC North East India Sunday School Editting Board chu General Headquarters Committee Room, Mualpui Salem Veng, Aizawl ah thu khawm in Kum 2024 North East India UPC Puitling Sunday school zir tur ” Thuhriltu leh Hla thlankhawmte” tih Rev. K. Malsawmtluanga ziak chu Edit na an nei.
———-
———-
AIZAWL EAST DISTRICT
OTS Graduation Day hman a ni:
July 2, Pathianni chawhnu dar 1 khan Armed Veng South Biakinah Aizawl East District in Pathian thu zirna a neih, OTS chuan Graduation Day an hmang.
Rev KVL. Hmangaihkima, TEB Chairman chuan inkhawm kaihruaiin Rev C. Lalmalsawma, Bazar Bialtu Pastor chuan hunserh a hmang a ni. Result puanna, Pastor Laltlanhlua Hnamte,TEB Secretary chuan neiin Graduate Confering & Certificate hlanna, Rev Lalmalsawma Sailo, General Treasurer chuan a nei a, thuchah a sawi nghal bawk a ni. He hunah hian District Department hrang hrang atangin thusawi tawi ngaihthlak ni bawkin Graduate te hnenah thilpek hlanna a nei bawk a ni. Zirtirtu aiawhin Rev VL. Hnemtluanga, District Missions Director chuan thusawina a nei a, zirlai aiawhin Evan F. Malsawmdawngliana’n thusawina a nei bawk. OTS Graduation Day-ah hian Sis Emmanuel Ramngaihzuali leh Sis. Angeli Lalruatpuii ten fak hla sa in, Rev H. Lalropuia, Treasurer, TEB in thilpek hlanna kaihruaiin lawmthu a sawi bawk a ni. Rev R. Laltlankima, District Secretary chuan malsawm tawngtaiin he hun hi a titawp a ni.
Kumin 2023-ah hian OTS-ah zirlai 30 awmin heng zinga mi 8 te hian pass chhuakin Certificate in Theology (CTh.) hlan an ni.
———-
District PYD Board:
June 30, Zirtawpni khan Aizawl East District PYD chuan kum chanve Board, District Committee room-ah an nei. He hun hi Rev. C. Lalmalsawma, President chuan kaihruaiin Rev KVL. Hmangaihkima, District Superintendent hnen atangin fuihna thu ngaihthlak a ni a, tawngtaina a hmang nghal bawk a ni. Aizawl East District PYD Board-ah hian Bial atangin palai an kal thain District Kohhranpui hruaitute leh General PYD President, Rev. C. Lalthanltuanga ten an telpui bawk a ni. An thu passed langsar zualte:
1. Kumin 2023 chhung hian Live Crusade neih ni se tih niin a neih dan tur leh a hmun leh hun chungchang chu Executive Meeting in lo ngaihtuah se tih a ni.
2. Kohhran in hma a sawn zawk theih nan Zokhawrthar PYD ram chu Kohhranpui enkawl tura hlan ni se tih a ni a, a hlan dan tur leh tul dang chu OB ten lo buaipui se tih a ni.
3. Ngur rama PYD hmun chu tha taka humhalh nise, District OB ten hmalak dan tur lo ruahman se tih a ni.
4. Music and Sound Committee tih chu Sound system enkawl tel tur a awm tawh loh avangin Music and Choir Committee tia thlak a ni.
5. Aizawl East District PYD te’n kum 2023 chhung hian thupui neiin, vawikhat tal a ruala chawnghei tawngtai neih nise tih a ni a, a hun leh ruahmanna dang chu hruaitute kutah dah a ni. Thupui turte:
1. Burma leh Manipur ram buai tan
2. Mizoram inthlanpui lo awm turah hruaitu tha tak kan neih theih nan leh inthlan fel fai
leh thianghlim tak kan neih theih nan.
