North Mizoram District Conference vawi 67-na rorel angin April Ni 16 Pathianni khan North Mizoram Disrtrict chhunga Pastor Bial 29-na ni turin Damparengpui Bial thar hawn a ni.
Damparengpui Bial thar hawng tur hian North Mizoram District Superintendent Rev. C. Lalrammuana, Rev. Biaksangzuala AED Secretary, Rev. H.F Malsawma Sihphir Bial leh chhimtu dang te’n April ni 15 Inrinniah Aizawl an chhuah san a, zanah inkhawmna neiin Rev. H.F Malsawma’n thuhrilh rawngbawlna a nei. Bial thar ni mai tur Damparengpui kohhrante tan kohhran nihphung leh a enkawl dan tur thu pawimawh tak tak a sawi.
April ni 16 Pathianni dar 10:30-ah Damparengpui Biak inah bial thar hawn inkhawm neiin; Bial enkawl lailawka Pastor Incharge hna thawk tura ruat Evan. H. Lalrinpuia’n inkhawm a kaihruai a, Thusawina hun West Phaileng Bialtu Pastor Jakob Lalremsanga, Upa Vanlaldika Damparengpui te’n an nei. Thusawi hnuin Bial thar hawnna leh Certificate hlanna hun Rev. C. Lalrammuana District Superintendent North Mizoram District chuan a hmang. Bial thar hawn a nih hnu hian Damparengpui Upa Vanlaldika’n lawmthu sawiin “Kohhrante hian min thlahthlam lo ula, tih dan tha zawk te, kal dan tha zawkte min zirtir ula, keini pawhin theih tawp kan chhuah ve ang. Hetianga Bial thar hawng tur khawpa Pathian kohhranhoten min hmu hi ropui kan ti a, huphurh hle mah ila, keini Bru ho zingah hian Pathian chanchin tha dik puangchhuak turin kan kohvah Lalpan mawhphurhna min pe ah kan ngai a ni” a ti.
April 16 Pathianni zanah Rev. Biaksangzuala AED Secretary Damparengpui Field-a Missionary hna lo thawk tawh chuan rawngbawlna neiin; Pathian kohhranhote tan fuihna thu tha tak a sawi bawk.
Bial thar hawng tura kal mikhual zawng zawng te Upa Lalawmpuia, Upa Vanlaldika leh Damparengpui Church Board ten chawhlui an buatsaih sak a, April ni 17 thawhtanni khan West Phaileng Bialten chawhlui an lo buatsaih sak bawk.
Facebook