GENERAL HRUAITUTE PROGRAMME:
General Sunday School Director Rev. Biaksangzuala chuan July ni 7, 2024 Pathianni hian Salem Kohhran, Aizawl East District ah thusawi rawngbawlna a nei ang.
———-
———-
CHHUMTUIPUI DISTRICT
CHAWIMAWINA HUN HMANG:
Siaha College Vaih Local ah Pathian hnathawh ropui tak thleng mek zel in, Pathian hnena lawmthu sawi chawimawina tum – 4 hman zawh tawh niin mi sawm hnih chuang zetin malsawmna dawngin Thlarau Thianghlim an dawng thar a, Thlarau Thianghlim dawng tawh mi engemawzatin he chawimawi atang hian siamthar lehna an chang tawh bawk a ni. Evan. Dr. Aichhunga te chhungkaw kaltlangin chawimawina tum -5 na hman leh a ni dawn a, Speaker ah Upa Hc. Hmingtinthanga hman a ni ang.
Evan.N.Thanghnuna rawngbawlna kal zelah Siahatla Local Church ah malsawmna a thleng mek zel a. July ni 5 zan a tang khan Evan. N. Lalchuanmawia te chhungkua chuan Pathian chawimawina hun an hmang bawk.
———-
Graduation day hmang dawn:
July ni 7 Pathianni chawhnu Dar 2 hian, Chhimtuipui District Pathianthu zirna Apostolic Bible school graduation day hman a ni dawn a, he hun ah hian zirlai 6 graduat tur awmin, Pastor Ls. Lalhruaisanga, CBCLecturer chuan he hun hi hmanpuiin thusawi rawngbawlna a nei ang.
———-
———-
LUNGLEI DISTRICT
DISTRICT LAD BOARD NEIH A NI:
June ni 27 Ningani khan District LAD Board vawi 116-na chu District Board Room-ah President Sist.PC.Lalrinthangi B/w kaihhruainain neih a ni a, an thurel pawimawh zualte:
1. Odhisa Mission Field Director Quarters, Buhubhaneswar, Sundarpada hmuna hman tur Air Conditioner (AC) lei sak nise tha tih a ni.
2. District LAD Conference vawi 55-na in Biak In sak nise tiin a lo rel tawh a, Biak In sakna tur hmun hi Biak In nei tha vak lo leh an member zat te Asst.Secretary hnena Report lut te thlir ho anih hnu ah Changpui Biak In chu sak nise tha tih a ni. Biak In sak nan hian Rs.300000 (Nuai thum) ruahman a ni.
3. Kohhran Office (Conference Hall) ah Sofa set dah tha tih a ni.
———-
DISTRICT PYD BOARD NEIH A NI:
June ni 28 Zirtawpni khan District PYD Board vawi 102-na chu District Board Room-ah an President Evan.C.Lalremchhunga kaihhruainain an thukhawm a, an thurel pawimawh zualte:
1. Kum 2025 District PYD rorel Inkhawmna hmun atan Tlabung Section tha tih a ni.
2. Hetiang hian Ruih hlo do hma lakna tur ruahmanna siam a ni.
(1) Kumin chhungin Section tinin mahni Section theuhah ruih hlo do chungchangah Trainers Training neih ni se.
(2) District hian Section thlan bikah ruih hlo do kawnga hma lak ni se.
(3) Section/Local tinte`n budget kan ruahman apiangin ruih hlo do puala hma lakna tur telh thin ni se.
(4) Chhungkaw maicham ngaih pawimawh a, ruih hlo that lohnate chhungkuaa inzirtirna neih tam lehzual ni se.
(5) Local tinte`n kan member zinga ruih hloin a tih buaite tanpui a, a la ti ve lote`n an tih ve lohna tura hma lak ni se. A tam thei ang bera ruih hlo that lohna awareness campaign neih ni se.
3. District PYD in thisen a pek chhoh mekah hetiang hian thisen la pelo te thisen pek hun tur siam a ni.
(a) August – Hnahthial Section, Pangzawl Section, S. Vanlaiphai Section, Rahsiveng Section
(b) September – Cherhlun Section, Zobawk Section, Zawlpui Section, Haulawng Section, Theiriat Section.
