GENERAL HRUAITUTE PROGRAMME:
General Superintendent Rev. R. Lalrinsanga chuan August ni 13 Pathianni hian Shillong ah hun hmangin rawngbawlna a nei.
General Sunday School Director Rev. Biaksangzuala chuan August ni 12 leh 13 hmanga Halflong Section ten Sunday School Rally an hmanna ah tel puiin rawngbawlna a nei ang.
———-
———-
AIZAWL EAST DISTRICT
Thingphun hnatlang nei:
August 5, Inrinni khan District PYD hnuaia Environment Sub- Committee te buatsaihin thingphun hnatlang hlim taka neih a ni. He hunah hian Bial hrang hrang atangin mi 28 kalin thing hi Zangen Ram, Zemabawk-ah phun a ni. Thing tiak 70 he hunah hian phun niin thing tiak phunte hi par mawi tak chhuah chi leh rah duh chi, sava te pawhin an tlan duh chi te anni hlawm a, thingkung tangkai tak tak tur an ni hlawm a ni. Thing tiak an phun mai bakah kawng sir hnim an sam fai bawk a ni. District PYD hnuaia Environment Sub- Committee ten an thingphunna hmun hi kawng sir ani a, PYD Roadside Plantation a siam an tum chho mek a, enkawl zui zel a sign board te pawh tar turin ruahmanna an siam mek a ni.
———-
Joint Fellowship hlawhtling taka neih a ni:
July 30, Pathianni chawhnu khan Bawngkawn Biakinah Bawngkawn Bial S.S Department buatsaihin Naupang Sunday School tan Joint Fellowship hlawhtling taka neih a ni. Upa HK Lalnunsanga, Bial Sunday School Director chuan hun hmasa kaihruaiin Rev. Vanlalfela Ramtiam, Bialtu Pastor chuan hunserh a hmang a ni. Hemi hnu hian host kaihhruaiin Bial chhunga Naupang Sunday School ten Item chi hrang hrang hrang Solo, Recitation, Worship dance hmangin intihhlimna neih a ni a, zai hona vawi engemaw zat neih a ni bawk. Sunday School Kumpuan “Kan fate i chhanhim ang u” tih hmangin thusawi tawi, Evan K. Lalbiaknunga, Bial S.S Treasurer chuan a nei bawk a ni. He hunah hian Bial chhung atangin naupang engemaw zat kalin hlim takin hun an hmang a ni.
Bawngkawn Bial S.S te hian August 13, Pathianni hian Local hrang hranga Naupang S.S-ah HIV/ AIDS leh ruihhlo do awarness campaign an nei dawn bawk a ni.
———-
Seminar leh Revival hlawhtling takin nei:
August 4 atanga 6 chhung khan Champhai Bethel Bial LAD buatsaihin Seminar cum Revival- Bial Headquarters Biak Inah hlawhtling taka neih a ni a. Resource Person leh Speaker atan Rev. Lalmalsawma Sailo, Gen.Treasurer chu hman a ni. Seminar hian August 5, Inrinni nileng khan neih niin Thupui-ah ‘Nu Mawhphurhna’ tih hman a ni. Seminar ah hian member 60 chuang kalin, hlawk thlak an ti hle a ni. Rev. Lalmalsawma Sailo, Gen.Treasurer Speaker-a hmang hian Pathianni zan thleng khan Revival inkhawm an hmang chhunzawm a, hlim takin hun an hmang a ni.
———-
Pathian thu zir hona nei:
August 7, Thawhtan zan khan Upper Republic Bial PYD te chuan Upper Republic Biak inah Bial Kumpuan Sub- Committee hmalaknain “Thuthlung Seminar” hlawhtling takin an nei. He hun hi Bro Lalzarmawia chuan kaihruaiin T. Upa Aldrin Lalnunpuia hnen atangin report an ngaithla a ni. Upper Republic Bial PYD ten Seminar an hmanah hian Rev KVL. Hmangaihkima, District Superintendent chu hman niin resource person hnen atang hian Thuthlung sermon tha tak tak kan ngaithlak a ni a, zawhna leh chhanna hun hlawhtling takin an hmang bawk a ni. He hunah hian Bial chhung atangin PYD member engemaw zat an kal thei a ni.
———-
Revival Crusade:
August 2 atanga 6 chhung khan Bawngkawn Bial Missions Department buatsaihin Revival Crusade hlawhtling takin Bawngkawn Biakinah neih a ni. He hunah hian Speaker-ah Evan HK. Lalhmangaiha hman niin Pathian thlarau thianghlim awmpuina hnuaiah hlim takin hun an hmang a ni.
ITI Biakinah pawh August 4 atanga 6 chhung khan Mualpui Bial Missions Department buatsaihin Revival Crusade neih a ni bawk a, Speaker-ah Evan R. Vanchhunga, District Fulltime Evangelist hman a ni.