3. Thalai ruihhlo ngaite tan.
6. District PYD Archeive committee din tha tih niin hetiang hian hruaitu tur pawh ruat nghal an ni.
Chairman: Evan. Lawmsangkima, Asst. Secretary, District PYD
Secretary: Bro. HK. Lalneihsanga, Bawngkawn Bial
Treasurer: Bro. MS Dawngzuala, Bazar Bial
7. Thalai enkawl ngaite enkawlna tur hmun Mualpuia Kohhran ramah District Kohhranpuiin In sak a phal sak angin, a sak dan tur chungchang ngaihtuah a ni a, OB te’n ruahmana lo siam se, kum tawp board ah enho leh nise tih a ni.
———-
District LAD Board:
June 29, Ningani khan Sis. Zionparmawii, District LAD President kaihhruaiin District Board tluang taka neih a ni. He hunah hian Board member an kal tha in District Kohhranpui hruaitute leh General LAD President in an telpui bawk a ni. An thu passed langsar zualte:
1. District LAD Board hun nghet nei ve tura tih niin June chawlhkar tawp ber Zirtawpni ni se tih a ni.
2. Tailoring Centre kalpui mek chu kumin September hian shift khatna a tawp dawn tak avangin October thla atangin Shift hnihna chhunzawm leh nghal ni se tih a ni. Hemi atan hian Bial ten theih tawk tawk Tailoring Centre atan khawn nise, December ni 15 hmain District-ah chhunluh theuh nise tha tih a ni.
3. District chhunga Manipur atanga raltlan(Refugee) puala thawhlawm khawn chu a sem chhuah dan tur Executive Committee in lo ngaihtuah se tih a ni.
4. Synod Hospital Durtlangah Charity fund atan Rs 20,000 pek ni se, hruaitute lo pe se tih a ni.
District LAD Board hian Kum 2024 Budget atan Nuai sawmhnih panga singkua sangnga chu an pawm bawk a ni.
———-
District Board leh Pastor refresher programme hmang dawn:
District Board in ruahmanna alo siam tawh angin July 11, Thawhlehni hian Lungleng Biakin-ah District chhunga Pastor te tan Pastor refresher programme hman a ni dawn a, resource person-ah Rev. KVL. Hmangaihkima, District Superintendent hman a ni ang.
District Board pawh July 12, Nilaini hian District Committee room-ah neih chhunzawm nghal a ni dawn a ni.
———-
Audit:
Aizawl East District hnuaia Kohhranpui leh Department hrang hrang bakah Sub-Committee te Kum chanve sum chu July 4, Thawhlehni atang khan District Office-ah Audit neih a ni a, tluang takin July 7, Zirtawpni khan an zo fel. District Board in heng mite hi Auditor atan a ruat a ni: Rev Rosanga Kawlni, Rev C.Lalmalsawma, Rev. E.Vanlalpeka Zote bakah Upa Jimmy L.Renthlei te niin Audit hi tluang takin an zo thei a ni.
———-
Mithar leh baptisma chang thar:
N. Vanlaiphai Bial, Lungkawlh Kohhrana Bro Vanlalhruaia leh a team te rawngbawlna kal zelah July 1, Inrinni zan khan mi pakhatin sual ngaihdamna baptisma changin Kohhranah sengluh a ni.
Bethlehem kohhranah July 2, Pathianni Chawhnu lnkhawmah khan mithar pakhat sengluh niin Kohhran mi ni sa Member 1 nen mi 2 in Isua hmingin Baptisma an chang.
Sakawrdai bial, New Vervek Kohhranah July 2, Pathianni khan Chhungkaw khat, Member 7 chu Kohhranah sengluh an ni.
Serchhip bial Sialhau Kohhranah July 2, Pathianni khan kohhran member ni sa mi 2 te chuan sual ngaihdamnan Isua hmingin baptisma Bialtu Pastor C.Lalchhuanga kutah an chang. Upa Zoramthara’n bialtu Pastor hi a tawiawm a ni.
Thingsulthliah Bial, Tlungvel Kohhrana Evan Lalbiakmuana rawngbawlna Lalpan mal a sawm hle a, Inrinni Dt 1.7.2023 khan a tum hnihna atan Kohhranin chawimawina a nei leh a, a tuk Pathianni zan khan mithar, chhungkaw khat member 7 te chu Kohhranah sengluh an ni.