(c) October – Lungsen Section, Tlabung Section, Chawngte Section.
(d) November – Bunghmun Section, Thenhlum Section, Thingsai Section,
4. October ni 2-a Social Work Day hmanna tur atana hmala tur, Lunglei Town Area Social Work Day OB atan heng mite hi ruat an ni:
Chariman – Rbt C Lalrosanga
Secretary – Evan H Lalhmingmawia
Treasurer – Evan Laldinpuia Sailo
5. Deputy Commissioner Office, Lunglei atanga ngenna ‘Town level emaw, Section level emaw huapa Non-Communicable Disese (NCD) leh ruih hlo do campaign neihna tura programme ruahmansak tura ngenna’ chu town level-a programme siam ni se tha kan ti a. Hma lo la turin District PYD OB-te ruat an ni.
6. Education Committee Treasurer atan Sist Rebek Lalfansangi, Venglai chu ruat a ni.
7. Thlamuantu a District News Reporter atan District Secretary Evan Lalringzuala Pachuau chu ruat a ni
8. PYD-te`n ‘Thu Zir Bu’ kan neih hi District PYD Conference-in uar zawka zir tura hma lak ni rawh se a tih chu Local tinin tun aia nasa leh kim zawka kan zir theih nan Section hruaitute`n hma lo la se tha kan ti tlang.
9. General PYD Conference-a Lunglei District atanga zai tur (zai pawl leh solo) chu OB-te leh Lunglei District Music Committee-te ngaihtuah atan dah a ni
———-
DISTRICT BOARD VAWI 214-NA AN THUKHAWM, PASTOR ATAN EVAN.LALRINGZUALA PACHUAU LAK A NI:
July ni 3 Nilaini khan UPC Lunglei District Board vawi 214-na chu District Board Room-ah an thukhawm a, District Superintendent Rev.C.Lalrintluangan a kaihruai. An thurel pawimawh zualte:
1. Pastor atan Evan.Lalringzuala Pachuau S/o Rev. PC. Nghakliana, Pukpui chu lak a ni a, Chawngte Bial ah a awm ang.
2. Biak In sak tanpui dilna lut ah heng Local te hi pek an ni.
– S.Lungdai Local
– Lungrang S-I Local (Upper Lungrang)
– Mualthuam N Venglai Local
– Theiriat Local
———-
AIZAWL EAST DISTRICT
District LAD Board:
June 28, Zirtawpni khan District Committee room-ah Sis. R. Lalramsiami B/W, District LAD President kaihhruaiin Kum chanve District Board tluang taka neih a ni. He hunah hian District Kohhranpui hruaitute bakah General LAD President Sis. Lalramthangi B/W te chuan an telpui bawk a ni. District LAD Board-ah hian Bial atangin palai an kal tha in an thu passed langsar zualte:
1. District PYD in a enkawl mek, thalai ruihhlo ngaite enkawlna hmun, Elpida Rehabilitation Centre tanpuina atan Rs 20,000 hlan ni se tih a ni.
2. LAD Inkhawm vawi khat thawhlawm, Zemabawk-a Cancer vei te tanpuina atan hlan ni se tih niin thawhlawm hi Bial tinin District Conference, Kawlkulh hmuna neih turah thehluh vek ni se tih a ni.
3. Kumin 2024 Distrct LAD Conference-ah Aizawl East District atanga chhuak, State danga Missionary-a awm pakhat tal hun pek ni se tih niin Missionary chahchhuah tur erawh Executive Meeting kutah dah a ni.
4. Kum 1994 atanga chhiar tanin hruaitu chawl lova kum 25 thawkte hnenah chawimawina hlan tura tih niin Bial tinin fel fai takin report pek ni se tih a ni.
Heng bakah hian Kumin 2024-a Kawlkulh hmuna District LAD Conference hman turah Thupui-ah “Taimak chhuah” II Petera 1:10 thu hman ni se tih niin Conference report form leh Agenda turte chu August thla chhung ngeiin thehluh ni se tih a ni bawk.
