GENERAL HRUAITUTE PROGRAMME:
General Treasurer Rev. Lalmalsawma Sailo chuan January ni 27-29 chhunga N. Vanlaiphai Bial Kohhranpui leh Department Joint Conference ah Speaker ah tangin rawngbawlna a nei ang.
General Missions Director Rev. R. Laichhingpuia chuan Lunglei District Missions Department Conference neih mek chu hmanpuiin January ni 29 Pathianni zing hian thusawi rawngbawlna a nei ang.
———-
FIFA WOLRD CUP QATAR 2022 FOOTBALL HLAN
January ni 18 Nilai ni khan UPC North East India General Hqrs Office a dah tur in 2022 FIFA WOLRD CUP FOOTBALL (Al Rihla) chu Upa Roluahpuia, Shillong chuan a hlan.
Office Devotion zawhah thilpek hlanna hun hi hman chhun zawm a ni a, a hmun ngei a World Cup en a harsat dan leh senso hautak dan te, World Cup khawvelin a ngaih hlut dan report hrang hrang te pein, Rev. Zohmingthanzama General Secretary hnen ah Thilpek hi a hlan a, Office in Thipek dangdai leh hlu tak a dawn a vanga lawmthu sawiin a lawm nan thingpui an in ho a ni.
———-
CBC OFFICE RE-OPENING PROGRAMME:
UPC NEI te Pathian thu zirna hmunpui Calvary Bible College, Shillong chuan January 18 2023 (Nilai ni) khan Office Re-opening Programme, Principal Office, CBC ah neih a ni.
He hun hi Rev. K. Malsawmtluanga,CBC Principal chuan kai hruaiin Lalhmingsanga, E.A. chuan Bible Reading & Prayer hun a hmang a Office Staff te hnen atangin Krismas leh Kumthar Report te ngaih thlak a ni bawk.
January 19 & 20, 2023 chhung khan CBC zirlai ten winter vacation an hman dan report leh interview te neiin January ni 23. 2023 (Thawhtanni) atangin session chhunzawm leh a ni ang.
———-
GENERAL PYD HNATLANG
January ni 26 Ningani khan UPC North East India Pathian thu Zirna Calvary Bible College (CBC) hmun thar tur, Mualpui a Kohhran ram chu General PYD huaihawtin samfai hna tlang neih a ni a, Aizawl khawpui chhung a PYD tha hnem tak an thawk chhuak thei a ni.
He hmun ah hian November ni 28, 2022 khan Calvary BIble College (CBC) Building thar LUNGPHUM phumna chu Rev. R. Lalrinsanga, General Superintendent & Chairman TEB chuan a lo nei tawh a ni.
———-
———-
AIZAWL EAST DISTRICT
District Board:
Ni hnih awh, Aizawl East District hnuaia rorelna sang, District Board Budget Session chu tluang takin January 25, Nilaini khan zawh fel a ni. District Board hi January 24, Thawhlehni khan Rev. KVL.Hmangaihkima, Superintendent kaihhruaiin neih a ni a, Board member an telkim thei a ni. Aizawl East District Board-ah hian Kumin 2023-a District Kohhranpui leh Department hrang hrang Budget ruahman te chu pawm niin Biak In sak tanpuina te, Pastor Quarters sak tanpuina leh Budget in a kaihhnawih tur hrang hrang an rel a ni.
———-
Tailoring Centre Board thutkhawm neih a ni:
January 23, Thawhtanni khan District Superintendent room-ah District LAD hnuaia Tailoring Board thutkhawm neih a ni. He hun hi Sis. Zionparmawii, District LAD President chuan kaihruaiin District Kohhranpui hruaitute leh Bial atanga Board member te an telkim thawkhat a ni. Thu pawimawh tak tak ngaihtuah niin an thu passed langsar zualte:
