UPCNEINEWSSERVICE NOV 11-17.2018
———-
Regional Director hovin Seminar :
November ni 8 atanga ni 11 chhung khan North East India UPC kohhran hruaitu, Executive Board member te chuan Thailand khawpui, Bangkok-ah Seminar an nei.
Bangkok ah hian November ni 7 leh ni 8 chhung khan UPCI Asia Cultural Experience Seminar- neih a ni a, he meeting pawimawhah hian North East India UPC aiawhin General Supreintendent Rev. Lalmalsawmna Sailo chu telin Asia khawmualpui chhunga ram hrang hrang aiawh UPC Kohhran hruaitu liante inhmuhkhawmna a ni a, inpawhna thazawk leh zau zawka rawngbawl theih dan tur ruahmanna hrang hrang siam chu he meeting neih chhan lian ber a ni.
Executive Board member te hian ni Nov ni 8, Ningani zing lam khan Bangkok hi tluang takin an thleng a, Asia Regional Director Rev. Lynden G. Shalm chuan India ram a rawn luh theih loh avangin seminar hi a neihpui a, Resources person-ah a tang a ni.
Seminar hi Bangkok Christian Guest House-ah neih a ni a, Nov 9, Inrinni atang khan seminar hi tanin Hongkong UPC Supt Rev.Stephen O’Donell ; Thailand & Cambodia Supt, Rev. Robert Frizzel; Rev. Allan Shalm leh a nau Rev. Lynden Shalm ten seminar-ah lecture an pe a. Frizzel-an – Personal Holiness sawiin Rawngbawltu nunah Thianghlimna hi a zung( root ), Dikna hi a rah ( fruit ) a ni, a ti.
Allan Shalm-an – Kan hmun nuam atanga kal chhuakin rawng i bawl ang u ( Let’s move out from our comfort zone ), tiin fuihna thu a sawi bawk.
Pakistan rama UPC bul lo intan dan te, Hongkong UPC kohhran chanchin leh report hrang hrang an pe bawk.
November 10, Inrinni khan Bangkok khawpui hmun hrang hrang tlawh kualin Bangkok pawn Pattaya Sea side an tlawh a, November 11, Pathianni khan Regional Director Rev Lynden Shalm-te nupa leh Rev. Allan Shalm-te nupa nen hun hmang ho lehin, Rev. Lynden Shalm-anI Kor 14:7&8 thu chhiarin – Ri fiah leh fel (clear sound ) i lantir ang u – a ti a, heng thil 3 hmang hian fuihna thuchah a sawi :
1. Thurin hi ( clear sound of Doctrine) fiah fai takin kan puang tur a ni.
2. Kan inpumkhatna a tha tur a ni (Clear sound of Unity). Inpumkhatna tha tak nen hma kan la tlang zel ang; kan hruaitute hnena intuk luh hi kan hna a ni a, kan ngaihdan chu a inang vek lo ang; malsawmna dawng tur chuan hruaituteah kan intulut tur a ni.
3. Pathian biakna thawm ri kan chhuah tur a ni (Clear sound of Worship) :
Pathian be thawm ri dik chuan kan lamah mite a hip a, chu thawm chuan mi thinlung a ti tap thei a ni, tiin fuihna thu pawimawh tak a sawi a ni.
Seminar-a kalte hian November ni 13, Thawhlehni khan dam takin Aizawl an thleng a, General hruaitu zinchhuak : Rev. Lalmalsawma Sailo, Rev. R. Lalrinsanga, Rev. Zohmingthanzama, Rev. R. Lalhawia, Rev. R. Laichhingpuia te pawhin Nov ni 14, Nilaini khan Office an kai chhunzawm leh nghal a ni.
Thailand ramah hian Billy Cole-anrawngbawlna bul a tan a, tun dinhmunah Bangkok khawpuiah Thai service leh English Service inkhawmna kan nei a, kohhran 5 leh preaching point 3 a awm. Thailand ram hmar lam, Bangkok atanga km 700 zeta hla Khang Ra-hmunah Bro. Coolbaugh-an rawng a bawl a, Bible school tha tak Kohhran hoten kan nei bawk.