———-
OTS Graduation Day:
June 7, Pathianni chawhnu hian Mualpui Bial, Salem Veng Biakinah Kum 2024 Session atan Oneness Theological Seminary chuan zirlai pass chhuakte tan Graduation Day an hmang dawn. He hun hi Rev. R. Laltlankima, Principal chuan kaihruaiin Rev. H. Lalropuia, District Secretary chuan hunserh a hmang anga Graduate Confering Rev K. Malsawmtluanga, Principal, CBC chuan a nei dawn a ni. Result puanna, Pastor Laltlanhlua Hnamte, Secretary, TEB chuan neiin fuihna thu Rev. C. Laldintluanga hnen atangin ngaihthlak a ni dawn a ni.
Kumin 2024 Session-ah hian zirlai mi 7 ten zirchhuakin Certificate in Theology (CTh.) hlan an ni dawn a ni. OTS te hian June thla chhung khan District Building-ah Class kalin July 2 atanga 4 chhung khan Exam an nei a ni.
———-
Pentecostal Choir member thar lakluhna, Induction neih a ni:
June 30, Pathianni zan khan Ramhlun Vengthar Biakinah Kum 2024- 2025 atana Pentecostal Choir member thar lakluhna, Induction, Evan Dr. R. Vanlalpeka, Chairman Music & Choir Committee kaihhruaiin neih a ni. Member thar lakluhna hi Rev. R. Laltlankima, District Superintendent chuan neiin fuihna thu tawi a sawi bawk a, Choir member turte hriak hnawih rawngbawlna a nei nghal a ni. He hunah hian Bro. Lallawmzuala, Secretary, Music & Choir Committee chuan member tharte hmelhriattirna neiin Bawngkawn Bial Zaipawl bakah Sis. Lalthafamkimi ten Pathian fak hla an sa a ni. District PYD Secretary, Evan. Lalfelkima chuan thusawi tawi nei bawkin Bro. Nelson KVL Chhandama kaihhruaiin member kalchhuak turte thlahna Citation hlan an ni. He hunah hian Member kalchhuak turte hnen atangin thlahna thusawi tawi ngaihthlak a ni bawk.
Pentecostal Choir member thar lakluhna inkhawmah hian hmun hrang hrang atangin Kohhran member engemaw zat inkhawmin hlim takin hun hman a ni. Kum 2024 – 2025 Term-ah hian Pentecostal Choir-ah hian member 28, Mipa 14 leh hmeichhia 14 an awm dawn a ni.
———-
Audit:
Aizawl East District hnuaia Kohhranpui leh Department hrang hrang bakah Sub-Committee te Kum chanve sum chu July 2, Thawhlehni atang khan District Office-ah Audit neih a ni a, tluang taka Audit niin July 5, Zirtawpni khan Audit hi zawh fel a ni. District Board in heng mite hi Auditor atan a ruat a ni: Rev Rosanga Kawlni, Rev C.Laldintluanga, Pastor HP. Ramfangzauva bakah Upa Jimmy L.Renthlei.
———-
Revival crusade leh Naupang Lang Camp neih ani.
Kawlkulh Bial, Chhawrtui Kohhranah June 28 atanga 30 chhung khan Revival crusade neih a ni a. Inriinni chhunah nilengin Naupang Lang Camp neih ani bawk. Speaker atan Evan MH Laldingngheta, District Missions Evangelist chu hman a ni Crusade leh lang camp neih chhung hian Thlarau Thianghlim Baptisma chang thar mi 5 an awm a, mi pahnihin sual ngaihdamna Baptisma an chang bawk. Thlarau lama chak tawh lo ten nasa takin Thlarau siam tharna an dawng thar leh a ni. Chhawrtui hmuna Crusade neih hi hmun hrang hrang atangin chhimtu engemaw zat an awm a ni.
———-
District PYD Education Sub- Committee te fehchhuak:
Aizawl East District PYD hnuaia Education Sub- Committee te chuan June 29 atanga 30 thleng khan Serchhip Bial-ah hun hmangin fehchhuah programme an hmang. Serchhip Bial te hian Chanmari Kohhranah lo thlengin an pual hian Inrinni zan atang khan hun hman nghal a ni. He hunah hian Education Sub- Committee te atang hian thusawi ropui tak tak leh Zirtirna tha tak ngaihthlak niin hun hlimawm tak an hmang a ni. Education Sub- Committee atang hian member 10 he hun hmang tur hian an kal a ni.