1. Tailoring Centre atan Ke khawl 10 leh Over lock 1 bakah Zigzag khawl 1 lei ni se tih a ni.
2. Training course hi thla 6 ni se tih a ni.
3. Vawi khatah Trainee 10 lak nise, hemi atan hian dilna hun February thla chhung hawn a ni ang.“
4. Instructor 1 lak tura advertisement chhuah ni se tih niin hlawh pawh thla khatah 15,000/- pek tura tih a ni.
5. Puan thui zirna hi April ni 3 atangin Class tan thei turin ruahmanna siam a ni bawk.
Aizawl East District LAD Conference kum 2022-a neih chuan puan thui zirna, Tailoring Centre hawn ni se tiin alo passed tawh a, a bawhzui dan tur District Board kuta dah a nih angin District Board chuan Tailoring Centre board dinin, Tailoring Centre board hian chak takin hma a la a, District Building hlui top floor chu puan thui zirna atan District-ah dil niin phalsak an nih angin tunah hian class kal thei turin chak takin hma a la mek a ni. He Tailoring Centre Board-ah hian District LAD hruaitute, Kohhranpui hruaitute bakah khawpui chhung Bial hrang hrang atangin member an awm a ni.
———-
Bial PYD Inkhawmpui hmang mek:
Aizawl East District chhunga Bial hrang hrangte chuan January 27, Zirtawp Zan atang khan Bial PYD Inkhawmpui a rualin an hmang mek a, Pathianni Zan hian a tiak ang. Bial PYD Inkhawmpui-ah hian Zirtawp Zan atang khan Bial thenkhat chuan Revival Inkhawma hun hmang nghalin Bial thenkhat chuan Variety Programme-in hun an hmang thung a, Tualchhung report ngaihthlak na hun atana hmang an awm bawk a ni. January 28, Inrinni nileng khan Bial chhung in awpna leh District-a lut tur bakah Kum 2023 chhunga Bial kalphung turte ngaihtuahin rorel Inkhawm an nei hlawm a ni. Khawmpui-ah hian Speaker hranpa leh Thupui nei an awm laiin Bial thenkhat-ah chuan Speaker hranpa nei lovin Bial hruaituten thusawi rawngbawlna an nei thung a, Bialtu Pastor Speaker-a hmang an awm bawk a ni.
Bial PYD Inkhawmpui hi District PYD hruaitute chuan hmun hrang hrang-ah hetiang hian hmun hrang hrangah an hmang a ni.
1) Bazar Bial – Rev C Lalmalsawma, President
2) Zemabawk North Bial – Evan R Vanlalpeka, Secretary
3) Khawhai Bial – Evan Lawmsangkima, Asst. Secretary
4) N. Vanlaiphai Bial – Evan C Lalropuia, Fin,. Secretary AED PYD
Tun dinhmunah Aizawl East District chhungah hian Bial 31 awm mekin PYD Member Kum 2022 report atanga a lan danin Sangsarih zathum chuang an awm mek a, District PYD te hian North Bengal & Sikkim Missions Field hnuaia Darjeeling hmunah Biakin a sak mek a ni.
———-
Mithar leh baptisma chang thar:
January 21, Inrinni zan khan Darlawn Bial N Serzawl khuaah Bro.Ramdintluanga(Tluangtea), District Evangelist rawngbawlna atangin mi thar pahnih Kohhranah sengluh an ni.
January 21, Inrinni zan vek khan Khanpui kohhrana lawi turin mi 2 kohhranah sengluh an ni bawk. Sengluhna hi Bialtu Pastor Hmingchungnunga Ralte in a nei a, lawm luhte hi nufa niin, a fapa hi hlan nghal a ni bawk.
January 22, Pathianni khan Khawlailung Bunghmun kohhrana lawi turin mithar pakhat kohhranah sengluh a ni. Sengluhna hi District Evangelist Evan C Lalropuia’n a nei a ni.
Suangpuilawn bial, Zawngin-ah pawh chhungkaw khat members pathum chu Bialtu Pastor Laltlanhlua Hnamte chuan sengluhna a nei, an fa Pathian hnenah hlanna neih nghal a ni bawk. Zawngin-ah hian District Missions Department in Bro. Joseph VL Hmangaihzuala chu rawngbawlna nei turin a dah a, January ni 13 atang khan rawngbawlna a nei tan a ni.