Thailand ram hi Buddhist ram anih avangin rawngbawl a awlsam lo hlê mai a, Thai mi nihna leh Buddhism chu thil inzawm tlatah an ngai a, sakhaw danga inleh chu Thai mi nih lohna hialah an ngai a, rawngbawl a har hlê a ni. Tun dinhmunah hian Kohhran member 2,000 chuang an awmin, Ordination License 37, General License 15, Local licence 14 an awm mek a ni. Gen. Supt cum Missionary chu Rev. Robert Frizzel a ni.
He Seminar hi Global Missions Fund leh UPC NEI Fund tang kawpa buatsaih a ni a, seminar-a kal Executive Board member te hian hlawkthlak an tiin ramdanga Pentecost mite thahnemngaihna leh an rawngbawlna hna kalpui dan te chuan an thinlung a fuih thar hle tih an sawi a.
General suptd Rev. Lalmalsawma Sailo chuan Khawvel ramdang Pentecost mite nena thawh hona tha zawk neih zel leh; zau zawka Pathian Chhandamna thuthlung puanchhuah zel hi India hmarchhak Pentecost Kohhrante hmachhawp pawimawh tak a ni a ti.
—–
General Missions Board :
Ni hnih awh General Missions Board chu Nov 14 leh 15 chhung khan General Hqrs Office, Mualpui salem veng Aizawl ah neih a ni.
General Missions Board-ah hian kum 2019 General Missions Budget, Missions Field budget, Sawmapakhat budget System chiam chungchang, Recruitment rule ennawn, Thawktu promote leh appointment renew, transfer chungchang bakah Biak insak, repair, quarters sak leh fencing tura dilna lute an ngaihtuah dawn a, District hrang hrang atanga Agenda lut nen tun tum board ah hian Agenda hlawm lian 36 zet an ngaihtuah a ni. Chanchin buatsaih lai hian Board thuchuak kimchang hriat hman a nih loh avangin karleh pennet programme ah a tul angina tihchhuah a ni ang.
—–
Inthlan thuchah :
United Pentecostal Church of North East India Kohhran chuan kan hma lawk, November 28, 2018-a Mizoram MLA inthlanna lo awm turah Kohhran mipuite leh Political Party-te hnena ngenna leh thuchah a siam a. He thuchah leh ngenna hi mipui leh Political Party-ten ngai pawimawha zawmsak turin Pathian hmingin min ngen a ni.
Kohhran mipuite hnena thuchah :
1. Inthlan boruak hian rawngbawlna kawngah kohhran leh ringtu mimal nun a tichak lo thei a; chak loh phah nana hmang lo turin politics lama inhmangte pawh fimkhur ni se. Inkhawm leh kohhran thiltih dangahte inthlahdah lova tawngtaia Pathian pawlna tam tawk neih ni se.
2. Party tan lam inan loh avangin kohhranah pawh inrem lohna a awm thei tih hriain, thusawiah leh chetziaahte mi dang hliam lo turin fimkhur ila, kohhran chhungah leh Biakinah phei chuan Politics thil sawi hauh loh ni se.
3. Inthlannaa vote thlak hi khua leh tuite tih tur a nih avangin vote neite chuan vote thlak ngei a tha a. Chutih rualin vote pekna turah ngaihtuahna fim tak hmangin, zu leh mipat-hmeichhiatna kawnga nungchang tha lo leh bawlhhlawh te, mi duham leh hlemhle tak te, Kohhran tana hnawksak leh min thliar hrang tur chite chu ram rorelnaa tel tlak an ni lo va, eng Party ami pawh ni se thlan loh ni se.
4. Candidate-te hnenah therhlo leh hamthatna umin kohhran tumahin intiamkamna neihtir loh ni se.
5. Huai takin mahni vote duh zawng chu vote mai tur a ni a; mahni dikna chanvo leh zahawmna humhimin, therhlo leh sum leh paiin tuman vote hralh loh ni se.