———-
Mithar leh baptisma chang thar:
June 30, Pathianni khan Keifang Kohhranah District Missions Evangelist, Evan K Laltlanmawia rawngbawlna kaltlangin Chhungkaw khat, Member 5 chu Bialtu Pastor J Lalhmingsanga chuan Kohhranah sengluhna a nei.
June 30, Pathianni vek khan Evan H Lalrinfela rawngbawlna, Tuirial Kohhranah Mithar 1 sengluh niin sual ngaihdamna baptisma a chang nghal a ni.
Khawlian Bial Khawlian Kohhranah Bro.J Lalkulha te chhungkua chuan June 29, Inrinni khan Pathian chawimawna neiin June 30, Pathianni khan mi pakhatin sual ngaihdamna baptisma Rev. H. Vanlalchhana kutah a chang. July 1, Thawhtanni khan Bro.Lalngaisanga te chhungkua kaltlangin Pathian chawimawina neih leh a ni bawk. Heng chawimawina neihnaah hian Speaker atan Rev.H.Vanlalchhana (Healing Ministry team) chu Speaker ah hman a ni.
Zemabawk Dinthar Preaching Station-a Evan H Lalremhlua rawngbawlna kaltlangin June 29, Inrinni khan mi 4 in sual ngaihdamna baptisma an chang bawk.
June 30, Pathianni zan inkhawmah khan Keifang Bial, Maite Kohhranah Bro. Malsawmdawnga (Sawmtea ) rawngbawlna kaltlangin mithar pakhat Kohhranah sengluh a ni. Sengluhna hi Upa Dintharzuala Church Board Chairman chuan a nei a ni.
June 30, Pathianni vek khan Bawngkawn Bial, Peniel Kohhranah Kohhran mi ni sa, mi 8 te chuan Bialtu Pastor, Rev. Vanlalfela Ramtiam kutah sual ngaihdamna baptisma an chang thar bawk.
July 1, Thawhtanni khan Serchhip Biakinpui Kohhranah, Bialtu Pastor C. Lalchhuanga kutah mi thar pakhat in sual ngaihdamna baptisma a chang bawk.
July 1, Thawhtan zan khan Evan. C.Lalzidinga (Dingtea) rawngbawlna kaltlangin chhungkaw 3, member 8 te chu Champhai Zotlang kohhranah sengluhna nei a ni bawk.
———-
———-
NORTH MIZORAM DISTRICT
HRUAITUTE PROGRAMME
UPC, North East India, North Mizoram District Hruaitute Superintendent, Secretary leh Treasurer te chuan July ni 5 PSM Graduation Day a nih angin, Headquarters Kohhran Biak in, Tuikhuahtlangah Graduation Day PSM Naupangte an hmanpui.
———-
DISTRICT NEWS LAWRKHAWM
PENTECOSTAL SCHOOL OF MINISTRY (PSM) GRADUATION DAY HMAN A NI:
July ni 5 Zirtawpni chawhnu dar 1:00 khan North Mizoram District hnuaia Bible zirna Pentecostal School of Ministry (PSM) Graduation Day hman a ni.
Graduation Day hman inkhawm hi District Hqrs. Biak in, Tuikhuahtlangah neiin, Rev. K. Lalduhsanga, PSM Principal in inkhawm a kaihruai a, Rev. K. Vanlaldika Chawlhhmun Bialtu Pastor-in Hunserh hmangin Pathian hnenah inhlanna a, Sist. HT Lalhmachhuani’n fak hla a sa bawk.
Rev. C. Lalthantluanga, PSM Registrar-in PSM zirlaite result puangin, PSM 2024 Batch-ah hian zirlai zawng zawng 1st yr. 2nd yrs leh 3rd yrs naupangte an vain mi 32 niin Final yr-ah hian Graduate tur zirlai naupang mi 11 an awm a, heng zingah hian Lalnunsiama chu pakhatna niin A+ grade-ah pass a, pahnihna Lalhmudika A+ Grade leh Pathumna Zosangpuii A+ Grade-ah te an passed a, Zirlai dangte pawh A+ Grade leh A Grade-a passed vek an ni.
