October 28-30 chhung hian UPC-NEI hnuaia District Missions Conference, District pathum (3)- Chhimtuipui District, Aizawl East District leh N. Mizoram District te chuan an nei dawn.
Chhimtuipui District, Lawngtlai Bazar Kohhran leh Lawngtlai North Bial Kohhran ten an thleng dawn a, Biak In zauh hna thla khat chuang thawk tawhin chhun zan zawmin inbuatsaihna an kalpui a, Bial hrang hrang atangin mikhual tam tak kal turin an beisei a ni.
Aizawl East District chuan Ngopa-ah District Missions Conference an thleng dawn a, inbuatsaihna a nasa tawh hle a, Pandal a hran in sak a ni a, mikhual sem chungchangah Ngopa YMA ten hma an la dawn a, thlarau thianghlim hruaina hnuaiah inkhawmpui an hman theih nan thlarau beiseina neitu zawng zawng te an sawm a ni. Inkhawmpui thupui atan hian “Chanchintha hi hril rawh u” Marka 16:15 chu hman a ni dawn a, thupui hmang hian Speaker hrang hrang Evan R.Vanchhunga, Rev Rohmingliana, Rev R.Lalhawia, Rev Vanlalfela Ramtiam leh Rev Darchhawna te hnen atangin thusawi ngaihthlak thin a ni dawn a ni. October 29, Inrinni hian rorel inkhawm Hqrs. Biak In-ah neih a ni anga, Rorel velo te tan Pandal hmunah vantlang Inkhawm neih tur niin Speaker atan Evan J.Lalhmingsanga hman a ni dawn a ni.
North Mizoram District Missions Conference chu Dinthar Bial ten an thleng dawn a, Biak Inah hman tur a ni a. Biak In kawtah leh a theih ang angin pandal zar a zauh hna thawh a ni. He khawmpui hi Aizawl khawpui chhung a nih avangin Thlarau Thianghlim beiseina neitu ten tih tak zet a he inkhwmpui ah hlawkna an chan theih nan khawpui chhunga Kohhran member leh a chhim duh a piangte an sawm tak meuh meuh a ni.
DISTRICT MISSIONS EXECUTIVE NEIH A NI
1. Oct. ni 10 Thawhtanni khan North Mizoram District Missions Executive Committee chu District Office Supdt. Chamber-ah Rev. K. Lalduhsanga Mission Director Kaihhruaiin neih a ni a, an rorel pawimawh zingah Arunachal Missions Field Dharka-a Biak hmun lei sak te, Assam Missions Field-a Milanpur, Kiraki leh Nepalpara-a Biak In sak te leh District Missions Conference October thla tawpa neih turah Conference Resolution Committee Oct. Ni 19 Nilaini-a neih tur chungchang te an sawi ho va, Executive Committee hi District hruaituten an tawiawm bawk a ni.
2. October 19, Nilaini khan Aizawl East Disrtict Director Room-ah District Missions Executive Board neih a ni. He hun hi Rev Darchhawna, Missions Director chuan kaihruaiin hunserh Rev Rosanga Kawlni, District Superintendent chuan a hmang a ni. Rev Darchhawna chuan Kumin kum kallai meka General Missions Budget an tlak theih tur thu a sawi. He hunah hian Ngopa-a District Missions Inkhawmpui atana thil pawimawh chi hrang hrang bakah agenda lut hrang hrangte thlir ho in programme hman dan tur tlangpui te pawh thlir hona an nei bawk a ni.
Facebook