July 5, Nilai zan inkhawmah khan Zemabawk Vengpui Kohhranah chhungkaw khat, member 5 te chu Kohranah Church Board Chairman, Upa R. Thanghmingliana’n sengluhna a nei. Zemabawk bial Missions Department chuan Zemabawk East preaching pointa rawngbawl turin Evan. J. H. Lalhminghlua, District Revival Speaker a ruai a, mithar sengluhte pawh hi Bial Missions in rawngbawl tura a rawih mek Evan. J. H. Lalhminghlua rawngbawlna kal tlanga Lalpa pek an ni.
July 6, Ningani pawh khan Kawlkulh Bial, Puilo hmuna Bro. H. Lalrinfela te rawngbawlna kaltlangin mithar pakhat Kohhranah sengluh niin Rev VL. Hnemtluanga, District Missions Director kutah sual ngaihdamna baptisma a chang nghal a ni.
———-
Hruaitute programme:
Rev KVL. Hmangaihkima, District Superintendent chuan Pathianni hian Upper Republic Kohhranah rawngbawltute pual seminar neihah resource person-ah tangin rawngbawlna a nei ang.
Rev R. Laltlankima, District Secretary chuan June 12 atang khan hmun hrang hrangah Kohhran ram pass buaipuiin Bial hrang hrangah hun a hmang a, June 30, Zirtawpni khan dam takin Aizawl a rawn thleng leh a ni.
Rev H. Lalropuia, District Treasurer chuan Khawbung Bial Pastor Quarters hawng turin Zirtawpni khan Khawbung a pan a, Pathianni-ah seminar nei nghalin ruahmanna ang chuan Thawhtanni-ah Aizawl a let leh ang.
Rev VL. Hnemtluanga, Missions Director chuan Pathianni hmang hian Sakawrdai Bial-ah hun hmangin kumin District Missions Department Conference an thlenna tur tul leh pawimawh en puiin hun a hmang ang.
———-
———-
NORTH MIZORAM DISTRICT
HRUAITUTE HUN HMAN:
Superintendent: NMD Supdt Rev. Chhiarpuia chuan July ni 5 Nilaini khan Dist. PYD tena Executive meeting an neih a h ova, July ni 7 zirtawpni khan kum 2023 PSM Graduation hmangin Principal a nihna angina PSM Graduation inkhawm kaihhruaina a thawk bawk.
District Supdt. Hian July ni 9 Pathianni hian Lengpui Bial Rawpuichhip kohhrante tlawhin Pathian thuchah a sawi bawk.
Secretary: District Secretary Rev. K. Lalduhsanga chuan Pentecostal School of Ministry zirna kalpui mekah June ni 26 atanga June ni 30 zirtawpni thleng zirtirna pein Camping Centre sakawrtuichhunah hun a hmang a, July ni 5-ah Camping center atangin naupangte nen chhuakin July ni 7-ah PSM Graduation hmannaah a tel.
Treasurer: District Treasurer Rev. C. Lalthantluanga chuan July ni 7-ah PSM Graduation hmannaah Dist. Treasurer a nihna anga a tihtur hrang hrang te tiin hun a hmang.
District Missions Director: Dist. Missions Director Rev. C. Lalramthanga chuan July ni 4-6 chhung khan Bawngva PP Biak in saknaah kalin Biak in sakna a thawk.
———-
UPC-NEI, NORTH MIOZRAM DISTRICT FORMER SUPERINTENDENT REV LALTLUANGA PENSION THLAH A NI TA (1984- 2023):
UPC, North Mizoram District Former Superintendent Rev. Laltluanga, Kum 1984 kuma United Pentecostal Church of North East India, North Mizoram District-a Pastor hna thawka rawngbawlna tan, kum 39 zet rawngbawla hun a hman hnuin vawiin June ni 30, 2023 Zirtawpni khan Full pension-in a chhuak ta.