Political party leh candidate-te hnena ngenna :
1. Ram hruaitu tha kan neih theih nan Candidate siamtu zawng zawngten Candidate atan pawl leh kohhran inenbikna awm lovin, Pathian tih mi, ruihtheih thil leh corruption-a fihlim, mipat-hmeichhiat kawnga hming hliau lo leh eng pawl leh eng mi pawh en hrang lo va, an harsatnaa tanpui duh mi thlang chhuak turin kan ngen a ni.
2. Tih puitlin theih loh tur hmanga mipui hnena inzuar lo va, ram leh hnam tana Party-in tih a tum dik tak sawia campaign tur te, tlin duh avanga hmanraw bawlhhlawh: hel pawl leh ralthuam lam chi hmang lo tur te, sum leh therhlo sem lo tur te leh hleihluak taka mimal leh pawl in sawichhiat tawn te, inelsen leh in auh nawmnahte ti lo turin kan ngen a ni.
3. Candidate zawng zawngte hnenah duhsakna kan hlan a. Thlan tlin member apiangte pawh term puitling hmang zo ngei turin duhsakna kan hlan a ni.
4. Thlan tlin apiangte chu anmahni thlangtu mipui leh roreltua ruattu Pathian zah chunga ram leh hnam tana rinawm taka hna thawk tur leh mimal hamthatna uma therhlo leh eng thil maha lei theiha awm lo turin kan ngen a ni.
———
Financial Campaign :
Lunglei District chhung, Bunghmun bial chuan Nov.18 Pathianni hmang hian Sesawm Vengchhak Local-ah financial Campaign an buatsaih dawn a, resource person atan bial hruaitute ruatin bial chhung Local tinah nei turin ruahmanna an siam a ni.
——
Rawngbawlin fehchhuak :
Lunglei District chhunga Tualchhung Kohhran hrang hrangte chuan tun Pathianni hmang hian heng hmunah te hian an fehchhuak ang :
1. Nov.17-18 chhung hian Chhipphir Local Missions Department-te chuan Serchhip Electric Local-ah rawngbawlin an fehchhuak dawn a, Speaker atan bialtu Pastor Rev.K.Lalchhuansanga chu an ruai ang.
2. Nov.16-18 chhung hian Sertlangpui Local LAD te chuan Mualthuam Venglai Local an tlawh dawn a, Speaker atan bialtu Pastor T.Zahmingliana chu an hmang ang.
3. Nov.17-18 hun hmang hian Venghlun Local PCD te chu Thuampui Local ah rawngbawlin an fehchhuak ang.
4. Nov.10-11 chhung khan Dawn Local-te chu Hnahthial Chanmari Local-ah rawngbawlin an fehchhuak a, member 20 vel kalin hlim takin hun an hmang a ni.
5. Nov.10-11 chhung vek khan Farm veng Local PYD member 40 vel chuan Hnahthial Venglai ah rawngbawlna an nei bawk a, hlim takin hun an hmang a ni.
——–
Joint Conference :
Nov.9-11 chhung khan Cherhlun bial LAD leh PYD Joint Conference vawi 40-na S.Chawngtui Local-ah hlim taka hman a ni a, Speaker atan Pangzawl bialtu Pastor R.Lalramhlua an ruai a, Pangzawl bial leh Serchhip bial atangin mi engemawzatin an tawiawm.
Theiriat bialtu Pastor Rev.R.Vanlalenga pawhin he Conference hi a hmanpui a ni. Nov.12 thawhtanni khan S.Chawngtui Joint LAD leh PYD bultumin lawmthusawi chawimawina neih a ni a, Theiriat bialtu pastor Rev.R.Vanlalenga chuan thusawi rawngbawlna a nei a ni.