———-
Mithar leh baptisma chang thar:
August 6, Pathianni khan Sialhawk Kohhranah mithar pakhat Kohhranah sengluh a ni. Sialhawk Kohhran ah hian Evan H Lalrinfela’n rawngbawlna a nei mek a ni.
August 6, Pathianni khan Evan Lalchhawrzela rawngbawlna, Keifang Bial, Chehrep Preaching Point ah mi 8 in Isua hmingin Baptisma an chang. Heng Baptisma chang te hi Kohhrana sengluh tawh Baptisma la changlo te an ni.
August 6, Pathianni khan Darlawn Bialah Bialtu Pastor, Rev VL Hnemtluanga hovin, Bial Secretary Evan Ngurzikpuia, Bial Treasurer Evan Kananthara leh Bro. Mapiana te chuan Bial fangin, Ratu Melkawn leh Ratu Vengpui tlawhin Bial an fang kual a, Kohhran In tinah tawngtaina neiin hming ziak chhuah zel a ni a, Kohhranhote pawhin an lo lawm hle a ni. Ratu Vengpuiah hian kohhran dang atangin member pakhat chu kohhranan sengluh a ni.
———-
Hruaitute Programme:
Rev. VL. Hnemtluanga, District Missions Director chuan Pathianni hmang hian Kawlkulh Bial, Dulte hmunah Missions Evangelist rawngbawlna enpuiin rawngbawlna a nei ang.
———-
———-
NORTH MIZORAM DISTRICT
DISTRICT HRUAITUTE PROGRAMME
Superintendent & Secretary Programme: District Supdt Rev. Chhiarpuia leh Dist. Secy Rev. K. Lalduhsanga te chuan kohhran tul pawimawh tiin Aug ni 10 Ningani ah Kawnpui Bial Thingdawl-ah an kal ang.
Tun Pathianni lo awm tur Aug ni 13 hmang hian Dist. Supdt. Rev. Chhiarpuia chuan Zawlnuam Bial a tlawh ang. Zawlnuam Bial chhunga Kohhran hrang hrangte’n ama puala progamme an lo buatsaihah rawngbawlna neiin hun a hmang dawn a ni.
Secretary: District Secretary Rev. K. Lalduhsanga chu Dinthar Bial hmui tura District Board in hun engemaw chhung atana a ruat angin Bial chhung kohhrante a tlawh ang.
———-
NORTH MIZORAM DISTRICT SUPERINTENDENT IN A QUARTER A LUAH LUT, QUARTERS HLANNA INKHAWM HMAN A NI:
UPC-NEI, North Mizoram District Superintendent Rev. Chhiarpuia chuan Aug ni 1 khan District Board ruahman angin a quarters thar a luah lut.
Superintendent quarters luah luh thar hi kum 27 chhung zet harsatna avanga NEI-UPC ten an luah tawh loh niin; buaina leh harsatna chinfel a nih a, NEI-UPC in a ta ngai nei let tura Supreme court in harsatna a sutkian sak tak avangin, Building NMD Supt Quarters atana ruahman a nih angin Aug ni 1 khan luah luh a ni a, hemi ni vek chawhnu dar 3:00 Pm khan building hlan tawngtai inkhawm quarters luahluh tharah hian neih nghal a ni.
Inkhawm Rev. C. Lalthantluanga, Dist. Treasurer in a kaihruai a, Dist. Supt Rev. Chhiarpuia leh Dist. Secretary Rev. K. Lalduhsanga ten thu an sawi a, hemi bakah hian a duh apiang tana thusawi hun hawnah Rev. C. Lalramthanga, Dist. Missions Director, Rev. Lalremtluanga, Hqrs. Bial Pastor, Rev. R. Lalhmangaiha, Maubawk Bial pastor te atangin thusawi ngaihnawm tak tak ngaihthlak a ni bawk. Thusawi zawh hian rawngbawltu leh mipui pungkhawmte’n Supdt. Quarters luahluh thar building chu hlanin tawngtai a ni a chumi hnuah Rev. P. Vanlalfela Chaltlang Bialtu Pastor chuan Malsawm tawngtai neiin; quarters hlan inkhawm chu a tin ta a ni.
———-
2023 KUM CHANVE AUDIT TLUANG TAKIN NEI:
UPC, North East India, North Mizoram District chuan Aug ni 8 leh ni 9 khan District enkawlna hnuaia Account hrang hrang Sawmapakhat, Buhfaitham bakah North Mizoram District Level Department Missions Dept, Sunday School, LAD, PYD, Camping Centre leh Pentecostal Gateway Higher Secondary School te kum chanve chhunga sum lut leh chhuak te audit hna thawh a ni a, District auditors atana ruat
1. Rev. C. Lalrammuana
2. Evan. Dr. K.Vanlalhruaia
3. Upa JK Das ten audit hna hi an thawk a ni.
———-
HEADQUARTERS BIAL CRUSADE:
UPC North Mizoram District Hqrs. Bial te chuan Bial Conference in a lo rel tawh bawhzuiin Aug ni 4-6 Zirtawp zan atanga Pathianni zan thleng, Nursery Local-ah Revival Crusade an nei.