Pension thlahna inkhawm hi District Kohhranpui ruahmannin Dinthar Bial Hqrs Dinthar Kohhran Biak inah thlahna inkhawm hman a ni. Pension thlahna inkhawm Rev. Chhiarpuia, NMD Supdt. chuan kaihruaiin chawhnu Dar 1:00-ah thlahna inkhawm tan a ni a, Hun ropui tak kohhranhote’n an tawn avanga Pathian fakna thu sawiin, Inkhawm chhimtute inhmelhriattirna neiin inkhawm tan nan ‘Aw Pathian nangman Chanchin tha min pe: tih hla sak a ni , Hunserh hmang tura ruat Rev. C.Lalmuanpuia, Kol. Diakkawn Bialtu chuan hunserh hmangin, Pathian thu Sam 8:3-5 leh 34 :8 & 9 thu chhiarin- ‘Rev. Laltluanga hian kohhranho a enkawl chhungin phurrit leh harsatna tam tak a tawk ngei ang a, chuti chunga kum 39 zet rawngbawlna kawng zawha a service hun a chhiar zo thei hi Kohhranhoten kan lawmpui a ni’ tiin, Dist a a hmunruak a zauh tur thu te a sawi bakah kohhrana mi senior te an tawnhriat ringawt pawh thil hlu a ni’ tiin a ui thu a sawi a, tawngtaiin a hun a ti tàwp a, chumi hnuah Ex Gen Choir ten Rev. Laltluanga Pension thlahna hla thiam takin an rawn sa a.
Rev. C.Lalthantluanga NMD Treasurer chuan North Mizoram District aiawhin Thlahna thilpek a pe a, chu mi hnuah Dist. Secretary Rev. K.Lalduhsangan pension thlah mek Rev. Laltluanga chanchin ngaihnawm tak a rawn sawi a, chumi hnuah Sist. C.Lalhriattluangin of Mission Vengthlang chuan fak hla mawi tak a rawn sa a, hemi hnu hian Dinthar Bial kohhranpui aiawh leh Dinthar Bial chhunga Local hrang heng
1) Dinthar Bial Kohhran aiawh Evan. K.Laldawla, Dinthar Bial Secy.
2) Dinthar Kohhran aiawh Upa Lalnghinglova, Dinthar Local Secy.
3) Zotlang Kohhran aiawh Upa Dr. H.Lalruata
4) Chawnpui Kohhran aiawh Upa R..Kapthanga, Chawhnupui Local Secy.
5) Dawrpui KohhranUpa R. Lawmsanga, Dawrpui Local Secy.
6) Tuikual kohhran aiawhin Upa Madina, Tuikual Church Board Secy. te dingin Pastor thlahna thu leh an ui thu te thiam takin an sawi hlawm.
Chumi hnuah Rev. Lalmalsawma Sailo Gen. Treasurer chairman saw manga rawn dingin General lam atanga Gen. Executive board member anih anga an thlahna thu leh an ui thu a rawn sawi a, hemi hnu hian Dist. LAD, Dist. PYD, Dist. SS leh Dist Missions Dept te thlahna thilpek an hlan a, hei bakah hian Dinthar Bial kohhranpui, Bial LAD, Bial Missions, Bial PYD leh Dinthar Bial chhunga local tin ten thlahna thilpek an pe bawk a, Pastor Bial vawngtu mi thahnem tak he niah hian lo kalkhawm bawkin an ni hian an rawngbawlpui leh an thawhpui thin Rev. Laltluanga thlahna thilpek hlu tak an pe theuh bawk a ni.