———–
Nilengin tawngtai :
Nov.12 thawhtanni khan Lunglei District chhung, Mualthuam N Electric Local LAD te chuan heng thupui then hrang hrang pasarih (7) hmangin nilenga tawngtaina hun an buatsaih a, LAD member engemawzat bakah Tualchhung Kohhhran ruaituten telpuiin thlarau thianghlim awmpuina hnuaiah hlim takin hun an hmang a ni. An tawngtai thupui te :
i)Kohhranten thlarau thianghlim siam tharna kan chan theih nan
ii)Rawngbawltu leh Dept. Hruaitute tan.
iii)Biakin thleng phak lo te tan.
iv) Home Missionary te tan.
iv) Christmas Thlarau malsawmna nen a hman anih theih nan.
vi) Dist.PYD conf.kan dawl tur,Thlarau malsawmna nen hman anih theih nan.
vii) MLA Election lo awm tura Pathian duh dan anga,roreltu tur thlanchhuah an nih theih nan
————
Bial Missions Conference :
Nov.9-11 chhung khan Tlabung section Mission Conference chu Chawnpui Local-ah neih a ni a, Pathian thlarau awmpuina hnuaiah hlim takin hun an hmang. Speaker atan Putlungasih Home Missionary Evan Simona Hmaran ruai a ni.
Nov.10 inrinniah rorelna neih ani a, Conference rorel langsar zual te..
1. Kum 2019 chhung atan Member thar target 25 siam nise.
2. Kum 2019 chhung atan Bial Mission department buatsaihin Chawnpui Local ah Crusade buatsaih nise
3. Kum 2019 chhung a tan Bial Mission Department chuan Rs 12000 in misonary pakhat sapport/chawm ve nise.
4. Lunglei District chhunga kan Home Mission Field Pakhat tlawh tur nise.
————–
Mi thar :
Nov.11 Pathianni hmang khan Theiriat bial chhung Lungpuizawl local ah Evan C. Remruatkima chuan mithar 6 kohhranah a seng lut a, Evan C. Remruatkima hian sual ngaihdamna Baptisma a chan tir nghal a ni.
——-
Bial PYD Conference :
1. Nov ni 9 atanga ni 11 chhung khan Chhimtuipui District, Siaha Bial PYD te chuan Lawm chungin Lalpa rawngbawl ula tih thupui hmangin Conference vawi 34 na an hmang.
He Conference ah hian District Evangelist N.Thanghnuna, Bialtu Pastor.Rev.Kholy Hlychho leh Evan T.Vanlaltana President PYD ten thupui hmangin thuchah an sawi thin a . Inkhawmpui chhung Pathianni chawhnu ah Bialtu pastor kaltlangin sacrament leh kesil rawngbawlna a neia, kohhran ten an hlawkpui in zawngchhang thlak anti hle.
He khawmpui ah hian District LAD Choir, bial chhung local hrang hrang LAD zaipawl leh Mimal ten zai rawngbawlna annei thin a. District PYD Secretary T.Upa.H.Lalduhsanga chuan he khawmpui hi ahmanpui ani.
An Conference rorel thuchhuak langsar zual te :
1) Kum 2019 chhungin Siaha khawpui chhungah Thuthlung lam hawi Open air service buatsaih.
3) Siaha bial chhung local hrang hrang chanchin documentary lehkhabu siam.
4) Riasika hmunah work camp neih.
5) Thisen pek runpui buatsaih.
—
2. November ni 9 atanga ni 11 chhung khan AOC Local, Lawngtlai North bialah “Thlarauvah awm rawh u” tih thupuia hmangin inkhawmpui hlim taka hman a ni.
He khawmpui ah hian Evan.R.Vanchhunga speaker atana rawih a ni a, Nov ni 12, Thawhtanni khan inkhawmpui hi chhunzawmin Pathian hnena lawmthusawi chawimawina an buatsaiha a, Thlarau thianghlim awmpuina hnuaiah hlim takin hun an hmang.