Result puan zawh hian North Mizoram District Choir te’n Pathian fak hla mawi tak an rem a, hemi hnu hian Calvary Bible College (CBC) Principal Rev. K. Malsawmtluanga’n Zirlai zir chhuakte Certificate hlanna a neih bakah thuchah a sawi bawk.
PSM Zirtirtu aiawhin Rev. C. Lalrammuana’n thuchah sawi bawkin Zirlai aiawhin T.Upa Lalhmudika’n thu a sawi bawk a, Rev. C. Lalmuanpuia, PSM Burser in lawmthu a sawi bawk.
Programme hlawhtling taka hman a nih hnuah Rev. HF Malsawma Maubawk Bialtu Pastor chuan Malsawm tawngtai neiin inkhawm tihtawp a ni a, chawhnu dar 3:30-ah Graduation Day lawmna ruai hlim taka kilho a ni.
———-
PASTOR NUPUI SEMINAR:
June ni 27, 2024 Ningani nileng khan United Pentecostal Church of North East India, North Mizoram District buatsaihin, North Mizoram District huam chhunga rawngbawltu Pastor Nupuite pualin Seminar hlawhtling tak neih a ni.
Seminar hi District Office Committee Room-ah neiin; Pastor Nupui mi 34 an kalkhawm thei a, Seminar hi hun hnih- Chawhma hun leh chawhnu hunah thenin chawhma hun hi District Secretary Rev. C. Lalthantluanga’n a kaihruai a, Pathian thu chhiarin Sis Lalchhuanawmi, Hunthar chuan tawngtaina a nei a, chu mi hnuah Rev. R. Lalrinsanga, UPC(NEI) General Sudpt. Kalchhuak ta buatsaih Paper “Pastor Nupuite Mawhphurhna Rawngbawlnaah” tih thupui zir ho a ni. Chawhma lam Paper zir zawh hian paper atanga sawi ho tur te hlawk takin an sawi ho a ni.
Chawhnu hun Dar 1:30Pm-ah tan lehin Rev. C. Lalmuanpuia, District Treasurer chuan hun a kaihruai a, chawhnu hunah hian Sist. Sangkungpuii, Tlangsang in tawngtaina a hmangin Rev. K. Lalduhsanga, District Supdt. Paper buatsaih “Pastor Nupuite mawhphurhna, Nitin nunah” tih thupui hmangin seminar neih leh a ni. Seminar hun hnihna hman zawh hnu hian sawi hona tha tak nei lehin hlawk takin hun an hmang bawk.
Seminar zawh hian District buatsaihin Zanriah chaw an kil ho nghal a ni.
———-
DISTRICT SUNDAY SCHOOL OB MEETING NEI:
June ni 28, Zirtawp ni UPC-NEI, North Mizoram District Sunday School chuan OB Meeting District Sunday School Room-ah neiin, Dist. SS Director Rev. Lalruatkima Fanaii’n a kaihruai a. An rorel July Ni 13-14th July 2024-a Thenzawl Bial a General Sunday School Department in Kumpuan bawhzuina atan a “Thianghlimna “ Seminar a buatsaih turah turah thlengtu Bial te Rs.5,000/- puih te,Kum 2025 atana Naupang Sunday School chawhnu zirlai buatsaih thar nise, zirlai ziak turin Evan. Challiana, Dist SS Secretary leh Evan. MS Dawngliana, Dist SS Treasurer ruat an ni a, Kumin Dist. SS Conference-ah tlangzarh tum nise tih te an rel.
———-
DISTRICT MISSIONS BOARD NEIH A NI:
June ni 28 Zirtawpni khan UPC-NEI, North Mizoram District Missions Department chuan District Committee Room-ah meeting an nei.
District Board hi District Missions Director Rev. C. Lalramthanga chuan kaihruaiin, District Missions hmalakna hrang hrang rawngbawlna leh Building sak chungchangah report a pe a, Board member te self Introduction neih tirin, District Supdt. Rev. K. Lalduhsanga hnen atangin thusawi ngaihthlak a ni a, Dist. Supdt hnen atang hian ‘District Missions hruaitute leh Board member te thawhhona avanga a lawmthu te, hmasawnna tam tak field-a hmuh tur awm te, leh tha thlah lova hma lam pana kal zel tur tein Board member te a fuih’ thu an ngaih thla bawk.
