February 18, Inrinni hi North East India UPC kohhran kan Missionary hmasa ber Rev. Ellis Luther Scism a’n Mizoram a lo luh ni a ni a, he ni hi North East India UPC kohhran chuan kohhran ni pawimawhah ngaiin Office chawlhah a puang a. UPC General headquarters office, District office, kohhran zirna in, Book store leh hmun pawimawh dangte pawh khar a ni. Kumin hian Inrinnia a tlak avangin tualchhung kohhran hrang hrang ten mahni remchan dan angin an hmang ang.
Rev. Ellis Luther Scism-hian Pathian hnen atangin India rama Missionary tura kohna dawng in kum 1948 khan India ram a rawn lut a, rawngbawlna hna thawk char charin Adoor, Kerela-ah Bible School- dinin bul a tan a. Mizorama mi hlim hote nena rawngbawlmek R.A Doveri-te nen chuan inbe chhovin Dt.18.2.1950 (Inrinni)-ah khan Mizoram a rawn thleng a, hmun hrang hranga thlaru thianghlim hnathawh avanga tihduhdah leh nekchepna tuar te chu ho khawmin Dt. 19.2.1950 (Pathianni) ah UPC kohhranah hi an din ta a ni. He kohhrana Baptisma chang hmasa ber leh Pastor atana lak hmasa ber chu Pu Zakamlova a ni.
Tun dinhmunah North East India huamchhung baka thenawm ram leh State dangah te chanchin thar hril rawngbawlna hna thawkin ke a pen a. Kohhran din tirha member record hmasa ber kum 1950 ah member 3,000 niin tun dinhmunah hian North East India huamchhungah hian member Nuai khat chuang a ni ta a. Report bu thar bera a lan danin N.E India UPC huamchhungah hian District 11 a awm a, Missions Field 7-a enkawlin, kohhran (Local) 774 leh Preaching point 155 a nei mek a ni. India hmarchhak State hrang hrang bakah Odisha, Delhi, Kolkata, Andaman & Nicobar Island, Myanmar, Bhutan leh Bangladesh ramah Missionary tirin rawngbawlna hna a thawk a, kohhran tha tak dinin Myanmar UPC chu mahnia kea ding (Nationalised Church)a ni tawh.
Kohhran din tirh a nih atangin chhung leh pawn lam Thianghlimna ngaipawimawha hma lain ke a pen chho va, North East India huam chhunga Pulpit kaia thusawi rawngbawlna nei thei chin te chuan Zuk leh hmuam nghei a nih theihnan hma a la chho mek. Nu leh Pa neilo te tan Audrine Scism Children Home, Kolasib Khuangpuilamah dinin an tan School kalna tur Susane Downs Boarding School a din bawk. Tin, kum 1970 khan Uttar Pradesh-ah Pathian thu zirna Calvary Bible College (CBC) dinin kum 1973 ah Shillong, Meghalaya ah sawn a ni. Kum tinin Pathian rawngbawlna kawnga a tuimi thahnem takin an zir chhuak thin.
Tun dinhmuna kohhran dinhmun tlangpui :
1. Tualchhung kohhran awm zat : 774
2. Preaching Point awm zat : 155
3. Total Members :
- (a) Mipa – 49,808
- (b) Hmeichhia – 50,255
- Total – 100,063
4. No. of Missionaries Sponsored :
- (a) Mipa – 159
- (b) Hmeichhia – 5
- Total – 164
Facebook