Nov. 17, Ningani khan kum 2017 a Puitling Sunday School thuzir tur ‘Tirhkohte thiltih hrilhfiahna’ chu Pathian hnenah hlanin Rev. R. Lalrinsanga, General Secretary chuan a tlangzarh. He lehkhabu hi Rev. VL Dika Sailo, former General Superintendent ziah a ni.
He mi pual inkhawm tawi buatsaihah hian Kum 2017 atanga Naupang Sunday School Department lama bet tel tura General Sunday School Conference in a pass Doctrinal Department thuzirtur chu Rev. C. Lalmuanpuia ziah pawh Rev. Zohmingthanzama, General Treasurer in a released nghal. Rev. R. Laichhingpuia General Sunday School Director chuan inkhawm a kaihruai a. Rev. F. Lalchhanhima, Aizawl East District Sunday School Director in hunserh a hmang. Sunday School zirlai bu buatsaih dan leh report hrang hrang Rev. R. Vanlalawia, General Sunday School Secretary in a pe a, thuzir tur ziaktura rorelna in a ruat ten thahnemngai taka an tihhlawhtlin thin avanga lawmthu a sawi. Puitling thuzirtur ziaktu Rev. V.L Dika Sailo in a lehkhabu ziah dan chungchang leh a ziahdan kalphung sawiin, “He lehkhabu hi Sunday School a zir tur a nih piah lamah Pathian thuzir lai te tan pawh rintlak tak tura buatsaih a nia, Tirhkohte rawngbawl dan chungchang leh an hunlai khawvel lum let dan leh an inawp dan chungchang Bible in a tarlan vek loh chhui zauna leh hrilhfiahna hrang hrang te a tam thei ang ber tarlan a ni” a ti.
Rev. R. Lalrinsanga chuan “Tirhkohte Thiltih Hrialhfiahna bu tha tak mai puitlin a ni thei hi lawmawm em em a, Zawlnei leh Lal Isua ngei pawhin a Hrilhlawkna thu te a taka ngeia a thlen dan chungchang ziahna bu anih avangin Tirhkohte thiltih lehkhabu hi a hlu em em a, Thuthlung thar kohhran rawngbawlna bul tanna a nih avangin kohhran ten kan in en chianna tur bulpui awmkhawmna a ni a ti.
Kum 2017 atanga North East India UPC kohhran ten bung thar kan kaina tur Doctrinal Department zirlai tlangzarh tu Rev. Zohmingthanzama chuan “Puitling zir lai tuipui pha lo te tana Hruaituten remruatna fel tak nena Department thar siam a, lehkhabu zir tur tha tak an puitlin theih avangin Pathian leh hruaitute hnenah lawmthu a sawi a. Kohhran pawhin nasa takin hma a sawn ngei dawn a ni a ti a. Sual kawng zawh lova Pathian thu tak lama an nun kawng kaihhruai leh khalh a nih theihna turin kohhranin hma kan la zel dawn a ni” a ti bawk.
Lehkhabu released te hi Rev. Lalramzauva Sailo, North Mizoram District Sunday School Director in Pathian hnenah tawngtainain a hlan a. Upa K. Hranglawta, Editing Board member in hun tawpna tawngtaina a hmang. Lehkhabu hlanna inkhawm buatsaihah hian Sunday School Department Editing Board member, General Hqrs thawktute leh Aizawl khawpui chhung a District pahnih North Mizoram leh Aizawl East District hruaitute an kalkhawm.
Kum 2017 Sunday School thuzir bute hi District hrang hrangah thawnchhuah nghal a ni dawn a, Aizawl khawpui chhungah chuan Pentecostal Book Store Millenium Center bakah Aizawl East District Office leh North Mizoram District Office ah te lei theih a ni ang.
Facebook