District Missions Board rorel pawimawh zual zingah:- District Missions Confe in a lo rel tawh anga Missionary Convention August ni 25 (Pathianni)-ah neih te, District Mission Dept sum ke nghet atan Ram lei te, Sihthiang Missions Field Biak in sak mek chhunzawm chungchang sawiin, District Missions hruaitute’n a tul angin hma lo la se, tih te, Tuipuibari Center leh Tuipuibari North Kohhran chu hmun khata kaihkawp ni se tih te pass a ni a, hemi bakah hian Missionary Chart siam tha tiin Sotapa awmna tur Bial siamfel chungchang relin District Kohhranpui Board ah thlen tha tih a ni a, chumi hma chu Rengdil Biala awm rih tura tih a ni bawk. Tin, Heng rorelna hrang hrang bakah hian Revival Team inkaihhruaina Dan te ennawna siam a ni bawk a ni.
———-
North Mizoram District hnuaia PG Higher Secondary School ten Parents Teachers Meeting nei*:
June ni 03. Nilaini khan PG Higher Secondary School (High School Section) chuan Parents Teachers Meeting District Conference Hall ah neiin Program hi Principal Evan JH Malsawmdawngliana’n a kaihruai a, Rev K Darsailova formal Gen. Supdt.-in tawngtaina hun a hmang.
He Meet ah hian Nu leh Pa mi 70 bawr kalkhawmin, Principal leh Zirtirtute atangin School Inkaihhruaina te, Rules & Regulations chungchangte inhrilh thar a nih bakah in lamah Nu leh Pa leh Guardians te nasa zawka tan lakpui turin an sawm a, First leh Second Unit Test result puan nghal a ni bawk.
Nu leh Pa atangin zawhna leh hriatthiam loh an neih bakah School leh zirna hmasawnna tur rawtna leh zawhna hrang hrang lak niin a theih chin chin ah Zirtirtuten an chhang a, meet hlawhtling tak an hmang. June ni 04, Ningani-ah Higher Section pualin Parents Teachers Meet hi neih leh tur a ni.
———-
BIAL NEWS LAWRKHAWM
UPC-North Mizoram District, Headquarters Bial Sunday School Dept ten Inter, Senior, leh Doctrinal Dept. (I.S.D) Meet hlim takin an hmang.:
UPC-NEI, North Mizoram District Headquarters Bial Sunday School Dept buatsaihin June ni 22 & 23, 2024 (Inrinni leh Pathianni) hmang khan Mission Vengthlang Kohhranah ISD meet an hmang a, Inrinni zan atangin Revival Programme-a chhunzawmin Speaker Evan. R. Lalrinchhana leh a team te rawngbawlna kaltlangin Thlarau Thianghlim dawng thar naupang zingah mi 10 an awm bawk.
North Mizoram District Hqrs. Bial SS Inter, Senior leh Doctrinal (ISD) Meet hi June ni 22, Inrinni dar 10:30Am-ah Mission Vengthlang THP Hall II-ah hman tan niin Bial Sunday School Director Upa Lalkamlova Rokhumin Programme a kaihruai a, Bialtu Pastor Rev. Lalremtluanga’n meet hawnna neiin fuihna thu te sawiin; Programme Pathian hnenah a hlan bawk.
Inrinni chawhma hun Bial SS Director Upa Lalkamlova’n kaihruaiin chawhnu lam Bial SS Treasurer T.Upa Lalthlengliana’n a kaihruai thung a, Inrinni chhunah hetiang hian hun hman a ni 1) Solo-Khatla South leh Tuikual S, Kohhran 2) Fak lam (Worship Dance) – Mission Vengthlang leh Headquarters Kohhran 3) Skit – Headquarters Kohhran 4) Zaipawl-Nursery leh Khatla South Kohhran 5) Musical Drama – Tuikual S Kohhran 6) Recitation – Nursery Kohhran, atang tein Pathian ropuina tura an inbuatsaihna Item hmuhnawm leh beng titlai tak tak en leh ngaihthlak a ni.