Pension thlahna thilpek mimal pe duh tanah hawng zuiin mi thahnem takin Rev. Laltluanga thlahna thilpek hi an hlan a, hemi hnu hian Rev Laltluanga Pension tur thlah mek tan thusawi hun pek a nih angina ani hnen atangin thusawi ngaihthlak a ni
A thusawi tlangpui: Lalpa tana chak lo tak chunga rawng a lo bawl chhunga Pathian kaihhruaina leh venhimna a chan chungchuangah Pathian hnenah lawmthu a sawi a, District hruaitu leh Office Staff te, a rawngbawlpui Pastor thahnem tak amah thlahtute, Disthar Bial chhunga kohhran hrang hrangte duhsakna te, Bial pawn atanga amah ngaipawimawha kalkhawmte chungah lawmthu a sawi a, Rawngbawlna kawng a zawh laia hun harsa leh khirh tak tak a lo pal leh tawnhriat ngaihnawm tak tak te a sawi a, thangthar rawngbawltute fuihin a, thusawi ngaihnawm tak ngaithlak a ni
Hemi hnu hian a duh apiang tan thusawi hun hawn leh niin; Upa DR. H. Lalruata rawng dingin thu tlem a sawi a, chumi hnuah fak hla sain Chawhnu dar 3: 40 bawrah Rev. Laltluanga kum 39 zet Lalpa rawngbawla kohhranhote enkawl a, hun hmang, Kohhranin dan a neih anga Pensiona ui leh ngai tak chunga an thlahna inkhawm chu North Mizoram District Missions Director Rev. C.Lalramthanga’n malsawm tawngtaina in a tin ta a ni.
Rev. Laltluanga’n Pastor a nih hnua Bial a lo vawn tawhna hmun hrang hrang te leh District hruaina hna a lo thawh te heng te hi an ni.
1. 1984-1985: Khawruhlian Bial
2. 1985-1990: Darlawn Bial
3. 1990-1995: Reiek Bial
4. 1995-1996: Sihphir Bial
5. 1996-2001: Headquarters bial
6. 2001-2005: Sialsuk Bial
7. 2005-2010: Chaltlang Bial
8. 2010-2011: District Missions Director
9. 2011-2014: Treasurer, North Mizoram District.
10. 2014-2018: Secretary, North Mizoram District.
11. 2018-2022: Superintendent, North Mizoram District
12. 2022-2023: Dinthar bial
———-
DISTABLE SUNDAY HMANG:
July ni 9 Pathianni chu Rualban lo te ni (Disable Sunday) ni a nih angin North Mizoram Distrct huam chhunga kohhran hrang hrang ten urhsun taka hmangin, Rualban lo Sunday a nih angina he ni ah hian an puala thawhlawm khawn a ni bawk a, Thawhlawm te hi District-ah chhung lutin District hian ruahmanna fel tak siamin sum tlingkhawmte a theih anga Rualbanlo te tan semchhuah thin a ni.
———-
DISTRICT PYD BOARD NEIH A NI:
June ni 27 thawhlehni khan North Mizoram District PYD chuan Board Meeting neiin Dist. PYD President Evan Jeno Vanlalruata’n a kaihruai.
Board-ah hian Dist. Supt. Rev Chhiarpuia leh Secretary Rev K Lalduhsanga leh Treasurer, Rev C Lalthantluanga, Gen PYD President ni bawk te chuan an ho a ni.
Dist. PYD Board Meeting rorel tlangpui:-
1. Dist. PYD Conf.2023 Bairabi hmuna neih tur thlir lawkna neih a ni a, Dist. PYD Conf.-ah hian Kolkata PYD te chahchhuah tura rel a ni. Conf. ah hian Theme song neih ngei nise tiin a rel bawk ni.
2. Kawrthah hmuna Pastor Quaters Supreme court in a neitu nihna a tihchian hnuah Kan kuta a awm leh tak avangin Pastor Quarter chu Chei hnumin Tirhkoh chuan luah se tiin Dist. kohhranpui board chuan a rel a. Dist. PYD Board chuan tirhkoh quarter awl tur chu a enkawl zui dan tur a ngaihtuah a, Kawrthah Dinhmun thlir chungin uluk takin boruak lo zir chiang a, hma la turin Dist.board chuan Dist. PYD executives committee kutah a hlan a ni.
3. Dist.PYD hmalaknain kum 2024 ah Solfa training buatsaih tura rel a ni.
4. UPC Dinna hmasaber Lungleng I ah Dist.PYD hminga hmalak nise tih a ni a. Dist.Hruaitute leh PYD OB te leh Bialtu Pastor ten Lungleng 1 kohhran ten an mamawh tak zir chiangin a ṭul angin hma lo la se tiin rel a ni.