———
Bial Revival Crusade :
Nov ni 8 atanga ni 11chhung khan Hmawngbu,Bungtlang South bial ah Bial huap Revival crusade buatsaih a ni.
Revival Crusade ah hian Dist.EvangelistEvan.Robert B.Lalnunsiama T chu speaker atana hman a ni a, kohhrante’n an hlawkpui hle. Crusade chhung hian Bialtu Pastor V.Lalhlimpui an mi pathum sual ngaihdamna baptisma a chantir a ni.
———–
Naupang Sunday School Inkhawmpui :
November ni16 atanga ni 17chhung hian Chhimtuipui District,Siahatla local ah bial chhung local hrang hrang Naupang sunday school Department inkhawmpui hman mek a ni.
He inkhawmpui ah hian Naupangte tan thu leh hla lamah in elna buatsaih bakah Tobacco Control society leh NRHM lam ten awaress annei bawk.
Intihsiakna hrang hrang Judge atan T.Upa.H.Lalduhsanga, T.Upa.V.Lalninghaka, Bro.L.Khaiu te an hmang a, Evan Robert.B.Lalnunsiama T chuan host in, T.Upa.N.Lalchhuanmawia leh Bro.J.Lalhriatchhunga te chu compiler anni.
————-
Mi thar :
Nov ni 11, Pathianni zan khan Meisatla ah Chhungkaw hnih Bro. Lalruatpuia te chhungkua leh Bro. Lalzawmliana te chhungkua chu Upa C.Kaphranga Local Chairman chuan Lalpa Isua hmingin Pentecost Kohhranah a senglut.
————
Joint Meet :
November 10 leh 11 chhung khan Aizawl East District Serchhip bial, Serchhip Dinthar bial leh Chhingchhip bial PYD te chuan Serchhip bial, Biakinpuiah Bial thum Joint meet hlawhtling takin an hmang.
Joint meet hi November 10, Inrinni zan atang khan hman tan niin T.Upa C.Lalchhuanmawia, Vice President, Chhingchhip bial PYD chuan inkhawm a kaihruai a, Dinthar bial PYD Zaipawl ten fak hla sa in T.Upa C.Malsawmsanga, Serchhip bial PYD President hnen atangin thuchah ngaihthlak a ni.
Pathianni Chawhma Inkhawm-ah Sis. R.Lalruatkimi, Serchhip bial PYD Fin.Secretary chuan tanna hun hmangin T.Upa H.Vanlalsanglura, Chhingchhip bial PYD President chuan thuchah a sawi thung a ni. Pathianni Chawhnu khan Biakin tual-ah Bro K.Lalrintluanga, Chhingchhip bial leh Bro Lalhruaitluanga, Serchhip bial te kaihhruaiin Fellowship hlimawm tak neih niin hetah hian Item hmuhnawm tak tak thlirho niin Health Department atangin Rilru hrisel tih thupui hmangin Awarness Campaign neih a ni bawk. Pathianni zan khan Serchhip bialtu Pastor, B.Lalengzauva chuan inkhawm kaihruaiin Bro.Thangluaia, Dinthar bial PYD Vice.President hnen atangin thuchah ngaihthlak a ni.
Serchhip bial, Serchhip Dinthar bial leh Chhingchhip bial PYD ten inpawhna tha zawk leh thawhhona tha zawk a awm theih nan tiin he Joint meet hi buatsaih niin kalkhawm te hian hlawkthlak an ti hle a ni.
———-
Silver Jubilee lawm :
November 10 leh 11 chhung khan Aizawl East District, Bazar Bial te chuan an Kum 25 tlin, Silver Jubilee an lawm.
Jubilee lawman hi Bial Hqrs. Bazar Biakinah hman niin November 10, Inrinni Chawhma Dar 11 khan Jubilee Dar vuaka bul tan a ni a, Bialtu Pastor lo ni tawhte, Tualchhung Church Board Hruaitute leh Bial OB ten Jubilee dar hi an vua a ni. I
nkhawm bialtu Pastor, Rev HL Thakunga chuan kaihruaiin Upa JH Rozawna, Bial Secretary hnen atangin inlawmna thu ngaihthlak a ni a, inhmelhriattirna a nei a. Jubilee Souvenir report, T.Upa Laldingliana hnen atangin ngaihthlak niin Rev VL Dika Sailo, Former Gen.Superintendent chuan Jubilee puala an Souvenir buatsaih chu a tlangzarhna.