Revival Crusade-ah hian District Ram tlan Tirhkoh Evan. C. Lalruatsanga’n rawngbawlna neiin; team member thahnem ngai tak tak te nen hlim taka hun hman a ni.
Rawngbawlna neih chhung hian Pathian hnena inhlanthar tawngtai bakah Thlarau Thianghlim indil sak tawngtaina te neih a ni a, Kohhranhote zingah Thlaraua siamtharna chang mi engemaw zat an awm bawk.
———-
TANPUINA PE:
Chaltlang Bial Chanmari Kohhrante chuan Rengtekawn Gosen venga kohhran member dam lohna avanga Aizawl Civil Hospital a admit tanpui ngai an hriat chu khawngaih thilpek pea rawngbawl sakin hetiang hian kanna thilpek an pe
Missions Dept. – 5000
Kohhranpui – 2000
Mimal chibai na tangin – 7100
Total – 14100
Dam lo leh a chhungte hian an mangan lai leh mamawh lai taka hmangaih taka thilpek petu Chanchinri Kohhrante chungah thinlung takin lawmthu an sawi a ni.
Heti zat mai kan han dawng hi kan lawm takzet ani. Chanmari Kohhran hi chu Pathian malsawmna dawng tlak hian annung takzet ani. Chanmari Kohhran Lalpa’n malsawm zel rawh se.
———-
MITHAR NEIH REPORT
:
Kolasib Rengtekawn Bial New Builum Kohhranah Mithar neih a ni: Pathianni kal zan Aug ni 6 khan Kol. Rengtekawn Bial chhunga New Builum Kohhranah mi thar -1 sengluh a ni a, he mithar hi Bialtu Pastor Rev C.Lalthlengliana chuan Aug ni 6 bialtu Pastorin Lalpa Isua hmingin a lawm lut a, Inkhawm banah Sual ngaihdamna baptisma Lalpa Isua hmingin a chang nghal a ni.
———-
S.CHHIMLUANG HOME MISSIONS FIELD-AH MITHAR NEIH A NI:
Aug ni 6 khan North Mizoram District Missions Field S.Chhimluang Home Missions field ah mi thar -1 sengluh a ni a, he mithar hi Missionary Evan Hrangchhankhuma’n Lalpa Isua hmingin Pentecost kohhranah a lawm lut a, hemi ni hian Puitling -2 in Evan Hrangchhankhuma kutah Sual ngaihdamna baptisma Lalpa Isua hmingin an chang nghal a ni.
———-
LAWMLUHNA LEH BAPTISMA RAWNGBAWLNA NEI:
Pathianni kal ta Aug ni 6 khan Vairengte Bial State veng PP-ah mithar neih a ni. Member thar hi District rawih Missionary Evan. Vanrammawia’n lawmluhna neiin, Pathianni chawhma inkhawm ban ah sual ngaihdamna Baptisma rawngbawltu kutah hian a chang nghal a ni.
———-
RENGTEKAWN KOHHRAN RAMMUT MITHAR:
Kol. Rengtekawn Bial Regtekawn Kohhrana ten Rammut Programme an hman atangin mi thar -3 ( chhungkaw khat) Pentecost kohhranah sengluh an ni. Heng mithar te hi Aug ni 5 Inrinni zan khan Rengtekawn Bialtu Pastor Rev C.Lalthlengliana’n Lalpa Isua hmingin kohhranah a lawm lut a, Nau -1 hlan nghal niin , Puitling -2 in sual ngaihdamna baptisma Lalpa Isua hmingin an chang bawk a ni.
———-
KAWRTHAHAH MITHAR:
Rengdil Bial chhunga awm Kawrthah Preaching Point-ah Inrinni kal ta Aug ni 5 zan inkhawm ah mithar 1 Evan. ZD Lalhmangaihzuala’n Lalpa Isua hmingin Pentecost kohhranah a lawmlut a, kohhranhote’n he mithar hi an lo lawm hle a ni.
———-
Mithar 13 N Chhimluang PP ah lawmlut:
Aug ni 5 Inrinni Zan khan khan District kohhranpui hi rawngbawltu a dahna hmun Vairengte Bial, N. chhimluang P.P.-ah mithar duhawm tak tak Puitling 6 leh 7 chu Vairengte Bialtu Pastor Rev. Lalpianthanga’n United Pentecostal Church (NEI) kohhranah Lalpa Isua hmingin lawmluhna a nei a, Aug ni 6 khan Puitling 6 ten Sual ngaihdamna Baptisma Lalpa Isua hmingin an chang nghal a ni.