North Mizoram District Bial News: Dinthar Bial LAD te chuan Gen LAD Kumpuan Taimakna bawhzuina inkhawm a vawi 4na July ni 27 Thawhlehzan khan Dawrpui Vengthar Kohhhran Biak inah neiin Thlarau lam boruak duhawm tak nen hun an hmang.
———-
Bairabi North Kohhranah mithar nei:
July ni 28 Zirtawp zan khan Bairabi bialtu pastor Rev. C. Lalhmunliana chuan bairabi North Kohhran-a lawi turin mithar pakhat a lawmlut.
He mithar duhawm tak hi Bro. Lalchhuangliana niin Salvation kohhran atanga Thuthlung hmua lawmluh a ni.
———-
Charge inhlan:
June ni 30 zirtawpni khan Vawngawnzo Missionary, Sist Esther Lalrawngbawli chuan taksa bawrhsawmna avanga a hna a chawlhsan tak avangin Dist. Missions Executive comt in ruahmanna a siam anga a awmna hmun lo hmui tura ruat, Evan Gospel Lalrinmawia, Damdiai Missionary hnenah charge a hlan. Charge inhlan hi Bial Director, Upa Zokhawliana leh bialtu, Pastor Vanlalruata ten an hmanpui a ni.
Missioary Estheri hrisellohnain a tlakbuak hma chuan Missionary tha leh chak tak member te huikhawmtu tha leh tihhmasawnna kawnga thawhhlawk tak a ni a, District Mission Dept pawhin a ui hle a ni.
———-
SEMINAR HMAN A NI:
June ni 30 Zirtawpni khan Vairengte Bial chhung Church Board member tan Chhimveng Biak In ah Seminar hman a ni. Seminar-ah hian Bial chhung hruaitute Resoures Person atan hman nghal niin, Bialtu Pastor Rev.Lalpianthang’n he hun hi a kaihruai a, Seminar neih hmain inhlanthar tawngtai rual neiin; seminar tan ni.
Bial Secretary Evan.H. Chhuana Paper buatsaih zirho hmasain ‘Kohhran Serh leh sang’ booklet a siam chu zirho a ni a, sawiho na hun tha tak neih nghal a ni bawk. Chawhma hun hman hi Evan. C.Lalnunhlua’n tawngtai a kharin thingpui inchawlh neih hnuah Chawhnu hun tan lehin Bial Treasurer Evan. Lalfala hnen atangin Thupui ‘Hruaitu mawhphurhna’ paper chu zir ho leh a ni a, Bialtu Pastor Rev. Lalpianthanga hnen atangirn Thupui ‘ Thianghlimna’ tih hmangin inzirtirna neih leh a ni bawk.
Chawhnu lama thupui zirho te Sawi hona hunt ha tak neih leh niin; rawngbawltu kalkhawmten an thu zir hlawkthlak an ti hle. Seminar hun hman Evan. Vanrammawia’n tawngtaia khar a ni.
———-
MI THAR LAWMLUHNA LEH BAPTISMA RAWNGBAWLNA NEIH A NI:
July ni 01 Inrinni zan inkhawmah Bairabi bialtu pastor Rev. C. Lalhmunliana’n UPC member ni turin Sis. Mary Sinha chu Bairabi Bethel kohhran Biak Inah a lawmlut a. Zan inkhawm banah Sis. Mary hian Isua hmingin sual ngaihdamna baptisma Rev. C. Lalhmunliana kutah a chang nghal bawk a ni.
Sis. Mary-in thlarau pawlna dawngin khur hlawk hlawk chung leh ‘Halleluiah amen’ ti chung zela baptisma khur a pante, baptisma a chan zawh ruala ‘ka sualna zawng zawng tlenfai a ni tawh’ a tihte chuan thuthlung thar rawngbawlna ropuizia a nemnghet thar hle a ni.