January 22, Pathianni vek khan Zemabawk Bial, Lungbial Kohhran a lawi turin Member 7 chu Bialtu Pastor, Rev R Malsawma’n sengluhna a nei. “Member sengluh zinga Member 3 hi mithar niin mi 4 te hi Kohhran mi ni tawh sa te an ni.
January 22, Pathianni khan Thingsulthliah Bial, Tlungvel Kohhrana lawi turin chhungkaw khat member 5 te chu Bialtu Pastor V. Lalnienga’n Kohhranah sengluhna a nei bawk.
———-
Hruaitute Programme:
District Kohhranpui hruaitute chuan Aizawl khawpui chhung Bial an fan kal mekah January 21 leh 22, Inrinni zan leh Pathianni khan Upper Republic Bial-ah rawngbawlna neiin hun an hmang. January 21, Inrinni zan khan Republic Vengthlangah rawngbawlna neiin Pathianni chawhmaah College Veng-ah hun an hmang leh a, zanah Upper Republic Kohhranah rawngbawlna an nei leh bawk a ni. Heng an hun hmannaah hian Pathian thlarau awmpuina hnuaiah hlim takin hun an hmang a ni.
Rev KVL.Hmangaihkima, District Superintendent chuan Haflong hmunah rawngbawlna neiin Jubilee lungphun hawnna leh Bial Conference an hmanah speaker-ah a tang a ni.
January 27 atanga 29 chhunga Bial PYD Inkhawmpui hman mekah Rev. R.Laltlankima, District Secretary chuan a bial hmui mek Thuampui Bial-ah hmangin Rev H.Lalropuia, District Treasurer pawhin a bial hmui mek, Khawlian Bial-ah a hmang bawk a ni.
———-
———-
NORTH MIZORAM DISTRICT
DISTRICT SUPERINTENDENT Rev. Chhiarpuia chuan Jan ni 27-29 chhung hian Phainuam Bial PYD Conference hman turah Speaker niin rawngbawlna a nei ang.
DISTRICT SECRETARY: NMD Secretary Rev. K. Lalduhsanga chuan Jan ni 27-29 hmanga Bial PYD Conference bukpui bialte’n an hman turah Speaker niin rawngbawlna a nei ang.
DISTRICT TREASURER: NMD Treasurer Rev. C. Lalthantluanga chuan Jan ni 27-29 hmanga AED Bawngkawn Bial PYD ten, Ramhlun Vengthar kohhrana Conference vawi 28-na an hman turah Speaker niin rawngbawlna a nei ang.
———-
Bial PYD Inkhawmpui hmang mek:
North Mizoram District chhunga Bial hrang hrangte chuan January 27, Zirtawp Zan atang ni 29 Pathianni hmang hian Bial PYD Inkhawmpui an hmang mek a, Dist. PYD hruaitute’n he tiang hian Bial PYD Confe an hmanpui a ni:
Dist. PYD President Evan Jeno Vanlalruala chuan Bairabi Bial Confe a hmanpui ang a, Dist. PYD Secretary Evan. C. Lalruatsanga chuan Rengdil Bial PYD Confe a hmanpui bawk.
———-
KHUANGPUILAM BIAK IN HAWNG:
Jan. ni 21 2023 (Inrinni) dar 11:00am khan Kolasib Diakkawn bial a Khuangpuilam Biak In chu Rev. Chhiarpuia Suptt. NMD chuan a hawng.
Biak In kawtah hian Khuangpuilam local LAD zaipawl ten Biak In thar lawmna hla thiam takin an sa a, Rev. Chhiarpuia Dist. Suptt. chuan Pathian thu chhiarin, Pathianin kohhran ten thu neihna an pek angin, he biak in hi Pathian thu tak puan chhuahna, kohhran te tan malsawm dawnna in leh UPC North East India, North Mizoram Dist. Biak In pakhat ni turin Pathian ropui nan Isua hmingin a hawng a ni.