Rev HL Dawngliana, Rev H Dingliana, Bialtu Pastor hmasaber bakah mi hrang hrang hnen atangin thusawi ngaihthlak niin tlaiah Jubilee ruai hlim takin Kohhran hoten an kilho a ni.
Bazar Bial ten an Kum 25-na, Silver Jubilee an lawmna-ah hian Inkhawm apiangin Bialtu Pastor lo ni tawhte bakah Bial Department hrang hrang hruaitute hnen atangin thusawi ngaihthlak thin a ni a, Pathianni Chawhnu khan Bialtu Pastor lo ni tawh leh Bial OB lo ni tawhte hnenah Citation hlanna hun an hmang bawk a ni.
Kum 1993 March 6-a Kolasib Town Hall-ah North Mizoram District Inkhawmpui neih chuan Bazar Bial hawn ni se a ti a, a Bial huam tur pawh ruahman fel nghalin March 31.1993, Nilai zan-ah Bazar Kohhran Biakin-ah Bial thar hawnna chu neih alo ni ta a ni. Bazar bial-ah hian a tirah chuan member 900 vel awmin tunah chuan member 1542 an awm mek a, Tualchhung Kohhran 6: Bazar, District Hqrs., Chhinga Veng, Armed Veng, Armed Veng South, Ramthar te awmin Bial chhungah License Holder mi 21, Upa 24 leh Tual Upa 16 an awm mek a, Bialtu Pastor mi 13 awm tawhin tunah hian Rev HL Thakunga chu Bialtu Pastor mawhphurhna chelhin aawm mek a ni.
———–
Revival Crusade :
1. Thuampui bial PYD te buatsaihin November 15, Ninga zan atang khan Thuampui Biakin-ah Revival Ctrusade hman mek a ni a, Speaker-atan , District PYD President Rev R.Laltlankima an ruai.
2. Bawngkawn Kohhran chuan November 14, Nilai zan atang khan Revival Crusade buatsaihin Sis.Mary Lalnunsangi B/W Speaker-ah an hmang a, Bro.Lalnghakmawia te chhungkua chuan November 18, Pathianni hian Pathian hnena lawmthusawi chawimawina an nei dawn a ni.
———-
Kumtawp Board :
Aizawl East District Sunday School Department chuan November 21, Nilaini hian District Committee room-ahDistrict Sunday School Board an nei dawn a. District PYD Kum tawp Board pawh ruahmanna ang chuan November 30, Zirtawpni hian District Committee room-ah neih ang.
———-
Biak In hawng :
November 17, Inrinni khan Darlawn Biakin sak thar chu Rev R.Lalrinsanga, General Secretary chuan UPC- North East India Biakin pakhat ni turin Pathian hnenah hlanin a hawng.
Biakin hawnna hunah hian Bialtu Pastor lo ni tawhte bakah Bial chhung atang leh he Kohhrana lo lawi tawh mi engemaw zatin an telpui a ni. Darlawn Biakin hi a dung ft 60 leh a vang ft 28 aliana sak a ni. Tunah hian Rev T.Lalbiakliana chu Bialtu Pastor-a awm mekin Kohhran member 140 chuang an awm mek a ni.
———-
Theological Campaign :
Aizawl East District, Serchhip Bial PYD Kumpuan Committee te hmalakna in November 12, Thawhtan zan khan Serchhip Biakinpui-ah Theological Campaign buatsaih a ni.