———-
WEST PHAILENG BIALin RAMMUT PROGRAMME HMANG:
West Phaileng Bial te chuan Rammut thla (August) chu Pathian ram tihzau ngei tuma hma lain Aug ni 7 Thawhṭan zan atanga tanin W. Phaileng Electric Veng Preaching Point ah Crusade an tan. Rammut Crusade-ah Bialtu Pastor K.Ainawna chu Speaker atan hman a ni a. Speaker hian Lal Isua hminga damna inkhawm buatsaihin Tui damdawi te siam a ni a, inkhawm chhungin Dam lo engemaw zat damna mamawh te pualin tawngtaina neiin Tui Dam dawite siam thin a ni.
Rammut Crusade buatsaih ah W. Phaileng Bial chhung Local hrang hrang atangin kohhran mipui an an fuankhawm tha thin hle bawk.
He Crusade hian Aug 7-13 thleng awh tura ruahmanna siam a ni a, August thla chhunga Pathianniah Mauchikawnah Chanchin tha famkim puanna Mual inkhawm neih an tum bawk. Phaileng Electrict kohhranah hian Dist rawih Missionary Evan H. Lalbiaktluanga’n a thut chilh mek a ni.
———-
MAMIT SS DEPT BUATSAIHIN AWARENESS CAMPAIGN NEIH A NI:
Mamit Bial Sunday School Department buatsaihin Dt.5th August 2023 khan Mamit S.P Conference Hall-ah Education and Anti-tobacco Awareness Campaign neih a ni a, Mamit Bial chhunga Naupang Sunday School atangin mi thahnem tak an tel.
Seminar hi hun hnih a thenin T.Upa Lalpianpuia, Bial Sunday School Department Director chuan kaihruaiin hun khatna Bro. VL Thansanga Palian, District Resource Person, Samaritan Society of Mizoram chu Resource Person ah hman a ni a, Education pawimawhna leh Career Guidance chungchang sawiin Naupang ten zirna kawnga an mamawh tur hrang hrang ngaihthlak a ni.
Hun hnihna ah hian National Tobacco Control Program te atangin hun an hmang a, Naupang te hnenah Zuk leh hmuam that loh zia te ngaihthlak a ni bawk. Awarenesss campaign neih kohhranhote’n an hlawkpui hle a ni.
———-
KAWRTHAH QUARTERS LUAH LUH A NI:
Zirtawpni kal ta Aug ni 4 khan kum tam tak chuan UPC-NEI in harsatna an tawh avanga an luah tawh loh Kawrthah quarters chu luah luh leh a ni.
He Quarters-ah hian District in Missionary atana a rawih Evan Zd Hmangaihzuala chu awm tura ruahmannin quarters hi NEI UPC ten an luah lohna a rei tawh avangin a cheibawl hna hun rei tak chhung thawh hmasak a ni a. Pathian remruat leh kaihhruaina duhawm tak hnuaiah Aug ni 4 Zirtawpni khan NEI UPC Quarters chu luah luh a nit a a ni.
Quarters luahluhna inkhawm hunserh hi khunkhan taka hmangin Rengdil Bialtu Pastor Rev. C. Laltlanchhuahan hun kaihruaiin thuchah tawi a sawi a. Quarters hlana tawngtai rual hman a ni bawk. He hunah hian Evan Zd Hmangaihzuala pawhin thutawi sawiin lawmthu sawina a nei a bawk.
Quarters luah luh inkhawmah hian Bial chhung atangain Bial level kohhran hruaitu pawimawh tak tak bakah kohhran member thahnem tak an tel bawk.
———-
———-
LUNGLEI DISTRICT
GOSPEL MEETING:
August ni 9 Ningani atanga August ni 11 Zirtawpni khan Christian Education Centre School chuan Gospel Meeting vawi 6-na an hmang.
He Gospel Meeting vawi 6-na hi School ah hman a ni a, Student-te hmun hnih ah then niin Speaker atan hian Cherhlun bialtu Pastor K.Lalnunpuia leh Thiltlang Home Missionary Evan.T.Biaklala te hman an ni a, an ni hnen atang hian Pathian thu bakah naupangte Thlarau an dawn theih nan zirtirna tha tak tak an pe a, Student ten an hlawkpui hle a, Thlarau dawng thar mi engemawzat an awm a ni.
———-
MI THAR 1 LAWMLUH A NI :
August ni 6 Pathianni khan Haulawng Lamṭhuamthum Local ah bialtu Pastor Lallawmsanga’n mi thar 1 Kohhran ah a lawmlut.
Facebook