July ni 2 Pathianni zing inkhawmah kan Kanan thar Mission Field-ah member pakhat chu Lal Isua hmingin Pentecost kohhranah lawmluh a ni. Lawmluhna hi Missionary Sist. F. Lalsiamliani’n neiin mithar lawmluh ni hian Bairabi Bial SS hruaituten kanaan thar an rawn tlawh lai a ni bawk.
———-
Chaltlang Bial ten Seminar an nei:
Chaltlang Bial 2023 Conference in alo rel angin Bial chhung a Church Board chin-ah seminar neih nise tih a rel a. Date 2 July, 2023 (Sunday Chawhnu) khan Chanmari Local Church Board member te ah kokim takin Seminar hi neih a ni, Church Board Member ten hlawkthlak an ti hle.
Chanmari west leh Bawngkawn local ah te seminar hi neih alo ni tawh bawk a ni. Seminar topic atan hian “Church Administration” hman a ni a, resource person atan Bialtu Pastor Rev. P Vanlalfela hman a ni.
Date 9 July, 2023 hian Ramhlun Localah Seminar hi neih leh a ni anga, chutiang zel in Bial chhung a “Seminar on Church Administration” tawp kharnan chu Bial Head Quarter, Chaltlang Localah hman a ni ang.
———-
HALF YEAR MEET HMAN A NI:
Mamit Bial PYD Conference in a rel tawh angin Bial PYD Half Year Meet chu Dt.29th June -2nd July 2023 chhung khan Headquarters Kohhran Biakinah te, VV Futsal Ground ah leh Bungzawl Volleyball Court ah te hman a ni.
Dt.29th June 2023 (Nilaithawhtan) zan ah VV Futsal Ground ah Meet hawnna hun neih niin Upa R.VL Rinchhana, President,Bial PYD chuan a kaihruai a, Meet hawnna hun hi T.Upa S Zahmingliana, Hqrs chuan neiin hemi zan hian Futsal hmanga inelna thianghlim buatsaih a ni a, hlim taka hun hman a ni.
Dt.30th June 2023 (Zirtawpni) zanah Fellowship neih niin Bro.C.VL Chhanchhuaha chuan a kaihruai a, Bro. C.Zomuansanga chuan tanna hun hmangin Quiz leh Solo Competition hmanga intihsiakna neih a ni a, Bial PYD Education Sub-Committee Chairman Bro.Jerry Lalramnghaksanga hnen atangin Education pawimawhna ngaihthlak a ni a, thuthlung hla sak ho na neih bawk niin hun hlimawm tak hman a ni.
Dt.1st June 2023 (Inrinni) chhunah Bungzawl Volleyball Court ah items grang hrang hmanga intihsiakna neih a ni a, zan lamah revival program a hun hman niin Upa R. VL Rinchhana, President, Bial PYD chuan a kaihruai a, Sist.Lalfakawmi, Phaizau PYD Treasurer chuan hun hmasa hmangin Sist.Lalremmawii’n zaia Pathian rawngbawlna a nei a, Bro. Vanlalhlimpuia, Secretary, Bial PYD hnen atangin “I nunna turin tlanchhuak rawh” tih thupui hmangin Pathian thuchah ngaihthlak a ni bawk.
Dt.2nd July 2023 (Pathianni) zing inkhawm chu Bialtu Pastor Vanlalruata chuan a kaihruai a, Bro.Lalramdingngheta, Secretary, Luangpawl PYD chuan hun hmasa a hmang a, Bro.Laldawngkima, Secretary, Hqrs PYD chuan zaia rawngbawlna neiin T.Upa K.Vanlalnghaka hnen atangin Pathian thuchah “Thalaite khawvel” tih thupui hmangin ngaihthlak a ni bawk.
Pathianni chhun lamah Fellowship neih niin Bro.C.Lalmalsawma, Vice President, Bial PYD chuan a kaihruai a, Bial PYD Kumpuan Sub-Committee Treasurer Bro. C.Pazawna hnan atangin Thuthlung puan uar a tul thu ngaihthlak a ni a, tin, Thianghlimna Seminar neih nghal niin Resource Person atan Evan F.Lalhriatpuia, Bial Thianghlimna Committee Chairman chu hman a ni.