He hunah hian Bro.Lalnunrimtuia Varte, Bial PYD Kumpuan OB Incharge hnen atangin thusawi ngaihthlak a ni. Serchhip bial te hian PYD Member zingah Pathian thu zir bakah Pathian thuah thanlenna an neih theih nan Theological Campaign hi Tualchhung hrang hrangah an lo nei tawh a, Seminar te buatsaihin hlawk takin hun an lo hmang tawh thin a ni.
————
Mi thar :
November 11, Pathianni khan Hnahlan bial, N.Diltlang hmunah mithar pakhat Kohhranah sengluh a ni. N.Diltlang hmunah hian Evan Lalamena, District FullTime Evangelist chuan tunah hian rawngbawlna a nei mek a ni.
———-
Aizawl East District Hruaitute Programme:
Rev Rosanga Kawlni, District Superintendent chuan Suangpuilawn Bial, Vanbawng hmuna November 17, Inrinni-a rawngbawltute puala Seminar-ah Resource person-ah tangin Pathianni zan thleng hian rawngbawlna a nei ang.
Rev Biaksangzuala, District Secretary chuan Shillong-a Department hrang hrang OB te puala Seminar buatsaihah Resource Person-ah tangin rawngbawlna a nei a, ruahmanna ang chuan Thawhtanni-ah Aizawl a let ang.
Rev R.Lianzama, District Missions Director leh Evan Lalramzauva, Secretary te chuan Champhai Bethel bial-ah rawngbawlna nei turin Zirtawpni khan an kal a, Pathianni zan thleng hun hmangin ruahmanna ang chuan Thawhtanni-ah Aizawl an kir ang.
——–
Rawngbawlin fehchhuak :
Zemabawk bial LAD te chuan Nov ni 9 atanga ni 11 chhung khan bus pahnih hmang in suangpuilawn bial LAD te tlawhin Suangpuilawn Kohhranah rawngbawlna an nei.
Inrinni chhunah, Thilpek tih thupuia hmang in seminar an buatsaih a, resource person ah District LAD Treasurer Sis Lalramliani Sailo chu an hmang. Hun hmang tute :
Inrinni zan Tantu – Sis. Laltlanchhungi.Airfield.
Thuhriltu – Sis. Lalhmingmawii Bial LAD Fin secretary
Sunday Zing tantu -C.Lalrammawii.Zemabawk Vengpui LAD president
Thuhriltu – Sis. Lalramsangi.President.Zemabawk Bial LAD.
Chawhnu Tantu-Lalsawmliani.Bethel Veng
Thuhriltu – Sis. C.Rothangi.zemabawk
Pathianni zan tantu-Hrangthankungi.M/s veng
Thuhriltu – Sis C.Remchhungi.V.president.
Zemabawk bial LAD te hian suangpuilawn kohran tan baptisma khur siamna tur leh tuizem(sintex) man tur cheng singhnih an pe a, Suangpuilawn Kohhran hote an lawm hle a ni.
——-
Dimapur Missions Field tlawh :
I.T.I veng PYD te chuan October ni 30 atanga Nov ni 6 chhung khan Dimapur Missions Field ah rawngbawlna neiin an fehchhuak.
October ni 30, Thawhlehni khan Dimapur mission field hi an thleng a, member 14 an fehchhuak a ni. Field chhunga Kohhran 5 ah inkhawm kualin,PYD President Bro. Lallawmzuala Parte, Vice President Bro. C. Vanlalhmangaiha leh Bro. Johana ten thusawi rawngbawlna an inneih chhawk thin a, an inkhawmna hmun apiang ahKohhran hote tanpuina thilpek (pawisa fai) an hlan zel a, inkhawmpui bakah Biak in leh a vel te, Pastor qtrs. te tifaiin an hnatlang thin bawk. He Project an buatsaihna chhan hi Missions rawngbawlna a tak ngeia hmuh an duh vang leh Thalaite fuih tharna atan niin thalai kalchhuakte hian an hlawkpui hle a ni.
Field director Pastor James Lawrence zote in kawng engkim ah a lo buaipuinaah an lawm hle a ni.
Facebook