Khuangpuilam kohhran hi 30 Jan. 2000 khan members 84 awmin din a ni a, kum 17 zet a vei hnuin tuna Biak In hi hawn theih a peih alo ni ta a ni. Khuangpuilam Biak In size hi 56×28 leh kawt lam bathlar 14x 28 fits. a ni a, Comitt. room 14×18 fits. leh Sunday school hall 42×28 fits. zunin 3 Ek In 1, Biak In hnuaiah Chowkidar quarters 28×14 a awm bawk a ni.
Sum hmuh zat: ₹ 20,69,061
Sum hman zat: ₹ 20,68,663 a ni.
sum hi Dist. leh mimal leh Bank leh kohhran sum tuakna atanga hmuh a ni.
Biak In lawmna inkhawm hi Rev. C. Lalmuanpuia bialtu pastor-in a kaihruaia, farnu Lalhriatchhungi leh farnu Lalnuntluangi te leh PYD zaipawl, LAD zaipawl ten zaia rawngbawlna an nei. Upa Danial a building chairman chuan biakin sak dan leh ṭul pawimaw report a pe bawk.
Rev. Chhiarpuia Suptt. chuan Pathian thusawiin Biak In hi a len leh tet emaw, sum sen tam leh tlemah emaw a ropuina a awm lova, Biak In chu Pathian in a ropuina a puan chhuahna hmun tur leh a mah fak nan a ni a, Hallelui pek theihna biak In hi a ropui a, Biakbuk hi Lalpa ropuina in a khah hian a ropui ber a ni. Pathianin kan zing a a chen ve theh nan biak buk/hmun thianghlim min siam sak rawh a tih avangin he Biak In pawh hi Pathian chenna a ni tur a ni tiin thu pawimawh tak tak a sawi a ni.
Tlaiah ruai buatsaih ani a, Sial, Vawk leh Ar sa siam a ni. He biak In hawn prog. hmang tur hian bial chhung leh pawn atangin chhim tu an kal ṭha a, Biak In-a leng lo kal khawmin hlim taka hun hman a niin, Rev. C.Lalrammuana Thenzawl bial vawng mek tu chuan malsawm ṭawngṭaiin hun a khar a ni.
PenNeT NMD.
———-
MITHAR NEI:
1. Home Missions Revival Team te rawngbawlna atanga mithar neih: Home Missios Revival Team Evan. Lalthianghlima leh a rawngbawlpui te chuan Rengil Bial K.Sarali Field-ah January ni 6 atanga Jan ni 15 thleng rawngbawlin an rawngbawlna kaltlangin mithar 11 chhungkua 2 Pathian Thlarau Thianghlim siamtharna Field members engemaw zatin an chang bawk.
2. Jan ni 15 (2023) Pathianni khan Bro. Lalrinmawia leh a nupui Sis.Malsawmzuali chu Nisapui kohhrana lawi turin Evan.Vanrammawia’n Lalpa Isua hmingin UPC of NEI-ah a lawmlut. Sis.Malsawmzuali hian sual ngaihdamna baptisma chang nghalin; Anni hi Seventh Day kohhran aṭanga lo lut an ni.
3. Jan ni 22 (Pathianni) khan Kolasib Venglai Bial South Chhimluang Mission field-ah member thar panga (5) chhungkaw hnih te chu UPC –NEI-ah lawmluh an ni. Mithar te hi Missionary Evan. Lalhmangaihzuala’n a lawmlut a, Nau pahnih hlan a ni bawk.
4. Jan ni 22 (Pathianni) vek khan Damparengpui Bial Tuirum-ah Mithar chhungkaw khat member 6 te chu UPC NEI-ah lawmluh an ni bawk. Nau pathum hlan nghal a ni.