Dt. 2nd July 2023 (Pathianni) zan inkhawm ah Bialtu Pastor Vanlalruata chuan inkhawm kaihruaiin Sist.C.Lalduhsangi, Treasurer, Bial PYD chuan hun hmasa a hmang a, Sist.Malsawmdawngliani, Treasurer, H/S Veng PYD leh Sist.Vanlalmuanpuii, Damdiai chuan zaia rawngbawlna neiin Upa. R.VL Rinchhana, Bial PYD President hnen atangin Pathian thuchah ropui tak “Pathian Thuthlung” ngaihthlak a ni bawk.
Mamit Bial PYD Half Year Meet chu Pathian thlarau awmpuina hnuaia hlim taka hun hman a nih hnu in Dt. 2nd July 2023 (Pathianni) zan khan a tiak ta a ni.
———-
Pentecostal Youth Department Dinthar, Aizawl Half Yearly Meet Sport hmang zo:
Dinthar PYD te chuan kum 2023 Half Yearly Meet Sport chu ni June ni 26 khan tluang takin an hmang zo. Sport hi hmun hrang hrangah hetiang hian hman a ni.
Opening function hi June ni 5 khan Joint YMA Multipurpose Indoor Stadium ah hman a ni a, Outdoor games hi 1st MAP playgound ah hman a ni. Dinthar Sunday School Hall ah indoor games hman leh niin June ni 26 khan a kharna hun chu Biakinah hlim taka hun hman a ni.
Half Yearly Meet sport hi Dinthar PYD ten kum khat chhunga an intih hlimna leh an ngaihhlut ber zing a mi a ni a, hrileng avanga hun engemaw chen hman chhunzawm theih anih loh hnu ah kumin hian hlawhtling taka hun hman a ni.
Maubawk Kohhran ten Pulpit pe dawn : Maubawk Kohhran te chuan Rengdil Bial chhunga kohhran dingthar Mualthuam kohhrana dah tur Pulpit man tur atan Rs. 50000 tur thu July ni 5 Nilaini khan Director Rev. C. Lalramthanga hrilhhriat a ni a, District Missions hruaitute an lawm hle.
———-
———-
LUNGLEI DISTRICT
DISTRICT BOARD VAWI 210-NA TLUANG TAKIN NEI. PASTOR ATAN F.LALSANGLURA LAK THAR A NI:
Ni hnih awh UPC Lunglei District Board vawi 210-na chu July ni 4-5, 2023 chhung khan District Committee room ah neih niin he rorel hi Rev C. Vanlalena, District Superintendent in kaihruaiin rorel thenkhat te:
1. Rbt.R. Lalsanglura, Electric veng Local, Lunglei chu License recommend nise tih a ni.
2. Kum 2024 atangin Upa Training neih chu a thuzir tur nen kalpui tum a ni (conf rorel bawhzuina)
3. Kum 2025 District Diamond Jubilee hmang tura ruahmanna siam a ni.
4. Jengkha (Dimapur field), Quarters Dist kut thlak tawh chu chhunzawm sak nise.
5. Farm veng a District ram chu laih zawl tur a ruahmanna pass a ni.
6. Revival Team din phal dilna chu Approved sak an ni. An Team hmingah Zion Revival Team tih a ni ang.
7. Pastor post -1 ruakin, Written leh Interview neih anih hnuin Evan F. Lalsanglura chu lak a ni.
8.District Office building thar hawnna/ hlanna hun siam nise tha tih a ni.
9. Executive Board member Rev. C. Hmingthanfala a pension dawn tak avangin, Rev B. Kamliana Executive Board member thar atan ruat a ni.
10. Pastor Transfer & Posting:
– Pastor R. Lalengzauva Bunghmun atangin Chhipphir ah.
– Pastor F. Lalsanglura, Bunghmun Bial ah.
11. Dist. Thianghlimna Comtt Secretary atan Upa Saithangpuia ruat a ni.
Facebook