Inrinni chawhma hunah Character Study ‘Daniela’ atanga neih niin; Upa Lalhlimliana, Hqrs. Local SS Secretary hnen atangin zir ho a ni. Hqrs. Bial Thianghlimna Committee leh Health Dept tangkawpin ‘Zuk leh hmuam that lohzia” Power Point Presentation hmangin zirtirna neih a ni bawk.
June ni 22 Inrinni chawhnu inkhawm atanga a tuk Pathianni zan June ni 23 thlengin Revival Programme-a hun hman chhoh niin; Speaker Evan. R. Lalrinchhana leh a team member 2 te inpekna leh tawngtaina a zarah hun hlimawm tak hman chhoh a ni. Speaker hnen atang hian Pathian thu “I Piangthar tawh em” tih te “Khawngaihna hun” tih leh “Pathian hnaih rawh” tih thupui pawimawh tak takte hmangin thusawi ngaihthlak thin a ni a, Pathian fakhla Bro. Austine Lalnuntluanga, Nursery, Bro. Johan L. Chhangte leh Esther Lalhluzuali te hnen atangin ngaihthlak a ni a, Recitation Sist. Estheri of Nursery atangin ngaihthlak a ni bawk
June ni 23 Pathianni chawhnu inkhawmah Speaker kaihhruainain Thlarau Thianghlim dil tawngtai neih a ni a, he hunah hian Pathian hnathawh lo thlengin I.S.D naupang 10 in Thlarau Thianghlim an dawng thar a, Siamthar leh khawihnawn chang mi thahnem tak an awm bawk.
———-
ENVIRONMENT PROTECTION AWARENESS CAMPAIGN:
Ni 24 June, 2024 (Thawhṭan) zan khan Dinthar Bial Environment Protection Sub – Committee hmalakna in Tuikual, Chawnpui leh Dawrpui Vengtharah te ‘Environment Protection Awareness’ tih thupui hmangin Campaign neih a ni a. Tuikual Local ah Sis. Lallawmzuali Fanai, Dinthar in hun a hmang a, Dawrpui Vengthar Local ah Sis. Jacinta Lalnunsangi, Tuikual in hun hmangin, Chawnpui Local ah Bro. Lalchhandama, Dinthar in hun a hmang bawk.
Campaign na atan thupui thlan sa ziak tur atana ruat Bro. Lalchhandam, Dinthar ziah hmangin thupui ṭhensawm,
(i) Single Use Plastic
(ii) Reduce, Re use, Recycle
(iii) Bawlhhlawh paih kawngah
(iv) Thing phun
(v) Awareness Campaign, tih hmangin ‘kan chhehvel a thil awm te’ kan venhim a, kan tihfai a kan enkawl dan tur te zir ho niin, Programme hlawhtling tak an hmang a ni.
———-
CHAWNPUI KOHHRAN RAWNGBAWLNA:
Dinthar Bial Mission Department hmalak na in Chawnpui Kohhran ah Evan H. Lalthanzara chu rawngbawla rawih niin, Rawngbawltu rawngbawlna Thu leh Thlarau lamah Kohhran ho ten an hlawk pui hle. Member hla te hnuh hnaih mek zel niin June ni 23, 2024 khan Pu Lalduhawma te chhungin Pathian hnena Lawm thusawi chawimawina neiin; Thlarau boruak kal zelah Upa Vanlalngaia te chhungin July ni 7, 2024 hian Pathian hnena Lawm thusawi chawimawina an nei leh ang.
———-
KAWNPUI BIAL INKAN THAWHHNIHNA:
Kawnpui bial chhunga local 8 ten, bial rorel bawhzuiin June Ni 29-30, 2024 khan inkantawn thawhhnihna an nei. Inkantawn thawhnihnaah hian a thawhkhatnaa a dawngtu localte an fehchhuak ve thung a, Intlawhtawn programme kohhran hoten an hlut hle a. Thu leh hlaa inchawm tawnin hun hlimawm tak an hmang. Tarlan tawh angin, inkantawn thawhkhatna hi June Ni 8 – 9, 2024 khan neih alo ni tawh bawk a ni.