5. Jan ni 22 Pathianni khan Nursery kohhrante chuan kan Unau Mz UPC a lawi thin chhungkaw 1 member 3 awmna te chu UPC-NEI Nursery kohhrana lawi turin Lapa Isua hminga lawmluh an ni.
6. Jan ni 22 Pathianni zan khan NMD Dist. PYD Secreary Evan C Lalruatsanga rawngbawlnaah Kolasib Venglai Kohhran a lawi turin Mizo Kohhran aṭangin Nupa member 2 UPC-NEI kohhranah seng luh an ni.
7. Jan ni 22 Pathianni vek khan Chaltlang Bial UPC-NEI Chanmari Kohhrana lawi turin Unau MZ UPC atangin member 3 lawmluhna neih a ni bawk
8. Jan ni 22 khan Kawnmawi local, West Phaileng bialah Evangelist thawklai Unaupa Lalṭhapuia Ralte chuan Presbyterian aṭangin mi thar panga (5) a lawm lût a, an zinga pahnih hi Sual ngaihdamna baptisma a chantir nghal bawk e.
9. Jan ni 11 (Nilai zan) khan Rengtekawn Bialtu Pastor Rev.C.Lalthlengliana N.Thinglian Home Missions field tlawhin pawl dang aṭangin Mi thar -1 UPC-NEI Thinglian UPC Kohhrana lawi turin Lawm luh prog. hman a ni, Mi thar lak hi Middle School Zirtirtu (B.Com) a ni nghe nghe a.
10. NMD Phaizau rawngbawl hnen atanga thudawn danin tun hnai Jan thla laihawl bawr khan Phaizau Preaching Poin ah Mithar 6 neih a ni. Phaizauah hian District kohhranpui rawihin Evan. Lalhausaa chuan rawng a bawl mek a ni.
———-
———-
LUNGLEI DISTRICT
MISSIONS DEPARTMENT CONFERENCE NEIH A NI DAWN:
Missions Department, Lunglei District Conference vawi 48-na chu January ni 27-29 chhung hian Pukpui Local UPC Biak Inah neih a ni dawn a, Conference thupuiah hian ‘Nitin a chhandamna thu chu hriattir rawh u’ Sam 96:2 chu hman a ni ang.
He inkhawmpui hi January ni 27 Zirtawp zanah District Superintendent Rev.C.Vanlalena chuan a hawng ang a, January ni 28 Inrinniah rorel inkhawm neih a ni ang. Inkhawmpui chhung hian Rev.Laichhingpuia General Missions Director, Rev.R.Vanlalenga Former Director Missions Department, Lunglei District, Pastor C.Thandawla, Field Director Bihar Missions Field leh Evan.Lalhriatmawia, Thiltlang Home Missionary te chuan thuchah puanchhuahna an nei ang.
———-
CHARGE IN HLAN:
January ni 23 Thawhtanni khan kum 2023-2024 Lunglei District chhunga Department leh Sub.Committee hrang hrang hruaitu atana thlan tharte chuan hruaitu kal chhuak turte hnen atangin charge an la.
Charge inhlanna hi District UPC Office-ah Superintendent Rev.C.Vanlalena kaihhruainain neih a ni a, Pathian hnenah tawngtai sakna a nei bawk.
———-
CERTIFICATE HLAN INKHAWM NEIH A NI DAWN:
January ni 30 Thawhtan zan hian District UPC Conference Hall-ah Pentecostal Social Ministry (PSM) hnuaia Tailoring Centre-a puanthui zir chhuakte Certificate hlan inkhawm neih a ni ang.
He hun hi Rev.PC.Lalfakawma, Chairman PSM chuan a kaihruai anga, Rev.C.Lalrintluanga District Secretary chuan Certificate hlanna a nei ang a, District Superintendent Rev.C.Vanlalena chuan thu a sawi ang.
PSM tailoring Centre 1st Batch ah hian mi 7 ten puanthui an zir a, nikum 2022 August thla atang khan zir tannin thla ruk an zir hnuah hlawhtling takin exam an hmachhawn a ni.
Facebook