———-
KEYBOARD ZIR TUR MI 5 FUIHNA LEH ṬAWNGṬAISAKNA HUN HMANG:
June ni 30, 2024 Pathianni chawhnu khan Aibawk kohhran aṭanga Keyboard zir tur mi 5 te ṭawngṭaisakna leh fuihna hun Aibawk UPC Biak inah hman niin, an mamawh tur hmanrua …
A thawh khatna (1st Batch) atana heng keyboard zir tura thlan mi 5 te hian July ni 2 aṭangin class an kal ṭan ang. An zirna senso hi Aibawk local Music Committee chuan a tumsak dawn a. Ruahman dan chuan tuna miten an zir zawh hunah midang pawh Music Committee-in tirh zui zel a tum a ni.
Local Music Committee bul tumin July ni 7 Pathianni chawhnu hian PYD leh SS Naupangte tân Khuang vuak dan leh Hla hril inzirtirna buatsaih a ni dawn bawk.
———-
MISSIONARY QUARTERS THAR HLANNA PROG.HMAN A NI :
June ni 30 Pathianni khan Rengtekawn Biala awm Bukvannei Missions Field Quarters sak thar hlan inkhawm hman a ni, Quarters hlan inkhawm hi Upa T. Liana Rengtekawn Bial Missions Director in kaihruaiin; Sist. Khawlliani, Bukvannei Field Missionary in thu tawi a sawi a, Bialtu Pastor Rev. C. Lalthlengliana’n Thu a sawi bakah Quarters thar Pathian hnena hlanna a nei bawk. T.Upa PC Ramdinthara, Bukvannei kohhran secretawry in lawmthu sawiin, Rev. C. Lalthlengliana’n Malsawm tawngtaiin inkhawm a titawp a ni.
Bukvannei Missionary Quarters thar hi 24 ft × 24 ft a sak niin, District Missions Department in a sakna sum a tum a, Kolasib Rengtekawn Bial Kohhranpuiin Bialtu Pastor hovin Ni -3 chhung a chung chih leh a chhuat leivung chhun work camp in an nei a, Tlangnuam Bial Missions Department in an bialtu Pastor Rev. Vanlalruata hovin Electric wiring work camp in an siam a. Rev. P.C Laltlankima & Rev R. Lalnithanga leh an ṭhianten tukverh frame vuah leh a daidangtu bang siam hnatlangin an thawk bawk. Heng bakah hian District Missions Director Rev C. Lalramthanga leh Missionary ṭhenkhat ten hnatlangin tha engemaw zat an seng bawk a ni.
Quarters sak nan hian Rs. 6,00,000/- (Cheng nuai ruk) bawr hman niin; hnatlang tha -120 vel sen a ni bawk.
Bukvannei Preaching point ah hian Sist H. Khawlliani, B.W chu Missionary in a awm mek a ni.
———-
MITHAR:
Central Jail veng Kohhranah:
June ni 23, Pathianni khan Central Jail Veng Kohhranah mithar pakua Chawlhhmun Bialtu Rev K.Vanlaldika Lalpa Isua hmingin a lawm lut. Mithar lawmluh rual hian Nau hlan rawngbawlna a nei nghal bawk a ni.
Kohhrana mithar a lawmluh te hi BCI aṭangin mi pali (4) leh PCI aṭangin mi panga (5) an ni. Sual ngaihdamna Baptisma chang thar mi panga (5) an awm bawk.
———-
Sailut 1-ah Mithar:
Pathianni kal ta June ni 30, 2024 khan Tlangsang Biala Missions Field Sailut one khuaah-ah rawngbawltu kaltlanga Pathian thuthlung hmu thar chhungkaw khat member 4 awmin, an chhungkua hian Rawngbawltu Evan. Lalremruata’n Lal Isua hmingin a lawmlut a ni.
———-
Bukvannei Missions Field-ah mithar:
June ni 30 Pathianni Bukvannei Mission Field-ah Missionary leh kohhranhote rawngbawlna kaltlangin mithar 2 neih a ni a, Heng mithar te hi Bialtu Pastor Rev. C. Lalthlengliana’n Lal Isua hmingin kohhranah a lawmlut a, hemi rual hian nau hlan rawngbawlna a nei nghal bawk. Hemi ni vek hian sual ngaihdamna Baptisma mi 3 in Lal Isua hmingin an chang bawk a ni.
Facebook